ପିଏମଇଣ୍ଡିଆ

କେନ୍ଦ୍ର ମନ୍ତ୍ରିମଣ୍ଡଳର ମୋର ସାଥି ଅଶ୍ୱିନୀ ବୈଷ୍ଣବ ଜୀ, ରାଜୀବ ଚନ୍ଦ୍ରଶେଖର ଜୀ, ଜିପିଏଆଇର ବିଦାୟୀ ଅଧ୍ୟକ୍ଷ, ଜାପାନର ମନ୍ତ୍ରୀ ହିରୋସି ୟୋଶିଦା ଜୀ, ଅନ୍ୟ  ଦେଶର ସଦସ୍ୟ ଏବଂ ମନ୍ତ୍ରୀଗଣ !

ଆର୍ଟିଫିସିଆଲ୍ ଇଣ୍ଟେଲିଜେନ୍ସ ଉପରେ ଗ୍ଲୋବାଲ୍ ପାର୍ଟନରସିପ୍ ଶିଖର ସମ୍ମିଳନୀରେ ମୁଁ ଆପଣସମସ୍ତଙ୍କୁ ସ୍ୱାଗତ କରୁଛି । ମୁଁ ଖୁସି ଯେ ଭାରତ ଆସନ୍ତା ବର୍ଷ ଏହି ଶିଖର ସମ୍ମିଳନୀରେ ଅଧ୍ୟକ୍ଷତା କରିବାକୁ ଯାଉଛି | ଏହି ଶିଖର ସମ୍ମିଳନୀ ଏପରି ସମୟରେ ଅନୁଷ୍ଠିତ ହେଉଛି ଯେତେବେଳେ ଏଆଇ କୁ ନେଇ ସମଗ୍ର ବିଶ୍ୱରେ ଏକ ବିରାଟ ବିତର୍କ ଚାଲିଛି | ସକାରାତ୍ମକ ଏବଂ ନକାରାତ୍ମକ ସମସ୍ତ ପ୍ରକାର ଦିଗ ଏହି ବିତର୍କ ଯୋଗୁଁ ଆଗକୁ ଆସୁଛି | ତେଣୁ ଏହି ଶିଖର ସମ୍ମିଳନୀ ସହ ଜଡିତ ପ୍ରତ୍ୟେକ ଦେଶର ଏକ ବଡ ଦାୟିତ୍ୱ ରହିଛି | ଅତୀତରେ ମୋତେ ଅନେକ ରାଜନୈତିକ ଏବଂ ଶିଳ୍ପ ନେତାଙ୍କୁ ଭେଟିବାର ସୁଯୋଗ ମିଳିଛି | ମୁଁ ସେମାନଙ୍କ ସହ ମୋର ସାକ୍ଷାତରେ ମଧ୍ୟ ଏହି ଶିଖର ସମ୍ମିଳନୀ ବିଷୟରେ ଆଲୋଚନା କରିଛି | ଏଆଇର ପ୍ରଭାବରେ ବର୍ତ୍ତମାନ କିମ୍ବା ଭବିଷ୍ୟତ ପିଢ଼ି ଅଛୁଆଁ ନୁହଁନ୍ତି | ଆମକୁ ବହୁତ ସତର୍କତାର ସହ ଆଗକୁ ବଢିବାକୁ ପଡିବ | ଏବଂ ସେଥିପାଇଁ ମୁଁ ବିଶ୍ୱାସ କରୁଛି ଯେ ଏହି ଶିଖର ସମ୍ମିଳନୀରୁ ବାହାରିଥିବା ଚିନ୍ତାଧାରା, ଏହି ଶିଖର ସମ୍ମିଳନୀରୁ ବାହାରିଥିବା ପରାମର୍ଶ ସମଗ୍ର ମାନବଜାତିର ମୌଳିକ ମୂଲ୍ୟବୋଧକୁ ସୁରକ୍ଷା ଏବଂ ଦିଗ ଦେବା ପାଇଁ କାର୍ଯ୍ୟ କରିବ |

ସାଥିମାନେ,

ଆଜି ଭାରତ ଏଆଇ ପ୍ରତିଭା ଏବଂ ଏଆଇ ସହ ଜଡିତ ନୂତନ ଚିନ୍ତାଧାରାରେ ସବୁଠାରୁ ପ୍ରମୁଖ ଖେଳାଳି । ଭାରତର ଯୁବ ବୈଷୟିକ ବିଶେଷଜ୍ଞ ଏବଂ ଗବେଷକମାନେ ଏଆଇର ସୀମା ଅନୁସନ୍ଧାନ କରୁଛନ୍ତି| ଭାରତରେ, ଆମେ ଏକ ଅତ୍ୟନ୍ତ ଉତ୍ସାହୀ ଏଆଇ ଅଭିନବ ଭାବନା ଦେଖୁଛୁ | ଏଠାକୁ ଆସିବା ପୂର୍ବରୁ, ମୁଁ ଏଆଇ ଏକ୍ସପୋ ପରିଦର୍ଶନ କରିବାର ସୁଯୋଗ ପାଇଲି | ଏହି ଏକ୍ସପୋରେ ଆମେ ଦେଖିପାରିବା ଆର୍ଟିଫିସିଆଲ ଇଣ୍ଟେଲିଜେନ୍ସ କିପରି ଜୀବନକୁ ପରିବର୍ତ୍ତନ କରିପାରିବ | ଯୁବ ଏଆଇ ଅଭିଯାନ ଅଧୀନରେ ଚୟନ ହୋଇଥିବା ଯୁବକମାନଙ୍କ ର ଚିନ୍ତାଧାରାକୁ ଦେଖି ମୁଁ ବହୁତ ଆନନ୍ଦିତ ହେବା ସ୍ୱାଭାବିକ | ଏହି ଯୁବକମାନେ ଟେକ୍ନୋଲୋଜି ମାଧ୍ୟମରେ ସାମାଜିକ ପରିବର୍ତ୍ତନ ଆଣିବାକୁ ଚେଷ୍ଟା କରୁଛନ୍ତି | ଭାରତରେ, ଏଆଇ ସମ୍ବନ୍ଧୀୟ ସମାଧାନ ବିଷୟରେ ଆଲୋଚନା ବର୍ତ୍ତମାନ ପ୍ରତ୍ୟେକ ଗ୍ରାମରେ ପହଞ୍ଚୁଛି | ନିକଟରେ ଆମେ କୃଷିକ୍ଷେତ୍ରରେ ଏକ ଏଆଇ ଚାଟ-ବଟ୍ ଆରମ୍ଭ କରିଛୁ | ଏହା କୃଷକମାନଙ୍କୁ ସାହାଯ୍ୟ କରିବ | ସେମାନଙ୍କ ର ଆବେଦନ ସ୍ଥିତି, ଦେୟ ବିବରଣୀ ଏବଂ ସରକାରୀ ଯୋଜନା ସମ୍ବନ୍ଧୀୟ ଅପଡେଟ୍ ଜାଣିବା ପାଇଁ | ଆମେ ଏଆଇ ସାହାଯ୍ୟରେ ଭାରତରେ ଆମର ସ୍ୱାସ୍ଥ୍ୟ କ୍ଷେତ୍ରକୁ ସମ୍ପୂର୍ଣ୍ଣ ରୂପାନ୍ତରିତ କରିବା ଦିଗରେ ମଧ୍ୟ କାର୍ଯ୍ୟ କରୁଛୁ| ନିରନ୍ତର ବିକାଶ ଲକ୍ଷ୍ୟ ହାସଲ କରିବାରେ ଏଆଇ ମଧ୍ୟ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିପାରେ |

ସାଥିମାନେ,

ଭାରତରେ ଆମର ବିକାଶର ମନ୍ତ୍ର ହେଉଛି – ସବକା ସାଥ, ସବକା ବିକାଶ | ଆମେ ‘ସମସ୍ତଙ୍କ ପାଇଁ ଏଆଇ‘ ଭାବନାରୁ ପ୍ରେରିତ ହୋଇ ସରକାରୀ ନୀତି ଏବଂ କାର୍ଯ୍ୟକ୍ରମ ବିକଶିତ କରିଛୁ | ସାମାଜିକ ବିକାଶ ଏବଂ ଅନ୍ତର୍ଭୁକ୍ତ ଅଭିବୃଦ୍ଧି ପାଇଁ ଏଆଇର ସାମର୍ଥ୍ୟର ସମ୍ପୂର୍ଣ୍ଣ ଲାଭ ଉଠାଇବା ଆମର ପ୍ରୟାସ | ଭାରତ ମଧ୍ୟ ଏଆଇର ଦାୟିତ୍ୱପୂର୍ଣ୍ଣ ଏବଂ ନୈତିକ ବ୍ୟବହାର ପାଇଁ ସମ୍ପୂର୍ଣ୍ଣ ପ୍ରତିଶ୍ରୁତିବଦ୍ଧ | ଆମେ “ଆର୍ଟିଫିସିଆଲ ଇଣ୍ଟେଲିଜେନ୍ସ ଉପରେ ଜାତୀୟ କାର୍ଯ୍ୟକ୍ରମ” ଆରମ୍ଭ କରିଛୁ | ଆମେ ଭାରତରେ ଏକ ଏଆଇ ମିଶନ ମଧ୍ୟ ଆରମ୍ଭ କରିବାକୁ ଯାଉଛୁ | ଏହି ମିଶନର ଲକ୍ଷ୍ୟ ହେଉଛି ଭାରତରେ ଏଆଇ କମ୍ପ୍ୟୁଟ ପାୱାରର ପର୍ଯ୍ୟାପ୍ତ କ୍ଷମତା ପ୍ରତିଷ୍ଠା କରିବା| ଏହା ଭାରତର ଷ୍ଟାର୍ଟଅପ୍ ଏବଂ ଉଦ୍ଭାବକମାନଙ୍କୁ ଉନ୍ନତ ସୁବିଧା ପ୍ରଦାନ କରିବ | ଏହି ମିଶନ ଅଧୀନରେ କୃଷି, ସ୍ୱାସ୍ଥ୍ୟ-ଯତ୍ନ ଏବଂ ଶିକ୍ଷା ଭଳି କ୍ଷେତ୍ରରେ AI ଆପ୍ଲିକେସନ୍ କୁ ପ୍ରୋତ୍ସାହିତ କରାଯିବ। ଆମେ ଆମର ଶିଳ୍ପ ପ୍ରଶିକ୍ଷଣ ଅନୁଷ୍ଠାନ ମାଧ୍ୟମରେ ଏଆଇ ଦକ୍ଷତାକୁ ଟାୟାର –2 ଏବଂ ଟାୟାର –3 ସହରକୁ ନେଉଛୁ| ଆମର ଏକ “ଜାତୀୟ ଏଆଇ ପୋର୍ଟାଲ” ଅଛି, ଯାହା ଦେଶରେ ଆର୍ଟିଫିସିଆଲ ଇଣ୍ଟେଲିଜେନ୍ସ ପଦକ୍ଷେପକୁ ପ୍ରୋତ୍ସାହିତ କରିଥାଏ | ଆପଣ ଐରାୱତ‘ ପଦକ୍ଷେପ ବିଷୟରେ ମଧ୍ୟ ଶୁଣିଥିବେ | ବହୁତ ଶୀଘ୍ର, ସମସ୍ତ ଗବେଷଣା ଲ୍ୟାବ, ଶିଳ୍ପ ଏବଂ ଷ୍ଟାର୍ଟଅପ୍ ଏହି ସାଧାରଣ ପ୍ଲାଟଫର୍ମକୁ ବ୍ୟବହାର କରିବାକୁ ସକ୍ଷମ ହେବେ।

ସାଥିମାନେ,

ଏଆଇ ସହିତ ଆମେ ଏକ ନୂତନ ଯୁଗରେ ପ୍ରବେଶ କରୁଛୁ | ଆର୍ଟିଫିସିଆଲ ଇଣ୍ଟେଲିଜେନ୍ସ ଏକ ବୈଷୟିକ ଉପକରଣ ଠାରୁ ବହୁତ ଅଧିକ| ଆର୍ଟିଫିସିଆଲ ଇଣ୍ଟେଲିଜେନ୍ସ ଆମର ନୂତନ ଭବିଷ୍ୟତ ଗଠନ ର ସବୁଠାରୁ ବଡ ମାଧ୍ୟମ ରେ ପରିଣତ ହେଉଛି | ଏଆଇର ଏକ ବଡ ଶକ୍ତି ହେଉଛି ଲୋକଙ୍କୁ ଯୋଡିବାର କ୍ଷମତା| ଏଆଇର ଉପଯୁକ୍ତ ବ୍ୟବହାର କେବଳ ଦେଶର ଅର୍ଥନୈତିକ ପ୍ରଗତିକୁ ସୁନିଶ୍ଚିତ କରେ ନାହିଁ ବରଂ ଏହା ସମାନତା ଏବଂ ସାମାଜିକ ନ୍ୟାୟ କୁ ମଧ୍ୟ ସୁନିଶ୍ଚିତ କରେ | ତେଣୁ ଏଆଇର ଭବିଷ୍ୟତ ପାଇଁ ବିଭିନ୍ନ ପ୍ରକାରର ଏଆଇ ର ଆବଶ୍ୟକତା ପଡିବ | ଅର୍ଥାତ୍ ଏଆଇକୁ ସର୍ବାଙ୍ଗୀନ କରିବାକୁ ପଡିବ ଏବଂ ସମସ୍ତ ଚିନ୍ତାଧାରାକୁ ଗ୍ରହଣ କରିବାକୁ ପଡିବ | ଏଆଇର ବିକାଶ ଯାତ୍ରା ଯେତେ ଅଧିକ ଅନ୍ତର୍ଭୁକ୍ତ ହେବ, ଏହାର ଫଳାଫଳ ସେତେ ଅଧିକ ସମାବେଶୀ ହେବ |

ଆମେ ଦେଖିଛୁ ଯେ ଗତ ଶତାବ୍ଦୀରେ ଟେକ୍ନୋଲୋଜିର ଅସମାନ ଉପଲବ୍ଧତା ଯୋଗୁଁ ସମାଜରେ ଥିବା ଅସମାନତା ବୃଦ୍ଧି ପାଇଥିଲା| ବର୍ତ୍ତମାନ ଆମକୁ ସମଗ୍ର ମାନବଜାତିକୁ ଏଭଳି ଏକ ଭୁଲରୁ ରକ୍ଷା କରିବାକୁ ପଡିବ | ଆମେ ଜାଣୁ ଯେ ଯେତେବେଳେ ଗଣତାନ୍ତ୍ରିକ ମୂଲ୍ୟବୋଧକୁ ପ୍ରଯୁକ୍ତି ବିଦ୍ୟା ସହିତ ମିଶ୍ରଣ କରାଯାଏ, ସେତେବେଳେ ଏହା ଅନ୍ତର୍ଭୁକ୍ତୀକରଣ ଦିଗରେ ଏକ ଗୁଣାତ୍ମକ ଭାବରେ କାର୍ଯ୍ୟ କରେ | ତେଣୁ ଆର୍ଟିଫିସିଆଲ ଇଣ୍ଟେଲିଜେନ୍ସର ଭବିଷ୍ୟତ ଦିଗ ମଧ୍ୟ ସମ୍ପୂର୍ଣ୍ଣ ଭାବେ ମାନବୀୟ ମୂଲ୍ୟବୋଧ ଏବଂ ଗଣତାନ୍ତ୍ରିକ ମୂଲ୍ୟବୋଧ ଉପରେ ନିର୍ଭର କରିବ | ଆର୍ଟିଫିସିଆଲ ଇଣ୍ଟେଲିଜେନ୍ସ ଆମର ଦକ୍ଷତା ବୃଦ୍ଧି କରିବାରେ ସାହାଯ୍ୟ କରିପାରେ | କିନ୍ତୁ ଭାବନା ପାଇଁ ମଧ୍ୟ କିଛି ସ୍ଥାନ ରଖିବା ଆମ ଉପରେ ନିର୍ଭର କରେ | ଆର୍ଟିଫିସିଆଲ ଇଣ୍ଟେଲିଜେନ୍ସ ଆମର ପ୍ରଭାବକୁ ବଢାଇପାରେ , କିନ୍ତୁ ଆମର ନୈତିକତାକୁ ବଜାୟ ରଖିବା ମଧ୍ୟ ଆମର ଦାୟିତ୍ୱ | ଏହି ଦିଗରେ , ଏହି ପ୍ଲାଟଫର୍ମ ବିଭିନ୍ନ ଦେଶ ମଧ୍ୟରେ ସହଯୋଗ ବଢ଼ାଇବାରେ ସହାୟକ ହୋଇପାରିବ ।

ସାଥିମାନେ,

ଯେକୌଣସି ବ୍ୟବସ୍ଥାସ୍ଥାୟୀ ହେବା ପାଇଁ, ଏହାକୁ ପରିବର୍ତନଶୀଳ, ସ୍ୱଚ୍ଛ ଏବଂ ବିଶ୍ୱସ୍ତ କରିବାକୁ ପଡିବ| ଏଥିରେ କୌଣସି ସନ୍ଦେହ ନାହିଁ ଯେ AI ପରିବର୍ତ୍ତନଶୀଳ | କିନ୍ତୁ ଏହାକୁ ଯଥାସମ୍ଭବ ସ୍ୱଚ୍ଛ କରିବା ଆମ ଉପରେ ନିର୍ଭର କରେ | ଯଦି ଆମେ ବ୍ୟବହୃତ ଡାଟା ଏବଂ ଆଲଗୋରିଦମସକୁ ସ୍ୱଚ୍ଛ ଏବଂ ପକ୍ଷପାତମୁକ୍ତ କରିପାରିବା, ତେବେ ଏହା ଏକ ଭଲ ଆରମ୍ଭ ହେବ | ଆମକୁ ସମଗ୍ର ବିଶ୍ୱର ଲୋକଙ୍କୁ ବୁଝାଇବାକୁ ପଡିବ ଯେ AI ସେମାନଙ୍କ ର ଲାଭ ପାଇଁ ଅଟେ ଏବଂ କଲ୍ୟାଣ ପାଇଁ ଅଟେ। ଆମକୁ ବିଶ୍ୱର ବିଭିନ୍ନ ଦେଶକୁ ମଧ୍ୟ ଆଶ୍ୱାସନା ଦେବାକୁ ପଡିବ ଯେ ଏହି ପ୍ରଯୁକ୍ତିବିଦ୍ୟାର ବିକାଶ ଯାତ୍ରାରେ କେହି ପଛରେ ରହିବେ ନାହିଁ | ଏଆଇ ସମ୍ବନ୍ଧୀୟ ନୈତିକ, ଅର୍ଥନୈତିକ ଏବଂ ସାମାଜିକ ଚିନ୍ତାକୁ ବିଚାରକୁ ନିଆଗଲେ AI ଉପରେ ବିଶ୍ୱାସ ବୃଦ୍ଧି ପାଇବ| ଉଦାହରଣ ସ୍ୱରୂପ, ଯଦି ଉନ୍ନତ ଦକ୍ଷତା ଏବଂ ପୁନଃଦକ୍ଷତା AI ଅଭିବୃଦ୍ଧି ବକ୍ରର ଅଂଶ ପାଲଟିଯାଏ , ଯୁବକମାନେ ବିଶ୍ୱାସ କରିବାକୁ ସକ୍ଷମ ହେବେ ଯେ ଏଆଇ ସେମାନଙ୍କ ଭବିଷ୍ୟତର ଉନ୍ନତି ପାଇଁ | ଯଦି ଡାଟା ନିରାପତ୍ତା ପ୍ରତି ଧ୍ୟାନ ଦିଆଯାଏ, ତେବେ ଲୋକମାନେ ବିଶ୍ୱାସ କରିବାକୁ ସକ୍ଷମ ହେବେ ଯେ ଏଆଇ ସେମାନଙ୍କ ଗୋପନୀୟତାରେ ହସ୍ତକ୍ଷେପ ନକରି ବିକାଶକୁ ପ୍ରୋତ୍ସାହିତ କରିବ | ଯଦି ଗ୍ଲୋବାଲ ସାଉଥ ଅନୁଭବ କରିବ ଯେ ସେମାନେ ମଧ୍ୟ ଏଆଇର ବିକାଶରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରନ୍ତି , ତା‘ହେଲେ ସେମାନେ ଏହାକୁ ଭବିଷ୍ୟତର ଏକ ଉପାୟ ଭାବରେ ଗ୍ରହଣ କରିବାକୁ ସକ୍ଷମ ହେବେ ।

ସାଥିମାନେ,

ଏଆଇର ଅନେକ ସକାରାତ୍ମକ ଦିଗ ରହିଛି, କିନ୍ତୁ ଏହା ସହିତ ଜଡିତ ନକାରାତ୍ମକ ଦିଗ ମଧ୍ୟ ସମାନ ଚିନ୍ତାର ବିଷୟ | ଏଆଇ ଏକବିଂଶ ଶତାବ୍ଦୀରେ ବିକାଶର ସବୁଠାରୁ ଗୁରୁତ୍ୱପୂର୍ଣ୍ଣ ଉପକରଣ ହୋଇପାରେ ଏବଂ ଏକବିଂଶ ଶତାବ୍ଦୀକୁ ନଷ୍ଟ କରିବାରେ ମଧ୍ୟ ସବୁଠାରୁ ବଡ ଭୂମିକା ଗ୍ରହଣ କରିପାରେ | ‘ଡିପ୍ ଫେକ୍ ‘ର ଚ୍ୟାଲେଞ୍ଜ ଆଜି ସମଗ୍ର ବିଶ୍ୱ ସାମ୍ନାରେ ଅଛି | ଏହା ବ୍ୟତୀତ, ସାଇବର ନିରାପତ୍ତା ପ୍ରତି ମଧ୍ୟ ଏକ ବଡ଼ ବିପଦ ରହିଛି, ଏବଂ ଡାଟା ଚୋରି ଏବଂ ଆତଙ୍କବାଦୀମାନେ ଏଆଇ ଉପକରଣ ର ଆକସେସ୍ ପାଇବା ପ୍ରସଙ୍ଗ | ଯଦି ଏଆଇ ସୁସଜ୍ଜିତ ଅସ୍ତ୍ରଶସ୍ତ୍ର ଆତଙ୍କବାଦୀ ସଂଗଠନମାନଙ୍କ ନିକଟରେ ପହଞ୍ଚିବ, ତେବେ ଏହା ବିଶ୍ୱ ସୁରକ୍ଷା ଉପରେ ବ୍ୟାପକ ପ୍ରଭାବ ପକାଇବ | ଆମକୁ ଏହି ବିଷୟରେ ଆଲୋଚନା କରିବା ଏବଂ ଏଆଇର ଅପବ୍ୟବହାରକୁ କିପରି ରୋକାଯାଇପାରିବ ସେ ବିଷୟରେ ଏକ ଠୋସ୍ ଯୋଜନାରେ ପହଞ୍ଚିବା ଆବଶ୍ୟକ| ସେଥିପାଇଁ, ଜି-୨୦ ଅଧ୍ୟକ୍ଷତା ସମୟରେ ଆମେ ଦାୟିତ୍ୱବାନ ମାନବ-କେନ୍ଦ୍ରୀତ ଏଆଇ ଶାସନ ପାଇଁ ଏକ ଢାଞ୍ଚା ସୃଷ୍ଟି କରିବାକୁ ପ୍ରସ୍ତାବ ଦେଇଥିଲୁ | ଜି-୨୦ ନୂଆଦିଲ୍ଲୀ ଘୋଷଣାନାମା ‘ଏଆଇ ନୀତି‘ ପ୍ରତି ସମସ୍ତ ସଦସ୍ୟ ରାଷ୍ଟ୍ରର ପ୍ରତିବଦ୍ଧତାକୁ ଦୋହରାଇଛି | AI ର ବ୍ୟବହାର ସହିତ ଜଡିତ ବିପଦ ବିଷୟରେ ସମସ୍ତ ସଦସ୍ୟଙ୍କ ଦ୍ୱାରା ଏକ ବୁଝାମଣା ରେ ପହଞ୍ଚିଥିଲା | ଯେପରି ଆମର ବିଭିନ୍ନ ଅନ୍ତର୍ଜାତୀୟ ପ୍ରସଙ୍ଗ ପାଇଁ ଚୁକ୍ତି ଏବଂ ପ୍ରୋଟୋକଲ ଅଛି, ସେହିଭଳି ଆମକୁ AI ର ନୈତିକ ବ୍ୟବହାର ପାଇଁ ଏକ ବିଶ୍ୱସ୍ତରୀୟ ଢାଞ୍ଚା ସୃଷ୍ଟି କରିବା ପାଇଁ ମିଳିତ ଭାବରେ କାର୍ଯ୍ୟ କରିବାକୁ ପଡିବ | ଏଥିରେ ଉଚ୍ଚ ବିପଦପୂର୍ଣ୍ଣ କିମ୍ବା ସୀମାନ୍ତ AI ଉପକରଣଗୁଡିକର ପରୀକ୍ଷଣ ଏବଂ ପ୍ରୟୋଗ ପାଇଁ ପ୍ରୋଟୋକଲ ମଧ୍ୟ ଅନ୍ତର୍ଭୁକ୍ତ ହେବ | ଦୃଢ଼ବିଶ୍ୱାସ, ପ୍ରତିବଦ୍ଧତା, ସମନ୍ୱୟ ଏବଂ ସହଯୋଗ ର ସବୁଠାରୁ ଅଧିକ ଆବଶ୍ୟକତା ରହିଛି | ଏଆଇର ଦାୟିତ୍ୱପୂର୍ଣ୍ଣ ବ୍ୟବହାର ସୁନିଶ୍ଚିତ କରିବା ପାଇଁ ଆମକୁ ମିଳିତ ଭାବେ ଏଭଳି ପଦକ୍ଷେପ ନେବାକୁ ପଡିବ | ଆଜି ଏହି ଶିଖର ସମ୍ମିଳନୀ ଜରିଆରେ ଭାରତ ସମଗ୍ର ବିଶ୍ୱକୁ ଆହ୍ୱାନ କରୁଛି ଯେ ଆମେ ଗୋଟିଏ ମୁହୂର୍ତ୍ତ ବି ନଷ୍ଟ ନ କରିବା| ଚଳିତ ବର୍ଷ ଆଉ ମାତ୍ର କିଛି ଦିନ ବାକି ଅଛି | ନୂତନ ବର୍ଷ ପାଖେଇ ଆସୁଛି | ଆମକୁ ଏକ ନିର୍ଦ୍ଦିଷ୍ଟ ସମୟ ସୀମା ମଧ୍ୟରେ ବୈଶ୍ୱିକ ଢାଞ୍ଚା ସମ୍ପୂର୍ଣ୍ଣ କରିବାକୁ ପଡିବ | ମାନବିକତାର ସୁରକ୍ଷା ପାଇଁ ଏହି କାର୍ଯ୍ୟ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ।

ସାଥିମାନେ,

AI କେବଳ ଏକ ନୂତନ ଜ୍ଞାନକୌଶଳ ନୁହେଁ, ଏହା ଏକ ବିଶ୍ୱବ୍ୟାପୀ ଅଭିଯାନରେ ପରିଣତ ହୋଇଛି | ତେଣୁ, ଆମେ ସମସ୍ତେ ଏକାଠି କାମ କରିବା ଅତ୍ୟନ୍ତ ଜରୁରୀ | ଆଗାମୀ ଦୁଇ ଦିନ ମଧ୍ୟରେ ଆପଣସମସ୍ତେ ବିଭିନ୍ନ ବିଷୟ ରେ ଆଲୋଚନା କରିବେ | ଯେତେବେଳେ ମୁଁ ଜଣେ AI ବିଶେଷଜ୍ଞଙ୍କୁ ଭେଟିବି, ମୁଁ ନିଜେକୁ ପ୍ରଶ୍ନ ପଚାରିବା ଏବଂ ପରାମର୍ଶ ଦେବାରୁ ଅଟକାଇ ପାରିବି ନାହିଁ | ଆଜି, ଆପଣଙ୍କ ଭଳି ବିଶେଷଜ୍ଞମାନଙ୍କ ସହ କଥା ବାର୍ତ୍ତା କରିବା ସମୟରେ ମୋ ମନରେ ଭିନ୍ନ ଭିନ୍ନ ଧାରଣା ଆସୁଥିଲା। ଆମକୁ ଏଆଇ ଉତ୍ପାଦିତ ସୂଚନାର ବିଶ୍ୱସନୀୟତା କିପରି ବୃଦ୍ଧି କରାଯାଇପାରିବ ସେ ବିଷୟରେ ଚିନ୍ତା କରିବାକୁ ପଡିବ? ସମ୍ଭାବ୍ୟ ଡାଟା ସେଟ୍ କ‘ଣ ହୋଇପାରେ ଯାହା ବ୍ୟବହାର କରି ଆମେ AI ଉପକରଣଗୁଡ଼ିକୁ ପ୍ରଶିକ୍ଷଣ ଏବଂ ପରୀକ୍ଷଣ କରିପାରିବା? ବଜାରରେ ଏକ AI ଟୁଲ୍ ରିଲିଜ୍ କରିବା ପୂର୍ବରୁ କେତେ ପରୀକ୍ଷା କରାଯିବା ଉଚିତ୍ ସେ ବିଷୟରେ ମଧ୍ୟ ଚିନ୍ତା କରିବା ଆବଶ୍ୟକ| ଆମେ କୌଣସି ସଫ୍ଟୱେୟାର୍ ୱାଟରମାର୍କ ପ୍ରଚଳନ କରିପାରିବା କି? ଯାହା ଦର୍ଶାଏ ଯେ ଏହି ସୂଚନା କିମ୍ବା ଉତ୍ପାଦ AI ଉତ୍ପନ୍ନ ହୋଇଛି? ଏହା ସହିତ, AI ଉତ୍ପାଦିତ ସୂଚନା ବ୍ୟବହାର କରୁଥିବା ବ୍ୟକ୍ତି ଏହାର ସୀମିତତା ବିଷୟରେ ଅବଗତ ହେବେ।

ମୁଁ ମଧ୍ୟ କେନ୍ଦ୍ର ସରକାର ଏବଂ ଭାରତର ରାଜ୍ୟ ସରକାରଙ୍କ ବିଶେଷଜ୍ଞମାନଙ୍କୁ ଗୋଟିଏ କଥା କହିବାକୁ ଚାହେଁ| ସରକାରଙ୍କ ପାଖରେ ଯୋଜନା ସମ୍ବନ୍ଧୀୟ ବିଭିନ୍ନ ପ୍ରକାରର ତଥ୍ୟ ଅଛି| ପ୍ରମାଣ ଭିତ୍ତିକ ନିଷ୍ପତ୍ତି ନେବାରେ ଏହାକୁ କିପରି ବ୍ୟବହୃତ କରାଯାଇପାରିବ? ଏଆଇ ଉପକରଣଗୁଡ଼ିକୁ ପ୍ରଶିକ୍ଷଣ ଦେବା ପାଇଁ ଆମେ ଏଭଳି ଡାଟା ବ୍ୟବହାର କରିପାରିବା କି? ଆମେ ଏକ ଅଡିଟ୍ ବ୍ୟବସ୍ଥା ସ୍ଥାପନ କରିପାରିବା ଯେଉଁଥିରେ ଏଆଇ ଉପକରଣଗୁଡ଼ିକୁ ଲାଲ, ଶ୍ରେଣୀଭୁକ୍ତ କରାଯାଇପାରିବ ହଳଦିଆ, ନା ସବୁଜ? ଆମେ ଏକ ସଂସ୍ଥାଗତ ବ୍ୟବସ୍ଥା ସ୍ଥାପନ କରିପାରିବା ଯାହା ସହାୟକ ନିଯୁକ୍ତି ସୁନିଶ୍ଚିତ କରେ? ଆମେ ମାନକ ବୈଶ୍ୱିକ ଏଆଇ ଶିକ୍ଷା ପାଠ୍ୟକ୍ରମ ଆଣିପାରିବା କି? ଏଆଇ-ପରିଚାଳିତ ଭବିଷ୍ୟତ ପାଇଁ ଲୋକଙ୍କୁ ପ୍ରସ୍ତୁତ କରିବା ପାଇଁ ଆମେ ମାନକ ନିର୍ଦ୍ଧାରଣ କରିପାରିବା କି? ସରକାରଙ୍କ ସହ ଜଡ଼ିତ ଲୋକଏବଂ ଆପଣଙ୍କ ପରି ସମସ୍ତ ବିଶେଷଜ୍ଞଏଭଳି ଅନେକ ପ୍ରଶ୍ନ ଉପରେ ବିଚାର କରିବା ଉଚିତ୍ ।

ସାଥିମାନେ,

ଆପଣ ଜାଣନ୍ତି ଯେ ଭାରତରେ ଶତାଧିକ ଭାଷା ରହିଛି ହଜାର ହଜାର ଉପଭାଷା ଅଛି| ଡିଜିଟାଲ ଅନ୍ତର୍ଭୁକ୍ତୀକରଣକୁ ବିସ୍ତାର କରିବା ପାଇଁ ଏଆଇ ସାହାଯ୍ୟରେ ସ୍ଥାନୀୟ ଭାଷାରେ ଡିଜିଟାଲ ସେବା କିପରି ଉପଲବ୍ଧ କରାଯାଇପାରିବ ସେ ବିଷୟରେ ମଧ୍ୟ ଚିନ୍ତା କରନ୍ତୁ | ଏହା ସହିତ ଏଆଇ ସାହାଯ୍ୟରେ ଆଉ କଥିତ ହୋଇନଥିବା ଭାଷାଗୁଡ଼ିକୁ କିପରି ପୁନରୁଦ୍ଧାର କରାଯାଇପାରିବ ସେ ବିଷୟରେ ମଧ୍ୟ ଚିନ୍ତା କରନ୍ତୁ| ସଂସ୍କୃତ ଭାଷାର ଜ୍ଞାନ ଭିତ୍ତିଭୂମି ଏବଂ ସାହିତ୍ୟ ବହୁତ ସମୃଦ୍ଧ | ଏଆଇ ସାହାଯ୍ୟରେ ଏହାକୁ କିପରି ଆଗେଇ ନିଆଯାଇପାରିବ ସେ ବିଷୟରେ ମଧ୍ୟ ଚିନ୍ତା କରନ୍ତୁ | ଏଆଇ ସହାୟତାରେ ବୈଦିକ ଗଣିତର ହଜିଯାଇଥିବା ଖଣ୍ଡଗୁଡ଼ିକୁ ପୁନଃ ଯୋଡ଼ାଯାଇପାରିବ କି ନାହିଁ ତାହା ମଧ୍ୟ ପ୍ରୟାସ କରାଯିବା ଉଚିତ୍ ।

ସାଥିମାନେ,

ମୋର ବିଶ୍ୱାସ ଯେ ଏହି ଶିଖର ସମ୍ମିଳନୀ ଚିନ୍ତାଧାରା ଆଦାନପ୍ରଦାନ ପାଇଁ ଏକ ଉତ୍ତମ ସୁଯୋଗ ପ୍ରଦାନ କରିବ| ମୁଁ ଚାହୁଁଛି ଏହି ଶିଖର ସମ୍ମିଳନୀରେ ଏଥିରେ ଯୋଗ ଦେଉଥିବା ପ୍ରତ୍ୟେକ ପ୍ରତିନିଧିଙ୍କ ପାଇଁ ଏକ ମହାନ ଶିକ୍ଷଣ ଅନୁଭୂତି ସାବ୍ୟସ୍ତ ହେଊ | ଆଗାମୀ ଦୁଇ ଦିନ ମଧ୍ୟରେ ଆପଣ AIର ବିଭିନ୍ନ ଦିଗ ଉପରେ ଅନୁଧ୍ୟାନ କରିବେ | ମୁଁ ଆଶା କରୁଛି ଏହା ଯେ ଆମକୁ  ନିର୍ଦ୍ଦିଷ୍ଟ ଫଳାଫଳ ହେବ | ଏହାକୁ କାର୍ଯ୍ୟକାରୀ କରିବା ଦ୍ୱାରା ଆମେ ନିଶ୍ଚିତ ଭାବରେ ଏକ ଦାୟିତ୍ୱବାନ ଏବଂ ସ୍ଥାୟୀ ଭବିଷ୍ୟତ ନିର୍ମାଣ ପାଇଁ ପଥ ପ୍ରଶସ୍ତ କରିବ | ମୁଁ ଆପଣଙ୍କୁ ଶୁଭେଚ୍ଛା ଜଣାଉଛି |

ଆପଣଙ୍କୁ ବହୁତ ଧନ୍ୟବାଦ।

ନମସ୍କାର!

ଅସ୍ୱୀକାର: ଏହା ହେଉଛି ପ୍ରଧାନମନ୍ତ୍ରୀଙ୍କ ଭାଷଣର ଆନୁମାନିକ ଅନୁବାଦ । ମୂଳ ଭାଷଣ ହିନ୍ଦୀରେ ଦିଆଯାଇଥିଲା।

*****

NS/SLP