પીએમઇન્ડિયા

80મા સ્વાતંત્ર્ય દિવસે લાલ કિલ્લાની પ્રાચીર પરથી રાષ્ટ્રને સંબોધિત કરતા, પ્રધાનમંત્રી શ્રી નરેન્દ્ર મોદીએ આર્ટિફિશિયલ ઈન્ટેલિજન્સ, શિક્ષણ, રમતગમત, સિવિલ ડિફેન્સ, સેમિકન્ડક્ટર મેન્યુફેક્ચરિંગ, અણુ ઊર્જા અને મહિલા સંચાલિત વિકાસને આવરી લેતી શ્રેણીબદ્ધ પહેલો અને લક્ષ્યોની જાહેરાત કરી હતી.

પ્રધાનમંત્રીના સંબોધનની મુખ્ય જાહેરાતોમાં નીચેનાનો સમાવેશ થાય છે:

1. એક કરોડ યુવાનો માટે AI સ્કિલિંગ: પ્રધાનમંત્રીએ જાહેરાત કરી હતી કે આગામી એક વર્ષમાં એક કરોડ યુવાનોને AI કૌશલ્યની તાલીમ આપવામાં આવશે. આર્ટિફિશિયલ ઈન્ટેલિજન્સના ઝડપી વિસ્તરણનો ઉલ્લેખ કરતા, તેમણે કહ્યું કે આ પહેલ ભારતના યુવાનોને AIની દુનિયામાં નેતૃત્વ કરવાની ક્ષમતાથી સજ્જ કરવામાં મદદ કરશે.
2. વિવિધ પરીક્ષાઓ માટે મફત ઓનલાઈન કોચિંગ: પ્રધાનમંત્રીએ વિવિધ પરીક્ષાઓની તૈયારી કરી રહેલા યુવાનો માટે મફત ઓનલાઈન કોચિંગની જાહેરાત કરી હતી. ગરીબ અને મધ્યમ વર્ગના પરિવારો પર કોચિંગ ક્લાસના નાણાકીય બોજનો ઉલ્લેખ કરતા, તેમણે કહ્યું કે દેશના યુવાનોને મફત કોચિંગ આપવા માટે ડિજિટલ પબ્લિક ઈન્ફ્રાસ્ટ્રક્ચર, ઉપલબ્ધ પ્રતિભા અને શિક્ષકોને એકસાથે લાવીને એક સંપૂર્ણ નેટવર્ક તૈયાર કરવામાં આવશે.
3. 5-15 વર્ષની વયના બાળકો માટે દેશવ્યાપી રમતગમત પ્રતિભા શોધ: પ્રધાનમંત્રીએ પાંચથી 15 વર્ષની વયના બાળકો વચ્ચે રમતગમતની પ્રતિભા ઓળખવા માટે ગામડાઓ, શહેરો અને શાળાઓમાં પ્રતિભા શોધ અભિયાનની જાહેરાત કરી હતી. ઓળખાયેલા બાળકોને દેશનું પ્રતિનિધિત્વ કરવા સક્ષમ ખેલાડીઓ બનાવવા માટે વિશેષ તાલીમ આપવામાં આવશે. ઓલિમ્પિક સ્પર્ધાઓ કે જેમાં ભારત હાલમાં ભાગ લેતું નથી અથવા ક્વોલિફાય થતું નથી તેનો ઉલ્લેખ કરતા, પ્રધાનમંત્રીએ કહ્યું કે આવી રમતોમાં ક્ષમતાઓ વિકસાવવા પર વધુ ભાર મૂકવામાં આવશે.
4. આધુનિક પડકારો માટે વાઇબ્રન્ટ સિવિલ ડિફેન્સ નેટવર્ક: યુદ્ધના બદલાતા સ્વરૂપ પર પ્રકાશ પાડતા, પ્રધાનમંત્રીએ જાહેરાત કરી હતી કે દેશમાં એક વાઇબ્રન્ટ સિવિલ ડિફેન્સ નેટવર્ક બનાવવામાં આવશે. તેમણે કહ્યું કે યુદ્ધ હવે માત્ર સરહદો પૂરતું સીમિત રહ્યું નથી અને તે રિફાઇનરીઓ, બેંકિંગ ક્ષેત્ર, ડેટા સેન્ટર્સ, ફેક્ટરીઓ અને અન્ય ઈન્ફ્રાસ્ટ્રક્ચરને પણ અસર કરી શકે છે. પ્રધાનમંત્રીએ કહ્યું કે અગાઉની સદીના યુદ્ધો અનુસાર વિકસાવવામાં આવેલી સિવિલ ડિફેન્સ વ્યવસ્થાઓ હવે જૂની થઈ ગઈ છે. તેથી નાગરિકોને આધુનિક પ્રણાલીઓથી માહિતગાર કરવામાં આવશે, અને આધુનિક પડકારોનો સામનો કરવા સક્ષમ એક વિશાળ સ્વૈચ્છિક સિવિલ ડિફેન્સ ફોર્સ વિકસાવવામાં આવશે.
5. આત્મનિર્ભરતાને મજબૂત કરવા વધુ સેમિકન્ડક્ટર પ્લાન્ટ્સ: પ્રધાનમંત્રીએ ડિજિટલ અને ટેકનોલોજીકલ વિશ્વમાં સેમિકન્ડક્ટર ચિપ્સની નિર્ણાયક ભૂમિકા પર ભાર મૂક્યો અને કહ્યું કે ભારત આ ક્ષેત્રમાં આત્મનિર્ભરતા તરફ આગળ વધી રહ્યું છે. તેમણે કહ્યું કે ત્રણ સેમિકન્ડક્ટર પ્લાન્ટ્સ શરૂ થઈ ચૂક્યા છે અને આ સુવિધાઓમાંથી ઉત્પાદનની નિકાસ થવા લાગી છે. પ્રધાનમંત્રીએ વધુમાં જણાવ્યું હતું કે આગામી સાત–આઠ વર્ષમાં અન્ય પાંચ–સાત કે આઠ સેમિકન્ડક્ટર પ્લાન્ટ્સ આવશે, અને સેમિકન્ડક્ટરમાં આત્મનિર્ભરતાને વિકસિત ભારત તરફના માર્ગ તરીકે વર્ણવ્યો હતો.
6. 2047 સુધીમાં 100 GW અણુ ઊર્જા ક્ષમતા: ચિપ્સ, AI અને ડેટા સેન્ટર્સની વધતી જતી ઊર્જા જરૂરિયાતો પર પ્રકાશ પાડતા, પ્રધાનમંત્રીએ ઊર્જા સુરક્ષા અને અણુ ઊર્જાના મહત્વ પર ભાર મૂક્યો હતો. તેમણે કહ્યું કે ભારત 2047 સુધીમાં 100 GWની અણુ ઊર્જા ક્ષમતાના લક્ષ્ય સાથે આગળ વધી રહ્યું છે અને આ દાયકાની અંદર પાંચ નવા અણુ રિએક્ટર શરૂ કરવાનું લક્ષ્ય ધરાવે છે. પ્રધાનમંત્રીએ એમ પણ કહ્યું કે ભારતે આ વર્ષે ફાસ્ટ બ્રીડર અણુ ટેકનોલોજીમાં એક મહત્વપૂર્ણ સીમાચિહ્ન પ્રાપ્ત કર્યું છે, જે અણુ બળતણમાં આત્મનિર્ભરતા તરફ એક મહત્વપૂર્ણ પગલું છે.
7. છ કરોડ લખપતિ દીદીઓનું લક્ષ્ય: રાષ્ટ્ર નિર્માણમાં મહિલાઓના યોગદાન પર પ્રકાશ પાડતા પ્રધાનમંત્રીએ કહ્યું કે ત્રણ કરોડ લખપતિ દીદીઓ બનાવવાનું અગાઉનું લક્ષ્ય પાર થઈ ગયું છે. તેમણે કહ્યું કે ભારત હવે છ કરોડ લખપતિ દીદીઓના લક્ષ્ય સાથે આગળ વધશે. તેમણે કહ્યું કે, બીજી ત્રણ કરોડ લખપતિ દીદીઓના નિર્માણથી મહિલાઓની શક્તિ દ્વારા ગ્રામીણ અર્થતંત્રમાં મોટો બદલાવ આવશે.

SM/DK/GP/JT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964@gmail.com [ 0KB ]