ভারতকী প্রধানমন্ত্রী

খুরুমজরি!

হন্দক, ঐ তিভি৯ ভারতভর্স অমুক নত্ত্রগা অনিরক য়েংখ্রে। চৎনবী ওইনা, অদোমগী মীৎয়েং অসি লালশিং অমসুং মিসাইলশিংদা থমখি অমসুং হৌজিক পাউশিং অদুনা পীক থল্লে। অচৌবা লৈবাকশিংনা তিভি৯ দা মচাক কয়া পীরকপা মাল্লি। অদুবু তশেংনা হায়রবদা, হৌজিক মালেমগী ওইরিবা ফিবম অসি মমাঙদা অমুক্ত থোকখিবা ওইদ্রি অমসুং য়াম্না শাথিরে। ফিবমশিং অসিগী মরক্ত, অনৌবা ৱাখল্লোনশিংগীদমক তিভি৯ নেতৱার্কনা মরুওইবা মফম অমা পীরে। মীফম অসিনা অদোম্না “ভারত অমসুং মালেম” হায়রিবা হিরম অসিদা খন্নরি। ঐনা অদোম থাগৎপা ফোঙদোকচরি, মীফম অসিদা ঐগী য়াইফ পাউজেল পীজরি অমসুং শরুক য়ারিবশিং তরাম্না ওকচরি।

মরুপশিং,

ঙসি, মালেম অসি মুক্নবনা থল্লিঙৈ, মালেম শীনবা থুংনা মুক্নবশিংগী চৈথেং ফংলিঙৈদা, “ভারত অমসুং মালেম” গী মরমদা ৱা ঙাংবা অসি য়াম্না চুনৈ। ঙসিগী ভারত অসি য়াংনা শেন-থুম চাউখৎলক্লিবা লৈবাক অমনি। ২০১৪ মমাঙগী ফিবমশিং থাদোক্লম্লগা, অনৌবা থাজবগা লোয়ননা ভারত য়াংনা চঙশিল্লি। হৌজিক ভারতনা খুদোংচাদবা থেংনদবা নত্তে অদুবু মখোয় মায়োক্নরি। হৌখিবা চহি ৫-৬ দা, লাইচৎ মতুংদা চহি কয়া মথং মথং খুদোংচাদবা কয়া মায়োক্নখি। ভারত অমসুং ভারতমচাশিং চাংয়েং তৌখিবদা চহি অমতা লৈখিদে। অদুবু, মীওই বিল্লিয়ন ১.৪ গী অপুনবা থবকশিংগী খুৎথাংদা, ভারতনা অৱাবশিং মায়োক্নখি অমসুং মাঙলোমদা চঙশিনখি। লালগী মতমশিং ফাওবদা, ভারতকী থৌশিল, লাল্লোং অমসুং মপাঙ্গল উবদা মালেম্না অঙকপা পোক্নখি। ঐখোয়গী হায়নবা অমা লৈরি: “মৈ ইক্লগা অশেংবা মশক খঙবা ঙম্মী”। ফেব্রুৱারি ২৮ দগী মালেমগী ওইনা অৱাবা মায়োক্নবা হৌরকপা মতমদা, চাউখৎনবা অমসুং থাজবগী অচেৎপা ফিরেপ অমগা লোয়ননা ভারত মখা তানা মাঙলোমদা চঙশিনখি। নুমিৎ ২৩ অসিদা, মরী শেমগৎপা, ৱারেপ লৌবা অমসুং অৱাবা থেংনবদা লৈবাক অসিগী তৌবা ঙম্বা ভারতনা উৎখ্রে।

মরুপশিং,

ঙসি, মালেম অসি কেম্প কয়া থোক্না খায়দোক্লে। ভারতনা মমাঙদা ওইখিদ্রিবা মওংদা মরী কয়া শেমগৎলে। গল্ফতগী হৌরগা মালেমগী নোংচুপ ফাওবা, গ্লোবেল সাউথতগী য়ুম্লোন্নরিবা লৈবাকশিং ফাওবা, ভারত লৈবাক খুদিংমক্না থাজবা লৈরিবা লৈবাক অমনি। মীওই খরনা হংখি, “ঐখোয় কনাগী মাইকৈদা লেপ্লিবগে?” ঐনা মখোয়দা পীখিবা পাউখুম অদু অচম্বনি: ঐখোয় ভারতকী মাইকৈদা লৈরি, ঐখোয় ভারতকী য়াইফনবা মাইকৈদা লেপ্ল, শান্তি অমসুং ৱারি শানবগী মাইকৈদা লৈরি।

মরুপশিং,

মালেমগী ওইনা সপ্লাই চেনশিং ফিবম শোকচিল্লকপা মতমদা, মখল কয়াগী অমসুং অৱাবা মায়োক্নবা ঙম্বা নমুনা অমা ভারতনা পুথোক্লে। মসি ইনর্জি, হার নত্ত্রগা তঙাইফদবা পোৎলমশিংগী ওইবা য়াই, লৈবাক অসিগী মীয়ামদা য়ারিবমখৈ অৱাবা পীদনবা ভারতনা মখা তানা থবকশিং পায়খৎলি।

মরুপশিং,

লৈবাক্কী থৌশিলনা রাজনিতিগী য়ুম্ফম ওইরকপা মতমদা, লৈবাক্কী তুংগী ফিবম অসি য়াম্না মরুওই। অদুবু লনাইগী খনবনা রাজনিতিদা মরুওইনা লৌবা মতমদা, মীয়াম্না লৈবাক্কীদমক খনবগী মহুত্ত মখোয় মশাগী তুংগী খনবা হৌরকই। ২০০৪ অমসুং ২০১০ গী মরক্ত করি থোকখিবগে হায়বা নিংশিংসি। কংগ্রেস সরকার মতমদা, পেত্রোল, দিজল অমসুং গ্যাসগী অৱাবা থেংনখি। মতম অদুদা কংগ্রেসনা লৈবাক্কী ৱাখিদে, অদুবু দল অসিনা মশাগী শক্তিগী ৱাখি। মখোয়না লুপা  করোর লাখ ১.৪ গী ওইল বোন্দশিং পীখি অমসুং তুংগী মীরোলশিংদা শেন্দোনগী অচৌবা পোৎলুম অমা পুহল্লে হায়না প্রধান মন্ত্রী মনমোহন সিংহ মশামক্না ফোঙদোকখি। থাউগী বোন্দগী ৱারেপ অসি অরানবনি হায়বা খঙলবা ফাওবদা, মখোয়গী শক্তি পায়নবা রিমোও কন্ত্রোলদা সরকার পায়রিবা মীওইশিংনা ৱারেপ অসি লৌখিবনি, মরমদি খুদক্ত শেন পীগদবা নত্তে ২০২০ গী মতুংদা পীগদবনি।

মরুপশিং,

হৌখিবা চহি ৫-৬ দা, কংগ্রেস সরকারনা পাংথোক্লম্বা পাপশিং চামথোক্নবা ঐখোয়গী সরকারনা থবক পায়খৎলে অমসুং মসি চামথোকপদা চঙবা শেনফম অপীকপা নত্তে। অদোম্না অসিগুম্বা চামথোকপগী থবক মমাঙদা উখিদ্রি। লুপা করোর লাখ ১.৪৮ গী মহুত্ত, শেন্দোয় য়াওনা লৈবাক অসিনা লুপা করোর লাখ ৩ হেন্না পীবা তাখি। ঐখোয় নমদুনা শেনফমগী শরুক অনি পীখি। হৌজিক, কংগ্রেসকী লুচিংবশিংনা ৱারোলশিংগী মিসাইল কাপতুনা লৈরি-মিসাইলশিংনা তি.ভি৯ হরাওহল্লে-অবুদু হিরম অসি পুথোক্লকপা মতমদা, মখোয় ৱা ঙাংখিদ্রে।

মরুপশিং,

নোংচুপ এসিয়াগী মতাংদা ঙসি লোক সভাদা ঐ ৱা ঙাংখ্রে। মালেমগী ওইনা থোকপা ওইরবসু, মখোয় ভারতকী ঙমখৈশিংদগী য়াম্লা লাপ্পী। ঙসিগী অমগা অমগা শম্নবা থবকশিং অসিদা, লালগী চৈথেং ফংদবা লৈবাক অমতা লৈতে। লৈবাক কয়াদা ফিবম অসি য়াম্না শোকচিল্লে। ফিবমশিং অসিদা, মীওই খর, দল খর, রাজনিতিগী খুদোংচাবা লৌনবা, অৱাবা মতম অসিদা হৌজিক ফাওবা খুদোংচাবা থিরি। মরম অদুনা ঐনা তিভি৯গী ফম্বাক অসিদগী অমুক হন্না হায়রি: হৌজিক অৱাবা খাংবা মতমনি। লাইচৎ মনুংদা মীয়াম অমতা ওইনা অৱাবা অমা মায়োক্নবা ঐখোয়না উখ্রে, মদুগী ফলশিং য়াম্না কান্নবা ওইখি। মদুগী ৱাখল্লোনগা লোয়ননা, লাল অসিনা থোকহল্লিবা অৱাবা ঐখোয় মায়োক্নগদবনি।

মরুপশিং,

মালেমগী অৱাবা মরক্ত, ভারতনা লৈবাক অসিগী চাউখৎপগী খোঙজেল ফজবা থম্লি। ফেব্রুৱারি ২৮ দগী লাল হেক হৌরকপদগী হৌখিবা নুমিৎ ২৩ গী মতাংদা করিগুম্ব ঐনা অদোমদা ফোঙদোক্লবদি, লৈবাক শীনবা থুংনা লুপা করোর লিশিং কয়াগী চাউখৎ-থৌরাংগী প্রোজেকশিং হৌদোকখ্রে। দিল্লি মেত্রো রেলগী মরুওইবা কোরিদোরশিং শঙ্গাখ্রে, শিলচর হায়-স্পিৎ কোরিদোরগী উরেপ-উয়ুং তমখ্রে, কোতাদা অনৌবা এয়রপোর্ত অমগী উরেপ-উয়ুং তমখ্রে, মদুরাই এয়রপোর্ত ইন্তরনেসনেল ওইহনখ্রে-শুপ্নগী নুমিৎ ২৩ দা অসিগুম্বা থবক কয়া পাংথোকখ্রে। হৌখিবা থা খক্তদা, উদ্যোগ চাউখৎপা য়াংশিন্নবা অচৌবা স্কিম অমা অয়াবা পীখ্রে, মসিগী মখাদা লৈবাক শীনবা থুংনা প্লগ-এন্দ-প্লে ইন্দষ্ট্রিএল পার্ক ১০০ শেমগৎকনি। লাক্লিবা চহিশিংদা মেগাৱাত ১৫০০ গী অনৌবা হায়দ্রো পৱার পুথোক্নবা স্মোল হায়দ্রো পৱার দিবলপমেন্ত স্কিম অয়াবা পীখ্রে। মতম অসিগী মনুংদা, জল জিবন মিসন ২০২৮ ফাওবা শাংদোক্লে। লৌমীশিংগী য়াইফনবা মরুওইবা ৱারেপ কয়া লৌখ্রে। হৌখিবা থাদা, পি.এম কিষান সম্মান নিধিগী মখাদা লৌমিশিংগী একাউন্তশিংদা হকথেংননা লুপা করোর ১৮,০০০ হেন্না ফংহনখ্রে। ঐখোয়গী এম.এস.এম,ইশিং অমসুং এক্সপোর্তরশিংগীদমক লুপা করোর ৫০০ রোমগী মতেং পাংনবা পেকেজ অমা লাউথোক্লে। বিকসিত ভারত অমা শেমগৎনবা কমদৌনা লৈবাক অসিনা য়াংনা থবক পায়খৎলিবগে হায়বা পায়খৎলিবা থবকশিংনা খুদম ওইরে।

মরুপশিং,

মালেমগী ওইনা অশীন-অরাং তৌবদা, পান্দম অমা লৈরি: “লৈরিবা ফিবম অদুদা, অশীন-অরাং তৌগদবনি”। অদুবু ঐনা অহেনবা ৱাখল হাপচিনবা পাম্মী: “লৈরিবা ফিবম অদুদা, ফগৎহনগদবনি, অওনবা পুরক্কদবনি”। করি ফিবমদা লৈরিবগে হায়বা য়েংশিনদ্রিঙৈদা ৱাখল তাহনগদবনি। নৈনবনা মরম চানা থবক পাংথোকপা ঙম্মী। য়াম্না মরুওইবনা, নৈনবনা থবকশিং পাংথোকপা ঙমহল্লি।

মরুপশিং,

করিগুম্বা অদোম্না ২০১৪ মমাঙগী চহি ১০-১১ নৈনরবদি অমসুং ২০১৪ মতুংগী চহি ১০-১১ নৈনরবদি, হিরম খুদিংমক্ত ভারত কমদৌনা অওনবা পুরক্লবগে হায়বা অদোম উবা ফংগনি। মমাঙদা, নোংমদা কিমি ১১-১২ রোমগী হায়ৱেশিং শেমগৎখি; ঙসিদি ভারতনা নোংমদা কিমি ৩০ রোমগী হায়ৱেশিং শেমগৎলে। মমাঙদা, হিথাংফমশিংদা জহাজশিংগী মতম নুমিৎ ৫-৬ লৌখি; ঙসিদি হায়রিবা থবক অদু নুমিৎ ২ চঙদনা পাংথোকপা ঙম্লে। মমাঙদা, ষ্টার্দঅপকী মরমদা খন্নখিদে। ২০১৪ গী মমাঙদা, ভারত্ত ষ্টার্দঅপ ৪০০-৫০০ খক্ত লৈরমখি। ঙসি ভারত্ত রেজিষ্টার তৌবা ষ্টার্দঅপ ২০০,০০০ হেন্না লৈরে। মমাঙদা মেদিকেল সিতশিং মশিং অকক্নবা লৈরমখি, এম.বি.বি.এস সিত লিশিং ৫০-৫৫ রোম লৈরমখি; ঙসিদি সিত ১২৫,০০০ হেন্না লৈরে। মমঙদা, মীওই কয়া বেঙ্কগী খুদোংচাবা ফংখিদে। লৈবাক অসিদা বেঙ্ক একাউন্ত মিল্লিয়ন ২৫০ খক লৈরমখি। জন ধন য়োজনাগী খুৎথাংদা, বেঙ্ক একাউন্ত মিল্লিয়ন ৫৫০ হেন্না হাংদোক্লে। মমাঙদা লৈবাক অসিদা এয়রপোর্ত ৭০ রোম লৈরমখি। ঙসিদি, এয়রপোর্ত ১৬০ হেন্না লৈরে।

মরুপশিং,

মমাঙদা, থৌরাংশিং শেমখি, অদুবু ঙসিগা খেন্নবনা ফলশিং উবা ফংলে। মমাঙদা খোঙজেল য়াম্না তপখি, ঙসিদি ভারত য়াংনা চৎলি। মমাঙদা ওইথোকপশিং উবা ফংখিদে, ঙসিদি ৱারেপশিং মাইপাকপশিংদা ওন্থোক্লে। মরম অসিদগী মসি অনৌবা ভারত অমনি হায়বগী পাউজেল মালেম্না ফংলে। লৈবাক অসি চাউখৎনবগীদমক থবক অমতা পায়খৎতনা তোক্লোই।

মরুপশিং,

ঙসিদি, মমাঙদা চাউখৎপগী থোং মান্নদবশিং খুদোংচাবশিং ওন্থোকপা অসি ঐখোয়গী থবক ওইরে। খুদম ওইনা, ভারতকী নোংপোক থংবা শরুক মিনরেলশিং মরাংকাইনা ফংলি, অদুবু মতম অদুগী সরকারশিংনা চহি কয়া মীরাইবদগী চাউখৎপা তপথহনখি। হৌজিক ফিবম অসি হোংলে। মতম অমদা নোংমৈ মখোল তারম্বা অসাম, হৌজিক সেমিকন্দক্তর য়ুনিত শেমগৎলি। উরিসাদা, সেমিকন্দক্তরশিংদগী হৌরগা পেত্রোকেমিকেলশিংগী অনৌবা হিরমশিং শেমগৎলি। বিহারদা, হৌখিবা চহি ৬০-৭০ দা গঙ্গ মথক্ত অচৌবা থোঙ অমা খক শাখি, হৌখিবা চহি ১০ দা অনৌবা থোঙ মঙা হেন্না শাখ্রে। মতম অমদা লৈবাক অসিদা শাবা পিষ্টোলশিংগী ৱারিশিংগী মমিং চৎখিবা উত্তর প্রদেস, ঙসিদি রাজ্য অসিদা মোবাইল শাবদা মালেমদা মমিং চৎলে।

মরুপশিং,

নোংপোক ভারতকী অতোপ্পা মরুওইবা রাজ্য অমদি নোংচুপ বেঙ্গলনি। মতম অমদা নোংচুপ বেঙ্গল ভারতকী নাৎ, লাইরিক-লাইশু, উদ্যোগ অমসুং ললোন-ইতিক্কী মফম অমা ওইরমখি। হৌখিবা চহি ১১ দা, কেন্দ্র সরকারনা নোংচুপ বেঙ্গল চাউখৎনবা শেন য়াম্না থাদখ্রে। লাইবক থিবদি, ঙসি রাজ্য অসিগী চাউখৎপা তপথহনবা তমথিরবা সরকার অমা লৈরি। সরকার অসিনা অয়ুস্মান স্কিম থিংদুনা তম্লিবা অদু বেঙ্গলদা তিভি৯ বাংলা য়েংলিবা ভাবকশিংনা খঙই। পি.এম সুর্য়া ঘর ফ্রি ইলেক্ত্রিসিতি স্কিম থিংজিল্লে। পি.এম অৱাস য়োজনা থিংজিল্লে। চা বাগানশিংগী শিন্মীশিংগী স্কিমশিং থিংজিল্লে। মীয়ামগী য়াইফনবা থবকশিং পায়খৎপগী মহুত্ত, সরকার অসিনা মখোয়গী রাজনিতিগী য়াইফনবা থবক পায়খৎতুনা লৈরে।

মরুপশিং,

লৈবাক অসিগা অসিগুম্বা মখলগী রাজনিতি হৌদোকখিবা দল অদু মসিগী পাপশিংদগী নান্থোকপা ঙম্লোই অমসুং দল অদুদি কংগ্রেসনি। কংগ্রেসকী রাজনিতিগী অমতা ঙাইরবা পান্দমদি চাউখৎপদা অপনবা পীবনি। ঐনা গুজরাত্ত লৈরিঙৈ মতমদগী হৌনা কংগ্রেসনা মসি পাংথোক্তুনা লাক্লি। গুজরাতকী মীয়াম্না চহি কয়া ঐখোয় থাগৎপা মতমদা, মীয়ামগী অপাম্বা অদু কংগ্রেসনা য়াখিদে। মখোয়না গুজরাতকী মতাংদা ৱাহং হংখি, রাজ্য অদুগী চাউখৎপা ফাজিনখি অমসুং কংগ্রেসনা রাজ্য খরদা ওপোজিসন্দা লৈরম্বা অদু লৈবাক শীনবা থুংবগী ওইরকখি।

মরুপশিং,

রাজনিতিদা ওপোজিসন্দা লৈরম্বদগী চাউখৎ-থৌরাংদা ওপোজিসন ওইরকপদগী, লৈবাক্কী মাইপাকপশিংদা মরৈ য়েৎপা হৌরকখি, মতম অদুদা সরকারগী ওপোজিসন খক ওইবতা নত্তনা- দল অসি লৈবাক্কী চাউখৎপদা নুংঙাইতবা ফাওবা ৱাখল অমা লৈখি। ঙসিদি কংগ্রেস ৱাখল্লোন অসিগী মীনাই অমা ওইরে। ঙসিদি লৈবাক অসিগী মাইপাকপা খুদিংমক ৱাহং হংলে অমসুং থবক খুদিংমক মাইথিনবা খনবগী ফিবম অমদা লৈরে। কোবিদ মনুংদা, লৈবাক অসিনা মশাগী তিকা পুথোকচবা মতমদা, মদু কংগ্রেসনা চিংনবা ফাওখি। মেক ইন ইন্দিয়া খন্নবা মতমদা, মসি মাইপাক্লোই হায়না মখোয়না হায়খি, মসি চেদা য়েকপা কৈ অমনি হায়না নোক্নখি। দিজিতেল ইন্দিয়া হৌদোকপা মতমদা, মখোয়না মসি নোক্নখি। ভারতকী লাইবক ফবদি খুদোংচাদবা খুদিংমক ভারতনা মাইপাকহনবা অদুনি। ঙসিদি, ভারত মালেমদা খ্বাইদগী চাউবা তিকা থাবগী থবক্কী খুদম অমা ওইরে। ভারতনা দিজিতেল পেমেন্তশিংগী মালেমগী লুচিংবা অমা ওইরে। মেনুফেকচরিং অমসুং ষ্টার্দঅপশিংদা ভারতনা অনৌবা থাকশিং য়ৌরে।

মরুপশিং,

গনতন্ত্র অমদা ওপোজিসন দরকার ওই। অদুবু ওপোজিসন অমসুং মীগী মাঙনবা শীনবগী মরক্ত খেন্নবা অমা লৈরি। সরকারগী থবকশিংদা য়েৎপা হায়বসি গনতন্ত্রগী হকনি। লৈবাক অসিগী মিংচৎ মাঙহনবা অসি কংগ্রেসকী করি ৱাখল লৈবগে হায়না ৱাহং হংলি। লৈবাক অসিগী মাইপাকপশিংদা নুংঙাইতবা ফাওবগী থাক্ত ওপোজিসন্না য়ৌরকপদা মসি রাজনিতি নত্তে, মসি খুদোংচাদবগী মীৎয়েং অমনি। মসি হন্দক ঐখোয়না গ্লোবেল এ.আই সম্মিৎতা উবা ফংলে। ভারত্ত মালেমগী মীয়াম তিনবা মতমদা, খোঙজং চঙশিন্নবা কংগ্রেস লুচিংবশিংনা মখোয়গী ফুরিৎ শেখায়খি। লৈবাক অসিগী ইকায়খুম্নবগী মতাংদা মখোয় করিসু খন্দে হায়বা মসিনা তাক্লে। মরম অদুনা ঙসি রাজনিতিগী খনবদগী লৈবাক্কী য়াইফনবা খনবনা হেন্না মরুওই হায়রিবা, মরম অদুনা রাজনিতিদগী লৈবাক অমসুং লৈবাক চাউখৎপনা হেন্না মরুওইরিবনি।

মরুপশিং,

ঙসিগী নুমিৎ অসি  মাইকৈ অসিদা ঐখোয়দা ইথিল পীবা নুমিৎ অমনি। নুমিৎ অসিদা, সহিদ ভগৎ সিংহ, সহিদ রাজগুরু অমসুং সহিদ সুখদেব লৈবাক্কীদমক থৱায় কৎখি। ঙসি শক্নাইরবা খুন্নাইগী অওনবা পুরকখিবা দোক্তর রাম মনোহর লোহিয়াগী মপোক কুমওন্নি। ইশাগী খনবগী মহুত্ত লৈবাক্কী খনবনা মতম পুম্নমক্ত মরুওইনা লৌনবা মখোয়না ইথিল পীরি। থবক খুদিংমক্কী মথক্ত লৈবাক্কী থবক্না হেন্না মরুওইনা লৌনবা ইথিল অসিনা বিকসিত ভারত অমা শেম্বা ঙমগনি। মসিগী ইথিল অসিনা ভারত অত্মনির্ভর ওইবা ঙমগনি। ভারতকী অত্মনির্ভর ওইবা অমসুং ভারত অমসুং ভারতমচাশিংদা মালেমদা থাজবা তিভি৯ মীফম অসিনা মখা তানা হেনগৎহনগনি হায়না ঐনা মপুংফানা থাজৈ। অদোমগী মফমদা ঐগী য়াইফ পাউজেল পীজরি অমসুং অদোমগী মরমদা শরুক য়ানবগী খুদোংচাবা পীবগীদমক ঐনা অদোম থাগৎপা ফোঙদোকচরি।

খুরুমজরি!

***