পি এম ইণ্ডিয়া

প্ৰধানমন্ত্ৰী শ্ৰী নৰেন্দ্ৰ মোদীয়ে আজি ৰাজ্যসভাত ভাষণ দি পশ্চিম এছিয়াত চলি থকা সংঘাতৰ পৰা উদ্ভৱ হোৱা পৰিস্থিতিৰ বিষয়ত চৰকাৰৰ স্থিতি স্পষ্ট কৰে। তিনি সপ্তাহতকৈও অধিক সময় ধৰি চলি থকা যুদ্ধই ভাৰতত বাবে গভীৰভাৱে উদ্বেগজনক প্ৰভাৱ পেলোৱাৰ লগতে  বিশ্বত  এক ভয়াৱহ শক্তি সংকটৰ সৃষ্টি কৰা বুলি উল্লেখ কৰি প্ৰধানমন্ত্ৰী মোদীয়ে আঙুলিয়াই দিয়ে যে এই সংঘাতে ভাৰতৰ বাণিজ্যিক পথত ব্যাঘাত জন্মাইছে আৰু পেট্ৰ’ল, ডিজেল, গেছ, সাৰ আদি অত্যাৱশ্যকীয় সামগ্ৰীৰ নিয়মীয়া যোগানত প্ৰভাৱ পেলাইছে। উপসাগৰীয় দেশসমূহত প্ৰায় এক কোটি ভাৰতীয়ই বাস কৰাৰ লগতে  কাম কৰি থকাৰ বাবে তেওঁলোকৰ সুৰক্ষা আৰু জীৱিকাৰ বিষয় হৈয়েই আছে বুলি প্ৰধানমন্ত্ৰীয়ে উল্লেখ কৰে। তেওঁ লগতে হৰমুজ জলদ্বীপত জাহাজত আবদ্ধ হৈ থকা বৃহৎ সংখ্যক ভাৰতীয় নাৱিকৰ বিষয়টোও উল্লেখ  কৰে।

শ্ৰী মোদীয়ে দৃঢ়তাৰে কয় যে এনে ভয়াৱহ পৰিস্থিতিত ভাৰতীয় সংসদৰ এই উচ্চ সদনৰ পৰা সমগ্ৰ বিশ্বলৈ শান্তি আৰু আলোচনাৰ এক ঐক্যবদ্ধ কণ্ঠস্বৰ প্ৰচাৰ কৰাটো অতি প্ৰয়োজনীয়। যুদ্ধ  আৰম্ভ হোৱাৰ পিছৰে পৰা ভাৰতে গ্ৰহণ কৰা   কূটনৈতিক প্ৰচাৰৰ বিশদ বিৱৰণ দাঙি ধৰি  প্ৰধানমন্ত্ৰীয়ে সদনক অৱগত কৰে যে তেওঁ ব্যক্তিগতভাৱে পশ্চিম এছিয়াৰ প্ৰায়বোৰ ৰাষ্ট্ৰৰ ৰাষ্ট্ৰপতিৰ সৈতে দুটা পৰ্যায়ত  টেলিফোনিক বাৰ্তালাপ কৰিছে আৰু ভাৰতৰ সকলো উপসাগৰীয় দেশৰ লগতে ইৰাণ, ইজৰাইল,তথা আমেৰিকাৰ সৈতেও অবিৰতভাবে যোগাযোগ অব্যাহত ৰাখিছে।

তেওঁ কয় যে ভাৰতৰ  উদ্দেশ্য হৈছে আলোচনা আৰু কূটনীতিৰ জৰিয়তে অঞ্চলটোত শান্তি পুনৰুদ্ধাৰ কৰা আৰু হৰমুজ জলদ্বীপৰ উত্তেজনা প্ৰশমন কৰি ইয়াক পুনৰ মুকলি কৰা। ভাৰতৰ দৃঢ় স্থিতিৰ বিষয়ত গুৰুত্ব আৰোপ কৰি তেওঁ ঘোষণা কৰে যে বাণিজ্যিক জাহাজত আক্ৰমণ আৰু হৰমুজ জলদ্বীপৰ দৰে আন্তঃৰাষ্ট্ৰীয় জলপথত বাধা দিয়াটো গ্ৰহণযোগ্য কথা নহয়। ভাৰতে সাধাৰণ নাগৰিক, অসামৰিক আন্তঃগাঁথনি, শক্তি আৰু পৰিবহণ সম্পৰ্কীয় আন্তঃগাঁথনিৰ ওপৰত কৰা সকলো আক্ৰমণৰ তীব্ৰ বিৰোধিতা কৰিছে। শ্ৰী মোদীয়ে মন্তব্য কৰে যে এই যুদ্ধত মানৱ জীৱনৰ প্ৰতি অহা  যিকোনো ভাবুকি মানৱতাৰ স্বাৰ্থৰ বিৰুদ্ধে। সেয়েহে ভাৰতৰ স্থায়ী প্ৰচেষ্টা হৈছে সকলো পক্ষকে সোনকালে শান্তিপূৰ্ণ সমাধানৰ দিশত উৎসাহিত কৰা। সংকটৰ সময়ত বিদেশত থকা ভাৰতীয়সকলক সুৰক্ষা দিয়াৰ চৰকাৰৰ  অগ্ৰাধিকাৰৰ বিষয়ত  গুৰুত্ব আৰোপ কৰি প্ৰধানমন্ত্ৰীয়ে কয় যে যুদ্ধ আৰম্ভ হোৱাৰ পিছৰে পৰা ৩,৭৫,০০০ৰো অধিক ভাৰতীয়ক নিৰাপদে দেশলৈ  ঘূৰাই অনা হৈছে। য’ত কেৱল ইৰাণৰ পৰা অহা ১০০০ৰো অধিক ভাৰতীয়, ইয়াৰ ভিতৰত ৭০০ৰো অধিক যুৱ চিকিৎসা বিজ্ঞানৰ ছাত্ৰ-ছাত্ৰীও আছে। সকলো দেশেই নিজৰ মাটিত উপস্থিত হোৱাৰ ক্ষেত্ৰত  ভাৰতীয়সকলৰ  বাবে পূৰ্ণ নিৰাপত্তাৰ আশ্বাস দিয়াৰ কথা উল্লেখ কৰি প্ৰধানমন্ত্ৰীয়ে এই সংকটৰ সময়ছোৱাত চৰকাৰে সম্পূৰ্ণ দায়বদ্ধতাৰে  কাম কৰি আছে বুলি কয়। তেওঁ আক্ৰমণৰ ফলত ভাৰতীয় লোকে প্ৰাণ হেৰুওৱা আৰু আঘাতপ্ৰাপ্ত হোৱাত গভীৰ শোক প্ৰকাশ কৰে। প্ৰধানমন্ত্ৰী মোদীয়ে কয় যে ক্ষতিগ্ৰস্ত পৰিয়ালসমূহলৈ প্ৰয়োজনীয় সকলো সাহায্য প্ৰদান কৰা হৈছে আৰু আহতসকলৰ বাবে সম্ভৱপৰ উত্তম চিকিৎসাৰ সুবিধা নিশ্চিত কৰা হৈছে।

খাৰুৱা তেল, গেছ, সাৰ পৰিবহণৰ বাবে বিশ্বৰ অন্যতম বৃহৎ বাণিজ্যিক পথ হিচাপে হৰমুজ জলদ্বীপৰ কৌশলগত তাৎপৰ্য্যৰ বিষয়ত  আলোকপাত কৰি প্ৰধানমন্ত্ৰীয়ে স্বীকাৰ কৰে যে যুদ্ধ আৰম্ভ হোৱাৰে পৰাই জলদ্বীপৰ মাজেৰে জাহাজ চলাচল কৰাটো অত্যন্ত প্ৰত্যাহ্বানজনক হৈ পৰিছে। কিন্তু প্ৰতিকূল পৰিস্থিতিৰ মাজতো চৰকাৰে আলোচনা আৰু কূটনীতিৰ জৰিয়তে বিকল্প পথ গঢ়ি তোলাৰ চেষ্টা কৰিছে, যিদৰেই  সম্ভৱ তেল আৰু গেছৰ যোগান ভাৰতলৈ হৈ থকাটো  নিশ্চিত কৰা হৈছে।   প্ৰধানমন্ত্ৰীয়ে কয় যে দেশখনে এনে প্ৰতিটো প্ৰচেষ্টাৰ সাক্ষী হৈ আছে। যোৱা কেইদিনমানৰ পৰা সমগ্ৰ বিশ্বৰ অসংখ্য দেশৰ পৰা খাৰুৱা তেল আৰু এল পি জি ভৰ্তি জাহাজ ভাৰতত উপস্থিত হৈছে আৰু আগন্তুক দিনবোৰতো এই দিশত আমাৰ প্ৰচেষ্টা অবিৰতভাৱে চলি থাকিব। দীৰ্ঘম্যাদী সংকটৰ প্ৰতি দৃষ্টি আকৰ্ষণ ৰাখি  প্ৰধানমন্ত্ৰীয়ে উল্লেখ কৰে যে তেলেই হওক, গেছেই হওক, সাৰেই হওক, প্ৰতিটো প্ৰয়োজনীয় সামগ্ৰী কঢ়িয়াই অনা জাহাজৰ নিৰাপদ আগমন নিশ্চিত কৰা হৈছে যদিও  এই যুদ্ধৰ ফলত সৃষ্টি হোৱা বিশ্বজোৰা  ব্যাঘাতৰ দীৰ্ঘদিনীয়া স্থায়িত্বই অনিবাৰ্যভাৱে গুৰুতৰ পৰিণতিৰ সৃষ্টি কৰিব। শ্ৰী মোদীয়ে দৃঢ়তাৰে কয় যে ভাৰতে সেয়েহে বিগত বছৰবোৰত গ্ৰহণ কৰা সকলো পদক্ষেপ অধিক  ত্বৰান্বিত কৰিছে।

ভাৰতৰ দশকজোৰা কৌশলগত প্ৰস্তুতিৰ বিষয়ত মন্তব্য কৰি প্ৰধানমন্ত্ৰী মোদীয়ে কয়  যে প্ৰতিটো সংকটে এখন  দেশৰ সংকল্প আৰু ইয়াৰ প্ৰচেষ্টা উভয়ৰে  পৰীক্ষা লয় আৰু দেশখনে এনে প্ৰত্যাহ্বান সহ্য কৰিব পৰাটো নিশ্চিত কৰিবলৈ বিগত এঘাৰ বছৰত সামঞ্জস্যপূৰ্ণ তথা  দূৰদৰ্শী সিদ্ধান্ত গ্ৰহণ কৰা হৈছে। খাৰুৱা তেল, এল এন জি আৰু এল পি জিৰ বাবে  পূৰ্বৰ ২৭খন দেশৰ পৰা আজি ৪১খন দেশৰ পৰা ইন্ধন  আমদানি কৰাৰ বিষয়ে বিতংভাৱে উল্লেখ কৰি তেওঁ সদনক জনায়  যে ভাৰতে এনে সংকটৰ সময়ৰ বাবে খাৰুৱা তেলৰ মজুত অটুট ৰখাত  অগ্ৰাধিকাৰ দিছে।  দেশৰ  তেল কোম্পানীসমূহে পেট্ৰ’ল আৰু ডিজেল যথেষ্ট পৰিমাণে মজুত ৰাখিছে। বিগত এঘাৰ বছৰত ৫৩ লাখ মেট্ৰিক টনতকৈ অধিক পেট্ৰলিয়ামৰ কৌশলগত  মজুত গঢ়ি তোলা হৈছে, ভাৰতৰ শোধন ক্ষমতাৰ যথেষ্ট বৃদ্ধিৰ সমান্তৰালভাৱে ৬৫ লাখ মেট্ৰিক টনতকৈ অধিক মজুতৰ কাম চলি আছে। প্ৰধানমন্ত্ৰীয়ে দৃঢ়তাৰে কয় যে ভাৰতত খাৰুৱা তেলৰ পৰ্যাপ্ত মজুত আছে  আৰু নিৰন্তৰ তথা  নিৰৱচ্ছিন্ন যোগানৰ বাবে শক্তিশালী ব্যৱস্থা সক্ৰিয় হৈ আছে ।  মই এই সদন আৰু দেশক এই আশ্বাসেই  দিব বিচাৰো।

যিকোনো একক ইন্ধনৰ উৎসৰ ওপৰত অতি নিৰ্ভৰশীলতা হ্ৰাস কৰাৰ  বাবে চৰকাৰে গ্ৰহণ কৰা  কৌশলৰ বিষয়ে বিশদভাৱে উল্লেখ কৰি প্ৰধানমন্ত্ৰীয়ে ঘৰুৱা গেছ যোগানৰ বাবে এল পি জিৰ সমান্তৰালভাৱে পাইপড নেচাৰেল গেছ (পি এন জি)ৰ বিষয়ত  গুৰুত্ব দিয়াৰ  কথা উল্লেখ কৰে। যোৱা দশকত পিএনজি সংযোগৰ বিষয়ত অভূতপূৰ্বভাবে  কাম কৰা হৈছে আৰু যোৱা কিছুদিনত এই প্ৰচেষ্টা  অধিক তীব্ৰতৰ কৰা হৈছে। শ্ৰী মোদীয়ে মন্তব্য কৰে যে একে সময়তে এল পি জিৰ ঘৰুৱা উৎপাদনো যথেষ্ট বৃদ্ধিৰ বাবে বৃহৎ পৰিসৰৰ প্ৰচেষ্টা চলোৱা হৈছে। ভাৰতৰ আত্মনিৰ্ভৰশীলতাৰ দৃষ্টিভংগীৰ কথা উল্লেখ কৰি  প্ৰধানমন্ত্ৰীয়ে  কয় যে বিগত কেইবাবছৰ ধৰি চৰকাৰৰ স্থায়ী প্ৰচেষ্টা হৈছে এয়াই যে প্ৰতিটো খণ্ডতে অন্য দেশৰ ওপৰত নিৰ্ভৰশীলতা কম কৰা। এই কথা উল্লেখ কৰি তেওঁ কয় যে ভাৰতৰ ৯০ শতাংশতকৈ অধিক তেল বৰ্তমান বিদেশী পতাকা থকা জাহাজত পৰিবহণ কৰা হয় , যিটো পৰিস্থিতিয়ে যিকোনো বিশ্ব সংকটৰ সময়ত দেশখনৰ দুৰ্বলতা আৰু অধিক বৃদ্ধি কৰিব। ইয়াৰ সমাধানৰ বাবে চৰকাৰে মেড-ইন-ইণ্ডিয়া জাহাজ নিৰ্মাণৰ বাবে প্ৰায় ৭০,০০০ কোটি টকাৰ অভিযান আৰম্ভ কৰিছে। একে সময়তে জাহাজ নিৰ্মাণ,জাহাজৰ  ৰক্ষণাবেক্ষণ আৰু অভাৰহ’লিঙৰ ক্ষমতা দ্ৰুতগতিত বিকশিত কৰিছে। তেওঁ লগতে আলোকপাত কৰে যে ভাৰতৰ প্ৰতিৰক্ষা খণ্ডক অধিক স্থিতিস্থাপক কৰি তোলা হৈছে। দেশখনে এতিয়া নিজৰ প্ৰয়োজনীয় অস্ত্ৰ-শস্ত্ৰৰ অধিকাংশই ঘৰুৱাভাৱে উৎপাদন কৰি আছে  আৰু জীৱন ৰক্ষাকাৰী ঔষধৰ বাবে ঘৰুৱা এপিআই পৰিৱেশ তন্ত্ৰ গঢ়ি তোলাৰ অৰ্থে আপুৰুগীয়া খনিজ পদাৰ্থৰ আমদানিৰ বিষয়ত  নিৰ্ভৰশীলতা হ্ৰাস কৰাত  উল্লেখযোগ্য অগ্ৰগতি লাভ কৰা হৈছে। প্ৰধানমন্ত্ৰী মোদীয়ে কয় যে প্ৰতিটো গুৰুত্বপূৰ্ণ  খণ্ডতে অধিক আত্মনিৰ্ভৰশীলতাই আগবাঢ়ি যোৱাৰ একমাত্ৰ পথ আৰু প্ৰতিটো ক্ষেত্ৰতে  ডাঙৰ পদক্ষেপ গ্ৰহণ কৰা হৈছে।

সাম্প্ৰতিক সংকটৰ অৰ্থনৈতিক প্ৰভাৱৰ বিষয়ে মূল্যায়ন কৰি প্ৰধানমন্ত্ৰীয়ে স্বীকাৰ কৰে যে এই সংঘাতে সমগ্ৰ বিশ্বৰ অৰ্থনীতিক কঁপাইছে আৰু পশ্চিম এছিয়াত হোৱা ক্ষতিৰ পৰা উদ্ধাৰ হ’বলৈ যথেষ্ট সময় লাগিব।

তেওঁ কয় যে ভাৰতৰ ওপৰত বিৰূপ প্ৰভাৱ কম কৰাৰ বাবে নিৰন্তৰ প্ৰচেষ্টা চলোৱা হৈছে।  ৰাষ্ট্ৰৰ শক্তিশালী অৰ্থনৈতিক মৌলিকতা আৰু দ্ৰুতগতিত বিকশিত হোৱা পৰিস্থিতিৰ ওপৰত চৰকাৰে ২৪ ঘণ্টাই নিৰীক্ষণ কৰি আছে।  আমদানি আৰু ৰপ্তানিৰ সৈতে জড়িত প্ৰত্যাহ্বানসমূহৰ মূল্যায়ন তথা  মোকাবিলা কৰিবলৈ নিয়মিতভাৱে বৈঠকত মিলিত হোৱা এটা আন্তঃমন্ত্ৰালয়ৰ গোট গঠনৰ বিষয়ে সদনক অৱগত কৰে প্ৰধানমন্ত্ৰীয়ে। ক’ভিড-১৯ মহামাৰীৰ সময়ত গঠন হোৱা সাতটা নতুন ক্ষমতাসম্পন্ন গোট গঠনৰ বিষয়ে , যোগান শৃংখল, পেট্ৰ’ল-ডিজেল, সাৰ, গেছ আৰু মুদ্ৰাস্ফীতিৰ ক্ষেত্ৰত দ্ৰুত তথা  সুদূৰপ্ৰসাৰী ব্যৱস্থা গ্ৰহণ কৰাৰ বিষয়েও প্ৰধানমন্ত্ৰীয়ে  সদনক অৱগত কৰে।  প্ৰধানমন্ত্ৰীয়ে কয় যে মই সম্পূৰ্ণ বিশ্বাসী যে এই ভাগ-বাটোৱাৰা কৰা সমন্বিত প্ৰচেষ্টাৰ জৰিয়তে আমি এই পৰিস্থিতিসমূহ অধিক ফলপ্ৰসূভাৱে  জয়  কৰিবলৈ সক্ষম হ’ম। কৃষি খণ্ডৰ প্ৰসংগ উল্লেখ  কৰি প্ৰধানমন্ত্ৰী মোদীয়ে দেশবাসীক আশ্বাস দিয়ে যে আগন্তুক বীজ সিঁচাৰ বতৰত কৃষকসকলে যাতে সাৰৰ পৰ্যাপ্ত যোগান লাভ কৰে তাৰ বাবে চৰকাৰে সকলো প্ৰচেষ্টা চলাইছে। এই বিষয়ত  ইতিমধ্যে সকলো প্ৰয়োজনীয় প্ৰস্তুতি চলি আছে। শ্ৰী মোদীয়ে দৃঢ়তাৰে কয় যে, “মই এই দেশৰ কৃষকসকলক পুনৰবাৰ আশ্বস্ত কৰিব বিচাৰো যে চৰকাৰে প্ৰতিটো প্ৰত্যাহ্বানৰ সমাধান বিচাৰি তেওঁলোকৰ সৈতে দৃঢ়তাৰে থিয় দিছে আৰু কোনো সংকটৰ কোনো বোজা যাতে কৃষকৰ  কান্ধত নপৰে সেয়া আমাৰ অটল প্ৰতিশ্ৰুতি হৈয়েই আছে।”সদনক সম্বোধন কৰি প্ৰধানমন্ত্ৰীয়ে উল্লেখ কৰে যে আগন্তুক সময়ছোৱা দেশৰ বাবে এক উল্লেখযোগ্য পৰীক্ষাৰ সময় আৰু ইয়াক জয় কৰাৰ  বাবে ৰাজ্যসমূহৰ সহযোগিতা অপৰিহাৰ্য হ’ব। তেওঁ সকলো ৰাজ্য চৰকাৰক আহ্বান জনায় যে প্ৰধানমন্ত্ৰী গৰীব কল্যাণ অন্ন যোজনাৰ সুবিধাসমূহ যাতে সময়মতে হিতাধিকাৰীসকলৰ ওচৰলৈ যায় তাৰ ব্যৱস্থা কৰিব লাগিব। এই সংকটে দৰিদ্ৰ, শ্ৰমিক, আৰু প্ৰব্ৰজিত শ্ৰমিকসকলক অসমতাপূৰ্ণভাৱে প্ৰভাৱান্বিত কৰিছে। প্ৰব্ৰজিত শ্ৰমিকসকলে সন্মুখীন হোৱা অসুবিধাসমূহৰ সমাধানৰ বাবে সক্ৰিয় পদক্ষেপ গ্ৰহণ কৰাৰ বাবে  ৰাজ্য চৰকাৰসমূহক বিশেষ নিৰীক্ষণ ব্যৱস্থা গঢ়ি তুলিবলৈ  আহ্বান জনাই তেওঁ লগতে সতৰ্ক কৰি  যে এনে সময়ত ক’লা ব্যৱসায়ী আৰু মজুতকাৰীসকল  অতি সক্ৰিয় হোৱাৰ প্ৰৱণতা থাকে। য’তেই এনে অভিযোগ উত্থাপন হয় তাতেই ক্ষিপ্ৰ ব্যৱস্থা গ্ৰহণ কৰিবলৈ তেওঁ ৰাজ্যসমূহক  আহ্বান জনায়। প্ৰধানমন্ত্ৰী মোদীয়ে মন্তব্য কৰে যে অত্যাৱশ্যকীয় সামগ্ৰীৰ নিৰৱচ্ছিন্ন যোগান প্ৰতিখন ৰাজ্যৰ বাবে সৰ্বোচ্চ অগ্ৰাধিকাৰ হ’ব লাগিব আৰু মই সকলো ৰাজ্য চৰকাৰক আন্তৰিকতাৰে আহ্বান জনাইছো যে ইয়াক নিশ্চিত কৰাৰ বাবে বিশেষ ব্যৱস্থা  গ্ৰহণ  কৰক।

সমবায় ফেডাৰেলিজমৰ মনোভাৱক প্ৰশংসা কৰি প্ৰধানমন্ত্ৰীয়ে সকলো ৰাজ্য চৰকাৰক আহ্বান জনায় যে সংকটৰ পৰিসৰ যিয়েই নহওক , ভাৰতৰ শক্তিশালী বৃদ্ধিৰ গতি যাতে বজাই ৰাখিব পাৰি তাৰ  বাবে  প্ৰতিটো প্ৰয়োজনীয় পদক্ষেপ তথা  প্ৰয়োজনীয় প্ৰতিটো সংস্কাৰ দ্ৰুতগতিত ৰূপায়ণ কৰিব লাগিব । কোভিড-১৯ মহামাৰীৰ সময়ত প্ৰদৰ্শিত  দৃষ্টান্তমূলক টিম ইণ্ডিয়া মনোভাৱৰ কথা  স্মৰণ কৰি  প্ৰধানমন্ত্ৰীয়ে কয় যে  যেতিয়া কেন্দ্ৰ আৰু ৰাজ্যসমূহে বিভিন্ন ৰাজনৈতিক দলৰ দ্বাৰা পৰিচালিত হোৱাৰ পিছতো পৰীক্ষা, টিকাকৰণ তথা অত্যাৱশ্যকীয় সামগ্ৰীৰ যোগানৰ ক্ষেত্ৰত নিৰৱচ্ছিন্নভাৱে সহযোগিতা কৰিছিল। প্ৰধানমন্ত্ৰীয়ে কয় যে এই একে মনোভাৱেৰেই এতিয়া  দেশক  পথ প্ৰদৰ্শন কৰিব লাগিব। শ্ৰী মোদীয়ে দৃঢ়তাৰে কয় যে সকলো ৰাজ্য চৰকাৰ আৰু কেন্দ্ৰীয় চৰকাৰৰ সন্মিলিত প্ৰচেষ্টাত দেশখনে এই ভয়াৱহ বিশ্ব সংকটৰ ফলপ্ৰসূভাৱে মোকাবিলা কৰিবলৈ সক্ষম হ’ব। তেওঁ কয়-  আমি একেটা টিম ইণ্ডিয়াৰ মনোভাৱক আগুৱাই নিব লাগিব।

প্ৰত্যাহ্বানৰ অনন্য প্ৰকৃতিৰ বিষয়ে উল্লেখ  কৰি প্ৰধানমন্ত্ৰীয়ে লক্ষ্য কৰে  যে এই সংকট এক সুকীয়া ধৰণৰ আৰু ইয়াৰ বাবে অনুৰূপভাৱে সুকীয়া চৰিত্ৰৰ সমাধানৰো প্ৰয়োজন। প্ৰধানমন্ত্ৰী মোদীয়ে কয় যে আমি প্ৰতিটো প্ৰত্যাহ্বানৰ সন্মুখীন হ’ব লাগিব ধৈৰ্য্য, সংযম, আৰু শান্ত মনেৰে।ভাষণৰ সামৰণিত প্ৰধানমন্ত্ৰীয়ে এই মুহূৰ্তলৈ পৰিস্থিতি সলনি হৈ থকা বুলি স্বীকাৰ কৰি ভাৰতৰ নাগৰিকসকলক প্ৰতিটো পৰিঘটনাৰ বাবে সাজু হৈ থাকিবলৈ আহ্বান জনায়। এই যুদ্ধৰ বিৰূপ প্ৰভাৱ দীৰ্ঘদিন ধৰি থকাৰ সম্ভাৱনা অতি বেছি বুলি সতৰ্ক কৰি দি  তেওঁ দেশক সহায়ৰ  দৃঢ় আশ্বাস প্ৰদান কৰে। প্ৰধানমন্ত্ৰী শ্ৰী নৰেন্দ্ৰ মোদীয়ে দৃঢ়তাৰে কয়, “চৰকাৰ সজাগ, ই সাজু, আৰু ই নিজৰ কৌশল প্ৰণয়ন কৰি আছে তথা  প্ৰতিটো সিদ্ধান্ত অত্যন্ত  গুৰুত্বসহকাৰে গ্ৰহণ কৰি আছে। এই দেশৰ জনসাধাৰণৰ কল্যাণ আমাৰ বাবে সৰ্বোচ্চ বিষয়; এয়াই আমাৰ পৰিচয় আৰু এয়াই আমাৰ শক্তি।”

Speaking in the Rajya Sabha. https://t.co/NAcbZLZq7P

— Narendra Modi (@narendramodi) March 24, 2026

****

MJPS/PRK