പിഎം ഇന്ത്യ

26-ാമത് എസ്‌സി‌ഒ ഉച്ചകോടിയുടെ ഭാഗമായി ബിഷ്‌കെക്കിൽ വെച്ച് റഷ്യൻ ഫെഡറേഷൻ പ്രസിഡന്റ് വ്‌ളാഡിമിർ പുടിനുമായി പ്രധാനമന്ത്രി ശ്രീ നരേന്ദ്ര മോദി ഇന്ന് കൂടിക്കാഴ്ച നടത്തി. ഈ വർഷത്തെ അവരുടെ ആദ്യ കൂടിക്കാഴ്ചയായിരുന്നു ഇത്. 2025 ഡിസംബറിൽ നടന്ന 23-ാമത് വാർഷിക ഉച്ചകോടിക്കിടെ ഇരു നേതാക്കളും നേരത്തെ ഡൽഹിയിൽ കൂടിക്കാഴ്ച നടത്തിയിരുന്നു.

രാഷ്ട്രീയം, സാമ്പത്തികം, പ്രതിരോധം, ഊർജ്ജം, ബഹിരാകാശം, മൊബിലിറ്റി, ജനങ്ങൾ തമ്മിലുള്ള ബന്ധം തുടങ്ങിയ വിവിധ മേഖലകളിലെ ഉഭയകക്ഷി സഹകരണത്തിലെ പുരോഗതി ഇരു നേതാക്കളും അവലോകനം ചെയ്തു. 2026 ഓഗസ്റ്റ് 24 ന് മോസ്കോയിൽ നടന്ന വ്യാപാര, സാമ്പത്തിക, സാംസ്കാരിക കാര്യങ്ങളെക്കുറിച്ചുള്ള 27-ാമത് ഇന്ത്യ-റഷ്യ ഇന്റർ-ഗവൺമെന്റൽ കമ്മീഷന്റെ ഫലത്തെ അവർ സ്വാഗതം ചെയ്തു.

2026-ലെ ഇന്ത്യയുടെ അധ്യക്ഷതയിലുള്ള ബ്രിക്‌സ് ഉൾപ്പെടെ ബഹുമുഖ മേഖലകളിലെ ഇന്ത്യ-റഷ്യ ഇടപെടലിനെക്കുറിച്ചുള്ള കാഴ്ചപ്പാടുകൾ നേതാക്കൾ പങ്കുവെച്ചു. സമുദ്ര വ്യാപാരത്തെയും ഇന്ത്യൻ നാവികരുടെ സുരക്ഷയെയും ബാധിച്ച പശ്ചിമേഷ്യയിലെയും കരിങ്കടൽ മേഖലയിലെയും സംഘർഷങ്ങൾ ഉൾപ്പെടെ, പരസ്പര താൽപ്പര്യമുള്ള പ്രധാന പ്രാദേശിക, ആഗോള വിഷയങ്ങളെക്കുറിച്ചുള്ള കാഴ്ചപ്പാടുകളും അവർ പങ്കിട്ടു. സംഘർഷങ്ങൾ പരിഹരിക്കുന്നതിനുള്ള മാർ​ഗം സംഭാഷണവും നയതന്ത്രവുമാണെന്ന് പ്രധാനമന്ത്രി ആവർത്തിച്ചു.

ഭൗമരാഷ്ട്രീയ അനിശ്ചിതത്വങ്ങളുടെ പശ്ചാത്തലത്തിൽ സ്ഥിരത കൈവരിക്കുകയും ഗണ്യമായ വളർച്ച രേഖപ്പെടുത്തുകയും ചെയ്തിട്ടുള്ള ഇരു രാജ്യങ്ങളും തമ്മിലുള്ള പ്രത്യേകവും സവിശേഷവുമായ തന്ത്രപരമായ പങ്കാളിത്തം കൂടുതൽ ശക്തിപ്പെടുത്തുന്നതിനായി തുടർന്നും ഇടപെടാൻ ഇരു നേതാക്കളും ധാരണയിലെത്തി.

2026 സെപ്റ്റംബർ 12-13 തീയതികളിൽ നടക്കുന്ന 18-ാമത് ബ്രിക്സ് ഉച്ചകോടിക്കായി പ്രസിഡന്റ് പുടിനെ ഇന്ത്യയിലേക്ക് സ്വാഗതം ചെയ്യുന്നതിനായി താൻ ആകാംക്ഷയോടെ കാത്തിരിക്കുകയാണെന്ന് പ്രധാനമന്ത്രി പറഞ്ഞു.

***

SK