పిఎంఇండియా

న్యూఢిల్లీలో సెమీకాన్ ఇండియా – 2026 సదస్సును ప్రధానమంత్రి శ్రీ నరేంద్ర మోదీ ఈ రోజు ప్రారంభించారు. ఈ సదస్సు అయిదో ఎడిషన్ ప్రాధాన్యాన్ని వివరిస్తూ.. కార్యక్రమంలో పాల్గొన్న అందరికీ ఆయన శుభాకాంక్షలు తెలిపారు. ఈ సదస్సులో పాలుపంచుకునేందుకు విదేశాల నుంచి భారత్‌కు విచ్చేసిన అంతర్జాతీయ ప్రతినిధులకు ఆయన ప్రత్యేక కృతజ్ఞతలు తెలిపారు. ‘‘విదేశాల నుంచి భారత్‌కు విచ్చేసిన అతిథులకు ప్రత్యేకంగా స్వాగతం పలుకుతున్నాను’’ అని శ్రీ మోదీ అన్నారు.

విశ్వకర్మ జయంతి రోజే ‘సెమీకాన్ ఇండియా’ను ప్రారంభించడం విశేషమన్న ప్రధానమంత్రి.. దేశ నిర్మాణ, సృజన ప్రక్రియలకు శతాబ్దాల వారసత్వముందంటూ కొనియాడారు. సాంప్రదాయక సృజన శక్తి, 21వ శతాబ్దపు సాంకేతికత – దార్శనికతల అద్భుత సమ్మేళనంగా ఈ కార్యక్రమం నిలిచిందని వ్యాఖ్యానించారు. ‘‘ఆత్మనిర్భర భారత్, వికసిత భారత్ నిర్మాణం దిశగా ఇదే మాకు స్ఫూర్తి’’ అని శ్రీ మోదీ వ్యాఖ్యానించారు.

గత 15 రోజుల్లో దేశం సాధించిన వేగవంతమైన పురోగతిని ప్రధానమంత్రి వివరించారు. ‘గ్లోబల్ ఫిన్‌టెక్ ఫెస్ట్‌’లో సమ్మిళిత ఆర్థిక వ్యవస్థపై చర్చలు, 3,000 కిలోమీటర్ల ప్రత్యేక సరుకు రవాణా కారిడార్ అందుబాటులోకి రావడం, త్రైమాసిక జీడీపీ వృద్ధి 7.8 శాతంతో బలంగా నమోదు కావడం వంటి కీలక విజయాలను ఆయన గుర్తుచేశారు. జపాన్‌ క్రెడిట్ రేటింగ్ ఏజెన్సీ ఇటీవల భారత సార్వభౌమ రేటింగ్‌ను పెంచడం దేశ ఆర్థిక విశ్వసనీయతకు నిదర్శనమన్నారు. ‘‘అంటే, ఒకవైపు భారతదేశ ఆర్థిక వ్యవస్థ వికసిస్తోంది. మరోవైపు భారత్‌పై ప్రపంచానికి నమ్మకం కూడా పెరుగుతోంది’’ అని శ్రీ మోదీ వ్యాఖ్యానించారు.

భారత్ ఆతిథ్యమిచ్చిన బ్రిక్స్ సదస్సు దౌత్య విజయాన్ని ఆయన గుర్తు చేశారు. న్యూఢిల్లీ డిక్లరేషన్ ఏకగ్రీవంగా ఆమోదం పొందడం అంతర్జాతీయ ఏకాభిప్రాయానికి నిదర్శనమని ప్రధానమంత్రి వ్యాఖ్యానించారు. మన దేశంపై అంతర్జాతీయ సమాజానికి గల అచంచలమైన విశ్వాసానికి ఈ చరిత్రాత్మక దౌత్య విజయం నిదర్శనమన్నారు. ‘‘భారత్‌పై ప్రపంచానికి ఉన్న నమ్మకానికి ఇది మరొక పెద్ద నిదర్శనం’’ అని శ్రీ మోదీ అన్నారు.

2022లో ప్రారంభమైనప్పటి నుంచి.. ‘సెమీకాన్ ఇండియా’ పరిణామ క్రమాన్ని ప్రధానమంత్రి ఈ సందర్భంగా వివరించారు. ప్రారంభ విధానపరమైన చర్చల స్థాయి నుంచి ప్రాజెక్టు ప్రణాళికలు, ప్రయోగాత్మకంగా చేపట్టిన చర్యలు, చివరికి వాణిజ్యపరమైన ఉత్పత్తి ప్రారంభం వరకు సాగిన పురోగతిని ఆయన గుర్తు చేశారు. మనదేశంలోని ప్లాంట్లలో తయారైన చిప్‌లు ఇప్పుడు ప్రపంచవ్యాప్తంగా వినియోగదారులకు చేరుతున్నాయన్నారు. అంతేకాకుండా మొహాలీ, సూరత్‌లలో రెండు కొత్త ప్లాంట్లలో వాణిజ్యపరంగా ఉత్పత్తి ప్రారంభం కావడంపై ఆయన హర్షం వ్యక్తం చేశారు. ‘‘ఇప్పుడు భారత్‌లోని ప్లాంట్ల నుంచి వస్తున్న చిప్‌లు దేశవ్యాప్తంగా, ప్రపంచవ్యాప్తంగా వినియోగదారులకు అందుతున్నాయి’’ అని శ్రీ మోదీ పేర్కొన్నారు.

సెమీకండక్టర్ వ్యవస్థ నిర్మాణం అత్యంత సంక్లిష్టమైనదని పేర్కొంటూ.. రికార్డు వ్యవధిలో చిప్ డిజైన్, పరికరాల తయారీ, టెస్టింగ్ సామర్థ్యాలను సాధించే దిశగా సమష్టిగా కృషి చేశారని ప్రధానమంత్రి అభినందించారు. పరిశ్రమ దిగ్గజాలను ఈ విజయానికి మూలస్తంభాలుగా పేర్కొంటూ… వారి భాగస్వామ్యం వల్లే ఈ వేగవంతమైన సాంకేతిక పురోగతిని సాధ్యమైందన్నారు. ‘‘భారత్ సాధించిన ఈ విజయానికి మీరే మూలస్తంభాలు. ఈ విజయంలో మీరే భాగస్వాములు’’ అని శ్రీ మోదీ స్పష్టం చేశారు.

సెమీకండక్టర్ రంగంలో నిరంతర పురోగతిని పేర్కొంటూ.. ‘టేప్ అవుట్’ భావనను ప్రధానమంత్రి వివరించారు. ఎలాంటి జాప్యమూ లేకుండా తదుపరి సాంకేతిక రూపకల్పనల దిశగా ప్రభుత్వం అడుగులు వేస్తున్న తీరునూ ప్రధానంగా ప్రస్తావించారు. సెమీకండక్టర్ మిషన్ రెండో విడతలో భాగంగా రూ. 13.5 బిలియన్ డాలర్ల భారీ కేటాయింపులను ఆయన ప్రకటించారు. అలాగే అంతర్జాతీయ కంపెనీలు, అంకుర సంస్థలు, డిజైన్ సంస్థల మధ్య భాగస్వామ్యాలను సులభతరం చేసే కొత్త నియంత్రణాపరమైన సంస్కరణలను ఆయన వివరించారు. ‘‘మీ ప్రాజెక్టులు విజయవంతమయ్యేందుకు అవసరమైన ప్రతి చర్యనూ కేంద్ర ప్రభుత్వం తీసుకుంటోంది’’ అని శ్రీ మోదీ స్పష్టం చేశారు.

దేశీయంగా బలమైన సరఫరా వ్యవస్థ ఏర్పాటుకు సంబంధించి ప్రణాళికను వివరిస్తూ… ఫ్యాబ్‌లెస్ కంపెనీలను ప్రోత్సహించడం, మేధో సంపత్తిని సృష్టించడం, ఏఐ ఆధారిత మౌలిక సదుపాయాల కోసం సిలికాన్ ఫొటోనిక్స్‌ను అనుసంధానించాల్సిన ఆవశ్యకతను ప్రధానమంత్రి పేర్కొన్నారు. ఆమోదం పొందిన 12 ప్రాజెక్టులు, వేగంగా పెరుగుతున్న డిమాండ్ ద్వారా అందుతున్న సువర్ణావకాశాలను సద్వినియోగం చేసుకోవాల్సిందిగా.. పరికరాలు, రసాయనాలు, గ్యాసులు, ఇతర ముడిపదార్థ రంగాల ప్రతినిధులకు ఆయన పిలుపునిచ్చారు. ‘‘వ్యవస్థ మొత్తం సమష్టిగా ఎదగాలని మేం కోరుకుంటున్నాం’’ అని శ్రీ మోదీ వ్యాఖ్యానించారు.

దేశ జనసంఖ్య వల్ల కలిగే వ్యూహాత్మక ప్రయోజనాలను శ్రీ మోదీ ప్రధానంగా ప్రస్తావించారు. పెద్ద సంఖ్యలో ఇంజినీరింగ్ ప్రతిభావంతులు, చిప్ డిజైనింగ్ కోసం ప్రత్యేకంగా రూపొందించిన నైపుణ్యాభివృద్ధి కార్యక్రమాల గురించి ఆయన మాట్లాడారు. విద్యార్థులు సొంతంగా రూపొందించిన చిప్‌లను తనకు బహుకరించడాన్ని ఈ సందర్భంగా సగర్వంగా గుర్తుచేసుకున్నారు. అలాగే లక్ష మంది ఇంజినీరింగ్ విద్యార్థులకు శిక్షణ ఇవ్వాలన్న ప్రతిష్ఠాత్మక లక్ష్యాన్ని ప్రభుత్వం నిర్దేశించుకుందని, అందులో భాగంగా ఇప్పటికే 70,000 మందికి శిక్షణ ఇచ్చిందని తెలిపారు. ‘‘ఇంత భారీ సంఖ్యలో ప్రతిభావంతులుండడం ఒక రకంగా మీ అందరికీ బంగారు గని వంటిది’’ అని శ్రీ మోదీ వ్యాఖ్యానించారు.

దేశంలోనూ, అంతర్జాతీయంగానూ పరిశోధనల్లో నిమగ్నమై ఉన్న ప్రతిభావంతులకు ఆయన ఆహ్వానం పలికారు. భారత్‌లోనే అత్యాధునిక సాంకేతికతల అభివృద్ధిలో యువత క్రియాశీలక భాగస్వామ్యం వహించాల్సిందిగా ప్రధానమంత్రి పిలుపునిచ్చారు. స్థానికంగా పరిశోధన – అభివృద్ధి రంగాన్ని ముందుకు తీసుకెళ్లాలని పరిశ్రమ దిగ్గజాలకు పిలుపునిచ్చారు. తద్వారా వ్యాపార సంస్థలతోపాటు దేశ యువత కూడా ఎదుగుతుందన్నారు. ‘‘దీనివల్ల పరిశ్రమలకు ప్రయోజనం చేకూరడంతోపాటు.. భారత యువశక్తి కూడా మరింత బలోపేతమవుతుంది’’ అని శ్రీ మోదీ వ్యాఖ్యానించారు.

సెమీకండక్టర్ మార్కెట్‌లో సంక్లిష్ట పరిస్థితుల్లో మార్పులను ప్రస్తావిస్తూ… కేవలం ట్రాన్సిస్టర్ సైజుకే పరిమితం కాకుండా మెమరీ ప్లేస్‌మెంట్, ఉష్ణ నియంత్రణ వంటి సమగ్ర వ్యవస్థల అనుసంధానం దిశగా కృత్రిమ మేధకు డిమాండ్ పెరుగుతోందన్నారు. తయారీ పరంగా అంతర్జాతీయంగా ఈ కొత్త సవాళ్లను ఎదుర్కొనేందుకు.. నమ్మకమైన, జాగరూకమైన గమ్యస్థానంగా భారత్ నిలుస్తుందని ఆయన పేర్కొన్నారు. ‘‘ఎప్పటికప్పుడు ఈ దిశగా భారత్ తనను తాను సిద్ధం చేసుకుంటోంది’’ అని శ్రీ మోదీ వ్యాఖ్యానించారు.

హై పర్ఫార్మెన్స్ కంప్యూటింగ్ కోసం ఇంధన భద్రత అనే కీలకమైన అంశాన్ని ప్రస్తావిస్తూ.. ఏఐ డేటా సెంటర్‌లకు అవసరమయ్యే భారీ విద్యుత్ డిమాండ్‌ను, తయారీ ప్లాంట్లకు నిరంతర విద్యుత్ సరఫరా ఆవశ్యకతను ప్రధానమంత్రి వివరించారు. సౌర విద్యుత్ సామర్థ్యాన్ని 160 గిగావాట్లకు పైగా పెంచడం, అణు విద్యుత్ రంగంలో ప్రైవేటు భాగస్వాములకు అవకాశాన్ని కల్పించడం, స్మాల్ మోడ్యులర్ రియాక్టర్ల అభివృద్ధి సహా.. విద్యుత్ రంగంలో దేశం వేగంగా సాధిస్తున్న పురోగతిని ఆయన వివరించారు. ‘‘అందుకే, భారత్ నేడు విద్యుత్ రంగంలో కూడా భారీగా పెట్టుబడులు పెడుతోంది’’ అని శ్రీ మోదీ పేర్కొన్నారు.

పారిశ్రామికంగా సన్నద్ధత కోసం.. విద్యుత్ మౌలిక సదుపాయాలు వేగంగా విస్తరించడం ఆవశ్యకమని ప్రధానమంత్రి పేర్కొన్నారు. సెమీకండక్టర్ వ్యవస్థకు ఇంధన భద్రత ప్రధాన బలంగా నిలుస్తుందని ప్రధానమంత్రి స్పష్టం చేశారు. పారిశ్రామిక వృద్ధి కోసం సానుకూల వాతావరణాన్ని అందించడానికి ప్రభుత్వం కట్టుబడి ఉందని ఆయన పునరుద్ఘాటించారు. ‘‘సెమీకండక్టర్ రంగంలో భారత్‌ను అత్యంత ప్రాధాన్య గమ్యస్థానంగా నిలిపేందుకు అవసరమైన అన్ని చర్యలనూ భారత్ తీసుకుంటోంది’’ అని శ్రీ మోదీ తెలిపారు.

భారత్ సాధించిన సాంకేతిక పురోగతిని.. భారత ప్రజాస్వామ్య విలువల నేపథ్యంలో విశ్లేషిస్తూ ఆయన తన ప్రసంగాన్ని ముగించారు. భారత రాజ్యాంగం రూపుదిద్దుకుని 75 ఏళ్లు పూర్తయిన చరిత్రాత్మక సందర్భాన్ని ఈ సందర్భంగా ఆయన సభకు గుర్తుచేశారు. ‘ప్రజాస్వామ్యానికి మాతృక’ వంటి భారత్‌లో ఒక కీలక పరిశ్రమ విజయవంతమవడం అంతర్జాతీయ సరఫరా వ్యవస్థను మరింత బలోపేతం చేస్తుందని ఆయన ఆశాభావం వ్యక్తం చేశారు. భవిష్యత్తులో అపరిమితమైన అవకాశాలను అందుకోవడానికి ముందుకు రావాలని పిలుపునిచ్చారు. ‘‘దేశ ఆకాంక్షలు మీ ముందున్నాయి. దేశంలో ఏర్పడుతున్న కొత్త అవకాశాలు మిమ్మల్ని స్వాగతించేందుకు సిద్ధంగా ఉన్నాయి’’ అని శ్రీ మోదీ అన్నారు.