పిఎంఇండియా

ఇంటర్ నేషనల్ కాంటినెంటల్ సైంటిఫిక్ డ్రిల్లింగ్ ప్రోగ్రామ్ (ఐ సి డి పి) లో భారతదేశం సభ్యత్వానికి కేంద్ర మంత్రిమండలి ఆమోదం తెలిపింది. ప్రధాన మంత్రి శ్రీ నరేంద్ర మోదీ ఈ రోజు జరిగిన కేంద్ర మంత్రివర్గ సమావేశానికి అధ్యక్షత వహించారు. జర్మనీకి చెందిన భూగోళ శాస్త్రాల పరిశోధనా సంస్థ హెల్మ్హోల్ట్జ్ సెంటర్ పొట్స్ డామ్ జి ఎఫ్ జెడ్ తో ఎమ్ ఒ యు కుదుర్చుకోవడం ద్వారా ఈ సభ్యత్వం లభిస్తుంది. ఈ సంస్థ జర్మనీ దేశంలోని బ్రాండెన్ బర్గ్ కు చెందిన పబ్లిక్ లా ఫౌండేషన్. దీనికి జర్మనీ ప్రభుత్వం నిధులు సమకూరుస్తున్నది.

ఐ సి డి పి లో ఈ సభ్యత్వం కాల పరిమితి ఐదు సంవత్సరాలు. ఈ సభ్యత్వం కారణంగా ఈ రంగంలో అంతర్జాతీయ స్థాయిలో పేరుగల నిపుణుల సాయంతో భారతదేశంలోని కోయ్నా క్షేత్రంలో డీప్ డ్రిల్లింగ్ కార్యక్రమాలను చేపట్టవచ్చు. ఐ సి డి పి ప్యానెల్స్లో భారతదేశ నిపుణులకు చోటు దక్కుతుంది. ఎగ్జిక్యూటివ్ కమిటీ, అసెంబ్లీ ఆఫ్ గవర్నర్స్ అనేవి ఈ రెండు ప్యానెళ్లు. భారతదేశ భూ శాస్త్రాల మంత్రిత్వ శాఖ చేపట్టే కోయ్ నా సైంటిఫిక్ డీప్ డ్రిల్లింగ్ ప్రాజెక్ట్ నిర్వహణకు సాంకేతిక, నిర్వహణపరమైన సహకారాన్ని ఐ సి డి పి అందిస్తుంది. కీలకమైన శాస్త్ర విభాగాల్లో మానవ వనరుల శిక్షణకు సహకరిస్తుంది.

ఐ సి డి పిలో సభ్యత్వం కారణంగా భారతదేశానికి చెందిన శాస్త్రవేత్తలు, ఇంజినీర్లు వారి ప్రతిపాదనలను ఐ సి డి పి కి సమర్పించవచ్చు. ఐ సి డి పి నిధులందించే వర్క్ షాపులలో, డ్రిల్లింగ్ ప్రాజెక్టులలో పాల్గొనవచ్చు. ఐ సి డి పి ప్రాజెక్టుల ద్వారా వచ్చే సమాచారాన్ని తెలుసుకోవచ్చు. భూకంపాలను అవగాహన చేసుకోవడానికి మార్గం సుగమం అవుతుంది.