ପିଏମଇଣ୍ଡିଆ

ବିଦେଶୀ ନିବେଶକଙ୍କୁ ଭାରତରେ ସ୍ଥାୟୀ ବାସିନ୍ଦା ମାନ୍ୟତା ପ୍ରଦାନ ସକାଶେ ପ୍ରସ୍ତାବିତ ଯୋଜନାକୁ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କେନ୍ଦ୍ର କେବିନେଟ ସ୍ୱୀକୃତି ପ୍ରଦାନ କରିଛନ୍ତି । ତେବେ ପ୍ରତ୍ୟକ୍ଷ ବିଦେଶୀ ପୁଞ୍ଜି ନିବେଶ ନୀତିରେ ଥିବା ନିର୍ଦ୍ଦିଷ୍ଟ ନିୟମାବଳୀ ଅନୁସାରେ ଏଭଳି ମାନ୍ୟତା ପ୍ରଦାନ କରାଯିବ । ଏହାଦ୍ୱାରା ଭାରତରେ ପୁଞ୍ଜି ଖଟାଇବାକୁ ବିଦେଶୀ ନିବେଶକମାନେ ଆଗ୍ରହୀ ହେବେ ଓ ତାହା “ମେକ୍ ଇନ୍ ଇଣ୍ଡିଆ” କାର୍ଯ୍ୟକ୍ରମକୁ ପ୍ରୋତ୍ସାହନ ଯୋଗାଇବ । ଏହି ଯୋଜନା ଅନୁସାରେ ଭିସା ନିୟମାବଳୀରେ କେତେକ ବିଶେଷ ବ୍ୟବସ୍ଥା ରହିବ ଯଦ୍ୱାରା ବିଦେଶୀ ନିବେଶକମାନଙ୍କୁ PRS ମାନ୍ୟତା ଦିଆଯାଇପାରିବ । ବିବିଧ ପ୍ରବେଶ ପାଇଁ 10 ବର୍ଷ ନିମନ୍ତେ ସ୍ଥାୟୀ ବାସିନ୍ଦା ମାନ୍ୟତା (PRS) ପ୍ରଦାନ କରାଯିବ । ଯଦି PPS ଧାରୀଙ୍କ ପ୍ରତି କୌଣସି ପ୍ରତିକୂଳ ବିଜ୍ଞପ୍ତି ଜାରି କରାଯାଇନଥାଏ, ତେବେ ଆବଶ୍ୟକସ୍ଥଳେ ଆଉ 10 ବର୍ଷ ସକାଶେ ଏଭଳି ମାନ୍ୟତାର ଅବଧି ବୃଦ୍ଧିକୁ ସମୀକ୍ଷା କରି ଦେଖାଯାଇପାରିବ । କେବଳ ବିଦେଶୀ ନିବେଶକଙ୍କ ପାଇଁ ନର୍ଦ୍ଦିଷ୍ଟ ସର୍ତ୍ତାବଳୀ ଅନୁସାରେ ଏହା ପ୍ରଯୁଜ୍ୟ । ଏଥିପାଇଁ ବିଦେଶୀ ନିବେଶକ ଅନ୍ୟୁନ 10 କୋଟି ଟଙ୍କାର ପୁଞ୍ଜି ଖଟାଇଥିବା ଦରକାର ଯାହାକି 18 ମାସ ମଧ୍ୟରେ ଆସିଥିବ ଅନ୍ୟଥା 25 କୋଟି ଟଙ୍କା ଯାହାକି 36 ମାସ ମଧ୍ୟରେ ଖଟାଯାଇଥିବ । ପୁନଶ୍ଚ, ଏହି ପୁଞ୍ଜି ନିବେଶରୁ ଅନ୍ୟୁନ 20 ଜଣ ଭାରତୀୟ ନାଗରିକଙ୍କ ପାଇଁ ପ୍ରତି ବର୍ଷ ନିଯୁକ୍ତି ସୁଯୋଗ ସୃଷ୍ଟି ହୋଇପାରୁଥିବ । PRSଧାରୀ କେବଳ ନିଜ ରହଣୀ ନିମନ୍ତେ ଗୋଟିଏ ଘର କ୍ରୟ କରିପାରିବେ ।