پی ایم انڈیا

نئی دہلی،21/ اکتوبر        وزیر اعظم جناب نریندر مودی نے آج پولیس کے یوم یادگار کے موقع پر نیشنل پولیس میموریل قوم کے نام وقف کیا۔

وزیر اعظم نے آفات کا سامنا کرنے کی کارروائیوں میں حصہ لینے والے پولیس اور نیم فوجی اہلکاروں کو اعزاز بخشنے کے لیے نیتاجی سبھاش چندر بوس کے نام پر یک ایوارڈ کا بھی اعلان کیا۔ آفات کے بعد لوگوں کی زندگی بچانے کے لیے کئے گئے بہادری اور ہمت کے مظاہرے کے اعتراف میں ہر سال اس ایوارڈ کا اعلان کیا جائے گا۔

جناب نریندر مودی نے نیشنل پولیس میموریل میں شہیدوں کو خراج عقیدت پیش کیا۔ انھوں نے ہاٹ اسپرنگز واقعے میں بچ جانے والے تین ارکان کو اعزاز سے سرفراز کیا۔ انھوں نے نیشنل پولیس میموریل کے میوزیم کا افتتاح بھی کیا اور وزیٹرز بک پر دستخط بھی کئے۔

اس موقع پر خطاب کرتے ہوئے وزیر اعظم نے قوم کی خدمت کے لیے اپنی جان نچھاور کرنے والے پولیس اہلکاروں کے حوصلے اور قربانی کو سلام کیا۔ انھوں نے ان پولیس اہلکاروں کی قربانیوں کو یاد کیا جنھوں نے ہاٹ اسپرنگز، لداخ میں بہادری سے لڑائی کی اور ان کے خاندان اور احباب کے لیے احترام کا اظہار کیا۔

نیشنل پولیس میموریل کو قوم کے نام وقف کرنے میں خوشی کا اظہار کرتے ہوئے وزیر اعظم نے کہا کہ میموریل کے وسط میں لگائی گئی لاٹھ  پولیس دستوں کی صلاحیت، حوصلے اور خدمت کے جذبے کی نمائندگی کرتی ہے۔ انھوں نے کہا کہ نیشنل پولیس میموریل سے تعلق رکھنے والی ہر ایک شے شہریوں کو تحریک دے گی اور انھیں پولیس اور نیم فوجی دستوں کے اہلکاروں کی بہادری سے متعارف کراتی ہے۔ انھوں نے کہا کہ اس وقت ملک میں جو امن، سکیورٹی اور خوشحالی قائم ہے وہ پولیس، نیم فوجی اور مسلح افواج کی قربانیوں اور مسلسل کوششوں کے نتیجے میں ہی ممکن ہو پائی ہے۔ وزیر اعظم نے نیشنل ڈیزاسٹر رسپانس فورسیز اور ریاستی ڈیزاسٹر رسپانس فورسز کی خدمات اور قربانیوں کا بھی ذکر کیا۔

نیشنل پولیس میموریل کا ذکر کرتے ہوئے وزیر اعظم نے کہا کہ اس میموریل کو این ڈی اے حکومت نے ترجیح دی ہے اور وقت پر کام مکمل ہوا ہے۔ انھوں نے کہا کہ یہ میموریل حکومت کے اس نظریئے کی عکاسی کرتا ہے کہ قوم کی تعمیر میں کلیدی رول ادا کرنے والے لوگوں کا زیادہ سے زیادہ احترام کیا جانا چاہیے۔

ٹیکنالوجی کی اہمیت پر زور دیتے ہوئے وزیر اعظم نے پولیس دستوں سے کہا کہ وہ روزانہ اپنے فرائض کی انجام دہی میں ٹیکنالوجی اور اختراع اختیار کریں۔ اس سلسلے میں وزیر اعظم نے پولیس دستوں کی جدیدکاری کی اسکیم (ایم پی ایف) کا ذکر کیا جو ٹیکنالوجی، جدید مواصلاتی نظام اور جدید ہتھیاروں کے ذریعہ پولیس دستوں کی جدید کاری کا کام کر رہی ہے۔

وزیر اعظم نے کہا کہ پولیس دستوں کو پولیس اور معاشرے کے درمیان تعلق کو مضبوط کرنے میں ایک بڑا رول ادا کرنا ہوگا۔ وزیر اعظم نے کہا کہ اس کے لیے پولیس دستوں کو پولیس اسٹیشنوں کو اور زیادہ عوام دوست بنانا ہوگا۔

نیشنل پولیس میموریل میں ایک وسطی لاٹھ، ایک دیوار شجاعت، جس پر اپنے فرض کی ادائیگی کے لیے اپنی جان کی قربا نی دینے والےپولیس اہلکاروں  کے نام کندہ ہیں۔ اور ایک جدید ترین میوزیم شامل ہے، جو شہید پولیس اہلکاروں کی یاد کے نام وقف کیا گیا ہے۔

۔ ۔ ۔ ۔ ۔ ۔ ۔ ۔ ۔ ۔

( م ن ۔ ا گ    ۔ را  ۔ 21 – 10 – 2018)

 U. No. 5406