પીએમઇન્ડિયા

મિત્રો,

વૈશ્વિક શાંતિ અને સુરક્ષા ફક્ત એક આદર્શ નથી, તે આપણા સામાન્ય હિતો અને ભવિષ્યનો પાયો છે. માનવતાનો વિકાસ ફક્ત શાંતિપૂર્ણ અને સુરક્ષિત વાતાવરણમાં જ શક્ય છે. આ ઉદ્દેશ્યને પૂર્ણ કરવામાં BRICSની ખૂબ જ મહત્વપૂર્ણ ભૂમિકા છે. આપણે એક થવું પડશે અને આપણા સામાન્ય પડકારોનો સામનો કરવા માટે સામૂહિક પ્રયાસો કરવા પડશે. આપણે સાથે મળીને આગળ વધવું પડશે.

મિત્રો,

આજકાલ માનવતા માટે આતંકવાદ સૌથી ગંભીર પડકાર તરીકે ઉભરી આવ્યો છે. તાજેતરમાં ભારતે એક અમાનવીય અને કાયર આતંકવાદી હુમલાનો સામનો કર્યો. 22 એપ્રિલના રોજ, પહેલગામમાં આતંકવાદી હુમલો ભારતની આત્મા, ઓળખ અને ગૌરવ પર સીધો હુમલો હતો. આ હુમલો ફક્ત ભારત માટે જ નહીં, પરંતુ સમગ્ર માનવતા માટે એક ફટકો હતો. આ દુઃખની ઘડીમાં હું તે મિત્ર દેશોનો હૃદયપૂર્વક આભાર વ્યક્ત કરું છું જેઓ અમારી સાથે ઉભા હતા. જેમણે સમર્થન અને સંવેદના વ્યક્ત કરી હતી.

આતંકવાદની નિંદા એ આપણો ‘સિદ્ધાંત‘ હોવો જોઈએ, ફક્ત ‘સુવિધા‘ નહીં. જો આપણે પહેલા જોઈએ કે હુમલો કયા દેશમાં, કોની સામે થયો છે તો તે માનવતા સામે વિશ્વાસઘાત હશે.

મિત્રો,

આતંકવાદીઓ સામે પ્રતિબંધો લાદવામાં કોઈ ખચકાટ ન હોવો જોઈએ. આતંકવાદના પીડિતો અને સમર્થકોને એક જ માપદંડ પર તોલી શકાય નહીં. વ્યક્તિગત કે રાજકીય લાભ માટે, આતંકવાદને મૌન સંમતિ આપવી, આતંકવાદ કે આતંકવાદીઓને ટેકો આપવો તે કોઈપણ સંજોગોમાં સ્વીકાર્ય ન હોવું જોઈએ. આતંકવાદ અંગે શબ્દો અને કાર્યોમાં કોઈ તફાવત ન હોવો જોઈએ. જો આપણે આ ન કરી શકીએ, તો સ્વાભાવિક રીતે જ પ્રશ્ન ઉભો થાય છે કે શું આપણે આતંકવાદ સામેની લડાઈ પ્રત્યે ગંભીર છીએ કે નહીં?

મિત્રો,

પશ્ચિમ એશિયાથી લઈને યુરોપ સુધી આજે દુનિયા વિવાદો અને તણાવોથી ઘેરાયેલી છે. ગાઝામાં જે માનવીય  પરિસ્થિતિ છે તે ખૂબ ચિંતાનો વિષય છે. ભારત દ્રઢપણે માને છે કે પરિસ્થિતિઓ ગમે તેટલી મુશ્કેલ હોય, શાંતિનો માર્ગ માનવતાના કલ્યાણ માટે એકમાત્ર વિકલ્પ છે.

ભારત ભગવાન બુદ્ધ અને મહાત્મા ગાંધીની ભૂમિ છે. આપણા માટે યુદ્ધ અને હિંસા માટે કોઈ સ્થાન નથી. ભારત એવા દરેક પ્રયાસને સમર્થન આપે છે જે વિશ્વને વિભાજન અને સંઘર્ષમાંથી બહાર કાઢે છે અને તેને સંવાદ, સહયોગ અને સંકલન તરફ દોરી જાય છે અને એકતા તેમજ વિશ્વાસ વધારે છે. આ દિશામાં અમે બધા મિત્ર દેશો સાથે સહયોગ અને ભાગીદારી માટે પ્રતિબદ્ધ છીએ. આભાર.

મિત્રો,

છેલ્લે હું તમને બધાને આવતા વર્ષે ભારતની અધ્યક્ષતામાં યોજાનાર બ્રિક્સ સમિટ માટે ભારત આવવા આમંત્રણ આપું છું.

ખૂબ ખૂબ આભાર.

AP/IJ/GP/JT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964@gmail.com [ 0KB ]