પીએમઇન્ડિયા

પ્રધાનમંત્રી શ્રી નરેન્દ્ર મોદી 1 ઓગસ્ટ 2026 ના રોજ આંધ્રપ્રદેશ અને કર્ણાટકની મુલાકાત લેશે. સવારે લગભગ 11 વાગ્યે, પ્રધાનમંત્રી આંધ્રપ્રદેશના વિઝિયાનાગરમ જિલ્લાના ભોગાપુરમ ખાતે અલ્લુરી સીતારામ રાજુ આંતરરાષ્ટ્રીય વિમાનમથકની પેસેન્જર ટર્મિનલ બિલ્ડિંગની મુલાકાત કરશે. સવારે આશરે 11:30 વાગ્યે, તેઓ ભોગાપુરમમાં વિમાનમથકનું ઉદ્ઘાટન કરશે અને ₹17,900 કરોડથી વધુના વિવિધ વિકાસ કાર્યોનો શિલાન્યાસ, ઉદ્ઘાટન અને રાષ્ટ્રને સમર્પણ કરશે. તેઓ આ પ્રસંગે જનસભાને સંબોધિત કરશે. ત્યારબાદ, બપોરે આશરે 3:30 વાગ્યે, પ્રધાનમંત્રી મૈસૂરુમાં શ્રી રામકૃષ્ણ આશ્રમ ખાતે સ્વામી વિવેકાનંદ સાંસ્કૃતિક યુવા કેન્દ્ર – વિવેક સ્મારકનું ઉદ્ઘાટન કરશે. તેઓ આ પ્રસંગે જનસભાને પણ સંબોધિત કરશે.

પ્રધાનમંત્રી આંધ્રપ્રદેશમાં

પ્રધાનમંત્રી શ્રી નરેન્દ્ર મોદી આંધ્રપ્રદેશના ભોગાપુરમ ખાતે અલ્લુરી સીતારામ રાજુ આંતરરાષ્ટ્રીય વિમાનમથકનું ઉદ્ઘાટન કરશે. જાહેર–ખાનગી ભાગીદારી (PPP) મોડ હેઠળ ₹5,640 કરોડથી વધુના ખર્ચે વિકસાવવામાં આવેલ આ ગ્રીનફિલ્ડ વિમાનમથક વાર્ષિક 60 લાખ મુસાફરોને સંભાળવા માટે ડિઝાઇન કરવામાં આવ્યું છે.

પેસેન્જર ટર્મિનલ બિલ્ડિંગ આધુનિક, સીમલેસ અને કાર્યક્ષમ મુસાફરીનો અનુભવ પ્રદાન કરવા માટે ડિઝાઇન કરવામાં આવી છે. વિમાનમથકમાં ઓપરેશનલ કાર્યક્ષમતા વધારવા અને ભવિષ્યની ઉડ્ડયન જરૂરિયાતોને પહોંચી વળવા માટે અદ્યતન ઇન્ફ્રાસ્ટ્રક્ચર, અત્યાધુનિક તકનીકો અને ટકાઉ સુવિધાઓનો સમાવેશ થાય છે.

વિમાનમથક આર્ટિફિશિયલ ઇન્ટેલિજન્સ, બિલ્ડિંગ ઇન્ફર્મેશન મોડેલિંગ (BIM), એરબોર્ન 4.0 તકનીકો, એરપોર્ટ પ્રિડિક્ટિવ ઓપરેશન્સ સેન્ટર (APOC), બાયોમેટ્રિક પેસેન્જર પ્રોસેસિંગ, સ્વચાલિત સામાન સંભાળવાની સિસ્ટમ્સ અને ઇન્ટેલિજન્ટ ઓપરેશનલ મોનિટરિંગ સોલ્યુશન્સ જેવી અદ્યતન તકનીકોથી સજ્જ છે. આ સિસ્ટમ્સ ઓપરેશનલ કાર્યક્ષમતા વધારવા, મુસાફરોની સુવિધા અને સલામતીમાં સુધારો કરવા અને સંસાધનોના ઉપયોગને શ્રેષ્ઠ બનાવવાની અપેક્ષા રાખે છે.

આ પ્રોજેક્ટમાં ઉર્જા–કાર્યક્ષમ હીટિંગ, વેન્ટિલેશન અને એર કંડિશનિંગ (HVAC) સિસ્ટમ્સ, ઉર્જા–કાર્યક્ષમ લાઇટિંગ, 5 મેગાવોટનો સોલર પાવર પ્લાન્ટ, વરસાદી પાણીનો સંગ્રહ, સ્માર્ટ બિલ્ડિંગ મેનેજમેન્ટ સિસ્ટમ્સ, વેસ્ટ મેનેજમેન્ટ પહેલ, ઇલેક્ટ્રિક વાહન ચાર્જિંગ ઇન્ફ્રાસ્ટ્રક્ચર અને પર્યાવરણીય દેખરેખના પગલાં સહિત કેટલીક સ્થિરતા સુવિધાઓનો સમાવેશ થાય છે. ટર્મિનલ ગ્રીન બિલ્ડિંગ સ્ટાન્ડર્ડ્સ અનુસાર ડિઝાઇન કરવામાં આવ્યું છે અને તે યુ.એસ. ગ્રીન બિલ્ડિંગ કાઉન્સિલ (USGBC) સાથે નોંધાયેલ છે.

એરપોર્ટની સ્થાપત્ય ડિઝાઇન આંધ્રપ્રદેશના સાંસ્કૃતિક વારસામાંથી પ્રેરણા લે છે. ટર્મિનલની છત પ્રોફાઇલ પરંપરાગત ચુટ્ટિલુ કોટેજિસ અને અરાકુ વેલીના લેન્ડસ્કેપ્સને દર્શાવે છે, જ્યારે તેનું વહેતું સ્વરૂપ ફ્લાઇંગ ફિશની સુંદર હિલચાલનું પ્રતીક છે, જે સમકાલીન એરપોર્ટ ડિઝાઇન સાથે પ્રાદેશિક સ્થાપત્ય ઘટકોનું મિશ્રણ કરે છે. આ વિમાનમથક પ્રદેશમાં હવાઈ કનેક્ટિવિટી મજબૂત કરવાની સાથે આંધ્રપ્રદેશમાં પ્રવાસન, વેપાર, રોકાણ અને રોજગાર સર્જનને નોંધપાત્ર વેગ આપે તેવી અપેક્ષા છે.

પ્રધાનમંત્રી વિશાખાપટ્ટનમ ખાતે ASIP સેમિકન્ડક્ટર પ્રોજેક્ટનો શિલાન્યાસ કરશે, જે ₹460 કરોડથી વધુના રોકાણ સાથે વિકસાવવામાં આવી રહ્યો છે. આ સુવિધા સાઉથ કોરિયાના APACT સાથેની ભાગીદારીમાં ASIP ટેકનોલોજીસ પ્રાઇવેટ લિમિટેડ દ્વારા વિકસાવવામાં આવી રહી છે. ઈન્ડિયા સેમિકન્ડક્ટર મિશન હેઠળ મંજૂર કરાયેલી આ આંધ્રપ્રદેશની પ્રથમ સેમિકન્ડક્ટર ઉત્પાદન સુવિધા છે. આ સુવિધા વાર્ષિક આશરે 9.6 કરોડ સેમિકન્ડક્ટર ચિપ્સનું ઉત્પાદન કરશે અને ઉચ્ચ કુશળ રોજગારીની તકો ઊભી કરશે, સાથે સેમિકન્ડક્ટર ઉત્પાદનને ટેકો આપવા માટે એક મજબૂત સહાયક ઇકોસિસ્ટમને પણ પ્રોત્સાહન આપશે.

પ્રધાનમંત્રી પાવરગ્રીડ દ્વારા સ્પેશિયલ પર્પઝ વ્હીકલ (SPV) મારફતે આશરે ₹5,550 કરોડના રોકાણ સાથે અમલમાં મુકવામાં આવી રહેલા કુર્નૂલ–IV રિન્યુએબલ એનર્જી ઝોન (REZ) – ફેઝ–I (4.5 GW) ના ઇન્ટિગ્રેશન માટેની ટ્રાન્સમિશન સિસ્ટમનો શિલાન્યાસ કરશે.

પ્રધાનમંત્રી આશરે ₹3,550 કરોડના ખર્ચે અમલમાં મુકાયેલ કુર્નૂલ વિન્ડ એનર્જી ઝોન / સોલર એનર્જી ઝોન (આંધ્રપ્રદેશ) – પાર્ટ A અને પાર્ટ B ની ટ્રાન્સમિશન સિસ્ટમ અને પાવરગ્રીડ દ્વારા ₹820 કરોડથી વધુના ખર્ચે અમલમાં મુકાયેલ અનંતપુરમ (2,500 MW) અને કુર્નૂલ (1,000 MW) માં સોલર એનર્જી ઝોન માટેની ટ્રાન્સમિશન સ્કીમનું પણ ઉદ્ઘાટન કરશે.

આ ટ્રાન્સમિશન પ્રોજેક્ટ્સ કુર્નૂલ અને અનંતપુરમમાં પુનઃપ્રાપ્ય ઊર્જા ક્ષેત્રોમાંથી ઉત્પાદિત વીજળીના ઉપયોગ અને નેશનલ ગ્રીડ દ્વારા દેશભરના લાભાર્થીઓને વીજળીના ટ્રાન્સમિશનને સક્ષમ બનાવશે. તેઓ ગ્રીડમાં મોટા પ્રમાણમાં પુનઃપ્રાપ્ય ઊર્જાના સંકલનને સુવિધાજનક બનાવશે, માંગ કેન્દ્રો માટે સ્વચ્છ વીજળીની ઉપલબ્ધતામાં સુધારો કરશે અને અશ્મિભૂત ઇંધણ આધારિત વીજ ઉત્પાદન પરની નિર્ભરતા ઘટાડીને ભારતના ઊર્જા સંક્રમણ અને કાર્બન ઉત્સર્જન ઘટાડવાના પ્રયાસોમાં યોગદાન આપશે.

પ્રધાનમંત્રી ₹1,880 કરોડથી વધુના નેશનલ હાઇવે પ્રોજેક્ટ્સ રાષ્ટ્રને સમર્પિત કરશે અને શિલાન્યાસ કરશે. રાષ્ટ્રને સમર્પિત કરવામાં આવનારા પ્રોજેક્ટ્સમાં NH-365BG ના રેચર્લા થી ગુરુવાયગુડેમ સેક્શનના ફોર–લેન એક્સેસ–કંટ્રોલ્ડ ગ્રીનફિલ્ડ હાઇવે, NH-365BG ના ગુરુવાયગુડેમ થી દેવરાપલ્લે સેક્શનના ફોર–લેન એક્સેસ–કંટ્રોલ્ડ ગ્રીનફિલ્ડ હાઇવે અને NH-67 પર ફોર–લેન તડીપત્રી બાયપાસનો સમાવેશ થાય છે. પ્રધાનમંત્રી NH-565 ના પેંચલાકોના–યેરપેડુ સેક્શન પર લિંગાસમુદ્રમ ખાતે હાઇ–લેવલ બ્રિજનો શિલાન્યાસ પણ કરશે. આ પ્રોજેક્ટ્સ વિજયવાડા અને અન્ય કેટલાક શહેરોમાં ટ્રાફિકની ભીડ હળવી કરશે, માર્ગ સલામતીમાં સુધારો કરશે, વિશાખાપટ્ટનમ અને હૈદરાબાદ વચ્ચે મુસાફરીનું અંતર અને મુસાફરીનો સમય ઘટાડશે અને પ્રાદેશિક કનેક્ટિવિટીને પ્રોત્સાહન આપશે.

પ્રધાનમંત્રી કર્ણાટકમાં

પ્રધાનમંત્રી શ્રી નરેન્દ્ર મોદી કર્ણાટકના મૈસૂરુ ખાતે સ્વામી વિવેકાનંદ સાંસ્કૃતિક યુવા કેન્દ્ર – વિવેક સ્મારકનું ઉદ્ઘાટન કરશે.

વિવેક સ્મારક ભારતયાત્રા દરમિયાન નવેમ્બર 1892 માં સ્વામી વિવેકાનંદની મૈસૂરુની ઐતિહાસિક મુલાકાતની યાદ અપાવે છે. તેમના રોકાણ દરમિયાન, તેમણે પ્રવચનો આપ્યા, વિદ્વાનો અને ભક્તો સાથે વાતચીત કરી અને મહારાજા શ્રી ચામરાજેન્દ્ર વાડિયાર X નું સંરક્ષણ પ્રાપ્ત કર્યું, જેમના સમર્થનથી 1893 માં શિકાગોમાં ધર્મ સંસદમાં તેમની યાત્રા સક્ષમ બની હતી.

ઐતિહાસિક નિરંજના મઠ ખાતે સ્થાપિત, વિવેક સ્મારક 81,000 ચોરસ ફૂટથી વધુના બિલ્ટ–અપ વિસ્તારમાં ફેલાયેલું છે અને તેમાં મુખ્ય મકાન અને એનેક્સ બ્લોકનો સમાવેશ થાય છે. તેમાં 4-D એક્સપિરિયન્સ સેન્ટર, એક્ઝિબિશન હોલ, આશરે 700 સીટોની ક્ષમતા ધરાવતું એમ્ફીથિયેટર, વર્ગખંડો, કોન્ફરન્સ રૂમ, લાઇનબ્રેરી, રીડિંગ રૂમ, ધ્યાન અને યોગ હોલ અને બુક સ્ટોલ છે. કેન્દ્રમાં સ્પર્ધાત્મક પરીક્ષાઓની તૈયારી કરતા વિદ્યાર્થીઓ માટે સમર્પિત સુવિધાઓ પણ શામેલ છે.

સ્વામી વિવેકાનંદના જીવન, સંદેશ અને આદર્શોને સમર્પિત, સાંસ્કૃતિક યુવા કેન્દ્રનો ઉદ્દેશ્ય મૂલ્ય–આધારિત શિક્ષણ, નેતૃત્વ વિકાસ અને વ્યક્તિત્વ નિર્માણ માટેના એક જીવંત કેન્દ્ર તરીકે સેવા આપવાનો છે. સ્વામી વિવેકાનંદના રાષ્ટ્ર નિર્માણ અને ચરિત્ર વિકાસના ફિલસૂફીથી પ્રેરિત વ્યાખ્યાનો, વર્કશોપ, ટૂંકા ગાળાના અભ્યાસક્રમો અને ક્ષમતા નિર્માણ કાર્યક્રમો દ્વારા નજીકની શૈક્ષણિક સંસ્થાઓના 10,000 થી વધુ વિદ્યાર્થીઓ તેમજ શહેરી અને ગ્રામીણ યુવાનોને લાભ થવાની અપેક્ષા છે.

SM/DK/GP

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964@gmail.com [ 0KB ]