ಪಿಎಂಇಂಡಿಯಾ

ಪ್ರಧಾನಮಂತ್ರಿ ಶ್ರೀ. ನರೇಂದ್ರ ಮೋದಿ ಅವರ ಅಧ್ಯಕ್ಷತೆಯಲ್ಲಿ ನಡೆದ ಕೇಂದ್ರ ಸಚಿವ ಸಂಪುಟ ಸಭೆಯು ಕೃಷಿ ಸಹಕಾರಕ್ಕಾಗಿ ಪ್ಯಾಲಸ್ತೀನ್ ನ ಕೃಷಿ ಸಚಿವಾಲಯ ಹಾಗೂ ಭಾರತದ ಕೃಷಿ ಮತ್ತು ರೈತರ ಕಲ್ಯಾಣ ಸಚಿವಾಲಯದ ನಡುವಿನ ತಿಳಿವಳಿಕೆ ಒಪ್ಪಂದಕ್ಕೆ ತನ್ನ ಪೂರ್ವಾನ್ವಯ ಅನುಮೋದನೆ ನೀಡಿದೆ.

ಈ ತಿಳಿವಳಿಕೆ ಒಪ್ಪಂದಕ್ಕೆ 2017ರ ಮೇ ನಲ್ಲಿ ಪ್ಯಾಲಸ್ತೀನ್ ನ ವಿದೇಶಾಂಗ ಸಚಿವರು ಭಾರತಕ್ಕೆ ಭೇಟಿ ನೀಡಿದ್ದ ಸಂದರ್ಭದಲ್ಲಿ ಅಂಕಿತ ಹಾಕಲಾಗಿತ್ತು.

ಈ ತಿಳಿವಳಿಕೆ ಒಪ್ಪಂದವು, ಪ್ಯಾಲಸ್ತೀನ್ ನ ಪಶುವೈದ್ಯ ಸೇವೆಗಳು ಮತ್ತು ಪ್ರಾಣಿಗಳ ಆರೋಗ್ಯ; ನೀರಾವರಿಯ ಸಾಮರ್ಥ್ಯ ಹೆಚ್ಚಳ ಮತ್ತು ಹವಾಮಾನ ಬದಲಾವಣೆ ಸೇರಿದಂತೆ ಕೃಷಿ ಮತ್ತು ಪಶುವೈದ್ಯಕೀಯ ಕ್ಷೇತ್ರದಲ್ಲಿನ ಸಂಶೋಧನೆಗೆ ಸಹಕಾರವನ್ನು ಒದಗಿಸುತ್ತದೆ. ಇದು ಸಸ್ಯ ಮತ್ತು ಮಣ್ಣಿನ ಫಲವತ್ತತೆ ಕ್ಷೇತ್ರ;ನೈರ್ಮಲ್ಯ ಮತ್ತು ಫೈಟೋಸ್ಯಾನಿಟರಿ ಕಾನೂನುಗಳು ಮತ್ತು ಸಸ್ಯ ಸಂರಕ್ಷಣೆ, ಪಶು ಸಂಗೋಪನೆ, ಆಧುನಿಕ ನೀರಾವರಿ ತಂತ್ರಜ್ಞಾನದಲ್ಲಿನ ಅನುಭವದ ವಿನಿಮಯ ಮತ್ತು ತರಬೇತಿ ಮತ್ತು ಸಾಮರ್ಥ್ಯವರ್ಧನೆ ಇತ್ಯಾದಿಯನ್ನೂ ಒಳಗೊಂಡ ಕ್ಷೇತ್ರಗಳಿಗೂ ವಿಸ್ತರಿಸುವುದು ಕೂಡ ಇದರ ವ್ಯಾಪ್ತಿಗೆ ಬರುತ್ತದೆ.

ಈ ತಿಳಿವಳಿಕೆ ಒಪ್ಪಂದದ ಅಡಿಯಲ್ಲಿ, ಎಂ.ಓ.ಯುನಲ್ಲಿ ಉಲ್ಲೇಖಿಸಲಾಗಿರುವ ಉದ್ದೇಶಗಳ ಸಾಧನೆ ಮತ್ತು ಕ್ರಿಯಾ ಯೋಜನೆಯ ಪ್ರಗತಿಯನ್ನು ತಿಳಿಯಲು ಕೃಷಿಯ ನಿಗಾ ಸಮಿತಿಯನ್ನು ಸ್ಥಾಪಿಸಲಾಗುತ್ತದೆ, ಇದು ಸಹಕಾರಕ್ಕಾಗಿ ಕಾರ್ಯಸೂಚಿಯನ್ನೂ ರೂಪಿಸುತ್ತದೆ.

****

AKT/VBA/SH