ভারতকী প্রধানমন্ত্রী

গুজরাতকী চীফ মিনিষ্টর শ্রী ভুপেন্দ্র ভাই পতেল, কেন্দ্রগী মন্ত্রীমন্দলগী ঐগী মরুপ অশ্বিনি বৈষ্ণব, মাইক্রোন তেক্নোলোজিগী সি.ই.ও সঞ্জয় মেহরোত্রা, ভারত্ত লৈবা এ.এস এম্বেসেদর সেরজিও গোর, দিপুতি চীফ মিনিষ্টর হর্স সঙভি, অতোপ্পা শক্নাইরবশিং, ইবেম্মাশিং অমসুং ইবুংঙোশিং।

মালেমগী খ্বাইদগী চাউবা অমসুং খ্বাইদগী মাইপাকপা এ.আই সম্মিৎকী মতুংদা, ঙসি ঐখোয়না অতোপ্পা পুৱারি ওইরবা থৌরম অমা মফম অসিদা উরে। এ.আই সম্মিৎনা মালেমদা ভারতকী এ.আইগী তৌবা ঙম্বশিং উৎখি, ঙসিগী থৌরম অসিনা তেক্নোলোজিগী মাঙজিল থানবা ভারতনা পায়খৎলিবা থবক্কী অতোপ্পা খুদম অমনি।

মরুপশিং,

চহি ১০-১১ গী মমাঙদা, ভারত্ত দেতা অমসুং চিপশিংগী মরমদা অকক্নবা মীওই কালুপ খর খক্তদা খন্নরমখি। তেক্নোলোজিগী মতাংদা লাকপদা, ঐখোয়না মরুওইবা আই.তিগী থবকশিংগী অয়াম্বনা খন্নখি। ঙসিদি, ভারত মসিগী সোফৱায়ারগীদমক মমিং চৎলে, হৌজিক হার্দৱায়ারগী লমদা লৈবাক অসি মমিং চৎপা হেনগৎলক্লি। ঙসি, সানন্দা, ঐখোয়না অনৌবা তুংলমচৎ অমা উবা ফংলে। মাইক্রোনগী এ.তি.এম.পি ফেসিলিতিদা পোৎথোক পুথোকপা হৌবা অসিনা মালেমগী তেক্নোলোজি ভেল চেন্দা ভারতকী থৌদাং হেন্না মপাঙ্গল কনখৎহল্লগনি।

মরুপশিং,

ঙসি, ভারত য়াম্না য়াংনা মালেমগী সেমিকন্দক্তর ভেলু চেনগী শরুক অমা ওইরক্লে। মাইক্রোনগী অপুনবা কাংবু, ভুপেন্দ্র ভাইনা লুচিংবা গুজরাতকী সরকার অমসুং ইঞ্জিনিয়ারশিং, তেক্নিসিয়ানশিং অমসুং শিন্মীশিং ঐনা থাগৎপা ফোঙদোকচরি।

মরুপশিং,

মাইক্রোনগী ফেসিলিতি অসি ভারতকী অনৌবা ৱাখল্লোনগী অচৌবা খুদম অমনি। পোৎথোক পুথোক্নবা থৌশিলগা লোয়ননা ঙসিগী ভারত মাঙলোমদা চঙশিল্লি। ফেসিলিতি অসিগীদমক জুন ২০২৩ দা এম.ও.য়ু খুৎয়েক পীনখিবা অদু অদোম নিংশিংলমগনি। সানন্দদা সেপ্তেম্বর ২০২৩ দা ফেসিলিতি অসিগী উরেপ-উয়ুং তমখি। চাংয়েং ওইনা পোৎথোক পুথোক্নবা মফম অসিদা ফেব্রুৱারি ২০২৪ দা মেছিনশিং খিনবা হৌখি। ঙসি, ফেব্রুৱারি ২০২৬ দা, ফেসিলিতি অসি য়োন্নবা পোৎথোক পুথোকপা হৌরে।

মরুপশিং,

হিরম অসি য়েংলিবা অমসুং খঙবা মীওই অমনা হেক্ত খোঙজেল অসিগী ৱাহন্থোক খঙগনি। মালেমগী চাউখৎলবা লৈবাকশিং ফাওবদা, এদভান্স প্রাইজিং এগ্রিমেন্তশিংগুম্বা তেক্স এগ্রিমেন্তশিংগী থবক চহি ৩ দগী ৫ ফাওবা চঙখি। মখোয় য়াম্না লুবা থবকশিংনি। অদুবু ভারতনা মসি থা খরদা অয়াবা পীখি। পুকচেল শেংবা মতমদা, লৈবাক অদু য়াংনা চাউখৎলকই, থৌশিল অমসুং ৱারেপশিং নাখৈ শেংবা মতমদা চাউখৎপগী খোঙজেল য়াংখৎলি।

মরুপশিং,

ঐনা মাইক্রোনগী লুচিংবশিং থাগৎলি, ঐনা ঐগী মরুপ সঞ্জয় থাগৎত্রে। ঙসি ঐনা সঞ্জয়গী ৱারোল তারবা মতুংদা ঐনা অতোপ্পা সঞ্জয় অমা খঙলে। মহাক লেপ্তনা ভারতকী মখা পোনখি। ঐনা অখন্নবা ওইনা সঞ্জয় থাগৎপা ফোঙদোকচরি, ঐখোয় চহি উনদুনা লাকখিবা অদু ঐ নিংশিংলি, ভারত্ত সেমিকন্দক্তর শাবাগী থবক পায়খৎনবা মহাক য়াম্না থৱায় য়াওখি। ঙসিদি, মহাক্কী লমজিং মখাদা, মহাক্না ভারত্ত থাজবা থম্বদগী, মফম অসিদা অনৌবা থাকশিং য়ৌরে। মহাক ভারতকী ফম পায়রকপদগী, এম্বেসেদর গোরসু অহানবা ওইনা গুজরাত্ত লাক্লে। মহাক এম্বেসেদর অমা ওইরবা মতুংদা, ঙসিগী অসি ঐনা মহাক্কা অহানবা উনবনি অমসুং মদুসু ঐগী পোক্নবফম লমদমদনি। ঐখোয়না তরাম্না ওকপা অসি অদোম নুংঙাইগনি হায়বা ঐনা থাজৈ।

মরুপশিং,

মাইক্রোনগী ফেসিলিতি অমসুং ঙসিগী থৌরম অসি, ভারত অমসুং য়ু.এস.এগী মরক্ত মতেং পাংনবগী খুদম অমনি। এ.আই অমসুং চিপশিংগুম্বা তেক্নোলোজিশিংগী হিরমদা ভারত অমসুং য়ু.এস.এ মতেং পাংনবা অসি য়াম্না মরুওই। মীওইবা খুন্নাইগী তুংগী য়াইফনবগীদমক, তেক্নোলোজি অনি অসিগী সপ্লাই চেনশিং ফজনা থম্বা ঙসি মালেম শীনবা থুংবনা পাম্মী। মালেমগী খ্বাইদগী চাউবা গনতন্ত্র চৎপা লৈবাক অনি, ভারত অমসুং য়ু.এস.এ, মসিগীদমক লেপ্তনা থবক পায়খৎলি। এ.আই সম্মিৎ মনুংদা ভারত অমসুং য়ু.এসগী মরক্ত পি.এ.এস.সি সিলিকা এগ্রিমেন্ত য়ানখিবা অসি মাইকৈ অসিদা পায়খৎপা অতোপ্পা থবক অমনি। ঐখোয়গী অপুনবা থবকশিংনা ক্রিতিকেল মিনরেলশিংগী মালেমগী সপ্লাই চেন হেন্না ফগনি।

মরুপশিং,

২০শুবা চহিচাদা, মালেম্না উদ্যোগকী অওনবা উবা ফংখ্রে। মতম অদুদা, ফেক্তরিশিং, মেছিনশিং অমসুং পোৎথোক য়াম্না পুথোকপদা মাঙজিল থাখিবা লৈবাকশিং য়াম্না য়াংনা চাউখৎখি। অদুবু চহিচা অসি, এ.আইগী অওনবগী চহিচানি। অহোংবা অসিদা সেমিকন্দক্তরনা অচৌবা থোঙ অমা ওইরি। অপীকপা চিপ অসি উদ্যোগকী অওনবা অমসুং এ.আইগী অওনবা শম্নহল্লিবা পাম্বৈ অমনি। হৌখিবা চহিচাদা করিগুম্বা থাউনা রিগুলেতর ওইরবদি, চৎলিবা চহিচা অসিগী রিগুলেতর  মাইক্রো-চিপনা ওইগনি।

মরুপশিং,

ৱাখল্লোন অসিগা লোয়ননা, সেমিকন্দক্তরগী হিরমদা য়াংনা চঙশিন্নবা ভারতনা ৱারেপ লৌরে। মালেম্না কোবিদ-১৯ গী অৱাবা ময়োক্নরিঙৈদা, ভারতনা সেমিকন্দক্তর মিসন লাউথোকখিবা অদু অদোম নিংশিংলমগনি। মতম অদুগী মরুপ কয়া মফম অসিদা ফম্লি, তোঙান তোঙানবা কাংবুশিং, অমগী মথংদা অমা মীফমশিং পাংথোকখি। লাইচৎ মনুংদা, থবক খুদিংমক ফিবম ফত্তে হায়না খনখি। অদুবু থাজবগা লোয়ননা ঐখোয়না হুনখিবা মরু অদু হৌরে অমসুং হৌজিক মহৈ য়াল্লে।

মরুপশিং,

হৌজিক ফাওবদা, সেমিকোন ইন্দিয়া প্রোগ্রামগী মখাদা, অপুনবা প্রোজেক ১০ অয়াবা পীখ্রে। হায়রিবা মাইক্রোনশিং অসিগী মথক্ত, অতোপ্পা প্রোজেক অহুমসু অথুবা মতমদা পোৎথোক পুথোকপা হৌরগনি। ঐখোয়না সেমিকন্দক্তরগী থবক অসি লমদম অমা খক্তদা পায়খৎতে, মসি ভারত শীনবা থুংনা পায়খৎলি। অমরোমদা, লৈবাক অসিগী মফম খুদিংমক্ত ভারতনা অনৌবা তেক হবশিং শেমগৎলি। সানন্দগী মথক্ত, ধোলেরাদা পাক-চাউনা থবক পায়খৎলি। উত্তর প্রদেসকী নোইদাদা অনৌবা ফেসিলিতি অমগী উরেপ-উয়ুং তমখ্রে। অসাম, উরিসা অমসুং পঞ্জাবতা সেমিকন্দক্তর য়ুনিতশিং শেমগৎলি।

মরুপশিং,

ঙসি, ভারতনা মালেম শীনবা থুংবগী ইনভেষ্টরশিংদা পাউজেল অমা পীরি, ভারত শেম-শাদুনা লৈরে। ভারত থাজনিঙাই ওই অমসুং ভারতনা থবক পাংথোক্লি।

মরুপশিং,

সেমিকন্দক্তর শাবগী থবক অসি ফেক্তরি অমা নত্তে হায়বা অদোম খঙলে। মসিগী থবক অসিদা মেছিনশিং শাবা, দিজাইন ইঞ্জিনিয়ারশিং, রিছার্স ইন্সতিতুসনশিং, লোজিষ্টিক্স নেতৱার্কশিং অমসুং হৈথোই-শিংথোইরবা শিন্মীশিংগুম্বা মরোল কয়ানা শাবনি। চিপ অমা শানবা মীওই খুদিংমক পুন্না থবক তৌমিন্নৈ। ভারতনা সেমিকন্দক্তর শাবগী অপুনবা ভেলু চেনদা মীৎয়েং চঙলি। চহি অসিগী বজেত্ত ঐখোয়না ইন্দিয়া সেমিকন্দক্তর মিসন ২.০ লাউথোক্লে। পোৎথোক পুথোকপা হেনগৎলকপগা লোয়ননা, মচাকশিং অমসুং থবকশিং দরকার ওইবা হেনগৎলক্কনি। মসি খ্বাইদগী চাউবা খুদোংচাবনি।

মরুপশিং,

অতোপ্পা ভারতকী অচৌবা খুদোংচাবদি , ঐখোয়গী পোৎথোক য়াম্না পুথোক্নবা পান্দম অসিনি। ভারতকী য়াম্লবা অপুনবা মীশিং লৈরি, মখোয় অহানবা ওইনা গেজেদশিং শীজিন্নবা মীওই ওইরক্লি। মসি ইলেক্ত্রোনিক্স, গারিশিং নত্ত্রগা অতোপ্পা তেক্নোলোজিশিং ওইবা য়াই, ভারত্ত দরকার ওইবা লেপ্তনা হেনগৎলক্লি। হৌজিক মেক ইন ইন্দিয়া মপুংফানা পায়খৎলি। হৌখিবা চহি ১১ দা, ঐখোয়গী ইলেক্ত্রোনিক্স পোৎথোক পুথোকপা অমসুং মপান্দা থাদোকপা শরুক কয়া হেনগৎলে। হৌজিক ভারতনা মচাকশিংদগী হৌরগা মপুংফারবা পোৎথোকশিং লৈবাক অসিদা শারে। ইলেক্ত্রোনিক্সকী মচাকশিং শাবগী থবক পাকথোক-চাউথোকপগা লোয়ননা, লৈবাক অসিদা সেমিকন্দক্তরশিং দরকার ওইবা হেনগৎলক্কনি। অরোমদা, ভারত্ত শেন থাদরিবশিংগী মাঙদা লৈবাক অসিগী কৈথেল অমসুং মালেমগী খুদোংচাবশিং অনিমক লৈরে।

মরুপশিং,

সানন্দগী অপুনবা লমদম অসিগা ঐগা অখন্নবা মরী অমা লৈনরি। সানন্দ অসি লৈবাক্তগী সনা ওন্থোকপা লমদম অমনি। মসি ঐনা থেংনবা থৌদোকশিংদগী অদোমদা হায়বনি। মতম অমদা ঐ মফম অসিদা বসতা লাকখি অমসুং সাইকলনা লম্বীশিংদা কোইনা চৎখি, মসি অপীকপা সহর অমনি। ঐগী মীৎমাংদা সানন্দ অহোংবশিং লাকপা ঐ উরে। মতম অমদা অপীকপা সহর অমা ওইরম্বা অদু হৌজিক অচৌবা সহর অমা ওইরে। মসি লুপা অমগী এস.এম.এসতগী হৌখিবনি। ঐনা রতন তাতাদা মেসেজ অমা থাখি, তরাম্না ওকচরি, ঐনা ইখি শ্বাগাতম। লুপা অমা থাদখিবা অদুনা ঙসিগী গুজরাত অসি ওইরিবনি।

মরুপশিং,

সানন্দ কার ফেক্তরি অমদগী, লৈবাক অসিগী অচৌবা গারিগী মফম অমা ওইরকপা ঐগী মীৎমাংদা উরে। অচৌবা ওতোমোবাইল কম্পেনি মফম অসিদা লাকখিবা, মদুগী থবকশিং চাউখৎলকখিবা অদু ঐ নিংশিংলি। কম্পেনি অমা লাকপদগী, এন্সিলারি য়ুনিতশিং মফম অসিদা লাকখি। সপ্লাইয়র নেতৱার্ক ফগৎলকখি, মফম অসিগী উদ্যোগ চাউখৎলকখি অমসুং থবক ফংবা অমসুং শেন থাদবা অনিমক হেনগৎলকখি। অপীকপা সহর অমা ওইরম্বদগী খঙহৌদনা মফম অসি মালেমগী মেপ্ত য়াওখি। চাউখৎপা অমসুং দরকার ওইবা থবকশিং, হৌজিক অদোমগী খুত্ত লৈরি, মসি অফবা অমা ওইগনি।

মরুপশিং,

অদোম্না পাম্লিবা পুন্সি মহিং, অদোম্না পাম্লিবা খুন্নাইগী পুন্সি মহিং, অদোম্না পাম্লিবা হিংবগী লম্বী, মদু গুজরাত্ত লৈরে, মদু অদোমদা পীগনি। ঐখোয়না অদোমগী অৱাৎপা অমতা লৈহল্লোই। হৌজিক মসিগা চপ মান্নবা মওংদা, মাইক্রোনসু অনৌবা থবক অমা পাকথোক-চাউথোক্লে। লাক্লিবা চহিশিংদা সেমিকন্দক্তরদা মাইপাক্নবা সানন্দনা অনৌবা পন্দুব অমা হাংদোক্কনি হায়না ঐনা থাজৈ।

মরুপশিং,

মালেম শীনবা থুংনা মাইক্রোনগী দি-রাম অমসুং নন্দ পাম্বৈশিং, পৱার দেতা সেন্তরশিং, এ.আই এপ্লিকেসনশিং, মোবাইল দিভাইন্সশিং অমসুং অফবা কম্পুতিংগী থবকশিং লৈরে। হৌজিক মখোয়না সানন্দা শারগনি। মফম অসিদা অফবা ৱেফরশিং অফবা মখলগী মেমোরি অমসুং ষ্টোরেজগী পোৎথোকশিংদা ওন্থোক্কনি। হৌজিক প্লান্ত অসিদা মীওই চা কয়া থবক ফংলে। মসি তুংদা মখা তানা হেনগৎলক্কনি।

মরুপশিং,

মফম অসিদা অদোম্না শেমগৎলিবা ক্লিনরুমশিং মালেমগী খ্বাইদগী চাউবা এ.তি.এম.পিনি। মসি ক্লিনরুমশিং ওইরগনি। প্লান্তশিং অসি মহৌশাগী অকোয়বগী ফিবম অমসুং চাউখৎপা পুন্না চৎমিন্নবগী খ্বাইদগী ফবা খুদম অমনি। শেন য়াম্না চঙদনা মফম অসিদা ঈশিং থম্নবা অদোম্না পায়খৎলিবা থবকশিং অসি শিংথানিঙাইনি।

মরুপশিং,

গুজরাত সরকারগী থৌশিলশিংসু ঐনা থাগৎলি। সেমিকন্দক্তর সেক্তরগীদমক শেমখিবা গুজরাত সরকারগী থৌশিলশিংগী কান্নবশিং হৌজিক থবক ওইনা পাংথোকপা উরে। ভুপেন্দ্র ভাইগী সরকারগী অফবা থৌরাংদগী, গুজরাতসু তেক্নোলোজিগী লমদা য়াংনা চঙশিল্লি। মসি অয়াবশিং পীবা, লম পীনবা ৱারি শানবা, থবকশিং লাইহনবদা, গুজরাত্ত ইনভেষ্টরশিংনা থম্লিবা থাজবা হেনগৎহল্লে। নোংচুপ থংবা ভারত্ত ধোলেরা অমসুং সানন্দ ঙসি সেমিকন্দক্তরদা ক্লষ্টরশিং ওইনা শেমগৎলে। সেমিকন্দক্তরদা সেক্তরগী দরকার ওইবা পোৎলমশিং হৌজিক গুজরাত্ত শারে। কেমিকেল অমসুং পেত্রোকেমিকেল উদ্যোগগুম্না, গুজরাত্ত চপ মান্ননা স্কিল সেন্তরশিং অমসুং ত্রেনিংগী থবকশিং পায়খৎলে।

মরুপশিং,

মসি ভারতকী নহারোলশিংগী খুদোংচাবশিংগী অনৌবা থোঙ অমা হাংদোকপনি। ঙসি ঐখোয়না অহানবা খোঙথাং অমা থাংজিল্লে। ভারতকী সেমিকন্দক্তরদা ইন্দষ্ট্রিগী প্রোজেক ১০ অসি পোৎথোক পুথোকপা হৌরকপা মতমদা, মসিগী কান্নবা এম.এস.এম.ইশিং, ষ্টার্দঅপশিং অমসুং ইলেক্ত্রোনিক্স ইন্দষ্ট্রিগী অপুনবা ভেলু চেনদা য়ৌগনি। ভারত থবক পাংথোকপা ঙম্লে, ভারত চাংদম্নবা শরুক য়াবা ঙম্লে, ভারত হায়দোকখিবা ৱা ঙাক্লে হায়বগী পাউজেল মালেমদা য়ৌরে। ভারত সরকার নত্ত্রগা রাজ্যশিংগী সরকারশিং ওইগেরা, ঐখোয়গী অদোমগীদমক লৈরি হায়না ভারতকী মরুপশিং, মালেমগী ইনভেষ্টরশিংদা ঐনা থাজবা পীরি।

মরুপশিং,

হৌজিক্কী মীরোলশিংনা চৎলিবা চহি ১০ অসি হনগৎনা য়েংবদা, চহি ১০ অসিদা ভারত কয়া য়াম্না চাউখৎলবগে হায়বদা মখোয় চাউথোকচগনি। চৎলিবা চহি ১০ অসি ভারতকী তেক্নোলোজিগী তুংগী মরুওইবা তাঞ্জা অমা ওইগনি। অমুক হন্না, ঐনা মাইক্রোনগী অপুনবা কাংবু, গুজরাত সরকার থাগৎপা ফোঙদোকচরি। অদোম থাগৎচরি!

***