পি এম ইণ্ডিয়া

মহামহিম প্ৰধানমন্ত্ৰী ৰব জেটেন,

দুয়োখন দেশৰ প্ৰতিনিধিসকল,

নেদাৰলেণ্ডৰ ব্যৱসায়িক ক্ষেত্ৰৰ বিশিষ্ট ব্যক্তিসকল,

নমস্কাৰ!

আজি ইয়াত, বিশ্বৰ  উদ্ভাৱনীমূলক কোম্পানীসমূহৰ বিশিষ্ট ব্যক্তিসকলৰ মাজত উপস্থিত থকাৰ কথাই মোক অপৰিসীম আনন্দ দিছে। আজি ৩০০ৰো অধিক ডাচ কোম্পানী ‘ইণ্ডিয়া ষ্ট’ৰী’ৰ এক অবিচ্ছেদ্য অংগ হৈ পৰিছে।  আপোনালোকৰ দৃষ্টিভংগীৰ বাবেই—আৰু ভাৰতৰ প্ৰতি থকা  আপোনালোকৰ আস্থাৰ বাবেই— ইউৰোপৰ পৰা   নেদাৰলেণ্ডে  ভাৰতৰ সৰ্ববৃহৎ বিনিয়োগকাৰী তথা ইয়াৰ দ্বিতীয় বৃহত্তম বাণিজ্যিক অংশীদাৰ হিচাপে  আত্মপ্ৰকাশ কৰিছে।

বন্ধুসকল,

আপোনালোকৰ কোম্পানীবোৰ কেৱল ভাৰতৰ বিখ্যাত ব্ৰেণ্ডেই নহয়; এইবোৰে  ভাৰত আৰু নেদাৰলেণ্ডৰ মাজত থকা বন্ধুত্বৰ ব্ৰেণ্ড এম্বেছাদৰ হিচাপেও কাম কৰিছে। মই এই কথাত  আনন্দিত যে এনএক্সপি, ফিলিপছ আৰু প্ৰ’ছেছৰ দৰে কোম্পানীয়ে  ভাৰতৰ   প্ৰতিভাৰ সৈতে সহযোগিতা কৰি বিশ্বৰ আগশাৰীৰ সমাধান বিকশিত কৰিবলৈ সক্ষম হৈছে।

এপিএম, ডামেন আৰু ৰয়েল বোপাকৰ দৰে কোম্পানীয়ে ভাৰতৰ বন্দৰ, জাহাজ, আৰু লজিষ্টিক খণ্ডক ৰূপান্তৰিত কৰিছে। ভাৰতৰ সমান্তৰালকৈ কৃষি তথা বহনক্ষমতাৰ ক্ষেত্ৰত বিশ্বৰ উন্নত ভৱিষ্যত সুনিশ্চিত কৰাৰ অৰ্থে আন বহু কাম কৰি আছে।

মাত্ৰ কিছু সময়ৰ আগতে এ এছ এম এল আৰু টাটাৰ মাজত বুজাবুজি চুক্তি স্বাক্ষৰিত হৈছে—এই উন্নয়নে এতিয়া এ এছ এম এলৰ সঁজুলি ব্যৱহাৰ কৰি ভাৰতত অৰ্ধপৰিবাহী চিপ নিৰ্মাণ কৰাটো সম্ভৱ কৰি তুলিব । আজি আপোনালোকে কৰা মন্তব্যত ভাৰত সন্দৰ্ভত এক অবিশ্বাস্য আশাবাদৰ ভাব স্পষ্ট হৈ পৰিছে। এই আশাবাদক স্পষ্ট ফলাফললৈ ৰূপান্তৰিত কৰাটোৱেই আমাৰ নিশ্চয়তা।

বন্ধুসকল,

সমসাময়িক ভাৰতে পৰিসৰ আৰু স্থিৰতা উভয়ৰে প্ৰতীক হিচাপে থিয় দিছে। পৰিসৰৰ ক্ষেত্ৰত আমি কেৱল বিশ্বৰ আটাইতকৈ দ্ৰুতগতিত বৃদ্ধি পোৱা ডাঙৰ অৰ্থনীতি নহয়, বিশ্বৰ সৰ্ববৃহৎ প্ৰতিভাৰো ঘৰো। আন্তঃগাঁথনিয়েই হওক, স্বচ্ছ শক্তিয়েই হওক, সংযোগেই  হওক— ভাৰতৰ গতিৰ সৈতে বিশ্বৰ আন কোনো দেশে সমান ফেৰ মাৰিব  নোৱাৰে। ঠিক সেইবাবেই ভাৰতে বৰ্তমান বিশ্বৰ অৰ্থনৈতিক বিকাশত ১৭ শতাংশ অৰিহণা যোগাব পাৰিছে।

স্থিতিশীলতাৰ বিষয়টোৰ কথা ক’বলৈ গ’লে ক’ব পাৰি যে  আজি বিশ্বৰ সৰ্ববৃহৎ গণতন্ত্ৰৰ প্ৰধানমন্ত্ৰী হিচাপে মোৰ সেৱাৰ দ্বাদশ বছৰ সম্পূৰ্ণ হৈছে। এই ১২ বছৰত নিৰন্তৰ সংস্কাৰৰ প্ৰক্ৰিয়াৰ জৰিয়তে আমি আমাৰ অৰ্থনৈতিক ডি এন এক মৌলিকভাৱে ৰূপান্তৰিত কৰিছো। আমাৰ দিশটো স্পষ্ট হৈয়েই আছে: ব্যক্তিগত খণ্ডক নীতিগত ভৱিষ্যদ্বাণীযোগ্যতা প্ৰদান কৰা আৰু তেওঁলোকৰ বাবে উপলব্ধ সুযোগৰ পথসমূহ সম্প্ৰসাৰিত  কৰা।

মহাকাশেই হওক, খননেই হওক বা পাৰমাণৱিক শক্তিয়েই হওক—আমি প্ৰতিটো খণ্ড ব্যক্তিগত খণ্ডৰ বাবে মুকলি কৰি দিছো। আমি অহৰহ অনুপালনৰ বোজা হ্ৰাস কৰি আহিছো আৰু ব্যৱসায় কৰাৰ সহজতা বৃদ্ধি কৰিছো। শেহতীয়াকৈ আমি কৰ, শ্ৰম সংহিতা, আৰু শাসনৰ দৰে ক্ষেত্ৰত পৰৱৰ্তী প্ৰজন্মৰ সংস্কাৰ ৰূপায়ণ কৰিছো। এতিয়া ভাৰতত উৎপাদন কৰাটো অতি ব্যয়-সাধ্য   হৈ পৰিছে।

ইলেক্ট্ৰনিকছ—এসময়ত ভাৰতৰ বাবে এটা প্ৰধান আমদানি সামগ্ৰীকৃত সামগ্ৰী আছিল—আজি ই ভাৰতৰ সৰ্ববৃহৎ ৰপ্তানি সামগ্ৰী হিচাপে আত্মপ্ৰকাশ কৰিছে। এই উৎপাদন বৃদ্ধিক পৰৱৰ্তী পৰ্যায়লৈ লৈ যাবলৈ আমি কেইবাটাও মূল খণ্ডত উদগনি  আগবঢ়াইছো। এই উদগনিসমূহৰ সহায় লৈ আপোনালোকে  সমগ্ৰ বিশ্বৰ বাবে ভাৰতত উৎপাদন কৰিব পাৰিব।

একেদৰে সেৱা খণ্ডতো ভাৰত—নিজৰ প্ৰতিভাৰ শক্তিৰ দ্বাৰা পৰিচালিত হৈছে—ভাৰত এতিয়া দক্ষতা আৰু উদ্ভাৱনৰ ইঞ্জিন হৈ পৰিছে। সমগ্ৰ বিশ্বৰ প্ৰযুক্তি কোম্পানীসমূহে ভাৰতত নিজৰ গ্ল’বেল কেপেবিলিটি চেণ্টাৰ স্থাপন কৰিছে। আমি আপোনালোক সকলোকে ভাৰতত আৰ্হি প্ৰস্তুত  আৰু উদ্ভাৱন কৰিবলৈ আমন্ত্ৰণ জনাইছো আৰু তেনে কৰিবলৈ এতিয়াতকৈ উত্তম সময় আৰু থাকিব নোৱাৰে।

বন্ধুসকল,

২০২৬ চনৰ পৰা ভাৰত-ইউৰোপ সম্পৰ্কত এক নতুন ‘সোণালী যুগ’ৰ আৰম্ভণি হৈছে । এইবাৰ আমি ভাৰত আৰু ইউৰোপীয় সংঘৰ মাজত এক ঐতিহাসিক মুক্ত বাণিজ্য চুক্তি সম্পাদন কৰিছো। বিশ্বৰ দুই বৃহৎ, গণতান্ত্ৰিক তথা দায়িত্বশীল শক্তিৰ মাজত স্বাক্ষৰিত এই চুক্তিখনে ভাগ-বাটোৱাৰা  কৰা সমৃদ্ধিৰ বাবে এক শক্তিশালী ভেটি স্থাপন  কৰিব।

 এফটিএৰ সম্পূৰ্ণ সম্ভাৱনা উদ্ভাসিত কৰিবলৈ প্ৰধানমন্ত্ৰী জেটেন  আৰু মই আজি কেইবাটাও উল্লেখযোগ্য সিদ্ধান্ত ল’বলৈ সাজু হৈছো। ভাৰত আৰু নেদাৰলেণ্ডৰ এই বিশ্বাসযোগ্য অংশীদাৰিত্বক আমি কৌশলগত অংশীদাৰিত্বলৈ উন্নীত কৰিছো। আমি গ্ৰীণ হাইড্ৰজেনৰ ক্ষেত্ৰত এক অভিলাষী যৌথ কাৰ্য পৰিকল্পনা  আৰম্ভ কৰিছো। আমি প্ৰযুক্তি খণ্ডত আমাৰ সম্পৰ্কক ‘ভৱিষ্যতৰ বাবে সাজু’ কৰি তুলিছো।

আমি আমাৰ দুয়োখন  দেশৰ মাজত প্ৰতিভাৰ গতিশীলতা, বিশ্ববিদ্যালয়ৰ অংশীদাৰিত্ব  আৰু যৌথ অনুসন্ধান তথা  বিকাশৰ পদক্ষেপক আৰু অধিক শক্তিশালী কৰাৰ মনস্থ কৰিছো। মুঠতে ভাৰত-নেদাৰলেণ্ডৰ অংশীদাৰিত্বৰ ভৱিষ্যত পূৰ্বতকৈ উজ্জ্বল হৈ পৰিছে।

বন্ধুসকল,

ভাৰত আৰু ইউৰোপৰ মাজত শক্তিশালী কৌশলগত অংশীদাৰিত্বই আমাৰ ব্যৱসায়িক সম্পৰ্কত সতেজ গতি প্ৰদান কৰিছে। এই দিশত দ্ৰুতগতিত আগবাঢ়ি যোৱাটো এতিয়া আপোনালোকৰ কাম । মোৰ সম্পূৰ্ণ বিশ্বাস যে আপোনালোকে এতিয়া ভাৰতত আপোনালোকৰ পৰিসৰ, বিনিয়োগ আৰু উচ্চাকাংক্ষা বৃদ্ধি কৰিব—আৰু আপোনালোকৰ লগতে সমগ্ৰ ইউৰোপীয় উদ্ভাৱন পৰিৱেশ তন্ত্ৰয়ো  ভাৰতত স্থান লাভ কৰিব।

বন্ধুসকল,

নেদাৰলেণ্ডত এটা কথা প্ৰচলিত হৈ আছে-

“বন্দৰত জাহাজসমূহ নিৰাপদ, কিন্তু বন্দৰত থাকিবলৈয়েই জাহাজ নিৰ্মাণ কৰা নহয়।”

এই কথা ডাচ ব্যৱসায়ী সমাজতকৈ কোনে ভালকৈ বুজিব পাৰিব? যুগ যুগ ধৰি আপোনালোকৰ দেশখনে নতুন সুযোগৰ সন্ধান কৰিবলৈ আগবাঢ়ি আহিছে৷ মই আপোনালোকক আশ্বস্ত কৰিছো—ভাৰতত আপোনালোকৰ এই অভিযান সফল আৰু অৰ্থপূৰ্ণ, দুয়োটাই হ’ব। এতিয়া আপোনালোকে ভাৰতত  আৰু অধিক সাহসী পদক্ষেপ গ্ৰহণ কৰিব লাগিব।

বে- ডাংকট।

আপোনালোকক অশেষ ধন্যবাদ।

***

MJPS/SS/ST/DM