ପିଏମଇଣ୍ଡିଆ

• ନୂତନ ମେଟ୍ରୋ ପ୍ରକଳ୍ପଗୁଡ଼ିକ ସହରର ବିକାଶକୁ ତ୍ୱରାନ୍ୱିତ କରିବ ଏବଂ ଜୀବନଯାପନକୁ ଅଧିକ ସୁଗମ କରିବ: ପ୍ରଧାନମନ୍ତ୍ରୀ

• ଭଲ ଯୋଗାଯୋଗ ସୁବିଧା ଥିବା ପୁଣେ ଅଧିକ ଦ୍ରୁତ ବିକାଶ ଲାଭ କରିପାରିବ, ଏହି ସହର ଦେଶର ଯୁବପିଢ଼ିଙ୍କ ସ୍ୱପ୍ନ ଓ ଆକାଂକ୍ଷାର ଏକ କେନ୍ଦ୍ରସ୍ଥଳୀ; ମେଟ୍ରୋ ଯୋଗାଯୋଗ ସୁଦୃଢ଼ ହେବା ଦ୍ୱାରା ପୁଣେ ସହରର ବିକାଶକୁ ଏକ ନୂତନ ଗତି ମିଳିବ: ପ୍ରଧାନମନ୍ତ୍ରୀ
• ଆମ ସହରଗୁଡ଼ିକ କେବଳ ବାସସ୍ଥାନ ନୁହେଁ, ବରଂ ଦେଶର ଆର୍ଥିକ ଗତିବିଧିର ପ୍ରମୁଖ କେନ୍ଦ୍ର; ଆମକୁ ଦେଶବ୍ୟାପୀ ଶହ ଶହ ଛୋଟ ସହରକୁ ସକ୍ରିୟ ବିକାଶ କେନ୍ଦ୍ର ଭାବରେ ଗଢ଼ି ତୋଳିବାକୁ ହେବ: ପ୍ରଧାନମନ୍ତ୍ରୀ
• ଆଜି ଭାରତ ଏପରି ଏକ ରାଷ୍ଟ୍ର ଭାବରେ ଛିଡ଼ା ହୋଇଛି ଯାହା କେବଳ ଦ୍ରୁତତମ ଅଭିବୃଦ୍ଧିଶୀଳ ଅର୍ଥବ୍ୟବସ୍ଥା ନୁହେଁ, ବରଂ ଦ୍ରୁତ ଗତିରେ ଦାରିଦ୍ର୍ୟ ହ୍ରାସ କରୁଥିବା ଦେଶ ମଧ୍ୟ: ପ୍ରଧାନମନ୍ତ୍ରୀ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ଭିଡିଓ କନଫରେନ୍ସିଂ ମାଧ୍ୟମରେ ପ୍ରାୟ ୨୧,୮୦୦ କୋଟି ଟଙ୍କା ମୂଲ୍ୟର ପୁଣେ ମେଟ୍ରୋ ପ୍ରକଳ୍ପଗୁଡ଼ିକର ଉଦଘାଟନ ଏବଂ ଶିଳାନ୍ୟାସ କରିଛନ୍ତି। ଏହି ଅବସରରେ ଉପସ୍ଥିତ ଜନସାଧାରଣଙ୍କୁ ଆଭାସୀ ମାଧ୍ୟମରେ ଉଦ୍‌ବୋଧନ ଦେଇ ପ୍ରଧାନମନ୍ତ୍ରୀ ପୁଣେ ଓ ମହାରାଷ୍ଟ୍ରବାସୀଙ୍କୁ ଦୀପାବଳିର ହାର୍ଦ୍ଦିକ ଶୁଭେଚ୍ଛା ଜଣାଇଥିଲେ। ସେ କହିଥିଲେ, ଦୈନନ୍ଦିନ ଜୀବନରେ ନୂତନ ସୁବିଧା ମିଳିଲେ ପାର୍ବଣର ଆନନ୍ଦ ଆହୁରି ବଢ଼ିଯାଏ। ଦଶ ବର୍ଷ ପୂର୍ବେ ସେ କିପରି ପୁଣେ ମେଟ୍ରୋର ପ୍ରଥମ ପର୍ଯ୍ୟାୟ ପାଇଁ ଭିତ୍ତିପ୍ରସ୍ତର ସ୍ଥାପନ କରିଥିଲେ, ତାହା ସ୍ମରଣ କରି ସେ କହିଥିଲେ, ହିଞ୍ଜୱାଡିରୁ ଶିବାଜୀନଗର କରିଡରର ଉଦଘାଟନ ଏକ ପ୍ରମୁଖ ଆଇଟି (ଆଇଟି) କେନ୍ଦ୍ରକୁ ଉନ୍ନତ ଯୋଗାଯୋଗ ସୁବିଧା ଯୋଗାଇ ଦେବ । ଆଜି ଆରମ୍ଭ ହୋଇଥିବା ନୂତନ ଲାଇନ୍ ସହରର ପୁରୁଣା ଓ ନୂତନ ଅଞ୍ଚଳଗୁଡ଼ିକୁ ପରସ୍ପର ସହ ଅଧିକ ଭଲ ଭାବରେ ଯୋଡ଼ିବ ।

ପ୍ରଧାନମନ୍ତ୍ରୀ ପୁଣେକୁ ଅଭିନବ ଉପାୟ ତଥା ବିଚାରର ଏକ ଐତିହାସିକ କେନ୍ଦ୍ର ଭାବରେ ବର୍ଣ୍ଣନା କରିଥିଲେ । ସେ କହିଥିଲେ, ଏହି ସହର ସର୍ବଦା ଦେଶ ଓ ସମାଜକୁ ମାର୍ଗଦର୍ଶନ କରିଆସିଛି ଏବଂ ବର୍ତ୍ତମାନ ଯୁବ ଆକାଂକ୍ଷାର ଏକ କେନ୍ଦ୍ରସ୍ଥଳୀ ପାଲଟିଛି । ଆଇଟି, ଅଟୋମୋବାଇଲ୍, ଔଷଧ ପ୍ରସ୍ତୁତି, ଷ୍ଟାର୍ଟଅପ୍, ନବସୃଜନ ଏବଂ ଉତ୍ପାଦନ କ୍ଷେତ୍ରରେ ଏହି ସହର ‘ବିକଶିତ ଭାରତ‘ର ନୂତନ ଶକ୍ତିକୁ ପ୍ରବାହିତ କରୁଛି। ଏଭଳି ପରିସ୍ଥିତିରେ, ଏଠାରେ ମେଟ୍ରୋ ଯୋଗାଯୋଗ ବ୍ୟବସ୍ଥାର ସୁଦୃଢ଼ୀକରଣ ପୁଣେ ସହରର ବିକାଶକୁ ଏକ ନୂତନ ଗତି ପ୍ରଦାନ କରିବ ବୋଲି ପ୍ରଧାନମନ୍ତ୍ରୀ ଶ୍ରୀ ମୋଦୀ କହିଥିଲେ ।

ପ୍ରଧାନମନ୍ତ୍ରୀ କହିଥିଲେ, ବିକଶିତ ଭାରତରେ ଆଧୁନିକ ସହରଗୁଡ଼ିକ କିପରି ବିକଶିତ ହେଉଛି ପୁଣେ ମେଟ୍ରୋ ତାହାର ଏକ ଉଦାହରଣ । ଶିଳ୍ପ, ବ୍ୟଞ୍ଜନ କିମ୍ବା ସ୍ଥାନୀୟ ଉତ୍ପାଦ ଭଳି ପାରମ୍ପରିକ ପରିଚୟ ଠାରୁ ଊର୍ଦ୍ଧ୍ୱକୁ ଯାଇ ସହରାଞ୍ଚଳ କେନ୍ଦ୍ରଗୁଡ଼ିକୁ ଏବେ ସହଜ ଜୀବନଧାରଣ, ପ୍ରତିଯୋଗିତାମୂଳକ କ୍ଷମତା ଆଦି ମାପଦଣ୍ଡ ଜରିଆରେ ବିବେଚନା କରାଯାଉଛି । ମେଟ୍ରୋ ନେଟୱର୍କ ଏହି କ୍ଷମତାକୁ ମଜବୁତ କରିବା ସହିତ ଯାତାୟାତ ସମୟ ହ୍ରାସ କରିବ ଏବଂ ଅଧିକ ସୁବିଧା ଆଣିଦେବ । ସହରର ସମୟ ସଞ୍ଚୟ ଦ୍ୱାରା ସହରାଞ୍ଚଳର ଉତ୍ପାଦକତା ବୃଦ୍ଧି ପାଇଥାଏ ଯାହା ଦେଶର ଅର୍ଥବ୍ୟବସ୍ଥାକୁ ଗତିଶୀଳ କରିଥାଏ ବୋଲି ସେ ଉଲ୍ଲେଖ କରିଥିଲେ । ଅର୍ଥବ୍ୟବସ୍ଥା ଆଗକୁ ବଢ଼ିଲେ ଉଭୟ ଗରିବ ଏବଂ ମଧ୍ୟବିତ୍ତ ବର୍ଗ ଏହାର ଲାଭ ପାଇଥା’ନ୍ତି ବୋଲି ଶ୍ରୀ ମୋଦୀ ମତପ୍ରକାଶ କରିଥିଲେ ।

ପ୍ରଧାନମନ୍ତ୍ରୀ ଏହି ଅବସରକୁ ଜନକଲ୍ୟାଣକାରୀ ଏବଂ ସକ୍ରିୟ ଶାସନ ବ୍ୟବସ୍ଥାର ଏକ ଉତ୍କୃଷ୍ଟ ଉଦାହରଣ ଭାବେ ଦର୍ଶାଇଥିଲେ । ସେ କହିଥିଲେ, ଗତ ୧୨ ବର୍ଷ ମଧ୍ୟରେ ଭାରତର ମେଟ୍ରୋ ନେଟୱାର୍କ ୨୬ଟି ସହରରେ ପ୍ରାୟ ୧,୨୦୦ କିଲୋମିଟର ପର୍ଯ୍ୟନ୍ତ ବିସ୍ତାରିତ ହୋଇଛି ଏବଂ ଏହା ମାଧ୍ୟମରେ ପ୍ରତିଦିନ ଏକ କୋଟିରୁ ଅଧିକ ଯାତ୍ରୀ ଯାତାୟାତ କରୁଛନ୍ତି । ଆଜି ଭାରତର ମେଟ୍ରୋ ନେଟୱାର୍କ ବିଶ୍ୱର ଶ୍ରେଷ୍ଠ ତିନୋଟି ମେଟ୍ରୋ ନେଟୱାର୍କ ମଧ୍ୟରେ ଗଣାଯାଉଛି ।

ପ୍ରଧାନମନ୍ତ୍ରୀ କହିଥିଲେ, ୨୦୧୪ ମସିହାରୁ ଦେଶରେ ଆସିଥିବା ପରିବର୍ତ୍ତନର ଏକ ପ୍ରତିଛବି ମହାରାଷ୍ଟ୍ରରେ ଦେଖିବାକୁ ମିଳୁଛି । ସେତେବେଳେ ରାଜ୍ୟରେ ମାତ୍ର ୧୦ ରୁ ୧୧ କିଲୋମିଟର ମେଟ୍ରୋ ଲାଇନ୍ କାର୍ଯ୍ୟକ୍ଷମ ଥିଲା, କିନ୍ତୁ ବର୍ତ୍ତମାନ ପ୍ରାୟ ୧୭୫ କିଲୋମିଟର ମେଟ୍ରୋ ଲାଇନ୍ କାର୍ଯ୍ୟକ୍ଷମ ରହିଛି । ଏହାସହିତ, ୨ ଲକ୍ଷ ୫୦ ହଜାର କୋଟି ଟଙ୍କାରୁ ଅଧିକ ନିବେଶ ସହ ୬୮୦ କିଲୋମିଟରରୁ ଅଧିକ ମେଟ୍ରୋ ଲାଇନ୍ ନିର୍ମାଣ କାର୍ଯ୍ୟ ଚାଲିଛି। ଏହି ଅର୍ଥ ଶ୍ରମିକମାନଙ୍କ ପକେଟକୁ ଯାଉଛି, ଇଞ୍ଜିନିୟରମାନଙ୍କୁ ରୋଜଗାର ଦେଉଛି ଏବଂ ବ୍ୟବସାୟ ତଥା କାରଖାନାଗୁଡ଼ିକରେ ନିଯୁକ୍ତି ସୃଷ୍ଟି କରୁଛି ।

ନୂତନ ଭାବେ ଉଦ୍‌ଘାଟିତ କରିଡରର ଅନ୍ୟ ଏକ ବିଶେଷ ଦିଗ ଉପରେ ଆଲୋକପାତ କରି ପ୍ରଧାନମନ୍ତ୍ରୀ କହିଥିଲେ, ସରକାର ଓ ଘରୋଇ କ୍ଷେତ୍ରର ମିଳିତ ପ୍ରୟାସରେ, ସରକାରୀ-ଘରୋଇ ଭାଗୀଦାରୀ ମଡେଲ୍ ଆଧାରରେ ଏହି ମେଟ୍ରୋ ଲାଇନ୍ ନିର୍ମାଣ କରାଯାଇଛି। ଏହା ବିକାଶର ଏପରି ଏକ ମଡେଲ୍, ଯାହାର ସଫଳତା ଦେଶର ଅଗ୍ରଗତିକୁ ଆହୁରି ତ୍ୱରାନ୍ୱିତ କରିଥାଏ ।

ପ୍ରଧାନମନ୍ତ୍ରୀ କହିଥିଲେ, ଭାରତର ପ୍ରତ୍ୟେକ ନାଗରିକ ତଥା ଯୁବକ-ଯୁବତୀମାନେ ‘ଆମେ ଏହା କରି ଦେଖାଇବୁ‘ ଭାବନା ନେଇ ଏକ ‘ବିକଶିତ ଭାରତ‘ ଗଠନ ଦିଗରେ କାର୍ଯ୍ୟ କରୁଛନ୍ତି । ଗତ ୧୨ ବର୍ଷ ମଧ୍ୟରେ ଦେଶ ଗ୍ରାମୀଣ ସଡ଼କ, ଜାତୀୟ ରାଜପଥ, ଏକ୍ସପ୍ରେସୱେ, ନୂତନ ତଥା ବିଦ୍ୟୁତିକରଣ ହୋଇଥିବା ରେଳ ଲାଇନ୍, ଦୀର୍ଘ ସୁଡ଼ଙ୍ଗ ଏବଂ ଉଚ୍ଚ ସେତୁ ନିର୍ମାଣ ଉପରେ ନିଜର ଶକ୍ତି କେନ୍ଦ୍ରିତ କରିଛି । ବର୍ତ୍ତମାନ ଆଗାମୀ ବର୍ଷଗୁଡ଼ିକରେ, ଏହା ସହିତ ଦେଶ ନିଜର ସହରଗୁଡ଼ିକୁ ବିଶ୍ୱର ସର୍ବୋତ୍ତମ ସହର ମଧ୍ୟରେ ସାମିଲ କରିବା ପାଇଁ ସମସ୍ତ ଶକ୍ତି ନିୟୋଜିତ କରିବାକୁ ଯାଉଛି ବୋଲି ସେ କହିଥିଲେ ।

ପ୍ରଧାନମନ୍ତ୍ରୀ କହିଥିଲେ, ସହରଗୁଡ଼ିକ କେବଳ ଆବାସିକ ସ୍ଥାନ ନୁହେଁ ବରଂ ଆର୍ଥିକ କାର୍ଯ୍ୟକଳାପର ପ୍ରମୁଖ ଇଞ୍ଜିନ ଏବଂ ଶହ ଶହ ଛୋଟ ସହରକୁ ଅଭିବୃଦ୍ଧି କେନ୍ଦ୍ରରେ ପରିଣତ କରାଯିବା ଉଚିତ । ଚଳିତ ବର୍ଷ ଫେବୃଆରୀରେ ସହରାଞ୍ଚଳ ଚ୍ୟାଲେଞ୍ଜ ପାଣ୍ଠିକୁ ମଞ୍ଜୁରୀ ପ୍ରଦାନ କରାଯାଇଛି ଯାହା ଲକ୍ଷ ଲକ୍ଷ କୋଟି ଟଙ୍କା ସହରୀ ନିବେଶ ସଂଗ୍ରହ କରିବା ପାଇଁ କେନ୍ଦ୍ରୀୟ ସହାୟତା ଦ୍ୱାରା ସମର୍ଥିତ । ସ୍ଥାନୀୟ ସଂସ୍ଥା ଏବଂ ଘରୋଇ କ୍ଷେତ୍ରର ଅଂଶୀଦାରମାନଙ୍କୁ ମିଶନ ମୋଡରେ ଏହି ପ୍ରୟାସରେ ଯୋଗଦେବାକୁ ସେ ଅନୁରୋଧ କରିଥିଲେ । ମୁଁ ନିଶ୍ଚିତ ଯେ ମହାରାଷ୍ଟ୍ର ଏଥିରେ ନିଜର ଭୂମିକା ଆହୁରି ବିସ୍ତାର କରିବ ବୋଲି ପ୍ରଧାନମନ୍ତ୍ରୀ ମୋଦୀ ଦୃଢ଼ୋକ୍ତି ପ୍ରକାଶ କରିଥିଲେ ।

ପ୍ରଧାନମନ୍ତ୍ରୀ କହିଥିଲେ, ଭାରତର ଦୁଇଟି ପ୍ରମୁଖ ସଫଳତା ବର୍ତ୍ତମାନ ବିଶ୍ୱବ୍ୟାପୀ ଚର୍ଚ୍ଚାର ବିଷୟ ପାଲଟିଛି । ଅନ୍ତର୍ଜାତୀୟ ସ୍ତରରେ ପ୍ରତିକୂଳ ପରିସ୍ଥିତି ସତ୍ତ୍ୱେ ଦେଶ ଦ୍ରୁତ ଅଭିବୃଦ୍ଧି ହାର ବଜାୟ ରଖିଛି । ଅନ୍ୟପଟେ ବିଶ୍ୱ ବ୍ୟାଙ୍କର ସଦ୍ୟତମ ରିପୋର୍ଟ ଅନୁଯାୟୀ, ୧୦ରୁ ୧୨ ବର୍ଷ ମଧ୍ୟରେ ପ୍ରାୟ ୫୦ କୋଟି ଲୋକ ଉତ୍କଟ ଦାରିଦ୍ର୍ୟରୁ ମୁକୁଳି ପାରିଛନ୍ତି । ବହୁ ଦଶନ୍ଧି ଧରି ଦାରିଦ୍ର୍ୟ ଦୂରୀକରଣ କେବଳ ଏକ ସ୍ଲୋଗାନରେ ସୀମିତ ରହିଥିଲା । ‘‘ପୂର୍ବରୁ ଦାରିଦ୍ର୍ୟ ଦୂରୀକରଣ କେବଳ ସ୍ଲୋଗାନରେ ସୀମିତ ରହୁଥିଲା, କିନ୍ତୁ ଆଜି ଭାରତ ତୃଣମୂଳସ୍ତରରେ ଦାରିଦ୍ର୍ୟ ଦୂରୀକରଣରେ ସଫଳ ହୋଇପାରୁଛି,’’ ଶ୍ରୀ ମୋଦୀ ଦୃଢ଼ୋକ୍ତି ପ୍ରକାଶ କରିଥିଲେ ।

ପ୍ରଧାନମନ୍ତ୍ରୀ କହିଥିଲେ, ଦ୍ରୁତତମ ଅଭିବୃଦ୍ଧିଶୀଳ ଅର୍ଥବ୍ୟବସ୍ଥା ଏବଂ ଦ୍ରୁତତମ ଦାରିଦ୍ର୍ୟ ହ୍ରାସକାରୀ ଦେଶ ଭାବରେ ଭାରତର ଦ୍ୱୈତ ମାଇଲଖୁଣ୍ଟ ପରସ୍ପର ସହ ଜଡିତ । କୌଣସି ବର୍ଦ୍ଧିତ ଅର୍ଥବ୍ୟବସ୍ଥା ଏବଂ ବଡ଼ ବଜେଟ୍ ଅଧିକ ସାଧାରଣ ନିବେଶ ଲାଗି ମାର୍ଗପ୍ରଶସ୍ତ କରିଥାଏ । ପୂର୍ବରୁ ଦୁର୍ନୀତି ଏବଂ ବାଟମାରଣା ଯୋଗୁଁ ସହାୟତା ରାଶି ପ୍ରକୃତ ହିତାଧିକାରୀଙ୍କ ପାଖରେ ପହଞ୍ଚି ପାରୁନଥିଲା । ଏବେ ସିଧାସଳଖ ହିତାଧିକାରୀଙ୍କ ପାଖରେ ସରକାରୀ ସହାୟତା ପହଞ୍ଚୁଛି । ରାସ୍ତା, ରେଳ, ବିମାନବନ୍ଦର, ମେଟ୍ରୋ, ବିଦ୍ୟୁତ୍, ପାଣି ଏବଂ ଗ୍ୟାସ୍ ପାଇପଲାଇନରେ ସରକାରୀ ନିବେଶ ଏକକାଳୀନ ଜୀବନଧାରଣ ମାନକୁ ଉନ୍ନତ କରିଛି ଏବଂ ନିଯୁକ୍ତି ସୃଷ୍ଟି କରୁଛି । ଏହି ଦୁଇଟି ସଫଳତା ପରସ୍ପର ସହିତ ଜଡିତ ବୋଲି ଶ୍ରୀ ମୋଦୀ ଉଲ୍ଲେଖ କରିଥିଲେ।

ପ୍ରଧାନମନ୍ତ୍ରୀ ଗରିବଙ୍କ ପାଇଁ ଘର, ଶୌଚାଳୟ, ‘ହର୍ ଘର୍ ଜଲ୍’ (ପ୍ରତିଟି ଘରେ ପାନୀୟ ଜଳ ଯୋଗାଣ) ଏବଂ ରୋଷେଇ ଗ୍ୟାସ୍ ସଂଯୋଗ ଭଳି କଲ୍ୟାଣକାରୀ ସୁବିଧାଗୁଡ଼ିକର ପ୍ରଭାବ ଉପରେ ଆଲୋକପାତ କରିଥିଲେ । ସେ କହିଥିଲେ, ଏହି ଅତ୍ୟାବଶ୍ୟକ ସୁବିଧାଗୁଡ଼ିକ ଲୋକଙ୍କ ଆତ୍ମବିଶ୍ୱାସ ବୃଦ୍ଧି କରିବା ସହ ସେମାନଙ୍କର ଦୈନନ୍ଦିନ ଜୀବନର ମୂଲ୍ୟବାନ ସମୟ ମଧ୍ୟ ବଞ୍ଚାଇଛି। ଏହି ସମୟକୁ ସେମାନେ ନିଜ ପରିବାର ପାଇଁ ଅତିରିକ୍ତ ଆୟ ଉପାର୍ଜନ କରିବାରେ ବିନିଯୋଗ କରୁଛନ୍ତି ।

ଗତ ମାସରେ ସରକାରଙ୍କ ମୁଖ୍ୟ ଭାବରେ ନିଜର ୨୫ ବର୍ଷର କାର୍ଯ୍ୟକାଳ ପୂରଣ କରିବା ବିଷୟରେ ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ, ଗରିବଙ୍କୁ ସଶକ୍ତ କରିବା ଦ୍ୱାରା ସେମାନଙ୍କ ମଧ୍ୟରେ ଦାରିଦ୍ର୍ୟକୁ ପରାସ୍ତ କରିବାର ସାହସ ସୃଷ୍ଟି ହୁଏ । ଏହି ମୂଳମନ୍ତ୍ରକୁ ଆଧାର କରି ସେ କାର୍ଯ୍ୟ କରିଆସିଛନ୍ତି । ଗୁଜରାଟର ମୁଖ୍ୟମନ୍ତ୍ରୀ ଥିବା ସମୟରେ ସରକାରୀ ଯୋଜନାଗୁଡ଼ିକର ସଠିକ୍ କାର୍ଯ୍ୟକାରିତା ଉପରେ ଧ୍ୟାନ ଦେବା ଏବଂ ହିତାଧିକାରୀମାନଙ୍କୁ ମଞ୍ଚ ଉପରକୁ ଡାକି ଦାରିଦ୍ର୍ୟ ବିରୋଧରେ ଶପଥ ନେବା ପାଇଁ ସେ ଗରିବ କଲ୍ୟାଣ ମେଳା ଆୟୋଜନ କରିଥିଲେ। ଏଥିରେ ଗରିବମାନେ ଦାରିଦ୍ର୍ୟକୁ ପରାସ୍ତ କରିବା ପାଇଁ ସଂକଳ୍ପ ନେଉଥିଲେ ଏବଂ ନିଜ ଭିତରେ ଆତ୍ମବିଶ୍ୱାସ ନେଇ ସେହି କାର୍ଯ୍ୟକ୍ରମରୁ ଫେରୁଥିଲେ ।

ସେ କହିଥିଲେ, ତତ୍କାଳୀନ ସମୟରେ ଆରମ୍ଭ ହୋଇଥିବା ‘‘ସଶକ୍ତୀକରଣ ଲାଗି ଶକ୍ତି’’ ବା ‘‘ପାୱାର୍‌ ଟୁ ଏମ୍ପାୱାର୍’’ର ମିଶନ୍‌ ଆଜି ବାସ୍ତବ ସୁଶାସନ ସହ ନିରନ୍ତର ଜାରି ରହିଛି । ପରିବର୍ତ୍ତନ ଅଚାନକ ଘଟୁଥିବା କୌଣସି ଘଟଣା ନୁହେଁ, ବରଂ ଏଥିପାଇଁ ଅନେକ ବର୍ଷର ସୁନିୟୋଜିତ ପ୍ରୟାସ ଆବଶ୍ୟକ । ଏହିପରି ଭାବେ ୫୦ କୋଟି ଭାରତୀୟଙ୍କୁ ଦାରିଦ୍ର୍ୟରୁ ମୁକୁଳିପାରିଛନ୍ତି ।

ପ୍ରଧାନମନ୍ତ୍ରୀ କହିଥିଲେ, ଦାରିଦ୍ର୍ୟ ହ୍ରାସ ପାଇବା ଦ୍ୱାରା କେବଳ ଗରିବ ପରିବାର ଉପକୃତ ହୁଅନ୍ତି ନାହିଁ, ବରଂ ସାରା ଦେଶ ମଧ୍ୟ ଲାଭାନ୍ୱିତ ହୋଇଥାଏ । ଏହାଦ୍ୱାରା ଦେଶର ଅର୍ଥବ୍ୟବସ୍ଥା ନୂଆ ଗତି ପାଇଥାଏ ଏବଂ ନୂତନ ମଧ୍ୟବିତ୍ତ ବର୍ଗ ସୃଷ୍ଟି ହୋଇଥା’ନ୍ତି, ଯେଉଁମାନଙ୍କର କ୍ରୟ କ୍ଷମତା ବଜାରରେ ଚାହିଦା ବୃଦ୍ଧି କରିଥାଏ ଏବଂ ଦୋକାନ ଠାରୁ ନେଇ କାରଖାନା ପର୍ଯ୍ୟନ୍ତ ନୂତନ ସମ୍ଭାବନା ସୃଷ୍ଟି ହୁଏ । ଏହାର ଅର୍ଥ ହେଉଛି ଭାରତରେ ଦାରିଦ୍ର୍ୟ ହ୍ରାସ ପାଇବା ଦ୍ୱାରା ଅର୍ଥବ୍ୟବସ୍ଥା ନୂତନ ଉଚ୍ଚତାରେ ପହଞ୍ଚୁଛି ।

ପ୍ରଧାନମନ୍ତ୍ରୀ ବିକଶିତ ଭାରତ ଯାତ୍ରାରେ କୃଷକମାନଙ୍କର ଗୁରୁତ୍ୱପୂର୍ଣ୍ଣ ଭୂମିକା ଏବଂ ସେମାନଙ୍କୁ ସଶକ୍ତ କରିବା ପାଇଁ ସରକାରଙ୍କ ନିରନ୍ତର ପ୍ରୟାସ ସମ୍ପର୍କରେ ଆଲୋକପାତ କରିଥିଲେ । ସେ କହିଥିଲେ, ମହାରାଷ୍ଟ୍ରରେ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନଭିସଙ୍କ ନେତୃତ୍ୱରେ ସମ୍ପ୍ରତି ବ୍ୟାପକ ଜଳ ସଂରକ୍ଷଣ କାର୍ଯ୍ୟ ହେଉଛି । ତେବେ ଚାଷୀ ପରିବାରଗୁଡ଼ିକ ପ୍ରତିକୂଳ ପାଗ ଏବଂ ପ୍ରାକୃତିକ ବିପର୍ଯ୍ୟୟର ସମ୍ମୁଖୀନ ହେଉଥିବା ଗୁରୁତର କଷ୍ଟକୁ ପ୍ରଧାନମନ୍ତ୍ରୀ ସ୍ୱୀକାର କରିଥିଲେ। ଶ୍ରୀ ମୋଦୀ କହିଥିଲେ, ମରୁଡ଼ି ବିଷୟରେ ସେ ଅବଗତ ଅଛନ୍ତି । ଏଥିସହିତ ସରକାରଙ୍କ ତରଫରୁ ସମ୍ପୂର୍ଣ୍ଣ ସମ୍ବେଦନଶୀଳତା ଏବଂ ସହୃଦୟତାର ସହିତ ଚାଷୀଙ୍କ ପ୍ରତି ନିଜର ସମର୍ଥନ ବ୍ୟକ୍ତ କରିଥିଲେ । ରାଜ୍ୟର ଚାଷୀମାନଙ୍କୁ ଆଶ୍ୱାସନା ଦେଇ ପ୍ରଧାନମନ୍ତ୍ରୀ କହିଥିଲେ, ଆଦୌ ଚିନ୍ତା କରନ୍ତୁ ନାହିଁ, ଆମେ ସମସ୍ତେ ଚାଷୀଙ୍କ ସହିତ ଅଛୁ ।

ପାର୍ବଣ ଋତୁରରେ ସାମାଜିକ ଦାୟିତ୍ୱ ନିର୍ବାହ କରିବା ଲାଗି ପ୍ରଧାନମନ୍ତ୍ରୀ ନାଗରିକମାନଙ୍କୁ ନିବେଦନ କରିଥିଲେ । ସେ କହିଥିଲେ, ଏହି ସମୟରେ ସମସ୍ତେ ମରୁଡ଼ି ପ୍ରଭାବିତ ନାଗରିକ, ଚାଷୀ ପରିବାର ଏବଂ ସଙ୍କଟରେ ଥିବା ଅନ୍ୟମାନଙ୍କ କଥା ମନେ ରଖିବା ଉଚିତ୍‌ । ଏହାଦ୍ୱାରା ସେମାନଙ୍କ ଘରେ ମଧ୍ୟ ଦୀପାବଳିର ଆନନ୍ଦ ବଜାୟ ରହିବ । ଦେଶକୁ ଏହି ବିପର୍ଯ୍ୟୟକୁ ଦୂର କରିବାରେ ଏକଜୁଟ ହେବାକୁ ପ୍ରଧାନମନ୍ତ୍ରୀ ଆହ୍ୱାନ କରିଥିଲେ। କେବଳ ଏକାଠି ହୋଇ ଆମେ ଏହି ବିପର୍ଯ୍ୟୟର ସାମ୍ନା କରିବା ବୋଲି ସେ ମତ ରଖିଥିଲେ ।

ନିଜର ଅଭିଭାଷଣ ଶେଷରେ ପ୍ରଧାନମନ୍ତ୍ରୀ ମେଟ୍ରୋ ପ୍ରକଳ୍ପଗୁଡ଼ିକ ପାଇଁ ସମସ୍ତଙ୍କୁ ଶୁଭେଚ୍ଛା ଜଣାଇଥିଲେ । ସେ କହିଥିଲେ, ସାମୁହିକ ତଥା ଏକତ୍ରିତ ପ୍ରୟାସ୍‌ ଅର୍ଥାତ୍‌ ସବକା ପ୍ରୟାସ ହିଁ ବିକଶିତ ଭାରତର ଜୀବନଶକ୍ତି । ଏହି ଭାବନା ନେଇ ଆମକୁ ଦେଶର ବିକାଶ କାର୍ଯ୍ୟରେ ନିରନ୍ତର ନିୟୋଜିତ ହେବାକୁ ପଡ଼ିବ ବୋଲି ସେ କହିଥିଲେ ।

*********

PS