ପିଏମଇଣ୍ଡିଆ

ମୁଁ ମୋର ଭାଷଣ ଆରମ୍ଭ କରିବା ପୂର୍ବରୁ ଆପଣ ସମସ୍ତଙ୍କୁ ଅନୁରୋଧ କରିବାକୁ ଚାହେଁ, ଆପଣମାନେ ଯେଉଁଠି ବି ଅଛନ୍ତି, ସେହିଠାରେ ଆପଣଙ୍କ ସ୍ଥାନରେ ବସନ୍ତୁ, ଠିଆ ହେବାର ଆବଶ୍ୟକତା ନାହିଁ, ଆମେ ୨୨ ତାରିଖରେ ଯେଉଁ ପରିବାରବର୍ଗଙ୍କୁ ହରାଇଛୁ ସେମାନଙ୍କୁ ଶ୍ରଦ୍ଧାଞ୍ଜଳି ଦେବା ପାଇଁ କିଛି ସମୟ ନିଜ ସ୍ଥାନରେ ବସିରହି ନିରବତା ଅବଲମ୍ବନ କରି, ନିଜ ନିଜ ଦେବତାଙ୍କୁ ସ୍ମରଣ କରି ସେ ସମସ୍ତଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିବା।  ଏହା ପରେ ମୁଁ ଆଜି ମୋର ଭାଷଣ ଆରମ୍ଭ କରିବି।

ଓମ୍ ଶାନ୍ତି-ଶାନ୍ତି-ଶାନ୍ତି।

ବିହାର ରାଜ୍ୟପାଳ ଆରିଫ ମହମ୍ମଦ ଖାନ୍ ଜୀ, ଏଠାକାର ଲୋକପ୍ରିୟ ମୁଖ୍ୟମନ୍ତ୍ରୀ, ମୋର ବନ୍ଧୁ ନୀତୀଶ କୁମାର ଜୀ, ମଞ୍ଚରେ ଉପସ୍ଥିତ ଅନ୍ୟ ସମସ୍ତ ବରିଷ୍ଠ ବ୍ୟକ୍ତି ଏବଂ ବିହାରର ମୋର ପ୍ରିୟ ଭାଇ ଭଉଣୀମାନେ।

ଆଜି ପଞ୍ଚାୟତିରାଜ ଦିବସ ଅବସରରେ ସମଗ୍ର ଦେଶ ମିଥିଲା ସହ ଯୋଡ଼ି ହୋଇ ରହିଛି, ବିହାର ସହ ଯୋଡ଼ି ହୋଇଛି। ଆଜି ଏଠାରେ ଦେଶ ଓ ବିହାରର ବିକାଶ ସହ ଜଡ଼ିତ ହଜାର ହଜାର କୋଟି ଟଙ୍କାର ପ୍ରକଳ୍ପର ଶିଳାନ୍ୟାସ ଓ ଉଦଘାଟନ କରାଯାଇଛି। ବିଜୁଳି, ରେଳବାଇ, ଭିତ୍ତିଭୂମିର ଏହି ବିଭିନ୍ନ କାର୍ଯ୍ୟ ବିହାରରେ ନୂତନ ନିଯୁକ୍ତି ସୁଯୋଗ ସୃଷ୍ଟି କରିବ । ଆଜି ହେଉଛି ଜାତୀୟ କବି ରାମଧାରୀ ସିଂ ଦିନକରଙ୍କ ଶ୍ରାଦ୍ଧ ବାର୍ଷିକୀ । ମୁଁ ତାଙ୍କୁ ମୋର ବିନମ୍ର ଶ୍ରଦ୍ଧାଞ୍ଜଳି ଅର୍ପଣ କରୁଛି ।

ବନ୍ଧୁଗଣ,

ବିହାର ହେଉଛି ସେହି ଭୂମି ଯେଉଁଠାରୁ ପୂଜ୍ୟ ବାପୁ ସତ୍ୟାଗ୍ରହର ମନ୍ତ୍ର ପ୍ରସାର କରିଥିଲେ। ପୂଜ୍ୟ ବାପୁ ଦୃଢ଼ ଭାବରେ ବିଶ୍ୱାସ କରୁଥିଲେ ଯେ ଯେପର୍ଯ୍ୟନ୍ତ ଭାରତର ଗାଁ ଗୁଡ଼ିକର ବିକାଶ ନହେବ, ଭାରତ ଦ୍ରୁତ ଗତିରେ ବିକାଶ କରିପାରିବ ନାହିଁ । ଦେଶରେ ପଞ୍ଚାୟତିରାଜ ଧାରଣା ପଛରେ ଏହି ଭାବନା ରହିଛି। ଗତ ଦଶନ୍ଧି ମଧ୍ୟରେ ପଞ୍ଚାୟତଗୁଡ଼ିକୁ ସଶକ୍ତ କରିବା ପାଇଁ ଗୋଟିଏ ପରେ ଗୋଟିଏ ପଦକ୍ଷେପ ନିଆଯାଇଛି। ବୈଷୟିକ ଜ୍ଞାନକୌଶଳ ମାଧ୍ୟମରେ ପଞ୍ଚାୟତଗୁଡ଼ିକୁ ସଶକ୍ତ କରାଯାଇଛି। ଗତ ଦଶନ୍ଧି ମଧ୍ୟରେ ୨ ଲକ୍ଷରୁ ଅଧିକ ଗ୍ରାମ ପଞ୍ଚାୟତକୁ ଇଣ୍ଟରନେଟ୍ ସଂଯୋଗ କରାଯାଇଛି। ଗାଁ ଗାଁରେ ସାଢେ ୫ ଲକ୍ଷରୁ ଅଧିକ କମନ୍ ସର୍ଭିସ୍ ସେଣ୍ଟର ନିର୍ମାଣ କରାଯାଇଛି। ପଞ୍ଚାୟତଗୁଡ଼ିକ ଡିଜିଟାଲ ହେବାର ଆଉ ଏକ ଲାଭ ରହିଛି। ଜୀବନ-ମୃତ୍ୟୁ ପ୍ରମାଣପତ୍ର, ଜମି ମାଲିକାନା ପ୍ରମାଣପତ୍ର ଏବଂ ଏଭଳି ଅନେକ ଦସ୍ତାବିଜ ସହଜରେ ମିଳିପାରିବ। ସ୍ୱାଧୀନତାର ଅନେକ ଦଶନ୍ଧିପରେ ଦେଶକୁ ନୂଆ ସଂସଦ ଭବନ ମିଳିଥିବା ବେଳେ ଦେଶରେ ୩୦ ହଜାର ନୂଆ ପଂଚାୟତ କୋଠା ମଧ୍ୟ ନିର୍ମାଣ ହୋଇଥିଲା । ପଂଚାୟତଗୁଡ଼ିକ ଯେପରି ପର୍ଯ୍ୟାପ୍ତ ପାଣ୍ଠି ପାଇବେ ତାହା ସୁନିଶ୍ଚିତ କରିବା ମଧ୍ୟ ସରକାରଙ୍କ ପ୍ରାଥମିକତା ରହିଛି। ଗତ ୧୦ ବର୍ଷରେ ପଞ୍ଚାୟତଗୁଡିକ ୨ ଲକ୍ଷ କୋଟିରୁ ଅଧିକ ଟଙ୍କାର ପାଣ୍ଠି ପାଇଛନ୍ତି । ଏହି ସମସ୍ତ ଅର୍ଥ ଗାଁର ବିକାଶରେ ବିନିଯୋଗ କରାଯାଇଛି।

ବନ୍ଧୁଗଣ,

ଗ୍ରାମ ପଞ୍ଚାୟତର ଆଉ ଏକ ପ୍ରମୁଖ ସମସ୍ୟା ହେଉଛି ଜମି ବିବାଦ। କେଉଁ ଜମିରେ ଜନବସତି ଥିଲା, କେଉଁଟି ଚାଷ ଜମି, କେଉଁଟି ପଞ୍ଚାୟତ ଜମି, କେଉଁଟି ସରକାରୀ ଜମି ତାହାକୁ ନେଇ ବାରମ୍ବାର ବିବାଦ ହେଉଥିଲା। ଏହାର ସମାଧାନ ପାଇଁ ଜମିକୁ ଡିଜିଟାଇଜ୍ କରାଯାଉଛି। ଜମି ରେକର୍ଡର ଡିଜିଟାଇଜେସନ୍ ଅନାବଶ୍ୟକ ବିବାଦର ସମାଧାନ କରିବାରେ ସହାୟକ ହୋଇଛି।

ବନ୍ଧୁଗଣ,

ଆମେ ଦେଖିଛୁ ଯେ ପଞ୍ଚାୟତଗୁଡିକ କିପରି ସାମାଜିକ ଅଂଶଗ୍ରହଣକୁ ସଶକ୍ତ କରିଛନ୍ତି । ବିହାର ହେଉଛି ଦେଶର ପ୍ରଥମ ରାଜ୍ୟ ଯେଉଁଠାରେ ଏଥିରେ ମହିଳାମାନଙ୍କୁ ୫୦ ପ୍ରତିଶତ ସଂରକ୍ଷଣ ପ୍ରଦାନ କରାଯାଇଛି ଆଉ ତେଣୁ ମୁଁ ନୀତୀଶଜୀଙ୍କୁ ଅଭିନନ୍ଦନ ଜଣାଉଛି। ଆଜି ବିହାରରେ ଗରିବ, ଦଳିତ, ମହାଦଳିତ, ପଛୁଆ ଓ ଅତ୍ୟନ୍ତ ପଛୁଆ ସମ୍ପ୍ରଦାୟର ବହୁ ସଂଖ୍ୟକ ଭଉଣୀ ଓ ଝିଅ ଜନପ୍ରତିନିଧି ଭାବେ କାର୍ଯ୍ୟ କରୁଛନ୍ତି ଏବଂ ଏହା ହିଁ ପ୍ରକୃତ ସାମାଜିକ ନ୍ୟାୟ, ଏହା ହିଁ ପ୍ରକୃତ ସାମାଜିକ ଭାଗିଦାରୀ । କେବଳ ସର୍ବାଧିକ ଅଂଶଗ୍ରହଣ ଦ୍ୱାରା ଗଣତନ୍ତ୍ର ସମୃଦ୍ଧ ଓ ସୁଦୃଢ଼ ହୋଇଥାଏ। ଏହି ଚିନ୍ତାଧାରାକୁ ଦୃଷ୍ଟିରେ ରଖି ଲୋକସଭା ଓ ବିଧାନସଭାରେ ମହିଳାଙ୍କ ପାଇଁ ୩୩ ପ୍ରତିଶତ ସଂରକ୍ଷଣ ଆଇନ ମଧ୍ୟ ପ୍ରଣୟନ କରାଯାଇଛି। ଦେଶର ପ୍ରତ୍ୟେକ ରାଜ୍ୟର ମହିଳାମାନେ ଏଥିରୁ ଉପକୃତ ହେବେ, ଆମର ଭଉଣୀ ଓ ଝିଅମାନେ ଅଧିକ ପ୍ରତିନିଧିତ୍ୱ ପାଇବେ।

ବନ୍ଧୁଗଣ,
ଦେଶରେ ମହିଳାଙ୍କ ଆୟ ବୃଦ୍ଧି ଏବଂ ରୋଜଗାର ଓ ସ୍ୱରୋଜଗାର ପାଇଁ ନୂଆ ସୁଯୋଗ ସୃଷ୍ଟି କରିବା ପାଇଁ ସରକାର ମିଶନ ମୋଡରେ କାମ କରୁଛନ୍ତି। ବିହାରରେ ଚାଲିଥିବା ଜୀବିକା ଦିଦି କାର୍ଯ୍ୟକ୍ରମ ଅନେକ ଭଉଣୀଙ୍କ ଜୀବନରେ ପରିବର୍ତ୍ତନ ଆଣିଛି। ଆଜି ହିଁ ବିହାରର ଭଉଣୀମାନଙ୍କର ସ୍ୱୟଂ ସହାୟକ ଗୋଷ୍ଠୀକୁ ପାଖାପାଖି ଏକ ହଜାର କୋଟି ଟଙ୍କାର ସହାୟତା ପ୍ରଦାନ କରାଯାଇଛି। ଏହା ଭଉଣୀମାନଙ୍କ ଆର୍ଥିକ ସଶକ୍ତୀକରଣକୁ ଆହୁରି ବଢ଼ାଇବ। ଏହା ଦ୍ୱାରା ଦେଶରେ ୩ କୋଟି ଲକ୍ଷପତି ଦିଦି ସୃଷ୍ଟି କରିବାର ଲକ୍ଷ୍ୟ ହାସଲରେ ସହାୟକ ହେବ।

ବନ୍ଧୁଗଣ,

ବିଗତ ଏକ ଦଶନ୍ଧି ମଧ୍ୟରେ ଗ୍ରାମୀଣ ଅର୍ଥନୀତି ନୂଆ ଗତି ହାସଲ କରିଛି। ଗାଁରେ ଗରିବଙ୍କ ପାଇଁ ଘର ତିଆରି ହୋଇଛି, ରାସ୍ତା ନିର୍ମାଣ ହୋଇଛି, କଂକ୍ରିଟ ରାସ୍ତା ତିଆରି ହୋଇଛି। ଗାଁ-ଗାଁରେ ଗ୍ୟାସ୍ ସଂଯୋଗ ଦିଆଯାଇଛି, ପାଣି ସଂଯୋଗ ଦିଆଯାଇଛି, ଶୌଚାଳୟ ନିର୍ମାଣ କରାଯାଇଛି। ଏଭଳି ପ୍ରତ୍ୟେକ କାର୍ଯ୍ୟ ମାଧ୍ୟମରେ ଲକ୍ଷ ଲକ୍ଷ ଟଙ୍କା ଗାଁରେ ପହଞ୍ଚିଛି। ନୂତନ ନିଯୁକ୍ତି ସୁଯୋଗ ମଧ୍ୟ ସୃଷ୍ଟି ହୋଇଛି। ଶ୍ରମିକଙ୍କଠାରୁ ଆରମ୍ଭ କରି କୃଷକ ଓ ଗାଡ଼ି ଚାଳକଙ୍କଠାରୁ ଆରମ୍ଭ କରି ଦୋକାନୀ ପର୍ଯ୍ୟନ୍ତ ସମସ୍ତଙ୍କୁ ରୋଜଗାରର ନୂଆ ସୁଯୋଗ ମିଳିଛି। ଏହା ଦ୍ୱାରା ସମାଜ ସବୁଠାରୁ ଅଧିକ ଲାଭବାନ ହେଉଛି, ଯାହା କି ପିଢ଼ି ପିଢ଼ି ଧରି ବଞ୍ଚିତ ଥିଲା। ମୁଁ ଆପଣଙ୍କୁ ପିଏମ ଆବାସ ଯୋଜନାର ଉଦାହରଣ ଦେବି। ଏହି ଯୋଜନାର ଉଦ୍ଦେଶ୍ୟ ହେଉଛି ଦେଶର କୌଣସି ଗରିବ ପରିବାର ବାସହୀନ ନ ହୁଅନ୍ତୁ, ସମସ୍ତଙ୍କ ମୁଣ୍ଡ ଉପରେ ଏକ କଂକ୍ରିଟ ଛାତ ରହିବା ଉଚିତ। ଏବେ ଯେତେବେଳେ ମୁଁ ଏହି ମା’ ଭଉଣୀମାନଙ୍କୁ ଘରର ଚାବି ଦେଉଥିଲି, ସେମାନଙ୍କ ମୁହଁରେ ଦେଖାଯାଉଥିବା ସନ୍ତୋଷ, ସେମାନଙ୍କ ଭିତରେ ଦେଖାଯାଉଥିବା ନୂତନ ଆତ୍ମବିଶ୍ୱାସ ପ୍ରକୃତରେ ଏହି ଗରିବ ଲୋକଙ୍କ ପାଇଁ କାମ କରିବା ପାଇଁ ପ୍ରେରଣାର କାରଣ ପାଲଟିଥିଲା। ଆଉ ଏହି ଲକ୍ଷ୍ୟକୁ ଦୃଷ୍ଟିରେ ରଖି ଗତ ଦଶନ୍ଧିମଧ୍ୟରେ ୪ କୋଟିରୁ ଅଧିକ କଂକ୍ରିଟ ଘର ନିର୍ମାଣ କରାଯାଇଛି। ବିହାରରେ ମଧ୍ୟ ଏପର୍ଯ୍ୟନ୍ତ ୫୭ ଲକ୍ଷ ଗରିବ ପରିବାର ପକ୍କା ଘର ପାଇଛନ୍ତି। ଗରିବ, ଦଳିତ, ପଛୁଆ ଓ ଅତ୍ୟନ୍ତ ପଛୁଆ, ପସମାଣ୍ଡା ପରିବାର ଏବଂ ଏଭଳି ସମାଜର ବଞ୍ଚିତ ପରିବାରକୁ ଏହି ଘର ଦିଆଯାଇଛି। ଆଗାମୀ ବର୍ଷଗୁଡ଼ିକରେ ଗରିବଙ୍କୁ ଆହୁରି ୩ କୋଟି କଂକ୍ରିଟ୍ ଘର ଦିଆଯିବ। ଆଜି ହିଁ ବିହାରର ପ୍ରାୟ ଦେଢ଼ ଲକ୍ଷ ପରିବାର ନୂଆ ପକ୍କା ଘରେ ପ୍ରବେଶ କରୁଛନ୍ତି। ସାରା ଦେଶରେ ୧୫ ଲକ୍ଷ ଗରିବ ପରିବାରକୁ ନୂତନ ଘର ନିର୍ମାଣ ପାଇଁ ମଞ୍ଜୁରୀ ପତ୍ର ମଧ୍ୟ ଦିଆଯାଇଛି । ଏମାନଙ୍କ ମଧ୍ୟରୁ ସାଢ଼େ ୩ ଲକ୍ଷ ହିତାଧିକାରୀ କେବଳ ଆମ ବିହାରର। ଆଜି ହିଁ ପ୍ରାୟ ୧୦ ଲକ୍ଷ ଗରିବ ପରିବାରଙ୍କୁ ପକ୍କା ଘର ପାଇଁ ଆର୍ଥିକ ସହାୟତା ପଠାଯାଇଛି। ଏଥିରେ ବିହାରର ୮୦ ହଜାର ଗ୍ରାମୀଣ ପରିବାର ଏବଂ ୧ ଲକ୍ଷ ସହରାଞ୍ଚଳ ପରିବାର ଅନ୍ତର୍ଭୁକ୍ତ।

ବନ୍ଧୁଗଣ,

ଗତ ଦଶନ୍ଧି ହେଉଛି ଭାରତର ଭିତ୍ତିଭୂମିର ଦଶନ୍ଧି। ଏହି ଆଧୁନିକ ଭିତ୍ତିଭୂମି ବିକଶିତ ଭାରତର ଭିତ୍ତିଭୂମିକୁ ସୁଦୃଢ଼ କରୁଛି। ପ୍ରଥମ ଥର ପାଇଁ ଦେଶର ୧୨ କୋଟିରୁ ଅଧିକ ଗ୍ରାମୀଣ ପରିବାରଙ୍କ ଘରେ ଟ୍ୟାପ୍ ପାଣି ପହଞ୍ଚିଛି। ଅଢ଼େଇ କୋଟିରୁ ଅଧିକ ଘରେ ବିଜୁଳି ସଂଯୋଗ ପହଞ୍ଚିଛି। ଯେଉଁମାନେ କେବେ ବି ଗ୍ୟାସ୍ ଚୁଲାରେ ରୋଷେଇ କରିବାକୁ ଭାବି ନଥିଲେ ସେମାନଙ୍କୁ ଗ୍ୟାସ୍ ସିଲିଣ୍ଡର ମିଳିଛି। ଆପଣ ନିକଟରେ ଏହି ଖବରଟି ନିଶ୍ଚୟ ପଢିଥିବେ । ଲଦାଖ ଏବଂ ସିଆଚେନରେ, ଯେଉଁଠାରେ ମୌଳିକ ସୁବିଧା ଯୋଗାଇବା ମଧ୍ୟ କଷ୍ଟକର, ସେଠାରେ ଏବେ ୪ଜି ଏବଂ ୫ଜି ମୋବାଇଲ ସଂଯୋଗ ପହଞ୍ଚିଛି। ଏହା ଦର୍ଶାଉଛି ଯେ ଆଜି ଦେଶର ପ୍ରାଥମିକତା କ’ଣ ରହିଛି। ସ୍ୱାସ୍ଥ୍ୟ ଭଳି କ୍ଷେତ୍ରର ଉଦାହରଣ ମଧ୍ୟ ଆମ ପାଖରେ ରହିଛି। ପୂର୍ବରୁ ଏମ୍ସ ଭଳି ଡାକ୍ତରଖାନା କେବଳ ଦିଲ୍ଲୀ ଭଳି ବଡ଼ ସହରରେ ଥିଲା। ଆଜି ଏଠାରେ ଦରଭଙ୍ଗାରେ ହିଁ ଏମ୍ସ ନିର୍ମାଣ କରାଯାଉଛି। ବିଗତ ୧୦ ବର୍ଷ ମଧ୍ୟରେ ଦେଶରେ ମେଡିକାଲ କଲେଜ ସଂଖ୍ୟା ପ୍ରାୟ ଦ୍ୱିଗୁଣିତ ହୋଇଛି। ଝଂଝାରପୁରରେ ଏଠାରେ ଏକ ନୂତନ ମେଡିକାଲ କଲେଜ ମଧ୍ୟ ନିର୍ମାଣ କରାଯାଉଛି।

ବନ୍ଧୁଗଣ,

ଗାଁ ଗାଁରେ ଭଲ ଡାକ୍ତରଖାନା ନିର୍ମାଣ ପାଇଁ ସାରା ଦେଶରେ ଦେଢ଼ ଲକ୍ଷରୁ ଅଧିକ ଆୟୁଷ୍ମାନ ଆରୋଗ୍ୟ ମନ୍ଦିର ନିର୍ମାଣ କରାଯାଇଛି। ବିହାରରେ ୧୦ ହଜାରରୁ ଅଧିକ ଆୟୁଷ୍ମାନ ଆରୋଗ୍ୟ ମନ୍ଦିର ନିର୍ମାଣ କରାଯାଇଛି। ସେହିପରି ଜନଔଷଧି କେନ୍ଦ୍ର ଗରିବ ଓ ମଧ୍ୟବିତ୍ତଙ୍କ ପାଇଁ ବଡ଼ ଆଶ୍ୱସ୍ତିର କାରଣ ପାଲଟିଛି। ଏଠାରେ କମ୍ ମୂଲ୍ୟର ଔଷଧ ୮୦ ପ୍ରତିଶତ ରିହାତିରେ ଉପଲବ୍ଧ ହେଉଛି। ବିହାରରେ ୮୦୦ରୁ ଅଧିକ ଜନଔଷଧି କେନ୍ଦ୍ର ସ୍ଥାପନ କରାଯାଇଛି। ଏହା ଦ୍ୱାରା ବିହାରର ଲୋକମାନେ ଔଷଧ ବାବଦରେ ୨୦୦୦ କୋଟି ଟଙ୍କା ସଞ୍ଚୟ କରିଛନ୍ତି। ଆୟୁଷ୍ମାନ ଭାରତ ଯୋଜନା ରେ ବିହାରର ଲକ୍ଷ ଲକ୍ଷ ପରିବାର ମାଗଣା ଚିକିତ୍ସା ପାଇଛନ୍ତି। ଫଳରେ ଏହି ପରିବାରଗୁଡ଼ିକର ହଜାର ହଜାର କୋଟି ଟଙ୍କା ସଞ୍ଚୟ ହୋଇଛି।

ବନ୍ଧୁଗଣ,

ଆଜି ଭାରତ ରେଳପଥ, ସଡ଼କ, ବିମାନବନ୍ଦର ଭଳି ଭିତ୍ତିଭୂମି ସହ ଅତି ଦ୍ରୁତ ଗତିରେ ଯୋଡ଼ି ହେଉଛି। ପାଟନାରେ ଚାଲିଛି ମେଟ୍ରୋ କାମ, ଦେଶର ଦୁଇ ଡର୍ଜନରୁ ଅଧିକ ସହରକୁ ମେଟ୍ରୋ ସୁବିଧା ସହ ସଂଯୋଗ କରାଯାଇଛି । ଆଜି ପାଟନା ଓ ଜୟ ନଗର ମଧ୍ୟରେ ନମୋ ଭାରତ ରାପିଡ୍ ରେଲ ଆରମ୍ଭ ହୋଇଛି। ଏଥିସହ ପାଟନାରୁ ଜୟ ନଗର ମଧ୍ୟରେ ଯାତ୍ରା ଖୁବ୍ କମ୍ ସମୟ ମଧ୍ୟରେ ଶେଷ ହେବ। ନମୋ ଭାରତ ରାପିଡ୍ ରେଲ୍ ସମସ୍ତିପୁର, ଦରଭଙ୍ଗା, ମଧୁବନୀ ଏବଂ ବେଗୁସରାଇର ଲକ୍ଷ ଲକ୍ଷ ଲୋକଙ୍କୁ ସାହାଯ୍ୟ କରିବ।

ବନ୍ଧୁଗଣ,

ଆଜି ଏଠାରେ ଅନେକ ନୂଆ ରେଳଲାଇନ୍‌ର ଉଦଘାଟନ ଓ ଲୋକାର୍ପଣ କରାଯାଇଛି। ସହରସାରୁ ମୁମ୍ବାଇ ପର୍ଯ୍ୟନ୍ତ ଆଧୁନିକ ଅମୃତ ଭାରତ ଟ୍ରେନ୍ ଆରମ୍ଭ ହେବା ଦ୍ୱାରା ଆମର ଶ୍ରମିକ ପରିବାରକୁ ବହୁତ ସୁବିଧା ମିଳିବ। ଆମ ସରକାର ମଧୁବନୀ ଓ ଝଙ୍ଝାରପୁର ସମେତ ବିହାରର ଡଜନାଧିକ ରେଳ ଷ୍ଟେସନର ଆଧୁନିକୀକରଣ କରୁଛନ୍ତି। ଦରଭଙ୍ଗା ବିମାନବନ୍ଦର ସହିତ ମିଥିଲା ଏବଂ ବିହାରର ବିମାନ ଯୋଗାଯୋଗରେ ଉନ୍ନତି ହୋଇଛି। ପାଟନା ବିମାନ ବନ୍ଦରର ମଧ୍ୟ ସମ୍ପ୍ରସାରଣ କରାଯାଉଛି। ଏହି ଉନ୍ନୟନମୂଳକ କାର୍ଯ୍ୟ ଯୋଗୁଁ ବିହାରରେ ନୂଆ ନିଯୁକ୍ତି ସୁଯୋଗ ସୃଷ୍ଟି ହେଉଛି।

ବନ୍ଧୁଗଣ,

ଆମର କୃଷକମାନେ ଗ୍ରାମୀଣ ଅର୍ଥନୀତିର ମେରୁଦଣ୍ଡ ଅଟନ୍ତି। ଏହି ମେରୁଦଣ୍ଡ ଯେତେ ମଜବୁତ ହେବ, ଗାଁ ଗୁଡ଼ିକ ସେତେ ଶକ୍ତିଶାଳୀ ହେବ ଏବଂ ଦେଶ ସେତେ ଶକ୍ତିଶାଳୀ ହେବ। ଆମେ ସମସ୍ତେ ଜାଣୁ ଯେ ମିଥିଲା, କୋଶୀର ଏହି ଅଞ୍ଚଳ ବନ୍ୟା ଦ୍ୱାରା ବହୁତ କ୍ଷତିଗ୍ରସ୍ତ ହୋଇଛି। ବିହାରରେ ବନ୍ୟା ପ୍ରଭାବ କୁ ହ୍ରାସ କରିବା ପାଇଁ ସରକାର ଏଗାର ହଜାର କୋଟି ଟଙ୍କା ଖର୍ଚ୍ଚ କରିବାକୁ ଯାଉଛନ୍ତି। ଏହା ସହ ବାଗମତୀ, ଧାର, ବୁଢ଼ୀ ଗଣ୍ଡକ ଓ କୋସି ଉପରେ ଡ୍ୟାମ୍ ନିର୍ମାଣ ହେବ। ଏହା ମାଧ୍ୟମରେ କେନାଲ ନିର୍ମାଣ କରାଯିବା ସହ ନଦୀ ଜଳ ଯୋଗାଣ କରାଯିବ। ଏବଂ ପ୍ରତ୍ୟେକ ଚାଷୀଙ୍କ କ୍ଷେତକୁ ପାଣି ପହଞ୍ଚାଇବାର ବ୍ୟବସ୍ଥା ମଧ୍ୟ କରାଯିବ। ଅର୍ଥାତ୍ ଏବେ ବନ୍ୟା ସମସ୍ୟା ଦୂର ହେବା ସହ ଚାଷ ଜମିରେ ପର୍ଯ୍ୟାପ୍ତ ପରିମାଣରେ ପାଣି ପହଞ୍ଚିବ।

ବନ୍ଧୁଗଣ,

ମଖାନା ଆଜି ଦେଶ ଓ ବିଶ୍ୱ ପାଇଁ ଏକ ସୁପରଫୁଡ୍, କିନ୍ତୁ ଏହା ମିଥିଲା ସଂସ୍କୃତିର ଏକ ଅଂଶ। ଆମେ ଏହି ସଂସ୍କୃତିକୁ ଏଠାରେ ସମୃଦ୍ଧିର ଉତ୍ସ କରୁଛୁ। ଆମେ ମଖାନାକୁ ଜିଆଇ ଟ୍ୟାଗ୍ ଦେଇଛୁ। ଅର୍ଥାତ୍ ମଖାନା ଏହି ମାଟିର ଉତ୍ପାଦ ହୋଇଥିବାରୁ ଏହାକୁ ଏବେ ଆନୁଷ୍ଠାନିକ ଭାବେ ସାର୍ଟିଫିକେଟ୍ ମିଳିଛି। ମଖାନା ଗବେଷଣା କେନ୍ଦ୍ରକୁ ମଧ୍ୟ ଜାତୀୟ ମାନ୍ୟତା ମିଳିଛି। ବଜେଟରେ ଘୋଷଣା ହୋଇଥିବା ମଖାନା ବୋର୍ଡ ଗଠନ ମଖାନା ଚାଷୀଙ୍କ ଭାଗ୍ୟ ବଦଳାଇବାକୁ ଯାଉଛି। ସୁପରଫୁଡ୍ ଭାବେ ବିହାରର ମଖାନା ବିଶ୍ୱର ବଜାରରେ ପହଞ୍ଚିବ । ବିହାରରେ ନ୍ୟାସନାଲ ଇନଷ୍ଟିଚ୍ୟୁଟ୍ ଅଫ୍ ଫୁଡ୍ ଟେକ୍ନୋଲୋଜି ଆଣ୍ଡ ମ୍ୟାନେଜମେଣ୍ଟ ମଧ୍ୟ ନିର୍ମାଣ ହେବାକୁ ଯାଉଛି। ଏହା ଦ୍ୱାରା ଏଠାକାର ଯୁବକମାନେ ଖାଦ୍ୟ ପ୍ରକ୍ରିୟାକରଣ ସହ ଜଡ଼ିତ କ୍ଷୁଦ୍ର ଉଦ୍ୟୋଗ ପ୍ରତିଷ୍ଠା କରିବାରେ ସହାୟକ ହେବେ।

ବନ୍ଧୁଗଣ,

ବିହାର ଚାଷ ସହ ମାଛ ଉତ୍ପାଦନ କ୍ଷେତ୍ରରେ ମଧ୍ୟ କ୍ରମାଗତ ଅଗ୍ରଗତି କରୁଛି। ଆମର ମତ୍ସ୍ୟଜୀବୀମାନେ ଏବେ କିଷାନ କ୍ରେଡିଟ୍ କାର୍ଡର ସୁବିଧା ପାଇପାରୁଛନ୍ତି। ଫଳରେ ମତ୍ସ୍ୟ ଚାଷରେ ନିୟୋଜିତ ଅନେକ ପରିବାର ଉପକୃତ ହୋଇଛନ୍ତି। ପ୍ରଧାନମନ୍ତ୍ରୀ ମତ୍ସ୍ୟ ସମ୍ପଦ ଯୋଜନାରେ ବିହାରରେ ଶହ ଶହ କୋଟି ଟଙ୍କାର କାମ ହୋଇଛି।

ବନ୍ଧୁଗଣ,

ଗତ ଏପ୍ରିଲ ୨୨ ତାରିଖରେ ଜମ୍ମୁ-କଶ୍ମୀରର ପହଲଗାମରେ ଆତଙ୍କବାଦୀମାନେ ନିରୀହ ନାଗରିକଙ୍କୁ ଯେଉଁ ନିଷ୍ଠୁରତାର ସହ ହତ୍ୟା କରିଥିଲେ, ସେଥିରେ ସମଗ୍ର ଦେଶ ଦୁଃଖିତ। ଲକ୍ଷ ଲକ୍ଷ ଦେଶବାସୀ ଦୁଃଖିତ। ସମସ୍ତ ମୃତକଙ୍କ ପରିବାରର ଦୁଃଖରେ ସମଗ୍ର ଦେଶ ସେମାନଙ୍କ ସହ ଛିଡ଼ା ହୋଇଛି। ବର୍ତ୍ତମାନ ଚିକିତ୍ସିତ ହେଉଥିବା ପରିବାରର ସଦସ୍ୟମାନେ ଯେପରି ଶୀଘ୍ର ସୁସ୍ଥ ହୁଅନ୍ତି ସେଥିପାଇଁ ସରକାର ସମସ୍ତ ପ୍ରକାର ପ୍ରୟାସ କରୁଛନ୍ତି।

ବନ୍ଧୁଗଣ,

ଏହି ଆତଙ୍କବାଦୀ ଆକ୍ରମଣରେ କାହାର ପୁଅ, କିଏ ଭାଇକୁ ହରାଇଲା ତ କାହାର ଜୀବନ ସାଥୀ। ସେମାନଙ୍କ ମଧ୍ୟରୁ କେତେକ ବଙ୍ଗଳା, କେହି କନ୍ନଡ଼, କିଛି ମରାଠୀ, କିଛି ଓଡ଼ିଆ, କିଛି ଗୁଜରାଟୀ, କିଛି ବିହାରର ଥିଲେ। ଆଜି କାର୍ଗିଲଠାରୁ କନ୍ୟାକୁମାରୀ ପର୍ଯ୍ୟନ୍ତ ସମସ୍ତଙ୍କ ମୃତ୍ୟୁରେ ଆମର ଦୁଃଖ ସମାନ, ଆମର କ୍ରୋଧ ସମାନ। ଏହି ଆକ୍ରମଣ କେବଳ ନିରସ୍ତ୍ର ପର୍ଯ୍ୟଟକଙ୍କ ଉପରେ ନୁହେଁ; ଦେଶର ଶତ୍ରୁମାନେ ଭାରତର ଆତ୍ମା ଉପରେ ଆକ୍ରମଣ କରିବାକୁ ସାହସ କରିଛନ୍ତି। ମୁଁ ଅତି ସ୍ପଷ୍ଟ ଶବ୍ଦରେ କହିବାକୁ ଚାହୁଛି, ଯେଉଁ ଆତଙ୍କବାଦୀମାନେ ଏହି ଆକ୍ରମଣ କରିଛନ୍ତି ଏବଂ ଯେଉଁମାନେ ଏହି ଆକ୍ରମଣ ପାଇଁ ଷଡ଼ଯନ୍ତ୍ର କରିଛନ୍ତି ସେମାନଙ୍କୁ ସେମାନେ କଳ୍ପନା ଠାରୁ ବଡ଼ ଦଣ୍ଡ ପାଇବେ। ଏବେ ଆତଙ୍କବାଦୀଙ୍କ ଅବଶିଷ୍ଟ ପଡ଼ିଆକୁ ଧ୍ୱଂସ କରିବାର ସମୟ ଆସିଛି। ୧୪୦ କୋଟି ଭାରତୀୟଙ୍କ ଇଚ୍ଛାଶକ୍ତି ଏବେ ଆତଙ୍କବାଦର ମୂଳୋତ୍ପାଟନ କରିବ।

ବନ୍ଧୁଗଣ,

ଆଜି ବିହାର ମାଟିରୁ ମୁଁ ସମଗ୍ର ବିଶ୍ୱକୁ କହୁଛି : ଭାରତ ପ୍ରତ୍ୟେକ ଆତଙ୍କବାଦୀ ଏବଂ ସେମାନଙ୍କ ସମର୍ଥକମାନଙ୍କୁ ଚିହ୍ନଟ କରିବ, ଖୋଜିବ ଏବଂ ଦଣ୍ଡିତ କରିବ। ଆମେ ସେମାନଙ୍କୁ ପୃଥିବୀର ଶେଷ ଭାଗ ପର୍ଯ୍ୟନ୍ତ ଅନୁସରଣ କରିବୁ। ଆତଙ୍କବାଦ ଦ୍ୱାରା ଭାରତର ଭାବନା କେବେ ଭାଙ୍ଗିବ ନାହିଁ। ଆତଙ୍କବାଦକୁ ଦଣ୍ଡ ମିଳିବ। ନ୍ୟାୟ ପାଇଁ ଯଥାସମ୍ଭବ ପ୍ରୟାସ କରାଯିବ। ଏହି ସଂକଳ୍ପରେ ସମଗ୍ର ଦେଶ ଦୃଢ଼। ମାନବିକତାରେ ବିଶ୍ୱାସ କରୁଥିବା ସମସ୍ତେ ଆମ ସହିତ ଅଛନ୍ତି। ମୁଁ ବିଭିନ୍ନ ଦେଶର ଲୋକ ଏବଂ ସେମାନଙ୍କ ନେତାମାନଙ୍କୁ ଧନ୍ୟବାଦ ଜଣାଉଛି, ଯେଉଁମାନେ ଏହି ସମୟରେ ଆମ ସହିତ ଠିଆ ହୋଇଛନ୍ତି।

ବନ୍ଧୁଗଣ,

ଦ୍ରୁତ ବିକାଶ ପାଇଁ ଶାନ୍ତି ଏବଂ ନିରାପତ୍ତା ସବୁଠାରୁ ଗୁରୁତ୍ୱପୂର୍ଣ୍ଣ ସର୍ତ୍ତ।  ବିକଶିତ ଭାରତ ପାଇଁ ଏକ ବିକଶିତ ବିହାର ଜରୁରୀ। ବିହାରରେ ବିକାଶ ହେବା ଦରକାର ଏବଂ ବିକାଶର ସୁଫଳ ଏଠାକାର ପ୍ରତ୍ୟେକ ବର୍ଗ ଓ ପ୍ରତ୍ୟେକ ଅଞ୍ଚଳରେ ପହଞ୍ଚିବା ଆମ ସମସ୍ତଙ୍କର ପ୍ରୟାସ। ପଞ୍ଚାୟତିରାଜ ଦିବସରେ ଏହି କାର୍ଯ୍ୟକ୍ରମରେ ଯୋଗ ଦେଇଥିବାରୁ ମୁଁ ପୁଣି ଥରେ ଆପଣ ମାନଙ୍କୁ ଧନ୍ୟବାଦ ଜଣାଉଛି।

ଆପଣଙ୍କୁ ବହୁତ ଧନ୍ୟବାଦ। ମୋ ସହିତ କୁହନ୍ତୁ –

ଭାରତ ମାତା କି ଜୟ । (ଭାରତ ମାତାଙ୍କୁ ନମସ୍କାର)

ଭାରତ ମାତା କି ଜୟ ।

ଭାରତ ମାତା କି ଜୟ ।

ସ୍ୱୀକାରୋକ୍ତି: ଏହା ହେଉଛି ପ୍ରଧାନମନ୍ତ୍ରୀଙ୍କ ଭାଷଣର ଆନୁମାନିକ ଅନୁବାଦ। ମୂଳ ଭାଷଣ ହିନ୍ଦୀରେ ଦିଆଯାଇଥିଲା।

*****

MT