ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ନେଟୱାର୍କ 18 ପକ୍ଷରୁ ଆୟୋଜିତ Rising India ସମ୍ମିଳନୀରେ ଉଦ୍ବୋଧନ ଦେଇଛନ୍ତି ।

ଏହି ସମ୍ମିଳନୀକୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଲେ ଯେ ଯେତେବେଳେ ଆମେ ଏକ ରାଷ୍ଟ୍ର ପରିପ୍ରେକ୍ଷୀରେ ଭାରତର କଥା କହୁ ଏହାର ବ୍ୟାପକ ପରିଭାଷା ରହିଛି । ସେ କହିଲେ ଯେ ଅର୍ଥବ୍ୟବସ୍ଥାର ଉତ୍ଥାନ ବ୍ୟତିରେକେ, ସେ ଅନୁଭବ କରନ୍ତି ଯେ Rising Indiaର ଅର୍ଥ ହେଲା ଭାରତର ଜନସାଧାରଣଙ୍କ ମନରେ ଆତ୍ମସମ୍ମାନର ଉଦୟ ଘଟିବା । ଲୋକମାନଙ୍କ ସାମୂହିକ ଇଚ୍ଛାଶକ୍ତି ବଳରେ ଏପରିକି ଅସମ୍ଭବକୁ ବି ସମ୍ଭବ କରାଯାଇପାରେ । ପ୍ରଧାନମନ୍ତ୍ରୀ କହିଲେ ଯେ ଏହି ସାମୂହିକ ଇଚ୍ଛାଶକ୍ତି ହିଁ ନୂତନ ଭାରତର ଅଙ୍ଗୀକାରବଦ୍ଧତାକୁ ସାକର କରିବା ଦିଗରେ କାର୍ଯ୍ୟ କରୁଛି ।

ପ୍ରଧାନମନ୍ତ୍ରୀ କହିଲେ ଯେ ଅନେକ ରାଷ୍ଟ୍ରଙ୍କ ମନରେ ଯେଉଁ ବଦ୍ଧମୂଳ ଧାରଣା ବସା ବାନ୍ଧି ରହିଛି ଯେ ସରକାର ହେଉଛନ୍ତି ବିକାଶ ଓ ପରିବର୍ତ୍ତନର ବାହକ ଏବଂ ନାଗରିକମାନେ ଏହାର ପାଶ୍ଚାତଧାବନ କରିଥାନ୍ତି, ଏଭଳି ଧାରଣା ଭ୍ରାନ୍ତ । ଭାରତରେ ଏହି ଧାରଣାରେ ବିଗତ ଚାରି ବର୍ଷ ମଧ୍ୟରେ ପରିବର୍ତ୍ତନ ଘଟିସାରିଛି । ଲୋକମାନେ ଏବେ ନିଜେ ସବୁ ବିକାଶମୂଳକ କାର୍ଯ୍ୟରେ ନେତୃତ୍ୱ ଗ୍ରହଣ କରୁଛନ୍ତି ଏବଂ ସରକାର ସେମାନଙ୍କର ଅନୁଧାବନ କରୁଛନ୍ତି ।

ପ୍ରଧାନମନ୍ତ୍ରୀ କହିଲେ ଯେ ସ୍ୱଚ୍ଛ ଭାରତ ଅଭିଯାନ ଏତେ କମ୍‌ ସମୟ ଭିତରେ ଏକ ଗଣ ଆନ୍ଦୋଳନରେ ପରିଣତ ହୋଇପାରିଛି । ଦେଶର ନାଗରିକମାନେ ଡ଼ିଜିଟାଲ ପେମେଣ୍ଟ ବ୍ୟବସ୍ଥାକୁ ଆପଣାଇ ଦୁର୍ନୀତି ଏବଂ କଳାଟଙ୍କା ବିରୋଧରେ ଏହାକୁ ଅସ୍ତ୍ର ରୂପେ ଉପଯୋଗ କରିଛନ୍ତି । ଶ୍ରୀ ମୋଦୀ କହିଲେ ଯେ ଦେଶର ନାଗରିକମାନେ ସରକାରଙ୍କୁ ଏ ଦିଗରେ ପ୍ରୋତ୍ସାହିତ କରିଛନ୍ତି ଏବଂ ସରକାରଙ୍କ ଏଭଳି ନିଷ୍ପତ୍ତିକୁ ପ୍ରବର୍ତ୍ତନ କରିବାରେ ସଂପୂର୍ଣ୍ଣ ସହଯୋଗ କରିଛନ୍ତି । ଭାରତରେ ଏବେ ବ୍ୟାପକ ସଂସ୍କାରଗତ ପରିବର୍ତ୍ତନର ଧାରା ପ୍ରବାହିତ ହେଉଛି ଏବଂ ତାହା ହୋଇପାରିଛି ନାଗରିକମାନଙ୍କ ପ୍ରତିବଦ୍ଧତା ଯୋଗୁଁ । ଜାତୀୟ ସ୍ତରରେ ଥିବା ବିଭିନ୍ନ ବୈଷମ୍ୟକୁ ଦୂର କରିବା ସକାଶେ ସରକାର ଏକ ସ୍ପଷ୍ଟ ଆଭିମୁଖ୍ୟ ଓ ପରିକଳ୍ପନା ନେଇ କାର୍ଯ୍ୟ କରୁଛନ୍ତି । ଭିଡ଼ିଓ ସହାୟତାରେ ପ୍ରଧାନମନ୍ତ୍ରୀ ଏହାର ବ୍ୟାଖ୍ୟା କରି କହିଲେ ଯେ ଉଜ୍ଜ୍ୱଳା ଯୋଜନା କିଭଳି କେବଳ ଲୋକମାନଙ୍କ ପାକଶାଳାରେ ପରିବର୍ତ୍ତନ ଆଣିନାହିଁ ପରନ୍ତୁ ସମଗ୍ର ପରିବାରରେ ସଂସ୍କାର ଆଣିଛି । ଏହା ଆମ ସାମାଜିକ ଢ଼ାଞ୍ଚାରେ ଥିବା ଅସମାନତାକୁ ଦୂର କରିବାରେ ସକ୍ଷମ ହୋଇପାରିଛି ବୋଲି ସେ ସୂଚାଇଥିଲେ ।

ପ୍ରଧାନମନ୍ତ୍ରୀ କହିଲେ ଯେ ମଣିପୁରରେ ଗୋଟିଏ ଦିନ ବିତାଇ ସେ ସଦ୍ୟ ନୂଆଦିଲ୍ଲୀ ଫେରିଛନ୍ତି । ମଣିପୁରଠାରେ ସେ ଭାରତୀୟ ବିଜ୍ଞାନ କଂଗ୍ରେସର ଅଧିବେଶନକୁ ଉଦ୍ଘାଟନ କରିଥିଲେ ଏବଂ ସେଠାରେ ଏକ କ୍ରୀଡ଼ା ବିଶ୍ୱବିଦ୍ୟାଳୟର ଶିଳାନ୍ୟାସ କରିଥିଲେ । ଏହା ବ୍ୟତୀତ ଉତ୍ତର ପୂର୍ବାଞ୍ଚଳ କ୍ଷେତ୍ର ସକାଶେ କେତେଗୁଡ଼ିଏ ଗୁରୁତ୍ୱପୂର୍ଣ୍ଣ ପ୍ରକଳ୍ପର ଶୁଭାରମ୍ଭ ଓ ଶିଳାନ୍ୟାସ କରିଥିଲେ । ପ୍ରଧାନମନ୍ତ୍ରୀ କହିଲେ ଯେ ପୂର୍ବ ଭାରତର ଆବେଗିକ ସମନ୍ୱୟ ଏବଂ ଜନସଂଖ୍ୟାଗତ ବିଭାଜନ କଥା ସଦାସର୍ବଦା ଆମେ ସ୍ମରଣ ରଖିବା ଉଚିତ । ସରକାର ଏବେ ‘ଏକ୍ଟ ଇଷ୍ଟ ଏଣ୍ଡ୍ ଏକ୍ଟ ଫାଷ୍ଟ ଫର୍‌ ଇଣ୍ଡିଆସ୍‌ ଇଷ୍ଟ’ ନୀତିକୁ ଅଗ୍ରପ୍ରାଧାନ୍ୟ ଦେଇ କାର୍ଯ୍ୟ କରୁଛନ୍ତି । ଏଥିରେ କେବଳ ଉତ୍ତର ପୂର୍ବାଞ୍ଚଳ କ୍ଷେତ୍ର ନୁହେଁ, ବରଂ ପୂର୍ବ ଉତ୍ତର ପ୍ରଦେଶ, ବିହାର, ପଶ୍ଚିମବଙ୍ଗ ଏବଂ ଓଡ଼ିଶା ଆଦି ରାଜ୍ୟ ସାମିଲ ବୋଲି ସେ ସୂଚାଇଥିଲେ ।

ଆସାମର ଗ୍ୟାସ କ୍ରାକର ପ୍ରକଳ୍ପର ଉଦାହରଣ ଦେଇ ପ୍ରଧାନମନ୍ତ୍ରୀ କହିଲେ ଯେ ଗୋରଖପୁର, ବାରାଉଣୀ ଏବଂ ସିନ୍ଦ୍ରୀର ସାର କାରଖାନାଗୁଡ଼ିକର ପୁନରୁତ୍ଥାନ, ଜଗଦୀଶପୁର-ହଳଦିଆ ଗ୍ୟାସ ପାଇପଲାଇନ୍‌ ଏବଂ ଧୋଲା-ସାଦିଆ ପୋଲ ଏହି କ୍ଷେତ୍ରରେ ବିକାଶମୂଳକ କାର୍ଯ୍ୟକ୍ରମକୁ କେତେ ଗୁରୁତ୍ୱର ସହ କାର୍ଯ୍ୟକାରୀ କରାଯାଉଛି – ଏସବୁ ତାହାର ଜ୍ଜ୍ଵଳନ୍ତ ନିଦର୍ଶନ ବୋଲି ସେ କହିଥିଲେ । ଶ୍ରୀ ମୋଦୀ କହିଲେ ଯେ ପୂର୍ବ ଭାରତରେ ଏବେ 12ଟି ନୂଆ ବିମାନ ବନ୍ଦର ନିର୍ମାଣ କରାଯାଉଛି ।

ପ୍ରଧାନମନ୍ତ୍ରୀ କହିଲେ ଯେ ଦେଶର ଯେଉଁ 18,000 ଗ୍ରାମ ବିଜୁଳିବିହୀନ ରହିଥିଲା ସେଥିରୁ 13,000 ହେଉଛି ପୂର୍ବ ଭାରତର ଏବଂ ଅନ୍ୟ 5,000 ହେଉଛି ଉତ୍ତର ପୂର୍ବାଞ୍ଚଳ କ୍ଷେତ୍ରର । ଖୁବ୍‌ ଶୀଘ୍ର ସେହିସବୁ ବିଜୁଳିବିହୀନ ଗ୍ରାମମାନଙ୍କୁ ସମସ୍ତଙ୍କୁ ବିଜୁଳି ଶକ୍ତି ଯୋଗାଣର ଲକ୍ଷ୍ୟ ପୂରଣ କରାଯିବ । ସୌଭାଗ୍ୟ ଯୋଜନାରେ ଦେଶର ପ୍ରତ୍ୟେକ ପରିବାରଙ୍କୁ ବିଜୁଳିଶକ୍ତି ଯୋଗାଇ ଦିଆଯିବ । ପୂର୍ବ ଭାରତର ଏହି ପ୍ରଗତି ଧାରା ଏବେ ବିଚ୍ୟୁତିରୁ ସଂମ୍ପୃକ୍ତି ଅଭିମୁଖେ ଧାବମାନ । ଏହା ‘Rising India’କୁ ଶକ୍ତି ଯୋଗାଇବ ବୋଲି ପ୍ରଧାନମନ୍ତ୍ରୀ ଦୃଢ଼ୋକ୍ତି ବ୍ୟକ୍ତ କରିଥିଲେ ।
ସ୍ୱାସ୍ଥ୍ୟ ସେକ୍ଟର ସଂପର୍କରେ ସୂଚନା ଦେଇ ପ୍ରଧାନମନ୍ତ୍ରୀ କହିଲେ ଯେ ସରକାର ଏବେ ଏହି ସେକ୍ଟରର ଚାରିଟି ମୁଖ୍ୟ ଦିଗ ଉପରେ ଗୁରୁତ୍ଵ ଆରୋପ କରୁଛନ୍ତି । ସେଗୁଡ଼ିକ ହେଲା:

ପ୍ରତିଷେଧକ ସ୍ୱାସ୍ଥ୍ୟ

ସୁଲଭ ସ୍ୱାସ୍ଥ୍ୟସେବା

ଯୋଗାଣଭିତ୍ତିକ ହସ୍ତକ୍ଷେପ

ମିଶନ ଢାଞ୍ଚାରେ ହସ୍ତକ୍ଷେପ

ପ୍ରତିଷେଧକ ସ୍ୱାସ୍ଥ୍ୟସେବା ମାଧ୍ୟମରେ ଏବେ ଦେଶର 13କୋଟି ପରିବାରଙ୍କ ନିକଟରେ ଶୌଚାଗାର ପହଞ୍ଚାଯାଇପାରିଛି ବୋଲି ଦର୍ଶଇ ପ୍ରଧାନମନ୍ତ୍ରୀ କହିଲେ ଯେ 2014ମସିହାରେ ଏହି ସଂଖ୍ୟା 6.5 କୋଟି ଥିଲା । ଦେଶର ପରିମଳ କାର୍ଯ୍ୟକ୍ରମର ବ୍ୟାପ୍ତି 38 ପ୍ରତିଶତରୁ ବୃଦ୍ଧି ପାଇ ଏବେ 80ପ୍ରତିଶତ ଛୁଇଁଛି । ଯୋଗ ଏବେ ଗଣ ଆନ୍ଦୋଳନରେ ପରିଣତ ହୋଇପାରିଛି । ଚଳିତବର୍ଷ ବଜେଟରେ ‘ୱେଲନେସ କେନ୍ଦ୍ର’ କାର୍ଯ୍ୟକ୍ରମ ସକାଶେ ଘୋଷଣା କରାଯାଇଛି । ସେହିଭଳି ଟୀକାକରଣ କାର୍ଯ୍ୟକ୍ରମକୁ ସର୍ବବ୍ୟାପୀ କରିବା ସକାଶେ ସରକାର ସଂକଳ୍ପବଦ୍ଧ ବୋଲି ସେ ସୂଚାଇଥିଲେ ।

ପ୍ରଧାନମନ୍ତ୍ରୀ କହିଲେ ଯେ ଦେଶବ୍ୟାପୀ ଏବେ 3,000ରୁ ଉର୍ଦ୍ଧ୍ଵ ଜନ ଔଷଧି କେନ୍ଦ୍ର ସ୍ଥାପନ କରାଯାଇଛି । ସେହିସବୁ କେନ୍ଦ୍ରରେ 800ରୁ ଉର୍ଦ୍ଧ୍ଵ କିସମର ଔଷଧ ଉପଲବ୍ଧ, ତାହା ପୁଣି ସୁଲଭ ମୂଲ୍ୟରେ ରୋଗୀମାନଙ୍କୁ ଯୋଗାଇ ଦିଆଯାଉଛି । ସେହିଭଳି ଷ୍ଟେଣ୍ଟ ଏବଂ ଆଣ୍ଠୁ ପ୍ରତିରୋପକ ସକାଶେ ଆବଶ୍ୟକ ଉପକରଣ ମୂଲ୍ୟକୁ ନିୟନ୍ତ୍ରଣ କରାଯାଇଛି ଏବଂ ଏହାର ଦର ହ୍ରାସ ଘଟିଛି ବୋଲି ପ୍ରଧାନମନ୍ତ୍ରୀ ସୂଚାଇଥିଲେ ।

ପ୍ରଧାନମନ୍ତ୍ରୀ କହିଲେ ଯେ ଆୟୁଷ୍ମାନ ଭାରତ ଯୋଜନା ଦେଶର 10 କୋଟି ପରିବାରଙ୍କୁ ସ୍ୱାସ୍ଥ୍ୟ ବୀମା ସୁବିଧା ଯୋଗାଇଦେବ ।

ପ୍ରଧାନମନ୍ତ୍ରୀ କହିଲେ ଯେ ଡ଼ାକ୍ତରଙ୍କ ଅଭାବ ପୂରଣ ସକାଶେ ଦେଶର ମେଡ଼ିକାଲ କଲେଜମାନଙ୍କରେ ସିଟ ସଂଖ୍ୟାରେ ଯଥେଷ୍ଟ ବୃଦ୍ଧି କରାଯାଇଛି । ଜାତୀୟ ପୁଷ୍ଟିସାଧନ ଅଭିଯାନ ଚଳିତ ବର୍ଷ ଆନ୍ତର୍ଜାତିକ ମହିଳା ଦିବସ ଅବସରରେ ଆରମ୍ଭ କରାଯାଇଥିବା ସେ ଉଲ୍ଲେଖ କରିଥିଲେ ।

ପ୍ରଧାନମନ୍ତ୍ରୀ ଶ୍ରୀ ମୋଦୀ କହିଥିଲେ ଯେ ପ୍ରତ୍ୟେକ ସେକ୍ଟରରେ ସରକାର ଏବେ ଅଭିନବ ବିକାଶ ମଡ଼େଲମାନ କାର୍ଯ୍ୟକାରୀ କରୁଛନ୍ତି ଯାହା ବିକାଶର ଧାରାକୁ ତ୍ୱରାନ୍ୱିକ କରିବ ।

ଦେଶର ଶକ୍ତି କ୍ଷେତ୍ର ସଂପର୍କରେ ସୂଚନା ଦେଇ ପ୍ରଧାନମନ୍ତ୍ରୀ କହିଲେ ଯେ ଏହି କ୍ଷେତ୍ରରେ ପ୍ରଚଳିତ ଥିବା ବଦ୍ଧମୂଳ ଧାରଣା ଓ ସମସ୍ୟାକୁ ଦୂର କରି ସେସବୁର ସମାଧାନ ସୂତ୍ର ବାହାର କରିବା ପାଇଁ ସରକାର ଚେଷ୍ଟିତ । ଅଧୁନା ସରକାରଙ୍କ ଶକ୍ତି ମନ୍ତ୍ରଣାଳୟ, ଅକ୍ଷୟ ଶକ୍ତି ମନ୍ତ୍ରଣାଳୟ ଏବଂ କୋଇଲା ମନ୍ତ୍ରଣାଳୟ ଗୋଟିଏ ୟୁନିଟ ଭଳି କାର୍ଯ୍ୟ କରୁଛନ୍ତି । ଭାରତ ଧୀରେ ଧୀରେ ଶକ୍ତି ବାଧିତ ରାଷ୍ଟ୍ରରୁ ଶକ୍ତି ଉଦବୃତ୍ତ ରାଷ୍ଟ ଦିଗରେ ଅଗ୍ରସର ହେଉଛି । ସେହିଭଳି ନେଟୱାର୍କ ବିଫଳତା ଅବସ୍ଥାରୁ ନେଟ୍‌ ଏକ୍ସପୋର୍ଟର ଭାବେ ପରିଚିତ ହେବାକୁ ଯାଉଛି ।

ପ୍ରଧାନମନ୍ତ୍ରୀ କହିଲେ ଯେ ଆଜି ଲୋକମାନେ ବିଶ୍ୱାସ କରୁଛନ୍ତି ଯେ ଭାରତ ତା’ର ଦୁର୍ବଳତାକୁ ପଛରେ ପକାଇ ଆଗକୁ ଅଗ୍ରସର ହୋଇପାରିବ । ଏହି ବିଶ୍ୱାସ ହିଁ ହେଉଛି Rising Indiaର ମୂଳ ଭିତ୍ତି । ଶ୍ରୀ ମୋଦୀ କହିଲେ ଯେ ଆଜି ଭାରତର ବିକାଶକୁ ସାରା ବିଶ୍ୱ ସ୍ୱୀକାର କରୁଛି । India ସମଗ୍ର ବିଶ୍ୱକୁ ଏକ ନୂତନ ଦିଗଦର୍ଶନ ପ୍ରଦାନ କରୁଛି । ତାହା କେବଳ ନିଜର ବିକାଶ କ୍ଷେତ୍ରରେ ନୁହେଁ, ବରଂ ସମଗ୍ର ବିଶ୍ୱର ବିକାଶ ପାଇଁ ଏହା ଉଦ୍ଦିଷ୍ଟ । ପ୍ରଧାନମନ୍ତ୍ରୀ କହିଲେ ଯେ ଅଧୁନା ଆରମ୍ଭ ହୋଇଥିବା ସୌରଶକ୍ତି ବିପ୍ଳବ ଯାହାକି ନିକଟରେ ନୂଆଦିଲ୍ଲୀ ଠାରେ ଅନୁଷ୍ଠିତ ଆନ୍ତର୍ଜାତିକ ସୌର ମେଣ୍ଟ ସମ୍ମିଳନୀରେ ପ୍ରତିଫଳିତ ହୋଇଥିଲା, ତାହା ଦେଶକୁ ଏକ ନୂତନ ଶୀର୍ଷରେ ପହଞ୍ଚାଇବ । ସେ କହିଲେ ଯେ ଜି-20 ଏବଂ ମିଳିତ ଜାତିସଂଘ ଭଳି ଆନ୍ତର୍ଜାତିକ ପ୍ଲାଟଫର୍ମରେ ଭାରତ ଏଭଳି ପ୍ରସଙ୍ଗମାନ ଉପସ୍ଥାପନ କରିଆସୁଛି ଯାହା ଦ୍ୱାରା ସମଗ୍ର ବିଶ୍ୱ ପ୍ରଭାବିତ ହୋଇଛନ୍ତି । ସେଭଳି ସମସ୍ୟାର ସମାଧାନ ଦ୍ୱାରା ସମଗ୍ର ବିଶ୍ୱ ଉପକୃତ ହୋଇପାରିବ । ସେସବୁ ମଧ୍ୟରୁ ଆତଙ୍କବାଦ, କଳା ଟଙ୍କା ଏବଂ ଦୁର୍ନୀତି ଅନ୍ୟତମ ।

ପ୍ରଧାନମନ୍ତ୍ରୀ କହିଲେ ଯେ ଆର୍ଥିକ ଦିଗରେ ଗତ ତିନିରୁ ଚାରି ବର୍ଷ ମଧ୍ୟରେ, ଭାରତ ବିଶ୍ୱ ଆର୍ଥିକ ବିକାଶ ପାଇଁ ଶକ୍ତି ଯୋଗାଇଛି । ମାକ୍ରୋ-ଇକୋନୋମିକ ସୂଚକାଂକରେ ଭାରତର ସାଫଲ୍ୟ ବେଶ୍‌ ଉଲ୍ଲେଖନୀୟ । ତେଣୁ ରେଟିଂ ଏଜେନ୍ସିମାନେ India ସଂପର୍କରେ ସେମାନଙ୍କର ରେଟିଂ ଆକଳନରୁ ବାରମ୍ବାର ଆଗକୁ ଘୁଞ୍ଚାଇ ଉଚ୍ଚ ସ୍ତରକୁ ନେଇ ଚାଲିଛନ୍ତି ।

ପ୍ରଧାନମନ୍ତ୍ରୀ କହିଲେ ଯେ ସରକାର ଗରିବ, ନିମ୍ନ ମଧ୍ୟବିତ୍ତ ଏବଂ ମଧ୍ୟବର୍ଗଙ୍କ ଆଶା ଆକାଂକ୍ଷା ପୂରଣ କରିବା ଲକ୍ଷ୍ୟ ନେଇ ସାମଗ୍ରିକ ଭାବେ ବିକାଶ ଯୋଜନାମାନ କାର୍ଯ୍ୟକାରୀ କରୁଛନ୍ତି । ପ୍ରଧାନମନ୍ତ୍ରୀ ମୁଦ୍ରା ଯୋଜନା ଯୁବକ ଏବଂ ମହିଳାମାନଙ୍କୁ ସଶକ୍ତ କରିବା ଦିଗରେ ଏକ ସଫଳ ସାଧନରେ ପରିଣତ ହୋଇଛି ବୋଲି ପ୍ରଧାନମନ୍ତ୍ରୀ ଦୃଢ଼ୋକ୍ତି ବ୍ୟକ୍ତ କରିଥିଲେ ।

****