ಪಿಎಂಇಂಡಿಯಾ

ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರ ಅಧ್ಯಕ್ಷತೆಯಲ್ಲಿಂದು ನಡೆದ ಕೇಂದ್ರ ಸಚಿವ ಸಂಪುಟವು, 2039-40ನೇ ಹಣಕಾಸು ವರ್ಷದವರೆಗೆ 10 ಸಾವಿರ ಕೋಟಿ ರೂ.ಗಳ ಬಜೆಟ್ ವೆಚ್ಚದೊಂದಿಗೆ ‘ಕಂಟೈನರ್ ಉತ್ಪಾದನಾ ಪ್ರೋತ್ಸಾಹಕ ಯೋಜನೆ’ (ಸಿಎಂಪಿಎಸ್)ಗೆ ಅನುಮೋದನೆ ನೀಡಿದೆ. ಈ ಯೋಜನೆಯು ಭಾರತದಲ್ಲಿ ಜಾಗತಿಕ ಮಟ್ಟದಲ್ಲಿ ಸ್ಪರ್ಧಾತ್ಮಕವಾದ ಕಂಟೈನರ್ ಉತ್ಪಾದನಾ ಪೂರಕ ವ್ಯವಸ್ಥೆಯನ್ನು ಸ್ಥಾಪಿಸುವುದು, ಆಮದು ಮೇಲಿನ ಅವಲಂಬನೆ ತಗ್ಗಿಸುವ ಮತ್ತು ಪೂರೈಕೆ ಸರಣಿಯ ಸ್ಥಿತಿಸ್ಥಾಪಕತ್ವ ಬಲವರ್ಧನೆಗೊಳಿಸುವ ಗುರಿ ಹೊಂದಿದೆ. ಈ ಯೋಜನೆಯು ಹೊಸ ಉತ್ಪಾದನಾ ಘಟಕಗಳ ಸ್ಥಾಪನೆಗೆ ಹಾಗೂ ಹಾಲಿ ಇರುವ ಕಂಟೈನರ್ ಉತ್ಪಾದನಾ ಘಟಕಗಳ ವಿಸ್ತರಣೆಗೆ ಬೆಂಬಲ ನೀಡುವ ಉದ್ದೇಶ ಹೊಂದಿದೆ.

2026-27ರ ಕೇಂದ್ರ ಬಜೆಟ್‌ನಲ್ಲಿ ಕಂಟೈನರ್ ಉತ್ಪಾದನಾ ಯೋಜನೆಯನ್ನು  ಘೋಷಿಸಲಾಗಿತ್ತು.

ಈ ಯೋಜನೆಯು ಈ ಕೆಳಗಿನ ಪ್ರಮುಖ ಅಂಶಗಳನ್ನು ಒಳಗೊಂಡಿದೆ:

1. ಬಡ್ಡಿ ಸಬ್ಸಿಡಿ ನೆರವು: 859 ಕೋಟಿ ರೂ.ಗಳ ಆರ್ಥಿಕ ವೆಚ್ಚದಲ್ಲಿ, ಕಂಟೈನರ್ ತಯಾರಕರು ಹೊಸ ಗ್ರೀನ್ ಫೀಲ್ಡ್ ಘಟಕಗಳನ್ನು ಸ್ಥಾಪಿಸಲು ಅಥವಾ ಹಾಲಿ ಇರುವ ಘಟಕಗಳನ್ನು ಬ್ರೌನ್ ಫೀಲ್ಡ್  ವಿಸ್ತರಣೆಗೆ ಮಾಡಲು ಅರ್ಹ ಸಾಲಗಳ (ಬಂಡವಾಳ ಸಾಲಗಳು) ಮೇಲೆ ವಾರ್ಷಿಕ ಶೇ. 3ರಷ್ಟು ಬಡ್ಡಿ ಸಬ್ಸಿಡಿಯನ್ನು ಒದಗಿಸುತ್ತದೆ.
2. ಕಾರ್ಯಾಚರಣಾ ವೆಚ್ಚ ನೆರವು: 8,891 ಕೋಟಿ ರೂ.ಗಳ ಆರ್ಥಿಕ ವೆಚ್ಚದಲ್ಲಿ, ಜಾಗತಿಕ ಶಿಪ್ಪಿಂಗ್ ಮಾನದಂಡಗಳ ಪ್ರಕಾರ ತಯಾರಿಸಲಾದ ಮತ್ತು ಅರ್ಹ ತಯಾರಕರಿಂದ ಮಾರಾಟ ಮಾಡಲಾದ ಕಂಟೈನರ್‌ಗಳಿಗೆ ಆರ್ಥಿಕ ನೆರವು ನೀಡಲಾಗುತ್ತದೆ. ಇದು ವೆಚ್ಚದ ಅಂತರ ತಗ್ಗಿಸಲು ಮತ್ತು ದೇಶೀಯವಾಗಿ ತಯಾರಿಸಿದ ಕಂಟೈನರ್‌ಗಳ ಸ್ಪರ್ಧಾತ್ಮಕತೆಯನ್ನು ಹೆಚ್ಚಿಸಲು ಸಹಾಯ ಮಾಡುತ್ತದೆ.
3. ಪರೀಕ್ಷೆ ಮತ್ತು ಪ್ರಮಾಣೀಕರಣ ನೆರವು: 150 ಕೋಟಿ ರೂ.ಗಳ ಆರ್ಥಿಕ ವೆಚ್ಚದಲ್ಲಿ, ‘ಡೈನಾಮಿಕ್ ಲಾಂಗಿಟ್ಯೂಡಿನಲ್ ಇಂಪ್ಯಾಕ್ಟ್ ಟೆಸ್ಟಿಂಗ್’ ನಂತಹ ಸಾಮಾನ್ಯ ಸೌಲಭ್ಯಗಳ ಸ್ಥಾಪನೆಗೆ ನೆರವು ನೀಡಲಾಗುವುದು.  ನೀಡಲಾಗುತ್ತದೆ.

ನಿರೀಕ್ಷಿತ ಒಟ್ಟಾರೆ ಪರಿಣಾಮಗಳು:

• ವಾರ್ಷಿಕ ದೇಶೀಯ ಕಂಟೈನರ್ ಉತ್ಪಾದನಾ ಸಾಮರ್ಥ್ಯವನ್ನು ಸುಮಾರು ಹತ್ತು ಪಟ್ಟು ಹೆಚ್ಚಿಸಿ, 7.5 ಲಕ್ಷ TEU (Twenty-foot Equivalent Units) ವರೆಗೆ ತಲುಪಿಸುವುದು.
• ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಸ್ಪರ್ಧಾತ್ಮಕವಾದ ಉತ್ಪಾದನಾ ನೆಲೆಯನ್ನು ಸೃಷ್ಟಿಸುವುದು; ಇದು ಭಾರತವನ್ನು ಗುಣಮಟ್ಟದ ಶಿಪ್ಪಿಂಗ್ ಕಂಟೈನರ್‌ಗಳ ಜಾಗತಿಕ ರಫ್ತು ತಾಣವನ್ನಾಗಿ ರೂಪಿಸುವ ಸಾಮರ್ಥ್ಯವನ್ನು ಹೊಂದಿದೆ.
• ಭಾರತದ ಸಾಗರ ಮತ್ತು ಲಾಜಿಸ್ಟಿಕ್ಸ್ ಪೂರೈಕೆ ಸರಣಿಗಳ ಸ್ಥಿತಿಸ್ಥಾಪಕತ್ವ ಬಲವರ್ಧನೆಗೊಳಿಸುವುದು.
• ಸುಮಾರು 3,000 ನೇರ ಉದ್ಯೋಗಗಳು ಮತ್ತು 50,000ಕ್ಕೂ ಅಧಿಕ ಪರೋಕ್ಷ ಉದ್ಯೋಗಗಳನ್ನು ಸೃಷ್ಟಿಸುವುದು. ಜೊತೆಗೆ, ಕಾರ್ನರ್ ಕ್ಯಾಸ್ಟಿಂಗ್‌ಗಳು, ವಿಶೇಷ ಉಕ್ಕು, ಮರದ ಚೌಕಟ್ಟುಗಳು ಮತ್ತು ಬಣ್ಣಗಳಂತಹ ಪೂರಕ ಕೈಗಾರಿಕೆಗಳಿಗೆ ನೆರವು ನೀಡಲಾಗುವುದು.

*****