பி.எம்.இந்தியா

பிரதமர் திரு நரேந்திர மோடி இன்று (11.10.2026) சென்னையில் உள்ள ஜெய்கோபால் கரோடியா இந்து வித்யாலயா மெட்ரிகுலேஷன் மேல்நிலைப் பள்ளியின் பொன்விழாக் கொண்டாட்டங்களில் பங்கேற்றார். இந்த நாளின் ஆழ்ந்த ஆன்மிக முக்கியத்துவத்தை எடுத்துரைத்த பிரதமர், நவராத்திரியின் முதல் நாளிலேயே சிவன், சக்தியின் புனித பூமியான தமிழ்நாட்டுக்கு வருகை தந்ததில் தமது அளவற்ற மகிழ்ச்சியை வெளிப்படுத்தினார். அன்னை சரஸ்வதியின் பக்தர்களைச் சந்தித்தபோது, இளைஞர்களின் நேர்மறை ஆற்றல், உற்சாகம், துடிப்பான ஆர்வத்தை அனுபவித்ததாகவும், அது இந்த விழாவிற்கு மிகவும் மங்களகரமான தொடக்கத்தை அளித்தது என்றும் அவர் கூறினார். உங்கள் அனைவரின் கண்களிலும் இந்தியாவின் எதிர்காலத்தை என்னால் காண முடிகிறது என்று திரு நரேந்திர மோடி குறிப்பிட்டார்.

இளம் தலைமுறையினரின் மகத்தான ஆற்றலைக் குறிப்பிட்ட பிரதமர், வளர்ச்சியடைந்த இந்தியா தொலைநோக்குப் பார்வைக்கு உந்து சக்தியாக மாறுவதற்கான வலுவான விருப்பம் இன்றைய இளைஞர்களிடம் உள்ளது என்று கூறினார். இந்த தேசிய இலக்கை அடைவதற்குத் தேவையான புதிய யோசனைகளும் தீர்வுகளும் இறுதியில் நாட்டின் தலைவிதியை மட்டுமல்ல, ஒட்டுமொத்த உலகத்தின் எதிர்காலத்தையும் வடிவமைக்கும் என்று அவர் கூறினார். இன்று, உலகம் தீர்வுகளைத் தேடுகிறது, அந்தத் தீர்வுகளை வழங்கும் ஆற்றல் இளைஞர்களிடம் உள்ளது என்று திரு நரேந்திர மோடி கூறினார்.

மாணவர்களைப் பெரிய அளவில் கனவு காண ஊக்குவித்த பிரதமர், நாடு முழுவதும் தற்போது உருவாகி வரும் எல்லையற்ற வாய்ப்புகளின் பரந்த தளத்தில் ஒவ்வொரு இளைஞரும் தங்கள் எதிர்காலத்தைக் கற்பனை செய்து பார்க்க வேண்டும் என்று வலியுறுத்தினார். முன்னெப்போதும் இல்லாத சாத்தியக்கூறுகள் நிறைந்த இந்தக் காலகட்டத்தில், இந்தக் கூட்டு தேசியக் கனவு, முற்றிலும் அவர்களின் கைக்கு எட்டும் தூரத்தில் உள்ளது என்ற முழு நம்பிக்கையை அவர் வெளிப்படுத்தினார். நாம் ஒன்றிணைந்து இதைச் சாதிப்போம் என்று திரு நரேந்திர மோடி கூறினார்.

தனிப்பட்ட நிகழ்வு ஒன்றை விவரித்த பிரதமர், சில மாதங்களுக்கு முன்பு நாகர்கோவிலில் கிரிஜா அம்மாவையும், பல குழந்தைகளையும் சந்தித்ததை நினைவு கூர்ந்தார். நாட்டின் எதிர்காலத்தின் மீதான அவரது ஆழ்ந்த அர்ப்பணிப்பு, தன்னம்பிக்கை, அசைக்க முடியாத உறுதி ஆகியவை தமது மனதில் முன்னெப்போதும் இல்லாத ஒரு தாக்கத்தை ஏற்படுத்தின என்று திரு நரேந்திர மோடி குறிப்பிட்டார்.

அந்த சந்திப்பின்போது அளித்த வாக்குறுதியை நிறைவேற்றும் வகையிலும், வரலாற்றுச் சிறப்புமிக்க நிறுவனத்தின் மீது தமக்குள்ள ஆழ்ந்த மரியாதையும், இந்த பொன்விழாக் கொண்டாட்டத்திற்கான அவரது அழைப்பை ஏற்கத் தன்னைத் தூண்டியதாகப் பிரதமர் பகிர்ந்துகொண்டார். இந்த ஐம்பது ஆண்டுகால மகத்தான பயணத்திற்காக விஸ்வ இந்து வித்யா கேந்திராவுக்கும், இந்து வித்யாலயா குடும்பம் முழுவதற்கும் தமது மனமார்ந்த வாழ்த்துகளை திரு நரேந்திர மோடி தெரிவித்தார்.

இந்த நிறுவனத்தின் மிகவும் எழுச்சியூட்டும் பயணத்தை விவரித்த பிரதமர், விஸ்வ ஹிந்து வித்யா கேந்திரா 1975-ல் சென்னையின் ‘மேற்கு மாம்பலத்தில்’ வெறும் ஏழு மாணவர்கள், குறைந்த வளங்களுடன் ஒரு மிகச் சிறிய பள்ளியாகத் தொடங்கியது என்று குறிப்பிட்டார். நவீன வசதிகளோ அல்லது நிரந்தரக் கட்டடமோ இல்லாத நிலையிலும், ஆரம்பகால இன்னல்களைக் கடந்து, நிறுவனத்தை முன்னோக்கிச் செலுத்துவதற்காகத் தங்கள் வலுவான மனவுறுதியையும் அசைக்க முடியாத சேவை மனப்பான்மையையும் நம்பியிருந்த நிறுவனர்களை அவர் பாராட்டினார். அதனால்தான், எல்லா சிரமங்களையும் மீறி, இந்த நிறுவனம் தொடர்ந்து முன்னேறிச் சென்றது என்று திரு நரேந்திர மோடி குறிப்பிட்டார்.

அந்த எளிய தொடக்கங்களிலிருந்து, மாபெரும் விரிவாக்கத்தை எடுத்துரைத்த பிரதமர், அந்தச் சிறிய ஆரம்ப முயற்சி பல ஆண்டுகளாக ஒரு மாபெரும் கல்வி இயக்கமாக எப்படி உருவெடுத்தது என்பதை எடுத்துரைத்தார். மாநிலம் முழுவதும் இந்த நிறுவனத்தின் தற்போதைய பரவலை அவர் குறிப்பிட்டார். இன்று தமிழ்நாட்டின் பல்வேறு பகுதிகளில் 15 நிறுவனங்கள் உள்ளன என்று திரு நரேந்திர மோடி கூறினார்.

இதன் நிறுவனத் தலைவர்களைக் கௌரவிக்கும் வகையில், பள்ளிக் கட்டடத்தைக் கட்டுவதில் திரு ஜெய்கோபால் கரோடியா ஆற்றிய முக்கியப் பங்களிப்புகளைப் பிரதமர் மரியாதையுடன் நினைவு கூர்ந்தார். இந்து வித்யாலயாவின் பயணத்தை ஒரு மாபெரும் வெற்றியாக மாற்றுவதற்காகத் தங்கள் வாழ்க்கையை அர்ப்பணித்த அனைத்து ஆசிரியர்கள், பணியாளர்கள், பெற்றோர், முன்னாள் மாணவர்களுக்கு அவர் தமது நன்றியைத் தெரிவித்தார். ஐம்பது ஆண்டுகால அர்ப்பணிப்பு மற்றும் உறுதிப்பாடு, ஐம்பது ஆண்டுகளாக வாழ்க்கையைச் செதுக்கியுள்ளது என்று அவர் குறிப்பிட்டார்.

கல்வியை வலுவான தேசபக்தி விழுமியங்களுடன் வெற்றிகரமாக இணைத்ததற்காக இந்த நிறுவனத்தைப் பாராட்டிய பிரதமர், நாட்டின் வீரர்களுக்காக தினமும் ஒரு ரூபாய் சேமிக்க குழந்தைகளை அற்புதமாக ஊக்குவித்த கிரிஜா அம்மாவை தமது ‘மனதின் குரல்‘ நிகழ்ச்சியில் குறிப்பிட்டதை நினைவு கூர்ந்தார். இந்தத் தீர்மானத்தில் ஆயிரக்கணக்கான குழந்தைகள் இணைந்து 40 லட்சம் ரூபாயை வெற்றிகரமாகத் திரட்டிய கூட்டுத் தாக்கத்தை அவர் பாராட்டினார். உண்மையில், இது எழுச்சியூட்டும் உதாரணம் என்று அவர் தெரிவித்தார்.

படிப்படியான முயற்சிகளின் மகத்தான சக்தியை எடுத்துரைத்த பிரதமர், சிறிய பங்களிப்புகள்கூட சமூகத்தில் ஒரு மிகப்பெரிய நேர்மறையான தாக்கத்தை ஏற்படுத்த முடியும் என்று கூறினார். இயற்கை பேரிடர்களின் போது தேவைப்படுபவர்களுக்கு ஆதரவளிப்பது அல்லது தூய்மைப் பணிகளில் தீவிரமாகப் பங்கேற்பது என, விழுமியங்களின் ஒரு சிறந்த பாரம்பரியத்தை முனைப்புடன் வளர்த்து வரும் இந்து வித்யாலயா குடும்பத்தை அவர் பாராட்டினார்.

பழங்கால ஞானத்தை நினைவு கூர்ந்த பிரதமர், திருவள்ளுவருக்கு மரியாதை செலுத்தியதோடு, அவரது போதனைகள் இன்றைய மாணவர்களுக்கு மிகுந்த பொருத்தமாக உள்ளன என்றும் கூறினார். ரஷ்ய அதிபர் புதினிடம் திருக்குறளின் ரஷ்ய மொழி மொழிபெயர்ப்பை வழங்கிய சந்திப்பு ஒன்றையும் அவர் பெருமையுடன் பகிர்ந்து கொண்டார். திருவள்ளுவரின் போதனைகள் அனைவருக்கும் மிகவும் முக்கியமானவை என்று திரு நரேந்திர மோடி குறிப்பிட்டார்.

திருக்குறளின் காலத்தால் அழியாத வழிகாட்டுதலை விரிவாக எடுத்துரைத்த பிரதமர், வாழ்நாள் முழுவதும் கற்கும் மாணவர்களுக்கு இந்நூல் ஒரு அற்புதமான வழிகாட்டி என்று கூறினார். கற்ற அறிவை அன்றாட வாழ்வில் தீவிரமாகப் பயன்படுத்துவதன் அவசியத்தை வலியுறுத்தும் திருவள்ளுவரின் புகழ்பெற்ற குறள் ஒன்றை அவர் சுட்டிக்காட்டி, அது மாணவர்களுக்கு ஒரு முக்கியப் பாடம் என்று குறிப்பிட்டார்.

தேசத்தைப் பிணைக்கும் ஆழமான கலாச்சாரப் பிணைப்புகளை எடுத்துரைத்த பிரதமர், மாபெரும் கவிஞர் மகாகவி பாரதியார் காசியில் ஆன்மிக, தேசிய உணர்வால் பெரிதும் ஈர்க்கப்பட்டார் என்று குறிப்பிட்டார். கவிஞரின் விரிவான வாழ்க்கையையும் தத்துவத்தையும் படித்து, அதிலிருந்து உத்வேகம் பெறுமாறு அவர் மாணவர்களை ஊக்குவித்தார். ஆன்மிக, தேசிய உணர்வால் நிறைந்த காசியின் சூழல், பாரதியாரின் சிந்தனைகளில் ஆழமான தாக்கத்தை ஏற்படுத்தியது என்று திரு நரேந்திர மோடி குறிப்பிட்டார்.

தமது நாடாளுமன்றத் தொகுதியான வாரணாசியின் (காசி) இந்தப் பொதுவான பாரம்பரியம் குறித்துப் பேசிய பிரதமர், காசி மக்கள் இன்றும் மகாகவி பாரதியாரை அன்புடன் நினைவுகூர்கிறார்கள் என்று கூறினார். இளைஞர்கள் தங்கள் எண்ணங்களையும் கனவுகளையும் தீவிரமாகப் பின்தொடர, பாரதியாரின் புகழ்பெற்ற வரிகளான ‘அச்சமில்லை, அச்சமில்லை‘ என்பதைத் தீவிரமாகக் கடைப்பிடிக்க வேண்டும் என்றும் அவர் வலியுறுத்தினார். “பெரிய அளவில் கனவு காணுங்கள், வித்தியாசமாகச் சிந்தியுங்கள், அச்சமின்றி செயல்படுங்கள்,” என்று திரு நரேந்திர மோடி அறிவுறுத்தினார்.

தமது சொந்த வாழ்க்கை அனுபவங்களை நினைவுகூர்ந்த பிரதமர், விரிவான பயணங்கள், நாட்டின் பல்வேறு பிராந்தியங்களில் உள்ள மக்களிடமிருந்து நேரடியாகக் கற்றுக்கொண்டது ஆகியவற்றின் மூலமே நாட்டைப் பற்றிய தமது ஆழ்ந்த புரிதல் உருவானது என்று விளக்கினார். 1990-களின் முற்பகுதியில் கன்னியாகுமரியிலிருந்து காஷ்மீருக்கு நடைபெற்ற ஒற்றுமை யாத்திரையில் பங்கேற்றதை அவர் நினைவு கூர்ந்தார். அங்குதான் கிரிஜா அம்மாவுடனான சந்திப்பு முதன்முதலில் தொடங்கியது என அவர் தெரிவித்தார். அப்போதிருந்து எங்கள் இந்த நட்பு நீடித்து வருகிறது என்று திரு நரேந்திர மோடி குறிப்பிட்டார்.

தமிழ்நாட்டுடனான தமது ஆழ்ந்த தனிப்பட்ட பிணைப்பை வெளிப்படுத்திய பிரதமர், தமது விரிவான பயணங்கள் தேசத்தின் பரந்த பன்முகத்தன்மையை ஆழமாகப் புரிந்துகொள்ள தமக்கு உதவியதாகக் கூறினார். தமிழ் மொழி, தமிழ் கலாச்சாரத்தின் மீது தமக்கு இருக்கும் அன்பும் இந்த அனுபவங்களிலிருந்தே பிறந்தது என்று அவர் கூறினார்.

தேசிய ஒருமைப்பாட்டில் மாணவர்கள் தீவிரமாக ஈடுபட ஊக்குவித்த பிரதமர், இளைஞர்கள் பரவலாகப் பயணம் செய்து, தாங்கள் செல்லும் இடமெல்லாம் தமிழ் கலாச்சாரத்தைப் பெருமையுடன் எடுத்துச் செல்ல வேண்டும் என்று கேட்டுக்கொண்டார். தேசத்தின் ஒற்றுமையை வலுப்படுத்த, முற்றிலும் மாறுபட்ட பின்னணியைச் சேர்ந்த மக்களுடன் தீவிரமாக நட்புறவை வளர்த்துக்கொண்டு, தமிழ் கவிதைகள், கதைகள், மரபுகளைப் பகிர்ந்து கொள்ளுமாறும் அவர் அவர்களுக்கு அறிவுறுத்தினார். நீங்கள் உருவாக்கும் நட்புறவுகளால்தான் நமது தேசத்தின் ஒற்றுமை கட்டமைக்கப்படுகிறது என்று பிரதமர் தெரிவித்தார்.

நாட்டின் கல்விச் சூழலை மாற்றியமைக்கும் கட்டமைப்பு மாற்றங்களை விவரித்த பிரதமர், புதிய தலைமுறைக்குக் கிடைக்கும் வாய்ப்புகளை எடுத்துரைத்தார். நாட்டில் பல்கலைக்கழகங்களின் எண்ணிக்கை 2014-ல் 750-ஆக இருந்தது இப்போது 1,300-க்கும் மேலாக உயர்ந்துள்ளது என்றும், கல்லூரிகளின் எண்ணிக்கை 38,000-லிருந்து 52,000-க்கும் மேலாக அதிகரித்துள்ளது என்றும், அத்துடன் ஏராளமான புதிய ஐஐடி, ஐஐஎம், ஐஐஐடி, எய்ம்ஸ் நிறுவனங்கள் நிறுவப்பட்டுள்ளன என்றும் அவர் தெளிவான புள்ளிவிவரங்களை வழங்கினார். இப்போது நாட்டின் கல்விச் சூழலே முழுமையாக மாறி வருகிறது என்று திரு நரேந்திர மோடி குறிப்பிட்டார்.

புதிய கல்விக் கொள்கையால் ஏற்பட்டுள்ள தரமான மேம்பாடுகளை எடுத்துரைத்த பிரதமர், உள்நாட்டு நிறுவனங்களுக்கு வேகமாக அதிகரித்து வரும் உலகளாவிய அங்கீகாரத்தைக் குறிப்பிட்டார். க்யூஎஸ் தரவரிசையில் இடம்பெற்றுள்ள இந்தியப் பல்கலைக்கழகங்களின் எண்ணிக்கை 2015-ல் வெறும் 14 ஆக இருந்த நிலையில், சமீபத்திய தரவரிசையில் 52 ஆக வியத்தகு முறையில் அதிகரித்துள்ளது என்றும், இது மாணவர்களுக்கான வாய்ப்புகளைப் பெருமளவில் விரிவுபடுத்தியுள்ளது என்றும் அவர் சுட்டிக்காட்டினார்.

இளைஞர்களின் பல்வேறுபட்ட விருப்பங்கள் குறித்துப் பேசிய பிரதமர், பல மாணவர்கள் விளையாட்டுத் துறையில், தீவிரமாக ஈடுபட விரும்புவதைக் குறிப்பிட்டார். விளையாட்டை வெறும் பொழுதுபோக்காகக் கருதாமல், ஒரு சாத்தியமான தொழில் முறைத் திறனாகக் கருதுவதை உறுதி செய்வதற்காக, நாடு புதிய விளையாட்டு உள்கட்டமைப்புகளைத் வேகமாக உருவாக்கி வருவதாகவும், சிறந்த பயிற்சியையும் ஆதரவையும் வழங்கி வருவதாகவும் அவர் தெரிவித்தார். இது ஏற்கெனவே நாட்டின் சர்வதேச அந்தஸ்தை உயர்த்தி வருகிறது என அவர் கூறினார். இளம் விளையாட்டு வீரர்கள் சிறந்த பயிற்சியையும் ஆதரவையும் பெற்று வருகின்றனர் என்று திரு நரேந்திர மோடி குறிப்பிட்டார்.

மிகவும் லட்சியமிக்க தேசிய விளையாட்டு இலக்குகளை சுட்டிக் காட்டிய பிரதமர், 2030 காமன்வெல்த் விளையாட்டுப் போட்டிகளை நடத்துவதற்கு நாடு தீவிரமாகத் தயாராகி வருவதாகவும், 2036 ஒலிம்பிக் போட்டிகளை நடத்தும் மாபெரும் கனவை நோக்கி முன்னேறி வருவதாகவும் தெரிவித்தார். வரவிருக்கும் மாபெரும் உலகளாவிய விளையாட்டு நிகழ்வுகளுக்கு, இப்போது மிகச்சிறந்த தளம், ஆற்றல், அரசின் முழு ஆதரவு ஆகியவை உள்ளது என்று அவர் கூறினார். “வாய்ப்புகள் முடிவற்றவை, இளைய தலைமுறை, விளையாட்டு உலகிலும் இந்தியாவை புதிய உயரங்களுக்குக் கொண்டு செல்லும் என்று உறுதியாக நம்புகிறேன்,” என்று திரு நரேந்திர மோடி குறிப்பிட்டார்.

இளம் தலைமுறையினர் மீது தமது நம்பிக்கையை வெளிப்படுத்திய பிரதமர், மாணவர்களுடன் கலந்துரையாடுவதும், அவர்களின் துடிப்பான கனவுகளை உணர்வதும், தேசிய எதிர்காலத்தின் மீதான தமது நம்பிக்கையை கணிசமாக வலுப்படுத்தியுள்ளதாகக் கூறினார். வரவிருக்கும் சகாப்தத்தை வடிவமைத்து, வரையறுக்கும் மாபெரும் நாயகர்கள் இளைஞர்கள்தான் என்று அவர் தெரிவித்தார்.

இளைஞர்களின் திறன்களின் மீதான தமது முழு நம்பிக்கையை மீண்டும் வெளிப்படுத்திய பிரதமர், அங்கு கூடியிருந்த மாணவர்களின் அபரிமிதமான திறமை, தன்னம்பிக்கை, ஆற்றலைப் பாராட்டினார். சில மாபெரும், வரலாற்றுச் சிறப்புமிக்க தேசியத் தீர்மானங்களை முன்னெடுத்துச் செல்வதில் தம்மோடு இணையுமாறு கூடியிருந்த இளைஞர்களுக்கு அவர் அழைப்பு விடுத்தார்.

2047-ம் ஆண்டுக்குள் வளர்ச்சியடைந்த இந்தியாவைக் கட்டியெழுப்புவதற்கும், உலகின் முதல் மூன்று பொருளாதாரங்களில் ஒன்றாக மாறுவதற்கும், தன்னிறைவு பெற்ற உலகளாவிய உற்பத்தி மையமாக இந்தியாவை நிறுவுவதற்கும், ஒலிம்பிக் போட்டிகளை நடத்துவதற்கும், நிலவில் ஒரு இந்தியரை இறக்குவதற்கும் இளைஞர்கள் தங்களை முழுமையாக அர்ப்பணித்துக் கொள்ள வேண்டும் என்று பிரதமர் வலியுறுத்தினார்.

மிகுந்த ஈடுபாட்டுடனும் உற்சாகத்துடனும் மாபெரும் தேசிய இலக்குகளை நிறைவேற்ற, “நாம் சாதிப்போம்!” என்று முழக்கமிடுமாறு அங்கு கூடியிருந்த பெருந்திரளான மக்களுக்கு வேண்டுகோள் விடுத்துப் பிரதமர் திரு நரேந்திர மோடி தமது உரையை நிறைவு செய்தார்.

****

(Release ID: 2322003)

TV/PLM/RJ