પ્રધાનમંત્રી શ્રી નરેન્દ્ર મોદી 20 નવેમ્બર 2026 ના રોજ સાંજે આશરે 5:30 વાગ્યે નવી દિલ્હીના પુરાના કિલ્લા ખાતે પ્રથમ શાંઘાઈ કોઓપરેશન ઓર્ગેનાઇઝેશન (SCO) સિવિલાઇઝેશનલ ડાયલોગ ફોરમનું ઉદ્ઘાટન કરશે. તેઓ આ પ્રસંગે જનસભાને સંબોધિત પણ કરશે.
20 થી 22 નવેમ્બર 2026 દરમિયાન યોજાનાર આ ફોરમનો ઉદ્દેશ્ય પ્રદેશના સમૃદ્ધ અને એકબીજા સાથે જોડાયેલા સભ્યતાગત વારસાની ઉજવણી કરવાનો, લોકો વચ્ચેના સંબંધો મજબૂત કરવાનો અને આંતર-સાંસ્કૃતિક સંવાદ તથા સહયોગને પ્રોત્સાહન આપવાનો છે.
આ પહેલ 2025 માં ચીનના તિયાનજિનમાં યોજાયેલી SCO સમિટમાં પ્રધાનમંત્રી દ્વારા SCO માળખા હેઠળ સભ્યતાગત સંવાદ માટે એક સમર્પિત પ્લેટફોર્મ સ્થાપિત કરવા માટે મૂકવામાં આવેલા પ્રસ્તાવ પર આધારિત છે. ત્યારબાદ SCO ના બિશ્કેક ઘોષણાપત્રમાં આ પ્રસ્તાવને આવકારવામાં આવ્યો હતો.
ઉદ્ઘાટન સમારોહમાં “સિવિલાઇઝેશન્સ ઇન કન્વર્ઝેશન – કલ્ચરલ શો” રજૂ કરવામાં આવશે, જે સંગીત, નૃત્ય, દ્રશ્ય વાર્તા કહેવા અને કથનનું સંયોજન કરતી પ્રસ્તુતિ છે. “વસુધૈવ કુટુમ્બકમ્ – વિશ્વ એક પરિવાર છે”ની થીમ પર આધારિત, તે ભારત અને યુરેશિયામાં સાંસ્કૃતિક જોડાણો પર પ્રકાશ પાડશે.
આ ફોરમમાં “અસ્તિત્વ – આપણા અસ્તિત્વનો સાર” શીર્ષક હેઠળ ભારતના પુરાતત્વીય, કલાત્મક અને સાહિત્યિક વારસાને પ્રદર્શિત કરતા પ્રદર્શનો પણ યોજાશે. તે ઈ.સ. પૂર્વે 1200 થી ઈ.સ. 1200 સુધીના પુરાતત્વીય પુરાવાઓ દ્વારા દિલ્હીના ઇતિહાસનો ગહન પરિચય આપશે, જેમાં ઉત્ખનન કરાયેલા અવશેષો, કલાકૃતિઓ, સ્થાપત્યના ટુકડાઓ અને અન્ય મહત્વપૂર્ણ શોધોનો સમાવેશ થાય છે. “મહાભારત સ્ક્રોલ પેવેલિયન – અનંત: 18મી સદીનો એક દુર્લભ મહાભારત સ્ક્રોલ” ભારતની સમૃદ્ધ મહાકાવ્ય અને કલાત્મક પરંપરાઓને પ્રતિબિંબિત કરતા ચિત્રિત સ્ક્રોલનું પ્રદર્શન કરશે.
21 અને 22 નવેમ્બરના રોજ ચાર વિષયવસ્તુ આધારિત સત્રો યોજાશે, જેમાં વિદ્વાનો, શિક્ષણવિદો, વિષય નિષ્ણાતો અને સાંસ્કૃતિક પ્રતિનિધિઓ એકસાથે આવશે. ચર્ચાઓમાં સંગીત અને પર્ફોર્મિંગ આર્ટ્સ, કાપડ, ભોજન, પરંપરાગત રમતો જેવી સાંસ્કૃતિક અભિવ્યક્તિઓ; કલા અને સ્થાપત્યમાં સહિયારી પરંપરાઓ; લિપિઓ અને હસ્તપ્રતો સહિત ભાષા અને સાહિત્યિક પરંપરાઓ; અને મઠના માર્ગો તથા દાર્શનિક પરંપરાઓ આવરી લેવામાં આવશે.
SM/NP/GP
સોશિયલ મીડિયા પર અમને ફોલો કરો :
@PIBAhmedabad
/pibahmedabad1964
/pibahmedabad
pibahmedabad1964@gmail.com [
0KB ]