પીએમઇન્ડિયા

યોર એક્સેલન્સી (મહામહિમ),

પ્રધાનમંત્રી ક્રિસ્ટર્સન, યોર એક્સેલન્સી (મહામહિમ), ઉર્સુલા,

 બંને દેશોના પ્રતિનિધિઓ, મીડિયાના મિત્રો,

નમસ્કાર!

સૌ પ્રથમ, હું પ્રધાનમંત્રી ક્રિસ્ટર્સનનો તેમના ઉષ્માભર્યા સ્વાગત માટે હૃદયપૂર્વક આભાર માનું છું.

થોડા સમય પહેલાં, મને સ્વીડનનું સર્વોચ્ચ સન્માન, ‘રોયલ ઓર્ડર ઓફ ધ પોલર સ્ટાર‘ એનાયત કરવામાં આવ્યું હતું. આ સન્માન માત્ર મારું નથી; આ 1.4 અબજ (140 કરોડ) ભારતીયોનું સન્માન છે. આ સ્વીડનના આપણા એ તમામ મિત્રોનું પણ એક સન્માન છે જેમણે ભારત-સ્વીડન સંબંધોને સમૃદ્ધ બનાવ્યા છે અને તેમને મજબૂત પાયો પૂરો પાડ્યો છે.

આજના કાર્યક્રમમાં જોડાવા બદલ હું ઉર્સુલા જી પ્રત્યે વિશેષ કૃતજ્ઞતા વ્યક્ત કરું છું, જે સ્વીડન અને યુરોપના ઔદ્યોગિક હૃદય સમાન ગોથેનબર્ગની મારી મુલાકાતને વિશેષ મહત્વ આપે છે.

મિત્રો,

ભારત અને સ્વીડન વચ્ચેના સંબંધો લોકશાહી મૂલ્યો, કાયદાના શાસન અને માનવ-કેન્દ્રીય વિકાસના મજબૂત પાયા પર બનેલા છે. આપણા બંને દેશો ઇનોવેશન (નવીનતા) ને વિકાસના ચાલક બળ તરીકે, ટકાઉપણાં (સસ્ટેનેબિલિટી) ને એક સહિયારી જવાબદારી તરીકે અને લોકશાહીને આપણી શક્તિ તરીકે જુએ છે.

આજની બેઠકમાં, અમે આ સહિયારા મૂલ્યો અને સમાન હિતોના આધારે અમારા સહયોગને આગળ વધારવા અંગે ચર્ચા કરી હતી. તમામ ક્ષેત્રોમાં આપણી ભાગીદારી વધી રહી હોવાથી, અમે આપણા સંબંધોને વ્યૂહાત્મક ભાગીદારી (Strategic Partnership) ના સ્તર સુધી લઈ જવાનો નિર્ણય કર્યો છે. આ ભાગીદારી હેઠળ, અમે ગ્રીન ટ્રાન્ઝિશન (હરિત પરિવર્તન), સંરક્ષણ, ઊભરતી ટેકનોલોજી અને લોકો વચ્ચેના પરસ્પર જોડાણો જેવા મુખ્ય ક્ષેત્રોમાં આગળ વધીશું.

મિત્રો,

AI (આર્ટિફિશિયલ ઇન્ટેલિજન્સ), હેલ્થ-ટેક અને ગ્રીન ગતિશીલતા (ગ્રીન મોબિલિટી) જેવા હાઇ-ટેક ક્ષેત્રોમાં આપણી વચ્ચે સહયોગની પ્રચંડ સંભાવનાઓ છે. આ વર્ષે ભારતમાં યોજાયેલી ‘AI ઇમ્પેક્ટ સમિટ‘માં સ્વીડનના એક મોટા બિઝનેસ પ્રતિનિધિમંડળે ભાગ લીધો હતો. અમે “સ્વીડન-ઇન્ડિયા ટેકનોલોજી એન્ડ AI કોરિડોર્સ” ને મજબૂત કરવા માટે નક્કર પહેલો પર કામ કરીશું.

બંને દેશોના સ્ટાર્ટઅપ્સ અને સંશોધન (રિસર્ચ) ઇકોસિસ્ટમ વચ્ચેના જોડાણોને મજબૂત કરવા માટે, આપણે ‘ભારત-સ્વીડન વિજ્ઞાન અને તકનીકી કેન્દ્ર‘ (India – Sweden Science and Technology Centre) ની સ્થાપના કરવા જઈ રહ્યા છીએ.

આબોહવા પરિવર્તન (ક્લાઇમેટ ચેન્જ) અને ટકાઉપણાં અંગેના આપણા વિચારોમાં ભારત અને સ્વીડન વચ્ચે મજબૂત અભિમુખતા (કન્વર્જન્સ) પણ છે. ‘લીડરશિપ ગ્રુપ ફોર ઇન્ડસ્ટ્રી ટ્રાન્ઝિશન‘ અથવા ‘લીડઆઇટી‘ (LeadIT) એ આપણી સંયુક્ત વૈશ્વિક પહેલ છે, જે હેઠળ આપણે લો-કાર્બન ઔદ્યોગિક પરિવર્તન પર ધ્યાન કેન્દ્રિત કરી રહ્યા છીએ. આજે, અમે તેના ત્રીજા તબક્કા પર કામ કરવાનો નિર્ણય લીધો છે.

ભારત ગ્રીન હાઇડ્રોજન, સર્ક્યુલર ઇકોનોમી (ચક્રીય અર્થતંત્ર) અને ટકાઉ ઇન્ફ્રાસ્ટ્રક્ચર જેવા ક્ષેત્રોમાં મોટું કામ કરી રહ્યું છે. સ્વીડનની ટેકનોલોજી અને ભારતના વ્યાપને એકસાથે લાવીને, આપણે એવા આબોહવા ઉકેલો (ક્લાઇમેટ સોલ્યુશન્સ) બનાવી શકીએ છીએ જે સમગ્ર વિશ્વને લાભ પહોંચાડે. આર્ક્ટિક ક્ષેત્રમાં ભારત અને સ્વીડનનો સહયોગ આબોહવા પરિવર્તન અંગેની વૈશ્વિક સમજને સુધારવામાં પણ મહત્વની ભૂમિકા ભજવી રહ્યો છે.

મિત્રો,

સંરક્ષણ ક્ષેત્રે આપણો સહયોગ સતત વધી રહ્યો છે. સ્વીડિશ કંપનીઓ દ્વારા ભારતમાં ઉત્પાદન સુવિધાઓ (મેન્યુફેક્ચરિંગ ફેસિલિટીઝ) ની સ્થાપના દર્શાવે છે કે આપણી ભાગીદારી ખરીદનાર-વેચનારના સંબંધોથી આગળ વધીને લાંબા ગાળાના ઔદ્યોગિક સહયોગમાં બદલાઈ રહી છે.

મિત્રો,

ઉર્સુલાજીની આજની ઉપસ્થિતિ આ પ્રસંગને વધુ ખાસ બનાવે છે. આ વર્ષના પ્રારંભમાં જાન્યુઆરીમાં તેમની ભારત મુલાકાત દરમિયાન, અમે ભારત-EU સંબંધોને વધુ મજબૂત કરવા માટે કેટલાક ઐતિહાસિક નિર્ણયો લીધા હતા. મને એ જોઈને આનંદ થાય છે કે તે તમામ પરિણામો પર સારી પ્રગતિ થઈ રહી છે.

ભારત-EU FTA ઉદ્યોગો, રોકાણકારો અને ઇનોવેટર્સ માટે નવી તકો ઊભી કરશે. ઉર્સુલાજીએ કહ્યું તેમ, આ “ Mother of all deals”  છે.

સુરક્ષા અને સંરક્ષણ ભાગીદારી અને ગતિશીલતા કરારે (મોબિલિટી એગ્રીમેન્ટ) આપણી વ્યૂહાત્મક અને લોકો-કેન્દ્રીય ભાગીદારીને નવી શક્તિ આપી છે. ભારત-EU ટ્રેડ એન્ડ ટેકનોલોજી કાઉન્સિલે આપણા સહયોગને વધુ ગાઢ બનાવ્યો છે. આપણે ડિજિટલ ટેકનોલોજી, ક્લીન એનર્જી (સ્વચ્છ ઊર્જા), સેમીકન્ડક્ટર્સ, સ્થિતિસ્થાપક પુરવઠા શૃંખલા (રેઝિલિયન્ટ સપ્લાય ચેઈન) અને ઇનોવેશન જેવા ક્ષેત્રોમાં સાથે મળીને કામ કરી રહ્યા છીએ.

સમગ્ર વિશ્વમાં શાંતિ અને સ્થિરતા માટે ભારત અને યુરોપ વચ્ચે રાજકીય, આર્થિક અને વ્યૂહાત્મક અભિમુખતા મહત્વપૂર્ણ છે.

મિત્રો,

આજના તણાવપૂર્ણ વૈશ્વિક વાતાવરણમાં, ભારત અને સ્વીડન જેવા લોકશાહી દેશો વચ્ચેનો ગાઢ સહયોગ વિશેષ મહત્વ ધરાવે છે. અમે વિવિધ તણાવ અને પડકારોનો ઉકેલ લાવવા માટે હંમેશા સંવાદ અને મુત્સદ્દીગીરી (ડિપ્લોમસી) પર ભાર મૂક્યો છે.

ભારત અને સ્વીડન સંમત છે કે આતંકવાદ એ સમગ્ર માનવતા માટે ગંભીર પડકાર છે. ગયા વર્ષે પહેલગામમાં થયેલા આતંકવાદી હુમલા બાદ સ્વીડન તરફથી આપણને જે સમર્થન મળ્યું હતું તે બદલ હું પ્રધાનમંત્રી ક્રિસ્ટર્સન પ્રત્યે કૃતજ્ઞતા વ્યક્ત કરું છું. આપણે આતંકવાદ અને તેને સમર્થન આપનારાઓ સામે આપણી લડાઈ ચાલુ રાખીશું.

એક્સેલન્સીસ (મહામહિમો),

આજની સાર્થક ચર્ચાઓ માટે હું ફરી એકવાર આપનો આભાર માનું છું. મને પૂર્ણ વિશ્વાસ છે કે આપણા સહિયારા પ્રયાસો દ્વારા ભારત-સ્વીડન અને ભારત-યુરોપ ભાગીદારી આગળ વધતી રહેશે, અને સાથે મળીને આપણે વૈશ્વિક શાંતિ, સુરક્ષા અને સમૃદ્ધિમાં યોગદાન આપતા રહીશું.

ખૂબ ખૂબ ધન્યવાદ.

IJ/DK/GP

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964@gmail.com