પીએમઇન્ડિયા

ભારત માતા કી જય!

ભારત માતા કી જય!

ભારત માતા કી જય!

દુનિયાએ હમણાં જ આ જયઘોષની શક્તિ જોઈ છે. ભારત માતા કી જય, આ ફક્ત એક જયઘોષ નથી, તે દેશના દરેક સૈનિકની શપથ છે. જે ભારત માતાના સન્માન અને ગરિમા માટે પોતાનો જીવ જોખમમાં મૂકે છે. આ દેશના દરેક નાગરિકનો અવાજ છે. જે દેશ માટે જીવવા માંગે છે અને તેના માટે કંઈક પ્રાપ્ત કરવા માંગે છે. ભારત માતા કી જય, ક્ષેત્રમાં અને મિશનમાં પણ ગુંજતો રહે છે. જ્યારે ભારતીય સૈનિકો જય મા ભારતીના નારા લગાવે છે, ત્યારે દુશ્મનનું હૃદય ધ્રૂજી જાય છે. જ્યારે આપણા ડ્રોન દુશ્મનના કિલ્લાની દિવાલોનો નાશ કરે છે, જ્યારે આપણા મિસાઇલો તીક્ષ્ણ અવાજ સાથે લક્ષ્ય સુધી પહોંચે છે, ત્યારે દુશ્મન સાંભળે છે – ભારત માતા કી જય! જ્યારે આપણે રાતના અંધારામાં પણ સૂર્ય ઉગાવીએ છીએ, ત્યારે દુશ્મન જોઈ શકે છે – ભારત માતા કી જય! જ્યારે આપણા દળો પરમાણુ બ્લેકમેલના ખતરાને નિષ્ફળ બનાવે છે, ત્યારે આકાશથી જમીન સુધી ફક્ત એક જ વાત ગુંજતી રહે છે – ભારત માતા કી જય!

મિત્રો,

ખરેખર, તમે બધાએ લાખો ભારતીયોને ગૌરવ અપાવ્યું છે; તમે દરેક ભારતીયને ગર્વની લાગણી અપાવી છે. તમે ઇતિહાસ રચ્યો છે. અને હું આજે વહેલી સવારે તમારી વચ્ચે તમને મળવા આવ્યો છું. જ્યારે વીરોના પગ ધરતીને સ્પર્શે છે, ત્યારે ધરતી ધન્ય બની જાય છે, જ્યારે વીરોને જોવાની તક મળે છે, ત્યારે જીવન ધન્ય બની જાય છે. અને એટલે જ હું આજે વહેલી સવારે તમને મળવા આવ્યો છું. ઘણા દાયકાઓ પછી પણ, જ્યારે ભારતની આ વીરતાની ચર્ચા થશે, ત્યારે તમે અને તમારા સાથીઓ તેનો સૌથી અગ્રણી પ્રકરણ હશો. તમે બધા દેશની વર્તમાન અને ભાવિ પેઢીઓ માટે એક નવી પ્રેરણા બન્યા છો. આજે, વીરોની આ ભૂમિ પરથી, હું વાયુસેના, નૌકાદળ અને સેનાના બધા બહાદુર સૈનિકો અને બીએસએફના આપણા નાયકોને સલામ કરું છું. તમારી બહાદુરીને કારણે, આજે ઓપરેશન સિંદૂરનો પડઘો દરેક ખૂણામાં સંભળાઈ રહ્યો છે. આ સમગ્ર ઓપરેશન દરમિયાન દરેક ભારતીય તમારી સાથે ઉભો રહ્યો, દરેક ભારતીયની પ્રાર્થનાઓ તમારી સાથે હતી. આજે દેશનો દરેક નાગરિક તેના સૈનિકો અને તેમના પરિવારોનો આભારી અને ઋણી છે.

મિત્રો,

ઓપરેશન સિંદૂર એ કોઈ સામાન્ય લશ્કરી કાર્યવાહી નથી. આ ભારતની નીતિ, ઇરાદા અને નિર્ણય લેવાની ક્ષમતાનો સંગમ છે. ભારત બુદ્ધની ભૂમિ છે અને ગુરુ ગોવિંદસિંહજીની પણ ભૂમિ છે. ગુરુ ગોવિંદસિંહજીએ કહ્યું હતું – “સવા લાખ સે એક લડાઉ, ચીડિયા સે મૈં બાજ ઉડાઉ, તબ ગોવિંદસિંહ નામ કહાઉ” દુષ્ટતાનો નાશ કરવા અને ન્યાયીપણાની સ્થાપના કરવા માટે શસ્ત્રો ઉપાડવાની આપણી પરંપરા છે. એટલા માટે જ્યારે આપણી બહેનો અને દીકરીઓના સિંદૂર ભૂંસાઈ ગયા, ત્યારે આપણે આતંકવાદીઓના ઘરમાં ઘૂસીને તેમના દાંત કચડી નાખ્યા. તેઓ કાયરની જેમ છુપાઈને આવ્યા હતા, પણ તેઓ ભૂલી ગયા કે તેમણે જેને પડકાર ફેંક્યો હતો તે ભારતીય સેના હતી. તમે સામેથી હુમલો કર્યો અને તેમને મારી નાખ્યા, તમે આતંકના બધા મોટા ઠેકાણાઓનો નાશ કર્યો, 9 આતંકવાદી ઠેકાણાઓનો નાશ થયો, 100થી વધુ આતંકવાદીઓ માર્યા ગયા, આતંકના આકાઓ હવે સમજી ગયા છે કે, ભારત તરફ નજર ઉંચકવાનું એક જ પરિણામ હશે – વિનાશ! ભારતમાં નિર્દોષ લોકોના લોહી વહેવડાવવાનું એક જ પરિણામ આવશે – વિનાશ અને મહાન વિનાશ! ભારતીય સેના, ભારતીય વાયુસેના અને ભારતીય નૌકાદળે પાકિસ્તાની સેનાને હરાવી દીધી છે. જેના પર આ આતંકવાદીઓ આધાર રાખતા હતા. તમે પાકિસ્તાની સેનાને પણ કહ્યું છે કે પાકિસ્તાનમાં એવી કોઈ જગ્યા નથી જ્યાં આતંકવાદીઓ બેસીને શાંતિથી શ્વાસ લઈ શકે. અમે તેમના ઘરોમાં ઘૂસીને તેમને મારી નાખીશું અને તેમને ભાગવાનો મોકો પણ નહીં આપીએ. અને આપણા ડ્રોન, આપણા મિસાઇલો, પાકિસ્તાન તેમના વિશે વિચારીને ઘણા દિવસો સુધી ઊંઘી શકશે નહીં. તેમણે કૌશલ દિખલાયા ચાલો મેં, ઉડ ગયા ભયાનક ભાલો મેં, નિર્ભિક ગયા વહ ઢાલો મેં, સરપટ દૌડા કરવાલો મેં. આ પંક્તિઓ મહારાણા પ્રતાપના પ્રખ્યાત ઘોડા ચેતક પર લખેલી છે, પરંતુ આ પંક્તિઓ આજના આધુનિક ભારતીય શસ્ત્રોમાં પણ બંધ બેસે છે.

મારા બહાદુર સાથીઓ,

ઓપરેશન સિંદૂર દ્વારા, તમે રાષ્ટ્રનું મનોબળ વધાર્યું છે, રાષ્ટ્રને એકતાના દોરમાં બાંધ્યું છે, અને તમે ભારતની સરહદોનું રક્ષણ કર્યું છે, ભારતના આત્મસન્માનને નવી ઊંચાઈઓ પર લઈ ગયા છો.

મિત્રો,

તમે કંઈક એવું કર્યું જે અભૂતપૂર્વ, અકલ્પનીય, અદ્ભુત છે. આપણી વાયુસેનાએ પાકિસ્તાનમાં ઘૂસીને આતંકવાદી ઠેકાણાઓને નિશાન બનાવ્યા છે. સરહદ પારના લક્ષ્યોને ભેદવું, ફક્ત 20-25 મિનિટમાં પિન-પોઇન્ટ લક્ષ્યોને ભેદવા એ આધુનિક ટેકનોલોજીથી સજ્જ એક વ્યાવસાયિક દળ જ કરી શકે છે. તમારી ગતિ અને ચોકસાઈ એટલી હદે હતી કે દુશ્મન સ્તબ્ધ થઈ ગયો. તેને ખ્યાલ પણ ન રહ્યો કે ક્યારે તેની છાતી વીંધાઈ ગઈ.

મિત્રો,

અમારો ઉદ્દેશ્ય પાકિસ્તાનની અંદર આવેલા આતંકવાદી મુખ્યાલય પર હુમલો કરીને આતંકવાદીઓને ઠાર કરવાનો હતો. પરંતુ હું કલ્પના કરી શકું છું કે પાકિસ્તાને પોતાના પેસેન્જર વિમાનોને આગળ રાખીને જે કાવતરું રચ્યું હતું, તે ક્ષણ કેટલી મુશ્કેલ હશે, જ્યારે નાગરિક વિમાન દેખાતું હતું, અને મને ગર્વ છે કે તમે ખૂબ જ કાળજીપૂર્વક, ખૂબ જ સાવધાનીપૂર્વક, નાગરિક વિમાનને કોઈ નુકસાન પહોંચાડ્યા વિના, તેનો નાશ કરીને તમારો જવાબ બતાવ્યો. હું ગર્વથી કહી શકું છું કે તમે બધાએ તમારા લક્ષ્યો સંપૂર્ણપણે પ્રાપ્ત કર્યા છે. પાકિસ્તાનમાં આતંકવાદીઓના ઠેકાણા અને તેમના એરબેઝનો નાશ થયો એટલું જ નહીં, પરંતુ તેમના દુષ્ટ ઇરાદા અને તેમની હિંમત બંનેનો નાશ થયો.

મિત્રો,

ઓપરેશન સિંદૂરથી હતાશ થયેલા દુશ્મને આ એરબેઝ તેમજ આપણા ઘણા એરબેઝ પર હુમલો કરવાનો ઘણી વખત પ્રયાસ કર્યો. તેણે વારંવાર અમને નિશાન બનાવ્યા, પરંતુ પાકિસ્તાનના દુષ્ટ ઇરાદા દર વખતે નિષ્ફળ ગયા. પાકિસ્તાનના ડ્રોન, તેના યુએવી, પાકિસ્તાનના વિમાન અને તેના મિસાઇલો, બધાને આપણા મજબૂત હવાઈ સંરક્ષણ દ્વારા નષ્ટ કરવામાં આવ્યા. હું દેશના તમામ એરબેઝના નેતૃત્વની, ભારતીય વાયુસેનાના દરેક વાયુ યોદ્ધાની હૃદયપૂર્વક પ્રશંસા કરું છું, તમે ખરેખર ખૂબ જ સારું કામ કર્યું છે.

મિત્રો,

આતંકવાદ સામે ભારતની લક્ષ્મણ રેખા હવે એકદમ સ્પષ્ટ છે. હવે જો ફરીથી કોઈ આતંકવાદી હુમલો થશે તો ભારત જવાબ આપશે, તે ચોક્કસ જવાબ આપશે. આપણે સર્જિકલ સ્ટ્રાઈક દરમિયાન, હવાઈ હુમલા દરમિયાન આ જોયું છે, અને હવે ઓપરેશન સિંદૂર ભારતનું ન્યૂ નોર્મલ છે. અને જેમ મેં ગઈકાલે પણ કહ્યું હતું તેમ, ભારતે હવે ત્રણ સિદ્ધાંતો પર નિર્ણય લીધો છે, પ્રથમ – જો ભારત પર આતંકવાદી હુમલો થશે, તો અમે અમારી રીતે, અમારી શરતો પર અને અમારા પોતાના સમયે જવાબ આપીશું. બીજું – ભારત કોઈપણ પરમાણુ બ્લેકમેલ સહન કરશે નહીં. ત્રીજું, આપણે આતંકવાદને સમર્થન આપતી સરકાર અને આતંકવાદના આકાઓને અલગ અલગ સંસ્થાઓ તરીકે નહીં જોઈએ. દુનિયા પણ ભારતના આ નવા સ્વરૂપને, આ નવી વ્યવસ્થાને સમજીને આગળ વધી રહી છે.

મિત્રો,

ઓપરેશન સિંદૂરની દરેક ક્ષણ ભારતીય સશસ્ત્ર દળોની તાકાતનો પુરાવો આપે છે. આ સમયગાળા દરમિયાન, આપણા દળો વચ્ચેનું સંકલન, મારે કહેવું જ જોઇએ, ઉત્તમ હતું. આર્મી હોય, નેવી હોય કે એરફોર્સ, બધા વચ્ચે સંકલન જબરદસ્ત હતું. નૌકાદળે સમુદ્ર પર પોતાનું વર્ચસ્વ સ્થાપિત કર્યું. સેનાએ સરહદ મજબૂત બનાવી. અને ભારતીય વાયુસેનાએ હુમલો અને બચાવ બંને કર્યા. બીએસએફ અને અન્ય દળોએ પણ અદ્ભુત ક્ષમતાઓનું પ્રદર્શન કર્યું છે. સંકલિત હવાઈ અને જમીન લડાઇ પ્રણાલીઓએ અદ્ભુત કામ કર્યું છે. અને આ જ છે, એકતા, આ હવે ભારતીય દળોની તાકાતની એક મજબૂત ઓળખ બની ગઈ છે.

મિત્રો,

ઓપરેશન સિંદૂરમાં, માનવબળ અને મશીનો વચ્ચેનું સંકલન પણ અદ્ભુત રહ્યું છે. ભારતની પરંપરાગત હવાઈ સંરક્ષણ પ્રણાલીઓ હોય, જેણે ઘણી લડાઈઓ જોઈ છે, કે પછી આકાશ જેવા આપણા મેડ ઇન ઈન્ડિયા પ્લેટફોર્મ હોય, તેમને S-400 જેવી આધુનિક અને શક્તિશાળી સંરક્ષણ પ્રણાલીઓ દ્વારા અભૂતપૂર્વ તાકાત આપવામાં આવી છે. એક મજબૂત સુરક્ષા કવચ ભારતની ઓળખ બની ગઈ છે. પાકિસ્તાનના તમામ પ્રયાસો છતાં, આપણા એરબેઝ કે આપણા અન્ય સંરક્ષણ માળખાને કોઈ અસર થઈ નથી. અને આનો શ્રેય તમારા બધાને જાય છે, અને મને તમારા બધા પર ગર્વ છે, આ શ્રેય સરહદ પર તૈનાત દરેક સૈનિકને જાય છે, આ કામગીરી સાથે સંકળાયેલા દરેક વ્યક્તિને જાય છે.

મિત્રો,

આજે આપણી પાસે નવી અને અદ્યતન ટેકનોલોજીની એટલી ક્ષમતા છે કે પાકિસ્તાન તેની સાથે સ્પર્ધા કરી શકે તેમ નથી. છેલ્લા દાયકામાં, વાયુસેના સહિત આપણા બધા દળો પાસે વિશ્વની શ્રેષ્ઠ ટેકનોલોજીની પહોંચ છે. પરંતુ આપણે બધા જાણીએ છીએ કે નવી ટેકનોલોજી સાથે, પડકારો પણ મોટા થાય છે. જટિલ અને અત્યાધુનિક સિસ્ટમો જાળવવી, તેમને કાર્યક્ષમતાથી ચલાવવી, એ એક મહાન કૌશલ્ય છે. તમે ટેકનોલોજીને યુક્તિઓ સાથે જોડીને બતાવ્યું છે. તમે સાબિત કર્યું છે કે તમે આ રમતમાં, દુનિયામાં શ્રેષ્ઠ છો. ભારતીય વાયુસેના હવે માત્ર શસ્ત્રોથી જ નહીં પરંતુ ડેટા અને ડ્રોનથી પણ દુશ્મનને હરાવવામાં માહિર બની ગઈ છે.

મિત્રો,

પાકિસ્તાનની અપીલ પછી, ભારતે ફક્ત તેની લશ્કરી કાર્યવાહી મુલતવી રાખી છે. જો, પાકિસ્તાન ફરીથી આતંકવાદી પ્રવૃત્તિ અથવા લશ્કરી સાહસનો આશરો લેશે, તો અમે યોગ્ય જવાબ આપીશું. તેઓ આ પ્રશ્નનો જવાબ પોતાની રીતે, પોતાની શરતો પર આપશે. અને આ નિર્ણયનો પાયો, તેની પાછળ છુપાયેલો આત્મવિશ્વાસ, તમારા બધાના ધૈર્ય, હિંમત, બહાદુરી અને સતર્કતા પર આધારિત છે. તમારે આ હિંમત, આ જુસ્સો, આ ઉત્સાહ આમ જ જાળવી રાખવો પડશે. આપણે સતત સજાગ રહેવું પડશે, તૈયાર રહેવું પડશે. આપણે દુશ્મનને યાદ અપાવતા રહેવું પડશે કે આ એક નવું ભારત છે. આ ભારત શાંતિ ઇચ્છે છે, પરંતુ જો માનવતા પર હુમલો થાય છે, તો આ ભારત યુદ્ધના મોરચે દુશ્મનનો નાશ કેવી રીતે કરવો તે પણ સારી રીતે જાણે છે. આ સંકલ્પ સાથે, ચાલો ફરી એકવાર કહીએ-

ભારત માતા કી જય. ભારત માતા કી જય.

ભારત માતા કી જય.

વંદે માતરમ. વંદે માતરમ.

વંદે માતરમ. વંદે માતરમ.

વંદે માતરમ. વંદે માતરમ.

વંદે માતરમ. વંદે માતરમ.

વંદે માતરમ.

ખૂબ ખૂબ આભાર.

AP/IJ/GP/JD