Search

অনৌবা পাউশিং

মচাকশিং অসি পি আই বিদগী মশা মথন্তা লৌথোকচবনি

আই.আই.তি খরগপুরগী প্লেতিনম জুব্লি থৌরমদা প্রধান মন্ত্রীনা ফোঙদোকখিবা ৱারোল

আই.আই.তি খরগপুরগী প্লেতিনম জুব্লি থৌরমদা প্রধান মন্ত্রীনা ফোঙদোকখিবা ৱারোল


নোংচুপ বেঙ্গলগী রাজ্যপাল শ্রী আর.এন রবি; মীয়ামগী লুচিংবা সুভেন্দু অধিকারি; কেন্দ্রগী মন্ত্রীমন্দলগী ঐগী মরুপ, শ্রী সুকান্ত মজুমদার; রাজ্য সরকারগী মিনিষ্টর, শ্রী জগন্নাথ চত্তোপধ্যায়; আই.আই খরগপুরগী শ্রী তি.ভি নরেন্দ্রন অমসুং শ্রী সুমন চক্রবর্তি; মহৈরোয়শিং, হান্নগী মহৈরোয়শিং অমসুং মফম অসিদা তিল্লিবা অতোপ্পা শক্নাইরবশিং-ইবেম্মাশিং অমসুং ইবুংঙোশিং।

অহানবদা, ঐনা থেংনা য়ৌরকপগীদমক ঙাকপীনবা হায়জরি। নোং-চিংগী ফিবম ফত্তবদগী, ঐ মতম চানা য়ৌরকপা ঙমখিদ্রে; লম্বীদা লাক্লবা ফাওবদা, ঐ থেংখি। থেংবা অসিনা খুদোংচাদবা থোকহনবগীদমক অমসুং ঐ ঙাইহনবগীদমক ঙাকপীনবা ঐনা হায়জরি।

মরুপশিং,

আই.আই.তি খরগপুরগী প্লেতিনম জুব্লি থৌরমদা, ঐনা ভারতকী হৌখ্রবা মতম, হৌজিক অমসুং তুং পুন্না উবা ফংলে। মপুংফানা হৈথোই-শিংথোইরবা অমসুং অনিংবা কয়া লৈরিবা মীরোল অমা ঙসি মফম অসিদা তিল্লে। মহৈলোয়শঙ অসিগী চহি ৭৫ গী খোঙচৎ অমসুং মসিনা পাংথোকখিবা থবকশিং হরাওবা ফোঙদোক্নবা ঐখোয় পুল্লে। মহৈলোয়শঙ অসি হেক লিংখৎপদগী চহি ৭৫ অসিদা, আই.আই.তি খরগপুরনা মাইপাকপা কয়া পুরকখ্রে। চহি ৭৫ গী মনুংদা, শিংথানিঙাই ওইরবা অওনবা অমা ভারতনা উরে- ষনগারিদগী বুল্লেত ত্রেনশিং ফাওবা অমসুং পোষ্টতা চিথি থাবদগী হৌরগা সোসিএল মেদিয়াগী মেসেজশিং ফাওবা। অহোংবা তাঙ্ককশিং অসি শীনবা থুংনা, লৈবাক অসিগী অহানবা আই.আই.তি ওইনা আই.আই.তি খরগপুরনা মরুওইবা থৌদাং অমা  লৌখি। থৌরম অসিদা আই.আই.তি খরগপুরগী মহৈরোয়শিং, ওজাশিং, অপুনবা ষ্টাফ অমসুং হৌখ্রবা মহৈরোয়শিং ঐনা থাগৎপা ফোঙদোকচরি।

মরুপশিং,

কনাগুম্ব অমনা আই.আই.তি খরগপুরদা লৈরিঙৈগী মতম অদু মীওই অমগী পুন্সি চুপ্পা নিংশিংদুনা লৈবা থৌদোক খর লৈরি। হান্নগী মহৈরোয় কয়া, চহি কয়াগী মতুংদা ফাওবা, ‘চেদিস’ দা চা থক্তুনা শান্নখিবা ৱারিশিং নুংশিনা নিংশিংলি। অতোপ্পা মহৈলোয়শঙশিংদা ‘হোষ্টেলশিং’ লৈরবসু, অদোমগী ‘হোল’শিং লৈরি অমসুং মখোয় মশাগী হোলদা মহৈরোয় খুদিংমক্না কয়া য়াম্না চাউথোকচবগে হায়বা ঐ খঙই। অদোম্না দিৱালি  পাংথোকখিবগী ফোতোশিং ঐ উরে। আই.আই.তি খরগপুরদা দিৱালিগী হরাও-তয়াম্বা অদু তোপ-তোপ্পনি হায়বা ঐ খঙলে। মফম অসি মৈ থানখিবা অসি মশাগী ওইবা অখন্নবা ফজবা অমনি অমসুং হোলশিংগী মরক্ত চাংদম্নবা পাংথোকপা অসিনা মসি অমুক্ক হেন্না অখন্নবা ওইহল্লে। হন্দক করম্বা হোলনা মকোক তাখিবগে? মসি কমদৌনা অদোম্না চাউথোকচনা পনখিবগে হায়বা য়েংউ? ফরে, মাইপাক্লবশিংদা থাগৎপা ফোঙদোকচরি। করিগুম্বা মকোক তারবশিং মখোয় মশামক থাগৎচদ্রবদি, কনানা থাগৎকনি?

মরুপশিং,

বেঙ্গল লমদম অসি অনৌবা ৱাখল্লোনশিং মপাঙ্গল কনগৎলকপা- লৈবাক্কী ইহৌশিং অহানবা ওইনা হৌদোকপা মফম অমনি। মতম অমদা নিংতম লান্মীশিং ফাজিন্দুনা থম্নবা মফম অমা ওইনা শীজিন্নরম্বা মফম অমদা মহৈলোয়শঙ অসিমক লৈরি। খন্দুনা য়েংউ: মফম অসিদা ফাজিন্দুনা থমখিবা নিংতম লান্মীশিং অদু করি ওইরমগনি, নুমিৎ চুপ্পা খন্ন-নৈরমগদরা? মখোয়গী ৱাখলশিং করি ওইরমগনি? মতম অদুদা মফম অসিদা ওইখিবা মখোয়গী পুন্সিশিং, মখোয়গী ৱাখল্লোন অমসুং মখোয়গী থবকশিং লমজিংনবা লাইৱা অমগুম্না হৌজিক ফাওবা খোন্থাং য়ৈরি, অদোম ময়ামগী ইথিলগী হৌরকফম অমা  ওইরি। চহি কয়াগী মমাংদা, ফাজিন্দুনা থম্নবা কেম্পশিং অদুদা মশানা মশাগী লৈবাক ঙাকচবা পাম্বা অমসুং অৱাংবা থাকশিংগী লৈবাক অমগী মঙ মঙলিবা ভারতমচাশিংগী মাইথিবা পীবা ঙমদবা ৱাখল্লোন অমসুং থৌনা উবা ফংখি। ঙসিদি, চপ মান্নবা লৈবাক লৈহাও অসিদা, ঐখোয়গী আই.আই.তি অওনবা পুরক্লে- অত্মনির্ভর ভারত অমগীদমক অকনবা শাফু অমা ওইরিবা নহারোলশিংগী অনৌবা থবকশিং অমসুং ৱাখল্লোনশিং য়োকখৎলি। মতম অমদা মশা মরোমদোম লৈবাক ঙাকচনবগী অপাম্বা অমা লৈরম্ব মফম অমদা, ঙসিদি মশাগী ওক্নবা পোৎথোক পুথোকচনবগী ৱারেপ অমা লৌরে। মতম অদুদা, নিংতম্বগী মঙলান অমা মঙখি; ঙসিনা তুংগী ফিবম শেম্নবা খুদোংচাবা অমনি। অনিংবদগী হৌরগা অত্মনির্ভর ভারত ফাওবগী খোঙচৎ অসিনা তশেংনা বিকসিত ভারত অমা শেম্নবা শক্তি পীনবা থাউ ওইরে।

মরুপশিং,

আই.আই.তি খরগপুরনা মসিগী খোঙচৎ হৌরকপা মতমদা, ভারত নিংতম্বা ফংবতা ঙাইরি; লৈবাক অসিগী অহানবা সাধরন মীখল ফাওবা পাংথোক্ত্রি। মতম অদুদা, লৈবাক অসিগী উদ্যোগশিং অমসুং ইনফ্রাষ্ট্রকচর শেমগৎনবা ভারতনা ইঞ্জিনিয়ারশিং দরকার ওইখি। লৈবাক অসিগী সাইন্সকী তৌবা ঙম্বশিং হেনগৎলকপগা লোয়ননা, ঐখোয়গী স্পেস অমসুং এতোমিক ইনর্জিগী থবকশিং খুমাঙচাউশিনহনবদা মহৈলোয়শঙ অসিদগী থোকখিবা গ্রেজুয়েদশিংনা শিংথাবা য়ানা থবক পাংথোকখি। ইনফোর্মেসন তেক্নোলোজিগী যুগ লাকপা অমসুং অনৌবা মালেমগী শেন-থুমগী খুদোংচাবশিং লাকপগা ইরোইন্না, মফম অসিদগী থোকখিবা গ্রেজুয়েদশিংনা লৈবাক অসিগী সোফৱায়ার ইন্দষ্ট্রি মপাঙ্গল কনখৎহনখি অমসুং মালেমগী খ্বাইদগী চাউবা কোর্পোরেসন খর লমজিংখি। যুগ খুদিংদা, লৈবাক শেমগৎনবা মসিগী থৌদাং পাংথোক্নবা মহৈলোয়শঙ অসি মাঙলোমদা চোংথোরকখি। হৌজিক, ঐখোয় বিকসিত ভারত অমগী পান্দমগা লোয়ননা মাঙলোমদা চঙশিনবা অসিদা, লৈবাক অসি চাউখৎনবা অমসুং লৈবাক অসিগী অনৌবা থবকশিংদা মরুওইবা থৌদাং অমা লৌনবা আই.আই.তি খরগপুরগী চহি ৭৫ গী খোঙচৎনা শেম-শারে। ঙসিগী ‘এস্পিরেসনেল ইন্দিয়া’গী অনিংবশিং থুংহন্নবা অদোম্না পায়খৎপা য়াবা থবক খুদিংমক পায়খৎকনি হায়না ঐনা থাজবা থম্লি।

মরুপশিং,

অৱাবশিং মায়োক্নবা ঙম্নবা ঐখোয়না উৎখিবা থৌনা অদুনা ঐখোয়গী অশেংবা মপাঙ্গল মশক তাক্লে। কমদৌনা ঐনা অৱাবশিং মায়োক্নবগে হায়না মীয়াম্না ঐঙোন্দা য়াম্না তোইনা হংখি; ঐনা হৈনবা মওংদা ঐনা মখোয়দা মসি লাইনা হায়খি- ঐনা মতেং পাংবা ঙম্লোই অদুবু অৱাবা অমা মায়োক্নগদবনি।

মরুপশিং,

ঐখোয়না অৱাবশিং মায়োক্নগদরা, নত্ত্রগা কমদৌনা ঐখোয়না খোঙজেল য়াংনা পেন্থোকপগে অমসুং লৈতাবগে হায়বদা তারকখি। মীয়াম্না তোইনা মখোয় মশাগী ৱাখল খনবদা ঙমখৈশিং থমখি- মখোয় মশানা মশাগী পনখৈ শেমজখি। মখোয় অসি ঐখোয়না ‘অকক্নবা খর খক থাজবা’ হায়না কৌরে। ‘অকক্নবা খর খক থাজবা’ হায়বসি করিনো? মখোয়না ফোঙদোক্লিবদি আদোমগী মঙলানশিং, অদোমগী হৈথোই-শিংথোইবা অমসুং অদোমগী লৈবাক্কী তৌবা ঙম্বা ফাওবা অকক্নবা ওইহনবা হায়বনি। করিনা পাংথোকপা ঙমগনি অমসুং করিনা ঙম্লোই হায়বা ঐখোয় ইশানা ৱারেপ লৌজরে। মীওই অয়াম্বনা হায়নৈ, “ও, মসি পাংথোকপা ঙম্লোই”। শুংজিন্দুনা লৈবা, কান্নদবা ৱাখল্লোন চেনবা মীওইশিং তশেংনা হিংবা ঙম্লোই। ঐখোয় ইশাগী ৱাখল্লোনগী ঙমখৈশিং অসি মালেম অসিমক্কী ঙমখৈশিংনি হায়না ঐখোয়না লান্না থাজরে।

মরুপশিং,

মখোয়গী ৱাখল্লোনগী পনখৈ থুগায়রবা মতম খক্তদা লৈবাকশিংনা মখোয়গী অশেংবা তৌবা ঙম্বশিং মশক খঙই। চহি খর অসিদা মসি ভারতনা মপুংফানা উৎলে। থাজবগা লোয়ননা ভারতনা লাউথোকখি: পনখৈশিং থুগায়সি। তৌবা ঙম্বশিং অথিংবা থম্লোইসি। ঐ অদোমদা খুদম খর পীগে। মসিগী মরমদা খল্লু। চহি ২০ গী মমাংদা, ঐখোয়গী লৈবাক্ত লায়রবা অসি তুংকোইবা অৱাবা অমনি হায়না খন্নরমখি। চহি ৫০ গী মমাংদা, লাল কিলাদগী লায়রবা কোকহন্নবা খোল্লাউশিং লাউখি। মদুগী তুংদা থৌশিল ওইনা করিগুম্বা অমতা পায়খৎখিদে, লৈঙাক্না ফাইলশিং শেম-শাখি অমসুং মখোয়গী মথক্ত ফমজিনখি।

মরুপশিং,

কৈদৌঙৈদা লায়রবা কোকহনবা ঙম্লোই হায়না মীওই খুদিংমক্না খনবদগী মদু থোকখিবনি। “অপুনবা মীশিং য়াম্না য়াম্মী, থবক খুদিংমক মতম পুম্নমক্ত হান্নগুম্না লৈগনি”। লায়রবা কোকহন্নবা অচৌবা থৌশিলশিং থবক ওইনা পায়খৎনবা কনাগুম্বা অমতনা থৌনা উৎখিদে।

মরুপশিং,

ঐখোয়না সরকার পায়রকপা মতমদা, ফিবম অদু চপ মান্ননা লৈখি। ঐনা লায়রবশিংগীদমক তোইলেতশিং শাগনি হায়না ঐনা লাল কিলাদগী হায়খি। সংসদকী মীওইশিংনা মসি নোক্নখি। মখোয়না হায়খি, “ মসি করম্বা মখলগী প্রধান মন্ত্রীনো, লাল কিলাদগী তোইলেতশিং শানবা হায়রিসি?” লায়রবা ইমুং অমগী, লায়রবা ইমাশিং অমসুং ইচলশিংগীদমক তোইলেত অমা হায়বসি কয়া য়াম্না মরুওইবগে হায়বা অসিগুম্বা মীওইশিংনা খঙখিদে। অসিগুম্বা ৱাখল্লোন অসিনা মরম ওইদুনা, লৈবাক শীনবা থুংনা তঙাইফদনা চঙদ্রবা য়াদ্রবা খুদোংচাবশিং ফংদনা লৈখি। হৌখিবা চহি ১২ দা, ঐখোয়না মসিগী ৱাখল্লোন অসি হোংদোক্লে। ঐখোয়না লায়রবশিংগী ফিবম ফগৎহল্লে। ফিবম ফগৎনবা শক্তি অসি ঐগী পুন্সি লমজিংনবা অচুম্বা ফিদম ওইরে। ঐখোয়না মখোয়গী ফিবম ফগৎহল্লে। মখোয় হিংবা লাইনবা ঐখোয়না স্কিমশিং হৌদোক্লে। ঙসিদি লৈবাক অসিনা ফলশিং উরে। ৱার্ল্দ বেঙ্ক রিপোর্ত অদোম পারম্লগনি নত্ত্রগা তারম্লগনি। শুপ্নগী চহি ১২-১৩ গী মনুংদা ভারত্ত মীওই করোর ৫০ লায়রবা কোক্লে হায়না ৱার্ল্দ বেঙ্কনা হায়খি।

মরুপশিং,

মসি অপীকপা অহোংবা অমা নত্তে। মসি পনখৈশিং থুগায়বা হায়বা ৱাখল্লোন অমগী ফলনি।

মরুপশিং,

ঐ অদোমদা অতোপ্পা খুদম অমা পীগে। ঐনা সেমিকন্দক্তর মসিন হৌদোকপা মতমদা, ৱাহং কয়া লাকখি। “করিগীদমক হৌজিক ঐখোয়না মিসন অসি দরকার ওইরিবনো? অতোপ্পা লৈবাকশিংনা মাঙজৌননা সেমিকন্দক্তরশিং পুথোকপা হৌখ্রে। চহি ৫০ রোম মালেম শীনবা থুংনা সেমকন্দক্তরশিং পুথোক্লে। হৌজিক ঐখোয়না সেমিকন্দক্তরশিং পুথোক্লগা ঐখোয়না করি তোঙজগনি?” মসিনি ৱাখল খনবদা অকক্নবা থম্বা হায়বদু।

মরুপশিং,

সেমিকন্দক্তরশিং শানবা চহি ৫০ গী মমাঙদা ভারত্ত কম্পেনি অমা লাকখি হায়বা খঙবদা অদোম অঙকপা ফাওগনি। অদুবু লৈবাক অসিনা ফজনা লোয়নখিদে অমসুং মখোয় হনখি। মদু অঙাংবা ফিরালশিং হাইখিবা মীওইশিংগী থবক্নি। ঐনা সেমিকন্দক্তর মিসনগী মরমদা ৱা ঙাংবদা, মীয়াম্না অমুক হন্না হায়খি মদুদি মসি য়াম্না থেংমল্লে।

মরুপশিং,

অদুবু ঐ চপ য়ুংনা লেপখি। ঐনা হায়খি, “ করিগুম্বা মসি থেংলবসু, ভারতনা মখা তানা ফমদুনা লৈথোক্কদরা?” ঐখোয় থবক হৌখি। থৌরাংশিং শেম্নবা ঐ ইশামক ওফিসিএলশিংগা লোয়ননা থবক শুখি। ঙসিদি, চহি মরি অসিদা, লৈবাক অসিদা সেমিকন্দক্তর শাফম কয়া লিংখৎলে। ভারতনা চিপশিং মপান্দা থাদোক্লে। ঐখোয়গী হান্নগী মহৈরোয় কয়ানা চিপ শাফমশিং থবক তৌরি অমসুং মখোয়গী লুচিংবশিং ওইরি। মফম খুদিংমক্ত অদোমগী খুদোংচাবশিং লৈরি হায়বা ঐনা থাজৈ। চিপশিংদগী জহাজশিং ফাওবদা, মফম অসিদা খুদিংমক শাগনি অমসুং অদোমগুম্বা নহারোলশিংনা মসি পাংথোক্কনি।

মরুপশিং,

ঐ স্পেস সেক্তরগী অতোপ্পা অফবা খুদম অমা পীগে। মমাংদা, ইসোরদা অকক্নবা মফম অমা খক লৈরমখি, মসিদা চঙবা ফাওবা য়াম্না কন্না অথিংবা থমখি। অকক্নবা থবক অমগী মখাদা অনৌবা মিসন অমা পাংথোকখি। ইসরোগী মপান্দা লৈবা নহারোলশিং ফাওবা খুদোংচাবশিং ফংখিদে। হিরম অসিদা ঐখোয়গী নহারোলশিং খুদোংচাবা অমা পীনবা ঐনা মিনিষ্ট্রিদা হায়খি। ঐখোয়না ভারতকী স্পেস সেক্তর ভারতকী নহারোলশিংগীদমক হাংদোক্লে। ঙসিদি, করি ওইরবগে হায়বা য়েংউ। আই.আই.তি খরগপুরদগী হৌখিবা মহৈরোয় অমা ওইরিবা পবন্না স্কাইরুত এরোস্পেসকী খুৎথাংদা, লৈবাক অসিগী অহানবা লনাই রোক্কেত থাগৎতুনা ভারতকী ফিবম ফগৎহনখি। ঙসিদি অসিগুম্বা স্পেস ষ্টার্দঅপ কয়ানা অনৌবা খোঙথাং অমগা লোয়ননা ভারতকী স্পেসকী থবকশিং মাঙলোমদা পুখৎলে। মতম অমদা হায়রিবা থবকশিং অসি ওইথোক্লমদবনি। ঙসিদি মখোয় পাংথোকপা ঙম্লে। ঙসিদি মখোয় মঙফাওনরে। পাংথোকপা ঙমদবা থবকশিং পাংথোকপা ঙম্বদা অদোমগী হান্নগী মহৈরোয়শিংনা অচৌবা থৌদাং অমা লৌরি হায়না ঐনা চাউথোক্না হায়রি।

মরুপশিং,

অদোম ময়ামদগী লৈবাক অসিনা থাজবা য়াম্না থম্লি। মথংগী চহি ২০ অসি অদোমগী পুন্সিশিংগী খ্বাইদগী অফবা থবকশিং পাংথোকপা ঙম্বা চহিশিং ওইগনি। ২০৪৭ ফাওবদা, নখোয়না লুচিংবগী ফমশিং পুরগনি। হায়রিবা চহিশিং অদু ভারত চাউখৎনবা মরুওইবা চহিশিং ওইগনি। মরম অদুনা অদোমগী মাইপাকপা খুদিংমক লৈবাক অসিগী ওইনা য়াম্না মরুওই। অদোম্না মতম পুম্নমক্ত নশাদা হংজগদবনি: লৈবাক অসিগী করম্বা খুদোংচাদবা কোকহন্নবা ঐনা মতেং পাংগনি? ঐগী লাইৱা নিংশিংবীয়ু, লৈবাক্কী থবক্না হান্না পাংথোকপা। মসিগী ৱাখল্লোন অসিগা লোয়ননা মাঙলোমদা চঙশিনবা মতমদা, মসিনা শোইনা অদোমগী অনৌবা খুদোংচাবশিং পীগনি অমসুং লৈবাক অসিদা কান্নবশিং পীগনি।

মরুপশিং,

হৌখিবা চহি ৭৫ দা অদোম্না অফবা থবকশিং পাংথোকখ্রে। আই.আই.তি খরগপুর চহি ১০০ শুরকপদা, মসিনা বিকসিত ভারত অমদা থবক তৌগনি হায়বগী অচেৎপা ফিরেপ অমগা লোয়ননা অদোম মাঙলোমদা চঙশিনগদবনি। ১৯২৫-২৭ দা মফম অসিদা ফাজিন্দুনা থমখিবা নিংতম লান্মীশিংনা মখোয় নিংতম্বা ফংগনি হায়না ৱাশক অমা লৌখি অমসুং চহি ২০ গী মনুংদা মখোয়না ফংখি। ঙসি মফম অসিদগী চহি ২০ গী মনুংদা বিকসিত ভারত অমা শেমগৎনবা ঐখোয় ৱাশক লৌরসি। মসি ঐখোয়না পাংথোক্কনি। মসিগীদমক ঐখোয় কৎথোক্কদবনি অমসুং চোকথবা নাইদনা থবক তৌগদবনি। ঙশি ঐনা বেঙ্গলগী লৈমাইদা লৈবা মতমদা, শ্বামী বিবেকানন্দগী ৱাহৈশিংগা লোয়ননা ঐনা ৱা ঙাংবা লোইশিনগনি: হৌগৎলো, মিকপ থোক্লো অমসুং পান্দম ফংদ্রি ফাওবা লেপকনু। অমুক হন্না, অখন্নবা থৌরম অসিদা, ঐনা ময়ামদা ঐগী য়াইফা পাউজেল পীজরি।

অদোম থাগৎচরি।

খুরুমজরি।

দিসক্লেমর: মসি প্রধান মন্ত্রীগী ৱারোলদগী চাউরাকপা হন্দোকপনি। অশেংবা ৱারোল হিন্দীদা ঙাংখি।

***