পি এম ইণ্ডিয়া

টেকানপুৰস্থিত বিএছএফ একাডেমীত অনুষ্ঠিত ডিজিপি আৰু আইজিপিৰ সন্মিলনৰ সামৰণি অনুষ্ঠানত আজি উপস্থিত থাকে প্ৰধানমন্ত্ৰী শ্ৰী নৰেন্দ্ৰ মোদী৷

২০১৪ৰ পৰা দিল্লীৰ বাহিৰত পাতিবলৈ লোৱাৰ পাছতে সন্মিলনৰ ৰেহ-ৰূপ কিদৰে সলনি হ’ল, সেই কথা উল্লেখ কৰি প্ৰধানমন্ত্ৰীয়ে এই পৰিৱৰ্তনৰ বাবে বিষয়-ববীয়াসকলক প্ৰশংসা কৰে৷ তেওঁ কয় যে সন্মিলনখন এতিয়া অধিক প্ৰাসংগিক হৈ উঠিছে আৰু ইয়াৰ আলোচনাৰ মান উন্নত হৈছে৷

দেশৰ নিৰাপত্তাৰ দায়িত্বত নিয়োজিত সুৰক্ষা বিষয়াসকলক প্ৰশংসা কৰি প্ৰধানমন্ত্ৰীয়ে কয় যে সন্মিলনত গোট খোৱা বিষয়াসকলে বেছিভাগ সময় নেতিবাচক পৰিৱেশৰ মাজত কাম কৰিও দক্ষতাৰে নেতৃত্ব দি আহিছে৷

এই সন্মিলনখনে শীৰ্ষ আৰক্ষী বিষয়াসকলক সমস্যা আৰু প্ৰত্যাহ্বানক এক সামগ্ৰিক দৃষ্টিকোণেৰে চোৱাৰ সুযোগ দিছে বুলি প্ৰধানমন্ত্ৰীয়ে উল্লেখ কৰে৷ তেওঁ লগতে কয় যে সন্মিলনত আলোচিত বিষয়বস্তুৰ প্ৰসাৰ বিগত দুবছৰ ধৰি অধিক ব্যাপক হৈ পৰিছে৷ ইয়ে জেষ্ঠ আৰক্ষী বিষয়াসকলক এক নতুন দৃষ্টিভংগী প্ৰদান কৰিব৷

সন্মিলনৰ গুৰুত্ব ইয়াতকৈও অধিক বৃদ্ধি কৰাৰ বিষয়ত আলোচনা কৰি প্ৰধানমন্ত্ৰীয়ে কয় যে কৰ্ম গোটৰ জৰিয়তে গোচৰসমূহ নিষ্পত্তিৰ দিশে আগুৱাই নিয়া উচিত৷ এই সন্দৰ্ভত তেওঁ বিশেষকৈ যুৱ বিষয়াক জড়িত কৰাৰ ওপৰত গুৰুত্ব প্ৰদান কৰে৷ ইয়ে আৰক্ষীৰ কাৰ্যকাৰিতা অধিক ফলপ্ৰসু কৰিব৷

অবৈধ ধনৰ লেনদেন ৰোধ কৰিবলৈ তথ্য-প্ৰযুক্তিৰ আমদানিৰ ক্ষেত্ৰত সমগ্ৰ বিশ্বৰ সহমত বৃদ্ধি পাইছে বুলি উল্লেখ কৰি প্ৰধানমন্ত্ৰী মোদীয়ে কয় যে এই দিশত সফলতা অৰ্জনত ভাৰতে এক গুৰুত্বপূৰ্ণ ভূমিকা গ্ৰহণ কৰিব পাৰে৷ সমগ্ৰ বিশ্বই এইক্ষেত্ৰত উদাৰতা প্ৰদৰ্শনৰ দৰে আমাৰ ৰাজ্যসমূহৰ মাজতো সুৰক্ষা বিষয়ত অধিক উদাৰতাৰ প্ৰয়োজন আহি পৰিছে৷ সুৰক্ষা বিষয়টো অকলে সমাধান কৰিব পৰা বিধৰ নহয় বুলিও তেওঁ কয়৷ সেইবাবে প্ৰচলিত ব্যৱস্থা ভংগ কৰি ৰাজ্যসমূহৰ মাজত তথ্যৰ আদান-প্ৰদান হ’লে সকলোৱে অধিক সুৰক্ষিত অনুভৱ কৰিব৷

প্ৰধানমন্ত্ৰীয়ে কয় যে চাইবাৰ সুৰক্ষাৰ সমস্যসমূহ তৎকালীনভাৱে মোকাবিলা কৰিব লাগে আৰু ই সৰ্বাধিক প্ৰাধান্য পোৱা উচিত৷ এই সন্দৰ্ভত তেওঁ ছ’চিয়েল মিডিয়াৰ গুৰুত্বৰ কথা বিশেষভাৱে উল্লেখ কৰে৷ অধিক কাৰ্যকাৰিতাৰ বাবে বাৰ্তাসমূহ স্থানীয় ভাষাৰ ওপৰত নিৰ্ভৰশীল হোৱা উচিত৷ মৌলবাদীৰ সমস্যা ৰোধ কৰিবলৈ প্ৰযুক্তি-কৌশল অৱলম্বন কৰিবলৈও প্ৰধানমন্ত্ৰীয়ে আহ্বান জনায়৷

দেশলৈ আগবঢ়োৱা অনবদ্য বৰঙণিৰ বাবে ৰাষ্ট্ৰপতিৰ আৰক্ষী পদক লাভ কৰা আইবি বিষয়াসকলক প্ৰধানমন্ত্ৰীয়ে অনুষ্ঠানত বঁটা প্ৰদান কৰে৷ পদকবিজয়ী বিষয়াসকলক অভিনন্দন জ্ঞাপন কৰি প্ৰধানমন্ত্ৰীয়ে তেওঁলোকৰ ত্যাগ আৰু সেৱাৰ শলাগ লয়৷

কেন্দ্ৰীয় গৃহ মন্ত্ৰী শ্ৰী ৰাজনাথ সিঙৰ লগতে কেন্দ্ৰীয় গৃহ ৰাজ্যক মন্ত্ৰীদ্বয় শ্ৰী কিৰেণ ৰিজিজু আৰু শ্ৰী হংসৰাজ আহিৰো অনুষ্ঠানত উপস্থিত আছিল৷

AKT/HS/MS