પીએમઇન્ડિયા

પ્રધાનમંત્રી શ્રી નરેન્દ્ર મોદી 14 માર્ચ 2026 ના રોજ પશ્ચિમ બંગાળની મુલાકાત લેશે. બપોરે લગભગ 2 વાગ્યે, પ્રધાનમંત્રી કોલકાતામાં આશરે ₹18,680 કરોડના બહુવિધ વિકાસ પ્રોજેક્ટ્સનું ઉદ્ઘાટન અને શિલાન્યાસ કરશે.

આ પ્રદેશમાં રોડ ઈન્ફ્રાસ્ટ્રક્ચરને મોટું પ્રોત્સાહન આપતા, પ્રધાનમંત્રી આશરે ₹16,990 કરોડના મૂલ્યના 420 કિમીથી વધુની સંયુક્ત લંબાઈ ધરાવતા અનેક રાષ્ટ્રીય ધોરીમાર્ગ પ્રોજેક્ટ્સનું ઉદ્ઘાટન અને શિલાન્યાસ કરશે. જે પ્રોજેક્ટ્સનું ઉદ્ઘાટન કરવામાં આવી રહ્યું છે તેમાં પશ્ચિમ બંગાળ અને ઝારખંડમાં NH-19 અને પશ્ચિમ બંગાળમાં NH-114 ના વિભાગોનો સમાવેશ થાય છે. આ પ્રોજેક્ટ્સથી માર્ગ સલામતીમાં વધારો થવાની, મુસાફરીના સમયમાં ઘટાડો થવાની, ટ્રાફિક જામ અને પ્રદૂષણમાં ઘટાડો થવાની, પ્રાદેશિક કનેક્ટિવિટી સુધારવાની અને પ્રવાસનને પ્રોત્સાહન મળવાની તેમજ આ પ્રદેશમાં આર્થિક વૃદ્ધિને વેગ મળવાની અપેક્ષા છે.

પ્રધાનમંત્રી અનેક નવા નેશનલ હાઈવે પ્રોજેક્ટ્સનો શિલાન્યાસ કરશે. આમાં NH-116A ના 231 કિમી લાંબા ફોર-લેન ખડગપુર-મોરેગ્રામ ઇકોનોમિક કોરિડોર વિભાગના પાંચ પેકેજનો સમાવેશ થાય છે. આ પ્રોજેક્ટ ખડગપુર અને સિલિગુડી વચ્ચેના ઇકોનોમિક કોરિડોરનો ભાગ છે અને તે પશ્ચિમ બંગાળના પશ્ચિમ મેદિનીપુર, બાંકુરા, હુગલી, પૂર્વ બર્ધમાન, બીરભૂમ અને મુર્શિદાબાદ જિલ્લાઓમાંથી પસાર થશે. સીધી ખડગપુર-મોરેગ્રામ કનેક્ટિવિટીથી મુસાફરીનું અંતર આશરે 120 કિમી ઘટશે અને મુસાફરીના સમયમાં લગભગ સાતથી આઠ કલાકની બચત થશે. આ કોરિડોર NH-16, NH-19, NH-14 અને NH-12 સહિતના મુખ્ય રાષ્ટ્રીય ધોરીમાર્ગો સાથે પણ જોડાશે, જેનાથી મલ્ટી-કોરિડોર કનેક્ટિવિટી મજબૂત થશે. પ્રધાનમંત્રી NH-14 પર 5.6 કિમી લાંબા ફોર-લેન દુબરાજપુર બાયપાસના નિર્માણનો શિલાન્યાસ કરશે, જે દુબરાજપુર શહેરના ગીચ વિસ્તારોમાં ટ્રાફિક હળવો કરવામાં મદદ કરશે અને મુસાફરીના સમયમાં લગભગ એક કલાકનો ઘટાડો કરશે. તેઓ NH-14 પર કાંગશાબતી અને શિલાબતી નદીઓ પર વધારાના ચાર-લેન મુખ્ય પુલોના નિર્માણ માટેનો શિલાન્યાસ પણ કરશે.

મુલાકાત દરમિયાન, પ્રધાનમંત્રી શિપિંગ અને બંદર સંબંધિત અનેક પ્રોજેક્ટ્સનું ઉદ્ઘાટન અને શિલાન્યાસ પણ કરશે. તેઓ હલ્દિયા ડોક કોમ્પ્લેક્સ ખાતે બર્થ નંબર 2 ના મિકેનાઇઝેશન પ્રોજેક્ટનું ઉદ્ઘાટન કરશે, જે કાર્યક્ષમ, ઝડપી અને પર્યાવરણને અનુકૂળ કાર્ગો હેન્ડલિંગને સક્ષમ બનાવશે. આ પ્રોજેક્ટ કાર્ગો હેન્ડલિંગ ક્ષમતામાં વધારો કરશે, કાર્યક્ષમ ફુલ-રેક રેલ લોડિંગ સિસ્ટમ્સની સુવિધા આપશે, મુખ્ય પ્રદર્શન સૂચકાંકોમાં સુધારો કરશે, જોખમી કામગીરીમાં માનવીય સંસર્ગ ઘટાડીને સલામતી વધારશે અને રોજગારીનું સર્જન કરશે. પ્રધાનમંત્રી ખિદ્દરપોર ડોક્સ (ડોક 1 – પશ્ચિમ) ખાતે કાયાકલ્પ પ્રોજેક્ટનું પણ ઉદ્ઘાટન કરશે.

પ્રધાનમંત્રી રાજ્યમાં બંદર સંબંધિત અનેક માળખાગત પ્રોજેક્ટ્સનો શિલાન્યાસ પણ કરશે. આમાં શ્યામા પ્રસાદ મુખર્જી પોર્ટના હલ્દિયા ડોક કોમ્પ્લેક્સ ખાતે બર્થ નંબર 5 ના મિકેનાઇઝેશનનો સમાવેશ થાય છે. અન્ય પ્રોજેક્ટ્સમાં કોલકાતા ડોક સિસ્ટમ ખાતે બાસક્યુલ બ્રિજ (Bascule Bridge) નું નવીનીકરણ; ખિદ્દરપોર ડોક-I (પૂર્વ) અને ડોક-II (પૂર્વ) ખાતે ડ્રેનેજ સિસ્ટમ સહિત યાર્ડ વિકાસ; હાવડા બ્રિજ પાયલોનથી નિમતાલા ઘાટ સુધી કોલકાતા રિવરફ્રન્ટ પર નદીના કિનારાના સંરક્ષણ કામો; અને કોલકાતા ડોક સિસ્ટમ ખાતે ઈન્ડેન્ચર મેમોરિયલ કોમ્પ્લેક્સ પાસે રિવર ક્રૂઝ ટર્મિનલ અને નદી પ્રવાસન સુવિધા માટે ટર્મિનલ બિલ્ડિંગનું નિર્માણ સામેલ છે.

રેલવે ક્ષેત્રમાં, પ્રધાનમંત્રી પુરુલિયા-આનંદ વિહાર ટર્મિનલ (દિલ્હી) એક્સપ્રેસને લીલી ઝંડી બતાવી રવાના કરશે, જે પશ્ચિમ બંગાળ, ઉત્તર પ્રદેશ, બિહાર, ઝારખંડ અને રાષ્ટ્રીય રાજધાની ક્ષેત્ર વચ્ચે રેલ કનેક્ટિવિટી મજબૂત કરશે.

પ્રધાનમંત્રી અમૃત સ્ટેશન યોજના હેઠળ છ પુનઃવિકાસિત રેલવે સ્ટેશનોનું ઉદ્ઘાટન પણ કરશે. આ સ્ટેશનોમાં કામાખ્યાગુરી, અનારા, તમલુક, હલ્દિયા, બારાભૂમ અને સિઉરીનો સમાવેશ થાય છે.

પ્રધાનમંત્રી બે રેલવે પ્રોજેક્ટ પણ રાષ્ટ્રને સમર્પિત કરશે: બેલડા અને દાંતન વચ્ચે 16 કિમી લાંબી ત્રીજી રેલ લાઇન, અને કલાઈકુંડા અને કનિમોહુલી વચ્ચે ઓટોમેટિક બ્લોક સિગ્નલિંગ સિસ્ટમ. આ પ્રોજેક્ટ્સ ટ્રેન સુરક્ષા અને સમયપાલન (punctuality) માં સુધારો કરશે, ભીડ ઘટાડશે અને પ્રદેશના મુસાફરો માટે મુસાફરીની એકંદર સરળતામાં વધારો કરશે.

આ પહેલો પશ્ચિમ બંગાળ અને પૂર્વી ભારતમાં ઈન્ફ્રાસ્ટ્રક્ચર મજબૂત કરવા, કનેક્ટિવિટી વધારવા અને આર્થિક વૃદ્ધિને વેગ આપવા માટે સરકારની સતત પ્રતિબદ્ધતાને પ્રતિબિંબિત કરે છે.

SM/DK/JD