ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କେନ୍ଦ୍ର କ୍ୟାବିନେଟ୍ ବୈଠକରେ ଆସାମର କମରୁପ୍ (ଉତ୍ତର ଗୌହାଟି ରାଜସ୍ୱ ସର୍କଲ)ରେ ନୂଆ ଏମ୍ସ ସ୍ଥାପନ ପାଇଁ ମଞ୍ଜୁରି ମିଳିଛି । ଏହି ପ୍ରକଳ୍ପ ପାଇଁ 1123 କୋଟି ଖର୍ଚ୍ଚ ହେବ ଓ ପ୍ରଧାନମନ୍ତ୍ରୀ ସ୍ୱାସ୍ଥ୍ୟ ସୁରକ୍ଷା ଯୋଜନା (ପିଏମ୍ଏସ୍ଏସ୍ୱାଇ) ଅଧୀନରେ ଏହା ସ୍ଥାପନ ହେବ । ଏହି ନୂଆ ଏମ୍ସକୁ ଭାରତ ସରକାରଙ୍କ ଅନୁମୋଦନ ମିଳିବାର 48 ମାସ ମଧ୍ୟରେ ସମ୍ପୂର୍ଣ୍ଣ କରାଯିବ । ଅତିବେଶୀରେ ନିର୍ମାଣ ପୂର୍ବ କାର୍ଯ୍ୟ ପାଇଁ 15 ମାସ, ନିର୍ମାଣ କାର୍ଯ୍ୟ ନିମନ୍ତେ 30 ମାସ ଓ କାର୍ଯ୍ୟକ୍ଷମ ପ୍ରକ୍ରିୟା 3 ମାସରେ ହେବ । ଏହି ପ୍ରତିଷ୍ଠାନରେ 750 ବେଡ୍ ବିଶିଷ୍ଟ ହସ୍ପିଟାଲ, ଟ୍ରମା ସେଂଟର ସୁବିଧା, ପ୍ରତିବର୍ଷ 100 ଏମବିବିଏସ୍ ଛାତ୍ରଛାତ୍ରୀଙ୍କୁ ପାଠପଢ଼ାର ସୁବିଧା ଥିବା ମେଡିକାଲ କଲେଜ, ପ୍ରତିବର୍ଷ 60 ଜଣ ବିଏସସି ଛାତ୍ରଛାତ୍ରୀ (ନର୍ସିଂ)କୁ ନେବା ପାଇଁ ନର୍ସିଂ କଲେଜ, ଆବାସିକ ପରିସର ଓ ଅନ୍ୟାନ୍ୟ ସୁବିଧା/ସେବା, ନୂଆଦିଲ୍ଲୀର ଏମ୍ସ ଶୈଳୀରେ ରହିବ । ଏହି ହସ୍ପିଟାଲରେ 22 ଟି ସ୍ପେଶାଲିଷ୍ଟ/ସୁପର ସ୍ପେଶାଲିଷ୍ଟ ବିଭାଗ ସମେତ 16 ଟି ଅପରେସନ୍ ଥିଏଟର ରହିବ । ପାରମ୍ପରିକ ମେଡିସିନ୍ ବ୍ୟବସ୍ଥାରେ ଚିକିତ୍ସା ସୁବିଧା ଦେବା ପାଇଁ 30 ଟି ବେଡର ଆୟୁଷ ବିଭାଗ ମଧ୍ୟ ରହିବ । ଏହି ନୂଆ ଏମ୍ସ ସ୍ଥାପନ ମାଧ୍ୟମରେ ଦୁଇଟି ଉଦ୍ଦେଶ୍ୟ ସାଧିତ ହେବ । ଲୋକଙ୍କୁ ସୁପର ସ୍ପେଶାଲିଷ୍ଟ ସ୍ୱାସ୍ଥ୍ୟ ସେବା, ଏହି ଅଂଚଳରେ ବହୁ ସଂଖ୍ୟାରେ ଡାକ୍ତର ଓ ଅନ୍ୟ ସ୍ୱାସ୍ଥ୍ୟକର୍ମୀ ସୃଷ୍ଟି ହେବେ । ଯେଉଁମାନେ କି ଜାତୀୟ ସ୍ୱାସ୍ଥ୍ୟ ମିଶନ ଅଧୀନରେ ପ୍ରାଥମିକ ଓ ମାଧ୍ୟମିକ ସ୍ତରର ପ୍ରତିଷ୍ଠାନ ପାଇଁ ଉପଲବ୍ଧ ହେବେ । ସୂଚନାଯୋଗ୍ୟ ପ୍ରଧାନମନ୍ତ୍ରୀ ସ୍ୱାସ୍ଥ୍ୟ ସୁରକ୍ଷା ଯୋଜନାରେ ଭୁବନେଶ୍ୱର, ଭୋପାଳ, ରାୟପୁର, ଯୋଧପୁର, ଋଷିକେଶ ଓ ପାଟନାରେ ଏମ୍ସ ନିର୍ମିତ ହୋଇଥିବାବେଳେ ରାଏବରେଲି ଏମ୍ସ କାର୍ଯ୍ୟ ଜାରି ରହିଛି । ସେହିପରି 2015 ରେ ନାଗପୁର, କଲ୍ୟାଣୀ (ପଶ୍ଚିମବଙ୍ଗ) ଓ ମଙ୍ଗଳାଗିରି (ଆନ୍ଧ୍ରପ୍ରଦେଶ)ରେ ଗୋଟିଏ ଲେଖାଏ ଏମ୍ସ ଏବଂ 2016 ରେ ଭଟିଣ୍ଡା ଓ ଗୋରଖପୁରେ ଏମ୍ସ ସ୍ଥାପନକୁ ମଞ୍ଜୁରି ମିଳିଛି ।

****