ପିଏମଇଣ୍ଡିଆ

ଆବଣ୍ଟିତ 10,000 ବର୍ଗ କିଲୋମିଟର ଅଞ୍ଚଳରେ ପଲିମେଟାଲିକ୍ ସଲଫାଇଡର ଅନୁସନ୍ଧାନ ଏବଂ ତତସଂଲଗ୍ନ ଉନ୍ନୟନ କାର୍ଯ୍ୟ ହାତକୁ ନେବା ପାଇଁ ଭାରତର ଭୂ-ତତ୍ତ୍ୱ ବିଜ୍ଞାନ ମନ୍ତ୍ରଣାଳୟ ଏବଂ ଆନ୍ତର୍ଜାତିକ ସମୁଦ୍ରପୃଷ୍ଠ ପ୍ରାଧିକରଣ (ISA) ସହିତ ଏକ 15ବର୍ଷିଆ ଚୁକ୍ତି ସ୍ୱାକ୍ଷର ପାଇଁ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କେନ୍ଦ୍ର କ୍ୟାବିନେଟ ବୈଠକରେ ଅନୁମୋଦନ କରାଯାଇଛି । ଏହା ଭାରତ ମହାସାଗର ମଧ୍ୟରେ ଅବସ୍ଥିତ କେନ୍ଦ୍ରୀୟ ଏବଂ ଦକ୍ଷିଣ-ପଶ୍ଚିମ ଭାରତୀୟ ଶୈଳମାଳା (SWIR)ରେ କରାଯିବ ।

ଏହି 15ବର୍ଷିଆ ଚୁକ୍ତି ସ୍ୱାକ୍ଷର ଦ୍ୱାରା ଆମ ଦେଶ ଭାରତ ମହାସାଗର ମଧ୍ୟରେ ଅବସ୍ଥିତ କେନ୍ଦ୍ରୀୟ ଏବଂ ଦକ୍ଷିଣ-ପଶ୍ଚିମ ଭାରତୀୟ ଶୈଳମାଳା (SWIR)ରେ ପଲିମେଟାଲିକ୍ ସଲଫାଇଡର ଅନୁସନ୍ଧାନ ପାଇଁ ଏକଚାଟିଆ ଅଧିକାର ପାଇବ । ପୁନଶ୍ଚ ଏହା ଚୀନ୍, କୋରିଆ ଏବଂ ଜର୍ମାନୀ ଭଳି ଦେଶ ଆଗରୁ ସକ୍ରିୟ ଥିବା ଭାରତ ମହାସାଗରରେ ଆମର ଉପସ୍ଥିତିକୁ ବୃଦ୍ଧି କରିବ । ଏହି କାର୍ଯ୍ୟକ୍ରମ ଭାରତର ଭୂ-ତତ୍ତ୍ୱ ବିଜ୍ଞାନ ମନ୍ତ୍ରଣାଳୟ କାର୍ଯ୍ୟକାରୀ କରିବ ଏବଂ ଏଥିରେ ବିଭିନ୍ନ ଜାତୀୟ ଅନୁଷ୍ଠାନ ଗବେଷଣା ପ୍ରୟୋଗଶାଳା ଏବଂ ସଂସ୍ଥାମାନେ ଅଂଶଗ୍ରହଣ କରିବେ ।

ପୃଷ୍ଠଭୂମି –

ଗଭୀର ସମୁଦ୍ରରୁ ଧାତବ ଚିମ୍ନୀ ମାଧ୍ୟମରେ ଉପରକୁ ଉଠୁଥିବା ମାଗ୍ମାରୁ ଜାତ ଉତ୍ତପ୍ତ ତରଳ ପଦାର୍ଥର ଅବକ୍ଷିପ୍ତ ଅଂଶ ହୋଇଥିବାରୁ ପଲିମେଟାଲିକ୍ ସଲଫାଇଡ (PMS)ରେ ଲୌହ, ତାମ୍ର, ଜିଙ୍କ୍, ରୂପା, ସୁନା, ପ୍ଲାଟିନମ ପରି ଧାତୁ ବିଭିନ୍ନ ମାତ୍ରାରେ ଥାଏ । ଶୈଳମାଳାରେ ଥିବା PMS ଏହାର ବହୁମୂଲ୍ୟତା ଏବଂ ଦୀର୍ଘକାଳୀନ ବ୍ୟବସାୟିକ ଉପାଦେୟତା ଯୋଗୁ ବିଶ୍ୱର ଦୃଷ୍ଟି ଆକର୍ଷଣ କରିଛି ।

ମିଳିତ ଜାତିସଂଘର ସମୁଦ୍ର ନିୟମାବଳୀ ଚୁକ୍ତି (UNCLOS) ଅଧିନରେ ଆନ୍ତର୍ଜାତିକ ସମୁଦ୍ରପୃଷ୍ଠ ପ୍ରାଧିକରଣ (ISA) ପୂର୍ବରୁ ଭାରତ ମହାସାଗର ମଧ୍ୟରେ ଅବସ୍ଥିତ 10,000 ବର୍ଗ କିଲୋମିଟର ପରିମିତ କେନ୍ଦ୍ରୀୟ ଏବଂ ଦକ୍ଷିଣ-ପଶ୍ଚିମ ଭାରତୀୟ ଶୈଳମାଳା (SWIR)ରେ ପଲିମେଟାଲିକ୍ ସଲଫାଇଡର ଅନୁସନ୍ଧାନ ପାଇଁ 15 ବର୍ଷର କାର୍ଯ୍ୟଯୋଜନା ନିମନ୍ତେ ଭାରତର ଭୂ-ତତ୍ତ୍ୱ ବିଜ୍ଞାନ ମନ୍ତ୍ରଣାଳୟ କରିଥିବା ଆବେଦନକୁ ଅନୁମୋଦନ କରିସାରିଛି । ଆନ୍ତର୍ଜାତିକ ଜଳଭାଗରେ ସମୁଦ୍ରଶଯ୍ୟାରେ ଥିବା ନିର୍ଜୀବ ଉପାଦାନର ନିୟନ୍ତ୍ରଣ ଆନ୍ତର୍ଜାତିକ ସମୁଦ୍ରପୃଷ୍ଠ ପ୍ରାଧିକରଣ (ISA) ହାତରେ ରହିଥାଏ ।