ভারতকী প্রধানমন্ত্রী

ওমানগী সুলতান হিস মজেস্তী সুলতান হাইথাম বিন তারিককী চেবাউদা, ভারতকী প্রধান মন্ত্রী শ্রী নরেন্দ্র মোদীনা ওমানগী সুলতানেত্‌তা ২০২৫গী দিসেম্বর ১৭-১৮ ফাওবা ওফিসিএল ওইবা খোঙচৎ অমা চৎখি। প্রধান মন্ত্রীবু দিফেন্স এফিয়র্সকীদমক দিপুতি প্রাইম মিনিস্তর, হিস হাইনেস সৈয়দ শিহাব বিন তারিকনা এয়রপোর্ত্তা তরাম্না ওকখি। মহাকপু দিসেম্বর ১৮, ২০২৫দা অল বারাকা পেলেসতা হিজ মজেস্তী সুলতান হাইথাম বিন তারিকনা মহাকপু তরাম্না ওকখি।

লৈবাক অনিগী মরক্তা লৈনরিবা দিপ্লোমেতিক মরী লিংখৎপগী চহি ৭০শুবা মপোক কুমওন্দা খোংচৎ অসিনা অখন্নবা মরুওইবা অমা থমগদৌরি। প্রধান মন্ত্রীগী খোঙচৎ অসি মহামহিম সুলতান হাইথাম বিন তারিকনা ২০২৩গী দিসেম্বরদা ভারত্তা চৎকদৌরিবা খোঙচৎ অদুগী মতুংদা লাকপনি।

মহামহিম সুলতান হাইথাম বিন তারিক অমসুং প্রধান মন্ত্রী শ্রী নরেন্দ্র মোদীনা ৱারী শানখি অমসুং ললোন-ইতিক, ইনভেস্তমেন্ত, ঙাকশেল, তেক্নোলোজী, এজুকেসন, ইনর্জী, স্পেস, এগ্রিকলচর, কলচর অমসুং মীয়ামগা মীয়ামগা লৈনরিবা মরীদা লৈবাক অনিগী মরী ফগৎলকপদা নুংঙাইবা ফোংদোকখি। ২০২৩গী দিসেম্বরদা ওমানগী সুলতানগী ভারত খোঙচৎ মনুংদা য়ানখিবা জোইন্ত ভিজন দোক্যুমেন্ততা মশক খঙদোক্লবা লমশিংদা হৌজিক পায়খৎলিবা খোঙথাংশিং অমসুং তেংবাং পীনবগী থবকশিং মখোয়না য়েংশিনখি। মেরিতাইম ওইবা য়ুম্লোন্নবশিং, ওমান অমসুং ভারত অনিগী মরক্তা লৈনরিবা মরী অসি মতমগী চাংয়েং অমা থেংনদুনা মল্তিফেসেতেদ স্ত্রেতেজিক পার্তনরশিপ অমদা ওন্থোকখ্রে হায়না নাকল অনিমক্না য়ানখি।

ভিজন ২০৪০গী মখাদা ওমাননা ইকোনোমিক দাইভর্সিফিকেসন অমসুং সস্তেনেবল দিবেলপমেন্ত ফংলকপদা ভারতনা থাগৎপা ফোংদোকখি। ওমানগী মায়কৈনা ভারতকী তুং কোইনা চৎথরিবা শেন্মিৎলোনগী খুমাং চাউশিল্লকপগীদমক অমসুং ২০৪৭ ফাওবদা বিক্সিত ভারত (চাউখৎলবা ভারত) ওইহন্নবা পান্দম থম্লিবা অসিগীদমক থাগৎপা ফোংদোকখি। নাকল অনিমক্না লৈবাক অনিমক্কী ভিজনশিংদা পাঙ্গল লৈ হায়না পনখি অমসুং ম্যুচেল ইন্তরেস্তকী লমশিংদা পুন্না থবক তৌমিন্ননবা য়ানখি।

লৈবাক অনিগী মরক্তা ত্রেদ অমসুং কম্মর্স অসি নাকল অনিগী ওইবা কোওপরেসনগী মরুওইবা য়ুম্বী অমা ওইরি হায়না নাকল অনিমক্না পনখি অমসুং নাকল অনিগী ওইবা ত্রেদতা মখা তানা চাউখৎপা অমসুং দাইভর্সিফিকেসনগী পোতেন্সিএলদা অকনবা ৱাফম থমখি। নাকল অনিমক্না তেক্সতাইল, ওতোমোবাইল, কেমিকেল, ইক্বিপমেন্ত অমসুং ফর্তিলাইজর য়াওনা হিরমশিংদা ললোন-ইতিক হেনগৎহন্নবগী অচৌবা পোতেন্সিএল লৈ হায়বা খঙখি।

নাকল অনিগী ওইবা ইকোনোমিক রিলেসনশিপকী মরুওইবা মাইলস্তোন অমা ওইরিবা ভারত-ওমান কম্প্রিহেন্সিব ইকোনোমিক পার্তনরশিপ এগ্রীমেন্ত (সি.ই.পি.এ.) সি.ই.পি.এ.না লৈবাক অনিমক্তা কান্নবা পীগনি হায়না লুচিংবা অনিমক্না য়ানখি অমসুং মখোয়না লৈবাক অনিমক্কী প্রাইবেৎ সেক্তরবু মসিগী এগ্রীমেন্ত অসিদগী কান্নবা লৌনবা পুক্নিং থৌগৎখি। লুচিংবা অনিনা সি.ই.পি.এ.না লৈবাক অনিগী মরক্তা ললোন-ইতিক্কী অথিংবা হন্থহন্দুনা অমসুং স্তেবল ওইবা ফ্রেমৱার্ক অমা শেমদুনা ললোন-ইতিক হেনগৎহনগনি হায়না য়ানখি। সি.ই.পি.এ.না শেন্মিৎলোনগী মরুওইবা সেক্তর পুম্নমক্তা খুদোংচাবশিং ফংহল্লগনি, শেন্মিৎলোনগী গ্রোথ হেনগৎহল্লগনি, থবক ফংহল্লগনি অমসুং লৈবাক অনিগী মরক্তা ইনবেস্তমেন্ত ফ্লো হেনগৎহল্লগনি হায়নসু মখোয়না পনখি।

ভারত অসি খোংজেল য়াংনা চাউখৎলক্লিবা শেন্মিৎলোনশিংগী মনুংদা অমা ওইরিবা অসি খঙলদুনা অমসুং ওমাননা শেন্মিৎলোনগী তোঙান-তোঙানবা মওংদা চাউখৎলক্লিবা অসি খঙলদুনা, নাকল অনিমক্না ইনফ্রাস্ত্রকচর, তেক্নোলোজী, মেন্যুফেকচরিং, ফুদ সেক্যুরিতী, লোজিস্তিক্স, হোস্পিতালিতী অমসুং অতোপ্পা মরুওইবা সেক্তরশিংদা ইনভেস্তমেন্তকী খুদোংচাবশিং থিজিনবদা অপেনবা ফোংদোকখি। ওমান-ইন্দিয়া জোইন্ত ইনভেস্তমেন্ত ফন্দ (ও.আই.জে.আই.এফ.) গী মায় পাক্লবা ত্রেক রেকোর্দ য়েংলগা ইনভেস্তমেন্তশিং প্রমোৎ অমসুং ফেসিলিতিতী তৌবদা মসিনা অচৌবা পোতেন্সিএল অমা লৈ হায়বা ৱাফমসু নাকল অনিমক্না থমখি।

লুচিংবা অনিনা লোকেল করেনসিশিংদা নাকল অনিগী ওইবা ললোন-ইতিক তৌবদা মতেং পাংনবা মেকানিজমশিং থিজিনবগী মতাংদা খন্ন-নৈনখিবা অদু খঙখি। মখোয়না বাইলেতরেল ইনভেস্তমেন্ত ত্রেক্তকী মায়কৈদা মাংলোমদা চংশিল্লিবা খুমাং চাওশিনববু তরাম্না ওকখি। মখোয়না মসিগী পোতেন্সিএল অসিনা ইকোনোমিক কোওপরেসন অমসুং ইনভেস্তর-ফ্রেন্দলী ওইবা ফিভম অমা শাগৎপদা মতেং পাংগনি হায়বা খঙখি।

নাকল অনিমক্না ইনর্জী সেক্তরদা মখোয়গী বাইলেতরেল পার্তনরশিপ হেনগৎহন্নবা লম্বীশিং খন্নখি। নাকল অনিগী ওইবা ইনর্জীগী ললোন-ইতিক অসিদা মখোয়না নুংঙাইবা ফোংদোক্লদুনা, মসিবু মখা তানা হেঙ্গৎহন্নবা অচৌবা পোতেন্সিএল লৈ হায়না য়ানখি।

নাকল অনিমক্না মখোয়গী কম্পেনীশিংদা ইনর্জী কোওপরেসন হেনগৎহন্নবা মতেং পাংনবদা অপেনবা ফোংদোকখি। মসিগী মনুংদা ইন্দিয়ন অমসুং গ্লোবেল ই অমসুং পিগী খুদোংচাবশিং, গ্রীন এমোনিয়া অমসুং গ্রীন হাইদ্রোজেনগী লমদা অনৌবা অমসুং রিন্যুএবল ইনর্জী কোওপরেসন য়াওরি। নাকল অনিমক্না সস্তেনেবল ইনর্জীগী পান্দমগা লোয়ননা সিনর্জিশিং অমসুং পুন্না শেল থাদবা, তেক্নোলোজী ত্রান্সফর তৌবা অমসুং মতম শাংনা চৎমিন্নবগী ৱাফম থমখি।

নাকল অনিমক্না দিফেন্স সেক্তরদা তেংবাং পীনবা হেনগৎলক্লিবা অসিবু থাগৎখি অমসুং অপুনবা পান্দমশিং ফংনবা অমসুং রিজনেল সেক্যুরিতী অমসুং স্তেবিলিতী ঙাক্তুনা থম্নবগীদমক জোইন্ত এক্সরসাইজ, ত্রেনিং অমসুং অৱাংবা থাক্কী খোংচৎশিং য়াওনা মসিগী মতাংদা মখা তানা পুন্না থবক তৌমিন্ননবা য়ানখি। মখোয়না মেরিতাইম দোমেনগী এৱয়রনেস হেঙ্গৎহন্দুনা ইনফোর্মেসন একচেঞ্জ মখা তানা তৌমিন্নদুনা মেরিতাইম ক্রাইম অমসুং পাইরেসী থিংনবা জোইন্ত ইনিসিএতিবশিং পায়খৎনবা য়ানখি।

খোঙচৎ অদুগী মনুংদা, নাকল অনিমক্না রিজনেল মেরিতাইম সেক্যুরিতী, ব্লু ইকোনোমী, অমসুং মহাসাগরগী রিসোর্সশিং তুং কোইনা শিজিন্নবগীদমক মখোয়গী শরুক য়ামিন্নরিবা ফিরেপ অদু উৎলিবা, মেরিতাইম কোওপরেসনগী মতাংদা জোইন্ত ভিজন দোক্যুমেন্ত অমা এদোপ্ত তৌখি।

নাকল অনিমক্না হেল্থ কোওপরেসনবু মখোয়গী পার্তনরশিপকী মরুওইবা য়ুম্বী অমা ওইনা শকখঙখি অমসুং হিরম অসিদা কোওপরেসন হেন্না মপাঙ্গল কনখৎহন্নবা অপাম্বা ফোংদোকখি।

নেস্নেল য়ুনিভর্সিতী ওফ সাইন্স এন্দ তেক্নোলোজীদা আয়ুশ চেয়র অমসুং ওমানদা ইনফোর্মেসন সেল লিংখৎনবা অমসুং ত্রেদিস্নেল মেদিসিনগী লমদা তেংবাং পীনবা ৱাফম য়াওনা হৌজিক চত্থরিবা খন্ন-নৈনবা অমসুং খোংথাংশিং অদু নাকল অনিমক্না খঙখি।

নাকল অনিমক্না লৌউ-শিংউগী লমদা তেংবাং পীননবা মখোয়গী ফিরেপ অদু অমুক হন্না ফোংদোকখি অমসুং লৌউ-শিংউ অমসুং মসিগা মরী লৈনবা সেক্তরশিংদা লৌউ-শিংউগী সাইন্স, এনিমেল হজবেন্দরী অমসুং এক্বাকলচরদা তেংবাং পীননবা এম ও য়ু সহি তৌবদা তরাম্না ওকখি। নাকল অনিমক্না ত্রেনিং অমসুং সাইন্তিফিক একচেঞ্জশিংগী খুত্থাংদা মিলেত থাবগী লমদা মতেং পীনবা হেনগৎনবা য়ানখি।

নাকল অনিমক্না আই.তি. সর্ভিসশিং, দিজিতেল ইনফ্রাস্ত্রকচর অমসুং স্পেস এপ্লিকেসনশিং য়াওনা তেক্নোলোজীদা মখোয়গী মতেং পীনবা হেনগৎলক্লিবা অদু পনখি।

নাকল অনিমক্না কলচরেল কোওপরেসন হেন্না চেৎশিল্লকপা অমসুং মীয়ামগী মরক্তা লৈনরিবা মরী মপাঙ্গল কনখৎলকপা অসিদা নুংঙাইবা ফোংদোকখি। “লেগেসী ওফ ইন্দো-ওমান রিলেসনস” হায়না মিংথোনবা জোইন্ত একজিবিসন অদু মখোয়না তরাম্না ওকখি অমসুং কলচর দিজিতেলাইজেসন ইনিসিয়েতিবশিংদা হৌজিক চত্থরিবা খন্ন-নৈনবগী থৌওংশিং অদু খঙখি। লৈবাক অনিগী মরক্তা কলচরেল অমসুং একাদমিক একচেঞ্জশিং প্রমোৎ তৌনবা সোহর য়ুনিভর্সিতীদা আই.সি.সি.আর. চেয়র প্রোগ্রাম ওফ ইন্দিয়ন স্তদিজ লিংখৎনবা পুন্না থবক তৌমিন্নবগী খোংথাং অদু নাকল অনিমক্না খঙখি।

নাকল অনিমক্না মেরিটাইম হেরিতেজ অমসুং ম্যুজিয়মশিংগী মতাংদা য়ানা ৱারোল অদু তরাম্না ওকখি। মসিনা জোইন্ত একজিবিসন অমসুং রিসর্চ য়াওনা ম্যুজিয়মশিংগী মরক্তা তেংবাং পীনবা ঙমহল্লি। মখোয়না আই.এন.এস.ভি. কৌন্দিয়ানা ওমানদা মাংজৌননা চৎকদৌরিবা অদুসু পনখি। মসিনা ঐখোয়গী মান্নবা সমুদ্রগী চৎনবীশিংবু ময়েক শেংহনগনি।

নাকল অনিমক্না এজুকেসন অমসুং সাইন্তিফিক একচেঞ্জদা মখা তানা মতেং পাংমিন্নবগী মতাংদা খঙমিন্নখি। মসিগী মনুংদা লাক্কদৌরিবা ইন্দিয়া ওমান নোলেজ দাইলোগ য়াওরি। হায়র এজুকেসনগী মতাংদা য়ানা ৱারোল অসিনা ফেকল্তী অমসুং মহৈরোইশিং, ইন্সতিত্যুস্নেল কোলাবোরেসন অমসুং জোইন্ত রিসর্চ প্রমোৎ তৌবদা অচৌবা মতেং ওইগনি। নাকল অনিমক্না আই.তি.ই.সি. (ইন্দিয়ন তেক্নিকেল অমসুং ইকোনোমিক কোওপরেসন) প্রোগ্রামগী মখাদা লৈরিবা কেপাসিতী বিল্দিং ইনিসিয়েতিবশিং অদুসু পনখি।

ওমানী নাকলনা এয়র সর্ভিস ত্রাফিক রাইতশিং, দেস্তিনেসন মশিং অমসুং কোদ-শেয়রিংগী প্রোভিজনশিং য়াওনা খন্ন-নৈনবগী অপাম্বা ফোঙদোকখি। ফোংদোক্লক্লিবা ৱাফমশিং অসি ভাপ তাখি।

নাকল অনিমক্না য়ানখি মদুদি চহি চা কয়াগী মমাংদগী লৈরক্লবা মীয়ামগী মরক্তা লৈনরিবা মরী অসি ওমান-ভারত মরীগী য়ুম্ফম ওইদুনা লৈরি। ওমানদা লৈরিবা  চাউরাক্না ৬৭৫,০০০গী মশিং য়াম্লবা ভারতকী মীয়ামগী য়াইফনবা অমসুং য়াইফ-থৌরাংগীদমক ভারতকী মায়কৈদগী ওমানগী লুচিংবশিংদা থাগৎপা ফোংদোকখি। ওমানগী মায়কৈনা ওমানগী চাউখৎ থৌরাংদা ভারতকী প্রবাসীশিংনা থাজবা থম্বা য়াবা থৌদাংশিং অদু শকখঙখি।

নাকল অনিমক্না মান্নবা অপাম্বশিংগী মরক্তা রিজনেল অমসুং ইন্তর্নেস্নেল ইসুশিংদা মীৎয়েংশিং লান্থোকখি।

লুচিংবা অনিনা তেরোরিজমগী মওং-মতৌ পুম্নমকপু য়ানিংদবা ফোঙদোকখি অমসুং অসিগুম্বা থৌওংশিং অসিগী অচুম-অরান লৈতে হায়না অমুক্কা হন্না ফোংদোকখি। মখোয়না হীরম অসিদা মখা তানা তেংবাং পীনবগী মরুওইবা অদু ফোংদোকখি।

নাকল অনিমক্না গাজাদা লৈরিবা হ্যুমেনিতরিয়ন ফিভমদা অৱাবা ফোংদোকখি অমসুং সিভিলিয়ানশিংদা মীওইবগী ওইবা মতেং অসি মতম চানা অমসুং সেফ ওইনা পীনবা হায়না য়ানখি। মখোয়না গাজা পিস প্লানগী অহানবা ফেজদা খুৎয়েক পীনখিবা অদু তরাম্না ওকখি অমসুং থৌরাং অদুদা মখোয়না শৌগৎপা অদু অমুক হন্না ফোংদোকখি। মখোয়না শান্তি অমসুং অচেৎপা ফিবম অমুক হন্না পুরক্নবা হোৎনরিবা অসিদা মখোয়গী মতেং অমুক হন্না ফোংদোকখি অমসুং সোভরিন অমসুং ইন্দিপেন্দেন্ত পেলেস্তাইন স্তেত অমা লিংখৎপা য়াওনা ৱা খন্ন-নৈনবগী অমসুং দিপ্লোমেসীগী খুত্থাংদা অচুম্বা অমসুং অচেৎপা ৱারোইশিন অমা পুরকপগী তঙাইফদবা অদুদা মিৎয়েং থমখি।

খোঙচৎ মনুংদা মখাদা পীরিবা এগ্রীমেন্ত অমসুং মেমোরেন্দম ওফ অন্দর্স্তেন্দিং অসি খুৎয়েক পীনখি:

1) কম্প্রিহেন্সিব ইকোনোমিক পার্তনরশিপ এগ্রীমেন্ত

2) মেরিতাইম হেরিতেজ অমসুং ম্যুজিয়মগী লমদা য়ানা ৱারোল

3) লৌউ-শিংউ অমসুং মরী লৈনবা সেক্তরশিংগী লমদা এম ও য়ু

4) হায়র এজুকেসনগী লমদা য়ানা ৱারোল

5) ওমান চেম্বর ওফ কম্মর্স এন্দ ইন্দস্ত্রী অমসুং কনফেদরেসন ওফ ইন্দিয়ন ইন্দস্ত্রীগী মরক্তা এম ও য়ু

6) মেরিতাইম কোওপরেসনগী মতাংদা জোইন্ত ভিজন দোক্যুমেন্ত এদোপ্ত তৌবা

7) মিলে চাবা অমসুং এগ্রিকলচর-ফুদ ইনোবেসনদা মতেং পীননবা এক্সিক্যুটিব প্রোগ্রাম

ভারতকী প্রধান মন্ত্রীনা মহাক অমসুং মহাক্কী মীহুৎ কাংবুবু তরাম্না ওকপগীদমক হিস মেজেস্টি সুলতান হাইথাম বিন তারিকপু থাগৎপা ফোংদোকখি। মহাক্না মহামহিম সুলতানবু নাকল অনিমক্না পাম্নবা মতম অমদা ভারত খোংচৎ চৎপীনবা কৌখি।

***