പിഎം ഇന്ത്യ

പ്രധാനമന്ത്രി ശ്രീ നരേന്ദ്ര മോദിയുടെ അധ്യക്ഷതയിൽ ചേർന്ന കേന്ദ്ര മന്ത്രിസഭായോഗം 2026 മുതൽ 2033-34 വരെയുള്ള കാലയളവിലേക്ക് 1,856.67 കോടി രൂപ ചെലവിൽ ‘ഖേലോ ഇന്ത്യ സ്പോർട്സ് ഗുഡ്സ് മാനുഫാക്ചറിങ്’ പദ്ധതിക്ക് അംഗീകാരം നൽകി. നിക്ഷേപം, ഉൽപ്പാദനം, നവീകരണം, കയറ്റുമതി എന്നിവ പ്രോത്സാഹിപ്പിക്കുകയും ആഗോള കായികോപകരണ മേഖലയിലെ ഇന്ത്യയുടെ സ്ഥാനം ശക്തിപ്പെടുത്തുകയും ചെയ്യുകയാണ് പദ്ധതിയുടെ ലക്ഷ്യം.

2026-27-ലെ കേന്ദ്ര ബജറ്റിൽ പ്രഖ്യാപിച്ച ഈ പദ്ധതി, നിക്ഷേപം, സാങ്കേതികവിദ്യയുടെ സ്വീകാര്യത, ഗവേഷണവും നവീകരണവും, നൈപുണ്യ വികസനം, ഗുണനിലവാര സർട്ടിഫിക്കേഷൻ, വിപണി വികസനം എന്നിവയ്ക്കുള്ള ലക്ഷ്യാധിഷ്ഠിത പിന്തുണയിലൂടെ ഇന്ത്യയുടെ കായിക സാമഗ്ര നിർമ്മാണ അടിത്തറ ശക്തിപ്പെടുത്താൻ ശ്രമിക്കുന്നു. ആഗോളതലത്തിൽ മത്സരക്ഷമമായ കായികോപകരണ വ്യവസായത്തിന്റെ വികസനത്തിന് പദ്ധതി പിന്തുണ നൽകുകയും ആഗോള വിതരണ ശൃംഖലകളിൽ ഇന്ത്യയുടെ സ്ഥാനം ശക്തിപ്പെടുത്തുകയും ചെയ്യും.

ഖേലോ ഭാരത് നിതി 2025, മേക്ക് ഇൻ ഇന്ത്യ, ആത്മനിർഭർ ഭാരത് എന്നീ ദർശനങ്ങളുമായി യോജിച്ചുപോകുന്ന ഈ പദ്ധതി നിക്ഷേപം ആകർഷിക്കുമെന്നും തൊഴിലവസരങ്ങൾ സൃഷ്ടിക്കുമെന്നും ആഭ്യന്തര നിർമാണശേഷി ശക്തിപ്പെടുത്തുമെന്നും ഇന്ത്യൻ കായികോപകരണങ്ങളുടെ ആഗോള മത്സരക്ഷമത വർധിപ്പിക്കുമെന്നും പ്രതീക്ഷിക്കുന്നു.

സംയോജിത കായിക ഉത്പന്ന നിർമ്മാണ ഇക്കോസിസ്റ്റം കെട്ടിപ്പടുക്കുന്നു

ക്ലസ്റ്റർ അധിഷ്ഠിത നിർമാണം പ്രോത്സാഹിപ്പിക്കുന്നതിനും നിർമാതാക്കൾ, വിതരണക്കാർ, പരിശോധനാ സൗകര്യങ്ങൾ, ഡിസൈൻ-പ്രോട്ടോടൈപ്പിംഗ് കേന്ദ്രങ്ങൾ, അനുബന്ധ സംരംഭങ്ങൾ എന്നിവയെ ഒരിടത്ത് സജ്ജീകരിച്ചുകൊണ്ട് സംയോജിത വ്യാവസായിക ഇക്കോസിസ്റ്റം സൃഷ്ടിക്കുന്നതിനുമായി പ്രത്യേക കായികോപകരണ നിർമാണ മേഖലകൾ (Sports Goods Manufacturing Zones – SGMZs) വികസിപ്പിക്കാനാണ് പദ്ധതി വിഭാവനം ചെയ്യുന്നത്. നിലവിലുള്ള വ്യാവസായിക അടിസ്ഥാനസൗകര്യങ്ങളായ ഭവ്യ (BHAVYA) പദ്ധതി, എൻ.ഐ.സി.ഡി.സി (NICDC) വ്യാവസായിക പാർക്കുകൾ എന്നിവയുമായി സംയോജിപ്പിച്ചായിരിക്കും ഈ മേഖലകൾ വികസിപ്പിക്കുക. ഇതിലൂടെ കാര്യക്ഷമമായ നിർമാണം, വ്യവസായ മേഖലകൾ തമ്മിലുള്ള ശക്തമായ ബന്ധം, കായികോപകരണ മൂല്യ ശൃംഖലയിലുടനീളമുള്ള മെച്ചപ്പെട്ട മത്സരശേഷി എന്നിവ സാധ്യമാകും.

ഈ മേഖലകൾ സംയോജിത നിർമാണ സൗകര്യങ്ങൾ സൃഷ്ടിക്കാനും വ്യവസായ മേഖലകൾ തമ്മിലുള്ള ബന്ധം ശക്തിപ്പെടുത്താനും പ്രവർത്തനക്ഷമത മെച്ചപ്പെടുത്താനും സഹായിക്കും. നിക്ഷേപം സുഗമമാക്കുന്നതിനും ഉൽപ്പാദനശേഷി വർധിപ്പിക്കുന്നതിനും രാജ്യത്ത് ശക്തമായ കായികോപകരണ നിർമാണ അടിത്തറയുടെ വളർച്ചയ്ക്ക് പിന്തുണ നൽകുന്നതിനും ഈ ഇടപെടലുകൾ സഹായിക്കുമെന്ന് പ്രതീക്ഷിക്കുന്നു.

നിക്ഷേപം ആകർഷിക്കുകയും ആഭ്യന്തര ഉൽപ്പാദനം വിപുലീകരിക്കുകയും ചെയ്യുന്നു

കായികോപകരണ മേഖലയിലേക്ക് പുതിയ നിക്ഷേപങ്ങൾ ആകർഷിക്കുകയും ആഭ്യന്തര നിർമാണശേഷി ശക്തിപ്പെടുത്തുകയും ചെയ്യുക എന്നതാണ് പദ്ധതിയുടെ പ്രധാന ലക്ഷ്യങ്ങളിലൊന്ന്. ‘ആങ്കർ ഇൻവെസ്റ്റ്‌മെന്റ് സപ്പോർട്ട്’ എന്ന ഘടകം പ്രമുഖ ആഭ്യന്തര-ആഗോള നിർമ്മാതാക്കളെയും ബ്രാൻഡുകളെയും റീട്ടെയിൽ ശൃംഖലകളെയും നിർദ്ദിഷ്ട സ്പോർട്സ് ഗുഡ്സ് മാനുഫാക്ചറിംഗ് സോണുകളിൽ നിർമ്മാണ യൂണിറ്റുകൾ സ്ഥാപിക്കാൻ പ്രോത്സാഹിപ്പിക്കുകയും ശക്തമായ സപ്ലയർ-അനുബന്ധ ഇക്കോസിസ്റ്റത്തിന്റെ വികസനത്തിന് വഴിയൊരുക്കുകയും ചെയ്യും. ഇതിന് പുറമേ, ‘ടേൺഓവർ ലിങ്ക്ഡ് സപ്പോർട്ട്’ ഘടകം ഉയർന്ന ഉൽപ്പാദനം, ശേഷി വർദ്ധനവ്, സുസ്ഥിര നിർമ്മാണ വളർച്ച എന്നിവയ്ക്ക് ആനുകൂല്യങ്ങൾ നൽകും.

ആകെ 1,130 കോടി രൂപയുടെ സംയുക്ത വിഹിതത്തോടുകൂടിയ ഈ ഇടപെടലുകൾ, ആഭ്യന്തര ഉൽപ്പാദനം ശക്തിപ്പെടുത്തുന്നതിനും, ഇറക്കുമതി ആശ്രിതത്വം കുറയ്ക്കുന്നതിനും, ആഭ്യന്തര മൂല്യവർദ്ധനവ് വർദ്ധിപ്പിക്കുന്നതിനും, കാര്യമായ സ്വകാര്യ നിക്ഷേപം ഉത്തേജിപ്പിക്കുന്നതിനും, മൂല്യ ശൃംഖലയിലുടനീളം തൊഴിലവസരങ്ങൾ സൃഷ്ടിക്കുന്നതിനും, ആഗോള വിപണിയിൽ ഇന്ത്യയുടെ മത്സരശേഷി മെച്ചപ്പെടുത്തുന്നതിനും സഹായിക്കുമെന്ന് പ്രതീക്ഷിക്കുന്നു.

MSME-കളെയും നിലവിലുള്ള നിർമാണ ക്ലസ്റ്ററുകളെയും ശക്തിപ്പെടുത്തുന്നു

കായികോപകരണ മേഖലയിൽ സൂക്ഷ്മ, ചെറുകിട, ഇടത്തരം സംരംഭങ്ങൾക്കുള്ള (MSMEs) പ്രധാന പങ്ക് തിരിച്ചറിഞ്ഞുകൊണ്ട്, നിലവിലുള്ള നിർമാണ ക്ലസ്റ്ററുകൾ ശക്തിപ്പെടുത്തുന്നതിനും ചെറുകിട സംരംഭങ്ങളുടെ വളർച്ചയ്ക്ക് പിന്തുണ നൽകുന്നതിനും പദ്ധതി ഊന്നൽ നൽകുന്നു.

പൊതു സൗകര്യങ്ങളുടെയും പങ്കാളിത്ത അടിസ്ഥാന സൗകര്യങ്ങളുടെയും വികസനം ഉൾപ്പെടെ നിലവിലുള്ള സ്പോർട്സ് ഗുഡ്സ് മാനുഫാക്ചറിംഗ് ക്ലസ്റ്ററുകളുടെ നവീകരണത്തിനായി സഹായം നൽകും.

ഗുണനിലവാരവും അന്താരാഷ്ട്ര സർട്ടിഫിക്കേഷനും പ്രോത്സാഹിപ്പിക്കുന്നു

ഇന്ത്യൻ കായികോപകരണങ്ങളുടെ മത്സരക്ഷമത വർധിപ്പിക്കുന്നതിൽ അന്താരാഷ്ട്രതലത്തിൽ അംഗീകരിക്കപ്പെട്ട ഗുണനിലവാര-പ്രകടന മാനദണ്ഡങ്ങളുടെ പ്രാധാന്യം പദ്ധതി തിരിച്ചറിയുന്നു.

അന്താരാഷ്ട്ര സ്പോർട്സ് ഫെഡറേഷനുകളിൽ നിന്നുള്ള സർട്ടിഫിക്കേഷനുകൾ നേടുന്നതിനും പുതുക്കുന്നതിനുമായി നിർമാതാക്കൾക്ക് സഹായം നൽകും. ഇതിനായി 105 കോടി രൂപ വകയിരുത്തിയിട്ടുണ്ട്.

ഈ നടപടികൾ ഉൽപ്പന്നങ്ങളുടെ ഗുണനിലവാരം മെച്ചപ്പെടുത്താനും അന്താരാഷ്ട്ര വിപണികളിലേക്ക് പ്രവേശനം എളുപ്പമാക്കാനും ഇന്ത്യയിൽ നിർമ്മിച്ച കായിക വസ്തുക്കളിലുള്ള ആഗോള വിശ്വാസം വർദ്ധിപ്പിക്കാനും സഹായിക്കും.

ഗവേഷണം, സാങ്കേതികവിദ്യ, നവീകരണം എന്നിവയിലെ നിക്ഷേപം

കായികോപകരണ മേഖലയിൽ ഗവേഷണം, രൂപകൽപ്പന, നവീകരണം എന്നിവ ശക്തിപ്പെടുത്തുന്നതിന് പദ്ധതി പ്രത്യേക ഊന്നൽ നൽകുന്നു.

കായിക ഉപകരണങ്ങൾ, മെറ്റീരിയൽ സയൻസ്, സംരക്ഷണ ഉപകരണങ്ങൾ, അത്യാധുനിക നിർമാണ സാങ്കേതികവിദ്യകൾ എന്നിവയിലെ ഗവേഷണം പ്രോത്സാഹിപ്പിക്കുന്നതിനായി പ്രമുഖ വിദ്യാഭ്യാസ-ഗവേഷണ സ്ഥാപനങ്ങളിൽ മികവിന്റെ കേന്ദ്രങ്ങൾ സ്ഥാപിക്കുന്നതിന് പിന്തുണ നൽകും.

അനുസന്ധാൻ നാഷണൽ റിസർച്ച് ഫൗണ്ടേഷനുമായി (Anusandhan National Research Foundation) ചേർന്നുള്ള ഗവേഷണ-വികസന പ്രവർത്തനങ്ങൾക്കും പ്രോത്സാഹനം നൽകും.

സ്റ്റാർട്ടപ്പ് ഇന്ത്യ സംരംഭത്തിന് അനുസൃതമായി സ്റ്റാർട്ടപ്പുകൾക്ക് പ്രത്യേക പിന്തുണ നൽകും. കായികോപകരണ നിർമാണ ഇക്കോസിസ്റ്റത്തിനുള്ളിൽ പുതിയ സാങ്കേതികവിദ്യകൾ, പ്രക്രിയകൾ, ഉൽപ്പന്നങ്ങൾ എന്നിവയുടെ വികസനം, പരിശോധന, സാധൂകരണം, വാണിജ്യവൽക്കരണം എന്നിവ പ്രോത്സാഹിപ്പിക്കാൻ ഇത് സഹായിക്കും.

ഭാവിയിലേക്ക് ഒരു വിദഗ്ദ്ധ തൊഴിൽ സേനയെ വാർത്തെടുക്കുന്നു

കായികോപകരണ മേഖലയിൽ തൊഴിലവസരങ്ങൾ സൃഷ്ടിക്കാനുള്ള വലിയ സാധ്യത കണക്കിലെടുത്ത്, വ്യവസായത്തിന്റെ ആവശ്യങ്ങളുമായി പൊരുത്തപ്പെടുന്ന നൈപുണ്യ വികസന സംരംഭങ്ങളെ പദ്ധതി പിന്തുണയ്ക്കും.

മാറിവരുന്ന വ്യവസായ ആവശ്യങ്ങളുമായി കൃത്യമായ പൊരുത്തപ്പെടൽ ഉറപ്പാക്കുന്നതിന് നൈപുണ്യ വികസന-സംരംഭകത്വ മന്ത്രാലയവുമായും പ്രസക്തമായ വ്യവസായ പങ്കാളികളുമായും സഹകരിച്ചാണ് നൈപുണ്യ വികസന സംരംഭങ്ങൾ നടപ്പിലാക്കുക.

ഈ ശ്രമങ്ങൾ വിദഗ്ദ്ധ തൊഴിലാളികളുടെ വർദ്ധിച്ചുവരുന്ന ആവശ്യകത നിറവേറ്റാനും കായിക വസ്തു നിർമ്മാണ മേഖലയുടെ ദീർഘകാല വികസനത്തെ പിന്തുണയ്ക്കാനും സഹായിക്കും.

ഇന്ത്യൻ കായികോപകരണങ്ങളെ ആഗോള വിപണികളിലെത്തിക്കുന്നു

പ്രത്യേക ബ്രാൻഡിങ്, ഔട്ട്‌റീച്ച്, വിപണി വികസന സംരംഭങ്ങളിലൂടെ അന്താരാഷ്ട്ര കായികോപകരണ വിപണികളിൽ ഇന്ത്യയുടെ സാന്നിധ്യം വിപുലീകരിക്കാനാണ് പദ്ധതി ലക്ഷ്യമിടുന്നത്. എക്‌സ്‌പോർട്ട് പ്രൊമോഷൻ മിഷന്റെ സഹായത്തോടെ ഇന്ത്യൻ കായികോപകരണങ്ങളുടെ ദൃശ്യപരത വർധിപ്പിക്കാനും വിപണികളിലേക്കുള്ള പ്രവേശനം ശക്തിപ്പെടുത്താനും അന്താരാഷ്ട്ര വിപണികളിൽ അവയുടെ സാന്നിധ്യം കൂടുതൽ വ്യാപിപ്പിക്കാനും ഈ ശ്രമങ്ങൾ സഹായിക്കും.

ഇന്ത്യയുടെ ആഗോള കായിക അഭിലാഷങ്ങൾക്ക് പിന്തുണ

ഉയർന്ന ഗുണനിലവാരമുള്ളതും അന്താരാഷ്ട്ര സർട്ടിഫിക്കേഷൻ ലഭിച്ചതുമായ കായികോപകരണങ്ങളുടെ നിർമാണം പ്രോത്സാഹിപ്പിക്കുന്നതിലൂടെ, ഇന്ത്യയുടെ കായികമേഖലയുടെയും കായികതാര വികസന പരിപാടികളുടെയും മാറിവരുന്ന ആവശ്യങ്ങൾ നിറവേറ്റാൻ പദ്ധതി സഹായിക്കും. പദ്ധതിയിലൂടെ മെച്ചപ്പെടുന്ന നവീകരണം, ഗുണനിലവാര അടിസ്ഥാന സൗകര്യങ്ങൾ, നിർമാണശേഷി എന്നിവ ഖേലോ ഇന്ത്യ, ഫിറ്റ് ഇന്ത്യ തുടങ്ങിയ സംരംഭങ്ങൾക്ക് പൂരകമാകും.

കായികോപകരണങ്ങളുടെ രൂപകൽപ്പന, വികസനം, നിർമാണം എന്നിവയിൽ ആഗോളതലത്തിൽ മത്സരക്ഷമമായ കേന്ദ്രമായി ഇന്ത്യയെ മാറ്റാൻ ഈ പദ്ധതി സഹായിക്കുമെന്ന് പ്രതീക്ഷിക്കുന്നു. നിർമാണശേഷി ശക്തിപ്പെടുത്തുകയും നവീകരണത്തിന് പ്രോത്സാഹനം നൽകുകയും ആഗോള വിപണികളിലേക്കുള്ള പ്രവേശനം വിപുലീകരിക്കുകയും ചെയ്യുന്നതിലൂടെ വളർച്ചയ്ക്കും തൊഴിലവസരങ്ങൾക്കും കയറ്റുമതിക്കും പുതിയ സാധ്യതകൾ സൃഷ്ടിക്കും. അതേസമയം, മുൻനിര കായികരാഷ്ട്രമായി ഉയരാനുള്ള ഇന്ത്യയുടെ അഭിലാഷത്തെ പിന്തുണയ്ക്കുകയും ആത്മനിർഭർ ഭാരത്, വികസിത് ഭാരത്@2047 എന്നീ ദർശനങ്ങൾ മുന്നോട്ടുകൊണ്ടുപോകുകയും ചെയ്യും.

***

SK