ਪੀਐੱਮਇੰਡੀਆ

ਪ੍ਰਧਾਨ ਮੰਤਰੀ ਸ਼੍ਰੀ ਨਰੇਂਦਰ ਮੋਦੀ ਨੇ ਅੱਜ 80ਵੇਂ ਆਜ਼ਾਦੀ ਦਿਹਾੜੇ ਮੌਕੇ ਲਾਲ ਕਿਲ੍ਹੇ ਦੀ ਫ਼ਸੀਲ ਤੋਂ ਦੇਸ਼ ਨੂੰ ਸੰਬੋਧਨ ਕੀਤਾ। ਉਨ੍ਹਾਂ ਨੇ ਦਿਲੋਂ ਵਧਾਈਆਂ ਦਿੰਦਿਆਂ ਕਿਹਾ ਕਿ ‘ਵੰਦੇ ਮਾਤਰਮ’ ਦੇ 150 ਸਾਲ ਮਨਾਉਂਦਿਆਂ ਦੇਸ਼ ਭਰ ਵਿੱਚ ਹਰ ਦਿਲ ਅਤੇ ਹਰ ਘਰ ਤਿਰੰਗੇ ਦੇ ਜਜ਼ਬੇ ਅਤੇ ਨਵੇਂ ਸੰਕਲਪਾਂ ਨਾਲ ਭਰਿਆ ਹੋਇਆ ਹੈ। ਸ਼੍ਰੀ ਮੋਦੀ ਨੇ ਕਿਹਾ, “ਮੈਂ ਉਨ੍ਹਾਂ ਸਾਰੇ ਆਜ਼ਾਦੀ ਘੁਲਾਟੀਆਂ ਅਤੇ ਮਹਾਨ ਇਨਕਲਾਬੀਆਂ ਅੱਗੇ ਸਤਿਕਾਰ ਸਹਿਤ ਸਿਰ ਝੁਕਾਉਂਦਾ ਹਾਂ ਜਿਨ੍ਹਾਂ ਨੇ ਕੁਰਬਾਨੀ ਦੀ ਮਹਾਨ ਰਵਾਇਤ ਨੂੰ ਜਗਾਇਆ।”

ਹਾਲ ਹੀ ਵਿੱਚ ਆਏ ਭਿਆਨਕ ਹੜ੍ਹਾਂ ਅਤੇ ਢਿੱਗਾਂ ਡਿੱਗਣ ਦੀਆਂ ਘਟਨਾਵਾਂ ਤੋਂ ਪ੍ਰਭਾਵਿਤ ਨਾਗਰਿਕਾਂ ਨਾਲ ਡੂੰਘੀ ਹਮਦਰਦੀ ਪ੍ਰਗਟ ਕਰਦਿਆਂ, ਪ੍ਰਧਾਨ ਮੰਤਰੀ ਨੇ ਉਨ੍ਹਾਂ ਨੂੰ ਇਨ੍ਹਾਂ ਔਖੇ ਸਮਿਆਂ ਵਿੱਚ ਦੇਸ਼ ਦੇ ਅਟੁੱਟ ਸਹਿਯੋਗ ਦਾ ਭਰੋਸਾ ਦਿੱਤਾ। ਸ਼੍ਰੀ ਮੋਦੀ ਨੇ ਕਿਹਾ, “ਮੈਂ ਪ੍ਰਭਾਵਿਤ ਪਰਿਵਾਰਾਂ ਨੂੰ ਭਰੋਸਾ ਦਿਵਾਉਂਦਾ ਹਾਂ ਕਿ ਅਸੀਂ ਅਤੇ ਪੂਰਾ ਦੇਸ਼ ਉਨ੍ਹਾਂ ਦੇ ਦੁੱਖ ਅਤੇ ਪੀੜ ਵਿੱਚ ਉਨ੍ਹਾਂ ਨਾਲ ਮਜ਼ਬੂਤੀ ਨਾਲ ਖੜ੍ਹੇ ਹਾਂ।”

ਕੌਮੀ ਮਹਾਨਤਾ ਦੇ ਬੁਨਿਆਦੀ ਅਸੂਲਾਂ ’ਤੇ ਜ਼ੋਰ ਦਿੰਦਿਆਂ, ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਅਸਲ ਕਾਮਯਾਬੀ ਉਦੋਂ ਹੀ ਮਿਲਦੀ ਹੈ, ਜਦੋਂ ਕੋਈ ਦੇਸ਼ ਆਪਣੀਆਂ ਉਮੀਦਾਂ ਅਤੇ ਮਜ਼ਬੂਤ ਸਮਰੱਥਾਵਾਂ ’ਤੇ ਨਿਰਭਰ ਕਰਦਾ ਹੈ। ਸ਼੍ਰੀ ਮੋਦੀ ਨੇ ਕਿਹਾ, “ਕੋਈ ਵੀ ਦੇਸ਼ ਉਦੋਂ ਮਹਾਨ ਬਣਦਾ ਹੈ ਅਤੇ ਆਪਣੇ ਟੀਚਿਆਂ ਨੂੰ ਹਾਸਲ ਕਰਦਾ ਹੈ, ਜਦੋਂ ਉਹ ਆਪਣੇ ਸੁਪਨਿਆਂ ਅਤੇ ਸੰਕਲਪਾਂ ਦੀ ਸੱਚੀ ਤਾਕਤ ਨਾਲ ਅੱਗੇ ਵਧਦਾ ਹੈ।”

ਨਾਗਰਿਕਾਂ ਨੂੰ ਛੋਟੀਆਂ ਇੱਛਾਵਾਂ ਛੱਡ ਕੇ ਦੇਸ਼ ਦੀ ਸੋਚ ਨੂੰ ਵਿਸ਼ਾਲ ਕਰਨ ਵਾਲੀ ਵੱਡੀ ਸੋਚ ਅਪਣਾਉਣ ਦੀ ਅਪੀਲ ਕਰਦਿਆਂ, ਪ੍ਰਧਾਨ ਮੰਤਰੀ ਨੇ ਸਮਝਾਇਆ ਕਿ ਪੱਕਾ ਇਰਾਦਾ ਸੰਕਟਾਂ ਵਿੱਚੋਂ ਨਿਕਲਣ ਦੀ ਤਾਕਤ ਆਪਣੇ-ਆਪ ਪੈਦਾ ਕਰਦਾ ਹੈ। ਸ਼੍ਰੀ ਮੋਦੀ ਨੇ ਕਿਹਾ, “ਜਦੋਂ ਸੰਕਲਪ ਪੱਕਾ ਹੁੰਦਾ ਹੈ, ਤਾਂ ਮੁਸੀਬਤਾਂ ਵਿੱਚੋਂ ਰਸਤੇ ਲੱਭਣ ਦੀ ਸਮਰੱਥਾ ਆਪਣੇ-ਆਪ ਪੈਦਾ ਹੋ ਜਾਂਦੀ ਹੈ।”

ਇੱਛਾ ਅਤੇ ਅਸਲ ਸਮਰੱਥਾ ਵਿਚਾਲੇ ਸਿੱਧੇ ਸਬੰਧ ਬਾਰੇ ਵਿਸਥਾਰ ਨਾਲ ਦੱਸਦਿਆਂ, ਪ੍ਰਧਾਨ ਮੰਤਰੀ ਨੇ ਜ਼ੋਰ ਦਿੱਤਾ ਕਿ ਉੱਚੇ ਸੁਪਨੇ ਕੁਦਰਤੀ ਤੌਰ ’ਤੇ ਕੌਮੀ ਕੋਸ਼ਿਸ਼ਾਂ ਦੇ ਸਮੁੱਚੇ ਪੱਧਰ ਅਤੇ ਸਮਰੱਥਾ ਨੂੰ ਵਧਾਉਂਦੇ ਹਨ। ਸ਼੍ਰੀ ਮੋਦੀ ਨੇ ਕਿਹਾ, “ਜਦੋਂ ਸੁਪਨੇ ਅਤੇ ਸੰਕਲਪ ਉੱਚੇ ਹੁੰਦੇ ਹਨ, ਤਾਂ ਸਾਡੀ ਸਮਰੱਥਾ ਦਾ ਦਾਇਰਾ ਵੀ ਵਧ ਜਾਂਦਾ ਹੈ।”

ਇਤਿਹਾਸਕ ਕੌਮੀ ਟੀਚੇ ਦਾ ਐਲਾਨ ਕਰਦਿਆਂ, ਪ੍ਰਧਾਨ ਮੰਤਰੀ ਨੇ 2047 ਤੱਕ ਦੇਸ਼ ਨੂੰ ਪੂਰੀ ਤਰ੍ਹਾਂ ਵਿਕਸਿਤ ਰਾਸ਼ਟਰ ਬਣਾਉਣ ਦੇ ਪੱਕੇ ਇਰਾਦੇ ਦਾ ਐਲਾਨ ਕੀਤਾ, ਜੋ ਦੁਨੀਆ ਨੂੰ ਭਾਰਤ ਦੀ ਅਥਾਹ ਦਲੇਰੀ ਅਤੇ ਸਮਰੱਥਾ ਨੂੰ ਮਾਨਤਾ ਦੇਣ ਲਈ ਮਜਬੂਰ ਕਰੇਗਾ। ਸ਼੍ਰੀ ਮੋਦੀ ਨੇ ਦਾਅਵਾ ਕੀਤਾ, “140 ਕਰੋੜ ਦੇਸ਼-ਵਾਸੀਆਂ ਦੀ ਸਖ਼ਤ ਮਿਹਨਤ ਨਾਲ, ਅਸੀਂ ਆਜ਼ਾਦੀ ਦੇ 100ਵੇਂ ਸਾਲ ਤੱਕ ਯਕੀਨੀ ਤੌਰ ’ਤੇ ‘ਵਿਕਸਿਤ ਭਾਰਤ’ ਬਣਾਵਾਂਗੇ।”

ਸਾਰੇ ਵਰਗਾਂ ਦੇ ਸਾਂਝੇ ਯੋਗਦਾਨ ਦੀ ਸ਼ਲਾਘਾ ਕਰਦਿਆਂ, ਪ੍ਰਧਾਨ ਮੰਤਰੀ ਨੇ ਪਿਛਲੇ 12 ਸਾਲਾਂ ਦੌਰਾਨ ਮਨੁੱਖੀ ਸ਼ਕਤੀਕਰਨ ਅਤੇ ਆਰਥਿਕ ਤਬਦੀਲੀ ਦਾ ਵਿਸਤ੍ਰਿਤ ਰਿਪੋਰਟ ਕਾਰਡ ਪੇਸ਼ ਕੀਤਾ। ਉਨ੍ਹਾਂ ਦੱਸਿਆ ਕਿ 25 ਕਰੋੜ ਨਾਗਰਿਕਾਂ ਨੇ ਗ਼ਰੀਬੀ ਨੂੰ ਹਰਾਇਆ ਹੈ ਅਤੇ ਭਾਰਤ ‘ਫ੍ਰੈਜਾਈਲ ਫਾਈਵ’ ਤੋਂ ਉੱਭਰ ਕੇ ਸਭ ਤੋਂ ਤੇਜ਼ੀ ਨਾਲ ਵਧਣ ਵਾਲਾ ਵੱਡਾ ਅਰਥਚਾਰਾ ਬਣ ਗਿਆ ਹੈ। ਸ਼੍ਰੀ ਮੋਦੀ ਨੇ ਕਿਹਾ, “ਹਰ ਨਾਗਰਿਕ ਨੇ ਪੂਰੀ ਲਗਨ ਨਾਲ ਦੇਸ਼ ਨੂੰ ਨਵੀਆਂ ਬੁਲੰਦੀਆਂ ’ਤੇ ਲਿਜਾਣ ਲਈ ਹਰ ਸੰਭਵ ਯਤਨ ਕੀਤਾ ਹੈ।”

ਅਤੀਤ ਵਿੱਚ ਗੁਆਏ ਮੌਕਿਆਂ, ਜਿੱਥੇ ਰਫ਼ਤਾਰ ਦੀ ਘਾਟ ਕਾਰਨ ਦੇਸ਼ ਪਿੱਛੇ ਰਹਿ ਗਿਆ ਸੀ, ਦਾ ਜ਼ਿਕਰ ਕਰਦਿਆਂ, ਪ੍ਰਧਾਨ ਮੰਤਰੀ ਨੇ ਹੁਣ ਆਈ ਤੇਜ਼ੀ ਦੀ ਸ਼ਲਾਘਾ ਕੀਤੀ ਅਤੇ ਜ਼ੋਰ ਦਿੱਤਾ ਕਿ ਲੋਕਾਂ ਦਾ ਸਾਂਝਾ ਸੰਕਲਪ ਹੁਣ ਰੁਕਣ ਵਾਲਾ ਨਹੀਂ ਹੈ। ਸ਼੍ਰੀ ਮੋਦੀ ਨੇ ਕਿਹਾ, “ਭਾਰਤ ਨੇ ਸ਼ਾਨਦਾਰ ਨਵੀਂ ਰਫ਼ਤਾਰ ਫੜੀ ਹੈ, ਅਤੇ ਹੁਣ 140 ਕਰੋੜ ਦੇਸ਼-ਵਾਸੀਆਂ ਦੀ ਸਮਰੱਥਾ ਰੋਕਣੀ ਅਸੰਭਵ ਹੈ।”

ਪਿਛਲੇ 12 ਸਾਲਾਂ ਦੌਰਾਨ ਨਿਰਮਾਣ, ਡਿਜੀਟਲ ਵਿਕਾਸ ਅਤੇ ਨਾਗਰਿਕਾਂ ਨੂੰ ਮਿਲਣ ਵਾਲੀਆਂ ਸਹੂਲਤਾਂ ਵਿੱਚ ਭਾਰਤ ਦੀ ਤਰੱਕੀ ਦਾ ਵਿਸਤ੍ਰਿਤ ਰਿਪੋਰਟ ਕਾਰਡ ਪੇਸ਼ ਕਰਦਿਆਂ, ਪ੍ਰਧਾਨ ਮੰਤਰੀ ਨੇ ਦੱਸਿਆ ਕਿ ਰੱਖਿਆ ਉਤਪਾਦਨ ਵਿੱਚ ਤਕਰੀਬਨ 4 ਗੁਣਾ ਵਾਧਾ ਹੋਇਆ ਹੈ, ਖਾਦੀ ਅਤੇ ਗ੍ਰਾਮ ਉਦਯੋਗ 5 ਗੁਣਾ ਵਧੇ ਹਨ, ਇਲੈਕਟ੍ਰੋਨਿਕਸ ਨਿਰਮਾਣ ਵਿੱਚ ਲਗਭਗ 7 ਗੁਣਾ ਵਾਧਾ ਹੋਇਆ ਹੈ, ਰੇਲਵੇ ਕੋਚਾਂ ਦਾ ਉਤਪਾਦਨ 21 ਗੁਣਾ ਵਧਿਆ ਹੈ ਅਤੇ ਮੋਬਾਈਲ ਫੋਨ ਨਿਰਮਾਣ ਵਿੱਚ 33 ਗੁਣਾ ਵਾਧਾ ਹੋਇਆ ਹੈ। ਡਿਜੀਟਲ ਨਵੀਨਤਾ ਵਿੱਚ ਇੰਟਰਨੈੱਟ ਵਰਤੋਂਕਾਰ 4 ਗੁਣਾ ਵਧੇ ਹਨ, ਪੇਟੈਂਟ ਮਨਜ਼ੂਰੀਆਂ ਵਿੱਚ 4 ਗੁਣਾ ਵਾਧਾ ਹੋਇਆ ਹੈ ਅਤੇ ਡਿਜੀਟਲ ਲੈਣ-ਦੇਣ 100 ਗੁਣਾ ਵਧਿਆ ਹੈ। ਇਸ ਦੇ ਨਾਲ ਹੀ ਬੁਨਿਆਦੀ ਸਹੂਲਤਾਂ ਵਿੱਚ ਤੇਜ਼ੀ ਆਈ ਹੈ, ਜਿਵੇਂ ਕਿ ਟੂਟੀ ਵਾਲੇ ਪਾਣੀ ਦੇ ਕਨੈਕਸ਼ਨ 15 ਗੁਣਾ ਤੇਜ਼ੀ ਨਾਲ ਦਿੱਤੇ ਗਏ ਹਨ, ਐੱਲਪੀਜੀ ਕਨੈਕਸ਼ਨ 6 ਗੁਣਾ ਤੇਜ਼ੀ ਨਾਲ ਵਧੇ ਹਨ, ਪਖਾਨੇ 4 ਗੁਣਾ ਤੇਜ਼ੀ ਨਾਲ ਬਣਾਏ ਗਏ ਹਨ, ਪੱਕੇ ਘਰ 3 ਗੁਣਾ ਤੇਜ਼ੀ ਨਾਲ ਬਣੇ ਹਨ ਅਤੇ ਸੈਂਕੜੇ ਪੁਰਾਣੇ ਕਾਨੂੰਨ ਖ਼ਤਮ ਕੀਤੇ ਗਏ ਹਨ। ਸ਼੍ਰੀ ਮੋਦੀ ਨੇ ਕਿਹਾ, “ਜਦੋਂ ਇੰਨੀਆਂ ਵੱਡੀਆਂ ਪ੍ਰਾਪਤੀਆਂ ਸਾਡੇ ਸਾਹਮਣੇ ਹੋਣ, ਤਾਂ ‘ਵਿਕਸਿਤ ਭਾਰਤ’ ਬਣਨ ਦਾ ਸੰਕਲਪ ਕਦੇ ਵੀ ਅਧੂਰਾ ਨਹੀਂ ਰਹਿ ਸਕਦਾ।”

ਮਜ਼ਬੂਤ ਆਤਮ-ਨਿਰਭਰਤਾ ਅਤੇ ਕੌਮੀ ਮਾਣ ਦੀ ਸਖ਼ਤ ਲੋੜ ’ਤੇ ਜ਼ੋਰ ਦਿੰਦਿਆਂ, ਪ੍ਰਧਾਨ ਮੰਤਰੀ ਨੇ ਸਸਤੀਆਂ ਵਿਦੇਸ਼ੀ ਵਸਤਾਂ ’ਤੇ ਨਿਰਭਰ ਰਹਿਣ ਦੀ ਸੋਚ ਪੂਰੀ ਤਰ੍ਹਾਂ ਨਕਾਰ ਦਿੱਤੀ ਅਤੇ ਇਸ ਦੀ ਬਜਾਏ ਮਜ਼ਬੂਤ ਘਰੇਲੂ ਸਮਰੱਥਾਵਾਂ ਉਸਾਰਨ ਵਾਲੀਆਂ ਪਹਿਲਕਦਮੀਆਂ ਦੀ ਵਕਾਲਤ ਕੀਤੀ। ਸ਼੍ਰੀ ਮੋਦੀ ਨੇ ਕਿਹਾ, “ਸਾਨੂੰ ਯੋਜਨਾਬੱਧ ਤਰੀਕੇ ਨਾਲ ਆਪਣੀਆਂ ਸਮਰੱਥਾਵਾਂ ਵਧਾਉਣੀਆਂ ਚਾਹੀਦੀਆਂ ਹਨ ਅਤੇ ਆਪਣੇ ਹਿੱਤਾਂ ਦੀ ਰਾਖੀ ਖੁਦ ਕਰਨੀ ਚਾਹੀਦੀ ਹੈ।”

ਦੇਸ਼ ਦੀ ਤੇਜ਼ ਤਕਨੀਕੀ ਤਰੱਕੀ ਅਤੇ ਆਤਮ-ਨਿਰਭਰਤਾ ਵੱਲ ਜ਼ੋਰਦਾਰ ਯਤਨਾਂ ਨੂੰ ਦਰਸਾਉਂਦਿਆਂ, ਪ੍ਰਧਾਨ ਮੰਤਰੀ ਨੇ ਸੈਮੀਕੰਡਕਟਰਾਂ ਦੀ ਵਿਸ਼ਵ ਪੱਧਰੀ ਮਹੱਤਤਾ ਨੂੰ ਉਜਾਗਰ ਕੀਤਾ ਅਤੇ ਪ੍ਰਗਤੀ ਰਿਪੋਰਟ ਪੇਸ਼ ਕੀਤੀ। ਉਨ੍ਹਾਂ ਮਾਣ ਨਾਲ ਐਲਾਨ ਕੀਤਾ ਕਿ ਦੇਸ਼ ਵਿੱਚ ਤਿੰਨ ਪਲਾਂਟ ਪਹਿਲਾਂ ਹੀ ਚਾਲੂ ਹਨ ਅਤੇ ਆਲਮੀ ਬਾਜ਼ਾਰਾਂ ਵਿੱਚ ਚਿਪਸ ਬਰਾਮਦ ਕਰ ਰਹੇ ਹਨ। ਉਨ੍ਹਾਂ ਇਹ ਅਹਿਮ ਨੀਤੀਗਤ ਐਲਾਨ ਵੀ ਕੀਤਾ ਕਿ 1 ਤੋਂ 2 ਸਾਲਾਂ ਦੇ ਅੰਦਰ 7 ਤੋਂ 8 ਨਵੇਂ ਉਤਪਾਦਨ ਪਲਾਂਟ ਚਾਲੂ ਹੋ ਜਾਣਗੇ। ਸ਼੍ਰੀ ਮੋਦੀ ਨੇ ਦਾਅਵਾ ਕੀਤਾ, “ਇਹ ਆਤਮ-ਨਿਰਭਰ ਭਾਰਤ ਸਾਨੂੰ ‘ਵਿਕਸਿਤ ਭਾਰਤ’ ਦੀ ਦਿਸ਼ਾ ਵਿੱਚ ਤੇਜ਼ੀ ਨਾਲ ਅੱਗੇ ਵਧਣ ਲਈ ਇੱਕ ਪੱਕਾ ਰਸਤਾ ਦਿੰਦਾ ਹੈ।”

ਸਰੋਤਾਂ ਦੀ ਸੁਰੱਖਿਆ ਦੀ ਰਣਨੀਤਕ ਲੋੜ ਬਾਰੇ ਪ੍ਰਧਾਨ ਮੰਤਰੀ ਨੇ ਬਜਟ ਵਿੱਚ ਐਲਾਨੇ ਗਏ ‘ਨੈਸ਼ਨਲ ਕ੍ਰਿਟੀਕਲ ਮਿਨਰਲਜ਼ ਮਿਸ਼ਨ’ ਅਤੇ ‘ਕ੍ਰਿਟੀਕਲ ਮਿਨਰਲਜ਼ ਕੌਰੀਡੋਰ’ ਦੀ ਸ਼ੁਰੂਆਤ ਦਾ ਜ਼ਿਕਰ ਕੀਤਾ। ਉਨ੍ਹਾਂ ਦੱਸਿਆ ਕਿ ਵਿਆਪਕ ਕੌਮਾਂਤਰੀ ਸਮਝੌਤਿਆਂ ਨੇ ਭਾਰਤ ਨੂੰ ਵਿਸ਼ਵ ਪੱਧਰ ’ਤੇ ਭਰੋਸੇਮੰਦ ਭਾਈਵਾਲ ਵਜੋਂ ਸਥਾਪਿਤ ਕੀਤਾ ਹੈ। ਸ਼੍ਰੀ ਮੋਦੀ ਨੇ ਕਿਹਾ, “ਦੁਨੀਆ ਦੇ ਕਈ ਦੇਸ਼ਾਂ ਨੇ ਹੁਣ ਇਨ੍ਹਾਂ ਅਹਿਮ ਖਣਿਜਾਂ ਦੀ ਰਣਨੀਤਕ ਦਿਸ਼ਾ ਵਿੱਚ ਭਾਰਤ ’ਤੇ ਪੱਕਾ ਭਰੋਸਾ ਕਰਨਾ ਸ਼ੁਰੂ ਕਰ ਦਿੱਤਾ ਹੈ।”

ਤਕਨੀਕੀ ਤਰੱਕੀ ਨੂੰ ਊਰਜਾ ਦੀਆਂ ਵਧਦੀਆਂ ਮੰਗਾਂ ਨਾਲ ਜੋੜਦਿਆਂ ਪ੍ਰਧਾਨ ਮੰਤਰੀ ਨੇ ਸ਼ਾਂਤੀ (SHANTI) ਐਕਟ ਤਹਿਤ ਇਤਿਹਾਸਕ ਊਰਜਾ ਸੁਧਾਰਾਂ ਬਾਰੇ ਗੱਲ ਕੀਤੀ ਅਤੇ ਵੱਡਾ ਨੀਤੀਗਤ ਐਲਾਨ ਕੀਤਾ। ਉਨ੍ਹਾਂ ਨੇ ਫਾਸਟ ਬ੍ਰੀਡਰ ਨਿਊਕਲੀਅਰ ਤਕਨਾਲੋਜੀ ਵਿੱਚ ਮੁਹਾਰਤ ਦੇ ਆਧਾਰ ’ਤੇ, 6 ਤੋਂ 7 ਸਾਲਾਂ ਦੇ ਅੰਦਰ 5 ਨਵੇਂ ਰਿਐਕਟਰ ਚਾਲੂ ਕਰਨ ਅਤੇ 2047 ਤੱਕ 100 ਗੀਗਾਵਾਟ ਪ੍ਰਮਾਣੂ ਸਮਰੱਥਾ ਦਾ ਟੀਚਾ ਮਿੱਥਿਆ। ਸ਼੍ਰੀ ਮੋਦੀ ਨੇ ਕਿਹਾ, “ਅਸੀਂ ਅਹਿਮ ਪ੍ਰਮਾਣੂ ਈਂਧਨ ਦੇ ਮਾਮਲੇ ਵਿੱਚ ਪੂਰੀ ਤਰ੍ਹਾਂ ਆਤਮ-ਨਿਰਭਰ ਬਣਨ ਦੀ ਦਿਸ਼ਾ ਵਿੱਚ ਸਫਲਤਾਪੂਰਵਕ ਬਹੁਤ ਵੱਡਾ ਕਦਮ ਚੁੱਕਿਆ ਹੈ।”

ਕੌਮੀ ਸਰੋਤਾਂ ਦੀ ਖੋਜ ਵਿੱਚ ਰੁਕਾਵਟ ਪਾਉਣ ਵਾਲੀਆਂ ਪਿਛਲੀਆਂ ਪਾਬੰਦੀਸ਼ੁਦਾ ਨੀਤੀਆਂ ਦੀ ਆਲੋਚਨਾ ਕਰਦਿਆਂ, ਪ੍ਰਧਾਨ ਮੰਤਰੀ ਨੇ ਘਰੇਲੂ ਤੇਲ ਅਤੇ ਗੈਸ ਵਿਕਾਸ ਵਿੱਚ ਇੱਕ ਵੱਡੀ ਤਬਦੀਲੀ ਬਾਰੇ ਗੱਲ ਕੀਤੀ। ਉਨ੍ਹਾਂ ਦੱਸਿਆ ਕਿ 99 ਫ਼ੀਸਦੀ ਸਮੁੰਦਰੀ ਕੰਢੇ ਨੂੰ ‘ਨੋ-ਗੋ ਏਰੀਆ’ ਤੋਂ ‘ਗੋ-ਅਹੈੱਡ ਏਰੀਆ’ ਵਿੱਚ ਬਦਲਿਆ ਗਿਆ ਹੈ ਅਤੇ ਨਵੇਂ ਊਰਜਾ ਭੰਡਾਰਾਂ ਦੀ ਖੋਜ ਲਈ 85,000 ਕਰੋੜ ਰੁਪਏ ਦੀ ‘ਸਮੁੰਦਰ ਮੰਥਨ’ ਪਹਿਲਕਦਮੀ ਤਹਿਤ ਵਿਆਪਕ ਆਫਸ਼ੋਰ ਕਾਰਜ ਸ਼ੁਰੂ ਕੀਤੇ ਗਏ ਹਨ। ਸ਼੍ਰੀ ਮੋਦੀ ਨੇ ਦਾਅਵਾ ਕੀਤਾ, “ਅਸੀਂ ਉਨ੍ਹਾਂ ਖੇਤਰਾਂ ਨੂੰ ਫੈਸਲਾਕੁਨ ਢੰਗ ਨਾਲ ਖੋਲ੍ਹ ਦਿੱਤਾ ਹੈ ਅਤੇ ਹੁਣ ਅਸੀਂ ਸਮੁੰਦਰ ਦੇ ਅੰਦਰ ਵੱਡੇ ਨਵੇਂ ਭੰਡਾਰ ਲੱਭਣ ਵੱਲ ਪੂਰਾ ਜ਼ੋਰ ਦੇ ਰਹੇ ਹਾਂ।”

ਬਦਲਵੇਂ ਊਰਜਾ ਢਾਂਚੇ ਦੇ ਤੇਜ਼ੀ ਨਾਲ ਪਸਾਰ ਬਾਰੇ ਪ੍ਰਧਾਨ ਮੰਤਰੀ ਨੇ ਪਿਛਲੇ ਖੜੋਤ ਵਾਲੇ ਸਮੇਂ ਦੀ ਤੁਲਨਾ 12 ਸਾਲਾਂ ਦੀਆਂ ਵੱਡੀਆਂ ਪ੍ਰਾਪਤੀਆਂ ਨਾਲ ਕੀਤੀ। ਉਨ੍ਹਾਂ ਦੱਸਿਆ ਕਿ ਸਿਟੀ ਗੈਸ ਡਿਸਟ੍ਰੀਬਿਊਸ਼ਨ 70 ਤੋਂ ਵਧ ਕੇ 700 ਸ਼ਹਿਰਾਂ ਤੱਕ ਪਹੁੰਚ ਗਈ ਹੈ, ਪਾਈਪ ਵਾਲੀ ਕੁਕਿੰਗ ਗੈਸ 1.75 ਕਰੋੜ ਘਰਾਂ ਤੱਕ ਪਹੁੰਚੀ ਹੈ, ਅਤੇ ਸੌਰ ਊਰਜਾ ਸਮਰੱਥਾ 2 ਗੀਗਾਵਾਟ ਤੋਂ ਵਧ ਕੇ 160 ਗੀਗਾਵਾਟ ਹੋ ਗਈ ਹੈ। ਸ਼੍ਰੀ ਮੋਦੀ ਨੇ ਕਿਹਾ, “ਪਾਈਪ ਗੈਸ ਨੈੱਟਵਰਕ ਨੂੰ 12 ਸਾਲਾਂ ਵਿੱਚ 70 ਤੋਂ 700 ਸ਼ਹਿਰਾਂ ਤੱਕ ਫੈਲਾਉਣਾ ਹੀ ਅਸਲ ਰਫ਼ਤਾਰ ਅਤੇ ਅਸਲ ਪਸਾਰ ਹੈ।”

ਨਵਿਆਉਣਯੋਗ ਊਰਜਾ ਰਾਹੀਂ ਮੱਧ ਵਰਗ ਨੂੰ ਮਿਲਣ ਵਾਲੇ ਸਿੱਧੇ ਆਰਥਿਕ ਲਾਭਾਂ ਦਾ ਵੇਰਵਾ ਦਿੰਦਿਆਂ, ਪ੍ਰਧਾਨ ਮੰਤਰੀ ਨੇ ‘ਪੀਐੱਮ ਸੂਰਯ ਘਰ ਮੁਫ਼ਤ ਬਿਜਲੀ ਯੋਜਨਾ’ ਦੀ ਸਫਲਤਾ ਦੀ ਸ਼ਲਾਘਾ ਕੀਤੀ। ਉਨ੍ਹਾਂ ਦੱਸਿਆ ਕਿ ਮੁਫ਼ਤ ਸੌਰ ਬਿਜਲੀ ਯੋਜਨਾ 50 ਲੱਖ ਘਰਾਂ ਦਾ ਅੰਕੜਾ ਪਾਰ ਕਰ ਚੁੱਕੀ ਹੈ, ਜਿਸ ਤਹਿਤ ਪ੍ਰਤੀ ਪਰਿਵਾਰ 80,000 ਰੁਪਏ ਤੱਕ ਦੀ ਵਿੱਤੀ ਸਹਾਇਤਾ ਦਿੱਤੀ ਜਾ ਰਹੀ ਹੈ, ਤਾਂ ਜੋ ਬਿਜਲੀ ਦੇ ਬਿੱਲ ਜ਼ੀਰੋ ਕੀਤੇ ਜਾ ਸਕਣ ਅਤੇ ਵਾਧੂ ਬਿਜਲੀ ਵੇਚ ਕੇ ਵਾਧੂ ਆਮਦਨ ਪੈਦਾ ਕੀਤੀ ਜਾ ਸਕੇ। ਸ਼੍ਰੀ ਮੋਦੀ ਨੇ ਕਿਹਾ, “ਅੱਜ ਹਜ਼ਾਰਾਂ ਘਰ ਵਾਧੂ ਬਿਜਲੀ ਵੇਚ ਕੇ ਕਮਾਈ ਕਰ ਰਹੇ ਹਨ, ਅਤੇ ਅਸੀਂ ਇਸ ਵੱਡੇ ਕੰਮ ਨੂੰ ਤੇਜ਼ੀ ਨਾਲ ਪੂਰਾ ਕਰ ਰਹੇ ਹਾਂ।”

ਰੇਲਵੇ ਬੁਨਿਆਦੀ ਢਾਂਚੇ ਵਿੱਚ ਪੁਰਾਣੀ ਖੜੋਤ ਦੀ ਆਧੁਨਿਕ ਕੁਸ਼ਲਤਾ ਨਾਲ ਤੁਲਨਾ ਕਰਦਿਆਂ, ਪ੍ਰਧਾਨ ਮੰਤਰੀ ਨੇ ਦੱਸਿਆ ਕਿ ਪਹਿਲੀਆਂ ਨੀਤੀਆਂ ਨੇ 90 ਸਾਲਾਂ ਵਿੱਚ ਸਿਰਫ਼ 30 ਫ਼ੀਸਦੀ ਬਿਜਲੀਕਰਨ ਕੀਤਾ ਸੀ, ਜਦਕਿ ਮੌਜੂਦਾ ਸਰਕਾਰ ਨੇ ਵਾਤਾਵਰਣ ਨੂੰ ਵੱਡਾ ਫਾਇਦਾ ਪਹੁੰਚਾਉਣ ਲਈ ਸਿਰਫ਼ ਇੱਕ ਦਹਾਕੇ ਵਿੱਚ ਪੂਰੇ ਨੈੱਟਵਰਕ ਦਾ ਬਿਜਲੀਕਰਨ ਕਰ ਦਿੱਤਾ ਹੈ। ਸ਼੍ਰੀ ਮੋਦੀ ਨੇ ਕਿਹਾ, “ਅਸੀਂ ਇਸ ਇੱਕ ਦਹਾਕੇ ਦੇ ਅੰਦਰ 100 ਫ਼ੀਸਦੀ ਬਿਜਲੀਕਰਨ ਦਾ ਵੱਡਾ ਕੰਮ ਪੂਰਾ ਕਰ ਲਿਆ ਹੈ, ਜਿਸ ਨਾਲ ਦਰਾਮਦ ਕੀਤੇ ਜਾਣ ਵਾਲੇ ਡੀਜ਼ਲ ਦੀ ਸਫ਼ਲਤਾਪੂਰਵਕ ਬੱਚਤ ਹੋਈ ਹੈ।”

ਭਵਿੱਖ ਦੇ ਈਂਧਨਾਂ ਦੇ ਖੇਤਰ ਵਿੱਚ ਵੱਡੀ ਕਾਮਯਾਬੀ ਦਾ ਐਲਾਨ ਕਰਦਿਆਂ, ਪ੍ਰਧਾਨ ਮੰਤਰੀ ਨੇ ਦੱਸਿਆ ਕਿ ਭਾਰਤ ਨੇ ਆਪਣੀ ਪਹਿਲੀ ‘ਮੇਕ ਇਨ ਇੰਡੀਆ’ ਹਾਈਡ੍ਰੋਜਨ ਰੇਲਗੱਡੀ ’ਤੇ ਕੰਮ ਸ਼ੁਰੂ ਕਰ ਦਿੱਤਾ ਹੈ, ਜਿਸ ਨੂੰ ਦੁਨੀਆ ਦੀ ਸਭ ਤੋਂ ਲੰਬੀ ਅਤੇ ਸਭ ਤੋਂ ਸ਼ਕਤੀਸ਼ਾਲੀ ਹਾਈਡ੍ਰੋਜਨ ਰੇਲਗੱਡੀ ਵਜੋਂ ਵਿਕਸਿਤ ਕੀਤਾ ਜਾ ਰਿਹਾ ਹੈ। ਸ਼੍ਰੀ ਮੋਦੀ ਨੇ ਦਾਅਵਾ ਕੀਤਾ, “ਦੁਨੀਆ ਵਿੱਚ ਹਾਈਡ੍ਰੋਜਨ ਰੇਲਾਂ ਦੇ ਖੇਤਰ ਵਿੱਚ ਭਾਰਤ ਨੇ ਮਾਣ ਅਤੇ ਮਜ਼ਬੂਤੀ ਨਾਲ ਆਪਣਾ ਝੰਡਾ ਗੱਡਿਆ ਹੈ।”

2047 ਦੇ ਵਿਕਾਸ ਟੀਚਿਆਂ ਵੱਲ ਉਥਲ-ਪੁਥਲ ਭਰੇ ਸਫ਼ਰ ਅਤੇ ਕੋਵਿਡ-19 ਮਹਾਮਾਰੀ ਅਤੇ ਯੂਕਰੇਨ ਤੇ ਪੱਛਮੀ ਏਸ਼ੀਆ ਵਿੱਚ ਭੂ-ਰਾਜਨੀਤਿਕ ਟਕਰਾਵਾਂ ਵਰਗੇ ਗੰਭੀਰ ਆਲਮੀ ਸੰਕਟਾਂ ਵਿੱਚੋਂ ਨਿਕਲਣ ਦਾ ਜ਼ਿਕਰ ਕਰਦਿਆਂ, ਪ੍ਰਧਾਨ ਮੰਤਰੀ ਨੇ ਭਾਰਤ ਦੀ ਪਰਖੀ ਹੋਈ ਲਚਕਤਾ ਦੀ ਸ਼ਲਾਘਾ ਕੀਤੀ। ਉਨ੍ਹਾਂ ਅਫਵਾਹਾਂ ਫੈਲਾਉਣ ਵਾਲੇ ਅਤੇ ਡਰ ਪੈਦਾ ਕਰਨ ਵਾਲੇ ਲੋਕਾਂ ਦੀ ਸਖ਼ਤ ਆਲੋਚਨਾ ਕੀਤੀ ਅਤੇ ਮਾਣ ਨਾਲ ਕਿਹਾ ਕਿ ਸਰਗਰਮ ਯੋਜਨਾਬੰਦੀ ਅਤੇ ਚੰਗੀਆਂ ਤਿਆਰੀਆਂ ਨੇ ਪੂਰੀ ਘਰੇਲੂ ਸਥਿਰਤਾ ਯਕੀਨੀ ਬਣਾਈ ਹੈ। ਸ਼੍ਰੀ ਮੋਦੀ ਨੇ ਕਿਹਾ, “ਦੇਸ਼ ਨੇ ਸਾਫ਼ ਵੇਖਿਆ ਕਿ ਸਾਡੀਆਂ ਸੋਚੀਆਂ-ਸਮਝੀਆਂ ਯੋਜਨਾਵਾਂ ਦੇ ਨਤੀਜੇ ਸਾਹਮਣੇ ਆਏ ਹਨ, ਅਤੇ ਅੱਜ ਅਸੀਂ ਆਪਣੀ ਤਾਕਤ ਦੇ ਸਿਰ ’ਤੇ ਪੂਰੀ ਤਰ੍ਹਾਂ ਮਜ਼ਬੂਤੀ ਨਾਲ ਖੜ੍ਹੇ ਹਾਂ।”

ਘਰੇਲੂ ਕਿਸਾਨਾਂ ਨੂੰ ਗੰਭੀਰ ਆਲਮੀ ਆਰਥਿਕ ਝਟਕਿਆਂ ਤੋਂ ਬਚਾਉਣ ਵਿੱਚ ਸਰਕਾਰ ਦੀ ਸਰਗਰਮ ਭੂਮਿਕਾ ਬਾਰੇ ਪ੍ਰਧਾਨ ਮੰਤਰੀ ਨੇ ਖੇਤੀ ਭਲਾਈ ਪ੍ਰਤੀ ਪੱਕੀ ਵਚਨਬੱਧਤਾ ’ਤੇ ਜ਼ੋਰ ਦਿੱਤਾ। ਉਨ੍ਹਾਂ ਦੱਸਿਆ ਕਿ ਸਰਕਾਰ ਨੇ ਆਲਮੀ ਪੱਧਰ ’ਤੇ 3,000 ਰੁਪਏ ਵਾਲਾ ਯੂਰੀਆ 300 ਰੁਪਏ ਤੋਂ ਘੱਟ ਵਿੱਚ ਅਤੇ 5,000 ਰੁਪਏ ਤੋਂ ਵੱਧ ਕੀਮਤ ਵਾਲੀ ਡੀਏਪੀ ਸਿਰਫ਼ 1,350 ਰੁਪਏ ਵਿੱਚ ਦੇਣ ਲਈ ਖੁਦ ਵੱਡਾ ਆਰਥਿਕ ਬੋਝ ਝੱਲਿਆ ਹੈ। ਸ਼੍ਰੀ ਮੋਦੀ ਨੇ ਦਾਅਵਾ ਕੀਤਾ, “ਅੱਜ ਵੀ, ਅਸੀਂ ਦੇਸ਼ ਦੇ ਕਿਸਾਨਾਂ ਨੂੰ ਉਸ ਵੱਡੇ ਬੋਝ ਨੂੰ ਚੁੱਕਣ ਲਈ ਮਜਬੂਰ ਨਹੀਂ ਕਰ ਰਹੇ, ਸਗੋਂ ਸਰਕਾਰ ਮਜ਼ਬੂਤੀ ਨਾਲ ਇਸ ਨੂੰ ਚੁੱਕ ਰਹੀ ਹੈ।”

ਆਤਮ-ਨਿਰਭਰਤਾ ਦੇ ਪੁਰਾਣੇ ਆਲੋਚਕਾਂ ਨੂੰ ਨਕਾਰਦਿਆਂ, ਪ੍ਰਧਾਨ ਮੰਤਰੀ ਨੇ ਆਲਮੀ ਪੱਧਰ ’ਤੇ ਆਈ ਵੱਡੀ ਤਬਦੀਲੀ ਵੱਲ ਧਿਆਨ ਦਿਵਾਇਆ, ਜਿੱਥੇ ਦੇਸ਼ ਹੁਣ ਜ਼ਰੂਰੀ ਸਰੋਤਾਂ ਨੂੰ ਹਥਿਆਰ ਵਜੋਂ ਵਰਤ ਰਹੇ ਹਨ, ਜੋ ਪਿਛਲੇ ਦਹਾਕੇ ਦੌਰਾਨ ਮਜ਼ਬੂਤ ਘਰੇਲੂ ਲਚਕਤਾ ਉਸਾਰਨ ਦੀ ਸਖ਼ਤ ਲੋੜ ਨੂੰ ਸਾਬਤ ਕਰਦਾ ਹੈ। ਸ਼੍ਰੀ ਮੋਦੀ ਨੇ ਕਿਹਾ, “ਜੇ ਅਸੀਂ ਆਤਮ-ਨਿਰਭਰਤਾ ਦੇ ਸ਼ਕਤੀਸ਼ਾਲੀ ਮੰਤਰ ਨੂੰ ਅਪਣਾ ਕੇ ਸਹੀ ਦਿਸ਼ਾ ਵਿੱਚ ਮਜ਼ਬੂਤੀ ਨਾਲ ਅੱਗੇ ਨਾ ਵਧਦੇ, ਤਾਂ ਅਸੀਂ ਅਜਿਹੀਆਂ ਵੱਡੀਆਂ ਚੁਣੌਤੀਆਂ ਦਾ ਡਟ ਕੇ ਸਾਹਮਣਾ ਕਿਵੇਂ ਕਰਦੇ।”

ਦੇਸ਼ ਦੇ ਵਧਦੇ ਕੌਮਾਂਤਰੀ ਸਤਿਕਾਰ ਦਾ ਸਿਹਰਾ ਸਥਿਰ ਸਿਆਸੀ ਫਤਵੇ ਅਤੇ ਜੀਵੰਤ ਲੋਕਤੰਤਰ ਨੂੰ ਦਿੰਦਿਆਂ, ਪ੍ਰਧਾਨ ਮੰਤਰੀ ਨੇ ਦੱਸਿਆ ਕਿ ਇਸ ਮਾਨਤਾ ਪ੍ਰਾਪਤ ਘਰੇਲੂ ਸਥਿਰਤਾ ਨੇ 2014 ਤੋਂ ਬਾਅਦ ਲਗਭਗ 40 ਦੇਸ਼ਾਂ ਨਾਲ ਮੁਕਤ ਵਪਾਰ ਸਮਝੌਤਿਆਂ (ਐੱਫਟੀਏ) ਨੂੰ ਸਫ਼ਲਤਾਪੂਰਵਕ ਨੇਪਰੇ ਚਾੜ੍ਹਿਆ ਹੈ, ਜਿਸ ਨਾਲ ਖੇਤੀਬਾੜੀ, ਮੱਛੀ ਪਾਲਣ, ਟੈਕਸਟਾਈਲ ਅਤੇ ਐੱਮਐੱਸਐੱਮਈ ਖੇਤਰ ਵਿੱਚ ਬਰਾਮਦ ਦੇ ਵੱਡੇ ਮੌਕੇ ਪੈਦਾ ਹੋਏ ਹਨ। ਸ਼੍ਰੀ ਮੋਦੀ ਨੇ ਕਿਹਾ, “ਅੱਜ, ਭਾਰਤ ਤੇਜ਼ੀ ਨਾਲ ਪੂਰੀ ਦੁਨੀਆ ਲਈ ਇੱਕ ਬਹੁਤ ਹੀ ਪ੍ਰਵਾਨਿਤ ਅਤੇ ਡੂੰਘੇ ਸਤਿਕਾਰ ਵਾਲਾ ਦੇਸ਼ ਬਣ ਰਿਹਾ ਹੈ।”

ਘਰੇਲੂ ਉਦਯੋਗਾਂ ਨੂੰ ਕੌਮਾਂਤਰੀ ਵਪਾਰ ਦੇ ਵੱਡੇ ਮੌਕਿਆਂ ਦਾ ਪੂਰਾ ਫਾਇਦਾ ਉਠਾਉਣ ਦੀ ਅਪੀਲ ਕਰਦਿਆਂ, ਪ੍ਰਧਾਨ ਮੰਤਰੀ ਨੇ ਭਾਰਤੀ ਉਤਪਾਦਾਂ, ਭਾਵੇਂ ਉਹ ਲੁਧਿਆਣਾ ਅਤੇ ਤਿਰੂਪੁਰ ਤੋਂ ਹੋਣ ਜਾਂ ਸਮੁੰਦਰੀ ਉਤਪਾਦਾਂ ਵਾਲੇ ਤੱਟਵਰਤੀ ਕੇਂਦਰਾਂ ਤੋਂ, ਲਈ ਇੱਕ ਸਖ਼ਤ ਟੀਚਾ ਤੈਅ ਕੀਤਾ ਕਿ ਉਹ ਗੁਣਵੱਤਾ ਅਤੇ ਸਮੁੱਚੀ ਕਿਫਾਇਤੀ ਕੀਮਤ ਵਿੱਚ ਕੌਮਾਂਤਰੀ ਮਾਪਦੰਡਾਂ ਨੂੰ ਪਾਰ ਕਰਕੇ ਆਲਮੀ ਬਾਜ਼ਾਰਾਂ ’ਤੇ ਦਬਦਬਾ ਬਣਾਉਣ। ਸ਼੍ਰੀ ਮੋਦੀ ਨੇ ਦਾਅਵਾ ਕੀਤਾ, “ਸਾਨੂੰ ਦੁਨੀਆ ਤੋਂ ਮਿਲਣ ਵਾਲੀਆਂ ਚੀਜ਼ਾਂ ਦੇ ਮੁਕਾਬਲੇ ਸਪਸ਼ਟ ਤੌਰ ’ਤੇ ਬਿਹਤਰ ਅਤੇ ਸਸਤੇ ਉਤਪਾਦ ਦੇਣੇ ਪੈਣਗੇ।”

ਇਨ੍ਹਾਂ ਫੌਰੀ ਆਰਥਿਕ ਰਣਨੀਤੀਆਂ ਨੂੰ ਸਿੱਧੇ ਤੌਰ ’ਤੇ ਕੌਮੀ ਦ੍ਰਿਸ਼ਟੀਕੋਣ ਨਾਲ ਜੋੜਦਿਆਂ, ਪ੍ਰਧਾਨ ਮੰਤਰੀ ਨੇ ਸਮਝਾਇਆ ਕਿ ਆਲਮੀ ਦਬਦਬੇ ਲਈ ਕੀਤੇ ਜਾ ਰਹੇ ਜ਼ੋਰਦਾਰ ਯਤਨ ਹੀ ਉਹ ਮਜ਼ਬੂਤ ਨੀਂਹ ਹਨ ਜਿਸ ’ਤੇ ਵਿਕਾਸ ਦੇ ਵੱਡੇ ਟੀਚੇ ਟਿਕੇ ਹੋਏ ਹਨ। ਸ਼੍ਰੀ ਮੋਦੀ ਨੇ ਕਿਹਾ, “ਇੱਕ ‘ਵਿਕਸਿਤ ਭਾਰਤ’ ਦਾ ਟੀਚਾ ਉਸ ਸ਼ਾਨਦਾਰ ਸਮਰੱਥਾ ਵਿੱਚ ਡੂੰਘਾਈ ਨਾਲ ਜੁੜਿਆ ਹੋਇਆ ਹੈ, ਜੋ ਸਾਡੇ ਦੇਸ਼ਵਾਸੀਆਂ ਨੇ ਮਾਣ ਨਾਲ ਦਿਖਾਈ ਹੈ।”

ਕੌਮੀ ਕਾਰਜ-ਸੱਭਿਆਚਾਰ, ਸੋਚ ਅਤੇ ਕੰਮ ਕਰਨ ਦੀ ਰਫ਼ਤਾਰ ਵਿੱਚ ਵੱਡੀ ਤਬਦੀਲੀ ’ਤੇ ਜ਼ੋਰ ਦਿੰਦਿਆਂ, ਪ੍ਰਧਾਨ ਮੰਤਰੀ ਨੇ ਪਿਛਲੇ ਦਹਾਕਿਆਂ ਵਿੱਚ ਰੁਕੇ ਹੋਏ ਕੰਮਾਂ ਨੂੰ ਪੰਜ ਤੋਂ ਸੱਤ ਸਾਲਾਂ ਵਿੱਚ ਪੂਰਾ ਕਰਨ ਦਾ ਟੀਚਾ ਤੈਅ ਕੀਤਾ, ਅਤੇ ਦੇਸ਼ ਦੇ ਮਿਹਨਤੀ ਕਾਮਿਆਂ ’ਤੇ ਭਰੋਸਾ ਜਤਾਇਆ। ਸ਼੍ਰੀ ਮੋਦੀ ਨੇ ਕਿਹਾ, “ਮੈਨੂੰ ਆਪਣੇ ਦੇਸ਼ ਦੀ ਨੌਜਵਾਨ ਸ਼ਕਤੀ, ਮਾਤਾਵਾਂ, ਭੈਣਾਂ, ਕਿਸਾਨਾਂ ਅਤੇ ਮਜ਼ਦੂਰਾਂ ’ਤੇ ਪੂਰਾ ਭਰੋਸਾ ਹੈ ਕਿ ਅਸੀਂ ਸਾਰੇ ਮਿਲ ਕੇ ਇਸ ਮਹਾਨ ਸੁਪਨੇ ਨੂੰ ਯਕੀਨੀ ਤੌਰ ’ਤੇ ਸਾਕਾਰ ਕਰ ਸਕਦੇ ਹਾਂ।”

ਢਾਂਚਾਗਤ ਤਬਦੀਲੀਆਂ ਪ੍ਰਤੀ ਪ੍ਰਸ਼ਾਸਨ ਦੀ ਅਟੁੱਟ ਵਚਨਬੱਧਤਾ ਦੁਹਰਾਉਂਦਿਆਂ, ਪ੍ਰਧਾਨ ਮੰਤਰੀ ਨੇ ਸਪਸ਼ਟ ਕੀਤਾ ਕਿ ਸ਼ਾਸਨ ਅਤੇ ਪ੍ਰਸ਼ਾਸਨਿਕ ਸੁਧਾਰ ਕਿਸੇ ਬਾਹਰੀ ਮਜਬੂਰੀ ਕਾਰਨ ਨਹੀਂ, ਸਗੋਂ ਡੂੰਘੇ ਅੰਦਰੂਨੀ ਵਿਸ਼ਵਾਸ ਕਾਰਨ ਕੀਤੇ ਜਾ ਰਹੇ ਹਨ। ਉਨ੍ਹਾਂ ਨੇ ਸਹਿਕਾਰੀ ਸੰਘਵਾਦ ਲਈ ਸੱਦਾ ਦਿੱਤਾ ਜਿੱਥੇ ਕੇਂਦਰ, ਸੂਬੇ ਅਤੇ ਸਮਾਜ ਅਗਲੇ ਪੱਧਰ ਦੇ ਸੁਧਾਰ ਲਿਆਉਣ ਲਈ ਇਕਜੁੱਟ ਹੋਣ। ਸ਼੍ਰੀ ਮੋਦੀ ਨੇ ਦਾਅਵਾ ਕੀਤਾ, “ਸਾਡਾ ਇਹ ਸੁਧਾਰ ਇੱਕ ਪੱਕਾ ਵਿਸ਼ਵਾਸ ਹੈ, ਅਤੇ ਅਸੀਂ ਆਉਣ ਵਾਲੇ ਦਿਨਾਂ ਵਿੱਚ ਅਗਲੇ ਪੱਧਰ ਦੇ ਸੁਧਾਰਾਂ ਵੱਲ ਪੂਰੇ ਜ਼ੋਰ ਨਾਲ ਅੱਗੇ ਵਧਣ ਜਾ ਰਹੇ ਹਾਂ।”

‘ਸਪਤ ਸਿੰਧੂ’ ਦੀ ਪ੍ਰਾਚੀਨ ਸੱਭਿਆਚਾਰਕ ਤਾਕਤ ਦਾ ਹਵਾਲਾ ਦਿੰਦਿਆਂ, ਪ੍ਰਧਾਨ ਮੰਤਰੀ ਨੇ ਸ਼ਕਤੀਸ਼ਾਲੀ ਨਵੇਂ ਰਣਨੀਤਕ ਢਾਂਚੇ ਦਾ ਐਲਾਨ ਕੀਤਾ ਅਤੇ ‘ਸਪਤਧਾਰਾ’ ਜਾਂ ‘ਸਪਤ ਸ਼ਕਤੀ’ ਨੂੰ ਪੇਸ਼ ਕਰਕੇ ਭਾਰਤ ਦੀ ਅਗਲੀ ਛਲਾਂਗ ਲਈ ਭਵਿੱਖਮੁਖੀ ਸੱਦਾ ਦਿੱਤਾ। ਉਨ੍ਹਾਂ ਜ਼ੋਰ ਦੇ ਕੇ ਕਿਹਾ ਕਿ ਤਾਕਤ ਦੀਆਂ ਇਹ ਸੱਤ ਧਾਰਾਵਾਂ, ਜੋ ਨੌਜਵਾਨਾਂ ਦੀ ਅਥਾਹ ਸਮਰੱਥਾ ਦੀ ਪੂਰੀ ਵਰਤੋਂ ਕਰਦੀਆਂ ਹਨ, ਦੇਸ਼ ਨੂੰ ਬੇਮਿਸਾਲ ਬੁਲੰਦੀਆਂ ਵੱਲ ਲੈ ਜਾਣਗੀਆਂ। ਸ਼੍ਰੀ ਮੋਦੀ ਨੇ ਵਾਅਦਾ ਕੀਤਾ, “ਇਸ ਸੱਤ-ਧਾਰਾ ਰਣਨੀਤੀ ਦੀ ਸ਼ਾਨਦਾਰ ਸਮਰੱਥਾ ਅਤੇ ਤਾਕਤ ਨਾਲ, ਅਸੀਂ ਪੂਰੇ ਜ਼ੋਰ ਨਾਲ ਦੇਸ਼ ਨੂੰ ਇੱਕ ਨਵੀਂ ਉਚਾਈ ਅਤੇ ਨਵੀਂ ਰਫ਼ਤਾਰ ਦੇਵਾਂਗੇ।”

‘ਨਿਰਮਾਣ ਸ਼ਕਤੀ’ ਨੂੰ ਅਹਿਮ ਪਹਿਲੀ ਧਾਰਾ ਵਜੋਂ ਦਰਸਾਉਂਦਿਆਂ, ਪ੍ਰਧਾਨ ਮੰਤਰੀ ਨੇ ਛੋਟੇ ਪੁਰਜ਼ਿਆਂ ਤੋਂ ਲੈ ਕੇ ਪੂਰੀ ਘਰੇਲੂ ਵੈਲਿਊ ਚੇਨ ਰਾਹੀਂ ਵੱਡੇ ਅੰਤਿਮ ਉਤਪਾਦਾਂ ਤੱਕ ਮਹਾਰਤ ਹਾਸਲ ਕਰਕੇ ਨਿਰਮਾਣ ਖੇਤਰ ਦਾ ਵੱਡੇ ਪੱਧਰ ’ਤੇ ਪਸਾਰ ਕਰਨ ਦਾ ਸੱਦਾ ਦਿੱਤਾ। ਉਨ੍ਹਾਂ ਬਿਨਾਂ ਕਿਸੇ ਨੁਕਸ ਵਾਲੀ ਸਟੀਕਤਾ, ਲਾਗਤ ਕੁਸ਼ਲਤਾ ਅਤੇ ਆਲਮੀ ਪੱਧਰ ਤੇ ਗੁਣਵੱਤਾ ਪ੍ਰਤੀ ਸਖ਼ਤ ਧਿਆਨ ਦੇਣ ’ਤੇ ਜ਼ੋਰ ਦਿੱਤਾ। ਸ਼੍ਰੀ ਮੋਦੀ ਨੇ ਦਾਅਵਾ ਕੀਤਾ, “ਡਿਜ਼ਾਈਨ ਤੋਂ ਲੈ ਕੇ ਮੁਕੰਮਲ ਨਿਰਮਾਣ ਤੱਕ, ਭਾਰਤ ਨੂੰ ਆਲਮੀ ਸਪਲਾਈ ਚੇਨ ਦਾ ਇੱਕ ਬਹੁਤ ਹੀ ਭਰੋਸੇਮੰਦ ਕੇਂਦਰ ਬਣਨਾ ਹੀ ਪਵੇਗਾ।”

‘ਖੇਤੀਬਾੜੀ ਅਤੇ ਫੂਡ ਪ੍ਰੋਸੈਸਿੰਗ’ ਨੂੰ ਅਹਿਮ ਦੂਜੀ ਧਾਰਾ ਵਜੋਂ ਐਲਾਨਦਿਆਂ, ਪ੍ਰਧਾਨ ਮੰਤਰੀ ਨੇ ਦੇਸ਼ ਭਰ ਵਿੱਚ ਰਸਾਇਣ-ਮੁਕਤ ਖੇਤੀ ਵੱਲ ਤਬਦੀਲੀ ਦੀ ਵਕਾਲਤ ਕੀਤੀ। ਉਨ੍ਹਾਂ ਖੇਤ ਤੋਂ ਲੈ ਕੇ ਬਰਾਮਦ ਤੱਕ ਦੀਆਂ ਏਕੀਕ੍ਰਿਤ ਸਪਲਾਈ ਚੇਨਾਂ ਨੂੰ ਵੱਡਾ ਹੁਲਾਰਾ ਦੇਣ ਦੀ ਅਪੀਲ ਕੀਤੀ, ਤਾਂ ਜੋ ਰਵਾਇਤੀ ਭਾਰਤੀ ਭੋਜਨ ਆਲਮੀ ਬਾਜ਼ਾਰਾਂ ਵਿੱਚ ਆਸਾਨੀ ਨਾਲ ਪਹੁੰਚ ਸਕਣ। ਸ਼੍ਰੀ ਮੋਦੀ ਨੇ ਕਿਹਾ, “ਸਾਡੇ ਖੇਤੀ-ਉਤਪਾਦਾਂ ਨੂੰ ਹਰ ਆਲਮੀ ਮਾਪਦੰਡ ’ਤੇ ਪੂਰਾ ਉਤਰਨਾ ਚਾਹੀਦਾ ਹੈ ਤਾਂ ਜੋ ਅਸੀਂ ਉਸ ਦੁਨੀਆ ਤੱਕ ਆਸਾਨੀ ਨਾਲ ਪਹੁੰਚ ਕੇ ਆਪਣਾ ਦਬਦਬਾ ਕਾਇਮ ਕਰ ਸਕੀਏ।”

‘ਤਕਨਾਲੋਜੀ ਅਤੇ ਨਵੀਨਤਾ’ ਨੂੰ ਅਹਿਮ ਤੀਜੀ ਧਾਰਾ ਦੱਸਦਿਆਂ, ਪ੍ਰਧਾਨ ਮੰਤਰੀ ਨੇ ਜ਼ੋਰ ਦਿੱਤਾ ਕਿ ਭਾਰਤ ਨੂੰ ਸਿਰਫ਼ ਆਲਮੀ ਬਾਜ਼ਾਰ ਬਣ ਕੇ ਨਹੀਂ ਰਹਿਣਾ ਚਾਹੀਦਾ, ਸਗੋਂ ਏਆਈ, ਕੁਆਂਟਮ ਕੰਪਿਊਟਿੰਗ, ਪੁਲਾੜ, ਐਡਵਾਂਸਡ ਰੋਬੋਟਿਕਸ, ਡਿਜੀਟਲ ਪਬਲਿਕ ਇਨਫਰਾਸਟ੍ਰਕਚਰ (ਡੀਪੀਆਈ) ਅਤੇ ‘ਮੇਕ ਇਨ ਇੰਡੀਆ’ 6ਜੀ ਵਰਗੇ ਅਤਿ-ਆਧੁਨਿਕ ਖੇਤਰਾਂ ਵਿੱਚ ਨਵੀਨਤਾ ਦਾ ਪ੍ਰਮੁੱਖ ਕੇਂਦਰ ਬਣਨਾ ਚਾਹੀਦਾ ਹੈ। ਸ਼੍ਰੀ ਮੋਦੀ ਨੇ ਦਾਅਵਾ ਕੀਤਾ, “ਸਾਡਾ ਟੀਚਾ ਇਹ ਹੋਣਾ ਚਾਹੀਦਾ ਹੈ ਕਿ ‘ਮੇਕ ਇਨ ਇੰਡੀਆ’ 6ਜੀ ਦੇਸ਼ ਦੇ ਹਰ ਕੋਨੇ ਤੱਕ ਪਹੁੰਚੇ ਅਤੇ ਸਾਨੂੰ ਇਸ ਵਿੱਚ ਤੇਜ਼ੀ ਲਿਆਉਣੀ ਪਵੇਗੀ।”

‘ਗਤੀ ਸ਼ਕਤੀ’ ਦਾ ਅਹਿਮ ਚੌਥੀ ਧਾਰਾ ਵਜੋਂ ਵੇਰਵਾ ਦਿੰਦਿਆਂ, ਪ੍ਰਧਾਨ ਮੰਤਰੀ ਨੇ ਨਿਰਵਿਘਨ ਮਲਟੀਮੋਡਲ ਲੌਜਿਸਟਿਕਸ ਬਣਾਉਣ ਲਈ ਬੁਨਿਆਦੀ ਢਾਂਚੇ ਵਿੱਚ ਵੱਡੇ ਸੁਧਾਰਾਂ ਦਾ ਆਦੇਸ਼ ਦਿੱਤਾ। ਇਸ ਵਿੱਚ ਹਾਈ-ਸਪੀਡ ਰੇਲ, ਆਧੁਨਿਕ ਹਾਈਵੇ, ਅੰਦਰੂਨੀ ਜਲ-ਮਾਰਗ, ਅਤੇ ਬੰਦਰਗਾਹਾਂ ਨੂੰ ਪੋਰਟ-ਆਧਾਰਿਤ ਵਿਕਾਸ ਦੇ ਗਤੀਸ਼ੀਲ ਕੇਂਦਰਾਂ ਵਿੱਚ ਬਦਲਣਾ ਸ਼ਾਮਲ ਹੈ। ਸ਼੍ਰੀ ਮੋਦੀ ਨੇ ਕਿਹਾ, “ਸਾਨੂੰ ਆਪਣੀਆਂ ਬੰਦਰਗਾਹਾਂ ਨੂੰ ਪੋਰਟ-ਆਧਾਰਿਤ ਵਿਕਾਸ ਦੀ ਰਣਨੀਤਕ ਦਿਸ਼ਾ ਵੱਲ ਲਿਜਾਣਾ ਹੀ ਪਵੇਗਾ।”

‘ਰੱਖਿਆ ਸ਼ਕਤੀ’ ਨੂੰ ਅਹਿਮ ਪੰਜਵੀਂ ਧਾਰਾ ਵਜੋਂ ਸ਼੍ਰੇਣੀਬੱਧ ਕਰਦਿਆਂ, ਪ੍ਰਧਾਨ ਮੰਤਰੀ ਨੇ ਰਣਨੀਤਕ ਆਤਮ-ਨਿਰਭਰਤਾ ਨੂੰ ਕੌਮੀ ਤਰਜੀਹ ਐਲਾਨਿਆ, ਜਿਸ ਨਾਲ ਕੋਈ ਸਮਝੌਤਾ ਨਹੀਂ ਕੀਤਾ ਜਾ ਸਕਦਾ। ਉਨ੍ਹਾਂ ਡਰੋਨ, ਕਾਊਂਟਰ-ਡਰੋਨ ਸਿਸਟਮ ਅਤੇ ਹਾਈਪਰਸੋਨਿਕਸ ਸਮੇਤ ਅਗਲੀ ਪੀੜ੍ਹੀ ਦੀਆਂ ਤਕਨੀਕਾਂ ਦਾ ਵਿਕਾਸ ਅਤੇ ਬਰਾਮਦ ਕਰਕੇ ਭਾਰਤ ਨੂੰ ਦੁਨੀਆ ਦਾ ਪ੍ਰਮੁੱਖ ਸਪਲਾਇਰ ਬਣਾਉਣ ਦੇ ਟੀਚੇ ’ਤੇ ਜ਼ੋਰ ਦਿੱਤਾ। ਸ਼੍ਰੀ ਮੋਦੀ ਨੇ ਦਾਅਵਾ ਕੀਤਾ, “ਸਾਨੂੰ ਰੱਖਿਆ ਤਕਨਾਲੋਜੀ ਦਾ ਵੱਡਾ ਆਲਮੀ ਸਪਲਾਇਰ ਬਣਨ ਦੇ ਪੱਕੇ ਟੀਚੇ ਨਾਲ ਤੇਜ਼ੀ ਨਾਲ ਅੱਗੇ ਵਧਣਾ ਪਵੇਗਾ।”

ਸਾਈਬਰ ਸੁਰੱਖਿਆ ਨੂੰ ਕੌਮੀ ਰੱਖਿਆ ਦਾ ਅਨਿੱਖੜਵਾਂ ਅੰਗ ਦੱਸਦਿਆਂ, ਪ੍ਰਧਾਨ ਮੰਤਰੀ ਨੇ ਦੇਸ਼ ਦੀਆਂ ਡਿਜੀਟਲ ਸਰਹੱਦਾਂ ਅਤੇ ਆਲਮੀ ਸਾਈਬਰ ਦ੍ਰਿਸ਼ ਦੀ ਰਾਖੀ ਲਈ ਭਾਰਤੀ ਨੌਜਵਾਨਾਂ ਦੀ ਅਥਾਹ ਡਿਜੀਟਲ ਸਮਰੱਥਾ ਦੀ ਵਰਤੋਂ ਕਰਨ ’ਤੇ ਜ਼ੋਰ ਦਿੱਤਾ। ਸ਼੍ਰੀ ਮੋਦੀ ਨੇ ਕਿਹਾ, “ਅਸੀਂ ਦੇਸ਼ ਅਤੇ ਦੁਨੀਆ ਦੀ ਸੁਰੱਖਿਆ ਲਈ ਸਾਈਬਰ ਸੁਰੱਖਿਆ ਦੇ ਖੇਤਰ ਵਿੱਚ ਆਪਣੇ ਨੌਜਵਾਨਾਂ ਦੀ ਸ਼ਾਨਦਾਰ ਸਮਰੱਥਾ ਦੀ ਸਰਗਰਮੀ ਨਾਲ ਵਰਤੋਂ ਕਰ ਸਕਦੇ ਹਾਂ।”

‘ਗ੍ਰੀਨ ਐਂਡ ਬਲੂ ਇਕੋਨੋਮੀ’ ਨੂੰ ਛੇਵੀਂ ਧਾਰਾ ਵਜੋਂ ਪੇਸ਼ ਕਰਦਿਆਂ, ਪ੍ਰਧਾਨ ਮੰਤਰੀ ਨੇ ਜਲਵਾਯੂ ਪਰਿਵਰਤਨ ਦੇ ਮਾਮਲੇ ਵਿੱਚ ਭਾਰਤ ਨੂੰ ਵਿਸ਼ਵ ਦੀਆਂ ਸਮੱਸਿਆਵਾਂ ਹੱਲ ਕਰਨ ਵਾਲੇ ਦੇਸ਼ ਵਜੋਂ ਪੇਸ਼ ਕੀਤਾ। ਉਨ੍ਹਾਂ ਗ੍ਰੀਨ ਹਾਈਡ੍ਰੋਜਨ, ਨਵਿਆਉਣਯੋਗ ਊਰਜਾ, ਊਰਜਾ ਸਟੋਰੇਜ, ਅਤੇ ਵੱਡੇ ਪੱਧਰ ’ਤੇ ਵਾਤਾਵਰਣ ਪੱਖੀ ਰੁਜ਼ਗਾਰ ਪੈਦਾ ਕਰਨ ਲਈ ਸਮੁੰਦਰੀ ਸਮਰੱਥਾ ਅਤੇ ਤੱਟਵਰਤੀ ਸੈਰ-ਸਪਾਟੇ ਦੇ ਵਿਆਪਕ ਵਿਕਾਸ ਰਾਹੀਂ ਟਿਕਾਊ ਪਸਾਰ ’ਤੇ ਜ਼ੋਰ ਦਿੱਤਾ। ਸ਼੍ਰੀ ਮੋਦੀ ਨੇ ਕਿਹਾ, “ਜਦੋਂ ਦੁਨੀਆ ਗਲੋਬਲ ਵਾਰਮਿੰਗ ’ਤੇ ਚਰਚਾ ਕਰ ਰਹੀ ਹੁੰਦੀ ਹੈ, ਤਾਂ ਅਸੀਂ ਲਗਾਤਾਰ ਰਸਤੇ ਲੱਭ ਰਹੇ ਹੁੰਦੇ ਹਾਂ ਅਤੇ ਠੋਸ ਹੱਲ ਦਿੰਦੇ ਹਾਂ।”

ਭਾਰਤ ਦੀ ‘ਸੌਫਟ ਪਾਵਰ’ ਨੂੰ ਆਖਰੀ ਸਤਵੀਂ ਧਾਰਾ ਵਜੋਂ ਦੱਸਦਿਆਂ, ਪ੍ਰਧਾਨ ਮੰਤਰੀ ਨੇ ਯੋਗਾ ਨੂੰ ਇਕਜੁੱਟ ਕਰਨ ਵਾਲੀ ਆਲਮੀ ਊਰਜਾ ਵਜੋਂ ਸਲਾਹਿਆ ਅਤੇ ਭਾਰਤ ਦੀ ਵਿਰਾਸਤ, ਆਯੁਰਵੇਦ ਅਤੇ ਸੈਰ-ਸਪਾਟੇ ਦੇ ਵਿਸ਼ਵੀਕਰਨ ਦੀ ਵਕਾਲਤ ਕੀਤੀ। ਇਸ ਦੇ ਨਾਲ ਹੀ ਉਨ੍ਹਾਂ ਵੀਐੱਫਐਕਸ, ਐਨੀਮੇਸ਼ਨ, ਗੇਮਿੰਗ ਅਤੇ ਵੇਵਸ (WAVES) ਸੰਮੇਲਨ ਰਾਹੀਂ ਰਚਨਾਤਮਕ ਅਰਥ-ਵਿਵਸਥਾ ਵਿੱਚ ਮਜ਼ਬੂਤ ਲੀਡਰਸ਼ਿਪ ਦੀ ਲੋੜ ’ਤੇ ਜ਼ੋਰ ਦਿੱਤਾ। ਸ਼੍ਰੀ ਮੋਦੀ ਨੇ ਦਾਅਵਾ ਕੀਤਾ, “ਭਾਰਤ ਰਚਨਾਤਮਕ ਦੁਨੀਆ ਦੇ ਅੰਦਰ ਆਪਣਾ ਸ਼ਾਨਦਾਰ ਦਬਦਬਾ ਦਿਖਾ ਸਕਦਾ ਹੈ, ਅਤੇ ਸਾਨੂੰ ਯਕੀਨੀ ਤੌਰ ’ਤੇ ਇਸ ਨੂੰ ਆਲਮੀ ਸਮਰੱਥਾ ਵਜੋਂ ਵਿਕਸਿਤ ਕਰਨਾ ਪਵੇਗਾ।”

ਭਾਰਤ ਦੇ ਜੰਗਲੀ ਜੀਵ ਅਤੇ ਨੈਸ਼ਨਲ ਪਾਰਕਾਂ ਦੀ ਵੱਡੀ ਅਣਵਰਤੀ ਸਮਰੱਥਾ ਨੂੰ ਪਛਾਣਦਿਆਂ, ਪ੍ਰਧਾਨ ਮੰਤਰੀ ਨੇ ਵਿਸ਼ਵ ਭਰ ਦੇ ਸੈਲਾਨੀਆਂ ਨੂੰ ਆਕਰਸ਼ਿਤ ਕਰਕੇ ਇਸ ਸੌਫਟ ਪਾਵਰ ਦਾ ਫਾਇਦਾ ਉਠਾਉਣ ਲਈ ਮੁਹਿੰਮ ਚਲਾਉਣ ਦੀ ਅਪੀਲ ਕੀਤੀ। ਉਨ੍ਹਾਂ ਕੌਮਾਂਤਰੀ ਖੇਡ ਸਮਾਗਮਾਂ ਦੇ ਨਾਲ-ਨਾਲ ਮੁਨਾਫ਼ੇ ਵਾਲੀ ਵੱਡੀ ਕੰਸਰਟ ਇਕੋਨੋਮੀ ਨੂੰ ਉਤਸ਼ਾਹਿਤ ਕਰਨ ’ਤੇ ਵੀ ਜ਼ੋਰ ਦਿੱਤਾ। ਸ਼੍ਰੀ ਮੋਦੀ ਨੇ ਕਿਹਾ, “ਸਾਡੇ ਕੋਲ ਆਪਣੀ ਸੌਫਟ ਪਾਵਰ ਰਾਹੀਂ ਦੁਨੀਆ ਦੇ ਸੈਲਾਨੀ ਖਿੱਚਣ ਦਾ ਵੱਡਾ ਮੌਕਾ ਹੈ, ਅਤੇ ਸਾਨੂੰ ਦਲੇਰੀ ਨਾਲ ਦੁਨੀਆ ਨੂੰ ਆਪਣੀ ਸਮਰੱਥਾ ਦਿਖਾਉਣੀ ਚਾਹੀਦੀ ਹੈ।”

ਇਨ੍ਹਾਂ ਸੱਤ ਸ਼ਕਤੀਸ਼ਾਲੀ ਧਾਰਾਵਾਂ ਦੇ ਰਣਨੀਤਕ ਮਕਸਦ ਦਾ ਸਾਰ ਦਿੰਦਿਆਂ, ਪ੍ਰਧਾਨ ਮੰਤਰੀ ਨੇ ਜ਼ੋਰ ਦਿੱਤਾ ਕਿ ਕੌਮੀ ਟੀਚੇ ਹਾਸਲ ਕਰਨ ਅਤੇ ਆਲਮੀ ਮਾਪਦੰਡ ਪਾਰ ਕਰਨ ਲਈ ਸਿਰਫ਼ ਵੱਖ-ਵੱਖ ਖੇਤਰਾਂ ਵਿੱਚ ਤਰੱਕੀ ਕਾਫ਼ੀ ਨਹੀਂ ਹੈ, ਸਗੋਂ ਸਾਰੇ ਖੇਤਰਾਂ ਵਿੱਚ ਬਹੁਤ ਹੀ ਤਾਲਮੇਲ ਵਾਲੀ ਪਹੁੰਚ ਦੀ ਲੋੜ ਹੈ। ਸ਼੍ਰੀ ਮੋਦੀ ਨੇ ਕਿਹਾ, “ਸਮੁੱਚੀ ਪਹੁੰਚ ਨਾਲ ਸਾਨੂੰ ਦੇਸ਼ ਲਈ ਤੈਅ ਕੀਤੇ ਗਏ ਵੱਡੇ ਟੀਚੇ ਪਾਰ ਕਰਨ ਦੀ ਦਿਸ਼ਾ ਵਿੱਚ ਪੂਰੇ ਜ਼ੋਰ ਨਾਲ ਕੰਮ ਕਰਨਾ ਪਵੇਗਾ।”

ਦੇਸ਼ ਦੇ ਕਾਰਪੋਰੇਟ ਖੇਤਰ ਦੀਆਂ ਉਮੀਦਾਂ ਬਾਰੇ ਪ੍ਰਧਾਨ ਮੰਤਰੀ ਨੇ ਆਲਮੀ ਰੈਂਕਿੰਗ ਵਿੱਚ ਭਾਰਤੀ ਦਬਦਬੇ ਲਈ ਜ਼ੋਰ ਦਿੱਤਾ। ਉਨ੍ਹਾਂ ਸਰਕਾਰਾਂ ਨੂੰ ਵੱਡੇ ਟੀਚੇ ਹਾਸਲ ਕਰਨ ਲਈ ਆਪਣੀਆਂ ਨੀਤੀਆਂ ਨੂੰ ਤੇਜ਼ੀ ਨਾਲ ਆਧੁਨਿਕ ਬਣਾਉਣ ਦੀ ਅਪੀਲ ਕੀਤੀ, ਜਿਨ੍ਹਾਂ ਵਿੱਚ ਫ਼ਾਰਚਿਊਨ 500 ਵਿੱਚ 50 ਭਾਰਤੀ ਕੰਪਨੀਆਂ, ਦੁਨੀਆ ਦੀ ਇੱਕ ਚੋਟੀ ਦੀ ਬੈਂਕ, ਦੁਨੀਆ ਦੀਆਂ ਚੋਟੀ ਦੀਆਂ ਪੰਜ ਕੰਪਨੀਆਂ ਵਿੱਚ ਇੱਕ ਫ਼ਾਰਮਾ ਦਿੱਗਜ, ਅਤੇ ਕਾਨੂੰਨ, ਰੇਟਿੰਗ, ਸਲਾਹਕਾਰੀ, ਅਕਾਊਂਟਿੰਗ ਅਤੇ ਤਕਨਾਲੋਜੀ ਫਰਮਾਂ ਵਿੱਚ ਪ੍ਰਮੁੱਖ ਆਲਮੀ ਲੀਡਰਸ਼ਿਪ ਸ਼ਾਮਲ ਹੈ। ਸ਼੍ਰੀ ਮੋਦੀ ਨੇ ਦਾਅਵਾ ਕੀਤਾ, “ਇਸੇ ਰਾਹ ’ਤੇ ਚੱਲਦਿਆਂ, ਆਪਣੀ ਸਖ਼ਤ ਮਿਹਨਤ ਵਿੱਚ ਕੋਈ ਕਸਰ ਨਾ ਛੱਡਦਿਆਂ ਅਸੀਂ ‘ਵਿਕਸਿਤ ਭਾਰਤ’ ਦਾ ਵੱਡਾ ਸੁਪਨਾ ਜ਼ਰੂਰ ਪੂਰਾ ਕਰਾਂਗੇ।”

ਦੇਸ਼ ਦੇ ਬਦਲਾਅ ਦੇ ਕੇਂਦਰ ਵਿੱਚ ਨੌਜਵਾਨਾਂ ਨੂੰ ਰੱਖਦਿਆਂ ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਨੌਜਵਾਨ ਭਾਰਤੀ ਇਸ ਤੇਜ਼ ਤਰੱਕੀ ਦੇ ਮੁੱਖ ਨਿਰਮਾਤਾ ਅਤੇ ਆਖਰੀ ਲਾਭਪਾਤਰੀ ਦੋਵੇਂ ਹਨ। ਉਨ੍ਹਾਂ ਜ਼ੋਰ ਦਿੱਤਾ ਕਿ ਵਿਕਸਿਤ ਦੇਸ਼ ਵੱਲ ਪੂਰੇ ਸਫ਼ਰ ਨੂੰ ਉਨ੍ਹਾਂ ਦੇ ਸ਼ਕਤੀਕਰਨ ਨਾਲ ਅਟੁੱਟ ਤੌਰ ’ਤੇ ਜੋੜਿਆ ਜਾਣਾ ਚਾਹੀਦਾ ਹੈ। ਸ਼੍ਰੀ ਮੋਦੀ ਨੇ ਕਿਹਾ, “ਸਾਨੂੰ ਆਪਣੀ ਸਭ ਤੋਂ ਵੱਡੀ ਤਰਜੀਹ ਵਜੋਂ ‘ਵਿਕਸਿਤ ਭਾਰਤ’ ਦੇ ਟੀਚੇ ਨੂੰ ਨੌਜਵਾਨਾਂ ਨਾਲ ਮਜ਼ਬੂਤੀ ਨਾਲ ਜੋੜ ਕੇ ਅੱਗੇ ਲਿਜਾਣਾ ਪਵੇਗਾ।”

ਪਿਛਲੇ ਦਹਾਕੇ ਦੌਰਾਨ ਘਰੇਲੂ ਸਟਾਰਟਅੱਪ ਈਕੋਸਿਸਟਮ ਦੇ 2.5 ਲੱਖ ਰਜਿਸਟਰਡ ਇਕਾਈਆਂ ਤੱਕ ਪਹੁੰਚਣ ਦੀ ਸ਼ਲਾਘਾ ਕਰਦਿਆਂ ਪ੍ਰਧਾਨ ਮੰਤਰੀ ਨੇ ਨੌਜਵਾਨਾਂ ਦੇ ਸ਼ਕਤੀਕਰਨ ਦੇ ਨਵੇਂ ਦੌਰ ਨੂੰ ਉਜਾਗਰ ਕੀਤਾ। ਇਹ ਦੌਰ 1 ਲੱਖ ਕਰੋੜ ਰੁਪਏ ਦੇ ਰਿਸਰਚ ਐਂਡ ਇਨੋਵੇਸ਼ਨ ਫੰਡ, ਸਸਤੇ ਡਿਜੀਟਲ ਡੇਟਾ ਦੇ ਕ੍ਰਾਂਤੀਕਾਰੀ ਪ੍ਰਭਾਵ ਅਤੇ ਸਕਿੱਲ ਇੰਡੀਆ, ਖੇਲੋ ਇੰਡੀਆ, ਨੈਸ਼ਨਲ ਡਰੋਨ ਨੀਤੀ, ਪ੍ਰਾਈਵੇਟ ਸਪੇਸ ਭਾਗੀਦਾਰੀ ਤੇ 35 ਸਾਲਾਂ ਬਾਅਦ ਲਿਆਂਦੀ ਗਈ ਇਤਿਹਾਸਕ ਕੌਮੀ ਸਿੱਖਿਆ ਨੀਤੀ 2020 ਵਰਗੇ ਢਾਂਚਿਆਂ ਦੁਆਰਾ ਸੰਚਾਲਿਤ ਹੈ। ਸ਼੍ਰੀ ਮੋਦੀ ਨੇ ਕਿਹਾ, “ਤੁਸੀਂ ਆਪਣੇ ਵੱਡੇ ਸੁਪਨੇ ਲੈ ਕੇ ਆਓ, ਅਸੀਂ ਵਿੱਤੀ ਸਹਾਇਤਾ ਦੇ ਮਜ਼ਬੂਤ ਸਿਸਟਮ ਨਾਲ ਸਰੋਤਾਂ ਦੀ ਕੋਈ ਕਮੀ ਨਹੀਂ ਆਉਣ ਦੇਵਾਂਗੇ।”

ਮਜ਼ਬੂਤ ਵਿੱਦਿਅਕ ਢਾਂਚੇ ਦੇ ਤੇਜ਼ੀ ਨਾਲ ਪਸਾਰ ਦਾ ਵੇਰਵਾ ਦਿੰਦਿਆਂ, ਪ੍ਰਧਾਨ ਮੰਤਰੀ ਨੇ ਪਿਛਲੇ ਸਮੇਂ ਦੀ ਸੁਸਤ ਰਫ਼ਤਾਰ ਦੀ ਤੁਲਨਾ ਸੰਸਥਾਵਾਂ ਵਿੱਚ ਕੀਤੇ ਗਏ ਤੇਜ਼ ਵਾਧੇ ਨਾਲ ਕੀਤੀ। ਉਨ੍ਹਾਂ ਦੱਸਿਆ ਕਿ ਯੂਨੀਵਰਸਿਟੀਆਂ ਦੀ ਗਿਣਤੀ 350 ਤੋਂ ਵਧ ਕੇ ਲਗਭਗ 1,000 ਹੋ ਗਈ ਹੈ ਅਤੇ ਮੈਡੀਕਲ ਕਾਲਜ 400 ਤੋਂ ਵਧ ਕੇ 850 ਦੇ ਕਰੀਬ ਹੋ ਗਏ ਹਨ। ਉਨ੍ਹਾਂ ਨੇ 10,000 ਤੋਂ ਵੱਧ ਅਟਲ ਟਿੰਕਰਿੰਗ ਲੈਬਾਂ ਰਾਹੀਂ ਸੰਚਾਲਿਤ ਨਵੀਨਤਾ ਈਕੋਸਿਸਟਮ ਅਤੇ ਨੌਜਵਾਨਾਂ ਵੱਲੋਂ ਚਲਾਏ ਜਾ ਰਹੇ ਸਟਾਰਟਅੱਪਸ ਦੀ ਸਫ਼ਲਤਾ ਦੀ ਵੀ ਸ਼ਲਾਘਾ ਕੀਤੀ ਜਿਨ੍ਹਾਂ ਨੇ ਆਪਣੀ ਪਹਿਲੀ ਹੀ ਕੋਸ਼ਿਸ਼ ਵਿੱਚ ਪ੍ਰਾਈਵੇਟ ਸੈਟੇਲਾਈਟ ਅਤੇ ਰਾਕੇਟ ਲਾਂਚ ਕੀਤੇ ਹਨ। ਸ਼੍ਰੀ ਮੋਦੀ ਨੇ ਕਿਹਾ, “ਅਸੀਂ ਇਸ ਦਿਸ਼ਾ ਵਿੱਚ ਪੂਰੇ ਜ਼ੋਰ ਨਾਲ ਕੰਮ ਕਰ ਰਹੇ ਹਾਂ ਕਿ ਸਾਡੇ ਦੇਸ਼ ਦੇ ਨੌਜਵਾਨਾਂ ਦੇ ਦਿਮਾਗ ਬਚਪਨ ਤੋਂ ਹੀ ਤਕਨਾਲੋਜੀ ਵੱਲ ਖਿੱਚੇ ਜਾਣ।”

ਉੱਭਰਦੀਆਂ ਤਕਨੀਕਾਂ ਵਿੱਚ ਵਿਸ਼ਵ ਪੱਧਰੀ ਦਬਦਬਾ ਬਣਾਉਣ ਲਈ ਵੱਡੀ ਪਹਿਲਕਦਮੀ ਦਾ ਐਲਾਨ ਕਰਦਿਆਂ, ਪ੍ਰਧਾਨ ਮੰਤਰੀ ਨੇ ਲਾਲ ਕਿਲ੍ਹੇ ਤੋਂ ਐਲਾਨ ਕੀਤਾ ਕਿ ਆਉਣ ਵਾਲੇ ਸਾਲ ਵਿੱਚ ਇੱਕ ਕਰੋੜ ਨੌਜਵਾਨਾਂ ਨੂੰ ਏਆਈ ਦੇ ਹੁਨਰ ਦੀ ਰਸਮੀ ਸਿਖਲਾਈ ਦਿੱਤੀ ਜਾਵੇਗੀ। ਸ਼੍ਰੀ ਮੋਦੀ ਨੇ ਦਾਅਵਾ ਕੀਤਾ, “ਅਸੀਂ ਇੱਕ ਕਰੋੜ ਨੌਜਵਾਨਾਂ ਨੂੰ ਏਆਈ ਹੁਨਰ ਸਿਖਾਉਣ ਲਈ ਪੂਰੇ ਜ਼ੋਰ ਨਾਲ ਕੰਮ ਕਰਾਂਗੇ ਤਾਂ ਜੋ ਸਾਡੇ ਨੌਜਵਾਨਾਂ ਕੋਲ ਏਆਈ ਦੀ ਦੁਨੀਆ ਵਿੱਚ ਅਗਵਾਈ ਕਰਨ ਦੀ ਪੂਰੀ ਸਮਰੱਥਾ ਹੋਵੇ।”

ਸਪਸ਼ਟ ਅਤੇ ਦੂਰਦਰਸ਼ੀ ਨੀਤੀਆਂ ਦੇ ਨਤੀਜੇ ਵਜੋਂ ਮਿਲੀ ਸ਼ਾਨਦਾਰ ਸਫ਼ਲਤਾ ਦਰਸਾਉਂਦਿਆਂ, ਪ੍ਰਧਾਨ ਮੰਤਰੀ ਨੇ ਉੱਭਰ ਰਹੇ ਖੇਤਰਾਂ ਦਾ ਰਿਪੋਰਟ ਕਾਰਡ ਪੇਸ਼ ਕੀਤਾ। ਉਨ੍ਹਾਂ ਬਾਇਓ-ਇਕੋਨੋਮੀ ਦੇ 2014 ਵਿੱਚ 60,000 ਕਰੋੜ ਰੁਪਏ ਤੋਂ ਵਧ ਕੇ ਅੱਜ ਲਗਭਗ 20 ਲੱਖ ਕਰੋੜ ਰੁਪਏ ਹੋਣ ਦੇ ਨਾਲ-ਨਾਲ ਇਲੈਕਟ੍ਰਿਕ ਵਾਹਨਾਂ ਦੀ ਵਿਕਰੀ ਵਿੱਚ 1.5 ਲੱਖ ਸਾਲਾਨਾ ਤੋਂ 25 ਲੱਖ ਤੱਕ ਦੇ ਵੱਡੇ ਵਾਧੇ ਦੀ ਸ਼ਲਾਘਾ ਕੀਤੀ। ਸ਼੍ਰੀ ਮੋਦੀ ਨੇ ਕਿਹਾ, “ਦੇਖੋ, ਜਦੋਂ ਨੀਤੀਆਂ ਸਹੀ ਹੁੰਦੀਆਂ ਹਨ ਅਤੇ ਟੀਚਾ ਬਿਲਕੁਲ ਸਪੱਸ਼ਟ ਹੁੰਦਾ ਹੈ, ਤਾਂ ਮੇਰੇ ਦੇਸ਼ ਦੇ ਨੌਜਵਾਨ ਕਿੰਨੇ ਸ਼ਾਨਦਾਰ ਨਤੀਜੇ ਦਿੰਦੇ ਹਨ।”

ਹਵਾਬਾਜ਼ੀ ਅਤੇ ਏਅਰੋਸਪੇਸ ਖੇਤਰਾਂ ਦੇ ਨਾਲ-ਨਾਲ ਪੇਂਡੂ ਸ਼ਾਸਨ ਦੇ ਤੇਜ਼ ਪਸਾਰ ਬਾਰੇ ਪ੍ਰਧਾਨ ਮੰਤਰੀ ਨੇ ਨਵੇਂ ਏਅਰਕ੍ਰਾਫਟ ਮੇਨਟੇਨੈਂਸ ਹੱਬਜ਼ ਅਤੇ ਮੇਕ-ਇਨ-ਇੰਡੀਆ ਸੀ-295 ਰੱਖਿਆ ਟਰਾਂਸਪੋਰਟ ਜਹਾਜ਼ ਦੀ ਸਫ਼ਲ ਉਡਾਣ ਰਾਹੀਂ ਪੈਦਾ ਹੋਏ ਵੱਡੇ ਰੁਜ਼ਗਾਰ ਦਾ ਜ਼ਿਕਰ ਕੀਤਾ। ਉਨ੍ਹਾਂ ਡਰੋਨ ਰਾਹੀਂ ਚੱਲਣ ਵਾਲੀ ਪ੍ਰਾਪਰਟੀ ਮੈਪਿੰਗ ਸਕੀਮ ‘ਸਵਾਮਿਤਵ’ ਦੀ ਸ਼ਾਨਦਾਰ ਸਫ਼ਲਤਾ ਦੀ ਸ਼ਲਾਘਾ ਕੀਤੀ ਜਿਸ ਨੇ 3.25 ਕਰੋੜ ਪਰਿਵਾਰਾਂ ਲਈ ਪੇਂਡੂ ਆਰਥਿਕ ਸਮਰੱਥਾ ਵਿੱਚ 140 ਲੱਖ ਕਰੋੜ ਰੁਪਏ ਦੇ ਰਾਹ ਖੋਲ੍ਹੇ ਹਨ। ਸ਼੍ਰੀ ਮੋਦੀ ਨੇ ਕਿਹਾ, “ਡਰੋਨਾਂ ਕਾਰਨ ਪੇਂਡੂ ਪ੍ਰਾਪਰਟੀ ਸਕੀਮ ਬਹੁਤ ਕਾਮਯਾਬ ਹੋ ਰਹੀ ਹੈ, ਜਿਸ ਨਾਲ ਜ਼ਰੂਰੀ ਕਰਜ਼ਿਆਂ ਅਤੇ ਕਾਰੋਬਾਰ ਲਈ ਜਾਇਦਾਦਾਂ ਦਾ ਵਿੱਤੀ ਲਾਹਾ ਲੈਣਾ ਸੰਭਵ ਹੋ ਗਿਆ ਹੈ।

ਮੱਧ ਵਰਗ ਦੇ ਪਰਿਵਾਰਾਂ ’ਤੇ ਮੁਕਾਬਲੇ ਦੀਆਂ ਪ੍ਰੀਖਿਆਵਾਂ ਦੇ ਭਾਰੀ ਵਿੱਤੀ ਅਤੇ ਮਾਨਸਿਕ ਬੋਝ ਘਟਾਉਣ ਲਈ ਵੱਡੀ ਨਵੀਂ ਪਹਿਲਕਦਮੀ ਦਾ ਐਲਾਨ ਕਰਦਿਆਂ, ਪ੍ਰਧਾਨ ਮੰਤਰੀ ਨੇ ਮੁਫ਼ਤ ਆਨਲਾਈਨ ਕੋਚਿੰਗ ਦੀ ਸ਼ੁਰੂਆਤ ਕੀਤੀ। ਇਸ ਤਹਿਤ ਮਜ਼ਬੂਤ ਡਿਜੀਟਲ ਪਬਲਿਕ ਇਨਫਰਾਸਟ੍ਰਕਚਰ (ਡੀਪੀਆਈ) ਅਤੇ ਚੋਟੀ ਦੇ ਅਧਿਆਪਕਾਂ ਦੀ ਵਰਤੋਂ ਕਰਕੇ ਦੇਸ਼ ਭਰ ਵਿੱਚ ਇੱਕ ਨੈੱਟਵਰਕ ਰਾਹੀਂ ਉੱਚ ਗੁਣਵੱਤਾ ਵਾਲੀ ਸਿੱਖਿਆ ਸਹਾਇਤਾ ਦਿੱਤੀ ਜਾਵੇਗੀ। ਸ਼੍ਰੀ ਮੋਦੀ ਨੇ ਦਾਅਵਾ ਕੀਤਾ, “ਉਨ੍ਹਾਂ ਵੱਡੇ ਸਰੋਤਾਂ ਨੂੰ ਇਕੱਠਾ ਕਰਕੇ, ਅਸੀਂ ਨੌਜਵਾਨਾਂ ਨੂੰ ਬਿਲਕੁਲ ਮੁਫ਼ਤ ਕੋਚਿੰਗ ਦੇਣ ਲਈ ਪੂਰਾ ਮਜ਼ਬੂਤ ਨੈੱਟਵਰਕ ਬਣਾਉਣ ਜਾ ਰਹੇ ਹਾਂ।”

ਟੌਪਸ (TOPS) ਸਕੀਮ ਅਤੇ ਖੇਲੋ ਇੰਡੀਆ ਵਰਗੀਆਂ ਜ਼ਮੀਨੀ ਪੱਧਰ ਦੀਆਂ ਰਣਨੀਤਕ ਪਹਿਲਕਦਮੀਆਂ ਰਾਹੀਂ ਆਲਮੀ ਖੇਡ ਜਗਤ ਵਿੱਚ ਭਾਰਤ ਦੇ ਵਧਦੇ ਦਬਦਬੇ ਦੀ ਸ਼ਲਾਘਾ ਕਰਦਿਆਂ ਪ੍ਰਧਾਨ ਮੰਤਰੀ ਨੇ ਕੌਮਾਂਤਰੀ ਮੰਚਾਂ ’ਤੇ ਤਿਰੰਗੇ ਦੀ ਵਧਦੀ ਮੌਜੂਦਗੀ ਨੂੰ ਮਾਣ ਨਾਲ ਨੋਟ ਕੀਤਾ। ਉਨ੍ਹਾਂ 2030 ਦੀਆਂ ਰਾਸ਼ਟਰਮੰਡਲ ਖੇਡਾਂ ਦੀ ਮੇਜ਼ਬਾਨੀ ਲਈ ਦੇਸ਼ ਦੀ ਦਾਅਵੇਦਾਰੀ ਅਤੇ 2036 ਦੀਆਂ ਓਲੰਪਿਕ ਖੇਡਾਂ ਲਈ ਮਜ਼ਬੂਤ ਉਮੀਦਵਾਰੀ ਦੀ ਪੁਸ਼ਟੀ ਕੀਤੀ। ਸ਼੍ਰੀ ਮੋਦੀ ਨੇ ਕਿਹਾ, “ਖੇਡਾਂ ਦੀ ਦੁਨੀਆ ਵਿੱਚ ਭਾਰਤ ਦਾ ਪ੍ਰਦਰਸ਼ਨ ਲਗਾਤਾਰ ਬਿਹਤਰ ਹੋ ਰਿਹਾ ਹੈ ਅਤੇ ਅਸੀਂ ਓਲੰਪਿਕ ਦੀ ਮੇਜ਼ਬਾਨੀ ਦੇ ਮਜ਼ਬੂਤ ਦਾਅਵੇਦਾਰ ਵਜੋਂ ਮਾਣ ਨਾਲ ਅੱਗੇ ਵਧ ਰਹੇ ਹਾਂ।”

5 ਤੋਂ 15 ਸਾਲ ਦੇ ਬੱਚਿਆਂ ਲਈ ‘ਨੈਸ਼ਨਲ ਸਪੋਰਟਸ ਟੈਲੇਂਟ ਹੰਟ’ (ਕੌਮੀ ਖੇਡ ਪ੍ਰਤਿਭਾ ਖੋਜ) ਦੀ ਸ਼ੁਰੂਆਤ ਕਰਦਿਆਂ ਪ੍ਰਧਾਨ ਮੰਤਰੀ ਨੇ ਹਰ ਪਿੰਡ ਅਤੇ ਸਕੂਲ ਵਿੱਚ ਜ਼ਮੀਨੀ ਪੱਧਰ ’ਤੇ ਰਣਨੀਤੀ ਦਾ ਐਲਾਨ ਕੀਤਾ, ਤਾਂ ਜੋ ਆਲਮੀ ਮੁਕਾਬਲਿਆਂ ਲਈ ਭਵਿੱਖ ਦੇ ਓਲੰਪਿਕ ਚੈਂਪੀਅਨਾਂ ਦੀ ਪਛਾਣ ਕੀਤੀ ਜਾ ਸਕੇ ਅਤੇ ਉਨ੍ਹਾਂ ਨੂੰ ਸਿਖਲਾਈ ਦੇ ਕੇ ਤਿਆਰ ਕੀਤਾ ਜਾ ਸਕੇ। ਸ਼੍ਰੀ ਮੋਦੀ ਨੇ ਕਿਹਾ, “ਬੱਚਿਆਂ ਦੀ ਪ੍ਰਤਿਭਾ ਨੂੰ ਧਿਆਨ ਨਾਲ ਪਰਖਿਆ ਜਾਵੇਗਾ, ਅਤੇ ਉਨ੍ਹਾਂ ਨੂੰ ਵਿਸ਼ੇਸ਼ ਸਿਖਲਾਈ ਦੇ ਕੇ ਸ਼ਾਨਦਾਰ ਖਿਡਾਰੀ ਬਣਾਇਆ ਜਾਵੇਗਾ ਜੋ ਦੇਸ਼ ਲਈ ਮਾਣ ਨਾਲ ਖੇਡਣਗੇ।”

ਨਸ਼ਿਆਂ ਦੇ ਗੰਭੀਰ ਕੌਮੀ ਸੰਕਟ ਬਾਰੇ ਪ੍ਰਧਾਨ ਮੰਤਰੀ ਨੇ ਨਸ਼ਾ-ਮੁਕਤ ਭਾਰਤ ਨੂੰ ਵੱਡੀ ਸਾਂਝੀ ਜ਼ੁੰਮੇਵਾਰੀ ਐਲਾਨਿਆ ਜੋ ਆਉਣ ਵਾਲੀ ਪੀੜ੍ਹੀ ਦੀ ਤਾਕਤ ਨੂੰ ਸੁਰੱਖਿਅਤ ਕਰਨ ਲਈ ਬਹੁਤ ਜ਼ਰੂਰੀ ਹੈ। ਉਨ੍ਹਾਂ ਨੇ ਹਰ ਪਰਿਵਾਰ, ਐੱਨਜੀਓ ਅਤੇ ਧਾਰਮਿਕ ਸੰਸਥਾਵਾਂ ਨੂੰ ‘ਨਸ਼ਾ ਮੁਕਤ ਯੁਵਾ ਅਭਿਆਨ’ ਤਹਿਤ 100 ਹਫ਼ਤਿਆਂ ਦੀ ਵਿਆਪਕ ਕੌਮੀ ਨਸ਼ਾ-ਵਿਰੋਧੀ ਮੁਹਿੰਮ ਲਈ ਇਕਜੁੱਟ ਹੋਣ ਦਾ ਸੱਦਾ ਦਿੱਤਾ। ਸ਼੍ਰੀ ਮੋਦੀ ਨੇ ਦਾਅਵਾ ਕੀਤਾ, “ਮੈਂ ਹਰ ਪਰਿਵਾਰ ਨੂੰ ਕਹਿਣਾ ਚਾਹੁੰਦਾ ਹਾਂ ਕਿ ਉਹ ਇਸ ਮੁਹਿੰਮ ਦਾ ਸਰਗਰਮ ਹਿੱਸਾ ਬਣੇ ਅਤੇ ਨਸ਼ਾ-ਮੁਕਤ ਭਾਰਤ ਦੇ ਸੁਪਨੇ ਨੂੰ ਪੂਰਾ ਕਰਨ ਲਈ ਅੱਗੇ ਆਵੇ।”

ਲੱਖਾਂ ਲੋਕਾਂ ਦਾ ਭਵਿੱਖ ਤਬਾਹ ਕਰਨ ਵਾਲੇ ਚਾਰ ਦਹਾਕਿਆਂ ਦੇ ਹਿੰਸਕ ਅੱਤਵਾਦ ਦਾ ਭਿਆਨਕ ਦੌਰ ਯਾਦ ਕਰਦਿਆਂ ਪ੍ਰਧਾਨ ਮੰਤਰੀ ਨੇ 3,500 ਤੋਂ ਵੱਧ ਸੁਰੱਖਿਆ ਕਰਮੀਆਂ ਦੀ ਕੁਰਬਾਨੀ ਨੂੰ ਸਲਾਮ ਕੀਤਾ। ਉਨ੍ਹਾਂ ਮਾਣ ਨਾਲ ਐਲਾਨ ਕੀਤਾ ਕਿ ਨਕਸਲਵਾਦ ਨੂੰ ਫੈਸਲਾਕੁਨ ਢੰਗ ਨਾਲ ਖ਼ਤਮ ਕਰ ਦਿੱਤਾ ਗਿਆ ਹੈ ਅਤੇ ਹੁਣ ਇਨ੍ਹਾਂ ਇਲਾਕਿਆਂ ਵਿੱਚ ਖੇਤਰੀ ਵਿਕਾਸ ਦੀ ਵੱਡੀ ਲਹਿਰ ਹੈ ਤੇ ਆਜ਼ਾਦ ਕਰਵਾਏ ਗਏ ਖੇਤਰਾਂ ਵਿੱਚ ਭਰੋਸਾ ਵਧ ਰਿਹਾ ਹੈ। ਸ਼੍ਰੀ ਮੋਦੀ ਨੇ ਕਿਹਾ, “ਅੱਜ ਉਨ੍ਹਾਂ ਇਲਾਕਿਆਂ ਵਿੱਚ, ਅੱਤਵਾਦ ਤੋਂ ਪੂਰੀ ਤਰ੍ਹਾਂ ਮੁਕਤ ਹੋਣ ਸਦਕਾ ਵਿਕਾਸ, ਭਰੋਸੇ ਅਤੇ ਯਤਨਾਂ ਦਾ ਤਿਰੰਗਾ ਮਾਣ ਨਾਲ ਲਹਿਰਾ ਰਿਹਾ ਹੈ।”

ਸੰਵੇਦਨਸ਼ੀਲ ਅੰਦਰੂਨੀ ਸੁਰੱਖਿਆ ਬਾਰੇ ਸਖ਼ਤ ਚਿਤਾਵਨੀ ਦਿੰਦਿਆਂ, ਪ੍ਰਧਾਨ ਮੰਤਰੀ ਨੇ ਦੇਸ਼ ਨੂੰ ਵਿਚਾਰਧਾਰਕ ਤੋੜ-ਭੰਨ ਅਤੇ ਅਜਿਹੇ ਅਨਸਰਾਂ ਵਿਰੁੱਧ ਬਹੁਤ ਸੁਚੇਤ ਰਹਿਣ ਦੀ ਅਪੀਲ ਕੀਤੀ ਜਿਨ੍ਹਾਂ ਨੇ ਅਤੀਤ ਵਿੱਚ ਕੌਮੀ ਨੀਤੀਆਂ ਨੂੰ ਗਲਤ ਢੰਗ ਨਾਲ ਪ੍ਰਭਾਵਿਤ ਕਰਨ ਲਈ ਸੱਤਾ ਦੇ ਗਲਿਆਰਿਆਂ ਵਿੱਚ ਘੁਸਪੈਠ ਕੀਤੀ ਸੀ। ਸ਼੍ਰੀ ਮੋਦੀ ਨੇ ਦਾਅਵਾ ਕੀਤਾ, “ਸਾਨੂੰ ਇਸ ਚੁਣੌਤੀ ਨੂੰ ਘੱਟ ਨਹੀਂ ਸਮਝਣਾ ਚਾਹੀਦਾ, ਸਾਨੂੰ ਇਸ ਬਾਰੇ ਤੁਰੰਤ ਹੋਰ ਵੀ ਸੁਚੇਤ ਹੋਣ ਦੀ ਲੋੜ ਹੈ।”

ਵਿਚਾਰਧਾਰਕ ਕੱਟੜਪੰਥੀਆਂ ਵੱਲੋਂ ਪੈਦਾ ਕੀਤੇ ਜਾ ਰਹੇ ਉੱਭਰ ਰਹੇ ਅਤੇ ਖਤਰਨਾਕ ਖਤਰੇ ਨੂੰ ਉਜਾਗਰ ਕਰਦਿਆਂ, ਪ੍ਰਧਾਨ ਮੰਤਰੀ ਨੇ ਇਨ੍ਹਾਂ ਵਿਘਨਕਾਰੀ ਅਨਸਰਾਂ ਦੀ ਪਛਾਣ ਕਰਨ ਅਤੇ ਉਨ੍ਹਾਂ ਨੂੰ ਵੱਖਰਾ ਕਰਨ ਲਈ ਇੱਕ ਵੱਡੇ ਅਤੇ ਤਾਲਮੇਲ ਵਾਲੇ ਯਤਨ ਦਾ ਸੱਦਾ ਦਿੱਤਾ। ਸ਼੍ਰੀ ਮੋਦੀ ਨੇ ਕਿਹਾ, “ਸਾਨੂੰ ਇਨ੍ਹਾਂ ਵਿਚਾਰਧਾਰਕ ਕੱਟੜਪੰਥੀਆਂ ਦੀ ਪਛਾਣ ਕਰਨੀ ਹੀ ਪਵੇਗੀ, ਉਨ੍ਹਾਂ ਨੂੰ ਵੱਖ ਕਰਨਾ ਪਵੇਗਾ, ਅਤੇ ਨੌਜਵਾਨ ਪੀੜ੍ਹੀ ਨੂੰ ਸਰਗਰਮੀ ਨਾਲ ਮੁੱਖ ਧਾਰਾ ਵੱਲ ਜੋੜਨਾ ਪਵੇਗਾ।”

ਤੇਜ਼ੀ ਨਾਲ ਬਦਲ ਰਹੇ ਆਲਮੀ ਦ੍ਰਿਸ਼ ਵਿੱਚ ਕੌਮੀ ਰੱਖਿਆ ਵੱਲ ਧਿਆਨ ਕੇਂਦਰਿਤ ਕਰਦਿਆਂ, ਜਿੱਥੇ ਆਧੁਨਿਕ ਯੁੱਧ ਘਰੇਲੂ ਬੁਨਿਆਦੀ ਢਾਂਚੇ ਨੂੰ ਨਿਸ਼ਾਨਾ ਬਣਾਉਂਦਾ ਹੈ, ਪ੍ਰਧਾਨ ਮੰਤਰੀ ਨੇ ਵੱਡੇ, ਆਧੁਨਿਕ ਅਤੇ ਸਵੈ-ਇੱਛਤ ਸਿਵਲ ਡਿਫੈਂਸ ਨੈੱਟਵਰਕ ਬਣਾਉਣ ਦਾ ਰਸਮੀ ਐਲਾਨ ਕੀਤਾ। ਨਾਲ ਹੀ ਉਨ੍ਹਾਂ ਦੱਸਿਆ ਕਿ ਰੱਖਿਆ ਬਰਾਮਦ 50 ਗੁਣਾ ਤੋਂ ਵੱਧ ਵਧ ਕੇ ਲਗਭਗ 100 ਦੇਸ਼ਾਂ ਤੱਕ ਪਹੁੰਚ ਗਈ ਹੈ। ਸ਼੍ਰੀ ਮੋਦੀ ਨੇ ਐਲਾਨ ਕੀਤਾ, “ਮੈਂ ਅੱਜ ਲਾਲ ਕਿਲ੍ਹੇ ਤੋਂ ਮਾਣ ਨਾਲ ਐਲਾਨ ਕਰ ਰਿਹਾ ਹਾਂ ਕਿ ਅਸੀਂ ਆਉਣ ਵਾਲੇ ਦਿਨਾਂ ਵਿੱਚ ਸਿਵਲ ਡਿਫੈਂਸ ਦਾ ਇੱਕ ਬਹੁਤ ਹੀ ਜੀਵੰਤ ਅਤੇ ਆਧੁਨਿਕ ਨੈੱਟਵਰਕ ਬਣਾਵਾਂਗੇ।”

ਹਵਾਬਾਜ਼ੀ, ਸਟੈੱਮ ਅਤੇ ਐੱਨਡੀਏ ਰਾਹੀਂ ਹਥਿਆਰਬੰਦ ਬਲਾਂ ਵਿੱਚ ਆਧੁਨਿਕ ਰਾਸ਼ਟਰ ਨਿਰਮਾਣ ਲਈ ਔਰਤਾਂ ਦੇ ਸ਼ਾਨਦਾਰ ਯੋਗਦਾਨ ਦੀ ਸ਼ਲਾਘਾ ਕਰਦਿਆਂ, ਪ੍ਰਧਾਨ ਮੰਤਰੀ ਨੇ ਪੇਂਡੂ ਔਰਤਾਂ ਦੇ ਆਰਥਿਕ ਸ਼ਕਤੀਕਰਨ ਨੂੰ ਉਜਾਗਰ ਕੀਤਾ। ਉਨ੍ਹਾਂ ਵਿਦੇਸ਼ਾਂ ਤੋਂ ਤਕਨੀਕੀ ਸਿਖਲਾਈ ਲੈਣ ਤੋਂ ਬਾਅਦ ਸਾਨੰਦ ਵਿੱਚ ਆਧੁਨਿਕ ਮਾਈਕ੍ਰੋਚਿਪਸ ਬਣਾਉਣ ਵਾਲੀਆਂ ਆਦਿਵਾਸੀ ਧੀਆਂ ’ਤੇ ਮਾਣ ਜ਼ਾਹਰ ਕੀਤਾ। ਇਹ ਦੱਸਦਿਆਂ ਕਿ 3 ਕਰੋੜ ‘ਲਖਪਤੀ ਦੀਦੀਆਂ’ ਬਣਾਉਣ ਦਾ ਟੀਚਾ ਪੂਰਾ ਕਰ ਲਿਆ ਗਿਆ ਹੈ, ਉਨ੍ਹਾਂ ਨੇ ਖੇਤਰੀ ਤਬਦੀਲੀ ਲਿਆਉਣ ਲਈ 6 ਕਰੋੜ ਦਾ ਨਵਾਂ ਟੀਚਾ ਮਿਥਿਆ। ਸ਼੍ਰੀ ਮੋਦੀ ਨੇ ਕਿਹਾ, “ਮੈਂ ਉਨ੍ਹਾਂ ਧੀਆਂ ਵਿੱਚ ਜੋ ਸ਼ਾਨਦਾਰ ਆਤਮ-ਵਿਸ਼ਵਾਸ ਵੇਖਿਆ, ਜੋ ਅੱਜ ਚਿੱਪ ਬਣਾਉਣ ਦਾ ਗੁੰਝਲਦਾਰ ਕੰਮ ਕਰ ਰਹੀਆਂ ਹਨ, ਉਸ ਨੇ ਮੈਨੂੰ ਸੱਚਮੁੱਚ ਪ੍ਰਭਾਵਿਤ ਕੀਤਾ ਹੈ।”

ਜਨਤਕ ਨੁਮਾਇੰਦਿਆਂ ਵਜੋਂ ਔਰਤਾਂ ਵੱਲੋਂ ਕੀਤੀ ਗਈ ਯੋਗ ਅਗਵਾਈ ਦੀ ਸ਼ਲਾਘਾ ਕਰਦਿਆਂ, ਪ੍ਰਧਾਨ ਮੰਤਰੀ ਨੇ ਨਾਰੀ ਸ਼ਕਤੀ ਲਈ ਵੱਡਾ ਸੱਦਾ ਦਿੱਤਾ। ਉਨ੍ਹਾਂ ਸਾਰੀਆਂ ਸਿਆਸੀ ਪਾਰਟੀਆਂ ਨੂੰ ਦਹਾਕਿਆਂ ਦੀ ਦੇਰੀ ਖਤਮ ਕਰਨ ਅਤੇ ਸੰਸਦ ਤੇ ਵਿਧਾਨ ਸਭਾਵਾਂ ਵਿੱਚ ਔਰਤਾਂ ਲਈ ਇੱਕ-ਤਿਹਾਈ ਰਾਖਵਾਂਕਰਨ ਤੁਰੰਤ ਲਾਗੂ ਕਰਨ ਦੀ ਅਪੀਲ ਕੀਤੀ। ਸ਼੍ਰੀ ਮੋਦੀ ਨੇ ਕਿਹਾ, “ਔਰਤਾਂ ਦੇ ਸਨਮਾਨ ਵਿੱਚ ਅੱਗੇ ਆਓ, ਸਿਹਰਾ ਲਓ, ਪਰ ਮੇਰੀਆਂ ਮਾਵਾਂ ਅਤੇ ਭੈਣਾਂ ਨੂੰ ਉਨ੍ਹਾਂ ਦਾ ਬਣਦਾ ਹੱਕ ਜ਼ਰੂਰ ਦਿਓ।”

ਪਿਛਲੇ ਸਮੇਂ ਦੀ ਘੱਟ ਸਮਾਜਿਕ ਸੁਰੱਖਿਆ ਕਵਰੇਜ ਦੀ ਤੁਲਨਾ ਪਿਛਲੇ ਦਹਾਕੇ ਦੌਰਾਨ ਹੋਏ ਵੱਡੇ ਪਸਾਰ ਨਾਲ ਕਰਦਿਆਂ, ਪ੍ਰਧਾਨ ਮੰਤਰੀ ਨੇ ਦੱਸਿਆ ਕਿ 2014 ਤੋਂ ਪਹਿਲਾਂ ਸਿਰਫ਼ 25 ਕਰੋੜ ਲੋਕਾਂ ਨੂੰ ਭਲਾਈ ਸਕੀਮਾਂ ਦਾ ਲਾਭ ਮਿਲਦਾ ਸੀ, ਜੋ ਹੁਣ ਵਧ ਕੇ ਲਗਭਗ 100 ਕਰੋੜ ਨਾਗਰਿਕਾਂ ਤੱਕ ਪਹੁੰਚ ਗਿਆ ਹੈ। ਸ਼੍ਰੀ ਮੋਦੀ ਨੇ ਜ਼ੋਰ ਦਿੱਤਾ, “ਇੱਕ ‘ਵਿਕਸਿਤ ਭਾਰਤ’ ਦਾ ਸੰਕਲਪ ਤਾਂ ਹੀ ਪੂਰਾ ਹੋਵੇਗਾ ਜਦੋਂ ਵੱਡਾ ਵਿਕਾਸ ਸਫ਼ਲਤਾਪੂਰਵਕ ਆਖਰੀ ਵਿਅਕਤੀ ਤੱਕ ਪਹੁੰਚੇਗਾ।”

ਵੱਡੀਆਂ ਭਲਾਈ ਪਹਿਲਕਦਮੀਆਂ ਦੇ ਜੀਵਨ-ਬਦਲੂ ਪ੍ਰਭਾਵ ਦਾ ਵੇਰਵਾ ਦਿੰਦਿਆਂ, ਪ੍ਰਧਾਨ ਮੰਤਰੀ ਨੇ ਆਯੁਸ਼ਮਾਨ ਭਾਰਤ ਯੋਜਨਾ ਦਾ ਜ਼ਿਕਰ ਕੀਤਾ, ਜਿਸ ਨੇ 70 ਸਾਲ ਤੋਂ ਵੱਧ ਉਮਰ ਦੇ ਬਜ਼ੁਰਗਾਂ ਲਈ 5 ਲੱਖ ਰੁਪਏ ਤੱਕ ਦਾ ਮੁਫ਼ਤ ਡਾਕਟਰੀ ਕਵਰ ਵਧਾ ਦਿੱਤਾ ਹੈ ਅਤੇ ਗਰੀਬ ਤੇ ਮੱਧ-ਵਰਗੀ ਪਰਿਵਾਰਾਂ ਨੂੰ ਭਾਰੀ ਡਾਕਟਰੀ ਬਿੱਲਾਂ ਤੋਂ ਬਚਾਉਂਦਿਆਂ ਲਗਭਗ 2 ਲੱਖ ਕਰੋੜ ਰੁਪਏ ਦੀ ਬੱਚਤ ਕੀਤੀ ਹੈ। ਸ਼੍ਰੀ ਮੋਦੀ ਨੇ ਕਿਹਾ, “ਇਸ ਹੈਲਥ ਕਾਰਡ ਕਾਰਨ ਮੇਰੇ ਗਰੀਬ ਅਤੇ ਮੱਧ-ਵਰਗੀ ਪਰਿਵਾਰਾਂ ਦੇ ਦਵਾਈਆਂ ਅਤੇ ਅਪਰੇਸ਼ਨਾਂ ’ਤੇ ਲੱਗਣ ਵਾਲੇ ਪੈਸੇ ਬਚ ਗਏ ਹਨ।”

ਇਹ ਦੱਸਦਿਆਂ ਕਿ ਭਾਰਤ ਦੀ ਪਹਿਲੀ ਡਿਜੀਟਲ ਜਨਗਣਨਾ (ਮਰਦਮਸ਼ੁਮਾਰੀ) ਇਸ ਵੇਲੇ ਚੱਲ ਰਹੀ ਹੈ, ਪ੍ਰਧਾਨ ਮੰਤਰੀ ਨੇ ਪਰਿਵਾਰਾਂ ਅਤੇ ਨੌਜਵਾਨਾਂ ਨੂੰ ਮੋਬਾਈਲ ਫੋਨਾਂ ਰਾਹੀਂ ਡਿਜੀਟਲ ਸੈਲਫ-ਰਜਿਸਟ੍ਰੇਸ਼ਨ ਦਾ ਫਾਇਦਾ ਉਠਾਉਣ ਦੀ ਅਪੀਲ ਕੀਤੀ। ਉਨ੍ਹਾਂ ਸਮਝਾਇਆ ਕਿ ਨਾਗਰਿਕਾਂ ਦੀ ਸਰਗਰਮ ਸ਼ਮੂਲੀਅਤ ਰਾਹੀਂ ਪ੍ਰਾਪਤ ਕੀਤਾ ਗਿਆ ਸਹੀ ਡੇਟਾ ਵਿਕਾਸ ਦੀਆਂ ਬਿਹਤਰ ਯੋਜਨਾਵਾਂ ਅਤੇ ਅਸਰਦਾਰ ਕੌਮੀ ਨੀਤੀਆਂ ਬਣਾਉਣ ਲਈ ਮਜ਼ਬੂਤ ਨੀਂਹ ਦਾ ਕੰਮ ਕਰਦਾ ਹੈ। ਸ਼੍ਰੀ ਮੋਦੀ ਨੇ ਦਾਅਵਾ ਕੀਤਾ, “ਤੁਸੀਂ ਡਿਜੀਟਲ ਰੂਪ ਵਿੱਚ ਜਿੰਨੀ ਸਹੀ ਜਾਣਕਾਰੀ ਪ੍ਰਦਾਨ ਕਰੋਗੇ, ਦੇਸ਼ ਨੂੰ ਤੇਜ਼ੀ ਨਾਲ ਅੱਗੇ ਵਧਣ ਵਿੱਚ ਓਨੀ ਹੀ ਵੱਡੀ ਮਦਦ ਮਿਲੇਗੀ।”

ਨੌਜਵਾਨਾਂ ਨੂੰ ਇਸ ਡਿਜੀਟਲ ਜਨਗਣਨਾ ਮੁਹਿੰਮ ਦੀ ਸਰਗਰਮੀ ਨਾਲ ਅਗਵਾਈ ਕਰਨ ਦੀ ਅਪੀਲ ਕਰਦਿਆਂ, ਪ੍ਰਧਾਨ ਮੰਤਰੀ ਨੇ ਉਨ੍ਹਾਂ ਨੂੰ ਸਲਾਹ ਦਿੱਤੀ ਕਿ ਉਹ ਆਪਣੇ ਪਰਿਵਾਰਾਂ ਨਾਲ ਬੈਠ ਕੇ, ਗਲਤੀਆਂ ਤੋਂ ਬਚਣ ਲਈ ਧਿਆਨ ਨਾਲ ਫ਼ਾਰਮ ਭਰਨ ਅਤੇ ਸਹੀ ਡੇਟਾ ਆਨਲਾਈਨ ਅਪਲੋਡ ਕਰਨ। ਸ਼੍ਰੀ ਮੋਦੀ ਨੇ ਕਿਹਾ, “ਮੈਂ ਆਪਣੇ ਦੇਸ਼ ਦੇ ਨੌਜਵਾਨਾਂ ਨੂੰ ਜ਼ੋਰਦਾਰ ਅਪੀਲ ਕਰਦਾ ਹਾਂ ਕਿ ਉਹ ਡਿਜੀਟਲ ਜਨਗਣਨਾ ਦੇ ਇਸ ਬਹੁਤ ਮਹੱਤਵਪੂਰਨ ਕੰਮ ਵਿੱਚ ਸਰਗਰਮੀ ਨਾਲ ਅਤੇ ਵੱਡੀ ਗਿਣਤੀ ਵਿੱਚ ਸ਼ਾਮਲ ਹੋਣ।”

ਪ੍ਰਧਾਨ ਮੰਤਰੀ ਨੇ ਆਪਣੇ ਆਜ਼ਾਦੀ ਦਿਹਾੜੇ ਦੇ ਸੰਬੋਧਨ ਦੀ ਸਮਾਪਤੀ ਪੰਚ ਪ੍ਰਣ ਯਾਦ ਕਰਵਾਉਂਦਿਆਂ ਕੀਤੀ ਅਤੇ ਹਰ ਨਾਗਰਿਕ ਨੂੰ ਅਪੀਲ ਕੀਤੀ ਕਿ ਉਹ ਹਮੇਸ਼ਾ ਦੇਸ਼ ਦੇ ਹਿੱਤਾਂ ਨੂੰ ਆਪਣੇ ਨਿੱਜੀ ਹਿੱਤਾਂ ਤੋਂ ਉੱਪਰ ਰੱਖੇ, ਬਸਤੀਵਾਦੀ ਮਾਨਸਿਕਤਾ ਖ਼ਤਮ ਕਰੇ ਅਤੇ ਵੱਡੇ ਸੁਪਨਿਆਂ ਨੂੰ ਤੇਜ਼ੀ ਨਾਲ ਇੱਕ ਵਿਕਸਿਤ ਦੇਸ਼ ਦੀ ਸਫ਼ਲਤਾ ਵਿੱਚ ਬਦਲਣ ਲਈ ਮਿਲ ਕੇ ਕੰਮ ਕਰੇ। ਸ਼੍ਰੀ ਮੋਦੀ ਨੇ ਕਿਹਾ, “ਆਓ ਹਰ ਕਦਮ ਨੂੰ ਵਿਕਾਸ ਦਾ ਕਦਮ ਬਣਾਈਏ, ਕਦਮ ਨਾਲ ਕਦਮ ਮਿਲਾਈਏ ਅਤੇ ਮਿਲ ਕੇ ‘ਵਿਕਸਿਤ ਭਾਰਤ’ ਬਣਾਈਏ।”

Addressing the nation on Independence Day.https://t.co/Q67F6cB96x

— Narendra Modi (@narendramodi) August 15, 2026

Watch LIVE. https://t.co/TmFSTCdlYC

— PMO India (@PMOIndia) August 15, 2026

Today is a day to move forward with our dreams, resolve and strength. pic.twitter.com/kTXLdvTTJu

— PMO India (@PMOIndia) August 15, 2026

India has set a big goal… To become a developed nation by 2047. pic.twitter.com/FOQIgsK3lF

— PMO India (@PMOIndia) August 15, 2026

We must believe in ourselves and take pride in building an Aatmanirbhar Bharat. pic.twitter.com/cxR8T42Mke

— PMO India (@PMOIndia) August 15, 2026

Sectors that were once seen as ‘No-Go Areas’ are now ‘Go-Ahead Areas.’ pic.twitter.com/k94STQjwdQ

— PMO India (@PMOIndia) August 15, 2026

Every Indian is embracing the spirit of Make in India and Vocal for Local. pic.twitter.com/R84aDMZjt0

— PMO India (@PMOIndia) August 15, 2026

India has a stable political mandate, a stable government, a vibrant democracy, a strong judicial system and a Constitution that guides us all. pic.twitter.com/JYbThDEhet

— PMO India (@PMOIndia) August 15, 2026

We need to focus on three things… Cost, quality and scale. pic.twitter.com/0wZusWMS51

— PMO India (@PMOIndia) August 15, 2026

Our factories must be competitive, our products user-friendly and our packaging must be the best. pic.twitter.com/42QzQ6UrRd

— PMO India (@PMOIndia) August 15, 2026

Places once affected by Naxal violence are witnessing peace, development and new hope. pic.twitter.com/QTRhWI1dpx

— PMO India (@PMOIndia) August 15, 2026

****

ਐੱਮਜੇਪੀਐੱਸ/ਐੱਸਐੱਸ/ਪੀਆਰਕੇ