پی ایم انڈیا

وزیر اعظم جناب نریندر مودی نے آج نیوزی لینڈ کے شہر آکلینڈ میں ’’کیا اورا مودی‘‘  کے عنوان سے منعقدہ ایک شاندار تقریب میں بھارت نژاد افراد کے ایک بڑے اجتماع سے خطاب کیا۔ ایک خصوصی خیرسگالی کے اظہار کے طور پر نیوزی لینڈ کے وزیر اعظم  عز ت مآب  کرسٹوفر لکسن بھی اس تقریب میں شریک ہوئے۔ اس موقع پر دس ہزار سے زائد بھارت نژاد افراد نے بھرپور جوش، ولولے اور گرمجوشی کے ساتھ شرکت کی، جس سے تقریب کا ماحول نہایت پُرجوش اور یادگار بن گیا۔

اپنے خطاب کے آغاز میں وزیر اعظم جناب نریندر مودی نے نیوزی لینڈ کے وزیر اعظم کرسٹوفر لکسن کا تقریب میں شرکت، دوطرفہ تعلقات کے فروغ اور نیوزی لینڈ میں مقیم بھارتی برادری کی فلاح و بہبود کے لیے ان کی مسلسل حمایت پر دلی شکریہ ادا کیا۔ انہوں نے بھارتی برادری کی جانب سے کیے گئے پُرتپاک استقبال کو سراہتے ہوئے کہا کہ نیوزی لینڈ میں مقیم بھارت نژاد افراد نے اپنے عزم، محنت اور مستقل مزاجی کے ذریعے دونوں ممالک کے تعلقات کو مزید مضبوط بنانے میں قابلِ قدر کردار ادا کیا ہے۔

نیوزی لینڈ میں مقیم بھارت نژاد برادری آج ایک متحرک اور بااثر قوت بن چکی ہے، جو وہاں کی زندگی کے تقریباً ہر شعبے میں نمایاں خدمات انجام دے رہی ہے۔ وزیر اعظم نے اس برادری کو سراہتے ہوئے کہا کہ اس نے اپنی ثقافت، تہواروں اور روایات کو محفوظ رکھتے ہوئے نیوزی لینڈ کے کثیرثقافتی معاشرے کو مزید رنگا رنگ اور مالامال بنایا ہے۔ انہوں نے بالخصوص اس برادری کے سیوا (بے لوث خدمت) کے جذبے کی تعریف کرتے ہوئے کہا کہ رضاکارانہ خدمات، خیراتی سرگرمیوں اور سماجی بہبود کے میدان میں اس کی خدمات مثالی ہیں اور معاشرے کے لیے قابلِ تقلید نمونہ پیش کرتی ہیں۔

وزیر اعظم نے کہا کہ بظاہر یہ اجتماع بھارتی برادری کا تھا، لیکن حقیقت میں یہ بھارت اور نیوزی لینڈ کی دوستی، کھیلوں کے مضبوط تعلقات اور بڑھتی ہوئی اقتصادی شراکت داری کا جشن تھا۔ انہوں نے اس بات کی طرف اشارہ کیا کہ سال 2026 دونوں ممالک کے درمیان کھیلوں کے تعلقات کے سو سال مکمل ہونے کا سال ہے، اور دونوں حکومتیں اس تاریخی موقع پر کھیلوں کے شعبے میں اپنے تعاون کو مزید وسعت دینے کے لیے پُرعزم ہیں۔ وزیر اعظم نے مقامی ماؤری ثقافت کی شمولیت، ہم آہنگی اور پائیدار ترقی کے تصور کو سراہتے ہوئے کہا کہ بھارت بھی ترقی کے ایسے ہی راستے پر گامزن ہے، جہاں ثقافتی ورثے کے تحفظ اور جدید ترقی کو یکجا کیا جا رہا ہے۔

انہوں نے نیوزی لینڈ میں مقیم بھارتی برادری پر زور دیا کہ وہ آئندہ بھی بھارت اور نیوزی لینڈ کے درمیان دوستی، اعتماد اور تعاون کا مضبوط پل بنی رہے، تاکہ دونوں ممالک کے درمیان قائم ہونے والی اسٹریٹجک پارٹنرشپ کی مکمل صلاحیت سے فائدہ اٹھایا جا سکے اور اس کے ثمرات دونوں قوموں تک پہنچ سکیں۔

******

ش ح۔ ف ا۔ م ر

U-NO. 9831