পি এম ইণ্ডিয়া

প্ৰধানমন্ত্ৰী শ্ৰী নৰেন্দ্ৰ মোদীয়ে আজি নতুন দিল্লীৰ ৰায় পিথোৰা সাংস্কৃতিক কমপ্লেক্সত “দ্য লাইট এণ্ড দ্য লোটাছ ঃ ৰেলিছ অব্ দ্য এৱেকেনড ৱান” শীৰ্ষক ভগৱান বুদ্ধৰ সৈতে জড়িত পৱিত্ৰ পিপ্ৰহৱা ধ্বংসাৱশেষৰ বিশাল আন্তঃৰাষ্ট্ৰীয় প্ৰদৰ্শনী উদ্বোধন কৰে। এই উপলক্ষে সভাত ভাষণ দি প্ৰধানমন্ত্ৰীয়ে মন্তব্য কৰে যে এশ পঁচিশ বছৰ অপেক্ষাৰ অন্তত ভাৰতৰ ঐতিহ্য ঘূৰি আহিছে, ভাৰতৰ উত্তৰাধিকাৰ পুনৰ উভতি আহিছে। তেওঁ আলোকপাত কৰে যে আজিৰ পৰা ভাৰতৰ জনসাধাৰণে ভগৱান বুদ্ধৰ এই পৱিত্ৰ ধ্বংসাৱশেষসমূহ প্ৰত্যক্ষ কৰি তেওঁৰ আশীৰ্বাদ লাভ কৰিব পাৰিব। এই শুভ অনুষ্ঠানত উপস্থিত থকা সকলো অতিথিক শ্ৰী মোদীয়ে আদৰণি জনাই শুভেচ্ছা জ্ঞাপন কৰে। তেওঁ বৌদ্ধ পৰম্পৰাৰ লগত জড়িত সন্ন্যাসী আৰু ধৰ্মাচাৰ্যও উপস্থিত থকা বুলি উল্লেখ কৰি তেওঁলোকৰ প্ৰতি তেওঁৰ শ্ৰদ্ধা ব্যক্ত কৰে। তেওঁ গুৰুত্ব আৰোপ কৰি কয় যে তেওঁলোকৰ উপস্থিতিয়ে এই অনুষ্ঠানটোক নতুন শক্তি প্ৰদান কৰিছে। প্ৰধানমন্ত্ৰীয়ে এই কথাতো আলোকপাত কৰে যে ২০২৬ চনৰ একেবাৰে আৰম্ভণিতে এই শুভ উদযাপন অতি প্ৰেৰণাদায়ক। ভগৱান বুদ্ধৰ আশীৰ্বাদত ২০২৬ বৰ্ষই বিশ্বৰ বাবে শান্তি, সমৃদ্ধি, সম্প্ৰীতিৰ এক নতুন যুগৰ সূচনা কৰক তাকেই কামনা কৰে।

প্ৰধানমন্ত্ৰীয়ে মন্তব্য কৰে যে এই প্ৰদৰ্শনী স্থাপন কৰা ঠাইখন নিজেই বিশেষ। তেওঁ আলোকপাত কৰে যে কিলা ৰায় পিথোৰাৰ স্থান ভাৰতৰ গৌৰৱময় ইতিহাসৰ এখন দেশ, য’ত প্ৰায় হাজাৰ বছৰৰ আগতে প্ৰাক্তন শাসকসকলে শক্তিশালী আৰু নিৰাপদ দেৱালেৰে আগুৰি থকা এখন চহৰ স্থাপন কৰিছিল। তেওঁ গুৰুত্ব আৰোপ কৰি কয় যে আজি একেটা ঐতিহাসিক চহৰৰ কমপ্লেক্সতে ইতিহাসৰ এটা আধ্যাত্মিক আৰু পৱিত্ৰ অধ্যায় সংযোজন কৰা হৈছে। শ্ৰী মোদীয়ে উল্লেখ কৰে যে ইয়ালৈ অহাৰ আগতে তেওঁ এই ঐতিহাসিক প্ৰদৰ্শনীখন বিস্তৃতভাৱে পৰ্যবেক্ষণ কৰিছিল। তেওঁ লগতে কয় যে আমাৰ মাজত ভগৱান বুদ্ধৰ পৱিত্ৰ ধ্বংসাৱশেষ থকাটোৱে সকলোকে ধন্য কৰিছে। তেওঁ উল্লেখ কৰে যে তেওঁলোক ভাৰতৰ পৰা আঁতৰি যোৱা আৰু অৱশেষত পুনৰ ঘূৰি অহা- দুয়োটা নিজৰ বাবেই উল্লেখযোগ্য শিক্ষা। দাসত্ব কেৱল ৰাজনৈতিক আৰু অৰ্থনৈতিক নহয়, ই আমাৰ ঐতিহ্যকো ধ্বংস কৰে, সেই শিক্ষাৰ কথাত জোৰ দি শ্ৰী মোদীয়ে মন্তব্য কৰে যে দাসত্বৰ সময়ছোৱাত কাঢ়ি লোৱা আৰু প্ৰায় এশ পঁচিশ বছৰ ধৰি দেশৰ বাহিৰত থকা ভগৱান বুদ্ধৰ পৱিত্ৰ ধ্বংসাৱশেষৰ ক্ষেত্ৰতো একেই ঘটিছিল। তেওঁ আঙুলিয়াই দিলে যে যিসকলে সেইবোৰ লৈ গৈছিল তেওঁলোকৰ বাবে, আৰু তেওঁলোকৰ বংশধৰসকলৰ বাবে এই ধ্বংসাৱশেষবোৰ কেৱল নিৰ্জীৱ প্ৰাচীন টুকুৰাহে। তেওঁ লগতে কয় যে এই কাৰণেই তেওঁলোকে এই পৱিত্ৰ ধ্বংসাৱশেষসমূহ আন্তঃৰাষ্ট্ৰীয় বজাৰত নিলাম কৰাৰ চেষ্টা কৰিছিল। প্ৰধানমন্ত্ৰীয়ে দৃঢ়তাৰে কয় যে ভাৰতৰ বাবে অৱশ্যে এই ধ্বংসাৱশেষসমূহ আমাৰ পূজনীয় দেৱতাৰ এক অংশ, আমাৰ সভ্যতাৰ এক অবিচ্ছেদ্য অংগ। তেওঁ ঘোষণা কৰে যে ভাৰতে সিদ্ধান্ত লৈছে যে তেওঁলোকক ৰাজহুৱা নিলামৰ অনুমতি দিয়া নহ’ব। শ্ৰী মোদীয়ে গোড্ৰেজ গোটৰ প্ৰতি কৃতজ্ঞতা জ্ঞাপন কৰি কয় যে তেওঁলোকৰ সহযোগত ভগৱান বুদ্ধৰ সৈতে জড়িত এই পৱিত্ৰ ধ্বংসাৱশেষসমূহ তেওঁৰ কৰ্মভূমি, তেওঁৰ চিন্তাৰ ভূমি, তেওঁৰ মহাবোধি ভূমি আৰু তেওঁৰ মহাপৰিনিৰ্বাণ ভূমিলৈ ঘূৰি আহিছে।

“ভগৱান বুদ্ধৰ জ্ঞান আৰু তেওঁ দেখুৱাই দিয়া পথ সকলো মানৱ জাতিৰ বাবে” বুলি উল্লেখ কৰি প্ৰধানমন্ত্ৰীয়ে এই আৱেগক বিগত কেইমাহমানৰ পৰা বাৰে বাৰে অনুভৱ কৰা বুলি কয়। তেওঁ উল্লেখ কৰে যে যোৱা কেইমাহমানত ভগৱান বুদ্ধৰ পৱিত্ৰ ধ্বংসাৱশেষ য’তেই ভ্ৰমণ কৰিছিল তাতেই বিশ্বাস আৰু ভক্তিৰ ঢৌৰ উঠিছিল। শ্ৰী মোদীয়ে উল্লেখ কৰে যে থাইলেণ্ডত য’ত এনে পৱিত্ৰ ধ্বংসাৱশেষ বিভিন্ন স্থানত ৰখা হৈছিল, তাত এমাহ নৌহওঁতেই চল্লিশ লাখতকৈ অধিক ভক্ত দৰ্শনৰ বাবে আহিছিল। তেওঁ দৃঢ়তাৰে কয় যে ভিয়েটনামত জনসাধাৰণৰ আৱেগ ইমানেই প্ৰবল আছিল যে প্ৰদৰ্শনীৰ সময়সীমা বৃদ্ধি কৰিবলগীয়া হৈছিল আৰু ৯খন চহৰত প্ৰায় ১.৭৫ কোটি লোকে এই ধ্বংসাৱশেষসমূহত শ্ৰদ্ধাঞ্জলি জনাইছিল। তেওঁ আঙুলিয়াই দিয়ে যে মংগোলিয়াত গণ্ডন মঠৰ বাহিৰত হাজাৰ হাজাৰ লোকে ঘণ্টাৰ পিছত ঘণ্টা অপেক্ষা কৰিছিল, আৰু বহুতে ভাৰতীয় প্ৰতিনিধিসকলক কেৱল বুদ্ধৰ দেশৰ পৰা অহাৰ বাবেই স্পৰ্শ কৰিবলৈ ইচ্ছা কৰিছিল। তেওঁ উল্লেখ কৰে যে ৰাছিয়াৰ কাল্মিকিয়া অঞ্চলত মাত্ৰ এসপ্তাহৰ ভিতৰতে ১.৫ লাখতকৈ অধিক ভক্তই এই পৱিত্ৰ ধ্বংসাৱশেষৰ সাক্ষী হৈছিল, যিটো স্থানীয় জনসংখ্যাৰ আধাতকৈ অধিক লোকৰ সমান। বিভিন্ন দেশৰ এই অনুষ্ঠানসমূহত সাধাৰণ নাগৰিকেই হওক বা চৰকাৰৰ মুৰব্বীয়েই হওক, সকলোৱে সমান শ্ৰদ্ধাৰে একত্ৰিত হোৱা বুলি উল্লেখ কৰি শ্ৰী মোদীয়ে মন্তব্য কৰে যে ভগৱান বুদ্ধ সকলোৰে আৰু সকলোকে তেওঁ একত্ৰিত কৰে।

নিজকে অতি সৌভাগ্যৱান বুলি গণ্য কৰি, যিহেতু ভগৱান বুদ্ধই তেওঁৰ জীৱনত গভীৰ স্থান দখল কৰিছে, প্ৰধানমন্ত্ৰীয়ে স্মৰণ কৰে যে তেওঁৰ জন্মস্থান বদনগৰ বৌদ্ধ শিক্ষাৰ এক প্ৰধান কেন্দ্ৰ আছিল, আৰু ভগৱান বুদ্ধই প্ৰথম ধৰ্মধ্বনি দিয়া সাৰনাথ তেওঁৰ কৰ্মভূমি। তেওঁ এই কথাও ভাগ-বতৰা কৰে যে চৰকাৰী দায়িত্বৰ পৰা আঁতৰত থকাৰ সময়তো তেওঁ বৌদ্ধ স্থানসমূহলৈ তীৰ্থযাত্ৰী হিচাপে ভ্ৰমণ কৰিছিল, আৰু প্ৰধানমন্ত্ৰী হিচাপে তেওঁ সমগ্ৰ বিশ্বৰ বৌদ্ধ তীৰ্থযাত্ৰা কেন্দ্ৰসমূহ ভ্ৰমণ কৰাৰ সৌভাগ্য লাভ কৰিছে। নেপালৰ লুম্বিনীৰ পৱিত্ৰ মায়া দেৱী মন্দিৰত প্ৰণাম কৰাৰ কথা তেওঁ এক অসাধাৰণ অভিজ্ঞতা বুলি অভিহিত কৰে। শ্ৰী মোদীয়ে আলোকপাত কৰিছিল যে জাপানৰ টো-জী মন্দিৰ আৰু কিংকাকু-জীত তেওঁ অনুভৱ কৰিছিল যে বুদ্ধৰ বাৰ্তাই সময়ৰ সীমা অতিক্ৰম কৰে। তেওঁ চীনৰ ছিয়ানৰ জায়েণ্ট ৱাইল্ড গুজ পেগোডা ভ্ৰমণ কৰাৰ কথা উল্লেখ কৰে, য’ৰ পৰা বৌদ্ধ শাস্ত্ৰসমূহ সমগ্ৰ এছিয়াতে বিয়পি পৰিছিল, আৰু য’ত ভাৰতৰ ভূমিকা এতিয়াও মনত আছে। তেওঁ মংগোলিয়াৰ গণ্ডন মঠ ভ্ৰমণৰ কথা মনত পেলাইছিল, য’ত তেওঁ বুদ্ধৰ উত্তৰাধিকাৰৰ সৈতে মানুহৰ গভীৰ আৱেগিক সংযোগৰ সাক্ষী হৈছিল। তেওঁ কয় যে শ্ৰীলংকাৰ অনুৰাধাপুৰাত জয়া শ্ৰী মহাবোধি দেখাটো সম্ৰাট অশোক, ভিক্ষু মহিন্দ আৰু সংঘমিত্ৰই বীজ সিঁচা পৰম্পৰাৰ সৈতে সংযোগ স্থাপনৰ অভিজ্ঞতা। প্ৰধানমন্ত্ৰীয়ে লগতে কয় যে থাইলেণ্ডৰ ৱাট ফ’ আৰু ছিংগাপুৰৰ বুদ্ধ দাঁতৰ ধ্বংসাৱশেষ মন্দিৰ ভ্ৰমণে ভগৱান বুদ্ধৰ শিক্ষাৰ প্ৰভাৱৰ বিষয়ে তেওঁৰ বুজাবুজি আৰু অধিক গভীৰ কৰি তুলিছে।

প্ৰধানমন্ত্ৰীয়ে মন্তব্য কৰে যে তেওঁ য’তেই ভ্ৰমণ কৰে, ভগৱান বুদ্ধৰ উত্তৰাধিকাৰৰ প্ৰতীক ঘূৰাই অনাৰ প্ৰচেষ্টা চলায়। তেওঁ আলোকপাত কৰে যে চীন, জাপান, কোৰিয়া, মংগোলিয়াত তেওঁ বোধি গছৰ পুলি কঢ়িয়াই লৈ ফুৰিছিল। তেওঁ জোৰ দি কয় যে পাৰমাণৱিক বোমাত বিধ্বস্ত হৈ পৰা চহৰ হিৰোছিমাৰ উদ্ভিদ উদ্যানত যেতিয়া বোধি গছ থিয় হৈ থাকে তেতিয়া মানৱতাৰ বাবে গভীৰ বাৰ্তা কল্পনা কৰিব পাৰি।

ভগৱান বুদ্ধৰ ভাগ-বতৰা কৰা এই ঐতিহ্য যে ভাৰত কেৱল ৰাজনীতি, কূটনীতি, অৰ্থনীতিৰ দ্বাৰা সংযুক্ত নহয়, বৰঞ্চ গভীৰ বান্ধোনৰ দ্বাৰা সংযুক্ত হোৱাৰ প্ৰমাণ সেই সন্দৰ্ভত আলোকপাত কৰি শ্ৰী মোদীয়ে কয় যে ভাৰত মন আৰু আৱেগৰ দ্বাৰা, বিশ্বাস আৰু আধ্যাত্মিকতাৰ দ্বাৰা সংযুক্ত। “ভাৰত কেৱল ভগৱান বুদ্ধৰ পৱিত্ৰ ধ্বংসাৱশেষৰ ৰক্ষক নহয়, তেওঁ পৰম্পৰাৰ জীৱন্ত বাহকো”, প্ৰধানমন্ত্ৰীয়ে কয়। তেওঁ উল্লেখ কৰে যে পিপ্ৰহৱা, বৈশালী, দেৱনীমৰি আৰু নাগাৰ্জুনকোণ্ডত পোৱা ভগৱান বুদ্ধৰ ধ্বংসাৱশেষ বুদ্ধৰ বাৰ্তাৰ জীৱন্ত উপস্থিতি। তেওঁ দৃঢ়তাৰে কয় যে ভাৰতে এই ধ্বংসাৱশেষসমূহ প্ৰতিটো ৰূপতে সংৰক্ষণ আৰু ৰক্ষা কৰিছে— বিজ্ঞান আৰু আধ্যাত্মিকতাৰ জৰিয়তে একেদৰেই।

প্ৰধানমন্ত্ৰীয়ে মন্তব্য কৰে যে সমগ্ৰ বিশ্বতে বৌদ্ধ ঐতিহ্য ক্ষেত্ৰসমূহৰ উন্নয়নত ভাৰতে অৰিহণা যোগাবলৈ ধাৰাবাহিকভাৱে প্ৰচেষ্টা চলাই আহিছে। তেওঁ আলোকপাত কৰে যে যেতিয়া নেপালৰ ভয়াৱহ ভূমিকম্পই এটা প্ৰাচীন স্তুপৰ ক্ষতিসাধন কৰিছিল, তেতিয়া ভাৰতে ইয়াৰ পুনৰ নিৰ্মাণৰ বাবে সমৰ্থন আগবঢ়াইছিল। তেওঁ উল্লেখ কৰে যে ম্যানমাৰৰ বাগানত হোৱা ভূমিকম্পৰ পিছত ভাৰতে এঘাৰটাতকৈও অধিক পেগোডা সংৰক্ষণৰ কাম হাতত লৈছিল। শ্ৰী মোদীয়ে দৃঢ়তাৰে কয় যে এনে বহু উদাহৰণ আছে। তেওঁ লগতে কয় যে ভাৰতৰ ভিতৰতো বৌদ্ধ পৰম্পৰাৰ সৈতে জড়িত স্থান আৰু ধ্বংসাৱশেষৰ অনুসন্ধান আৰু সংৰক্ষণৰ কাম অবিৰতভাৱে আগবাঢ়িছে। তেওঁ স্মৰণ কৰে যে তেওঁৰ জন্মস্থান গুজৰাটৰ বদনগৰ বৌদ্ধ পৰম্পৰাৰ এক প্ৰধান কেন্দ্ৰ আছিল আৰু মুখ্যমন্ত্ৰী হিচাপে তেওঁৰ কাৰ্যকালত তাত বৌদ্ধ ধৰ্মৰ সৈতে জড়িত হাজাৰ হাজাৰ ধ্বংসাৱশেষ আৱিষ্কাৰ হৈছিল। তেওঁ আলোকপাত কৰে যে আজি চৰকাৰে তেওঁলোকৰ সংৰক্ষণৰ ওপৰত গুৰুত্ব আৰোপ কৰি বৰ্তমানৰ প্ৰজন্মক তেওঁলোকৰ সৈতে সংযোগ স্থাপন কৰিছে। তেওঁ উল্লেখ কৰে যে তাত এটা ভয়ংকৰ অভিজ্ঞতামূলক সংগ্ৰহালয় নিৰ্মাণ কৰা হৈছে, য’ত প্ৰায় ২৫০০ বছৰীয়া ইতিহাসৰ অভিজ্ঞতা উপলব্ধ কৰা হৈছে। প্ৰধানমন্ত্ৰীয়ে উল্লেখ কৰে যে মাত্ৰ কেইমাহমানৰ আগতে জম্মু-কাশ্মীৰৰ বাৰামুল্লাত বৌদ্ধ যুগৰ এটা ডাঙৰ বৌদ্ধ স্থান আৱিষ্কাৰ হৈছিল আৰু এতিয়া ইয়াৰ সংৰক্ষণৰ কাম ত্বৰান্বিত কৰা হৈছে।

বিগত দহ-এঘাৰ বছৰত ভাৰতেও বৌদ্ধ স্থানসমূহক আধুনিকতাৰ সৈতে সংযোগ কৰিবলৈ চেষ্টা কৰা বুলি গুৰুত্ব আৰোপ কৰি শ্ৰী মোদীয়ে আঙুলিয়াই দিয়ে যে বুদ্ধগয়াত এটা অধিৱেশন কেন্দ্ৰ আৰু ধ্যান তথা অভিজ্ঞতা কেন্দ্ৰ স্থাপন কৰা হৈছে। সাৰনাথত ধেমেক স্তুপত পোহৰ আৰু শব্দ প্ৰদৰ্শনৰ লগতে বুদ্ধ থিম পাৰ্ক গঢ়ি তোলা হৈছে। তেওঁ মন্তব্য কৰে যে শ্ৰৱস্তি, কপিলবস্তু আৰু কুশীনগৰত আধুনিক সুবিধাসমূহ গঢ়ি তোলা হৈছে। তেওঁ লগতে কয় যে তেলেংগানাৰ নালগোণ্ডাত ডিজিটেল এক্সপিৰিয়েন্স চেণ্টাৰ স্থাপন কৰা হৈছে। তেওঁ আলোকপাত কৰে যে সাঁচি, নগাৰ্জুন সাগৰ আৰু অমৰাৱতীত তীৰ্থযাত্ৰীৰ বাবে নতুন সুবিধা গঢ়ি তোলা হৈছে। প্ৰধানমন্ত্ৰীয়ে উল্লেখ কৰে যে ভাৰতৰ সকলো বৌদ্ধ তীৰ্থস্থানৰ মাজত উন্নত সংযোগ সুনিশ্চিত কৰিবলৈ আজি দেশত বৌদ্ধ চাৰ্কিটৰ সৃষ্টি কৰা হৈছে, যাৰ ফলত সমগ্ৰ বিশ্বৰ ভক্ত আৰু তীৰ্থযাত্ৰীসকলক বিশ্বাস আৰু আধ্যাত্মিকতাৰ গভীৰ অভিজ্ঞতা প্ৰদান কৰা হৈছে।

“ভাৰতৰ প্ৰচেষ্টা হৈছে বৌদ্ধ ঐতিহ্য ভৱিষ্যত প্ৰজন্মৰ মাজলৈ স্বাভাৱিকভাৱে লৈ যোৱা”, শ্ৰী মোদীয়ে গুৰুত্ব আৰোপ কৰি কয়। তেওঁ আলোকপাত কৰে যে গোলকীয় বৌদ্ধ সন্মিলন আৰু বৈশাখ আৰু আছাধা পূৰ্ণিমাৰ দৰে আন্তঃৰাষ্ট্ৰীয় অনুষ্ঠানসমূহ এই চিন্তাৰ দ্বাৰাই পৰিচালিত হয়। তেওঁ লক্ষ্য কৰিছিল যে ভগৱান বুদ্ধৰ অভিধম্মা, তেওঁৰ বাক্য আৰু তেওঁৰ শিক্ষা আদিতে পালি ভাষাত আছিল আৰু ভাৰতে পালি ভাষাক সাধাৰণ জনতাৰ বাবে সুলভ কৰি তুলিবলৈ চেষ্টা কৰা বুলি গুৰুত্ব আৰোপ কৰে। তেওঁ দৃঢ়তাৰে  কয় যে এই কাৰণেই পালিক ধ্ৰুপদী ভাষাৰ মৰ্যাদা প্ৰদান কৰা হৈছে, যাৰ ফলত ধম্মাক ইয়াৰ মূল সত্তাত বুজিবলৈ আৰু ব্যাখ্যা কৰাত সহজ হ’ব আৰু বৌদ্ধ পৰম্পৰাৰ সৈতে জড়িত গৱেষণাও শক্তিশালী হ’ব।

প্ৰধানমন্ত্ৰীয়ে দৃঢ়তাৰে কয় যে ভগৱান বুদ্ধৰ জীৱন দৰ্শনে সীমা আৰু ভৌগোলিক অঞ্চল অতিক্ৰম কৰি বিশ্বক এক নতুন পথ দেখুৱাইছে। তেওঁ ভগৱান বুদ্ধৰ শিক্ষাৰ কেইশাৰীমান আবৃত্তি কৰে। ভগৱান বুদ্ধৰ কালজয়ী বাৰ্তা “আত্ত দীপো ভৱ”ত আত্মসন্মান আৰু আত্মনিৰ্ভৰশীলতাক সন্নিৱিষ্ট কৰা হৈছে বুলি গুৰুত্ব আৰোপ কৰি শ্ৰী মোদীয়ে সংঘাতৰ ওপৰত ভাৰতৰ ঐক্য দৰ্শন, ধাৰণা আৰু কৰুণাৰ জৰিয়তে বিশ্ব কল্যাণ গ্ৰহণ কৰা দৰ্শনক আলোকপাত কৰে। তেওঁ কয় যে একবিংশ শতিকাত ভাৰতে য’ত বিবাদ আছে তাত আলোচনা আৰু শান্তিৰ প্ৰসাৰ ঘটাই অৰিহণা যোগায়, একে সময়তে মানৱতাৰ শত্ৰুৰ বিৰুদ্ধে শক্তি প্ৰদৰ্শন কৰে। ‘সৰ্বজন হিতায়, সৰ্বজন সুখায়’ৰ প্ৰতি দায়বদ্ধ হৈ তেওঁ আশা প্ৰকাশ কৰে যে এই প্ৰদৰ্শনীখনলৈ অহা দৰ্শকে এই চিৰস্থায়ী প্ৰেৰণাৰ সৈতে সংযোগ স্থাপন কৰিব।

শ্ৰী মোদীয়ে আৰু মন্তব্য কৰে যে ভগৱান বুদ্ধৰ এই পৱিত্ৰ ধ্বংসাৱশেষসমূহ ভাৰতৰ ঐতিহ্য, আৰু এটা শতিকাৰ অপেক্ষাৰ অন্তত এইবোৰ দেশলৈ ঘূৰি আহিছে। তেওঁ সমগ্ৰ দেশৰ লোকসকলক এই পৱিত্ৰ ধ্বংসাৱশেষসমূহৰ সাক্ষী হোৱাৰ বাবে ইযালৈ আহিবলৈ, ভগৱান বুদ্ধৰ চিন্তাৰ সৈতে সংযোগ স্থাপন কৰিবলৈ আৰু এবাৰ হ’লেও ঠাইখন ভ্ৰমণ কৰিবলৈ আহ্বান জনায়। তেওঁ স্কুলীয়া ছাত্ৰ-ছাত্ৰী, কলেজীয়া শিক্ষাৰ্থী, যুৱ সংগী আৰু পুত্ৰ-কন্যাসকলক এই প্ৰদৰ্শনীখন নিশ্চিতভাৱে চাবলৈ আহ্বান জনায়। প্ৰধানমন্ত্ৰীয়ে দৃঢ়তাৰে কয় যে এই প্ৰদৰ্শনীখন আমাৰ অতীতৰ গৌৰৱক আমাৰ ভৱিষ্যতৰ সপোনৰ সৈতে সংযোগ কৰাৰ এক মহান মাধ্যম। তেওঁ সমগ্ৰ দেশৰ লোকসকলক এই প্ৰদৰ্শনীত অংশগ্ৰহণ কৰিবলৈ আহ্বান জনাই আৰু এই আহ্বানৰ জৰিয়তে তেওঁ এই অনুষ্ঠানৰ সফলতাৰ বাবে সকলোকে শুভেচ্ছা জনাই বক্তব্যৰ সামৰণি মাৰে ।

এই অনুষ্ঠানত কেন্দ্ৰীয় মন্ত্ৰী শ্ৰী গজেন্দ্ৰ সিং শ্বেখাৱট, শ্ৰী কিৰেণ ৰিজিজু, শ্ৰী ৰামদাস আথাৱালে, শ্ৰী ৰাও ইন্দৰজিৎ সিং, দিল্লীৰ উপ-ৰাজ্যপাল শ্ৰী বিনয় ছাক্সেনাকে ধৰি অন্যান্য বিশিষ্ট ব্যক্তিসকল উপস্থিত থাকে।

Speaking during the inauguration of the Grand International Exposition of Sacred Piprahwa Relics related to Bhagwan Buddha.
https://t.co/8irFbkh8pn

— Narendra Modi (@narendramodi) January 3, 2026

***

MJPS/SR/KD