પીએમઇન્ડિયા

પ્રધાનમંત્રી શ્રી નરેન્દ્ર મોદીએ ફ્રાન્સના રાષ્ટ્રપતિ મહામહિમ શ્રી ઇમેન્યુઅલ મેક્રોન સાથે આજે પેરિસમાં યુરોપના સૌથી મોટા ટેકનોલોજી અને સ્ટાર્ટ–અપ કાર્યક્રમ ‘વિવાટેક 2026’ માં ભાગ લીધો હતો.

ટેક–ઉદ્યોગસાહસિકો, સ્ટાર્ટ–અપ્સ, રોકાણકારો અને વ્યવસાયિક અગ્રણીઓની સભાને સંબોધિત કરતા, પ્રધાનમંત્રીએ માનવ–કેન્દ્રિત એઆઈ (AI) અને ફ્રન્ટિયર ટેકનોલોજી (અદ્યતન તકનીકો) માટેના ભારતના વિઝન તેમજ ઊભરતી ટેકનોલોજીમાં ભારત–ફ્રાન્સ વચ્ચે વધી રહેલા સહયોગ પર પ્રકાશ પાડ્યો હતો. તેમણે નોંધ્યું હતું કે ટેકનોલોજીએ ભારતમાં ડિજિટલ પેમેન્ટ્સ, એઆઈ–સક્ષમ કૃષિ પ્રગતિથી લઈને અત્યાધુનિક સ્પેસ એપ્લિકેશન્સ સુધીના પરિવર્તનકારી ફેરફારોને સક્ષમ બનાવ્યા છે. મુખ્ય સંબોધન (કીનોટ એડ્રેસ) પછી, પ્રધાનમંત્રી મોદી અને રાષ્ટ્રપતિ મેક્રોને ઉદ્યોગ, આરોગ્ય સંભાળ, ટકાઉપણું (સસ્ટેનેબિલિટી) અને ગતિશીલતા (મોબિલિટી) માટે અદ્યતન ટેકનોલોજી અને વ્યવહારુ ઉકેલો પ્રદર્શિત કરતા ભારતીય સ્ટાર્ટ–અપ્સ અને ઇનોવેટર્સ સાથે સંવાદ કર્યો હતો.

ભારત વિવાટેક 2026 માં ‘એઆઈ કન્ટ્રી પાર્ટનર’ (AI Country Partner) છે. વિવાટેક ખાતે આ ભારતની અત્યાર સુધીની સૌથી મોટી ઉપસ્થિતિ પણ છે, જ્યાં આર્ટિફિશિયલ ઇન્ટેલિજન્સ, ડિજિટલ પબ્લિક ઇન્ફ્રાસ્ટ્રક્ચર, હેલ્થ–ટેક, ક્લીન ટેકનોલોજી, મોબિલિટી, એડવાન્સ કમ્પ્યુટિંગ વગેરેમાં તેની ઇનોવેશન ઇકો–સિસ્ટમને પ્રદર્શિત કરવા માટે પેવેલિયન સ્થાપિત કરવામાં આવ્યા છે. આ ઇવેન્ટમાં 80થી વધુ ભારતીય ડીપ–ટેક કંપનીઓ અને સ્ટાર્ટ–અપ્સ ભાગ લઈ રહ્યા છે.

વિવાટેકમાં પ્રધાનમંત્રીની સહભાગિતાથી ભારતીય અને ફ્રેન્ચ ટેકનોલોજી ઇકો–સિસ્ટમ વચ્ચેની ભાગીદારી વધુ ગાઢ બનવાની અપેક્ષા છે. વર્ષોથી વિવાટેક સાથે ભારતનું જોડાણ સતત વધી રહ્યું છે: પ્રધાનમંત્રી શ્રી નરેન્દ્ર મોદીએ 2021 માં વિવાટેક ખાતે મુખ્ય સંબોધન આપ્યું હતું; ભારત 2022 માં વિવાટેક ખાતે પ્રથમ ‘કન્ટ્રી ઓફ ધ યર’ (Country of the Year) બન્યું હતું; અને વિવાટેકે તાજેતરમાં જ બેંગલુરુ ટેક સમિટ સાથે સહયોગને ઔપચારિક સ્વરૂપ આપ્યું છે. ભારત દ્વારા આ વર્ષની સહભાગિતા વિશેષ મહત્વ ધરાવે છે કારણ કે બંને દેશો વર્ષ 2026ને ‘ભારત–ફ્રાન્સ ઇનોવેશન વર્ષ’ તરીકે ઉજવી રહ્યા છે.

SM/DK/JD