ପିଏମଇଣ୍ଡିଆ

ସୁବହ ଉଦେଶାନକ ଭେଭା ଆୟୁବୋୱାନ

ଗତ ବର୍ଷ ମାର୍ଚ୍ଚ ମାସରେ ମୁଁ ଜାଫନାରେ ଥିଲି ।

ଜାଫନାର ଲୋକମାନଙ୍କଠାରୁ ପାଇଥିବା ଆଦର ଏବଂ ସ୍ନେହ ଏବେ ବି ମୋ ମନରେ ସତେଜ ହୋଇ ରହିଛି ।

ତାହା ଗୋଟିଏ ଐତିହାସିକ ଦିନ ଥିଲା କାରଣ ତାହା ଥିଲା କୌଣସି ଭାରତୀୟ ପ୍ରଧାନମନ୍ତ୍ରୀଙ୍କ ପ୍ରଥମ ଜାଫନା ଗସ୍ତ ।

ଆଜି ଆଉ ଗୋଟିଏ ସ୍ମରଣୀୟ ଦିନ ।

ଯେତେବେଳେ ପୁଣି ଥରେ ଆମେ ଶ୍ରୀଲଙ୍କାର ଲୋକମାନଙ୍କ ଏବଂ ଜାଫନାବାସୀଙ୍କ ସହିତ ଆମର ସହଭାଗୀତାର ଉତ୍ସବ ପାଳନ କରୁଛୁ ।

ଆଜି, ରାଷ୍ଟ୍ରପତି ମୈତ୍ରୀପାଳ ସିରିସେନାଙ୍କ ସହିତ, ଆମେ ପୁନଃନିର୍ମିତ ଦୁରାଇଆପ୍ପା ଷ୍ଟାଡିୟମକୁ ଶ୍ରୀଲଙ୍କାବାସୀଙ୍କ ଉଦ୍ଦେଶ୍ୟରେ ସମର୍ପିତ କରୁଛୁ ।

ଏବଂ ଆମେ ଏକାକୀ ନାହୁଁ ।

ଆଧୁନିକ ଯୁଗର ଯୋଗାଯୋଗ ମାଧ୍ୟମ, ଭାରତର 125 କୋଟି ଲୋକ ଏବଂ ଶ୍ରୀଲଙ୍କାର ବନ୍ଧୁବତ୍ସଳ ଲୋକମାନଙ୍କୁ ଆମ ସହିତ ଏହି ଉତ୍ସବରେ ସାମିଲ ହେବାର ସୁଯୋଗ ଦେଇଛି ।

ବନ୍ଧୁଗଣ,

ପ୍ରାୟ 20 ବର୍ଷର ପ୍ରତୀକ୍ଷା ପରେ, ଆପଣମାନଙ୍କ କରତାଳି ଧ୍ୱନୀରେ ଦୁରାଇଆପ୍ପା ଷ୍ଟାଡିୟମର ଆତ୍ମା ପୁନର୍ଜିବୀତ ହୋଇଉଠିବ ।

ହଜାର ହଜାର କିଲୋମିଟର ଦୂର ଦିଲ୍ଲୀରେ ଥାଇ ମଧ୍ୟ ଆମେ ଜାଫନାରେ ପରିବର୍ତ୍ତନର ପରିବେଶ ଏବଂ କମ୍ପନର ସ୍ପନ୍ଦନକୁ ଅନୁଭବ କରି ପାରୁଛୁ ।

ଦୁରାଇଆପ୍ପା ଷ୍ଟାଡିୟମ କେବଳ ଇଟା-ମାଟିର ସମଷ୍ଟି ନୁହେଁ ।

ଏହା ଆଶାବାଦ ଏବଂ ଅର୍ଥନୈତିକ ପ୍ରଗତିର ପ୍ରତୀକ ।

ଏହା ଜାଫନାର ଯୁବଗୋଷ୍ଠୀର ସମୃଦ୍ଧି ଏବଂ ସୁସ୍ଥ ଭବିଷ୍ୟତର କ୍ଷେତ୍ର ।

ଏହା ଦାନ ସୂତ୍ରରେ ମିଳିଥିବା ହିଂସାକୁ ପରିହାର କରି ଆପଣମାନଙ୍କ ଦ୍ଵାରା ଅର୍ଥନୈତିକ ପ୍ରଗତିର ପଥକୁ ଆପଣେଇ ନେବାର ନିଷ୍ପତ୍ତିର ନିଦର୍ଶନ ।

ଏହାର ମୂଳରେ ରହିଛି ଆପଣମାନଙ୍କର ସାହସ ଏବଂ ମହାନ ତ୍ୟାଗ ।

ସଫଳତାର ସହିତ ଏହି କାର୍ଯ୍ୟ ସମ୍ପୂର୍ଣ୍ଣ ହେବା ଏହି କଥାର ସଙ୍କେତ ଯେ, ଅତୀତକୁ ପଛରେ ପକାଇ ଆପଣମାନେ ସମୃଦ୍ଧ ଭବିଷ୍ୟତ ପାଇଁ ଆଗ୍ରହୀ ।

ମହାମହୀମ ସିରିସେନା,

ମୁଁ ଆପଣଙ୍କ, ପ୍ରଧାନମନ୍ତ୍ରୀ ବିକ୍ରମସିଂଘେ, ରାଜ୍ୟପାଳ ଏବଂ ଉତ୍ତରାଞ୍ଚଳ ରାଜ୍ୟର ମୁଖ୍ୟମନ୍ତ୍ରୀଙ୍କ ଦୂରଦୃଷ୍ଟିସମ୍ପନ୍ନ ନେତୃତ୍ୱକୁ ମଧ୍ୟ ସଲାମ୍ କରୁଛି ଯେ ସେମାନେ ଏହି ପରିଯୋଜନାର ସଫଳତାକୁ ସୁନିଶ୍ଚିତ କଲେ ।

ବନ୍ଧୁଗଣ,

ଆମ ସମ୍ପର୍କ କେବଳ ଦୁଇ ସରକାର ମଧ୍ୟରେ ସୀମିତ ନୁହେଁ । ଏହା ରହିଛି ଆମ ବୈଭବଶାଳୀ ଇତିହାସରେ, ସଂସ୍କୃତିରେ, ଭାଷାରେ, କଳା ଏବଂ ଭୂଗୋଳରେ ।

ଭାରତ ଦୃଢତାର ସହ ଏକଥାରେ ବିଶ୍ୱାସ କରେ ଯେ, ଏହାର ନିଜର ଆର୍ଥିକ ପ୍ରଗତି ଏହାର ପଡୋଶୀମାନଙ୍କ ପାଇଁ ମଧ୍ୟ ଲାଭପ୍ରଦ ହେବା ଉଚିତ ।

ଦୁରାଇଆପ୍ପା ଷ୍ଟାଡିୟମ ଆମ ସହେଯାଗ ମନୋବୃତ୍ତିକୁ ଧାରଣ କରୁଛି । ବାସ୍ତବରେ, ଶ୍ରୀଲଙ୍କାର ପ୍ରଗତି ପାଇଁ ଭାରତର ସହଯୋଗ ଆମ ବନ୍ଧୁତ୍ୱର ପ୍ରତିଶୃତି ଏବଂ ଏହା ଆପଣମାନଙ୍କ ଆବଶ୍ୟକତା ଓ ଅଗ୍ରାଧିକାର ଉପରେ ଆଧାରିତ ହେବ ବୋଲି ଆପଣ ନିଶ୍ଚିତ ରହିପାରନ୍ତି ।

ଏହା ହିଁ ଆମ ଅତୀତ, ବର୍ତ୍ତମାନ ଏବଂ ଭବିଷ୍ୟତର ସମ୍ବନ୍ଧକୁ ପ୍ରାସଙ୍ଗିକ କରୁଛି ।

ବନ୍ଧୁଗଣ,

ଭାରତ ଅର୍ଥନୈତିକ ଦୃଷ୍ଟିରୁ ଏକ ସମୃଦ୍ଧ ଶ୍ରୀଲଙ୍କା ଦେଖିବାକୁ ଚାହେଁ । ଏକ ଶ୍ରୀଲଙ୍କା, ଯେଉଁଠାରେ ସାରା ଦେଶରେ ଏବଂ ସମସ୍ତ ଜନସାଧାରଣଙ୍କ ମଧ୍ୟରେ ଥିବ ଏକତା ଓ ସଂହତି, ଶାନ୍ତି, ସୌହାର୍ଦ୍ଦ୍ୟ ଏବଂ ସୁରକ୍ଷା ତଥା ସମାନ ସୁଯୋଗ ଓ ସମ୍ମାନ ।

ମହାମହୀମ ସିରିସେନା ଏବଂ ବନ୍ଧୁଗଣ,

ବର୍ତ୍ତମାନ ଠାରୁ ପ୍ରାୟ 72 ଘଣ୍ଟା ପରେ ଅର୍ଥାତ୍, ଜୁନ 21 ତାରିଖରେ ବିଶ୍ୱ ଆନ୍ତର୍ଜାତିକ ଯୋଗ ଦିବସର ଦ୍ୱିତୀୟ ବାର୍ଷିକୀ ପାଳନ କରିବ । 2014 ମସିହାରେ ମିଳିତ ଜାତିସଂଘରେ ଏହି ପ୍ରସ୍ତାବକୁ ସମର୍ଥନ କରିବାରେ ଆଗୁଆ ଥିବା ଦେଶମାନଙ୍କରେ ଶ୍ରୀଲଙ୍କା ସାମିଲ ହୋଇଥିଲା । ଆଜି ଆମେ ଆନ୍ତର୍ଜାତିକ ଯୋଗ ଦିବସ ପାଳନର ଆଦ୍ୟ ପର୍ବ ଜାଫନାର ଏହି ଦୁରାଇଆପ୍ପା ଷ୍ଟାଡିୟମରୁ ଆରମ୍ଭ କରିଛୁ ।

କିଛି ସମୟ ପୂର୍ବରୁ ପ୍ରଦର୍ଶିତ ସୂର୍ଯ୍ୟ ନମସ୍କାର ବିଶ୍ୱକୁ ପ୍ରକୃତି ସହ ଏକାକାର ହୋଇ ଜୀବନଯାପନ ଏବଂ ସ୍ୱାସ୍ଥ୍ୟର ସମ୍ପୂର୍ଣ୍ଣ ଯତ୍ନର ବାର୍ତ୍ତା ପ୍ରଦାନ କରିଛି ।

ଆନ୍ତର୍ଜାତିକ ଯୋଗ ଦିବସର ଏହା ଠାରୁ ଭଲ ଶୁଭାରମ୍ଭ ଆଉ କଣ ହୋଇପାରେ ?

ମହାମହୀମ ରାଷ୍ଟ୍ରପତି ସିରିସେନା,

ଏହି ସୁଯୋଗ ପାଇଁ ମୁଁ ପୁଣି ଥରେ ଆପଣଙ୍କୁ, ଆପଣଙ୍କ ପାଶ୍ୱର୍ରେ ଥିବା ନେତୃବୃନ୍ଦଙ୍କୁ ଏବଂ ପ୍ରିୟ ଜାଫନାବାସୀଙ୍କୁ ଧନ୍ୟବାଦ ଅର୍ପଣ କରୁଛି ।

ଦୁରାଇଆପ୍ପା ଷ୍ଟାଡିୟମ ଆମର ଦୀର୍ଘକାଳୀନ ବନ୍ଧୁତ୍ୱର ଅନ୍ୟ ଏକ ପ୍ରତୀକ ହୋଇ ରହିବ ।

ଶ୍ରୀଲଙ୍କା ନିଜର ନାଗରିକମାନଙ୍କ ପ୍ରଗତି ଏବଂ ସମୃଦ୍ଧି ପାଇଁ ମାର୍ଗ ପ୍ରସ୍ତୁତ କରୁଥିବା ବେଳେ ଭାରତ ତାହାର ପାଖେ ପାଖେ ରହିବ ।

ମୁଁ ପୁଣି ଥରେ ଭାରତର 125 କୋଟି ଜନତାଙ୍କ ତରଫରୁ ଶ୍ରୀଲଙ୍କାବାସୀଙ୍କୁ ଅଭିନନ୍ଦନ ଜଣାଉଛି ।

ବୋହୋମା ସ୍ତୁତି, ମିକ୍କା ନାନ୍ଦ୍ରି,

ଆପଣଙ୍କୁ ଅନେକ ଅନେକ ଧନ୍ୟବାଦ ।