পি এম ইণ্ডিয়া

প্ৰধানমন্ত্ৰী শ্ৰী নৰেন্দ্ৰ মোদীয়ে আজি ইকনমিক টাইমছ ৱ’ৰ্ল্ড লীডাৰ্ছ ফ’ৰাম ২০২৬ত ভাষণ দিয়ে। উপস্থিত বিশিষ্ট ব্যক্তি, নীতি নিৰ্ধাৰক, ব্যৱসায়িক নেতৃবৰ্গক সম্ভাষণ জনাই তেওঁ এই সন্মানীয় সন্মিলনত অংশগ্ৰহণ কৰি গভীৰ আনন্দ প্ৰকাশ কৰে। এইবাৰৰ মূল বিষয় “শ্বেয়াৰড ফিউচাৰ”ৰ গুৰুত্ব আৰু প্ৰাসংগিকতাৰ ওপৰত গুৰুত্ব আৰোপ কৰি শ্ৰী মোদীয়ে কয় যে শেহতীয়া বছৰবোৰৰ গোলকীয় উত্তাল পৰিস্থিতিয়ে সকলো দেশৰ ভৱিষ্যত যে আন্তঃসংযোগী, সেই কথা প্ৰমাণ কৰিছে। তেওঁ উল্লেখ কৰে যে ভাৰত সদায় এই মনোভাবেৰে আগবাঢ়ি আহিছে। এই কাৰণেই জি-২০ৰ অধ্যক্ষতাৰ সময়ত ভাৰতৰ মন্ত্ৰ আছিল “এখন পৃথিৱী, এটা পৰিয়াল, এক ভৱিষ্যত।” শ্ৰী মোদীয়ে কয় যে ভাগ-বতৰা কৰা ভৱিষ্যতৰ এই মনোভাব আৰু ইয়াৰ লগত জড়িত দায়িত্বই একবিংশ শতিকাৰ বিশ্বৰ বহু সমস্যাৰ সমাধান কৰে।

প্ৰধানমন্ত্ৰীগৰাকীয়ে উন্নয়ন, সম্পদক অস্ত্ৰ হিচাপে ব্যৱহাৰ আৰু ক্ৰমবৰ্ধমান অনাস্থাৰ বিষয়ে বিশ্বজোৰা উদ্বেগকো সম্বোধন কৰে। তেওঁ এই কথাত গুৰুত্ব আৰোপ কৰে যে আন্তঃৰাষ্ট্ৰীয় সমাজে ভাৰতক বিকাশ আৰু আশাৰ ৰেঙণি হিচাপে গণ্য কৰে। তেওঁ ২৫ কোটি নাগৰিকক দৰিদ্ৰতাৰ পৰা উলিয়াই আনি বিশ্বৰ আটাইতকৈ দ্ৰুতগতিত বৃদ্ধি পোৱা বৃহৎ অৰ্থনীতিৰ মৰ্যাদা অক্ষুণ্ণ ৰখাৰ ক্ষেত্ৰত ভাৰতৰ সফলতাৰ ওপৰত আলোকপাত কৰে। শ্ৰী মোদীয়ে স্বাধীনতা দিৱসৰ ভাষণত ঘোষণা কৰা “সপ্তধাৰা” (উৎপাদন, প্ৰযুক্তি আৰু সেউজ অৰ্থনীতিকে ধৰি সাতটা মূল খণ্ড)ৰ ওপৰত চৰকাৰে গুৰুত্ব দিয়াৰ ওপৰত আলোকপাত কৰে। তেওঁ কয় যে ভাৰতে আজি নীতিগত পৰ্যায়ত পৰৱৰ্তী প্ৰজন্মৰ সংস্কাৰ হাতত লৈছে। প্ৰশাসনিক ​​পৰ্যায়ত সংস্কাৰ সাধন কৰা হৈছে আৰু জীৱনটো সহজ কৰি তোলা হৈছে। শ্ৰী মোদীয়ে কয় যে, “সংস্কাৰ আমাৰ বাবে বাধ্যবাধকতা নহয়। ই আমাৰ সৰ্বোচ্চ প্ৰতিশ্ৰুতি আৰু প্ৰত্যয়।”

বৰ্তমানৰ অৰ্থনৈতিক পৰিৱেশক অতীতৰ প্ৰতিবন্ধক নীতিৰ সৈতে তুলনা কৰি প্ৰধানমন্ত্ৰীগৰাকীয়ে হাস্যৰসেৰে লাইচেন্স ৰাজৰ উতপাদন-সংলগ্ন শাস্তি (পিএলপি)ৰ ধাৰণাটো বুজাই দিলে। তেওঁ কয় যে সেই যুগত কোম্পানীসমূহক নিৰ্ধাৰিত সীমাৰ বাহিৰত উৎপাদন কৰাৰ বাবে শাস্তি প্ৰদান কৰা হৈছিল আৰু সামগ্ৰী ধ্বংস কৰিবলৈ বাধ্য কৰোৱা হৈছিল। নাগৰিকক নিৰ্ভৰশীল কৰি ৰাখিবলৈ ইচ্ছাকৃতভাৱে নাটনি সৃষ্টি কৰা পূৰ্বৰ চৰকাৰসমূহৰ মানসিকতাক তেওঁ সমালোচনা কৰে। ইয়াৰ ফলত চাকৰি সৃষ্টিৰ ক্ষেত্ৰত যথেষ্ট প্ৰভাৱ পৰিছিল। শ্ৰী মোদীয়ে কয়, “এই মানসিকতাৰ লোকসকলে সদায় বিচাৰিছিল যে অত্যাৱশ্যকীয় সামগ্ৰীৰ তীব্ৰ নাটনি হওক। নাগৰিকক অৱদমিত কৰি ৰখাটো তেওঁলোকৰ ইচ্ছাকৃত নীতি আছিল।”

প্ৰশাসন ​​পদ্ধতিৰ পৰিৱৰ্তনত আলোকপাত কৰি প্ৰধানমন্ত্ৰীগৰাকীয়ে বিপৰ্যয়জনক পিএলপি আৰ্হিক বৰ্তমানৰ উৎপাদন-সংলগ্ন উদগনি (পিএলআই) আঁচনিৰ সৈতে তুলনা কৰে। তেওঁ তথ্যৰ দ্বাৰা চিত্ৰিত কৰিছিল যে মানসিকতাৰ পৰিৱৰ্তনে কেনেকৈ অৰ্থনৈতিক ফলাফলক ৰূপান্তৰিত কৰিব পাৰে। পিএলআই আঁচনিৰ সফলতাৰ উদাহৰণ দি তেওঁ কয় যে ইয়াৰ দ্বাৰা ২.৫ লাখ কোটি টকাৰ প্ৰকৃত বিনিয়োগ আকৰ্ষণ কৰা হৈছে, ২২ লাখ কোটি টকাৰ উৎপাদন আৰু বিক্ৰী হৈছে, ১৫ লাখ কোটি টকাৰ ৰপ্তানি হৈছে আৰু ১৪ লাখতকৈ অধিক চাকৰি সৃষ্টি হৈছে। শ্ৰী মোদীয়ে কয় যে “য’ত লাইচেন্স ৰাজৰ পুৰণি শাস্তিমূলক আৰ্হিয়ে নিবনুৱা সমস্যা বৃদ্ধি কৰিলে আজি আমাৰ উদগনিমূলক আৰ্হিটোৱে লাখ লাখ নতুন চাকৰি সৃষ্টি কৰিছে।”

দেশৰ দ্ৰুত উন্নয়নৰ কাৰণ ৰাজনৈতিক স্থিতিশীলতা আৰু নীতিৰ ধাৰাবাহিকতা বুলি উল্লেখ কৰি প্ৰধানমন্ত্ৰীগৰাকীয়ে প্ৰশাসন ব্যৱস্থাৰ সংস্কাৰৰ আধাৰত এক স্পষ্ট ৰূপৰেখা দাঙি ধৰে। তেওঁ ব্যাখ্যা কৰে যে “অনুমোদিত নোহোৱালৈকে নিষিদ্ধ”ৰ সলনি “নিষিদ্ধ নোহোৱালৈকে অনুমোদন” পদ্ধতি গ্ৰহণ কৰা হৈছে, যি বাৰে বাৰে আমোলাতন্ত্ৰিক অনুমোদনৰ প্ৰয়োজনীয়তা বহু পৰিমাণে হ্ৰাস কৰিছে। শ্ৰী মোদীয়ে কয়, “চৰকাৰ আৰু নাগৰিকৰ মাজৰ সম্পৰ্ক সন্দেহৰ আধাৰত নহয়, গভীৰ বিশ্বাসৰ আধাৰত হ’ব লাগিব।”

এই নতুন চিন্তাধাৰাক প্ৰতিফলিত কৰা নীতিগত সংস্কাৰৰ বিশদ বিৱৰণ দি প্ৰধানমন্ত্ৰীগৰাকীয়ে জন বিশ্বাস বিধেয়কৰ কথা উল্লেখ কৰে। এই বিধেয়কখনে বহুতো সৰু সৰু অপৰাধক অপৰাধমুক্ত কৰি কাৰাদণ্ডৰ ঠাইত আৰ্থিক শাস্তিৰ ব্যৱস্থা কৰিছে। উদ্যোগসমূহৰ ওপৰত বোজা হ্ৰাস কৰিবলৈ ৪০ হাজাৰৰো অধিক অভিযোগ নিৰ্মূল কৰা হৈছে আৰু ১৫০০ৰো অধিক পুৰণি আইন বিলুপ্ত কৰা হৈছে। শ্ৰী মোদীয়ে কয়, যেতিয়া আমি এই সকলোবোৰ বৃহৎ সংস্কাৰক একেলগে চাওঁ, তেতিয়া আমি অনুভৱ কৰোঁ যে আমাৰ ব্যৱসায়িক ক্ষেত্ৰৰ পৰা এক বিশাল বোজা নোহোৱা হৈছে।

ৰাজনৈতিক বিৰোধিতা সত্ত্বেও আইনী কাঠামো আধুনিকীকৰণৰ বাবে চৰকাৰে অব্যাহত ৰখা প্ৰচেষ্টাক প্ৰশংসা কৰি প্ৰধানমন্ত্ৰীগৰাকীয়ে বৰ্ষাকালীন অধিৱেশনৰ সময়ত বেংকৰ নথি প্ৰমাণ বিধেয়ক গৃহীত হোৱাত সুখ প্ৰকাশ কৰে। তেওঁ কয় যে ১৯ শতিকাৰ ব্ৰিটিছ আইনখনৰ ঠাইত ডিজিটেল বেংকিং ৰেকৰ্ডক আইনী স্বীকৃতি প্ৰদান কৰা আধুনিক আইন প্ৰণয়নে জটিলতা বহু পৰিমাণে হ্ৰাস কৰিব আৰু ব্যৱসায় কৰাটো সহজ কৰি তুলিব। শ্ৰী মোদীয়ে কয় যে ইয়াৰ ফলত আইনী হেঁচা হ্ৰাস পাব, ব্যৱস্থাটোত অধিক স্বচ্ছতা বৃদ্ধি পাব, ব্যৱসায় কৰাৰ সহজতা যথেষ্ট উন্নত হ’ব।

মানৱকেন্দ্ৰিক প্ৰশাসন ব্যৱস্থাৰ অতি গুৰুত্বপূৰ্ণ দিশৰ ওপৰত জোৰ দি প্ৰধানমন্ত্ৰীগৰাকীয়ে ভাৰতীয় ৰে’লৱেত গ্ৰহণ কৰা ব্যাপক সুৰক্ষা উন্নয়নৰ ওপৰত আলোকপাত কৰে। ইয়াৰ ভিতৰত ৬৫০০ৰো অধিক ষ্টেচন আৰু ১০ হাজাৰ লেভেল ক্ৰছিঙত ইলেক্ট্ৰনিক ইন্টাৰলক স্থাপন কৰাটোও অন্যতম। মিছন মোডত প্ৰায় ৯ হাজাৰ অৰক্ষিত ক্ৰছিং আঁতৰোৱাৰ ফলত ২০১৪ চনৰ আগৰ তুলনাত ৰেল দুৰ্ঘটনা ৯০ শতাংশ হ্ৰাস পাইছে। এই সন্দৰ্ভত শ্ৰী মোদীয়ে কয় যে “প্ৰতিটো মানৱ জীৱন আৰু তেওঁলোকৰ বহুমূলীয়া সময়ৰ প্ৰতি অতি সংবেদনশীলতাৰে ব্যৱস্থাসমূহৰ আৰ্হি প্ৰস্তুত কৰা উচিত।”

ৰে’লৱেৰ স্বচ্ছতাৰ ব্যাপক পৰিৱৰ্তনক আধুনিক শাসনৰ এক প্ৰধান উদাহৰণ হিচাপে উল্লেখ কৰি প্ৰধানমন্ত্ৰীগৰাকীয়ে কয় যে ২০১৪ চনৰ পৰা ৰে’লত ৩.৬ লাখৰো অধিক বায়’-টয়লেট স্থাপন কৰা হৈছে, যাৰ ফলত ৰে’লপথত মানুহৰ মল-মূত্ৰৰ সমস্যা সম্পূৰ্ণৰূপে নাইকিয়া হৈছে। শ্ৰী মোদীয়ে  কয়, “এই বৃহৎ পৰিৱৰ্তন কেৱল পৰিষ্কাৰ-পৰিচ্ছন্নতাৰ কথা নহয়; আচলতে ই যাত্ৰীৰ মৰ্যাদা, পৰিষ্কাৰ-পৰিচ্ছন্নতা আৰু আধুনিক প্ৰশাসনৰ বিষয়।”

সময়োপযোগিতাক প্ৰশাসনৰ মানৰ এক গুৰুত্বপূৰ্ণ পৰিমাপ হিচাপে উল্লেখ কৰি প্ৰধানমন্ত্ৰীগৰাকীয়ে দিল্লী-মীৰাট নমো ভাৰত ৰেপিড ৰেল আৰু দিল্লী মেট্ৰ’ৰ কথা উল্লেখ কৰে, যি নিউয়ৰ্ক, হংকং, পেৰিছৰ ব্যৱস্থাৰ সৈতে প্ৰতিযোগিতা কৰি ৯৯.৯ শতাংশ সময় নিশ্চিতিৰ আকৰ্ষণীয় অভিলেখ বৰ্তাই ৰাখিছে। শ্ৰী মোদীয়ে কয় যে এয়া কেৱল মেট্ৰ’ আৰু নমো ৰেপিড ৰে’লৰ সময়মতে চলাৰ কাহিনী নহয়; এয়া দ্ৰুতগতিত পৰিৱৰ্তিত ভাৰতৰ গৌৰৱময় পৰিচয়।

নীতিগত সংস্কাৰৰ ওপৰত গুৰুত্ব আৰোপ কৰি প্ৰধানমন্ত্ৰীগৰাকীয়ে বুজাই দিয়ে যে দেশৰ ওপৰত নিষেধাজ্ঞামূলক নিয়ম জাপি দিয়াৰ পৰিৱৰ্তে চৰকাৰে দেশৰ প্ৰয়োজন অনুসৰি নীতি প্ৰণয়ন কৰে, যিবোৰে পৰৱৰ্তী চিন্তাধাৰা, জনসাধাৰণৰ স্বাৰ্থত উন্নয়নক প্ৰসাৰিত কৰে। যেতিয়া ভাৰতৰ নাগৰিকে দেশৰ মানচিত্ৰ নিৰ্মাণ কৰাটো অবৈধ আছিল তেতিয়াৰ অস্বাভাৱিক পৰিস্থিতিৰ কথা আৰু ভূ-স্থানীয় তথ্যৰ নিয়ম শিথিল কৰাটোৱে কেনেদৰে ষ্টাৰ্টআপৰ বিকাশৰ গতি যথেষ্ট ত্বৰান্বিত কৰিছে, সেই কথা স্মৰণ কৰে। শ্ৰী মোদীয়ে কয় যে, “দেশ আৰু ইয়াৰ জনসাধাৰণৰ প্ৰকৃত প্ৰয়োজনীয়তাৰ অনুকূলে নীতিসমূহ সম্পূৰ্ণৰূপে প্ৰস্তুত কৰিব লাগিব।”

নিষেধাজ্ঞা আঁতৰোৱাৰ প্ৰভাৱৰ বিশদ বিৱৰণ দি প্ৰধানমন্ত্ৰীগৰাকীয়ে কৃষি, প্ৰতিৰক্ষা আৰু বিষয়বস্তু সৃষ্টিৰ দৰে খণ্ডত ভাৰতৰ ড্ৰ’ন উদ্যোগৰ ব্যাপক উন্নয়নৰ কথা উল্লেখ কৰে; যিবোৰ পূৰ্বৰ কঠোৰ নিয়মৰ অধীনত অসম্ভৱ আছিল। শ্ৰী মোদীয়ে কয় যে আমি ড্ৰ’ন উৰণক নিষেধাজ্ঞাৰ পৰা সম্পূৰ্ণৰূপে মুক্ত কৰিছোঁ আৰু আজি ভাৰতৰ ড্ৰ’ন উদ্যোগে অভূতপূৰ্ব শিখৰত উপনীত হৈছে।

প্ৰধানমন্ত্ৰীগৰাকীয়ে সীমান্তৰ আন্তঃগাঁথনিৰ দুৰ্বলতাতকৈ ডাঙৰ কৌশলগত শক্তি হিচাপে চোৱাৰ আহ্বান জনায়। তেওঁ সগৌৰৱে উল্লেখ কৰে যে সীমান্ত পথ সংস্থাই (বি আৰ অ’) কেৱল ২০২৪ আৰু ২০২৫ চনত দেশৰ বাবে ২৫০টা আন্তঃগাঁথনি প্ৰকল্প উৎসৰ্গা কৰিছিল। শ্ৰী মোদীয়ে কয় যে যেতিয়া প্ৰতিৰক্ষামূলক চিন্তাধাৰা মৌলিকভাৱে সলনি হৈছিল, তেতিয়া সীমান্তৰ আন্তঃগাঁথনিৰ সমগ্ৰ ছবিখনো দ্ৰুতগতিত সলনি হৈছিল।

নিষিদ্ধ অঞ্চলত অভূতপূৰ্ব গাঁথনিগত সংস্কাৰৰ ওপৰত আলোকপাত কৰি প্ৰধানমন্ত্ৰীগৰাকীয়ে ব্যক্তিগত খণ্ডৰ বাবে পাৰমাণৱিক শক্তি সফলতাৰে মুকলি কৰা ‘শান্তি বিধেয়ক’ আৰু ৪০টাতকৈও অধিক অস্ত্ৰ-শস্ত্ৰৰ কাৰখানাক সাতটা আধুনিক কৰ্পৰেট প্ৰতিষ্ঠানলৈ ঐতিহাসিক ৰূপান্তৰৰ কথা কয়। তেওঁ এই সাহসী পদক্ষেপসমূহৰ বাবে ৰাষ্ট্ৰৰ আত্মনিৰ্ভৰশীলতা আৰু ২০১৪ চনৰ তুলনাত প্ৰতিৰক্ষা ৰপ্তানি ৫৫গুণ বৃদ্ধি কৰাৰ কৃতিত্ব দিয়ে। শ্ৰী মোদীয়ে কয় যে আজি ভাৰতে প্ৰতিৰক্ষা প্ৰয়োজনীয়তাৰ বাবেও দ্ৰুতগতিত আত্মনিৰ্ভৰশীল হৈ পৰিছে আৰু আমাৰ প্ৰতিৰক্ষা ৰপ্তানি যথেষ্ট বৃদ্ধি পাইছে।

দৈনন্দিন জীৱনত ‘জীৱন-যাপনৰ সহজতা’ উন্নতকৰণৰ নিৰৱচ্ছিন্ন সংযোগৰ ওপৰত নিজৰ মতামত প্ৰকাশ কৰি প্ৰধানমন্ত্ৰীগৰাকীয়ে আঙুলিয়াই দিয়ে যে ডিজিটেল উন্নয়ন— গেলামালৰ অৰ্ডাৰ কৰাই হওক, কিউআৰ ক’ড স্কেন কৰাই হওক বা নিমিষতে ধন স্থানান্তৰ কৰাই হওক— সাধাৰণ ভাৰতীয় জীৱনৰ এক সহজ অথচ বৈপ্লৱিক অংগ হৈ পৰিছে। শ্ৰী মোদীয়ে কয় যে এই কথাবোৰ আচৰিত কিন্তু ই এতিয়া ভাৰতৰ সাধাৰণ মানুহৰ জীৱনৰ অংশ হৈ পৰিছে।

প্ৰধানমন্ত্ৰীয়ে গুৰুত্ব সহকাৰে কয় যে ভাৰতীয় মধ্যবিত্ত শ্ৰেণীয়ে প্ৰত্যক্ষ কৰা গভীৰ পৰিৱৰ্তন বহু উন্নত দেশতো সুদূৰৰ সপোন হৈয়েই আছে। শ্ৰী মোদীয়ে কয়, “ভাৰতত গ্ৰহণ কৰা সংস্কাৰৰ ফলত মানুহৰ জীৱনত যি ব্যাপক পৰিৱৰ্তন হৈছে, সেয়া বহু উন্নত দেশতো দূৰৈৰ সপোন হৈয়ে আছে।”

ভাৰতৰ ডিজিটেল বিপ্লৱৰ মূল আধাৰশিলাৰ কথা উল্লেখ কৰি প্ৰধানমন্ত্ৰীগৰাকীয়ে এই কথাত গুৰুত্ব আৰোপ কৰে যে দেশখনত সৰ্বাধিক সুলভ তথ্য আৰু বিশ্বৰ ভিতৰতে সৰ্বাধিক দ্ৰুত ৫ জি  সেৱা অব্যাহত আছে। তেওঁ আধাৰক মোবাইল আৰু বেংকিং সেৱাৰ সৈতে একত্ৰিত কৰাৰ প্ৰশংসা কৰে, যি সহজ ই-কেৱাইচি আৰু ডিজিটেল প্ৰমাণীকৰণৰ সুবিধা প্ৰদান কৰে, বেংক একাউণ্ট খোলাৰ পৰা আয়কৰ ৰিটাৰ্ণ দাখিল কৰালৈকে সকলো ৰূপান্তৰিত কৰে। শ্ৰী মোদীয়ে কয়, “আজি যদি আপুনি বেংক একাউণ্ট খুলিব বিচাৰে তেন্তে চৰকাৰে বেংকটো পোনপটীয়াকৈ আপোনাৰ ওচৰলৈ লৈ আহিছে।”

টেলিমেডিচিনৰ উল্লেখযোগ্য প্ৰভাৱৰ ওপৰত আলোকপাত কৰি প্ৰধানমন্ত্ৰীগৰাকীয়ে ই-সঞ্জীৱনী মঞ্চৰ প্ৰশংসা কৰে। এই প্লেটফৰ্মে প্ৰায় ৫০ কোটি টেলি-কনছাল্টেচন (চিকিৎসকৰ সৈতে অনলাইন পৰামৰ্শ) সক্ষম কৰি তুলিছে আৰু অত্যাৱশ্যকীয় স্বাস্থ্যসেৱা সেৱাসমূহ পোনপটীয়াকৈ ৰোগীৰ ওচৰলৈ লৈ আহিছে, যিসকলে পূৰ্বতে বহু দূৰ যাত্ৰা কৰিবলগীয়া হৈছিল। শ্ৰী মোদীয়ে কয় যে আজি ৰোগীৰ ঘৰত  পোনপটীয়াকৈ তেওঁলোকৰ স্ক্ৰীণত চিকিৎসক সহজে উপলব্ধ।

দেশৰ ভ্ৰমণ অভিজ্ঞতাৰ আধুনিকীকৰণৰ প্ৰশংসা কৰি প্ৰধানমন্ত্ৰীয়ে বিমানবন্দৰত ‘ডিজি যাত্ৰা’ৰ ব্যাপক ব্যৱহাৰ আৰু ঘাইপথত ফাষ্টেগ ৰূপায়ণৰ কথা উল্লেখ কৰে, যাৰ ফলত নিৰৱচ্ছিন্ন আৰু মসৃণ যাত্ৰা সম্ভৱ হৈছে। শ্ৰী মোদীয়ে কয় যে ইয়াৰ ফলত বহু সময় ৰাহি হৈছে, জীৱনযাত্ৰা বহুত সহজ হৈ পৰিছে আৰু লাখ লাখ লোকে নিজৰ অগ্ৰগতিত নিৰাপদে মনোনিৱেশ কৰিবলৈ সক্ষম হৈছে।

প্ৰধানমন্ত্ৰীগৰাকীয়ে এই কথাত গুৰুত্ব আৰোপ কৰে যে দেশৰ প্ৰকৃত পৰিৱৰ্তনৰ বাবে এনে সিদ্ধান্তৰ প্ৰয়োজন, যি কেৱল তাৎক্ষণিক নিৰ্বাচনী লাভৰ সৃষ্টি কৰে, তাৰ পৰিৱৰ্তে দীৰ্ঘম্যাদী প্ৰভাৱ পেলোৱা সিদ্ধান্তৰ প্ৰয়োজন। শ্ৰী মোদীয়ে কয় যে দেশখনক মৌলিকভাৱে ৰূপান্তৰিত কৰা সিদ্ধান্তসমূহ হ’ল যিবোৰৰ প্ৰভাৱ ভূমিত স্পষ্টভাৱে দেখা যায় আৰু যিবোৰ বৰ্তমান আৰু ভৱিষ্যত দুয়োটাকে মনত ৰাখি লোৱা হয়।

এই বহনক্ষম পদ্ধতিৰ উদাহৰণ দি প্ৰধানমন্ত্ৰীগৰাকীয়ে কৃষক আৰু মধ্যবিত্ত শ্ৰেণীক উল্লেখযোগ্য দীৰ্ঘম্যাদী সুবিধা প্ৰদান কৰা পি এম কুসুম আঁচনি আৰু ‘পি এম সূৰ্য ঘৰ বিনামূলীয়া বিদ্যুৎ’ আঁচনিৰ প্ৰসংগ উল্লেখ কৰে। তেওঁ কয় যে বিনামূলীয়া বিদ্যুৎ ঘোষণা কৰিলে ডাঙৰ শিৰোনাম দখল হ’লহেঁতেন যদিও চৰকাৰে ৫০ লাখৰো অধিক পৰিয়ালৰ বাবে ছাদৰ ওপৰৰ সৌৰ উদ্যোগক ৰাজসাহায্য দিয়াৰ অধিক ফলপ্ৰসূ পথ বাছি লৈছিল। শ্ৰী মোদীয়ে কয় যে আমি প্ৰতিটো ঘৰৰ ছাদত সৌৰ পেনেল স্থাপনৰ বাবে সম্পূৰ্ণৰূপে প্ৰতিশ্ৰুতিবদ্ধ, যাৰ ফলত বহনক্ষম শক্তিৰ বৃহৎ পৰিসৰৰ সুবিধা নিশ্চিত কৰা হ’ব।

‘সূৰ্য ঘৰ’ আঁচনিৰ গভীৰ আৰ্থ-সামাজিক প্ৰভাৱৰ বিশদ বিৱৰণ দি প্ৰধানমন্ত্ৰীগৰাকীয়ে কয় যে ইয়াৰ দ্বাৰা তেওঁলোকৰ বিদ্যুতৰ বিল হ্ৰাস কৰাই নহয়, অতিৰিক্ত বিদ্যুৎ গ্ৰীডত বিক্ৰী কৰিও আয়ৰ সৃষ্টি কৰা হৈছে। ইয়াৰ ফলত তেওঁলোকে আধুনিক সঁজুলি ক্ৰয় কৰিবলৈ সক্ষম হৈছে আৰু বিদ্যুৎ বিচ্ছিন্ন হৈ শিশুৰ টোপনি যাতে ব্যাঘাত নহয় তাৰ ব্যৱস্থা কৰা হৈছে। শ্ৰী মোদীয়ে কয়, “নিৰ্বাচন হওক বা নহওক, এই ‘সূৰ্য ঘৰ’ আৰু ইয়াৰ পোহৰে সমগ্ৰ দেশৰ পৰিয়ালসমূহক ভৱিষ্যতলৈ উপকৃত কৰি থাকিব।”

যুৱক-যুৱতী, মহিলা, কৃষক আৰু মধ্যবিত্ত শ্ৰেণীৰ বাবে ‘জীৱনৰ সহজতা’ আৰু ‘ব্যৱসায়ৰ সহজতা’ নিৰন্তৰ সম্প্ৰসাৰণৰ প্ৰতিশ্ৰুতি দি প্ৰধানমন্ত্ৰীগৰাকীয়ে আশ্বাস দিয়ে যে প্ৰশাসনৰ ‘সংস্কাৰ এক্সপ্ৰেছ’-এ ‘বিকশিত ভাৰত’ৰ লক্ষ্যত উপনীত হ’বলৈ দ্ৰুতগতিত আগবাঢ়িব। দেশৰ শক্তিৰ গভীৰ গোলকীয় প্ৰভাৱৰ ওপৰত গুৰুত্ব আৰোপ কৰি তেওঁ পূৰ্ণ আস্থা প্ৰকাশ কৰে যে দেশৰ প্ৰগতিৰ পথ সুৰক্ষিত কৰিলে আন্তঃৰাষ্ট্ৰীয় সমাজলৈও ব্যাপক স্থিতিশীলতা আহিব। ইয়াৰ পাছতে তেওঁ অনুষ্ঠানৰ আয়োজকসকলৰ প্ৰতি আন্তৰিক কৃতজ্ঞতা জ্ঞাপন কৰি ভাষণৰ সামৰণি মাৰে। শ্ৰী মোদীয়ে কয় যে ভাৰত যিমানেই সুস্থিৰ হ’ব আৰু ইয়াৰ ভৱিষ্যত যিমানেই সুৰক্ষিত হ’ব, সিমানেই বিশ্বক নিৰাপত্তাৰ অনুভূতি প্ৰদান কৰিবলৈ শক্তি লাভ কৰিব।

Addressing the Economic Times World Leaders Forum.@EconomicTimes https://t.co/XohLKVrp4h

— Narendra Modi (@narendramodi) August 21, 2026

***

MJPS/SS/PRK/KD