ପିଏମଇଣ୍ଡିଆ

ମୋର ବନ୍ଧୁ ରାଷ୍ଟ୍ରପତି ମାକ୍ରୋନ୍‌, ସମ୍ମାନିତ ଅଂଶଗ୍ରହଣକାରୀଗଣ, ନମସ୍କାର!

ପ୍ରଥମ ଅନ୍ତର୍ଜାତୀୟ ମହାକାଶ ସମ୍ମିଳନୀରେ ଭାଗ ନେଇ ମୁଁ ଖୁବ୍ ଖୁସି । ରାଷ୍ଟ୍ରପତି ଶ୍ରୀ ମାକ୍ରୋନଙ୍କୁ ତାଙ୍କର ହାର୍ଦ୍ଦିକ ନିମନ୍ତ୍ରଣ ଏବଂ ଏହି ସମୟୋଚିତ ପଦକ୍ଷେପ ଗ୍ରହଣ କରିବା ପାଇଁ ମୁଁ ଧନ୍ୟବାଦ ଜଣାଉଛି । ଶତାବ୍ଦୀ ଧରି, ମହାକାଶ ଆମର କଳ୍ପନାକୁ ପ୍ରେରଣା ଦେଇଛି । ଆଜି, ଏହା ପୃଥବୀରେ ଜଳବାୟୁ ଏବଂ ଫସଲରୁ ଆରମ୍ଭ କରି ମହାସାଗର ଏବଂ ସମ୍ପ୍ରଦାୟ ପର୍ଯ୍ୟନ୍ତ ଜୀବନକୁ ଆକାର ଦେଉଛି । ମହାକାଶର ପ୍ରତିଶ୍ରୁତି ଅସୀମ । ଆମର ଦାୟିତ୍ୱ ମଧ୍ୟ ସାମୂହିକ । ଦିନକୁ ଦିନ କକ୍ଷପଥରେ ଭିଡ଼ ବଢ଼ିବା ସହ ପ୍ରଯୁକ୍ତିବିଦ୍ୟା ଅଧିକ ବିକଶିତ ହେଉଛି ଏବଂ ଏ ସମ୍ପର୍କିତ ଦେଶମାନଙ୍କ ସଂଖ୍ୟା ବୃଦ୍ଧି ପାଉଛି । ତେଣୁ ଆମର ବିକଳ୍ପ ନିଶ୍ଚିତ ଭାବରେ ସ୍ପଷ୍ଟ ହେବା ଉଚିତ: ସଂଘର୍ଷ ଅପେକ୍ଷା ସହଯୋଗ , ସ୍ୱଳ୍ପକାଳୀନ ଲାଭ ପରିବର୍ତ୍ତେ ସହଯୋଗ ଏବଂ ବାଦ ଦେବା ପରିବର୍ତ୍ତେ ସମାବେଶନ ହେବା ଉଚିତ୍ ।

ବନ୍ଧୁଗଣ,

ଭାରତର ଦୃଷ୍ଟିକୋଣ ‘ବସୁଧୈବ କୁଟୁମ୍ବକମ୍‌’ ସିଦ୍ଧାନ୍ତ ଉପରେ ଆଧାରିତ, ଯାହାର ଅର୍ଥ ହେଉଛି – ଗୋଟିଏ ପୃଥିବୀ, ଗୋଟିଏ ପରିବାର, ଗୋଟିଏ ଭବିଷ୍ୟତ । ଏହି ଭାବନା ବର୍ତ୍ତମାନ ପୃଥିବୀର ସୀମା ଅତିକ୍ରମ କରି ଆଗକୁ ବଢ଼ିବା ଆବଶ୍ୟକ । ଅନ୍ତର୍ଜତୀୟ ଆଇନ, ଆଲୋଚନା ଏବଂ ବହୁପକ୍ଷୀୟ ସହଯୋଗ ଉପରେ ଆଧାରିତ ଏକ ସୁରକ୍ଷିତ, ନିରାପଦ, ଶାନ୍ତିପୂର୍ଣ୍ଣ ଏବଂ ସ୍ଥାୟୀ ମହାକାଶ କ୍ଷେତ୍ରକୁ ଆମେ ସମର୍ଥନ କରୁଛୁ । ବୈଜ୍ଞାନିକ ତଥ୍ୟଗୁଡିକ ସ୍ୱଚ୍ଛ ଓ ସତ୍ୟନିଷ୍ଠା ସହିତ ସାମୂହିକ କଲ୍ୟାଣରେ ଉପଯୋଗ ହେବା ଉଚିତ । 

ଭାରତର ମହାକାଶ ଯାତ୍ରା ଏହି ଦର୍ଶନକୁ ପ୍ରତିଫଳିତ କରେ । ଏହି ଯାତ୍ରାର ମୁଖ୍ୟ ଆଧାର ହୋଇଥିବା ‘ଇସ୍ରୋ’ ନିଜର ଉତ୍କର୍ଷତା ଏବଂ ସ୍ୱଳ୍ପ-ବ୍ୟୟବହୁଳ ମିଶନ ପାଇଁ ବିଶ୍ୱସ୍ତରୀୟ ପ୍ରଶଂସା ଲାଭ କରିଛି । ଏହାର କ୍ଷମତା କୃଷକ ଓ ମତ୍ସ୍ୟଜୀବୀଙ୍କ ସେବା କରିବା ସହିତ ପାଣିପାଗ ପୂର୍ବାନୁମାନ, ବିପର୍ଯ୍ୟୟ ପରିଚାଳନା ଏବଂ ନାଭିଗେସନ (ଦିଗ ନିର୍ଣ୍ଣୟ) କ୍ଷେତ୍ରରେ ସହାୟକ ହୋଇଥାଏ । ଭାରତୀୟ ରକେଟ୍ ମାଧ୍ୟମରେ ୩୪ଟି ଦେଶର ୪୩୦ରୁ ଅଧିକ ଉପଗ୍ରହ ମହାକାଶକୁ ପଠାଯାଇଛି । ଇସ୍ରୋର ପ୍ରଯୁକ୍ତିବିଦ୍ୟା ଏବଂ ଭାଗୀଦାରୀ କେବଳ ଭାରତ ନୁହେଁ, ବରଂ ସମଗ୍ର ବିଶ୍ୱର ସେବା କରୁଛି ।

ଏହି ବିଶ୍ୱସ୍ତରୀୟ ବିଶ୍ୱାସ ପଛରେ ଭାରତୀୟ ବୈଜ୍ଞାନିକ, ଯନ୍ତ୍ରୀ ଏବଂ ବୈଷୟିକ କର୍ମଚାରୀଙ୍କ ଅନେକ ପିଢ଼ିର ନିଷ୍ଠା ଓ କଠିନ ପରିଶ୍ରମ ରହିଛି । ଦିନରାତି କଠିନ ପରିଶ୍ରମ କରି ସେମାନେ ଗୋଟିଏ ପରେ ଗୋଟିଏ ମିଶନ୍ ଏବଂ ସଫଳତା ମାଧ୍ୟମରେ ଇସ୍ରୋର ବିଶ୍ୱସ୍ତରୀୟ ଖ୍ୟାତି ଗଢ଼ି ତୋଳିଛନ୍ତି ଏବଂ ମହାକାଶ ଅଭିଯାନ ଚଳାଉଥିବା ରାଷ୍ଟ୍ରଗୁଡିକ ମଧ୍ୟରେ ଭାରତକୁ ଏକ ଗୌରବମୟ ସ୍ଥାନ ପ୍ରଦାନ କରିଛନ୍ତି ।

ଚନ୍ଦ୍ରଯାନ-୩ ଭାରତକୁ ଚନ୍ଦ୍ରର ଦକ୍ଷିଣ ମେରୁ ନିକଟରେ ଅବତରଣ କରିଥିବା ପ୍ରଥମ ରାଷ୍ଟ୍ରରେ ପରିଣତ କରିଛି। ଆଦିତ୍ୟ-ଏଲ୍‌୧ ସୂର୍ଯ୍ୟଙ୍କ ରହସ୍ୟ ଉନ୍ମୋଚନ କରୁଛି । ଗତ ବର୍ଷ ଜଣେ ଭାରତୀୟ ଅନ୍ତର୍ଜାତୀୟ ମହାକାଶ ଷ୍ଟେସନ ପରିଦର୍ଶନ କରିଥିଲେ । ଭବିଷ୍ୟତକୁ ଦୃଷ୍ଟିରେ ରଖି, ଆମେ ୨୦୩୫ ସୁଦ୍ଧା ଏକ ଭାରତୀୟ ମହାକାଶ ଷ୍ଟେସନ୍ ପ୍ରତିଷ୍ଠା କରିବାକୁ ଏବଂ ୨୦୪୦ ସୁଦ୍ଧା ଜଣେ ଭାରତୀୟଙ୍କୁ ଚନ୍ଦ୍ରକୁ ପଠାଇବାକୁ ଲକ୍ଷ୍ୟ ରଖିଛୁ । ଏହି ସମସ୍ତ ପ୍ରୟାସରେ ଆମର ମୂଳ ନୀତି ସ୍ପଷ୍ଟ ରହିଛି; ଏହାର ଲାଭ ସମଗ୍ର ମାନବଜାତି ନିକଟରେ ପହଞ୍ଚିବା ଆବଶ୍ୟକ ।

ଇସ୍ରୋ ସହିତ ଭାରତର ଘରୋଇ ମହାକାଶ କ୍ଷେତ୍ର ମଧ୍ୟ ଦ୍ରୁତ ଗତିରେ ଅଗ୍ରଗତି କରୁଛି । ଉଦ୍ୟୋଗୀ ଶକ୍ତି ବା ଉଦ୍ୟମଶୀଳତାର ଶକ୍ତି ଇସ୍ରୋର ଉତ୍କର୍ଷତା ସହିତ ଜଡିତ। ୧୯୬୦ ଦଶକରେ ଥୁମ୍ବାଠାରେ ଭାରତୀୟ ମହାକାଶ କାର୍ଯ୍ୟକ୍ରମ ଆରମ୍ଭ ହେବା ସମୟରୁ ଫ୍ରାନ୍ସ ଏକ ବିଶ୍ୱସ୍ତ ଅଂଶୀଦାର ରହିଆସିଛି । ଆଜି ଆମର ସହଯୋଗ ପୃଥିବୀ ପର୍ଯ୍ୟବେକ୍ଷଣ ଏବଂ ଉନ୍ନତ ପ୍ରଯୁକ୍ତିବିଦ୍ୟା ପର୍ଯ୍ୟନ୍ତ ବ୍ୟାପ୍ତ ରହିଛି, ଯାହା ବୈଜ୍ଞାନିକ ଉତ୍କର୍ଷତାକୁ ମାନବୀୟ ଲକ୍ଷ୍ୟ ସହିତ ଯୋଡୁଛି । ଭାରତର ମହାକାଶ ଅଭିଯାନର ପରବର୍ତ୍ତୀ ପର୍ଯ୍ୟାୟରେ ସହଯାତ୍ରୀ ହେବା ପାଇଁ ଆମେ ଫ୍ରାନ୍ସ ଏବଂ ସମଗ୍ର ବିଶ୍ୱକୁ ଆମନ୍ତ୍ରଣ କରୁଛୁ ।

ବନ୍ଧୁଗଣ,

ପ୍ୟାରିସରେ ଆୟୋଜିତ ମହାକାଶ ସମ୍ମିଳନୀ ଏକ ସ୍ପଷ୍ଟ ବାର୍ତ୍ତା ପ୍ରଦାନ କରୁ: ସମଗ୍ର ମାନବଜାତି ଏବଂ ଆଗାମୀ ପିଢ଼ି ପାଇଁ ଆମେ ମିଳିତ ଭାବେ ମହାକାଶର ଅନୁସନ୍ଧାନ କରିବା, ନୂତନ ଉଦ୍ଭାବନ କରିବା ଏବଂ ମହାକାଶକୁ ସୁରକ୍ଷିତ ରଖିିବା । ମୁଁ ସମସ୍ତ ଅଂଶଗ୍ରହଣକାରୀଙ୍କୁ ଶୁଭେଚ୍ଛା ଜଣାଉଛି ।

ଧନ୍ୟବାଦ ।

SR