پی ایم انڈیا

نئی دہلی۔29؍اگست۔وزیراعظم جناب نریندر مودی نے تمام کھلاڑیوں اور کھیل کود کے شائقین کو قومی کھیل کود کے دن کے موقع پر مبارکباد پیش کی ہے۔ وزیراعظم نے اس موقع پر اساطیری حیثیت کے حامل ہاکی کے معروف کھلاڑی میجر دھیان چند کو بھی خراج عقیدت پیش کیا ہے۔

وزیراعظم نے اپنے پیغام میں کہا ہے کہ نیشنل اسپورٹس ڈے کے موقع پر میں تمام کھلاڑیوں اور کھیل کود کے شائقین کو جو بڑے ذوق وشوق کے ساتھ کھیل کود سے وابستہ رہے ہیں اپنی جانب سے مبارکباد پیش کرتا ہوں۔ میں غیرمعمولی ہاکی کھلاڑی میجر دھیان چند کو بھی خراج عقیدت پیش کرتا ہوں جن کی اساطیری کھیل کود ہنرمندی نے بھارتی ہاکی میں معرکۃ الآراء ابواب رقم کیے ہیں۔

وزیراعظم نے کہا ہے کہ کھیل کود سے جسمانی درستگی حاصل ہوتی ہے، ذہن چاق وچوبند رہتا ہے اور شخصیت کو جلا ملتی ہے۔ بھارت میں زبردست کھیل کود صلاحیتیں مضمر رہی ہیں، اسے بروئے کار لانے کیلئے انڈیا اسپورٹس کی جانب سے ایک پورٹل بھی شروع کیا گیا ہے۔

نیشنل اسپورٹس ٹیلنٹ سرچ پورٹل، نوجوانوں کو کھیل کود کوبطور کریئر اپنانے اور اس شعبے میں نمائندہ مقام حاصل کرنے کے لئے لازمی رہنمائی اور امداد فراہم کرتا ہے۔

******

م ن۔ ۔ ع ن۔
U-4240