পি এম ইণ্ডিয়া

প্ৰধানমন্ত্ৰী শ্ৰী নৰেন্দ্ৰ মোদীয়ে আজি সেৱা তীৰ্থত ২০ টা মহাকাশ ষ্টাৰ্টআপৰ মুখ্য কাৰ্যবাহী বিষয়া আৰু প্ৰতিষ্ঠাপকসকলৰ সৈতে মত বিনিময় কৰে।

ৰকেট নিৰ্মাণ আৰু পুনৰ ব্যৱহাৰযোগ্য ছেমি-ক্ৰায়োজেনিক উৎক্ষেপণ বাহন, এভিঅ’নিক্স, উপগ্ৰহ, উন্নত প্ৰপালচন প্ৰণালী, মহাকাশ আৰু প্ৰতিৰক্ষা বুদ্ধিমত্তা, মহাকাশৰ ধ্বংসাৱশেষ আঁতৰোৱা, এআই-চালিত স্থানীয় বতৰৰ আগজাননী আৰু জলবায়ু বুদ্ধিমত্তা আদিকে ধৰি বিভিন্ন ক্ষেত্ৰত কাম কৰি থকা মহাকাশ খণ্ডৰ আগশাৰীৰ কোম্পানীসমূহৰ মুখ্য কাৰ্যবাহী বিষয়াসকলে এই মত বিনিময় অনুষ্ঠানত অংশগ্ৰহণ কৰে। তেওঁলোকে ভাৰতৰ ব্যক্তিগত মহাকাশ উদ্যোগৰ দ্ৰুত অগ্ৰগতি সন্দৰ্ভত আলোকপাত কৰাৰ লগতে খণ্ডটোৰ ভৱিষ্যতৰ বাবে তেওঁলোকৰ দৃষ্টিভংগী শ্বেয়াৰ কৰে। তেওঁলোকে প্ৰধানমন্ত্ৰীৰ পৰা লাভ কৰা সমৰ্থনৰ বাবে কৃতজ্ঞতা প্ৰকাশ কৰি কয় যে দেশত তেওঁলোকৰ সামৰ্থ্য আৰু প্ৰয়োজনীয় প্ৰযুক্তি গঢ়ি তোলাত যথেষ্ট সময় আৰু প্ৰচেষ্টা গ্ৰহণ কৰিছে। তেওঁলোকে উদ্যোগটোৰ বাবে চৰকাৰৰ সমৰ্থন আৰু সহযোগিতা সন্দৰ্ভত আলোকপাত কৰি কয় যে তেওঁলোকে অত্যন্ত অনুপ্ৰাণিত আৰু মহাকাশ খণ্ডত উচ্চাকাংক্ষী লক্ষ্য প্ৰাপ্ত কৰাৰ বাবে দৃঢ় সংকল্পৰে কাম কৰি আছে।

মহাকাশ খণ্ডক ব্যক্তিগত অংশগ্ৰহণৰ বাবে মুকলি কৰাৰ ফলত যথেষ্ট উৎসাহৰ সৃষ্টি হোৱাৰ লগতে উদ্যোগৰ বাবে নতুন সুযোগৰ সৃষ্টি হোৱাৰ কথাও তেওঁলোকে স্মৰণ কৰে। তেওঁলোকে লগতে কয় যে কেইবাটাও কোম্পানীয়ে ভাৰতৰ উদীয়মান ব্যক্তিগত মহাকাশ উদ্যোগৰ দ্বাৰা বিকশিত প্ৰযুক্তি গ্ৰহণ আৰু ব্যৱহাৰৰ ক্ষেত্ৰত আগ্ৰহ প্ৰকাশ কৰিছে।

প্ৰধানমন্ত্ৰীয়ে মহাকাশ খণ্ডত সাহস প্ৰদৰ্শন কৰা আৰু নতুন ক্ষেত্ৰত নেতৃত্ব লোৱাৰ আগশাৰীৰ ব্যক্তিসকলক অভিনন্দন জনায়। তেওঁ কয় যে খণ্ডটোৱে প্ৰদৰ্শন কৰা আত্মবিশ্বাসে মহাকাশ খণ্ডক ব্যক্তিগত অংশগ্ৰহণৰ বাবে মুকলি কৰা দৃষ্টিভংগীক শক্তিশালী কৰিছে। তেওঁ উল্লেখ কৰে যে বহু দেশে হয়তো মহাকাশ খণ্ডত বিনিয়োগ কৰিব নোৱাৰে বা ইয়াত বিনিয়োগ কৰিব নিবিচাৰে। ই ভাৰতক বিশ্ব মহাকাশ খণ্ডত ইয়াৰ স্থিতি দ্ৰুতগতিত শক্তিশালী কৰাৰ এক গুৰুত্বপূৰ্ণ সুযোগ প্ৰদান কৰে।

প্ৰধানমন্ত্ৰীয়ে মহাকাশ কোম্পানীসমূহক প্ৰযুক্তিৰ নতুন প্ৰয়োগসমূহ অন্বেষণ কৰিবলৈ আৰু সেইসমূহে কেনেদৰে মানুহৰ জীৱন সহজ কৰি তুলিব পাৰে, তাৰ ওপৰত গুৰুত্ব দিবলৈ উৎসাহিত কৰে।

প্ৰধানমন্ত্ৰীয়ে অন্যান্য খণ্ডত কাম কৰা কোম্পানীসমূহৰ সৈতে মহাকাশ খণ্ডৰ কোম্পানীসমূহৰ মাজত অধিক সহযোগিতাৰ পৰামৰ্শ দিয়ে। মহাকাশৰ ধ্বংসাৱশেষ বিষয়ত কাম কৰা কোম্পানীসমূহে তেওঁলোকৰ প্ৰযুক্তিৰ পৰিসৰ বৃদ্ধি কৰিবলৈ পৰিবেশ সংগঠনসমূহৰ সৈতে কাম কৰিব পাৰে বুলি তেওঁ কয়। কৃষি খণ্ডৰ সৈতে কাম কৰা মহাকাশ প্ৰযুক্তি কোম্পানীসমূহে কৃষি বিশ্ববিদ্যালয় আৰু বিভাগসমূহৰ সৈতে সহযোগিতাৰে কাম কৰিব পাৰে যাতে কৃষকসকলক উন্নত তথ্যযুক্ত সিদ্ধান্ত গ্ৰহণ কৰাত আৰু তেওঁলোকৰ উৎপাদন বৃদ্ধি কৰাত সহায় কৰিব পাৰে।

প্ৰধানমন্ত্ৰীয়ে এনে এক পৰিবেশতন্ত্ৰ আৰু পৰিবেশ সৃষ্টি কৰিবলৈ আহ্বান জনায়, য’ত বিশ্বই যেতিয়া মহাকাশৰ কথা চিন্তা কৰে, তেতিয়া ভাৰতৰ পিনে দৃষ্টি নিবদ্ধ ৰাখে। তেওঁ কয় যে ভাৰতৰ মহাকাশ খণ্ডই দেশলৈ আন্তঃৰাষ্ট্ৰীয় প্ৰতিভা, কোম্পানী আৰু বিনিয়োগক আকৰ্ষিত কৰিবলৈ চুম্বকৰ দৰে কাম কৰিব পাৰে।

তেওঁ অটল টিংকাৰিং লেবৰ সৈতে ঘনিষ্ঠ সহযোগিতাৰে কাম কৰিবলৈও আহ্বান জনায়। তেওঁ কয় যে ই কম বয়সৰ পৰাই সৰু ল’ৰা-ছোৱালীৰ মনত মহাকাশৰ বিষয়ে কৌতূহল আৰু আগ্ৰহৰ সৃষ্টি কৰিব পাৰে।

এই মত বিনিময় অনুষ্ঠানত স্কাইৰুট এৰ’স্পেচ, অগ্নিকুল কছমছ, পিক্সেল, ধ্ৰুৱ স্পেচ, গেলেক্সআই, পিয়েৰচাইট, বেলাট্ৰিক্স এৰ’স্পেচ, দিগন্তাৰা, ছেটছিউৰ, চুহোৰা টেকন’লজিছ, মানস্তু স্পেচ, এষ্ট্ৰ’বেছ, টেকমি২স্পেচ, ব্যমআইচি, কছম’চাৰ্ভ স্পেচ, অৰ্বিটএআইডি এৰ’স্পেচ, স্কাইচাৰ্ভ (হাইস্পেচ), ছেৰেনডিপিটি স্পেচ, ভাছাৰ লেবছ আৰু মিষ্টইঅ’সহ মহাকাশ খণ্ডত কাম কৰা ২০ টা ষ্টাৰ্টআপৰ মুখ্য কাৰ্যবাহী বিষয়া আৰু প্ৰতিষ্ঠাপকসকলে অংশগ্ৰহণ কৰে।

***

MJPS/SS/ST/NB