ਪੀਐੱਮਇੰਡੀਆ

ਲਾਲ ਕਿਲ੍ਹੇ ਦੀ ਫ਼ਸੀਲ ਤੋਂ ਆਪਣੇ 80ਵੇਂ ਆਜ਼ਾਦੀ ਦਿਹਾੜੇ ਮੌਕੇ ਭਾਸ਼ਣ ਵਿੱਚ ਪ੍ਰਧਾਨ ਮੰਤਰੀ ਸ਼੍ਰੀ ਨਰੇਂਦਰ ਮੋਦੀ ਨੇ 2047 ਤੱਕ ਵਿਕਸਿਤ ਭਾਰਤ ਵੱਲ ਭਾਰਤ ਦੀ ਯਾਤਰਾ ਨੂੰ ਤੇਜ਼ ਕਰਨ ਦੇ ਮੰਤਵ ਨਾਲ ਕਈ ਕਈ ਸੱਦੇ ਦਿੱਤੇ। ਦੇਸ਼ ਦੇ ਕਾਰਜ ਸੱਭਿਆਚਾਰ, ਸੋਚ ਅਤੇ ਆਸਾਂ ਦੇ ਪੈਮਾਨੇ ਵਿੱਚ ਤਬਦੀਲੀ ਦੀ ਮੰਗ ਕਰਦੇ ਹੋਏ, ਪ੍ਰਧਾਨ ਮੰਤਰੀ ਨੇ ਨਾਗਰਿਕਾਂ, ਸਰਕਾਰਾਂ, ਉਦਯੋਗ, ਕਿਸਾਨਾਂ, ਨੌਜਵਾਨਾਂ ਅਤੇ ਸਮਾਜ ਦੇ ਹੋਰ ਵਰਗਾਂ ਵੱਲੋਂ ਸਮੂਹਿਕ ਕਾਰਵਾਈ ਦੀ ਲੋੜ ‘ਤੇ ਜ਼ੋਰ ਦਿੱਤਾ।

ਪ੍ਰਧਾਨ ਮੰਤਰੀ ਦੇ ਭਾਸ਼ਣ ਦੇ ਮੁੱਖ ਨੁਕਤੇ ਸ਼ਾਮਲ ਹਨ:

1. ਅਗਲੇ ਪੱਧਰ ਦੇ ਸੁਧਾਰ: ਪ੍ਰਧਾਨ ਮੰਤਰੀ ਨੇ ਸੁਧਾਰਾਂ ਦੀ ਰਫ਼ਤਾਰ ਤੇਜ਼ ਕਰਨ ਦਾ ਸੱਦਾ ਦਿੰਦਿਆਂ ਕਿਹਾ ਕਿ ਭਾਰਤ ਲਈ ਸੁਧਾਰ ਨਾ ਤਾਂ ਕੋਈ ਮਜਬੂਰੀ ਹਨ ਅਤੇ ਨਾ ਹੀ ਸਿਰਫ਼ ਇੱਕ ਚਰਚਿਤ ਸ਼ਬਦ, ਸਗੋਂ ਇਹ ਦ੍ਰਿੜ੍ਹ ਵਿਸ਼ਵਾਸ ਦਾ ਮਾਮਲਾ ਹੈ। ਉਨ੍ਹਾਂ ਕਿਹਾ ਕਿ ਸਰਕਾਰ, ਸਮਾਜ, ਉਦਯੋਗ, ਉਤਪਾਦਕ ਅਤੇ ਕਿਸਾਨ ਸਾਰਿਆਂ ਨੂੰ ਰਵਾਇਤੀ ਪ੍ਰਣਾਲੀਆਂ, ਸੋਚ ਅਤੇ ਟੀਚਿਆਂ ਵਿੱਚ ਸੁਧਾਰ ਕਰਨਾ ਹੋਵੇਗਾ। ਪ੍ਰਧਾਨ ਮੰਤਰੀ ਨੇ ਕੇਂਦਰ, ਰਾਜਾਂ ਅਤੇ ਉਦਯੋਗ ਨੂੰ ਇਕੱਠੇ ਅੱਗੇ ਵਧਣ ਅਤੇ ਸੁਧਾਰਾਂ ਨੂੰ ਲਗਾਤਾਰ ਅੱਗੇ ਵਧਾਉਣ ਦਾ ਸੱਦਾ ਦਿੱਤਾ, ਜਿਸ ਵਿੱਚ 2047 ਦੀਆਂ ਆਸਾਂ ਅਨੁਸਾਰ ਵਿਵਸਥਾ, ਨੀਤੀਆਂ ਅਤੇ ਨਿਯਮਾਂ ਨੂੰ ਆਕਾਰ ਦਿੱਤਾ ਜਾਵੇ।

2. ਵਿਕਸਿਤ ਭਾਰਤ ਲਈ ‘ਸਪਤ ਧਾਰਾ’: ਪ੍ਰਧਾਨ ਮੰਤਰੀ ਨੇ ਲਾਲ ਕਿਲ੍ਹੇ ਤੋਂ ਸੱਤ ਸ਼ਕਤੀ ਧਾਰਾਵਾਂ, “ਸਪਤ ਧਾਰਾ” ਦਾ ਸੱਦਾ ਦਿੱਤਾ, ਜੋ ਭਾਰਤ ਨੂੰ ਨਵੀਂਆਂ ਬੁਲੰਦੀਆਂ ‘ਤੇ ਲੈ ਜਾਣ ਅਤੇ ਆਉਣ ਵਾਲੇ ਪੰਜ-ਸੱਤ ਸਾਲਾਂ ਵਿੱਚ ਦੇਸ਼ ਨੂੰ ਨਵੀਂ ਗਤੀ ਦੇਣ। ਸੱਤ ਧਾਰਾਵਾਂ ਹਨ:

ਨਿਰਮਾਣ ਸ਼ਕਤੀ: ਭਾਰਤ ਨੂੰ ਪੁਰਜ਼ਿਆਂ ਅਤੇ ਡਿਜ਼ਾਈਨ ਤੋਂ ਲੈ ਕੇ ਸੰਪੂਰਨ ਉਤਪਾਦਾਂ ਦੇ ਨਿਰਮਾਣ ਤੱਕ, ਪੂਰੀ ਮੁੱਲ ਲੜੀ ਵਿਕਸਿਤ ਕਰਨੀ ਚਾਹੀਦੀ ਹੈ, ਅਤੇ ਆਲਮੀ ਸਪਲਾਈ ਲੜੀ ਦਾ ਇੱਕ ਭਰੋਸੇਯੋਗ ਕੇਂਦਰ ਬਣਨਾ ਚਾਹੀਦਾ ਹੈ। ਪ੍ਰਧਾਨ ਮੰਤਰੀ ਨੇ ਲਾਗਤ, ਗੁਣਵੱਤਾ ਅਤੇ ਪੈਮਾਨੇ, ਪ੍ਰਤੀਯੋਗੀ ਫ਼ੈਕਟਰੀਆਂ, ਉਪਭੋਗਤਾ-ਅਨੁਕੂਲ ਉਤਪਾਦਾਂ, ਆਕਰਸ਼ਕ ਪੈਕੇਜਿੰਗ ਅਤੇ ਬਿਨਾ ਨੁਕਸ ਵਾਲੇ ਨਿਰਮਾਣ ‘ਤੇ ਜ਼ੋਰ ਦਿੱਤਾ। ਗੁਣਵੱਤਾ ਨਾਲ ਕੋਈ ਸਮਝੌਤਾ ਨਾ ਕਰਨ ਦੀ ਮੰਗ ਕਰਦੇ ਹੋਏ, ਉਨ੍ਹਾਂ ਕਿਹਾ, “ਗੁਣਵੱਤਾ, ਗੁਣਵੱਤਾ, ਗੁਣਵੱਤਾ” ਭਾਰਤੀ ਨਿਰਮਾਣ ਦਾ ਮੰਤਰ ਹੋਣਾ ਚਾਹੀਦਾ ਹੈ।

ਖੇਤੀਬਾੜੀ ਅਤੇ ਖੁਰਾਕ ਉਤਪਾਦਨ: ਪ੍ਰਧਾਨ ਮੰਤਰੀ ਨੇ ਖੇਤ ਤੋਂ ਨਿਰਯਾਤ ਬਾਜ਼ਾਰ ਵੱਲ ਜਾਣ ਅਤੇ ਭਾਰਤ ਦੇ ਰਵਾਇਤੀ ਭੋਜਨ, ਮੋਟੇ ਅਨਾਜ, ਮਸਾਲੇ, ਫ਼ਲ ਅਤੇ ਫੁੱਲਾਂ ਨੂੰ ਆਲਮੀ ਬ੍ਰਾਂਡਾਂ ਵਿੱਚ ਬਦਲਣ ਦਾ ਸੱਦਾ ਦਿੱਤਾ। ਉਨ੍ਹਾਂ ਨੇ ਰਸਾਇਣ-ਮੁਕਤ ਖੇਤੀ ਅਤੇ ਖੇਤੀਬਾੜੀ ਉਤਪਾਦਾਂ ‘ਤੇ ਵੀ ਜ਼ੋਰ ਦਿੱਤਾ ਜੋ ਆਲਮੀ ਮਿਆਰਾਂ ਨੂੰ ਪੂਰਾ ਕਰਦੇ ਹਨ।

ਤਕਨਾਲੋਜੀ ਅਤੇ ਨਵੀਨਤਾ: ਏਆਈ, ਕੁਆਂਟਮ, ਪੁਲਾੜ, ਰੋਬੋਟਿਕਸ ਅਤੇ ਡੇਟਾ ਸੈਂਟਰਾਂ ਸਮੇਤ ਉੱਭਰ ਰਹੇ ਖੇਤਰਾਂ ਦਾ ਹਵਾਲਾ ਦਿੰਦੇ ਹੋਏ, ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਭਾਰਤ ਨੂੰ ਦੁਨੀਆ ਲਈ ਸਿਰਫ਼ ਇੱਕ ਬਾਜ਼ਾਰ ਨਹੀਂ ਰਹਿਣਾ ਚਾਹੀਦਾ ਸਗੋਂ ਇੱਕ ਨਵੀਨਤਾ ਕੇਂਦਰ ਬਣਨਾ ਚਾਹੀਦਾ ਹੈ। ਉਨ੍ਹਾਂ ਕਿਹਾ ਕਿ ਮੇਡ-ਇਨ-ਇੰਡੀਆ 6ਜੀ ਹਰ ਕੋਨੇ ਤੱਕ ਪਹੁੰਚਣਾ ਦੇਸ਼ ਦਾ ਟੀਚਾ ਹੋਣਾ ਚਾਹੀਦਾ ਹੈ।

ਗਤੀ ਸ਼ਕਤੀ: ਪ੍ਰਧਾਨ ਮੰਤਰੀ ਨੇ ਸ਼ਹਿਰਾਂ, ਆਧੁਨਿਕ ਹਾਈਵੇਅ, ਅੰਦਰੂਨੀ ਜਲ ਮਾਰਗਾਂ, ਹਵਾਈ ਅੱਡਿਆਂ ਅਤੇ ਮਲਟੀਮੋਡਲ ਲੌਜਿਸਟਿਕਸ ਨੂੰ ਜੋੜਨ ਵਾਲੇ ਹਾਈ-ਸਪੀਡ ਰੇਲ ਰਾਹੀਂ ਸਹਿਜ ਅਤੇ ਤੇਜ਼ ਸੰਪਰਕ ਦਾ ਸੱਦਾ ਦਿੱਤਾ। ਉਨ੍ਹਾਂ ਕਿਹਾ ਕਿ ਬੰਦਰਗਾਹਾਂ ਨੂੰ ਸਾਮਾਨ ਨੂੰ ਲਾਹੁਣ ਅਤੇ ਲੱਦਣ ਤੋਂ ਪਰੇ ਜਾ ਕੇ ਬੰਦਰਗਾਹ-ਅਗਵਾਈ ਵਾਲੇ ਵਿਕਾਸ ਅਤੇ ਵਿਕਾਸ ਦੇ ਚਾਲਕ ਬਣਨਾ ਚਾਹੀਦਾ ਹੈ।

ਰੱਖਿਆ ਸ਼ਕਤੀ: ਪ੍ਰਧਾਨ ਮੰਤਰੀ ਨੇ ਰੱਖਿਆ ਵਿੱਚ ਆਤਮਨਿਰਭਰਤਾ ਦਾ ਸੱਦਾ ਦਿੱਤਾ ਅਤੇ ਕਿਹਾ ਕਿ ਭਾਰਤ ਨੂੰ ਅਗਲੀ ਪੀੜ੍ਹੀ ਦੀਆਂ ਰੱਖਿਆ ਤਕਨਾਲੋਜੀਆਂ ਵਿਕਸਿਤ ਕਰਕੇ ਇੱਕ ਆਲਮੀ ਸਪਲਾਇਰ ਬਣਨ ਵੱਲ ਵਧਣਾ ਚਾਹੀਦਾ ਹੈ। ਉਨ੍ਹਾਂ ਨੇ ਖ਼ਾਸ ਤੌਰ ‘ਤੇ ਡਰੋਨ ਅਤੇ ਕਾਊਂਟਰ-ਡਰੋਨ ਪ੍ਰਣਾਲੀਆਂ ਵਿਕਸਿਤ ਕਰਨ ਅਤੇ ਹਾਈਪਰਸੋਨਿਕ ਰੱਖਿਆ ਤਕਨਾਲੋਜੀਆਂ ਵਿੱਚ ਅਗਵਾਈ ਕਰਨ ਦਾ ਸੱਦਾ ਦਿੱਤਾ। ਉਨ੍ਹਾਂ ਨੇ ਸਾਈਬਰ ਸੁਰੱਖਿਆ ਨੂੰ ਇੱਕ ਅਜਿਹੇ ਖੇਤਰ ਵਜੋਂ ਵੀ ਉਜਾਗਰ ਕੀਤਾ ਜਿੱਥੇ ਭਾਰਤੀ ਨੌਜਵਾਨਾਂ ਦੀਆਂ ਸਮਰੱਥਾਵਾਂ ਦੀ ਵਰਤੋਂ ਭਾਰਤ ਅਤੇ ਦੁਨੀਆ ਲਈ ਕੀਤੀ ਜਾ ਸਕਦੀ ਹੈ।

ਹਰੀ ਅਰਥਵਿਵਸਥਾ ਅਤੇ ਨੀਲੀ ਅਰਥਵਿਵਸਥਾ: ਪ੍ਰਧਾਨ ਮੰਤਰੀ ਨੇ ਗ੍ਰੀਨ ਹਾਈਡ੍ਰੋਜਨ, ਅਖੁੱਟ ਊਰਜਾ, ਊਰਜਾ ਸਟੋਰੇਜ, ਹਰੀ ਗਤੀਸ਼ੀਲਤਾ ਅਤੇ ਹਰੇ ਨਿਰਮਾਣ ਵਿੱਚ ਵਿਸ਼ਵ ਪੱਧਰ ‘ਤੇ ਪ੍ਰਾਪਤੀਆਂ ਦਾ ਸੱਦਾ ਦਿੱਤਾ। ਉਨ੍ਹਾਂ ਨੇ ਮੱਛੀ ਪਾਲਣ, ਤੱਟਵਰਤੀ ਸੈਰ-ਸਪਾਟਾ, ਸਮੁੰਦਰੀ ਤਕਨਾਲੋਜੀ ਅਤੇ ਨੀਲੀ ਅਰਥਵਿਵਸਥਾ ਦੇ ਹੋਰ ਖੇਤਰਾਂ ਵਿੱਚ ਭਾਰਤ ਦੇ ਤੱਟਵਰਤੀ ਖੇਤਰ ਦੇ ਉਪਲਬਧ ਮੌਕਿਆਂ ਨੂੰ ਵੀ ਉਜਾਗਰ ਕੀਤਾ।

ਭਾਰਤ ਦੀ ਨਰਮ ਤਾਕਤ: ਪ੍ਰਧਾਨ ਮੰਤਰੀ ਨੇ ਯੋਗ, ਆਯੁਰਵੇਦ, ਸੰਪੂਰਨ ਸਿਹਤ ਸੰਭਾਲ ਅਤੇ ਹੀਲ ਇਨ ਇੰਡੀਆ ਵਿੱਚ ਭਾਰਤ ਦੀਆਂ ਸ਼ਕਤੀਆਂ ਨੂੰ ਦੁਨੀਆ ਵਿੱਚ ਲਿਜਾਣ ਦਾ ਸੱਦਾ ਦਿੱਤਾ। ਉਨ੍ਹਾਂ ਨੇ ਦਸਤਕਾਰੀ, ਸੱਭਿਆਚਾਰ, ਫ਼ਿਲਮਾਂ, ਵੀਐੱਫਐਕਸ, ਐਨੀਮੇਸ਼ਨ, ਗੇਮਿੰਗ ਅਤੇ ਡਿਜੀਟਲ ਸਮਗਰੀ ਨੂੰ ਉਨ੍ਹਾਂ ਖੇਤਰਾਂ ਵਜੋਂ ਵੀ ਉਜਾਗਰ ਕੀਤਾ ਜਿੱਥੇ ਭਾਰਤ ਵਿਸ਼ਵ ਪੱਧਰ ‘ਤੇ ਆਪਣੀ ਤਾਕਤ ਸਥਾਪਤ ਕਰ ਸਕਦਾ ਹੈ। ਉਨ੍ਹਾਂ ਨੇ ਵਿਦੇਸ਼ੀ ਸੈਲਾਨੀਆਂ, ਆਲਮੀ ਖੇਡ ਸਮਾਗਮਾਂ ਅਤੇ ਸੰਗੀਤ ਸਮਾਗਮਾਂ ਨੂੰ ਭਾਰਤ ਵੱਲ ਆਕਰਸ਼ਿਤ ਕਰਨ ਲਈ ਵੱਡੇ ਯਤਨਾਂ ਦਾ ਸੱਦਾ ਦਿੱਤਾ।

3. ਭਾਰਤ ਦੀਆਂ ਆਸਾਂ ਦਾ ਪੱਧਰ ਵਧਾਉਣਾ : ਦੇਸ਼ ਨੂੰ ਵੱਡਾ ਸੋਚਣ ਦਾ ਸੱਦਾ ਦਿੰਦੇ ਹੋਏ, ਪ੍ਰਧਾਨ ਮੰਤਰੀ ਨੇ ਪੁੱਛਿਆ ਕਿ ਆਉਣ ਵਾਲੇ ਦਹਾਕੇ ਵਿੱਚ ਭਾਰਤ ਨੂੰ ਫਾਰਚੂਨ 500 ਵਿੱਚ 50 ਕੰਪਨੀਆਂ ਕਿਉਂ ਨਹੀਂ ਹੋਣੀਆਂ ਚਾਹੀਦੀਆਂ। ਉਨ੍ਹਾਂ ਕਿਹਾ ਕਿ ਇੱਕ ਭਾਰਤੀ ਬੈਂਕ ਦੁਨੀਆ ਦੇ ਚੋਟੀ ਦੇ ਪੰਜ ਬੈਂਕਾਂ ਵਿੱਚ ਹੋਣਾ ਚਾਹੀਦਾ ਹੈ ਅਤੇ ਇੱਕ ਜਾਂ ਦੋ ਭਾਰਤੀ ਫਾਰਮਾਸਿਊਟੀਕਲ ਕੰਪਨੀਆਂ ਨੂੰ ਦੁਨੀਆ ਦੀਆਂ ਪੰਜ ਸਭ ਤੋਂ ਵੱਡੀਆਂ ਫਾਰਮਾ ਕੰਪਨੀਆਂ ਵਿੱਚ ਜਗ੍ਹਾ ਮਿਲਣੀ ਚਾਹੀਦੀ ਹੈ। ਉਨ੍ਹਾਂ ਨੇ ਭਾਰਤੀ ਕਾਨੂੰਨ ਫਰਮਾਂ, ਰੇਟਿੰਗ ਏਜੰਸੀਆਂ, ਸਲਾਹਕਾਰ ਫਰਮਾਂ ਅਤੇ ਲੇਖਾ ਫਰਮਾਂ ਨੂੰ ਦੁਨੀਆ ਦੀਆਂ ਮੋਹਰੀ ਫਰਮਾਂ ਵਿੱਚੋਂ ਉੱਭਰਨ, ਭਾਰਤੀ ਤਕਨਾਲੋਜੀ ਕੰਪਨੀਆਂ ਨੂੰ ਵਿਸ਼ਵ ਪੱਧਰ ‘ਤੇ ਮੋਹਰੀ ਬਣਨ ਅਤੇ ਭਾਰਤੀ ਬ੍ਰਾਂਡਾਂ ਨੂੰ ਦੇਸ਼ ਦੀ ਪਛਾਣ ਬਣਨ ਦਾ ਸੱਦਾ ਦਿੱਤਾ ਜੋ ਦੁਨੀਆ ਨੂੰ ਆਕਰਸ਼ਿਤ ਕਰਦੇ ਹਨ।

4. ਭਾਰਤੀ ਗੁਣਵੱਤਾ ਨੂੰ ਆਲਮੀ ਪਛਾਣ ਬਣਾਉਣਾ: ਪ੍ਰਧਾਨ ਮੰਤਰੀ ਨੇ ਨਿਰਮਾਤਾਵਾਂ, ਉੱਦਮੀਆਂ ਅਤੇ ਐੱਮਐੱਸਐੱਮਈਜ਼ ਨੂੰ ਆਲਮੀ ਬਾਜ਼ਾਰਾਂ ਵਿੱਚ ਭਾਰਤੀ ਉਤਪਾਦਾਂ ਦੀ ਭਰੋਸੇਯੋਗਤਾ ਅਤੇ ਗੁਣਵੱਤਾ ਦੀ ਪਛਾਣ ਬਣਾਉਣ ਦੀ ਜ਼ੋਰਦਾਰ ਅਪੀਲ ਕੀਤੀ। ਉਨ੍ਹਾਂ ਕਿਹਾ ਕਿ ਭਾਰਤ ਨੂੰ ਲਾਗਤ, ਗੁਣਵੱਤਾ ਅਤੇ ਪੈਮਾਨੇ ਵਿੱਚ ਆਲਮੀ ਮਿਆਰਾਂ ਨੂੰ ਪੂਰਾ ਕਰਨਾ ਚਾਹੀਦਾ ਹੈ ਅਤੇ ਅਜਿਹੇ ਉਤਪਾਦ ਪੇਸ਼ ਕਰਨੇ ਚਾਹੀਦੇ ਹਨ ਜੋ ਆਲਮੀ ਬਾਜ਼ਾਰਾਂ ਵਿੱਚ ਸਫਲਤਾਪੂਰਵਕ ਮੁਕਾਬਲਾ ਕਰ ਸਕਣ। ਉਨ੍ਹਾਂ ਐੱਮਐੱਸਐੱਮਈਜ਼ ਨੂੰ ਭਾਰਤ ਦੇ ਵਪਾਰ ਸਮਝੌਤਿਆਂ ਨਾਲ ਪੈਦਾ ਕੀਤੇ ਮੌਕਿਆਂ ਦਾ ਫ਼ਾਇਦਾ ਉਠਾਉਣ ਅਤੇ ਗੁਣਵੱਤਾ ਅਤੇ ਮੁਕਾਬਲੇਬਾਜ਼ੀ ਦੇ ਵਿਸ਼ਵ ਮਿਆਰਾਂ ਨੂੰ ਪੂਰਾ ਕਰਦੇ ਹੋਏ ਭਾਰਤੀ ਉਤਪਾਦਾਂ ਨੂੰ ਆਲਮੀ ਬਾਜ਼ਾਰਾਂ ਵਿੱਚ ਲੈ ਜਾਣ ਦੀ ਅਪੀਲ ਕੀਤੀ।

5. ਕਾਰਜ ਸੱਭਿਆਚਾਰ ਬਦਲਣ ਅਤੇ ਭਾਰਤ ਦੇ ਟੀਚਿਆਂ ਦੇ ਪੈਮਾਨੇ ਨਾਲ ਮੇਲ ਬਣਾਉਣਾ: ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਇਸ ਸਦੀ ਦੀ ਅਗਲੀ ਚੌਥਾਈ ਭਾਰਤ ਲਈ ਬਹੁਤ ਮਹੱਤਵਪੂਰਨ ਹੈ ਅਤੇ ਦੇਸ਼ ਨਾ ਤਾਂ ਆਪਣੀ ਗਤੀ ਨੂੰ ਰੋਕ ਸਕਦਾ ਹੈ ਅਤੇ ਨਾ ਹੀ ਹੌਲੀ ਹੋਣ ਦੇ ਸਕਦਾ ਹੈ। ਉਨ੍ਹਾਂ ਨੇ ਦੇਸ਼ ਦੇ ਕਾਰਜ ਸੱਭਿਆਚਾਰ, ਸੋਚ ਅਤੇ ਕੰਮ ਦੀ ਗਤੀ ਨੂੰ ਬਦਲਣ ਦਾ ਸੱਦਾ ਦਿੱਤਾ ਅਤੇ ਕਿਹਾ ਕਿ ਜੋ ਕੰਮ ਪਿਛਲੇ ਪੰਜ-ਸੱਤ ਦਹਾਕਿਆਂ ਵਿੱਚ ਪੂਰੇ ਨਹੀਂ ਕੀਤੇ ਗਏ ਸਨ, ਉਨ੍ਹਾਂ ਨੂੰ ਆਉਣ ਵਾਲੇ ਪੰਜ-ਸੱਤ ਸਾਲਾਂ ਵਿੱਚ ਪੂਰਾ ਕਰਨਾ ਪਵੇਗਾ।

6. ਨਸ਼ਾ ਮੁਕਤ ਭਾਰਤ — ਹਰ ਪਰਿਵਾਰ ਦਾ ਸ਼ਾਮਲ ਹੋਣਾ: ਭਾਰਤ ਦੇ ਨੌਜਵਾਨਾਂ ਦੇ ਸਾਹਮਣੇ ਨਸ਼ੇ ਦੀ ਵਰਤੋਂ ਨੂੰ ਇੱਕ ਵੱਡੀ ਚੁਣੌਤੀ ਦੱਸਦਿਆਂ, ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਨਸ਼ਾ ਮੁਕਤ ਭਾਰਤ ਇੱਕ ਸਮੂਹਿਕ ਜ਼ਿੰਮੇਵਾਰੀ ਬਣਨਾ ਚਾਹੀਦਾ ਹੈ। ਮਾਈ ਭਾਰਤ ਵਲੰਟੀਅਰਾਂ, ਗੈਰ-ਸਰਕਾਰੀ ਸੰਗਠਨਾਂ, ਸਮਾਜਿਕ-ਸਭਿਆਚਾਰਕ ਸੰਗਠਨਾਂ ਅਤੇ ਅਧਿਆਤਮਕ ਆਗੂਆਂ ਦੀ ਸ਼ਮੂਲੀਅਤ ਵਾਲੀ 100-ਹਫ਼ਤੇ ਦੀ ਨਸ਼ਾ ਮੁਕਤ ਭਾਰਤ ਮੁਹਿੰਮ ਦਾ ਹਵਾਲਾ ਦਿੰਦੇ ਹੋਏ, ਉਨ੍ਹਾਂ ਨੇ ਹਰੇਕ ਪਰਿਵਾਰ ਨੂੰ ਮੁਹਿੰਮ ਦਾ ਹਿੱਸਾ ਬਣਨ ਅਤੇ ਨਸ਼ਾ ਮੁਕਤ ਭਾਰਤ ਦੇ ਸੁਪਨੇ ਨੂੰ ਸਾਕਾਰ ਕਰਨ ਵਿੱਚ ਯੋਗਦਾਨ ਪਾਉਣ ਦਾ ਸੱਦਾ ਦਿੱਤਾ।

7. ਮਹਿਲਾ ਰਾਖਵਾਂਕਰਨ ਦਾ ਅਮਲ: ਪ੍ਰਧਾਨ ਮੰਤਰੀ ਨੇ ਸਾਰੀਆਂ ਰਾਜਨੀਤਿਕ ਪਾਰਟੀਆਂ ਨੂੰ ਮਹਿਲਾ ਰਾਖਵਾਂਕਰਨ ਲਾਗੂ ਕਰਨ ਲਈ ਇਕੱਠੇ ਹੋਣ ਦੀ ਅਪੀਲ ਕੀਤੀ। ਨਾਰੀ ਸ਼ਕਤੀ ਵੰਦਨ ਅਧਿਨਿਯਮ ਦਾ ਹਵਾਲਾ ਦਿੰਦੇ ਹੋਏ, ਉਨ੍ਹਾਂ ਨੇ ਰਾਜਨੀਤਿਕ ਪਾਰਟੀਆਂ ਨੂੰ ਅਪੀਲ ਕੀਤੀ ਕਿ ਉਹ ਜਲਦੀ ਤੋਂ ਜਲਦੀ ਇਹ ਯਕੀਨੀ ਬਣਾਉਣ ਕਿ ਔਰਤਾਂ ਨੂੰ ਲੋਕ ਸਭਾ ਅਤੇ ਰਾਜ ਵਿਧਾਨ ਸਭਾਵਾਂ ਵਿੱਚ 33 ਪ੍ਰਤੀਸ਼ਤ ਪ੍ਰਤੀਨਿਧਤਾ ਮਿਲੇ ਅਤੇ ਭਾਰਤ ਦੀਆਂ ਨੀਤੀਆਂ ਨੂੰ ਆਕਾਰ ਦੇਣ ਵਿੱਚ ਯੋਗਦਾਨ ਪਾਉਣ ਦੇ ਯੋਗ ਬਣਨ।

8. ਜਨਗਣਨਾ ਵਿੱਚ ਨੌਜਵਾਨਾਂ ਦੀ ਮੋਹਰੀ ਭਾਗੀਦਾਰੀ: ਨੀਤੀਆਂ, ਯੋਜਨਾਵਾਂ ਅਤੇ ਦੇਸ਼ ਦੀ ਭਵਿੱਖੀ ਯੋਜਨਾਬੰਦੀ ਲਈ ਸਹੀ ਜਾਣਕਾਰੀ ਜ਼ਰੂਰੀ ਹੋਣ ‘ਤੇ ਜ਼ੋਰ ਦਿੰਦੇ ਹੋਏ, ਪ੍ਰਧਾਨ ਮੰਤਰੀ ਨੇ ਨੌਜਵਾਨਾਂ ਨੂੰ ਆਪਣੇ ਪਰਿਵਾਰਾਂ ਨੂੰ ਚੱਲ ਰਹੀ ਜਨਗਣਨਾ ਵਿੱਚ ਸਹੀ ਢੰਗ ਨਾਲ ਹਿੱਸਾ ਲੈਣ ਵਿੱਚ ਮਦਦ ਕਰਨ ਲਈ ਅਗਵਾਈ ਕਰਨ ਦਾ ਸੱਦਾ ਦਿੱਤਾ। ਉਨ੍ਹਾਂ ਨੌਜਵਾਨਾਂ ਨੂੰ ਆਪਣੇ ਪਰਿਵਾਰਾਂ ਨਾਲ ਬੈਠਣ, ਫਾਰਮ ਨੂੰ ਸਮਝਣ, ਇਹ ਯਕੀਨੀ ਬਣਾਉਣ ਕਿ ਦਰਜ ਕੀਤੀ ਗਈ ਜਾਣਕਾਰੀ ਸਹੀ ਹੋਵੇ ਅਤੇ ਜਨਗਣਨਾ ਅਭਿਆਸ ਵਿੱਚ ਸਰਗਰਮੀ ਨਾਲ ਹਿੱਸਾ ਲੈਣ ਦੀ ਅਪੀਲ ਕੀਤੀ।

9. ਖ਼ੁਦ ਤੋਂ ਪਹਿਲਾਂ ਰਾਸ਼ਟਰ; ਫਰਜ਼ ਦੀ ਪਛਾਣ: ਪੰਚ ਪ੍ਰਣ ਨੂੰ ਯਾਦ ਕਰਦੇ ਹੋਏ, ਪ੍ਰਧਾਨ ਮੰਤਰੀ ਨੇ ਨਾਗਰਿਕਾਂ ਨੂੰ ਗ਼ੁਲਾਮੀ ਦੀ ਮਾਨਸਿਕਤਾ ਨੂੰ ਖ਼ਤਮ ਕਰਦੇ ਰਹਿਣ ਦਾ ਸੱਦਾ ਦਿੱਤਾ ਅਤੇ ਇਸ ਸੰਕਲਪ ਨੂੰ ਦੁਹਰਾਇਆ ਕਿ ਰਾਸ਼ਟਰ ਦਾ ਹਿੱਤ ਆਪਣੇ ਆਪ ਤੋਂ ਉੱਪਰ ਹੋਣਾ ਚਾਹੀਦਾ ਹੈ ਅਤੇ ਫ਼ਰਜ਼ ਸਾਡੀ ਪਛਾਣ ਬਣਨਾ ਚਾਹੀਦਾ ਹੈ।

10. ਸੁਪਨਿਆਂ ਨੂੰ ਸੰਕਲਪ ਵਿੱਚ ਬਦਲੋ ਅਤੇ ਸੰਕਲਪ ਨੂੰ ਸਫਲਤਾ ਵਿੱਚ ਬਦਲੋ: ਵਿਕਸਿਤ ਭਾਰਤ ਪ੍ਰਤੀ ਸਮੂਹਿਕ ਰਾਸ਼ਟਰੀ ਯਤਨਾਂ ਦੇ ਸੱਦੇ ਦੇ ਨਾਲ ਸਮਾਪਤ ਕਰਦੇ ਹੋਏ, ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਸਮਾਂ, ਮੌਕਾ ਅਤੇ ਸੰਕਲਪ ਭਾਰਤ ਦਾ ਹੈ। ਉਨ੍ਹਾਂ ਨਾਗਰਿਕਾਂ ਨੂੰ ਸੁਪਨਿਆਂ ਨੂੰ ਸੰਕਲਪ ਵਿੱਚ ਬਦਲਣ, ਸੰਕਲਪ ਨੂੰ ਤਾਕਤ ਵਿੱਚ ਅਤੇ ਤਾਕਤ ਨੂੰ ਸਫਲਤਾ ਵਿੱਚ ਬਦਲਣ, ਹਰ ਕਦਮ ਨੂੰ ਵਿਕਾਸ ਵੱਲ ਕਦਮ ਬਣਾਉਣ, ਇਕੱਠੇ ਅੱਗੇ ਵਧਣ ਅਤੇ ਸਮੂਹਿਕ ਤੌਰ ‘ਤੇ ਵਿਕਾਸ ਭਾਰਤ ਬਣਾਉਣ ਦਾ ਸੱਦਾ ਦਿੱਤਾ।

***********

MJPS/SS