পি এম ইণ্ডিয়া

প্ৰধানমন্ত্ৰী শ্ৰী নৰেন্দ্ৰ মোদীয়ে আজি ক্ষমতা নিৰ্মাণ আয়োগ (চি বি চি)ৰ প্ৰতিষ্ঠা দিৱস উপলক্ষে এক ভিডিঅ’ বাৰ্তাৰ জৰিয়তে কৰ্মযোগী সাধনা সপ্তাহ সম্বোধন কৰে।

প্ৰধানমন্ত্ৰী শ্ৰী নৰেন্দ্ৰ মোদীয়ে আজি ভিডিঅ’ বাৰ্তাৰ জৰিয়তে কৰ্মযোগী সাধনা সপ্তাহ সম্বোধন কৰি অংশগ্ৰহণকাৰী সকলোকে শুভেচ্ছা জ্ঞাপন কৰে। এই অনুষ্ঠানটো ক্ষমতা নিৰ্মাণ আয়োগৰ (চি বি চি)প্ৰতিষ্ঠা দিৱসৰ লগত সংগতি আয়োজিত কৰা হৈছে।

দ্ৰুতগতিত সলনি হোৱা বিশ্বৰ সৈতে গতি বজাই ৰাখিবলৈ ৰাজহুৱা সেৱাৰ প্ৰয়োজনীয়তাৰ ওপৰত গুৰুত্ব আৰোপ কৰি প্ৰধানমন্ত্ৰীগৰাকীয়ে উল্লেখ কৰে যে দ্ৰুতগতিত সলনি হোৱা গোলকীয় ব্যৱস্থাৰ মাজত ভাৰতে দ্ৰুতগতিত আগবাঢ়িছে আৰু ইয়াৰ শাসন ব্যৱস্থা নিৰন্তৰভাৱে আপডেট কৰিব লাগিব। ‘একবিংশ শতিকাত আমাৰ ৰাজহুৱা সেৱা প্ৰাসংগিক আৰু প্ৰতিক্ৰিয়াশীল হৈ থকাটো নিশ্চিত কৰাৰ বাবে কৰ্মযোগী সাধনা সপ্তাহ হৈছে সেই প্ৰচেষ্টাৰ এক গুৰুত্বপূৰ্ণ যোগসূত্ৰ’, শ্ৰী মোদীয়ে কয়।

আজি শাসনৰ পথপ্ৰদৰ্শক দৰ্শনৰ বিষয়ে বিশদভাৱে উল্লেখ কৰি প্ৰধানমন্ত্ৰীগৰাকীয়ে উল্লেখ কৰে যে প্ৰশাসনক চালিত কৰা মূল মন্ত্ৰ হৈছে নাগৰিকক সৰ্বোচ্চ বুলি গণ্য কৰা ‘নাগৰিক দেৱ ভৱ’। তেওঁ গুৰুত্ব আৰোপ কৰি কয় যে নাগৰিকসকলৰ প্ৰতি অধিক সক্ষম আৰু সংবেদনশীল হ’বলৈ জনসেৱাক পুনৰ অভিমুখ কৰা হৈছে। ‘প্ৰশাসনক এতিয়া প্ৰকৃততে নাগৰিককেন্দ্ৰিক কৰি এক নতুন পৰিচয় দিয়া হৈছে’, প্ৰধানমন্ত্ৰী মোদীয়ে মন্তব্য কৰে।

ক্ষমতা নিৰ্মাণ আয়োগৰ উৎপত্তিৰ প্ৰতি লক্ষ্য ৰাখি প্ৰধানমন্ত্ৰীয়ে কয় যে যদিও স্বাধীনতাৰ পাছৰে পৰা বহুতো প্ৰতিষ্ঠানে বিভিন্ন গুৰুত্বৰে কাম কৰি আহিছে, প্ৰতিজন চৰকাৰী কৰ্মচাৰীৰ সামৰ্থ্য বৃদ্ধিৰ লক্ষ্যৰে এক সমৰ্পিত সংস্থাৰ স্পষ্ট প্ৰয়োজন আছিল। ‘এই চিন্তাই ক্ষমতা নিৰ্মাণ আয়োগৰ জন্ম দিছিল, যি ব্যৱস্থাই প্ৰতিজন কৰ্মযোগীৰ সবলীকৰণৰ ওপৰত গুৰুত্ব আৰোপ কৰিছে’, তেওঁ উল্লেখ কৰে। চি বি চি-ক ইয়াৰ প্ৰতিষ্ঠা দিৱসত অভিনন্দন জনাই আৰু আইগ’ট মিছন কৰ্মযোগীৰ সফল ভূমিকাক স্বীকাৰ কৰি শ্ৰী মোদীয়ে এই প্ৰচেষ্টাসমূহে আধুনিক, সক্ষম, সমৰ্পিত আৰু সংবেদনশীল কৰ্মযোগীৰ এটা দল গঠন কৰিব বুলি আস্থা প্ৰকাশ কৰে।

এই পদক্ষেপক বিকশিত ভাৰতৰ বিস্তৃত দৃষ্টিভংগীৰ সৈতে সংযোগ কৰি, প্ৰধানমন্ত্ৰীয়ে সেৱা তীৰ্থৰ উদ্বোধনৰ সময়ত তেওঁৰ শেহতীয়া ভাষণৰ কথা স্মৰণ কৰে আৰু দ্ৰুত অৰ্থনৈতিক বিকাশ, আধুনিক আন্তঃগাঁথনি, প্ৰযুক্তি গ্ৰহণ তথা এক বৃহৎ দক্ষ কৰ্মশক্তিৰ প্ৰয়োজনীয়তাৰ কথা পুনৰ নিশ্চিত কৰে। তেওঁ গুৰুত্ব আৰোপ কৰি কয় যে এই লক্ষ্যসমূহ প্ৰাপ্ত কৰাৰ ক্ষেত্ৰত ৰাজহুৱা প্ৰতিষ্ঠান আৰু ৰাজহুৱা কৰ্মচাৰীসকলৰ এক গুৰুত্বপূৰ্ণ ভূমিকা আছে। ‘আজিৰ ভাৰত গভীৰভাৱে আকাংক্ষিত, প্ৰতিজন নাগৰিকৰ সপোন আৰু লক্ষ্য আছে আৰু সেইবোৰ পূৰণ কৰিবলৈ সৰ্বাধিক সমৰ্থন আগবঢ়োৱাৰ দায়িত্ব আমাৰ সকলোৰে ওপৰত আছে’, শ্ৰী মোদীয়ে দৃঢ়তাৰে কয়।

নাগৰিকসকলৰ জীৱন ধাৰণৰ সূচলতা আৰু জীৱনৰ মান উন্নত কৰাৰ বাবে প্ৰশাসন মূল হ’ব লাগিব বুলি উল্লেখ কৰি প্ৰধানমন্ত্ৰীয়ে ৰাজহুৱা কৰ্মচাৰীসকলক প্ৰতিদিনে কিবা নতুন শিকিবলৈ আৰু কৰ্মযোগীৰ প্ৰকৃত মনোভাৱত নিজকে গঢ়িবলৈ আহ্বান জনায়। ‘আমাৰ প্ৰশাসনে নাগৰিকসকলৰ জীৱন ধাৰণৰ মান দিন যোৱাৰ লগে লগে উন্নত হোৱাটো নিশ্চিত কৰিব লাগে, এয়া হৈছে আমাৰ প্ৰকৃত মান’, শ্ৰী মোদীয়ে দৃঢ়তাৰে কয়।

প্ৰশাসনিক সংস্কৃতিত এক মৌলিক পৰিৱৰ্তনৰ আহ্বান জনাই প্ৰধানমন্ত্ৰীয়ে আঙুলিয়াই দিয়ে যে পুৰণি ব্যৱস্থাই এজন ‘বিষয়া’ হোৱাৰ ওপৰত অত্যাধিক গুৰুত্ব আৰোপ কৰিছিল, আনহাতে আজি দেশৰ গুৰুত্ব দৃঢ়ভাৱে কৰ্তব্যৰ মনোভাৱৰ ওপৰত। তেওঁ মনত পেলাই দিয়ে যে সংবিধানে নিজেই কৰ্তব্য পালনৰ জৰিয়তে অধিকাৰ প্ৰদান কৰে। প্ৰধানমন্ত্ৰী মোদীয়ে কয়, ‘প্ৰতিটো সিদ্ধান্ত লোৱাৰ আগতে, যেতিয়া আপুনি আপোনাৰ কৰ্তব্যই কি দাবী কৰে সেই বিষয়ে চিন্তা কৰে, আপোনাৰ সিদ্ধান্তৰ প্ৰভাৱ স্বয়ংক্ৰিয়ভাৱে বহুগুণে বৃদ্ধি পাব।’

ৰাজহুৱা কৰ্মচাৰীসকলক তেওঁলোকৰ বৰ্তমানৰ কামক ভৱিষ্যতৰ বৃহৎ কেনভাছৰ ওপৰত চাবলৈ আহ্বান জনাই শ্ৰী মোদীয়ে তেওঁলোকৰ ব্যক্তিগত সিদ্ধান্তই কেনেদৰে লাখ লাখ লোকৰ জীৱন সলনি কৰিব পাৰে আৰু ব্যক্তিগত পৰিৱৰ্তনে কেনেদৰে প্ৰতিষ্ঠানিক পৰিৱৰ্তন সাধন কৰিব পাৰে সেই বিষয়ে  তেওঁলোকক নিৰন্তৰভাৱে চিন্তা কৰিবলৈ কয়। ব্যক্তিগত অভিজ্ঞতাৰ পৰা আহৰণ কৰি প্ৰধানমন্ত্ৰীয়ে উল্লেখ কৰে যে এনে পৰিৱৰ্তনশীল কামৰ বাবে অপৰিসীম শক্তিৰ প্ৰয়োজন। ‘এই শক্তি কেৱল নিঃস্বাৰ্থ সেৱাৰ মনোভাৱৰ পৰাহে আহিব পাৰে’, তেওঁ মন্তব্য কৰে

প্ৰযুক্তিৰ প্ৰয়োজনীয় গুৰুত্বৰ কথা উল্লেখ কৰি প্ৰধানমন্ত্ৰীয়ে প্ৰশাসন, সেৱা প্ৰদান আৰু অৰ্থনীতিত বিস্তৃত হৈ যোৱা এঘাৰ বছৰ ধৰি চৰকাৰী কাম-কাজত প্ৰযুক্তিৰ গভীৰ একত্ৰীকৰণৰ কথা উল্লেখ কৰে। তেওঁ উল্লেখ কৰে যে কৃত্ৰিম বুদ্ধিমত্তাৰ আগমনৰ লগে লগে এই পৰিৱৰ্তনবোৰ আৰু অধিক ত্বৰান্বিত হ’বলৈ সাজু হৈছে। শ্ৰী মোদীয়ে গুৰুত্ব আৰোপ কৰি কয়, ‘এজন উন্নত প্ৰশাসক, এজন উন্নত ৰাজহুৱা কৰ্মচাৰী হ’ব যিগৰাকীৰ প্ৰযুক্তি আৰু তথ্যৰ প্ৰতি দৃঢ় বোধগম্যতা থাকিব, ই সিদ্ধান্ত গ্ৰহণৰ মূল আধাৰ গঠন কৰিব’। তেওঁ আশা প্ৰকাশ কৰে যে সাধনা সপ্তাহৰ সময়ত দক্ষতা বৃদ্ধি আৰু এ আই-ত নিৰন্তৰ শিক্ষণ এক গুৰুত্বপূৰ্ণ কেন্দ্ৰবিন্দু হ’ব।

ভাৰতৰ। যুক্তৰাষ্ট্ৰীয় গাঁথনিৰ প্ৰতি দৃষ্টি আকৰ্ষণ কৰি প্ৰধানমন্ত্ৰীয়ে গুৰুত্ব আৰোপ কৰি কয় যে দেশৰ সফলতা হৈছে ইয়াৰ সকলো ৰাজ্যৰ সামূহিক সফলতা। তেওঁ লক্ষ্য কৰে যে কেইবা দশক পুৰণি শ্ৰেণীবিভাজন, অগ্ৰগামী ৰাজ্য, পিছপৰা ৰাজ্য, বিমাৰু ৰাজ্যসমূহ ধ্বংস কৰা হৈছে, আৰু ৰাজ্যসমূহৰ মাজৰ ব্যৱধানবোৰ একেধৰণৰ প্ৰচেষ্টাৰ তীব্ৰতাৰ জৰিয়তে পূৰণ কৰিব লাগিব। প্ৰধানমন্ত্ৰী মোদীয়ে দৃঢ়তাৰে কয়, ‘আমি ওখ প্ৰাচীৰ ভংগ কৰিব লাগিব আৰু উন্নত সমন্বয়, অংশীদাৰী বুজাবুজি আৰু এক সম্পূৰ্ণ চৰকাৰী দৃষ্টিভংগীৰে আগবাঢ়ি যাব লাগিব, তেতিয়াহে প্ৰতিটো অভিযান সফল হ’ব।’

ভাষণৰ সামৰণিত প্ৰধানমন্ত্ৰীয়ে কৰ্মচাৰীসকলক মনত পেলাই দিয়ে যে সাধাৰণ নাগৰিকৰ বাবে স্থানীয় চৰকাৰৰ কাৰ্যালয় হৈছে সমগ্ৰ চৰকাৰৰ মুখ। তেওঁ উল্লেখ কৰে যে বিষয়াসকলৰ কাম কৰা শৈলী আৰু আচৰণে প্ৰত্যক্ষভাৱে গণতন্ত্ৰ আৰু সাংবিধানিক প্ৰতিষ্ঠানসমূহৰ ওপৰত জনসাধাৰণৰ বিশ্বাস গঠন কৰে। ‘আমি যি কৰোঁ, যি স্তৰতে কৰোঁ, আমি সেই বিশ্বাস সুৰক্ষিত কৰিব লাগিব, ই হৈছে আমাৰ গণতন্ত্ৰৰ ভেটি’, শ্ৰী মোদীয়ে কয়। তেওঁ পুনৰ এবাৰ ক্ষমতা নিৰ্মাণ আয়োগক অভিনন্দন জনায় আৰু বিশ্বাস প্ৰকাশ কৰে যে কৰ্মযোগী সাধনা সপ্তাহ দেশৰ বিকশিত ভাৰত হোৱাৰ যাত্ৰাৰ এক গুৰুত্বপূৰ্ণ অধ্যায় হৈ পৰিব।

Sharing my remarks during the Karmayogi Sadhana Saptah.
https://t.co/8nkQJE1QZQ

— Narendra Modi (@narendramodi) April 2, 2026

***

MJPS/PRK/MK