Search

ન્યૂઝ અપડેટ

વિષયવસ્તુ પીઆઇબીથી આપમેળે પ્રાપ્ત થાય છે

વસ્ત્ર અને પરિધાન ક્ષેત્રમાં રોજગારીના સર્જન અને નિકાસને પ્રોત્સાહન આપવા માટે વિશેષ પેકેજ


પ્રધાનમંત્રી શ્રી નરેન્દ્ર મોદીની અધ્યક્ષતામાં કેન્દ્રીય મંત્રીમંડળે આગામી 3 વર્ષોમાં વસ્ત્ર અને પરિધાન ઉદ્યોગમાં એક કરોડ નોકરીઓનું સર્જન કરવા માટે સુધાર પેકેજની જાહેરાત કરી છે. આ પેકેજમાં કેટલાક એવા ઉપાયો સામેલ છે જે શ્રમિકોને અનુકૂળ છે અને રોજગારી સર્જન, મોટા અર્થતંત્ર તથા નિકાસને પ્રોત્સાહન આપશે. આ ઉપાયોથી આગામી 3 વર્ષોમાં નિકાસમાં 30 બિલિયન યુએસ ડોલરની સંચયી વૃદ્ધિ થશે અને રૂ. 74,000 કરોડનું રોકાણ થશે.

મોટા ભાગની નવી નોકરીઓ મહિલાઓને મળવાની શક્યતા છે કારણ કે પરિધાન ઉદ્યોગ લગભગ 70% મહિલાઓને રોજગારી પુરી પાડે છે. આ પ્રકારે આ પેકેજ મહિલા સશક્તિકરણના માધ્યમથી સામાજિક પરિવર્તનમાં સહાયક થશે.

જાહેર કરાયેલ પેકેજની મુખ્ય વિશેષતાઓ નીચે મુજબ છે.

ક. કર્મચારી ભવિષ્ય નિધિ યોજનામાં સુધારો.

* ભારત સરકાર રૂ.15000 પ્રતિમાસથી ઓછી આવક ધરાવતા પરિધાન ઉદ્યોગના નવા કર્મચારીઓનો પ્રથમ ત્રણ વર્ષ માટે કર્મચારી ભવિષ્ય નિધિ યોજનાના નોકરીદાતાનો સંપૂર્ણ ફાળો 12 % વહન કરશે.

* હાલમાં પ્રધાનમંત્રી રોજગાર પ્રોત્સાહન યોજના (પીએમઆરપીવાય) હેઠળ સરકાર દ્વારા પહેલાથી જ નોકરીદાતાઓનો ફાળો 8.33 % વહન કરવામાં આવી રહ્યો છે. વસ્ત્ર મંત્રાલય આગામી 3 વર્ષોમાં કર્મચારીના ફાળાના 3.67% વધુ ફાળવશે જે રૂ.1170 કરોડની રકમ હશે.

* ઈપીએફ પ્રતિમાસ રૂ.15000 થી ઓછી આવક ધરાવતા કામદારો માટે વૈકલ્પિક બનાવાશે.

* આનાથી કર્મચારીઓના હાથમાં વધુ પૈસા આવશે તથા ઔપચારિક ક્ષેત્રમાં રોજગારીનું સંવર્ધન પણ થશે.

ખ. ઓવર ટાઈમની મર્યાદામાં વધારો કરવો

* આઈએલઓ માપદંડને અનુરૂપ કામદારો માટે ઓવર ટાઈમના કલાકો પ્રતિ સપ્તાહ 8 કલાકથી વધુ નહીં થાય

* આનાથી કામદારોની આવકમાં વધારો થશે.

ગ. નિર્ધારિત અવધિ રોજગારીનો પ્રારંભ

* ઉદ્યોગની મોસમી પ્રકૃતિને જોતા, પરિધાન ક્ષેત્ર માટે નિર્ધારિત અવધિ રોજગારીનો પ્રારંભ કરાશે.

* કામના કલાકો, મજૂરી, ભથ્થા અને અન્ય વૈધાનિક જવાબદારીઓ સંબંધે એક નિર્ધારિત અવધિ કામદારને કાયમી કામદાર સમાન ગણાશે.

ઘ. એ-ટેફ્સ હેઠળ વધારાનું પ્રોત્સાહન

* આ પેકેજ રોજગારી સર્જનને પ્રોત્સાહન આપનાર તરીકે સંશોધિત ટેફ્સ હેઠળ પરિધાન ક્ષેત્ર માટે નવી સબસિડીને 15% થી વધારીને 25% કરીને ઈનપુટથી આઉટકમ આધારિત પ્રોત્સાહન સુધી લાવીને નવી તકો ઉપલબ્ધ કરાવશે.

* આ યોજનાની એક મુખ્ય વિશેષતા સંભવિત નોકરીઓના સર્જન થયા બાદ જ સબસિડી પ્રદાન કરવાની રહેશે.

ચ. લેવી રિફંડ કવરેજમાં વધારો

* અત્યાર સુધી રિફંડ નહીં કરાયેલ રાજ્ય લેવિઓનું રિફંડ કરવા માટે લાગુ કરાયેલ નવી યોજના પોતાની રીતે એક નવા પ્રકારનું પગલું હશે.

* આ પગલાંથી ટ્રેઝરી પર રૂ.5500 કરોડનો બોજો આવવાની શક્યતા છે પરંતુ આનાથી વિદેશી બજારોમાં ભારતીય નિકાસની પ્રતિસ્પર્ધાત્મકતામાં ઘણો વધારો થશે.

AP/J.Khunt