પીએમઇન્ડિયા

પ્રધાનમંત્રી શ્રી નરેન્દ્ર મોદી 27 ઓક્ટોબર 2026 ના રોજ સાંજે 5:30 વાગ્યે ભારત મંડપમ, નવી દિલ્હી ખાતે ઇમર્જિંગ સાયન્સ, ટેકનોલોજી અને ઇનોવેશન કોન્કલેવ 2026 (Emerging Science, Technology and Innovation Conclave 2026) નું ઉદ્ઘાટન કરશે. આ પ્રસંગે તેઓ સભાને પણ સંબોધિત કરશે.

27 થી 29 ઓક્ટોબર સુધી આયોજિત, ત્રણ દિવસીય કોન્કલેવ ઉભરતી ટેકનોલોજીઓ અને ભારતના વિજ્ઞાન, ટેકનોલોજી અને ઇનોવેશનની પ્રાથમિકતાઓ પર વિચારમંથન કરવા માટે અગ્રણી વૈજ્ઞાનિકો, સંશોધકો, શિક્ષાવિદો, નીતિ નિર્માતાઓ, ઉદ્યોગના અગ્રણીઓ, સ્ટાર્ટઅપ્સ અને આંતરરાષ્ટ્રીય નિષ્ણાતોને એકસાથે લાવશે.

આ વિચારમંથન આર્ટિફિશિયલ ઇન્ટેલિજન્સ, બાયોટેકનોલોજી, અદ્યતન સામગ્રી, ઉત્પાદન, આરોગ્ય સંભાળ, ઊર્જા, આબોહવા અને સમુદ્ર વિજ્ઞાન સહિતના 12 થીમેટિક ક્ષેત્રોને આવરી લેશે. આ ચર્ચાઓ સંશોધન પ્રાથમિકતાઓ, રાષ્ટ્રીય ક્ષમતાઓ અને વૈજ્ઞાનિક પ્રગતિઓને વ્યવહારુ ઉપયોગોમાં પરિવર્તિત કરવા પર ધ્યાન કેન્દ્રિત કરશે.

આ કોન્કલેવમાં દેશી વૈજ્ઞાનિક સિદ્ધિઓ અને ઉભરતી ટેકનોલોજીઓનું પ્રદર્શન કરતી એક વ્યાપક ટેકનોલોજી અને ઇનોવેશન પ્રદર્શની પણ યોજાશે. તેમાં લગભગ 150 ડીપ–ટેક સ્ટાર્ટઅપ સ્ટોલ્સનો સમાવેશ થશે, જે ટેકનોલોજીકલ વિકાસ અને વિવિધ ક્ષેત્રોમાં તેની સંભવિત ઉપયોગિતાઓ પર પ્રકાશ પાડશે.

કોન્કલેવ વૈજ્ઞાનિક વિકાસ અને તેના વાસ્તવિક દુનિયાના ઉપયોગો સાથે જોડાણ વધારવા માટે થીમેટિક વિડીયો, ટેકનોલોજીના પ્રદર્શનો, ડોક્યુમેન્ટરીઝ, માહિતીપ્રદ કિયોસ્ક અને ઓગમેન્ટેડ તથા વર્ચ્યુઅલ રિયાલિટીના અનુભવોનો પણ ઉપયોગ કરશે.

એક નવી પહેલ, ગ્લોબલ કનેક્ટ નેટવર્કિંગ ઇવેન્ટ, ભારતમાં અને વિદેશમાં રહેલા અકાદમિક ક્ષેત્ર, સંશોધન સંસ્થાઓ અને ઉદ્યોગોમાંથી 300 થી વધુ આમંત્રિત સહભાગીઓને એકસાથે લાવશે. તે આંતરરાષ્ટ્રીય સંશોધન ભાગીદારી, ઉદ્યોગ–અકાદમિક સહયોગ અને પ્રયોગશાળાઓમાંથી બજારો સુધી નવીનતાઓને લઈ જવાના માર્ગો શોધવા માટેનો એક મંચ પૂરો પાડશે.

SM/DK/JD