ପିଏମଇଣ୍ଡିଆ

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି କୋଚି ମେଟ୍ରୋର ଉଦ୍ଘାଟନ କରିଛନ୍ତି ଓ ନୂଆ ମେଟ୍ରୋ ଲାଇନ୍ ରେ କିଛି ସମୟ ପାଇଁ ଯାତ୍ରା କରିଥିଲେ । ପରେ ସେ ରାଷ୍ଟ୍ର ଉଦ୍ଦେଶ୍ୟରେ କୋଚି ମେଟ୍ରୋକୁ ସମର୍ପିତ କରିବା ପାଇଁ ଆୟୋଜିତ ସମାରୋହରେ ବହୁ ସଂଖ୍ୟାରେ ଏକତ୍ରୀତ ହୋଇଥିବା ଜନସାଧାରଣଙ୍କୁ ସମ୍ବୋଧିତ କରିଥିଲେ ।

ପ୍ରଧାନମନ୍ତ୍ରୀଙ୍କ ଅଭିଭାଷଣର ମୂଳ ପାଠ :

କୋଚି ମେଟ୍ରୋର ଉଦ୍ଘାଟନ ସମାରୋହରେ ଭାଗ ନେଇ ମୁଁ ଅତ୍ୟନ୍ତ ଆନନ୍ଦିତ । ମୁଁ ଏହି ଗର୍ବର ମୂହୁର୍ତ୍ତରେ କୋଚିର ଲୋକମାନଙ୍କୁ ଅଭିନନ୍ଦନ ଜଣାଉଛି ।

ବନ୍ଧୁଗଣ,

ଆରବ ସାଗରର ରାଣୀ କୋଚି, ମସଲା ବ୍ୟବସାୟର ଏକ ମହତ୍ୱପୂର୍ଣ୍ଣ କେନ୍ଦ୍ର ଭାବେ ପରିଚିତ । ଏବେ ଏହା କେରଳର ବାଣିଜ୍ୟିକ ରାଜଧାନୀ ଭାବେ ପରିଚିତ । କେରଳ ଆସୁଥିବା ଘରୋଇ ଓ ଆନ୍ତର୍ଜାତିକ ପର୍ଯ୍ୟଟକଙ୍କ ସଂଖ୍ୟା ଦୃଷ୍ଟିରୁ କୋଚି ପ୍ରଥମ ସ୍ଥାନରେ ରହିଛି । ତେଣୁ କୋଚିରେ ମେଟ୍ରୋ ଟ୍ରେନର ସୁବିଧା ହେବାର ମଧ୍ୟ ଯଥାର୍ଥ ।

ଏହି ସହରର ଜନସଂଖ୍ୟା କ୍ରମାଗତ ବଢ଼ିବାରେ ଲାଗିଛି ଓ 2021 ମସିହା ସୁଦ୍ଧା 23ଲକ୍ଷରେ ପହଂଚିବାର ଅନୁମାନ କରାଯାଉଛି । ତେଣୁ ସହରର ଭିତ୍ତିଭୂମି ଢାଂଚା ଉପରେ ବଢ଼ୁଥିବା ଚାପର ମୁକାବିଲା ପାଇଁ ଏକ ବ୍ୟାପକ ଦ୍ରୁତ ପରିବହନ ବ୍ୟବସ୍ଥା ଆବଶ୍ୟକ । ଏହା କୋଚିର ଆର୍ଥିକ ବିକାଶରେ ମଧ୍ୟ ଯୋଗଦାନ କରିବ ।

କୋଚି ମେଟ୍ରୋ ଟ୍ରେନ୍ ଲିମିଟେଡ୍ ଭାରତ ସରକାର ଓ କେରଳ ସରକାରର 50:50 ଅନୁଦାନର ଯୌଥ ଉଦ୍ୟୋଗ । କୋଚି ମେଟ୍ରୋ ପାଇଁ କେନ୍ଦ୍ର ସରକାର ଏପର୍ଯ୍ୟନ୍ତ 2 ହଜାର କୋଟି ଟଙ୍କା ପ୍ରଦାନ କରିଛନ୍ତି । ଆଜି ଉଦ୍ଘାଟନ ହେଉଥିବା ପର୍ଯ୍ୟାୟରେ ଅଲୁଭାରୁ ପଲାରିଭାଟ୍ଟୋମ ପର୍ଯ୍ୟନ୍ତ ଟ୍ରେନ ଚାଲିବ । ଏହା 13.26 କିମି ଦୂର ଓ 11ଟି ଷ୍ଟେସନ୍ ମଧ୍ୟ ଦେଇ ଅତିକ୍ରମ କରିବ ।
ଏହି ମେଟ୍ରୋ ପରିଯୋଜନାର ଅନେକ ମହତ୍ୱପୂର୍ଣ୍ଣ ବୈଶିଷ୍ଟ୍ୟ ରହିଛି ।

ଏହା ଆଧୁନିକ ସିଗ୍ନାଲ ପ୍ରଣାଳୀ ‘କମ୍ୟୁନିକେସନ୍ ଆଧାରିତ ଟ୍ରେନ୍ ନିୟନ୍ତ୍ରଣ ସିଗନାଲ୍ ସିଷ୍ଟମ’ ରେ ପରିଚାଳିତ ପ୍ରଥମ ମେଟ୍ରୋ ପରିଯୋଜନା ।

ଏହାର ଡବା ‘ମେକ୍ ଇନ୍ ଇଣ୍ଡିଆ’ ଲକ୍ଷ୍ୟକୁ ଦର୍ଶାଉଛି । ଏହି ଡବାକୁ ଫ୍ରାନ୍ସର କମ୍ପାନୀ ଅଲ୍ସଟମ୍ ଦ୍ୱାରା ଚେନ୍ନାଇ ନିକଟରେ ଥିବା ତା’ର କାରଖାନାରେ ନିର୍ମାଣ କରାଯାଇଛି ଓ ଏଥିରେ ପ୍ରାୟ 70 ପ୍ରତିଶତ ଭାରତୀୟ ଉପକରଣ ଲଗାଯାଇଛି ।

କୋଚି ମେଟ୍ରୋ ସହରର ସମଗ୍ର ସାର୍ବଜନୀନ ପରିବହନ ନେଟୱାର୍କକୁ ଏକକ ସିଷ୍ଟମରେ ଏକୀକୃତ କରୁଛି । ଏହି ସିଷ୍ଟମରେ ଗୋଟିଏ ସାଧାରଣ ସମୟ-ସାରଣୀ, ସାଧାରଣ ଟିକେଟ୍ ବ୍ୟବସ୍ଥା ଓ କେନ୍ଦ୍ରୀକୃତ ‘କମାଣ୍ଡ ଓ କଂଟ୍ରୋଲ’ ସାମିଲ ହେବ । ଏହା ସହର ଆଭ୍ୟନ୍ତରୀଣ ସୀମାର ଶେଷ ସ୍ଥାନ ପର୍ଯ୍ୟନ୍ତ ସଂଯୋଗ ଓ ମୋଟର ସମେତ ପରିବହନ ବ୍ୟବସ୍ଥାରେ ସୁଧାର ଆଣିବା ଦିଗରେ ମଧ୍ୟ ଧ୍ୟାନକେନ୍ଦ୍ରିତ କରୁଛି ।

କୋଚି ମେଟ୍ରୋ ଟିକେଟ୍ ପାଇଁ ମଧ୍ୟ ଏକ ନୂତନ ପିପିପି ମଡେଲର ମାର୍ଗ ପ୍ରଶସ୍ତ କରିଛି । ସ୍ୱୟଂଚାଳିତ ଭଡ଼ା ଆଦାୟ ବ୍ୟବସ୍ଥାରେ ନିବେଶ ପାଇଁ ଟେଣ୍ଡର ପ୍ରକ୍ରିୟା ଆଧାରରେ ଭାରତୀୟ ବ୍ୟାଙ୍କ ଓ ଆର୍ଥିକ ସଂସ୍ଥାନଗୁଡ଼ିକୁ ଆମନ୍ତ୍ରିତ କରାଯାଉଛି । ଚୟନିତ ବ୍ୟାଙ୍କର ନାମ କୋଚି ମେଟ୍ରୋ ଭଡ଼ା କାର୍ଡ ଓ App ରେ ସହଯୋଗୀ ବ୍ରାଣ୍ଡ ଭାବେ ଜାରି କରାଯିବ ।

ମୋତେ କୁହାଯାଇଛି କି କୋଚି-1 କାର୍ଡ ହେଉଛି ଏକ ବହୁମୁଖୀ ପ୍ରି-ପେଡ୍ କଂଟ୍ରାକ୍ଟଲେସ୍ RuPay କାର୍ଡ । ଯାହାର ଉପଯୋଗ ମେଟ୍ରୋରେ ଯାତ୍ରା କରିବା ଓ ଏହା ସହିତ ସାଧାରଣ ଡେବିଟ୍ କାର୍ଡ ଭାବେ ମଧ୍ୟ କରିହେବ । କୋଚି ବିଶ୍ୱର କେତେକ ହାତଗଣତି ସହର ମଧ୍ୟରେ ସାମିଲ ହେବ ଓ ଏହା ଭାରତରେ ପ୍ରଥମ ଏଭଳି ସହର ଯେଉଁଠି ଆଧୁନିକ ଓପନ୍-ଲୁପ୍ ସ୍ମାର୍ଟ କାର୍ଡ ହେବ । ଯାହାର ଉପଯୋଗ ବସ୍, ଟ୍ୟାକ୍ସି ଓ ଅଟୋ ଭଳି ପରିବହନର ଅନ୍ୟ ସାଧନରେ ମଧ୍ୟ କରାଯାଇ ପାରିବ ।

ମୁଁ ଆହୁରି ଜାଣିବାକୁ ପାଇଛି ଯେ କୋଚି-1 ମୋବାଇଲ୍ ଆପ୍ ଦୀର୍ଘକାଳକୁ ଦୃଷ୍ଟିରେ ରଖି ବିକଶିତ କରାଯାଇଛି । ଏହି ମୋବାଇଲ୍ ଆପ୍ ରେ ଏକ ଇଲେକ୍ଟ୍ରୋନିକ୍ସ-ୱାଲେଟ୍ କୁ ଏକୀକୃତ କରାଯାଇଛି ଯାହା କୋଚି କାର୍ଡ-1 ସହ ସଂଯୁକ୍ତ ହୋଇଛି । ଆରମ୍ଭରେ ଏହା କୋଚିର ନାଗରିକଙ୍କୁ ମେଟ୍ରୋ ସେବାର ଲାଭ ଉଠାଇବାରେ ସହାୟତା କରିବ । କିନ୍ତୁ ଭବିଷ୍ୟତରେ ଏହା ସେମାନଙ୍କର ଯାତ୍ରା ସମ୍ବନ୍ଧୀୟ ସମସ୍ତ ଆବଶ୍ୟକତାକୁ ପୂରଣ କରିବ । ଏହା ମାଧ୍ୟମରେ ନିୟମିତ ପୈଠ ସମ୍ବନ୍ଧୀୟ ଆବଶ୍ୟକତାକୁ ମଧ୍ୟ ପୂରଣ କରାଯାଇ ପାରିବ ଓ ଏହା ସହର ଏବଂ ପର୍ଯ୍ୟଟନ ସମ୍ବନ୍ଧୀୟ ସୂଚନା ମଧ୍ୟ ଉପଲବ୍ଧ କରାଇବ । ଏଭଳି ଭାବେ ଏହା ଇ-ଗଭର୍ଣ୍ଣାନ୍ସ ଡିଜିଟାଲ ପ୍ଲାଟଫର୍ମର ଏକ ଉତ୍ତମ ଉଦାହରଣ । ଏହି ପରିଯୋଜନାର ଏକ ଅନ୍ୟ ମହତ୍ୱପୂର୍ଣ୍ଣ ଦିଗ ହେଉଛି କୋଚି ମେଟ୍ରୋ ଟ୍ରେନ ସିଷ୍ଟମରେ କାମ କରିବା ପାଇଁ ପ୍ରାୟ ଏକ ହଜାର ମହିଳା ଓ 23ଜଣ କିନ୍ନରଙ୍କୁ ଚୟନ କରଯାଇଛି ।

ଏହି ପରିଯୋଜନା ପରିବେଶ ଅନୁକୂଳ ବିକାଶର ଏକ ଉଦାହରଣ ମଧ୍ୟ । ଏହା ମୋଟ ଶକ୍ତି ଆବଶ୍ୟକତାର ପ୍ରାୟ 25 ପ୍ରତିଶତ ଅକ୍ଷୟ ଶକ୍ତିରୁ ବିଶେଷ କରି ସୌର ଶକ୍ତିରୁ ମିଳିବାର ଯୋଜନା ଅଛି । ଦୀର୍ଘ ଅବଧି ପାଇଁ ଜିରୋ କାର୍ବନ ଉତ୍ସର୍ଜନ ବିଶିଷ୍ଟ ସହର ଟ୍ରାନ୍ଜିଟ୍ ପ୍ରଣାଳୀ କରିବା ମଧ୍ୟ ଯୋଜନା ରହିଛି । ମେଟ୍ରୋ ବ୍ୟବସ୍ଥାର ପ୍ରତ୍ୟେକ ଷଷ୍ଠ ଖୁମ୍ଭରେ ଏକ ନିବୃତ ଭର୍ଟିକାଲ ଗାର୍ଡେନ ହେବ ଯାହା ଅନେକାଂଶରେ ସହରର ବର୍ଜ୍ୟକୁ ଉପଯୋଗ କରିବ ।

ଏହା ଜାଣି ଅତ୍ୟନ୍ତ ଖୁସି ଲାଗୁଛି ଯେ କୋଚି ମେଟ୍ରୋ ସମସ୍ତ ଷ୍ଟେସନ୍ ସହ ଅପରେଟିଂ କଂଟ୍ରୋଲ ସେଂଟରକୁ ପ୍ଲାଟିନମ୍ ରେଟିଂ ହାସଲ କରିଛି । ଯାହା ଇଣ୍ଡିଆନ ଗ୍ରୀନ୍ ବିଲିଡିଂ କାଉନସିଲ ଦ୍ୱାରା ପ୍ରଦତ୍ତ ସର୍ବୋଚ୍ଚ ପ୍ରମାଣୀକୃତ ସ୍ତର ।

ବନ୍ଧୁଗଣ

ଗତ 3ବର୍ଷ ମଧ୍ୟରେ ମୋର ସରକାର ଦେଶର ସମଗ୍ର ଭିତ୍ତିଭୂମି ଢାଂଚାର ବିକାଶ ଉପରେ ଗୁରୁତ୍ୱ ଦେଉଛି । ରେଳବାଇ, ସଡ଼କ, ବିଦ୍ୟୁତ କ୍ଷେତ୍ରକୁ ଆମେ ପ୍ରାଥମିକତା ଦେଉଛୁ । ‘ପ୍ରଗତି’ ବୈଠକରେ ମୁଁ ବ୍ୟକ୍ତିଗତ ଭାବେ 8 ଲକ୍ଷ କୋଟି ଟଙ୍କାରୁ ଅଧିକ 175ଟି ପରିଯୋଜନାର ସମୀକ୍ଷା କରିଛି । ଆମେ ପ୍ରତିବନ୍ଧକକୁ ଦୂର କରିଛୁ ଓ ଏହି କ୍ଷେତ୍ରରେ କାର୍ଯ୍ୟକାରିତାର ହାରରେ ଉଲ୍ଲେଖନୀୟ ଉନ୍ନତି ଆସିଛି । ଏବେ ଆମେ ପରବର୍ତ୍ତୀ ପୀଢ଼ିର ଭିତ୍ତିଭୂମି ଢାଂଚା ଉପରେ ମଧ୍ୟ ଧ୍ୟାନକେନ୍ଦ୍ରୀତ କରୁଛୁ । ଯେଉଁଥିରେ ଲଜିଷ୍ଟିକ, ଡିଜିଟାଲ ଓ ଗ୍ୟାସ୍ ସାମିଲ ଅଛି ।

ବିଶେଷକରି ସହରରେ ସାର୍ବଜନୀନ ପରିବହନରେ ଉନ୍ନତି ଆଣିବା ପାଇଁ ଆମେ ଅନେକ ପଦକ୍ଷେପ ନେଇଛୁ । ଏହି କ୍ଷେତ୍ରରେ ବିଦେଶୀ ପୁଞ୍ଜିନିବେଶକୁ ଆମନ୍ତ୍ରିତ କରାଯାଇଛି । ମେଟ୍ରୋ ଟ୍ରେନ୍ ପରିଯୋଜନାକୁ କାର୍ଯ୍ୟକାରୀ କରିବା ପାଇଁ ଭାରତରେ 50 ସହର ପ୍ରସ୍ତୁତ ଅଛନ୍ତି ।

ମେଟ୍ରୋ ଟ୍ରେନ୍ ବ୍ୟବସ୍ଥାର ଆର୍ଥିକ ଓ ସାମାଜିକ ଲାଭ ସମସ୍ତେ ଜାଣନ୍ତି । ଆମେ ଏହି କ୍ଷେତ୍ରରେ ନୀତି ନିର୍ଦ୍ଧାରଣକୁ ଗତିଶୀଳ କରୁଛୁ । ନିକଟରେ ଭାରତ ସରକାର ମେଟ୍ରୋ ଟ୍ରେନର ରେଲିଙ୍ଗ ଷ୍ଟକ ଓ ସିଗ୍ନାଲ ପ୍ରଣାଳୀ ପାଇଁ ବୈଶିଷ୍ଟ୍ୟକୁ ମାନକୀକୃତ କରିଛନ୍ତି । ଏହା ନିର୍ମାଣକାରୀମାନଙ୍କୁ ଭାରତରେ ଦୀର୍ଘ ଅବଧି ପାଇଁ ନିର୍ମାଣ ପ୍ଲାଂଟ ସ୍ଥାପିତ କରିବା ପାଇଁ ପ୍ରୋତ୍ସାହିତ କରିବ । ‘ମେକ୍ ଇନ୍ ଇଣ୍ଡିଆ’ ଆଭିମୁଖ୍ୟ ଅନୁରୂପ ମେଟ୍ରୋ ରେଲିଙ୍ଗ ଷ୍ଟକ୍ ର ଘରୋଇ ନିର୍ମାଣକୁ ପ୍ରୋତ୍ସାହିତ କରିବା ପାଇଁ ପ୍ରୟାସ କରାଯାଉଛି ।

ବନ୍ଧୁଗଣ

ସାଧାରଣ ଲୋକ କେନ୍ଦ୍ରୀତ ଦୃଷ୍ଟିକୋଣକୁ ଆପଣାଇବା ଓ ଭୂମିର ଉପଯୋଗ ଏବଂ ପରିବହନକୁ ଏକୀକୃତ କରି ସହର ଯୋଜନାରେ ଏକ ଉଲ୍ଲେଖନୀୟ ପରିବର୍ତ୍ତନ ଆଣିବାର ଆବଶ୍ୟକତା ରହିଛି ।

ଏ ଦିଗରେ ଭାରତ ସରକାର 2017 ଏପ୍ରିଲରେ ଏକ ନେସନାଲ ଟ୍ରାଞ୍ଜିଟ୍ ଓରିଏଂଟେଡ୍ ଡେଭଲପମେଣ୍ଟ ନୀତି ଜାରି କରିଛନ୍ତି । ଏହି ନୀତି ସହରକୁ ଟ୍ରାଞ୍ଜିଟ୍ ଉପରେ ନିର୍ଭର କରିବା ପରିବର୍ତ୍ତେ ଟ୍ରାଞ୍ଜିଟ୍ କେନ୍ଦ୍ରୀତ ଭାବେ ବଦଳାଇବାକୁ ଚାହୁଁଛି । ଏହାର ଉଦ୍ଦେଶ୍ୟ ହେଉଛି ଅତିକମରେ ପାଦଚାଳିତ ବର୍ଗ ସୃଷ୍ଟି କରିବା ଓ ସାର୍ବଜନୀନ ପରିବହନକୁ ଟ୍ରାଞ୍ଜିଟ୍ ର ନିକଟତର କରାଇବା ।

ମୁଁ ଭେଲ୍ୟୁ କେପ୍ଚର ଫାଇନାନ୍ସ ପଲିସି ଫ୍ରେମୱାର୍କ ପାଇଁ ଭେଙ୍କେୟା ଜୀଙ୍କ ନେତୃତ୍ୱରେ ସହରାଂଚଳ ବିକାଶ ମନ୍ତ୍ରଣାଳୟର ପ୍ରଶଂସା କରୁଛି । ଏହା ବୃଦ୍ଧି ପାଉଥିବା ଜମି ଦର ନିୟନ୍ତ୍ରଣକୁ ଆଣିବାରେ ଏକ ବ୍ୟବସ୍ଥା ପ୍ରଦାନ କରିବ ।

ଏବେ ମୁଁ ଏହି ମହତ୍ୱପୂର୍ଣ୍ଣ ମାଇଲଖୁଂଟ ହାସଲ କରିଥିବାରୁ କୋଚିର ନାଗରିକ, କୋଚି ମେଟ୍ରୋ ଟ୍ରେନ୍ କର୍ପୋରେସନ୍ ଓ କେରଳର ମୁଖ୍ୟମନ୍ତ୍ରୀଙ୍କୁ ଅଭିନନ୍ଦନ ଜଣାଇ ନିଜର ଭାଷଣ ସମାପ୍ତ କରୁଛି । କୋଚି 2016 ଜାନୁୟାରୀରେ ଚାଲେଞ୍ଜ ପ୍ରକ୍ରିୟାର ପ୍ରଥମ ପର୍ଯ୍ୟାୟରେ ସ୍ମାର୍ଟ ସିଟି ଭାବେ ଚୟନ ହୋଇଥିଲା । ମୁଁ ଆଶା କରୁଛି ଆଗାମୀ ଦିନରେ ଏହା ଅଧିକ ଭଲ କରିବ ।

ଧନ୍ୟବାଦ

**********