ପିଏମଇଣ୍ଡିଆ

• ଇ-ଟୋଲ ଆଦାୟ ବଢାଇବା ଉପରେ ପ୍ରଧାନମନ୍ତ୍ରୀଙ୍କ ଗୁରୁତ୍ୱ

• ଏବେ 10ଟି ଆଂଚଳିକ ଭାଷାରେ “ମେରି ସଡକ” ଆପ୍

• ପ୍ରମୁଖ ବନ୍ଦରମାନଙ୍କରେ ଟ୍ରାଫିକ 17 ପ୍ରତିଶତ ବୃଦ୍ଧି

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ରାସ୍ତା, ପିଏମଜିଏସୱାଇ, ଗ୍ରାମୀଣ ଗୃହ ନିର୍ମାଣ, ରେଳପଥ, ବନ୍ଦର ଏବଂ ବିମାନ ବନ୍ଦର ଆଦି ଗୁରୁତ୍ୱପୂର୍ଣ୍ଣ ଭିତ୍ତିଭୂମି କ୍ଷେତ୍ରର ଅଗ୍ରଗତି ସମ୍ବନ୍ଧରେ ଗୁରୁବାର ଦିନ ସମୀକ୍ଷା କରିଛନ୍ତି । ପ୍ରାୟ ଦୁଇ ଘଂଟା ଧରି ଚାଲିଥିବା ଏହି ସମୀକ୍ଷା ବୈଠକରେ ଭିତ୍ତିଭୂମି ସହିତ ସଂପୃକ୍ତ ଥିବା ମନ୍ତ୍ରଣାଳୟ, ନୀତି ଆୟୋଗ ଏବଂ ପ୍ରଧାନମନ୍ତ୍ରୀ କାର୍ଯ୍ୟାଳୟର ପ୍ରମୁଖ ଅଧିକାରୀମାନେ ଯୋଗଦେଇଥିଲେ ।

ନୀତି ଆୟୋଗର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଶ୍ରୀ ଅମିତାଭ କାନ୍ତଙ୍କ ଦ୍ୱାରା କରାଯାଇଥିବା ଉପସ୍ଥାପନା ସମୟରେ ଅନୁଧ୍ୟାନ କରାଯାଇଥିଲା ଯେ ରାସ୍ତା ନିର୍ମାଣ କାର୍ଯ୍ୟ ଦୃତଗତିରେ ଚାଲିଛି । 2017-18 ଆର୍ଥିକ ବର୍ଷରେ ଦୈନିକ ହାରାହାରି 26.93 କିଲୋମିଟର ଦୀର୍ଘର ରାସ୍ତା ନିର୍ମାଣ କରାଯାଇଛି । 2013-14 ଆର୍ଥିକ ବର୍ଷ ସହ ତୁଳନା କଲେ ଏହା ଥିଲା ଅଧିକ 11.67 କିଲୋମିଟର ।

ଯୋଗାଯୋଗ କ୍ଷେତ୍ରରେ ଡିଜିଟାଲକରଣର ଅଗ୍ରଗତିକୁ ନେଇ ପ୍ରଧାନମନ୍ତ୍ରୀଙ୍କୁ ସୂଚନା ପ୍ରଦାନ କରାଯାଇଥିଲା । ଏପର୍ଯ୍ୟନ୍ତ 24 ଲକ୍ଷରୁ ଉର୍ଦ୍ଧ୍ଵ ଆରଏଫଆଇଡି ଟ୍ୟାଗ ପ୍ରଦାନ କରାଯାଇଛି ଏବଂ ଏବେ ମୋଟ ଟୋଲ ଆଦାୟ ମଧ୍ୟରୁ 22 ପ୍ରତିଶତରୁ ଉର୍ଦ୍ଧ୍ଵ ଇଲେକ୍ଟ୍ରୋନିକ ଟୋଲ ରାଜସ୍ୱ ମିଳୁଛି । ରାସ୍ତା ଅବସ୍ଥା ସମ୍ବନ୍ଧୀୟ ସୂଚନା ଏବଂ ଅଭିଯୋଗ ଦାଖଲ ସୁବିଧା ଥିବା “ସୁଖଦ ଯାତ୍ରା” ଆପ୍ କୁ ଏପର୍ଯ୍ୟନ୍ତ ଏକ ଲକ୍ଷରୁ ଉର୍ଦ୍ଧ୍ଵ ସଂଖ୍ୟାରେ ଡାଉନଲୋଡ କରାଯାଇ ସାରିଛି । ଇ-ଟୋଲ ଆଦାୟ ବଢାଇବା ଉପରେ ପ୍ରଧାନମନ୍ତ୍ରୀ ଗୁରୁତ୍ୱ ଦେଇଛନ୍ତି ।

ପ୍ରଧାନମନ୍ତ୍ରୀ ଗ୍ରାମ ସଡକ ଯୋଜନା ଅଧୀନରେ ଯୋଗ୍ୟତା ସମ୍ପନ୍ନ ସମସ୍ତ ଅଂଚଳର ଶତକଡା 88 ପ୍ରତିଶତ ଗ୍ରାମକୁ ସଡକ ସଂଯୋଗ କରାଯାଇଛି । 2014-18 ମଧ୍ୟରେ 44,000 ରୁ ଉର୍ଦ୍ଧ୍ଵ ଗ୍ରାମକୁ ସଂଯୁକ୍ତ କରାଯାଇ ଥିଲା ବେଳେ ତୁଳନାତ୍ମକ ଭାବେ ତାର ପୂର୍ବ 4 ବର୍ଷର ଅବଧି (2010-14)ମଧ୍ୟରେ ଏହା ପ୍ରାୟ 35,000 ଥିଲା । “ମେରି ସଡକ” ଆପ୍ କୁ 10ଟି ଆଂଚଳିକ ଭାଷାରେ ଶୁଭାରମ୍ଭ କରାଯାଇଛି ଏବଂ ଏପର୍ଯ୍ୟନ୍ତ ଏହାକୁ 9.76 ଲକ୍ଷ ସଂଖ୍ୟାରେ ଡାଉନଲୋଡ କରାଯାଇଛି । ଜିଆଇଏସ ରାସ୍ତା ମାନଚିତ୍ରକରଣ ଆଗେଇ ଚାଲିଛି ଜିଓସ୍ପାଟିଆଲ ଗ୍ରାମୀଣ ରାସ୍ତା ସୂଚନା ପଦ୍ଧତି (ଜିଆରଆରଆଇଏସ)କୁ ଏପର୍ଯ୍ୟନ୍ତ 20ଟି ରାଜ୍ୟରେ କାର୍ଯ୍ୟକାରୀ କରାଯାଇଛି । ଗ୍ରାମୀଣ ରାସ୍ତା ନିର୍ମାଣରେ ସବୁଜ ପ୍ରାଦ୍ୟୋଗିକୀ ଏବଂ ବର୍ଜ୍ୟ ପ୍ଲାଷ୍ଟିକ ଓ ଫ୍ଲାଏ-ଆସ ଭଳି ଅଣ-ପାରମ୍ପରିକ ସାମଗି୍ରର ବ୍ୟବହାର କରାଯାଉଛି ।

ରେଳ କ୍ଷେତ୍ରରେ କ୍ଷମତା ଓ ରୋଲିଂ ଷ୍ଟକ ଆଦିରେ ଅନେକ ପରିମାଣରେ ବୃଦ୍ଧି ହୋଇଛି । 2014 ରୁ 2018 ମଧ୍ୟରେ ନୂତନ ଲାଇନ ଯୋଗ ଓ ଦ୍ୱିଗୁଣିତ କରାଯିବା ସହ ଗଜ ପରିବର୍ତ୍ତନ କରାଯାଇଛି ଏବଂ ଏହାର ଦୈର୍ଘ୍ୟ ରହିଛି ପାଖାପାଖି 9528 କିଲୋମିଟର, ଯାହାକି ତା’ପୂର୍ବ 4 ବର୍ଷ ତୁଳନାରେ 56 ପ୍ରତିଶତ ଅଧିକ ରହିଛି । ସେହିପରି ବିମାନ ଚଳାଚଳ କ୍ଷେତ୍ରରେ ପାସେଞ୍ଜର ଟ୍ରାଫିକ 2014-2018 – ଏହି ଚାରି ବର୍ଷ ମଧ୍ୟରେ 62 ପ୍ରତିଶତରୁ ଅଧିକ ବୃଦ୍ଧି ପାଇଛି, ଯାହାକି ତାପୂର୍ବ 4 ବର୍ଷ ମଧ୍ୟରେ 18 ପ୍ରତିଶତ ଥିଲା । ଉଡାଣ ଯୋଜନା ଅନ୍ତର୍ଗତ ଟାୟାର 2 ଏବଂ ଟାୟାର 3 ସହରମାନଙ୍କରେ 27ଟି ବିମାନବନ୍ଦର ଏବେ କାର୍ଯ୍ୟକ୍ଷମ ରହିଛି ।

ବନ୍ଦର କ୍ଷେତ୍ରରେ 2014 ରୁ 2018 ମଧ୍ୟରେ ପ୍ରମୁଖ ବନ୍ଦରମାନଙ୍କରେ ଟ୍ରାଫିକ ପରିମାଣ 17 ପ୍ରତିଶତ ବୃଦ୍ଧି ପାଇଛି ।

ଗ୍ରାମୀଣ ଗୃହ ନିର୍ମାଣ କ୍ଷେତ୍ରରେ ପ୍ରଧାନମନ୍ତ୍ରୀଙ୍କୁ ସୂଚନା ପ୍ରଦାନ କରାଯାଇଥିଲା ଯେ 2014ରୁ 2018 ମଧ୍ୟରେ ଏକ କୋଟିରୁ ଉର୍ଦ୍ଧ୍ଵ ଆବାସ ନିର୍ମାଣ କରାଯାଇଛି, ଯାହାକି ତୁଳନାତ୍ମକ ଭାବେ ତାପୂର୍ବ 4 ବର୍ଷ ମଧ୍ୟରେ ଥିଲା 25 ଲକ୍ଷ । ଏହା ଗୃହ ନିର୍ମାଣ କ୍ଷେତ୍ରରେ ଏବଂ ଏଥିସହିତ ସଂପୃକ୍ତ ନିର୍ମାଣ ଶିଳ୍ପ କ୍ଷେତ୍ରରେ ନିଯୁକ୍ତି ହାରକୁ ବୃଦ୍ଧି କରିଛି । ଏକ ସ୍ୱତନ୍ତ୍ର ଅନୁଧ୍ୟାନରୁ ଜଣାପଡିଛି ଯେ ହାରାହାରି ନିର୍ମାଣ ଶେଷ କରିବାର ସମୟ ଦ୍ରୂତ ଗତିରେ ହ୍ରାସ ପାଇଛି । ଏହା 2015-16ରେ 314 ଦିନ ଥିଲା ବେଳେ 2017-18ରେ ହ୍ରାସ ପାଇ 114 ଦିନରେ ପହଂଚିଛି । ବିପର୍ଯ୍ୟୟକାଳୀନ ମୁକାବିଲା ସାମର୍ଥ୍ୟ ବୃଦ୍ଧି ଏବଂ କମ ମୂଲ୍ୟର ଗୃହ ନିର୍ମାଣ ଡିଜାଇନ ଉପରେ ମଧ୍ୟ ଗୁରୁତ୍ୱ ପ୍ରଦାନ କରାଯାଉଛି ।

ସହରୀକରଣ ଗୃହ ନିର୍ମାଣ ଯୋଜନାରେ ନୂତନ ନିର୍ମାଣ ପ୍ରଯୁକ୍ତି ବିଦ୍ୟା ଉପରେ ଗୁରୁତ୍ୱାରୋପ କରାଯାଉଛି । ଏହି ଯୋଜନାର ଆରମ୍ଭ ହେବା ବେଳଠାରୁ ପ୍ରଧାନମନ୍ତ୍ରୀ ଆବାସ ଯୋଜନା (ସହରାଂଚଳ) ଅଧୀନରେ 54 ଲକ୍ଷ ଗୃହ ନିର୍ମାଣକୁ ମଂଜୁରି ପ୍ରଦାନ କରାଯାଇଛି ।