প্ৰধানমন্ত্ৰী শ্ৰী নৰেন্দ্ৰ মোদীয়ে আজি চত্তীশগড়ৰ বাস্তাৰৰ কৰণপুৰস্থিত কোব্ৰা অপাৰেচন বেছ পৰিদৰ্শন কৰে। বাস্তাৰ আৰু আবুঝমাড় অঞ্চলত নক্সালবাদ বিৰোধী অভিযানৰ বাবে এই ঘাটিটো প্ৰশিক্ষণ কেন্দ্ৰ তথা অভিযান আৰম্ভ কৰাৰ মূল ঘাটি হিচাপে ব্যৱহাৰ কৰা হৈছিল। দীপাৱলী উপলক্ষে নিৰাপত্তা বাহিনীৰ জোৱানসকলৰ সৈতে উৎসৱ উদযাপন কৰাৰ উদ্দেশ্যে প্ৰধানমন্ত্ৰীয়ে এই ঘাটি পৰিদৰ্শন কৰে।
সমগ্ৰ দেশৰ লগতে বিশ্বৰ বিভিন্ন প্ৰান্তত কোটি কোটি ভাৰতীয়ই নিজৰ আপোনজনৰ সৈতে পোহৰৰ পৱিত্ৰ উৎসৱ দীপাৱলী উদযাপন কৰাৰ সময়তে প্ৰধানমন্ত্ৰীগৰাকীয়ে জোৱানসকলক সম্বোধন কৰে। ভাষণত তেওঁ হিমালয়ৰ কাৰ্গিল আৰু লেপচাৰ পৰা সাগৰৰ পাৰৰ ছাৰ ক্ৰিকলৈকে তথা সাগৰৰ বুকুত থকা আই এন এছ বিক্ৰান্তৰ বীৰ জোৱানসকলৰ সৈতে উদযাপন কৰা দীপাৱলীৰ কথা স্মৰণ কৰে। শ্ৰী মোদীয়ে কয়, “সীমান্তত আৰু দেশৰ ভিতৰত ৰাষ্ট্ৰক সুৰক্ষা প্ৰদান কৰা প্ৰহৰীসকল, ভাৰত মাতাৰ বীৰ সন্তানস্বৰূপ আপোনালোক সকলোৱেই মোৰ আপোনজন, আপোনালোক সকলোৱেই মোৰ পৰিয়ালৰ অংশ।”
২০২৬ চনৰ দীপাৱলীক প্ৰকৃতাৰ্থত বিশেষ বুলি অভিহিত কৰি প্ৰধানমন্ত্ৰীয়ে কয় যে মাওবাদী সন্ত্ৰাসৰ বিৰুদ্ধে দশকজোৰা যুঁজত ভাৰতে বিজয় সাব্যস্ত কৰাৰ পাছত এয়া দেশৰ প্ৰথম দীপাৱলী। দেশৰ প্ৰতিখন জিলা নক্সালবাদৰ পৰা মুক্ত হৈছে আৰু কোটি কোটি নাগৰিকে নক্সালবাদৰ ভয়ক পৰাস্ত কৰিবলৈ সক্ষম হৈছে।
এই অসাধাৰণ সফলতা সম্ভৱ কৰি তোলা লাখ লাখ নিৰাপত্তাৰক্ষীৰ সৈতে এই ঐতিহাসিক ক্ষণ উদযাপন কৰিবলৈ আৰু ১৪০ কোটি দেশবাসীৰ হৈ তেওঁলোকৰ প্ৰতি কৃতজ্ঞতা প্ৰকাশ কৰিবলৈ বাস্তাৰলৈ অহা বুলি প্ৰধানমন্ত্ৰীয়ে উল্লেখ কৰে।
প্ৰধানমন্ত্ৰী মোদীয়ে কয়, “আজি মই আপোনালোকৰ ত্যাগ, সমৰ্পণ আৰু সেৱাৰ মনোভাৱৰ প্ৰতি কৃতজ্ঞতা প্ৰকাশ কৰিবলৈ আহিছোঁ।”প্ৰাচীন সংস্কৃত বাণী ‘আভ্যন্তৰং ভয়ং ৰক্ষ্যম্, অসাৰং বাহ্যতো ভয়ম্’ ৰ উদ্ধৃতি দি প্ৰধানমন্ত্ৰীয়ে কয় যে এখন ৰাষ্ট্ৰৰ আভ্যন্তৰীণ নিৰাপত্তা শক্তিশালী হ’লে বাহিৰৰ শত্ৰুৱে দেশখনৰ কোনো ক্ষতি কৰিব নোৱাৰে। কিন্তু আভ্যন্তৰীণ নিৰাপত্তা দুৰ্বল হ’লে বাহিৰৰ শত্ৰুৱেও মূৰ দাঙি উঠিবলৈ সাহস কৰে।
প্ৰধানমন্ত্ৰীয়ে সীমান্তত নিয়োজিত সশস্ত্ৰ বাহিনীৰ সৈতে দেশৰ ভিতৰত নিৰাপত্তা বাহিনীৰ ভূমিকাৰ তুলনা কৰি চি আৰ পি এফ, কোব্ৰা, বি এছ এফ, আই টি বি পি, এছ এছ বি, আই আৰ বি, ৰাজ্যিক আৰক্ষী বাহিনী, বাস্তাৰ ফাইটাৰ্ছৰ কমাণ্ডো আৰু মহিলা যোদ্ধাসকলৰ অপৰিসীম ত্যাগৰ প্ৰশংসা কৰে। লগতে দেশৰ সীমান্তত নিয়োজিত সৈনিকসকলকো উৎসৱৰ শুভেচ্ছা জ্ঞাপন কৰে।
শ্ৰী মোদীয়ে কয়, “আপোনালোকৰ সেৱাৰ বাবে দেশ আপোনালোকৰ ওচৰত ঋণী আৰু কোটি কোটি দেশবাসীয়ে আপোনালোকক লৈ গৌৰৱ কৰে।”
প্ৰধানমন্ত্ৰীয়ে নক্সালবাদৰ ভয়াৱহ সময়ছোৱাৰ কথা স্মৰণ কৰি কয় যে বিহাৰ, মহাৰাষ্ট্ৰ, ওড়িশা, উত্তৰ প্ৰদেশ, মধ্যপ্ৰদেশ আৰু চত্তীশগড়কে ধৰি প্ৰায় ২০খন ৰাজ্যৰ ২৩০খনতকৈও অধিক জিলা বাওঁপন্থী উগ্ৰবাদৰ কবলত আছিল।
সেই সময়ত সন্ধিয়া হোৱাৰ লগে লগে ভয় আৰু আতংকৰ পৰিৱেশে বিৰাজ কৰিছিল। নক্সালবাদীসকলে মানুহৰ ভোটাধিকাৰ কাঢ়ি লৈছিল। বছৰি প্ৰায় দুই হাজাৰ পৰ্যন্ত আক্ৰমণ সংঘটিত হৈছিল।কেৱল চত্তীশগড়তে এহাজাৰতকৈও অধিক নিৰাপত্তাৰক্ষীয়ে দেশৰ বাবে প্ৰাণ আহুতি দিছিল। আই ই ডি বিস্ফোৰণত অসংখ্য জোৱানে হাত-ভৰি হেৰুৱাবলগীয়া হৈছিল।
২০১০ চনত দান্তেৱাড়াত সংঘটিত পৃথক দুটা ঘটনাত চি আৰ পি এফৰ ৭৬গৰাকী জোৱান আৰু ৪৪গৰাকী নিৰ্দোষী নাগৰিক নিহত হোৱাৰ ঘটনাৰ কথাও প্ৰধানমন্ত্ৰীয়ে উল্লেখ কৰে।
তেওঁ কয় যে ২০০৪ চনৰ পৰা ২০১৩ চনলৈ প্ৰতিবছৰে যিমানসংখ্যক নক্সালবাদী নিহত হৈছিল, তাতোকৈ অধিকসংখ্যক নিৰাপত্তাৰক্ষী শ্বহীদ হৈছিল। ইয়াৰ ফলত মাওবাদী সংগঠনসমূহৰ নেতাসকল অধিক উৎসাহিত হৈ পৰিছিল। দেশৰ শত্ৰুৰ বিৰুদ্ধে নিষ্ক্ৰিয় মনোভাৱেৰে কোনো ৰাষ্ট্ৰই উন্নতি কৰিব নোৱাৰে বুলি উল্লেখ কৰি প্ৰধানমন্ত্ৰীয়ে কয় যে দৃঢ় মনোবল আৰু সুপৰিকল্পিত কৌশলেৰে শত্ৰুক পৰাস্ত কৰিব লাগিব।
তেওঁ কয় যে ২০১৪ চনৰ পাছত এই দশকজোৰা পৰিস্থিতিৰ পৰিৱৰ্তন ঘটিবলৈ আৰম্ভ কৰে। নিৰাপত্তা বাহিনীৰ অধিক সংখ্যক লোকৰ মৃত্যুৰ ধাৰা বন্ধ কৰি এক ঐতিহাসিক সফলতা অৰ্জন কৰা হৈছে। বিগত এবছৰত কৰ্তব্যৰত অৱস্থাত চি আৰ পি এফৰ এজনো জোৱানে প্ৰাণ হেৰুৱাবলগীয়া হোৱা নাই। ৪৭ বছৰৰ ভিতৰত এয়া প্ৰথম ঘটনা।
শ্ৰী মোদীয়ে কয়, “এয়া দেশৰ সঠিক নীতি আৰু দৃঢ় ইচ্ছাশক্তিৰ বিজয়। এয়া আপোনালোকৰ বীৰত্ব, সাহস আৰু সংযমৰো বিজয়।”
সঠিক উদ্দেশ্য আৰু সঠিক নীতি অবিহনে সফলতা সম্ভৱ নহয় বুলি উল্লেখ কৰি প্ৰধানমন্ত্ৰীয়ে কয় যে ৰাষ্ট্ৰীয় নিৰাপত্তাৰ স্বাৰ্থত চৰকাৰে এটাৰ পাছত এটাকৈ কঠোৰ সিদ্ধান্ত গ্ৰহণ কৰিছে। ইয়াৰে কেইবাটাও সিদ্ধান্তৰ বিষয়ে আজিও ৰাজহুৱাভাৱে প্ৰকাশ কৰা হোৱা নাই।
এই সিদ্ধান্তসমূহৰ জৰিয়তে নক্সালবাদী আৰু বিচ্ছিন্নতাবাদী সংগঠনসমূহৰ পুঁজি যোগান ব্যৱস্থাত বৃহৎ আঘাত হনা হৈছে আৰু জাল মুদ্ৰাৰ চক্ৰ ধ্বংস কৰা হৈছে। প্ৰধানমন্ত্ৰীয়ে কয় যে ইয়াৰ ফলত কেৱল তেওঁলোকৰ আৰ্থিক মেৰুদণ্ডই ভাঙি পৰা নাই, বৰং সমগ্ৰ যোগান ব্যৱস্থাও স্তব্ধ হৈ পৰিছে। ফলত অস্ত্ৰ-শস্ত্ৰৰ যোগান বন্ধ হোৱাৰ লগতে নক্সালবাদীসকলৰ চলাচল আৰু নতুন সদস্য নিযুক্তিৰ ওপৰতো বাধা আৰোপ কৰা সম্ভৱ হৈছে। প্ৰধানমন্ত্ৰীয়ে কয় যে তেওঁৰ চৰকাৰে নিৰাপত্তা বাহিনীক প্ৰয়োজনীয় সকলো সিদ্ধান্ত গ্ৰহণ কৰাৰ পূৰ্ণ স্বাধীনতা প্ৰদান কৰিছে।
কোনো মাতৃৰ কোলাই যাতে উদং নহয়, কোনো পৰিয়াল ধ্বংসৰ সন্মুখীন নহয় আৰু কোনো যুৱকে যাতে অস্ত্ৰ হাতত তুলি হিংসাৰ পথ বাছি ল’বলগীয়া নহয়, সেই একমাত্ৰ লক্ষ্যৰে চৰকাৰে কোনো প্ৰচাৰ বা লোকক দেখুওৱা কাম নকৰাকৈ নিৰন্তৰ কাম কৰি আহিছে বুলিও তেওঁ উল্লেখ কৰে।
সংবেদনশীলতাৰে নিৰাপত্তা অভিযান চলোৱাৰ লগতে জনসেৱাৰ মনোভাৱেৰে নক্সালবাদী সন্ত্ৰাসৰ মেৰুদণ্ড ভাঙি পেলোৱা হৈছে। ইয়াৰ ফলত নক্সালবাদৰ দ্বাৰা ক্ষতিগ্ৰস্ত জনসাধাৰণেও চৰকাৰ আৰু নিৰাপত্তা বাহিনীৰ কাষত দৃঢ়তাৰে থিয় দিছে। অনুষ্ঠানত উপস্থিত থকা স্থানীয় নাগৰিকসকলৰ গুৰুত্বপূৰ্ণ সহযোগিতাৰ বাবেও প্ৰধানমন্ত্ৰীয়ে তেওঁলোকক ধন্যবাদ জনায়।
প্ৰধানমন্ত্ৰী মোদীয়ে কয়, “সেৱাৰ মনোভাৱেৰে আমি নক্সালবাদী প্ৰভাৱান্বিত অঞ্চলসমূহৰ জনসাধাৰণৰ জীৱনলৈ পৰিৱৰ্তন আনিছোঁ।”‘ৰাষ্ট্ৰ প্ৰথম’ৰ মনোভাৱেৰে কাম কৰিলে দেশত শান্তি আৰু নিৰাপত্তা সুনিশ্চিত হোৱাৰ লগতে উন্নয়নৰ নতুন শিখৰ স্পৰ্শ কৰিব পৰা যায় আৰু দৰিদ্ৰ তথা বঞ্চিত লোকসকলৰ ৰাষ্ট্ৰীয় উন্নয়নত অংশগ্ৰহণৰ সুযোগ বৃদ্ধি পায় বুলি প্ৰধানমন্ত্ৰীয়ে মন্তব্য কৰে।
বিগত ১২ বছৰত দেশে কেৱল নক্সালবাদ আৰু বিচ্ছিন্নতাবাদৰ বিৰুদ্ধে যুঁজতেই বিজয় সাব্যস্ত কৰা নাই, দৰিদ্ৰতাৰ বিৰুদ্ধেও এক বৃহৎ যুঁজত জয়লাভ কৰিছে বুলি তেওঁ উল্লেখ কৰে। শ্ৰী মোদীয়ে কয়, “বিগত ১২ বছৰত দেশে কেৱল নক্সালবাদ আৰু বিচ্ছিন্নতাবাদৰ বিৰুদ্ধে যুঁজত জয়লাভ কৰাই নহয়, দৰিদ্ৰতাৰ বিৰুদ্ধেও এক বৃহৎ যুঁজত বিজয় সাব্যস্ত কৰিছে।”
দীপাৱলীৰ ঠিক পূৰ্বে প্ৰকাশ পোৱা বিশ্ব বেংকৰ প্ৰতিবেদনৰ কথা উল্লেখ কৰি প্ৰধানমন্ত্ৰীয়ে কয় যে বিগত ১২ বছৰত ভাৰতৰ ৫০ কোটি লোক চৰম দৰিদ্ৰতাৰ পৰা ওলাই আহিবলৈ সক্ষম হৈছে। বিগত ১২ বছৰত ভাৰতৰ কল্যাণমূলক আঁচনিসমূহৰ সমন্বয়ক দীপাৱলীৰ ৰংগোলীৰ সৈতে তুলনা কৰি প্ৰধানমন্ত্ৰীয়ে কয় যে ৰংগোলীৰ সৰু সৰু আঁচসমূহ একেলগ হৈ এখন সুন্দৰ ছবি গঢ়ি তোলাৰ দৰে চৰকাৰৰ বিভিন্ন আঁচনিয়েও দৰিদ্ৰ লোকসকলৰ জীৱনলৈ সামগ্ৰিক পৰিৱৰ্তন আনিছে।
তেওঁ উল্লেখ কৰে যে জনধন যোজনাৰ জৰিয়তে কোটি কোটি লোকক বেংকিং ব্যৱস্থাৰ সৈতে সংযুক্ত কৰা হৈছে। প্ৰধানমন্ত্ৰী আৱাস যোজনাৰ জৰিয়তে কোটি কোটি পৰিয়ালে পকী ঘৰ লাভ কৰিছে। মুদ্ৰা যোজনাৰ অধীনত জামিন অবিহনে ঋণ প্ৰদান কৰা হৈছে। স্বনিধি যোজনাৰ জৰিয়তে পদপথৰ ক্ষুদ্ৰ ব্যৱসায়ীসকলক সহায় আগবঢ়োৱা হৈছে, যাতে তেওঁলোকে নিজৰ ব্যৱসায় সম্প্ৰসাৰণ কৰিব পাৰে।
আয়ুষ্মান ভাৰতৰ জৰিয়তে দৰিদ্ৰ লোকসকলে বিনামূলীয়া চিকিৎসাৰ সুবিধা লাভ কৰিছে। কোটি কোটি পৰিয়ালক প্ৰতিমাহে বিনামূলীয়া ৰেচন প্ৰদান কৰা হৈছে। শিশুসকলৰ শিক্ষাৰ বাবেও বিভিন্ন নীতি গ্ৰহণ কৰা হৈছে। স্বচ্ছ ভাৰত অভিযান আৰু হৰ ঘৰ জলৰ দৰে আঁচনিয়ে জনসাধাৰণৰ জীৱনৰ মৌলিক সমস্যাসমূহ দূৰ কৰাত সহায় কৰিছে। এই সকলোবোৰ আঁচনিৰ জৰিয়তে দৰিদ্ৰ পৰিয়ালসমূহৰ বাবে বিনামূলীয়া ঔষধ, বিনামূলীয়া শিক্ষা আৰু খাদ্যৰ ব্যৱস্থা সুনিশ্চিত কৰা হৈছে।
প্ৰধানমন্ত্ৰীয়ে কয় যে ইয়াৰ ফলত পূৰ্বে প্ৰজন্মৰ পাছত প্ৰজন্ম ধৰি দৰিদ্ৰতাত জীৱন কটোৱা পৰিয়ালসমূহে এতিয়া এক উন্নত ভৱিষ্যতৰ ভেটি লাভ কৰিছে। যিসকলৰ জীৱন কেৱল চিন্তা আৰু উদ্বিগ্নতাৰ মাজতে পাৰ হৈছিল, তেওঁলোকৰ মাজত এতিয়া চৰকাৰৰ প্ৰতি আস্থা আৰু নতুন আত্মবিশ্বাসৰ সৃষ্টি হৈছে।
শ্ৰী মোদীয়ে কয়, “যিবোৰ দৰিদ্ৰ পৰিয়ালৰ সমগ্ৰ জীৱন কেৱল চিন্তাৰ মাজতে পাৰ হৈছিল, সেই পৰিয়ালসমূহে এতিয়া চৰকাৰৰ আশ্বাস লাভ কৰিছে আৰু তেওঁলোকৰ মাজত নতুন আত্মবিশ্বাসৰ সৃষ্টি হৈছে।”
দৰিদ্ৰতাৰ বিৰুদ্ধে এই সফলতাৰ সৈতে নক্সালবাদৰ বিৰুদ্ধে চলোৱা যুঁজৰ গভীৰ সম্পৰ্ক আছে বুলি উল্লেখ কৰি প্ৰধানমন্ত্ৰীয়ে কয় যে নক্সালবাদীসকলে পূৰ্বে বিদ্যালয়, চিকিৎসালয়, ঔষধৰ দোকান, পলিঅ’ প্ৰতিষেধক প্ৰদান, মোবাইল টাৱাৰ আৰু উদ্যোগ স্থাপনত বাধা প্ৰদান কৰিছিল। আনকি ৰে’লপথত বোমা বিস্ফোৰণ ঘটাই উন্নয়নৰ পথো ৰুদ্ধ কৰিছিল। ইয়াৰ ফলত লাখ লাখ নিৰ্দোষী নাগৰিক উন্নয়নৰ সুযোগৰ পৰা বঞ্চিত হৈ দৰিদ্ৰতাৰ মাজতে জীৱন অতিবাহিত কৰিবলৈ বাধ্য হৈছিল।
সেইবাবে নক্সালবাদৰ বিৰুদ্ধে যুঁজ আৰম্ভ কৰাৰ লগতে নক্সালবাদী প্ৰভাৱান্বিত অঞ্চলসমূহৰ উন্নয়নৰ বাবেও বিশেষ অভিযান আৰম্ভ কৰা হৈছিল বুলি প্ৰধানমন্ত্ৰীয়ে উল্লেখ কৰে।
এই অভিযানৰ অধীনত বাওঁপন্থী উগ্ৰবাদ প্ৰভাৱান্বিত অঞ্চলসমূহত ১৫ হাজাৰ কিলোমিটাৰতকৈও অধিক পথ নিৰ্মাণ কৰা হৈছে। লগতে ৯ হাজাৰ ৫০০টাতকৈও অধিক মোবাইল টাৱাৰ স্থাপন কৰা হৈছে। জনজাতীয় শিশুসকলৰ শিক্ষাৰ বাবে প্ৰায় ১৭৫খন একলব্য বিদ্যালয়, যুৱক-যুৱতীসকলৰ কৰ্মসংস্থাপনৰ বাবে প্ৰায় ৫০খন ঔদ্যোগিক প্ৰশিক্ষণ প্ৰতিষ্ঠান (আই টি আই) আৰু প্ৰায় ৫০টা দক্ষতা বিকাশ কেন্দ্ৰ স্থাপন কৰা হৈছে। ইয়াৰ উপৰি হাজাৰ হাজাৰ ডাকঘৰ, বেংকৰ শাখা আৰু এটিএম স্থাপন কৰা হৈছে।
প্ৰধানমন্ত্ৰী জনমন যোজনাৰ জৰিয়তে অতি পিছপৰা জনজাতীয় অঞ্চলসমূহৰ উন্নয়নৰ বিশেষ ব্যৱস্থা গ্ৰহণ কৰা হৈছে। এই আঁচনিৰ অধীনত হাজাৰ হাজাৰ দুৰ্গম গাঁৱত প্ৰথমবাৰৰ বাবে খোৱাপানী, বিদ্যুৎ আৰু পথৰ দৰে মৌলিক সুবিধা উপলব্ধ কৰা হৈছে। আত্মসমৰ্পণ কৰা নক্সালবাদীসকলৰ পুনৰ সংস্থাপনৰ বাবেও বিভিন্ন আঁচনি গ্ৰহণ কৰা হৈছে।
প্ৰধানমন্ত্ৰী মোদীয়ে কয়, “আমি যেতিয়া নক্সালবাদৰ বিৰুদ্ধে যুঁজ আৰম্ভ কৰিছিলোঁ, তেতিয়াই নক্সালবাদী প্ৰভাৱিত অঞ্চলসমূহৰ উন্নয়নৰ বাবেও বিশেষ অভিযান আৰম্ভ কৰিছিলোঁ।”‘সবকা সাথ, সবকা বিকাশ’ অভিযানৰ জৰিয়তে দৰিদ্ৰতাৰ বিৰুদ্ধে দেশৰ যুঁজে নতুন শক্তি আৰু আত্মবিশ্বাস লাভ কৰিছে বুলি প্ৰধানমন্ত্ৰীয়ে উল্লেখ কৰে। তেওঁ কয় যে আজি এফালে ৫০ কোটি লোক চৰম দৰিদ্ৰতাৰ পৰা মুক্ত হৈছে, আনফালে দেশত নক্সালবাদী হিংসাৰো অৱসান ঘটিছে।
বাস্তাৰৰ পৰিৱৰ্তনৰ উদাহৰণ দাঙি ধৰি প্ৰধানমন্ত্ৰীয়ে কয় যে আজি সেই একেখন বাস্তাৰতে বাস্তাৰ অলিম্পিক অনুষ্ঠিত হৈছে। এতিয়া শিশুসকলে বন্দুকৰ পৰিৱৰ্তে ক্ৰীড়াৰ ক্ষেত্ৰত নিজৰ প্ৰতিভা প্ৰদৰ্শন কৰিছে।
শ্ৰী মোদীয়ে কয়, “আজি এই বাস্তাৰতে বাস্তাৰ অলিম্পিক অনুষ্ঠিত হৈছে আৰু শিশুসকলে বন্দুকৰ পৰিৱৰ্তে ক্ৰীড়াৰ ক্ষেত্ৰত নিজৰ প্ৰতিভা প্ৰদৰ্শন কৰিছে।” আজিৰ সফলতাসমূহক যাত্ৰাৰ শেষ নহয়, বৰং নতুন লক্ষ্যত উপনীত হোৱাৰ বাবে এক মঞ্চ বুলি অভিহিত কৰি প্ৰধানমন্ত্ৰীয়ে কয় যে দেশৰ নতুন যাত্ৰাই স্বাধীনতা সংগ্ৰামী, সীমান্তত প্ৰাণ আহুতি দিয়া সৈনিক আৰু নক্সালবাদ তথা সন্ত্ৰাসবাদৰ বিৰুদ্ধে যুঁজত জীৱন উৎসৰ্গা কৰা নিৰাপত্তাৰক্ষীসকলৰ শতিকা পুৰণি সপোন বাস্তৱায়িত কৰিব।
‘তেৰা গৌৰৱ অমৰ ৰহে মা, হম দিন চাৰ ৰহেঁ না ৰহেঁ’— এই দেশপ্ৰেমৰ মনোভাৱেৰে জীৱন অতিবাহিত কৰা নিৰাপত্তাৰক্ষীসকলক নতুন আত্মবিশ্বাসেৰে ৰাষ্ট্ৰৰ সেৱাত আগবাঢ়ি যাবলৈ তেওঁ আহ্বান জনায়। প্ৰধানমন্ত্ৰীয়ে কয়, “এতিয়া সময় হৈছে ৰাষ্ট্ৰৰ বাবে জীয়াই থকাৰ আৰু দেশক উন্নয়নৰ নতুন শিখৰলৈ লৈ যোৱাৰ।”
জম্মু-কাশ্মীৰৰ পৰা সংবিধানৰ ৩৭০ নং অনুচ্ছেদ প্ৰত্যাহাৰ, প্ৰতিটো ঘৰতে শৌচাগাৰ নিৰ্মাণ আৰু টিকাকৰণৰ পৰিসৰ বৃদ্ধি কৰাৰ দৰে প্ৰতিশ্ৰুতি পূৰণ কৰাৰ উদাহৰণ দাঙি ধৰি প্ৰধানমন্ত্ৰীয়ে কয় যে দেশে গ্ৰহণ কৰা প্ৰতিটো সংকল্প পূৰণ কৰাৰ সামৰ্থ্য আছে।
তেওঁ নিৰাপত্তা বাহিনী আৰু দেশবাসীৰ ওপৰত সম্পূৰ্ণ আস্থা প্ৰকাশ কৰি কয় যে ভৱিষ্যতেও ভাৰতে দৰিদ্ৰতা নিৰ্মূল, নিচামুক্ত ভাৰত, আত্মনিৰ্ভৰ ভাৰত আৰু বিকশিত ভাৰতৰ লক্ষ্য নিশ্চয়কৈ পূৰণ কৰিব। এই সপোনসমূহ বাস্তৱায়িত কৰিবলৈ সকলোকে একেলগে কাম কৰি যাবলৈ আহ্বান জনাই প্ৰধানমন্ত্ৰীয়ে দেশৰ নিৰাপত্তাৰক্ষীসকলৰ ত্যাগ আৰু পৰিশ্ৰমক বিকশিত ভাৰতৰ ভৱিষ্যৎ নিৰ্মাণৰ শক্তিশালী ভেটি বুলি অভিহিত কৰে।
প্ৰধানমন্ত্ৰী মোদীয়ে কয়, “আপোনালোকৰ ত্যাগ আৰু পৰিশ্ৰম বিকশিত ভাৰতৰ বিশাল ভৱন নিৰ্মাণৰ বাবে এক শক্তিশালী ভেটি হৈ পৰিব।”
ভাষণৰ সামৰণিত প্ৰধানমন্ত্ৰীগৰাকীয়ে নিৰাপত্তা বাহিনীৰ জোৱানসকলক পুনৰ এবাৰ দীপাৱলীৰ আন্তৰিক শুভেচ্ছা জ্ঞাপন কৰে।
A very special Diwali with our brave security forces in Bastar, Chhattisgarh. https://t.co/7I5aOQdMSk
— Narendra Modi (@narendramodi) November 8, 2026
****
MJPS/SS/PRK/DM
A very special Diwali with our brave security forces in Bastar, Chhattisgarh. https://t.co/7I5aOQdMSk
— Narendra Modi (@narendramodi) November 8, 2026
साल 2026 की ये दीवाली वाकई विशेष है! ये पहली दीवाली है- जब देश नक्सलवाद-माओवादी आतंक के खिलाफ दशकों पुरानी लड़ाई जीत चुका है। ये पहली दीवाली है- जब देश का हर जिला नक्सलवाद से मुक्त है। ये पहली दीवाली है- जब करोड़ों देशवासी नक्सलवाद के भय को परास्त कर चुके हैं: PM @narendramodi
— PMO India (@PMOIndia) November 8, 2026
47 साल बाद, पहली बार ऐसा हुआ है जब पिछले एक वर्ष में CRPF के एक भी जवान को duty के दौरान जान नहीं गंवानी पड़ी। ये देश की सही नीतियों और दृढ़ इच्छाशक्ति की जीत है: PM @narendramodi
— PMO India (@PMOIndia) November 8, 2026
हमने सेवा भाव से नक्सल प्रभावित इलाकों में लोगों के जीवन को बदला। इसलिए, नक्सलवाद से पीड़ित लोग भी सरकार और सुरक्षाबलों के साथ मजबूती से खड़े हुए: PM @narendramodi
— PMO India (@PMOIndia) November 8, 2026
आज एक तरफ 50 करोड़ लोग भीषण गरीबी से बाहर आए हैं। दूसरी ओर, देश में नक्सली हिंसा का भी अंत हुआ है: PM @narendramodi
— PMO India (@PMOIndia) November 8, 2026
