মন্ত্ৰীসভাত থকা মোৰ সহযোগী মনসুখ মাণ্ডৱিয়া জী, ৰক্ষা খাড়ছে জী, ভাৰতীয় পেৰা অলিম্পিক সমিতি আৰু ৰাষ্ট্ৰীয় ক্ৰীড়া ফেডাৰেচনৰ সকলো প্ৰতিনিধি, উপস্থিত বিশিষ্ট ব্যক্তিসকল, পদক বিজয়ী সকলো খেলুৱৈ,গণ্য-মান্য ব্যক্তিসকল।
আপোনালোকক লগ পাবলৈ মই অধীৰ আগ্ৰহেৰে অপেক্ষা কৰি আছিলোঁ। কেইসপ্তাহমান পূৰ্বে এছিয়ান গেমছত অংশগ্ৰহণ কৰা খেলুৱৈসকলৰ সৈতে মোৰ সাক্ষাৎ হৈছিল। এতিয়া পেৰা এছিয়ান গেমছত অংশগ্ৰহণ কৰা আপোনালোক সকলো উদ্যমী খেলুৱৈৰ সৈতে মিলিত হোৱাৰ সুযোগ লাভ কৰিছোঁ। আপোনালোকৰ অসাধাৰণ প্ৰদৰ্শনে প্ৰমাণ কৰিছে যে আজি ভাৰত ক্ৰীড়া জগতত দ্ৰুতগতিত বৃহৎ শক্তি হিচাপে আত্মপ্ৰকাশ কৰিছে। ইমান বৃহৎ মঞ্চত আপোনালোকে কেৱল পদকেই জয় কৰা নাই, বৰং কোটি কোটি দেশবাসীৰ হৃদয়ো জয় কৰিছে। আপোনালোক সকলো পেৰা খেলুৱৈয়ে পুনৰ এবাৰ প্ৰমাণ কৰি দেখুৱাইছে যে আটাইতকৈ উচ্চ শিখৰত আৰোহণ কৰিবলৈ সাহস আৰু মনোবলৰ প্ৰয়োজন। ১৪০ কোটি দেশবাসীৰ হৈ মই আপোনালোক সকলো খেলুৱৈকে আন্তৰিক অভিনন্দন জনাইছোঁ।
আপোনালোকৰ এই সফলতাত পৰিয়ালৰ সদস্য, প্ৰশিক্ষকসকলৰো গুৰুত্বপূৰ্ণ ভূমিকা আছে। মই তেওঁলোককো অভিনন্দন জনাইছোঁ। মই পূৰ্বেও কৈছোঁ যে এগৰাকী সাধাৰণ খেলুৱৈৰ বাবে তেওঁৰ প্ৰশিক্ষকে যিমান পৰিশ্ৰম কৰিবলগীয়া হয়, পেৰা অলিম্পিকৰ বাবে তাৰ তুলনাত বহু গুণে অধিক পৰিশ্ৰম কৰিবলগীয়া হয়। তেতিয়াহে সফলতাৰ ৰং বিৰিঙি উঠে। সেয়েহে তেওঁলোকক মই বিশেষভাৱে অভিনন্দন জনাইছোঁ আৰু তেওঁলোকৰ প্ৰতি কৃতজ্ঞতা প্ৰকাশ কৰিছোঁ।
বন্ধুসকল,
এটা সময় আছিল, যেতিয়া অধিকাংশ ক্ৰীড়াক্ষেত্ৰত ভাৰতৰ অংশগ্ৰহণক কেৱল আনুষ্ঠানিকতা হিচাপেহে গণ্য কৰা হৈছিল। পেৰা গেমছৰ ক্ষেত্ৰত দেশখন বহু পিছপৰি আছিল। ২০১০ চনৰ পেৰা এছিয়ান গেমছত ভাৰতে মাত্ৰ এটাহে সোণৰ পদক লাভ কৰিছিল। সেই প্ৰতিযোগিতাত মুঠতে আমি কেৱল ১৪টা পদক লাভ কৰিবলৈ সক্ষম হৈছিলোঁ। মাত্ৰ ১৪টা পদক। আনহাতে, এইবাৰ আমাৰ খেলুৱৈসকলে ১১৪টা পদক লৈ উভতি আহিছে। ১৪টাৰ পৰা ১১৪টালৈ উত্তৰণৰ এই যাত্ৰাৰ কথা এবাৰ ভাবি চাওকচোন। এয়া আপোনালোকৰ কঠোৰ পৰিশ্ৰমৰ নিদৰ্শন আৰু এয়া সেই পৰিশ্ৰমৰেই সুফল। ক্ৰীড়াৰ প্ৰতি আপোনালোকৰ নিষ্ঠা আৰু গঢ় লৈ উঠা সম্পূৰ্ণ ব্যৱস্থাটোৰ বাবেই এই সফলতা সম্ভৱ হৈছে।
এইবাৰ আপোনালোকে ৩০টা সোণ, ৩৫টা ৰূপ আৰু ৪৯টা ব্ৰঞ্জৰ পদক লাভ কৰিছে। ইয়াৰ লগতে ৫টা নতুন বিশ্ব অভিলেখ তথা ৯টা এছিয়ান অভিলেখ গঢ়ি সমগ্ৰ দেশক গৌৰৱান্বিত কৰিছে। এইবাৰ অংশগ্ৰহণ কৰা ৫৬গৰাকী মহিলা খেলুৱৈৰ ভিতৰত ৩৪গৰাকী কন্যাই পদক বিজয়ী হৈছে। আনকি চাৰিটা প্ৰতিযোগিতাত পদক মঞ্চৰ তিনিওটা স্থানতে আমাৰ দেশৰ খেলুৱৈয়ে স্থান লাভ কৰিছে। সোণৰ পদকো ভাৰতে লাভ কৰিছে, সেই একেটা প্ৰতিযোগিতাতে ৰূপ আৰু ব্ৰঞ্জৰ পদকো ভাৰতেই লাভ কৰিছে। প্ৰতিযোগিতাৰ অন্তিম দিনটোতো আপোনালোকে অসাধাৰণ প্ৰদৰ্শন আগবঢ়াইছিল। সেইদিনা আপোনালোকে ৯টা সোণৰ পদক জয় কৰিছিল। এনে লাগিছিল যেন আপোনালোকে সংকল্প লৈছিল যে প্ৰতিযোগিতা চলি থকালৈকে পদক জয়ৰ ধাৰা বন্ধ হ’বলৈ নিদিয়ে।
বন্ধুসকল,
এইবাৰ আমাৰ খেলুৱৈসকলে এনে কিছুমান প্ৰতিযোগিতাতো সোণৰ পদক লাভ কৰিছে, য’ত ভাৰতে ইয়াৰ পূৰ্বে কেতিয়াও এনে সফলতা লাভ কৰা নাছিল। পেৰা শ্বুটিঙত মোনা আগৰৱালে বিশ্ব অভিলেখ গঢ়িছে। হানীয়েও নিজৰ পূৰ্বৰ বিশ্ব অভিলেখ ভংগ কৰি উভতি আহিছে। হিমাংশু, ৰবি আৰু জেহানে নিজৰ প্ৰদৰ্শনেৰে সমগ্ৰ বিশ্বক দেখুৱাই দিছে যে শাৰীৰিক প্ৰত্যাহ্বানক কেনেদৰে পৰাস্ত কৰিব পাৰি।
বন্ধুসকল,
এগৰাকী খেলুৱৈৰ ব্যক্তিগত সফলতাই হওক বা দেশৰ সামূহিক সফলতাই হওক, বিজয়ৰ উজ্জ্বলতা সমগ্ৰ বিশ্বই প্ৰত্যক্ষ কৰে। কিন্তু সেই মুহূৰ্তটোৰ বাবে বছৰ বছৰ ধৰি কৰা পৰিশ্ৰম, দিনে-নিশাই বোৱাই দিয়া ঘাম, অটল নিষ্ঠা আৰু একাগ্ৰতাৰে কৰা সাধনাৰ ওপৰতেই বিজয়ৰ সুউচ্চ ভেটি নিৰ্মাণ হয়।
উদাহৰণস্বৰূপে, ৰিংকু জীয়ে এছিয়ান পেৰা গেমছ আৰম্ভ হোৱাৰ মাত্ৰ দুমাহ পূৰ্বে নিজৰ মাতৃক হেৰুৱাইছিল। ইমান ডাঙৰ দুখৰ মাজতো তেওঁ সাহস হেৰুওৱা নাছিল। যেতিয়া তেওঁ সোণৰ পদক জয় কৰিলে, তেতিয়া নিজৰ মাতৃৰ আলোকচিত্ৰ হাতত তুলি লৈ সেই পদক মাতৃৰ নামত উৎসৰ্গা কৰিলে। সেই মুহূৰ্তই সকলো দেশবাসীক আবেগিক কৰি তুলিছিল।
বন্ধুসকল,
আপোনালোক সকলোৰে সংগ্ৰাম আৰু সফলতাই প্ৰতিগৰাকী ভাৰতীয়ক অনুপ্ৰাণিত কৰে। এই যাত্ৰাত আপোনালোকৰ আৰু দেশৰ যাত্ৰাও একে ধৰণৰ হৈ আহিছে। সেইবাবেই আজি আপোনালোকৰ প্ৰচেষ্টা আৰু দেশৰ প্ৰচেষ্টা একত্ৰিত হৈ এক আৰু একে এঘাৰ হৈছে।
বন্ধুসকল,
২০১৪ চনৰ পিছত যেতিয়া দেশে বৃহৎ লক্ষ্যৰে নিজৰ যাত্ৰা আৰম্ভ কৰিছিল, তেতিয়া পৰিস্থিতি সম্পূৰ্ণ বেলেগ আছিল। অধিকাংশ অভিভাৱকে নিজৰ সন্তানক ক্ৰীড়াক্ষেত্ৰলৈ পঠিয়াবলৈ ভয় কৰিছিল। তেওঁলোক নিজেও শংকিত হৈছিল। ব্যৱস্থাৰ দুৰৱস্থা, সম্পদৰ অভাৱ, সহায়-সমৰ্থনৰ অভাৱ আৰু স্বচ্ছতাৰ অভাৱ আছিল। মানুহে ভাবিছিল যে এই ব্যৱস্থাৰ কোনো পৰিৱৰ্তন সম্ভৱ নহয়, সকলো এনেদৰেই চলি থাকিব। সকলোৱে যেন এই অৱস্থাকেই স্বাভাৱিক বুলি মানি লৈছিল।
কিন্তু আপোনালোকে যেনেদৰে কোনো অসুবিধাৰ সন্মুখত হাৰ মনা নাছিল, ঠিক তেনেদৰে দেশেও কেৱল নিজৰ লক্ষ্যৰ দিশে দৃষ্টি নিবদ্ধ ৰাখিছিল। আমি সিদ্ধান্ত লৈছিলোঁ যে আমাৰ যুৱপ্ৰজন্মৰ প্ৰতিভাক কোনো কাৰণতে অপচয় হ’বলৈ নিদিওঁ। সেয়েহে আপোনালোকৰ দৰে যুৱক-যুৱতীক আগবাঢ়ি যোৱাত বাধা দিয়া ব্যৱস্থাটোকেই সলনি কৰাৰ সংকল্প গ্ৰহণ কৰিছিলোঁ।
ইয়াৰ ফলতেই ক্ৰীড়াৰ ক্ষেত্ৰত নতুন দৃষ্টিভংগীৰ সৃষ্টি হৈছে। আজি এগৰাকী যুৱ খেলুৱৈৰ নিজৰ প্ৰতিভাৰ ওপৰত বিশ্বাস থাকিলে দেশ তেওঁৰ কাষত থিয় দিব বুলি তেওঁলোকৰ মনতো বিশ্বাস জন্মিছে। আমাৰ পেৰা ক্ৰীড়াক্ষেত্ৰই ইয়াৰ আটাইতকৈ ডাঙৰ উদাহৰণ। যিবোৰ ক্ৰীড়াক্ষেত্ৰত পূৰ্বে ভাৰতৰ অংশগ্ৰহণ অতি সীমিত আছিল, সেইবোৰত এতিয়া আমাৰ আধিপত্য বৃদ্ধি পাইছে।
ধনুৰ্বিদ্যা, এথলেটিকছ, শ্বুটিং, সাঁতোৰ, টেবুল টেনিছ, বেডমিণ্টন, জুডো, পাৱাৰলিফটিং আদি বিভিন্ন ক্ৰীড়াক্ষেত্ৰত নতুন নতুন যুৱ খেলুৱৈৰ উত্থান ঘটিছে। আমি নতুন নতুন চেম্পিয়ন লাভ কৰিছোঁ।
এইবাৰো আমাৰ ৬১গৰাকী খেলুৱৈয়ে প্ৰথমবাৰৰ বাবে এছিয়ান পেৰা গেমছত অংশগ্ৰহণ কৰিছিল। তেওঁলোক সম্পূৰ্ণ নতুন খেলুৱৈ আছিল। প্ৰথমবাৰৰ বাবে অংশগ্ৰহণ কৰা এই খেলুৱৈসকলৰ ভিতৰত ৩৬গৰাকী যুৱ খেলুৱৈয়ে পদক জয় কৰি উভতি আহিছে। আনকি সন্দীপে প্ৰথমবাৰৰ অংশগ্ৰহণতেই বিশ্ব অভিলেখ গঢ়িবলৈ সক্ষম হৈছে। যুৱ খেলুৱৈসকলৰ এই অংশগ্ৰহণে আজিৰ ভাৰতৰ ছবি দাঙি ধৰাৰ লগতে ভৱিষ্যতৰ ভাৰতৰো আগজাননী দিছে।
বন্ধুসকল,
আমি ক্ৰীড়াক কেৱল কেইখনমান ৰাষ্ট্ৰীয় আৰু আন্তঃৰাষ্ট্ৰীয় প্ৰতিযোগিতা হিচাপে নাচাওঁ। আমাৰ বাবে ক্ৰীড়া হৈছে ব্যক্তিত্ব গঠন আৰু ৰাষ্ট্ৰ নিৰ্মাণৰ শক্তিশালী মাধ্যম। ক্ৰীড়াই যুৱপ্ৰজন্মক পৰাজয়ৰ পিছতো কেনেদৰে জয়ী হ’ব পাৰি, সেই শিক্ষা দিয়ে। ই তেওঁলোকক অনুশাসন আৰু দলীয় মনোভাৱৰ অৰ্থ বুজাত সহায় কৰে।
বন্ধুসকল,
এই দৃষ্টিভংগীৰে আমি দেশত এক আধুনিক ক্ৰীড়া ব্যৱস্থা গঢ়ি তুলিছোঁ। দেশৰ বিদ্যালয় আৰু তৃণমূল পৰ্যায়ত ক্ৰীড়াৰ প্ৰসাৰৰ বাবে বিভিন্ন অভিযান চলোৱা হৈছে। বৃহৎ সংখ্যক ‘খেলো ইণ্ডিয়া’ কেন্দ্ৰ স্থাপন কৰা হৈছে। খেলুৱৈসকলে যাতে অলিম্পিক পৰ্যায়ৰ প্ৰশিক্ষণ লাভ কৰিব পাৰে, তাৰ বাবে আমি ‘টপছ’ আঁচনিও আৰম্ভ কৰিছোঁ। অলিম্পিকক লক্ষ্য হিচাপে লৈ এইবাৰ লালকিল্লাৰ পৰাই মই প্ৰতিভা সন্ধান অভিযানত যুৱপ্ৰজন্মক আগবাঢ়ি আহিবলৈ আহ্বান জনাইছোঁ।
বন্ধুসকল,
এই প্ৰচেষ্টাসমূহত পেৰা গেমছকো সমান গুৰুত্ব প্ৰদান কৰা হৈছে। ইয়াৰ ফলতেই আপোনালোকৰ দৰে প্ৰতিভাৱান খেলুৱৈসকল উজলি উঠিছে আৰু আজি বৃহৎ প্ৰতিযোগিতাসমূহত দেশে গৌৰৱ অৰ্জন কৰিবলৈ সক্ষম হৈছে। এইবাৰৰ পেৰা গেমছতো আমি ইয়াৰ উদাহৰণ দেখিবলৈ পাইছোঁ। এই প্ৰতিযোগিতাত ‘টপছ’ আঁচনিৰ পৰা সহায় লাভ কৰা খেলুৱৈসকলে ৪১টা পদক জয় কৰিছে। ‘খেলো ইণ্ডিয়া’ৰ খেলুৱৈসকলে লাভ কৰিছে ১৯টা পদক। ইয়াৰ পৰা প্ৰমাণ হয় যে আমাৰ প্ৰচেষ্টাসমূহ সঠিক দিশত আগবাঢ়িছে।
বন্ধুসকল,
আজি ভাৰতত ক্ৰীড়াৰ ক্ষেত্ৰত গ্ৰহণ কৰা আধুনিক নীতিসমূহে খেলপথাৰৰ বাহিৰতো যুৱপ্ৰজন্মৰ বাবে ক্ৰীড়াৰ সৈতে জড়িত বহু নতুন সুযোগৰ সৃষ্টি কৰিছে। ক্ৰীড়াৰ আন্তঃগাঁথনি নিৰ্মাণ, ক্ৰীড়া সামগ্ৰীৰ উৎপাদন, সম্প্ৰচাৰ অৰ্থনীতি আদি সকলো ক্ষেত্ৰতে ইয়াৰ সম্প্ৰসাৰণ ঘটিছে।
বন্ধুসকল,
কেইদিনমান পূৰ্বে চৰকাৰে প্ৰায় ১,৮০০ কোটি টকাতকৈ অধিক ব্যয়ৰ ‘খেলো ইণ্ডিয়া ক্ৰীড়া সামগ্ৰী উৎপাদন আঁচনি’ত অনুমোদন জনাইছে। এতিয়া আমাৰ ক্ৰীড়া সামগ্ৰী উৎপাদন উদ্যোগেও নতুন কৃতিত্ব অৰ্জন কৰাৰ সময় আহি পৰিছে।
যেতিয়া কোনো ভাৰতীয় বা বিদেশী খেলুৱৈ খেলপথাৰত নামিব, তেতিয়া তেওঁৰ ক্ৰীড়া সামগ্ৰীসমূহো ‘মে’ড ইন ইণ্ডিয়া’ হ’ব লাগে। তেওঁৰ পোছাক আৰু জোতাও ‘মে’ড ইন ইণ্ডিয়া’ হ’ব লাগে। আমি বিচাৰোঁ যে ভাৰতে যেনেকৈ বিশ্বমানৰ খেলুৱৈ সৃষ্টি কৰে, তেনেদৰে বিশ্বমানৰ ক্ৰীড়া সামগ্ৰীও উৎপাদন কৰে। ভাৰতৰ ক্ৰীড়া সামগ্ৰীসমূহে যাতে সমগ্ৰ বিশ্বৰ বজাৰত স্থান লাভ কৰে, সেয়াই আমাৰ লক্ষ্য।
ইয়াৰ ফলত ভাৰতৰ ক্ষুদ্ৰ, লঘু আৰু মজলীয়া উদ্যোগ খণ্ডই নতুন শক্তি লাভ কৰিব। সৰু চহৰ আৰু গ্ৰামাঞ্চলতো নতুন নতুন সুযোগৰ সৃষ্টি হ’ব।
বন্ধুসকল,
আজিৰ এই অনুষ্ঠানৰ পিছত আপোনালোক সকলোকে বিদ্যালয়, মহাবিদ্যালয় আৰু বিভিন্ন প্ৰতিষ্ঠানলৈও আমন্ত্ৰণ জনোৱা হ’ব। তাত যুৱপ্ৰজন্মই আপোনালোকৰ কথা শুনিব বিচাৰিব আৰু আপোনালোকৰ পৰা শিকিবলৈ আগ্ৰহী হ’ব। আপোনালোকে যেতিয়া যুৱক-যুৱতীসকলৰ সৈতে কথা পাতিব, তেতিয়া খেলপথাৰত কেনেদৰে জয়ী হ’ব পাৰি, সেই কৌশলসমূহ শিকোৱাৰ লগতে খেলপথাৰৰ বাহিৰত ক্ৰীড়াৰ সৈতে জড়িত কি কি সুযোগ আছে, সেই বিষয়েও তেওঁলোকক অৱগত কৰিব।
লগতে দেশখনে বিশেষভাৱে সক্ষম ভাই-ভনীসকলৰ জীৱন সহজ কৰি তুলিবলৈ কিমান বৃহৎ প্ৰচেষ্টা গ্ৰহণ কৰিছে, সেই বিষয়েও তেওঁলোকক জনাব। কেইদিনমান পূৰ্বে মন্ত্ৰীসভাই বিশেষভাৱে সক্ষম ব্যক্তিসকলৰ পেঞ্চন সন্দৰ্ভত গুৰুত্বপূৰ্ণ সিদ্ধান্ত গ্ৰহণ কৰিছে। আমি পেঞ্চনৰ পৰিমাণ বৃদ্ধি কৰিছোঁ। পূৰ্বে বিশেষভাৱে সক্ষমতাৰ যি মাপকাঠী ৮০ শতাংশ আছিল, সেয়া হ্ৰাস কৰি ৪০ শতাংশ কৰা হৈছে।
আগতে পেঞ্চন লাভৰ বাবে ১৮ বছৰ বয়স সম্পূৰ্ণ হোৱাটো বাধ্যতামূলক আছিল। এতিয়া জন্মৰ পৰাই যোগ্যতা থকা বিশেষভাৱে সক্ষম শিশুসকলৰ বাবেও পেঞ্চন লাভৰ পথ মুকলি কৰা হৈছে।
একেদৰে ভাৰতীয় সাংকেতিক ভাষাৰ প্ৰসাৰৰ বাবেও বৃহৎ প্ৰচেষ্টা গ্ৰহণ কৰা হৈছে। ১০ হাজাৰতকৈ অধিক শব্দ সন্নিৱিষ্ট এখন সাংকেতিক ভাষাৰ অভিধান প্ৰস্তুত কৰা হৈছে। বিদ্যালয়ৰ পাঠ্যপুথিসমূহো সাংকেতিক ভাষাত উপলব্ধ কৰোৱা হৈছে। ‘সুগম্য ভাৰত অভিযান’ৰ জৰিয়তে ৰাজহুৱা স্থানসমূহ বিশেষভাৱে সক্ষম লোকসকলৰ বাবে অনুকূল কৰি তোলা হৈছে।
আমাৰ প্ৰচেষ্টা হৈছে দেশৰ প্ৰতিগৰাকী বিশেষভাৱে সক্ষম ব্যক্তি, প্ৰতিগৰাকী বিশেষভাৱে সক্ষম ভাই-ভনীয়ে যাতে সন্মান লাভ কৰে, একেদৰে সমান সুযোগো লাভ কৰে আৰু নিজৰ সামৰ্থ্যৰ জৰিয়তে জীৱনত আগবাঢ়ি যাব পাৰে।
বন্ধুসকল,
আইচি-নাগোয়াৰ পদকৰ মঞ্চই আপোনালোকৰ যাত্ৰাৰ অন্তিম গন্তব্যস্থান নহয়। এই কথা মনত ৰাখিব। এই সফলতাক আপোনালোকে আৰু বৃহৎ লক্ষ্যত উপনীত হোৱাৰ আৰম্ভণিৰ ভেটি হিচাপে ব্যৱহাৰ কৰিব লাগিব।
ভাৰতৰ লগতে আপোনালোকৰ অধিকাংশ খেলুৱৈৰ পৰৱৰ্তী লক্ষ্য হৈছে—লছ এঞ্জেলছ, লছ এঞ্জেলছ ২০২৮! অৱনী আৰু মনীষে ইতিমধ্যে লছ এঞ্জেলছত অনুষ্ঠিত হ’বলগীয়া প্ৰতিযোগিতাৰ বাবে নিজৰ স্থান নিশ্চিত কৰিছে।
আমাৰ লক্ষ্য হোৱা উচিত যাতে অধিক সংখ্যক ভাৰতীয় খেলুৱৈয়ে লছ এঞ্জেলছ ২০২৮ত অংশগ্ৰহণ কৰে আৰু অধিক সংখ্যক পদক জয় কৰি উভতি আহে। সেয়েহে, আপোনালোকে এই মুহূৰ্তটো পূৰ্ণ উদ্যমেৰে উদযাপন কৰক আৰু এতিয়াৰ পৰাই পৰৱৰ্তী লক্ষ্যৰ বাবে প্ৰস্তুতি আৰম্ভ কৰক। দেশ আপোনালোকৰ সৈতে আছে, আৰু মই নিজেও আপোনালোকৰ কাষত আছোঁ। সমগ্ৰ দেশে আপোনালোকৰ পৰৱৰ্তী বিজয়ৰ বাবে অপেক্ষা কৰি আছে।
আপোনালোক সকলোকে পুনৰ এবাৰ আন্তৰিক অভিনন্দন আৰু অলেখ শুভকামনা জনাইছোঁ।
দীপাৱলীৰ মহোৎসৱ আৰম্ভ হৈছে। এইবাৰ আপোনালোকে অতি গৌৰৱ আৰু আনন্দৰে দীপাৱলী উদযাপন কৰক। কিন্তু দীপাৱলীৰ সময়তে পৰৱৰ্তী লক্ষ্যও মনত স্থিৰ কৰক আৰু নতুন সংকল্পৰে আগবাঢ়ি যাওক। আপোনালোক সকলোলৈ মোৰ আন্তৰিক শুভকামনা জনালোঁ।
অশেষ ধন্যবাদ।
****
MJPS/SS/SS/RK/DM
