পি এম ইণ্ডিয়া

চাইপ্ৰাছৰ মহামান্য ৰাষ্ট্ৰপতি

দুয়োখন দেশৰ প্ৰতিনিধিসকল,

সংবাদ মাধ্যমৰ বন্ধুসকল,

নমস্কাৰ!

কালিমেৰা

চাইপ্ৰাছৰ ৰাষ্ট্ৰপতি আৰু তেওঁৰ প্ৰতিনিধি দলক ভাৰতলৈ আদৰণি জনাই মই অতি আনন্দিত হৈছো। ৰাষ্ট্ৰপতি মহোদয়, যোৱা বছৰ আপুনি চাইপ্ৰাছত আমাক অতি ঊষ্ম আদৰণি জনাইছিল। ভাৰতৰ প্ৰতি বিশেষ সন্মান প্ৰদৰ্শন কৰি আপোনালোকে মোক চাইপ্ৰাছৰ সৰ্বোচ্চ সন্মানৰে সন্মানিত কৰিলে।

এই ভ্ৰমণৰ সময়ছোৱাত আপোনাৰ আত্মীয়তা, আপোনাৰ মৰম আৰু ভাৰতৰ প্ৰতি আপোনাৰ বিশেষ আকৰ্ষণ অতি গভীৰভাৱে আমি অনুভৱ কৰিছিলো। আৰু আজি আপোনাৰ ভাৰত ভ্ৰমণ আমাৰ উমৈহতীয়া যাত্ৰাৰ পৰৱৰ্তী গুৰুত্বপূৰ্ণ মাইলৰ খুঁটি।

বন্ধুসকল,

ভাৰত আৰু চাইপ্ৰাছৰ মাজৰ বন্ধুত্ব শক্তিশালী আৰু ভৱিষ্যমুখী। গণতন্ত্ৰ আৰু আইনৰ শাসনৰ দৰে মূল্যবোধৰ ওপৰত গঢ়ি উঠা বিশ্বাস আমাৰ অংশীদাৰিত্বৰ আধাৰ। আমি সকলো দেশৰ সাৰ্বভৌমত্ব আৰু আঞ্চলিক অখণ্ডতাক সন্মান জনাইছো। ভাৰত এই নীতিসমূহৰ প্ৰতি সম্পূৰ্ণৰূপে দায়বদ্ধ আৰু ভৱিষ্যতেও দায়বদ্ধ হৈ থাকিব।

আৰু আজি ভাৰত আৰু ইউৰোপ- দুয়োটা অঞ্চলৰ মাজৰ সম্পৰ্কই এক নতুন সোণালী যুগত প্ৰৱেশ কৰাৰ লগে লগে চাইপ্ৰাছে কেৱল ইউৰোপীয় সংঘৰ পৰিষদৰ অধ্যক্ষতা কৰাই নহয়, বৰঞ্চ ভাৰত আৰু সমগ্ৰ ইউৰোপৰ মাজত এক গুৰুত্বপূৰ্ণ বিনিয়োগ প্ৰৱেশদ্বাৰ হিচাপেও আত্মপ্ৰকাশ কৰিছে।

বন্ধুসকল,

চাইপ্ৰাছ ভাৰতৰ শীৰ্ষ ১০ খন বিনিয়োগকাৰী দেশৰ ভিতৰত অন্যতম; যোৱা দশকত চাইপ্ৰাছৰ পৰা ভাৰতত বিনিয়োগ প্ৰায় দুগুণ হৈছে। দুয়োখন দেশৰ মাজত আস্থা বৃদ্ধি হৈছে। ভাৰত-ইউৰোপীয় সংঘৰ মুক্ত বাণিজ্য চুক্তিয়ে বহুতো নতুন সম্ভাৱনা মুকলি কৰিছে। ইয়াৰ সুবিধা লৈ আমি অহা পাঁচ বছৰৰ ভিতৰত এই বিনিয়োগ পুনৰ দুগুণ কৰাৰ লক্ষ্য লৈছো। আৰু এই সংকল্পক বাস্তৱায়িত কৰিবলৈ আজি আমি আমাৰ বিশ্বস্ত সম্পৰ্কক এক কৌশলগত অংশীদাৰিত্বলৈ উন্নীত কৰিছো।

বন্ধুসকল,

ভাৰত আৰু চাইপ্ৰাছৰ মাজৰ এই কৌশলগত অংশীদাৰিত্বই দুয়োখন দেশৰ বিত্তীয় আৰু সেৱা কেন্দ্ৰসমূহক সংযোগ কৰি বাণিজ্যৰ বাবে মূলধন মুকলি কৰিব। ইয়াৰ জৰিয়তে চাইপ্ৰাছৰ আন্তঃগাঁথনি, শক্তি আৰু কৃষি খণ্ডত ভাৰতীয় কোম্পানীসমূহৰ বাবে নতুন সুযোগ মুকলি হ’ব। তদুপৰি এই পদক্ষেপে ভাৰতৰ দ্ৰুতগতিত বৃদ্ধি পোৱা জাহাজ পৰিবহণ আৰু সামুদ্ৰিক খণ্ডত নতুন বিনিয়োগ সৃষ্টি কৰিব।

চাইপ্ৰাছৰ সৈতে একেলগে, আমি জিআইএফটি চহৰক এক বিশ্বব্যাপী বিত্তীয় আৰু সেৱা কেন্দ্ৰ হিচাপে গঢ়ি তোলাৰ দৃষ্টিভংগী ত্বৰান্বিত কৰিম তথা দুয়োখন দেশৰ উদ্ভাৱন আৰু ষ্টাৰ্ট-আপ পৰিবেশতন্ত্ৰৰ মাজত সংযোগ বৃদ্ধি কৰিম।

বন্ধুসকল,

প্ৰতিৰক্ষা আৰু নিৰাপত্তা সহযোগিতাও আমাৰ সম্পৰ্কৰ এক গুৰুত্বপূৰ্ণ স্তম্ভ। আমি অতি আনন্দিত যে বিগত বছৰবোৰত দুয়োখন দেশৰ মাজত সামৰিক বিনিময় আৰু প্ৰশিক্ষণ সহযোগিতা বৃদ্ধি পাইছে। আজি আমি চাইবাৰ সুৰক্ষা, সামুদ্ৰিক সুৰক্ষা আৰু সন্ত্ৰাসবাদবিৰোধী সহযোগিতা অধিক শক্তিশালী কৰাৰ সিদ্ধান্ত লৈছো।

কেৱল এয়াই নহয়, আমি ভাৰত-প্ৰশান্ত মহাসাগৰ উদ্যোগ তথা ভাৰত-মধ্য প্ৰাচ্য ইউৰোপ অৰ্থনৈতিক কৰিডৰৰ দৰে গুৰুত্বপূৰ্ণ পদক্ষেপৰ সৈতে সংযোগ নিশ্চিত কৰাৰ বাবেও একেলগে কাম কৰিম।

বন্ধুসকল,

চাইপ্ৰাছত থকা ভাৰতীয় পেছাদাৰী আৰু শিক্ষাৰ্থীসকলে আমাৰ জনসাধাৰণৰ মাজৰ সম্পৰ্ক অধিক শক্তিশালী কৰি তুলিছে। এই সম্পৰ্কবোৰ অধিক শক্তিশালী কৰিবলৈ, আমি এক ব্যাপক প্ৰব্ৰজন আৰু গতিশীলতা অংশীদাৰিত্বত প্ৰৱেশ কৰিবলৈ সন্মত হৈছো; লগতে অতি সোনকালেই এক সামাজিক সুৰক্ষা চুক্তিও কৰা হ’ব।

আজি আমি সংস্কৃতি আৰু উচ্চ শিক্ষাৰ ক্ষেত্ৰতো চুক্তি স্বাক্ষৰ কৰিছো, যাৰ জৰিয়তে দুয়োখন দেশৰ মাজত সাংস্কৃতিক বিনিময় আৰু গৱেষণা সহযোগিতা গভীৰ হ’ব।

বন্ধুসকল,

আজি আমি একেলগে আন্তৰ্জাতিক বিষয়সমূহৰ বিষয়েও আলোচনা কৰিলো। ইউক্ৰেইন হওক বা পশ্চিম এছিয়া, আমি সংঘাত আৰু শান্তিৰ আগতীয়া সমাপ্তিৰ বাবে চলোৱা প্ৰচেষ্টাৰ প্ৰতি সমৰ্থন অব্যাহত ৰাখিম। আমি এইক্ষেত্ৰতো একমত হৈছো যে বৰ্ধিত গোলকীয় প্ৰত্যাহ্বানৰ মোকাবিলা কৰিবলৈ আন্তৰ্জাতিক প্ৰতিষ্ঠানসমূহৰ সংস্কাৰ জৰুৰী আৰু গুৰুত্বপূৰ্ণ।

মহামহিম,

ভাৰত আৰু চাইপ্ৰাছৰ মাজৰ সম্পৰ্ক বাৰে বাৰে পৰীক্ষাৰ সন্মুখীন হৈছে। আজি ভাৰত-চাইপ্ৰাছ কৌশলগত অংশীদাৰিত্ব গঠনৰ লগে লগে আমি আমাৰ সম্পৰ্কক নতুন উচ্চাকাংক্ষা আৰু নতুন গতি দিব বিচাৰিছো।

আহক, আমি একেলগে আমাৰ সম্পৰ্কক সহযোগিতাৰ পৰা সহ-সৃষ্টিলৈ আৰু অংশীদাৰিত্বৰ পৰা অংশীদাৰী সমৃদ্ধিলৈ লৈ যাওঁ।

ভাৰত আৰু চাইপ্ৰাছে একেলগে এক সুৰক্ষিত, সমৃদ্ধিশালী আৰু উন্নত ভৱিষ্যত গঢ়ি তুলিব।

বহুত ধন্যবাদ।

***

MJPS/SS/PRK/DD