પીએમઇન્ડિયા

પ્રધાનમંત્રી શ્રી નરેન્દ્ર મોદી 28 માર્ચ 2026 ના રોજ ઉત્તર પ્રદેશની મુલાકાત લેશે. સવારે અંદાજે 11:30 વાગ્યે, તેઓ જેવર, ગૌતમ બુદ્ધ નગર ખાતે નોઈડા ઈન્ટરનેશનલ એરપોર્ટના ટર્મિનલ બિલ્ડિંગનું નિરીક્ષણ (walkthrough) કરશે. ત્યારબાદ, બપોરે અંદાજે 12 વાગ્યે, પ્રધાનમંત્રી નોઈડા ઈન્ટરનેશનલ એરપોર્ટના ફેઝ-I નું ઉદ્ઘાટન કરશે અને આ પ્રસંગે જાહેર જનતાને સંબોધિત કરશે.

નોઈડા ઈન્ટરનેશનલ એરપોર્ટનું ઉદ્ઘાટન ભારતની વૈશ્વિક એવિએશન હબ બનવાની દિશામાં એક મહત્વપૂર્ણ સીમાચિહ્નરૂપ છે. નેશનલ કેપિટલ રીજન (NCR) માટે એક મુખ્ય આંતરરાષ્ટ્રીય ગેટવે તરીકે કલ્પના કરવામાં આવેલ આ એરપોર્ટ, દેશના એરપોર્ટ ઈન્ફ્રાસ્ટ્રક્ચરને મજબૂત કરવા અને પ્રાદેશિક તથા આંતરરાષ્ટ્રીય કનેક્ટિવિટી વધારવા માટેનું એક મોટું પગલું છે. નોઈડા ઈન્ટરનેશનલ એરપોર્ટને દિલ્હી NCR ક્ષેત્ર માટે બીજા આંતરરાષ્ટ્રીય એરપોર્ટ તરીકે વિકસાવવામાં આવ્યું છે, જે ઈન્દિરા ગાંધી ઈન્ટરનેશનલ એરપોર્ટનું પૂરક બનશે. બંને એરપોર્ટ સાથે મળીને એક સંકલિત એવિએશન સિસ્ટમ તરીકે કામ કરશે, જે ભીડ ઘટાડશે, મુસાફરોની ક્ષમતામાં વધારો કરશે અને દિલ્હી NCR ને અગ્રણી વૈશ્વિક એવિએશન હબમાં સ્થાન આપશે.

નોઈડા ઈન્ટરનેશનલ એરપોર્ટ ભારતના સૌથી મોટા ગ્રીનફિલ્ડ એરપોર્ટ પ્રોજેક્ટ્સમાંનું એક છે. નોઈડા ઈન્ટરનેશનલ એરપોર્ટનો ફેઝ-I પબ્લિક-પ્રાઈવેટ પાર્ટનરશિપ (PPP) મોડલ હેઠળ અંદાજે ₹11,200 કરોડના કુલ રોકાણ સાથે વિકસાવવામાં આવ્યો છે. એરપોર્ટની શરૂઆતમાં વાર્ષિક 12 મિલિયન મુસાફરો (MPPA) ની ક્ષમતા હશે, જે સંપૂર્ણ વિકાસ બાદ 70 MPPA સુધી વધારી શકાય છે. તેમાં 3,900-મીટરનો રનવે છે જે વાઈડ-બોડી એરક્રાફ્ટને હેન્ડલ કરવા માટે સક્ષમ છે, સાથે ઇન્સ્ટ્રુમેન્ટ લેન્ડિંગ સિસ્ટમ (ILS) સહિત આધુનિક નેવિગેશન સિસ્ટમ્સ અને કાર્યક્ષમ, તમામ હવામાનમાં ચોવીસ કલાક કામગીરીને ટેકો આપવા માટે અદ્યતન એરફિલ્ડ લાઇટિંગ છે.

એરપોર્ટમાં મજબૂત કાર્ગો ઇકોસિસ્ટમનો પણ સમાવેશ થાય છે, જેમાં સંકલિત કાર્ગો ટર્મિનલ અને લોજિસ્ટિક્સ ઝોન ધરાવતું મલ્ટી-મોડલ કાર્ગો હબ છે. કાર્ગો સુવિધા વાર્ષિક 2.5 લાખ મેટ્રિક ટનથી વધુ હેન્ડલ કરવા માટે ડિઝાઇન કરવામાં આવી છે, જે અંદાજે 18 લાખ મેટ્રિક ટન સુધી વિસ્તૃત કરી શકાય છે, અને તેમાં સમર્પિત 40-એકર મેન્ટેનન્સ, રિપેર અને ઓવરહોલ (MRO) સુવિધાનો સમાવેશ થાય છે.

ટકાઉ અને ભવિષ્ય માટે તૈયાર ઈન્ફ્રાસ્ટ્રક્ચર પ્રોજેક્ટ તરીકે ડિઝાઈન કરાયેલ, નોઈડા ઈન્ટરનેશનલ એરપોર્ટ નેટ-ઝીરો એમિશન (શૂન્ય ઉત્સર્જન) સુવિધા તરીકે કાર્ય કરવાનું લક્ષ્ય રાખે છે, જે ઊર્જા-કાર્યક્ષમ પ્રણાલીઓ અને પર્યાવરણને અનુકૂળ પદ્ધતિઓને એકીકૃત કરે છે. તેની સ્થાપત્ય રચના ભારતીય વારસામાંથી પ્રેરણા લે છે, જેમાં પરંપરાગત ઘાટ અને હવેલીઓની યાદ અપાવતા તત્વોનો સમાવેશ થાય છે, જેનાથી સાંસ્કૃતિક સૌંદર્યશાસ્ત્ર અને આધુનિક ઈન્ફ્રાસ્ટ્રક્ચરનું મિશ્રણ થાય છે.

યમુના એક્સપ્રેસ વે પર વ્યૂહાત્મક રીતે સ્થિત, નોઈડા ઈન્ટરનેશનલ એરપોર્ટને રોડ, રેલવે, મેટ્રો અને પ્રાદેશિક પરિવહન પ્રણાલીઓ સાથે સીમલેસ એકીકરણ સાથે મલ્ટી-મોડલ ટ્રાન્સપોર્ટ હબ તરીકે આયોજિત કરવામાં આવ્યું છે, જે મુસાફરો અને કાર્ગો માટે કાર્યક્ષમ કનેક્ટિવિટી સુનિશ્ચિત કરે છે.

SM/BS/GP

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964@gmail.com