പിഎം ഇന്ത്യ

നമസ്‌കാരം!
ബജറ്റ് അവതരണത്തിന് മുന്നോടിയായി സഹപ്രവര്‍ത്തരായ നിങ്ങളില്‍ പലരുമായും ഞാന്‍ വിശദമായ ചര്‍ച്ച നടത്തിരുന്നു. ഇന്ത്യയെ വീണ്ടും ഉയര്‍ന്ന വളര്‍ച്ചാ പാതയിലേക്ക് കൊണ്ടുപോകുന്നതിന് ഈ ബജറ്റ് വ്യക്തമായ ഒരു റോഡ് മാപ്പ് അവതരിപ്പിച്ചു. ഇന്ത്യയുടെ വികസനത്തില്‍ സ്വകാര്യമേഖലയുടെ ശക്തമായ പങ്കാളിത്തത്തെക്കുറിച്ചും ബജറ്റ് ശ്രദ്ധ കേന്ദ്രീകരിക്കുന്നു. പൊതു-സ്വകാര്യ പങ്കാളിത്തത്തിന്റെ വ്യാപ്തിയും ലക്ഷ്യങ്ങളും വ്യക്തതയോടെ ബജറ്റ് വിശദീകരിച്ചു. ഓഹരി വിറ്റഴിക്കലും ആസ്തി ധനസമ്പാദനവും ഈ ബജറ്റിന്റെ ഒരു പ്രധാന വശമാണ്.

സുഹൃത്തുക്കളെ,
രാജ്യത്ത് പൊതുമേഖലാ സ്ഥാപനങ്ങള്‍ നിലവില്‍ വന്ന കാലവും രാജ്യത്തിന്റെ ആവശ്യങ്ങളും വ്യത്യസ്തമായിരുന്നു. 50-60 വര്‍ഷം മുമ്പ് രാജ്യത്തിന് അനുയോജ്യമായിരുന്ന നയങ്ങള്‍ ഇപ്പോള്‍ മെച്ചപ്പെടുത്തുന്നതിന് എല്ലായ്‌പ്പോഴും സാധ്യതയുണ്ട്. ഇന്ന്, നാം ഈ പരിഷ്‌കാരങ്ങള്‍ നടപ്പാക്കുന്നതിന്റെ ഏറ്റവും വലിയ ലക്ഷ്യം പൊതു പണത്തിന്റെ ശരിയായ ഉപയോഗം ഉറപ്പാക്കുക എന്നതാണ്.

നഷ്ടം സൃഷ്ടിക്കുന്ന നിരവധി പൊതുമേഖലാ സ്ഥാപനങ്ങളുണ്ട്. അവയില്‍ പലതിനെയും നികുതിദായകരുടെ പണത്തിലൂടെ പിന്തുണയ്ക്കേണ്ടതുണ്ട്. ഒരു തരത്തില്‍ പറഞ്ഞാല്‍, ദരിദ്രര്‍ക്കും പ്രതീക്ഷകള്‍ വെച്ചുപുലര്‍ത്തുന്ന യുവാക്കള്‍ക്കും അര്‍ഹതപ്പെട്ട പണം ഈ സംരംഭങ്ങള്‍ക്കായി മാറ്റിവെക്കേണ്ടിവരികയും അതു സമ്പദ് വ്യവസ്ഥയില്‍ വലിയ ഭാരം വരുത്തിവെക്കുകയും ചെയ്യുന്നു. വര്‍ഷങ്ങളായി നിലനില്‍ക്കുന്നു എന്നതുകൊണ്ടോ ചിലരുടെ പ്രിയ പദ്ധതികളായിരുന്നു എന്നതുകൊണ്ടോ പൊതുമേഖലാ സംരംഭങ്ങള്‍ പ്രവര്‍ത്തിപ്പിക്കേണ്ടതില്ല. പൊതുമേഖലാ സ്ഥാപനങ്ങള്‍ ഒരു പ്രത്യേക മേഖലയുടെ ആവശ്യങ്ങള്‍ നിറവേറ്റുന്നുണ്ടെങ്കിലോ അവയ്ക്കു തന്ത്രപരമായ പ്രാധാന്യമുണ്ടെങ്കിലോ എനിക്ക് ആവശ്യം മനസ്സിലാക്കാന്‍ കഴിയും.
രാജ്യത്തെ സംരംഭങ്ങള്‍ക്കും ബിസിനസുകള്‍ക്കും പൂര്‍ണ പിന്തുണ നല്‍കേണ്ടതു ഗവണ്‍മെന്റിന്റെ ഉത്തരവാദിത്തമാണ്, എന്നാല്‍ ഇന്നത്തെ കാലഘട്ടത്തില്‍ ഗവണ്‍മെന്റ് സംരംഭങ്ങള്‍ നടത്തുകയും അത് സ്വന്തമായി തുടരുകയും ചെയ്യേണ്ടത് ആവശ്യവും പ്രായോഗികവുമല്ല. അതിനാല്‍, ഞാന്‍ പറയുന്നു, ഗവണ്‍മെന്റ് ബിസിനസ് ചെയ്യേണ്ട കാര്യമില്ല. ഗവണ്‍മെന്റിന്റെ ശ്രദ്ധ ജനങ്ങള്‍ക്കായുള്ള ക്ഷേമ, വികസന പദ്ധതികള്‍ യാഥാര്‍ഥ്യമാക്കുന്നതില്‍ തുടരണം. ഗവണ്‍മെന്റിന്റെ പരമാവധി ഊര്‍ജ്ജവും വിഭവങ്ങളും ശേഷിയും ക്ഷേമ പ്രവര്‍ത്തനങ്ങള്‍ക്കായി ഉപയോഗപ്പെടുത്തണം. ഗവണ്‍മെന്റ് ബിസിനസ്സ് ചെയ്യാന്‍ ആരംഭിക്കുമ്പോള്‍ അത് കനത്ത നഷ്ടത്തിന് കാരണമാകുന്നു.

തീരുമാനമെടുക്കല്‍ പ്രക്രിയയില്‍ ഗവണ്‍മെന്റിനു മുന്നില്‍ നിരവധി തടസ്സങ്ങളുണ്ട്. വാണിജ്യപരമായ തീരുമാനങ്ങള്‍ എടുക്കാനുള്ള ധൈര്യം ഗവണ്‍മെന്റിന് ഇല്ല. ആരോപണങ്ങളെയും നിയമപരമായ പ്രത്യാഘാതങ്ങളെയും എല്ലാവരും ഭയപ്പെടുന്നു. അതുകൊണ്ടാണ് എന്റെ ഉത്തരവാദിത്തം ഒരു നിശ്ചിത സമയത്തേക്കാണല്ലോ, കാര്യങ്ങള്‍ നേരത്തേ ഉള്ളതുപോലെ നടക്കട്ടെ എന്ന ചിന്തയുണ്ടാകുന്നത്. പിറകെ വരുന്നവര്‍ ചെയ്‌തോട്ടെ എന്ന ചിന്തയില്‍ ആരും തീരുമാനമെടുക്കില്ല. കാര്യങ്ങള്‍ പഴയപടി തുടരുകയും ചെയ്യും.

അത്തരമൊരു സമീപനത്തിലൂടെ ഒരാള്‍ക്ക് ബിസിനസ്സ് നടത്താന്‍ കഴിയില്ലെന്നും നിങ്ങള്‍ക്കറിയാം. ഇതിന് മറ്റൊരു വശമുണ്ട്. ഗവണ്‍മെന്റ് ബിസിനസ്സ് ചെയ്യാന്‍ ആരംഭിക്കുമ്പോള്‍ വിഭവങ്ങളുടെ വ്യാപ്തി ചുരുങ്ങുന്നു. ഗവണ്‍മെന്റിന് മികച്ച ഉദ്യോഗസ്ഥരുടെ കുറവില്ല, പക്ഷേ അവര്‍ക്ക് അടിസ്ഥാനപരമായി  ഭരണനിര്‍വ്വഹണം നടത്താനും നയങ്ങളും നിയമങ്ങളും പാലിക്കുന്നുണ്ടെന്ന് ഉറപ്പുവരുത്താനും ജനങ്ങളുടെ ക്ഷേമത്തിന് ഊന്നല്‍ നല്‍കാനും ആവശ്യമായ നയങ്ങള്‍ രൂപീകരിക്കാനും പരിശീലനം നല്‍കുന്നു. അവര്‍ക്ക് ഇക്കാര്യങ്ങളില്‍ പരിശീലനം ലഭിച്ചതിനാല്‍ അവര്‍ക്ക് അതില്‍ വൈദഗ്ധ്യവുമുണ്ട്. വളരെക്കാലം ആളുകള്‍ക്കിടയില്‍ പ്രവര്‍ത്തിച്ച ശേഷമാണ് അവര്‍ ഉയര്‍ന്നുവന്നത്. ഇത്രയും വലിയൊരു രാജ്യത്ത് ഇത്തരം പ്രവര്‍ത്തനങ്ങള്‍ക്ക് വലിയ പ്രാധാന്യമുണ്ട്.

ഗവണ്‍മെന്റ് ബിസിനസ്സ് ചെയ്യാന്‍ ആരംഭിക്കുമ്പോള്‍, അത്തരം നല്ല ഉദ്യോഗസ്ഥരെ ആ സ്ഥാനങ്ങളില്‍ നിന്ന് പിന്‍വലിക്കുകയും പുതിയ ഇടത്തേക്ക് മാറ്റുകയും വേണം. ഒരു തരത്തില്‍ പറഞ്ഞാല്‍, അവരുടെ കഴിവുകള്‍ക്ക് മാത്രമല്ല, പൊതുമേഖലാ സ്ഥാപനത്തോടും നാം അനീതി ചെയ്യുന്നു. തല്‍ഫലമായി, വ്യക്തിയെ ദ്രോഹിക്കുകയും സംരംഭം നഷ്ടപ്പെടുകയും ചെയ്യുന്നു. അതിനാല്‍ ഇത് രാജ്യത്തെ പലവിധത്തില്‍ ദ്രോഹിക്കുന്നു. ജനങ്ങളുടെ ജീവിതനിലവാരം ഉയര്‍ത്തുക, ജനങ്ങളുടെ ജീവിതത്തില്‍ അനാവശ്യമായ ഗവണ്‍മെന്റ് ഇടപെടല്‍ കുറയ്ക്കുക എന്നിവയാണ് നമ്മുടെ ഗവണ്‍മെന്റിന്റെ ശ്രമം. അതായത്, ജീവിതത്തില്‍ ഗവണ്‍മെന്റിന്റെ അഭാവവോ സ്വാധീനമോ ഇല്ല.

സുഹൃത്തുക്കളെ,
ഇന്ന്, രാജ്യത്തു കുറച്ചു മാത്രം ഉപയോഗിക്കുന്നതും ഉപയോഗിക്കാത്തതുമായ ധാരാളം സ്വത്തുക്കള്‍ ഗവണ്‍മെന്റിന്റെ നിയന്ത്രണത്തിലാണ്. ഈ ആശങ്ക കണക്കിലെടുത്ത് ഞങ്ങള്‍ ദേശീയ ആസ്തി ധനസമ്പാദന പൈപ്പ്‌ലൈന്‍ പ്രഖ്യാപിച്ചു. എണ്ണ, ഗ്യാസ്, തുറമുഖങ്ങള്‍, വിമാനത്താവളങ്ങള്‍, വൈദ്യുതി തുടങ്ങിയ മേഖലകളില്‍ അത്തരം നൂറോളം ആസ്തികള്‍ വഴി ധനസമ്പാദനം നടത്താന്‍ ഞങ്ങള്‍ ലക്ഷ്യമിട്ടിട്ടുണ്ട്. ഈ ആസ്തികള്‍ക്ക് 2.5 ട്രില്യണ്‍ രൂപയുടെ നിക്ഷേപ അവസരങ്ങളുണ്ടെന്ന് കണക്കാക്കപ്പെടുന്നു. ഭാവിയില്‍ ഈ പ്രക്രിയ തുടരുമെന്ന് പറയാന്‍ ഞാന്‍ ആഗ്രഹിക്കുന്നു. ഗവണ്‍മെന്റ് മുന്നോട്ട് പോകുന്നതു  ധനസമ്പാദനവും നവീകരണവുമെന്ന മന്ത്രം ഉപയോഗിച്ചാണ്.

ഗവണ്‍മെന്റ് ഒരു പ്രത്യേക സ്വത്തിലൂടെ ധനസമ്പാദനം നടത്തുമ്പോള്‍, അത് രാജ്യത്തിന്റെ സ്വകാര്യമേഖലയ്ക്ക് പകരമായിരിക്കും. സ്വകാര്യമേഖല നിക്ഷേപവും മികച്ച ആഗോള സമ്പ്രദായങ്ങളും കൊണ്ടുവരുന്നു. ഇത് മികച്ച നിലവാരമുള്ള മനുഷ്യശക്തി കൊണ്ടുവന്ന് മാനേജുമെന്റിനെ പരിവര്‍ത്തനം ചെയ്യുന്നു. ഇത് കാര്യങ്ങള്‍ കൂടുതല്‍ നവീകരിക്കുകയും മുഴുവന്‍ മേഖലയും നവീകരിക്കുകയും ചെയ്യുന്നു. ഇത് ആ മേഖലയുടെ ദ്രുതഗതിയിലുള്ള വികാസത്തിലേക്ക് നയിക്കുകയും പുതിയ തൊഴിലവസരങ്ങള്‍ സൃഷ്ടിക്കുകയും ചെയ്യുന്നു. മോണിറ്ററിംഗ് പ്രധാനമാണ്. അതിനാല്‍ മുഴുവന്‍ പ്രക്രിയയും സുതാര്യവും നിയമങ്ങള്‍ അനുസരിച്ച് തുടരുന്നതും ആയിരിക്കും. അതായത്, ധനസമ്പാദനം, നവീകരണം എന്നിവയിലൂടെ സമ്പദ്വ്യവസ്ഥയുടെ മുഴുവന്‍ കാര്യക്ഷമതയും നമുക്ക് വര്‍ദ്ധിപ്പിക്കാന്‍ കഴിയും.

സുഹൃത്തുക്കളെ,
ഗവണ്‍മെന്റിന്റെ തീരുമാനങ്ങളെത്തുടര്‍ന്ന് ലഭിച്ച തുക ക്ഷേമ പദ്ധതികളില്‍ ഉപയോഗിക്കാന്‍ കഴിയും. സ്വത്തുക്കളുടെ ധനസമ്പാദനം, സ്വകാര്യവല്‍ക്കരണം എന്നിവയില്‍ നിന്ന് ലഭിക്കുന്ന പണം പാവപ്പെട്ടവര്‍ക്ക് വീടുകള്‍ നിര്‍മ്മിക്കുന്നതിനും ഗ്രാമങ്ങളില്‍ റോഡുകള്‍ നിര്‍മ്മിക്കുന്നതിനും സ്‌കൂളുകള്‍ തുറക്കുന്നതിനും ദരിദ്രര്‍ക്ക് ശുദ്ധമായ വെള്ളം നല്‍കുന്നതിനും ഉപയോഗിക്കുന്നു. സാധാരണക്കാരുമായി ബന്ധപ്പെട്ട നിരവധി സേവനങ്ങളുണ്ട്. സ്വാതന്ത്ര്യലബ്ധിക്കുശേഷം ഇത്രയും വര്‍ഷങ്ങള്‍ പിന്നിട്ടിട്ടും നമ്മുടെ രാജ്യത്ത് ഇത്തരം പോരായ്മകളുണ്ട്. ഇപ്പോള്‍ രാജ്യത്തിന് കൂടുതല്‍ നേരം കാത്തിരിക്കാനാവില്ല.

രാജ്യത്തെ സാധാരണ പൗരന്റെ അടിസ്ഥാന ആവശ്യങ്ങള്‍ നിറവേറ്റുക എന്നതിനാണ് ഞങ്ങളുടെ മുന്‍ഗണന. ഈ ദിശയില്‍ ഗവണ്‍മെന്റ് വേഗത്തില്‍ പ്രവര്‍ത്തിക്കുന്നു. അതിനാല്‍, സ്വത്തുക്കളുടെ ധനസമ്പാദനവും സ്വകാര്യവല്‍ക്കരണവുമായി ബന്ധപ്പെട്ട ഓരോ തീരുമാനവും രാജ്യത്തെ പൗരന്മാരെ ശാക്തീകരിക്കാന്‍ സഹായിക്കും, അത് ദരിദ്രര്‍, മധ്യവര്‍ഗം, യുവാക്കള്‍, സ്ത്രീകള്‍, കര്‍ഷകര്‍ അല്ലെങ്കില്‍ കൃഷിക്കാര്‍ എന്നിവരെയെല്ലാം. സ്വകാര്യവല്‍ക്കരണം കഴിവുള്ള യുവാക്കള്‍ക്ക് മികച്ച അവസരങ്ങളും നല്‍കുന്നു, ഒപ്പം അവരുടെ കഴിവുകള്‍ പ്രകടിപ്പിക്കാന്‍ കൂടുതല്‍ അവസരങ്ങളും ലഭിക്കുന്നു.

സുഹൃത്തുക്കളെ,
എല്ലാ സംരംഭങ്ങളും കാര്യക്ഷമമാക്കുമ്പോള്‍ സുതാര്യത, ഉത്തരവാദിത്തം, നിയമവാഴ്ച, പാര്‍ലമെന്ററി മേല്‍നോട്ടം, ശക്തമായ രാഷ്ട്രീയ ഇച്ഛാശക്തി എന്നിവ നിങ്ങള്‍ കണ്ടെത്തും. ഈ ബജറ്റില്‍ പൊതുമേഖലാ സ്ഥാപനങ്ങള്‍ക്കായി പ്രഖ്യാപിച്ച പുതിയ നയത്തില്‍ ഞങ്ങളുടെ ഉദ്ദേശ്യം വ്യക്തമായി കാണാം.

നാലു തന്ത്രപ്രധാന മേഖലകളില്‍ ഒഴികെയുള്ള എല്ലാ പി.എസ്.ഇകളെയും സ്വകാര്യവല്‍ക്കരിക്കാന്‍ സര്‍ക്കാര്‍ പ്രതിജ്ഞാബദ്ധമാണ്. തന്ത്രപരമായ മേഖലയില്‍ മിനിമം പിഎസ്ഇകള്‍ ഉണ്ടായിരിക്കണമെന്നും നാം വ്യക്തമാക്കിയിട്ടുണ്ട്. വാര്‍ഷിക ഓഹരി വിറ്റഴിക്കല്‍ ലക്ഷ്യങ്ങള്‍ക്കപ്പുറം ഇടത്തരം തന്ത്രപ്രധാന സമീപനമുള്ള കമ്പനികളെ തിരഞ്ഞെടുക്കുന്നതിന് ഈ നയം സഹായിക്കും.

ഇത് നിക്ഷേപങ്ങള്‍ക്ക് വ്യക്തമായ ഒരു റോഡ്മാപ്പും സൃഷ്ടിക്കും. ഇത് എല്ലാ മേഖലയിലും നിങ്ങള്‍ക്ക് പുതിയ നിക്ഷേപ അവസരങ്ങള്‍ സൃഷ്ടിക്കുകയും ഇന്ത്യയില്‍ ധാരാളം തൊഴിലവസരങ്ങള്‍ സൃഷ്ടിക്കുകയും ചെയ്യും. ഇതെല്ലാം വിലപ്പെട്ട സ്വത്താണെന്നും ഞാന്‍ പറയും. ഈ സംരംഭങ്ങള്‍ രാജ്യത്തിന് വളരെയധികം സേവനം നല്‍കിയിട്ടുണ്ട്, മാത്രമല്ല ഭാവിയിലും വലിയ സാധ്യതകള്‍ നിറഞ്ഞതാണ്. മാനേജുമെന്റ് മാറുമ്പോള്‍ യൂണിറ്റുകള്‍ പുതിയ ഉയരങ്ങളില്‍ എത്തുന്നതു നാം പല തവണ കണ്ടു. നിങ്ങള്‍ എല്ലാവരും ഈ സംരംഭങ്ങളെ അവരുടെ ഇന്നത്തെ അവസ്ഥയില്‍ നിന്ന് വിലയിരുത്തരുത്, മറിച്ച് മറഞ്ഞിരിക്കുന്ന ഭാവി സാധ്യതകള്‍ നോക്കുക. അവരുടെ ശോഭനമായ ഭാവി ഞാന്‍ വ്യക്തമായി കാണുന്നു.

സുഹൃത്തുക്കളെ,
ഇന്ന്, നമ്മുടെ സര്‍ക്കാര്‍ പൂര്‍ണ്ണമായ പ്രതിബദ്ധതയോടെ ഈ ദിശയിലേക്ക് നീങ്ങുമ്പോള്‍, ഉള്‍പ്പെടുന്ന നയങ്ങളുടെ നടപ്പാക്കലും ഒരുപോലെ പ്രധാനമാണ്. സുതാര്യത, മത്സരം, മികച്ച പ്രക്രിയകള്‍, സ്ഥിരമായ നയങ്ങള്‍ എന്നിവ ഉറപ്പാക്കേണ്ടത് വളരെ അത്യാവശ്യമാണ്. വിശദമായ റോഡ്മാപ്പ് ഉപയോഗിച്ച് ശരിയായ വില കണ്ടെത്തലിനും സ്റ്റേക്ക്ഹോള്‍ഡര്‍ മാപ്പിംഗിനുമുള്ള ലോകത്തെ മികച്ച സമ്പ്രദായങ്ങളില്‍ നിന്ന് ഞങ്ങള്‍ പഠിക്കേണ്ടതുണ്ട്. എടുക്കുന്ന തീരുമാനങ്ങള്‍ ജനങ്ങള്‍ക്ക് പ്രയോജനകരമാണെന്നും ആ മേഖലയുടെ വികസനത്തിന് സഹായിക്കുമെന്നും നാം കാണണം.

സുഹൃത്തുക്കളെ,

ഡിസംബറില്‍ നടന്ന വെര്‍ച്വല്‍ ഗ്ലോബല്‍ ഇന്‍വെസ്റ്റേഴ്സ് ഉച്ചകോടിയില്‍ പരമാധികാര, ഇന്‍ഫ്രാസ്ട്രക്ചര്‍ ഫണ്ടുകളിലെ നികുതി മെച്ചപ്പെടുത്തല്‍ പോലുള്ള ചില നിര്‍ദ്ദേശങ്ങള്‍ നിങ്ങളില്‍ പലരും മുന്നോട്ട് വച്ചിരുന്നു. ഈ ബജറ്റില്‍ ഇത് അഭിസംബോധന ചെയ്തതായി നിങ്ങള്‍ കണ്ടു. നിങ്ങള്‍ രാജ്യത്തു കാര്യങ്ങള്‍ നടക്കുന്നതിന്റെ വേഗത അനുഭവിക്കുന്നുണ്ടാകണം. പ്രക്രിയകള്‍ വേഗത്തിലാക്കാനും നിക്ഷേപകരുടെ പ്രശ്‌നങ്ങള്‍ വേഗത്തില്‍ പരിഹരിക്കാനും ഞങ്ങള്‍ ഒരു ഉന്നതാധികാര സെക്രട്ടറിമാരുടെ സംഘം രൂപീകരിച്ചു. അതുപോലെ, നിരവധി നിര്‍ദ്ദേശങ്ങളെ അടിസ്ഥാനമാക്കി, ഓരോ ഘട്ടത്തിലും വലിയ നിക്ഷേപകരെ സഹായിക്കുന്നതിന് ഞങ്ങള്‍ ഒറ്റ സ്ഥലത്തു ബന്ധപ്പെടാവുന്ന സംവിധാനവും സൃഷ്ടിച്ചിട്ടുണ്ട്.

സുഹൃത്തുക്കളെ,
ഇന്ത്യയെ ബിസിനസിന്റെ പ്രധാന ലക്ഷ്യസ്ഥാനമാക്കി മാറ്റുന്നതിനുള്ള പരിഷ്‌കാരങ്ങള്‍ വര്‍ഷങ്ങളായി നമ്മുടെ ഗവണ്‍മെന്റ് തുടര്‍ച്ചയായി ഏറ്റെടുത്തിട്ടുണ്ട്. ഇന്ന്, ഇന്ത്യയില്‍ ഒരു മാര്‍ക്കറ്റ്-വണ്‍ ടാക്‌സ് സമ്പ്രദായമുണ്ട്. ഇന്ന്, ഇന്ത്യയിലെ കമ്പനികള്‍ക്ക് മികച്ച പ്രവേശന, ബഹിര്‍ഗമന മാര്‍ഗങ്ങളുണ്ട്. ഇന്ത്യയിലെ പൊരുത്തപ്പെടലുമായി ബന്ധപ്പെട്ട സങ്കീര്‍ണ്ണതകള്‍ തുടര്‍ച്ചയായി മെച്ചപ്പെടുത്തുന്നു. ലോജിസ്റ്റിക്‌സുമായി ബന്ധപ്പെട്ട പ്രശ്‌നങ്ങള്‍ പരിഹരിക്കപ്പെടുന്നു. ഇന്ന്, ഇന്ത്യയിലെ നികുതി സമ്പ്രദായം ലളിതമാക്കുകയും സുതാര്യതയ്ക്ക് ഊന്നല്‍ നല്‍കുകയും ചെയ്യുന്നു. നികുതിദായകരുടെ അവകാശങ്ങള്‍ ക്രോഡീകരിച്ച രാജ്യങ്ങളില്‍ ഇന്ത്യയും ഉള്‍പ്പെടുന്നു. തൊഴില്‍ നിയമങ്ങളും ഇപ്പോള്‍ ലളിതമാക്കി.

സുഹൃത്തുക്കളെ,
ഈ വെബിനറില്‍ പങ്കെടുക്കുന്ന നമ്മുടെ വിദേശ സഹപ്രവര്‍ത്തകര്‍ക്ക് ഇന്ത്യയിലെ പുതിയ അവസരങ്ങള്‍ സംബന്ധിച്ച് ആകാശമാണു പരിധി. എഫ്ഡിഐ നയത്തില്‍ ഇന്ത്യ കൈവരിച്ച അഭൂതപൂര്‍വമായ പരിഷ്‌കാരങ്ങളെക്കുറിച്ചും നിങ്ങള്‍ക്കറിയാം. എഫ്ഡിഐ സൗഹൃദ അന്തരീക്ഷവും ഉലപാദനവുമായി ബന്ധപ്പെടുത്തിയുള്ള ആനുകൂല്യവും പോലുള്ള ആനുകൂല്യങ്ങളും കണക്കിലെടുത്ത് നിക്ഷേപകര്‍ ഇന്ത്യയെക്കുറിച്ച് ആവേശത്തിലാണ്. കഴിഞ്ഞ കുറച്ച് മാസങ്ങളായി എഫ്ഡിഐയുടെ റെക്കോര്‍ഡ് രേഖയില്‍ ഇത് വ്യക്തമാണ്. ഇന്ന്, ബിസിനസ്സ് ചെയ്യാനുള്ള എളുപ്പം കേന്ദ്രഗവണ്‍മെന്റില്‍ മാത്രം ഒതുങ്ങുന്നില്ല. ആരോഗ്യകരമായ മത്സരം നമ്മുടെ സംസ്ഥാനങ്ങളിലും നടക്കുന്നുണ്ട്. ഇത് ഒരു വലിയ പരിവര്‍ത്തനമാണ്.

സുഹൃത്തുക്കളെ,

ഇന്ത്യയെ സ്വാശ്രയമാക്കാനായി ആധുനിക അടിസ്ഥാന സൗകര്യം, മള്‍ട്ടിമോഡല്‍ കണക്റ്റിവിറ്റി എന്നിവയുമായി ബന്ധപ്പെട്ട പ്രവര്‍ത്തനങ്ങളില്‍ ദ്രുതഗതിയിലുള്ള പുരോഗതി ഉണ്ട്. അടുത്ത അഞ്ച് വര്‍ഷത്തിനുള്ളില്‍ നമ്മുടെ അടിസ്ഥാനസൗകര്യം നവീകരിക്കുന്നതിനായി നാം 111 ട്രില്യണ്‍ രൂപയുടെ ദേശീയ ഇന്‍ഫ്രാസ്ട്രക്ചര്‍ പൈപ്പ്‌ലൈനിനായി പ്രവര്‍ത്തിക്കുന്നു. സ്വകാര്യ മേഖലയ്ക്ക് 25 ട്രില്യണ്‍. രൂപയുടെ നിക്ഷേപ ശേഷിയുണ്ട്. ഈ അടിസ്ഥാനസൗകര്യ പദ്ധതികള്‍ രാജ്യത്ത് തൊഴിലും ആവശ്യകതയും പ്രോത്സാഹിപ്പിക്കാന്‍ പോകുന്നു. പല നിക്ഷേപകരും തങ്ങളുടെ ആദ്യത്തെ ഓഫീസ് ഇന്ത്യയില്‍ തുറക്കാന്‍ ഒരുങ്ങുന്നുണ്ടെന്നും ഞാന്‍ മനസ്സിലാക്കുന്നു.

എല്ലാ ചങ്ങാതിമാരെയും ഞാന്‍ സ്വാഗതം ചെയ്യുന്നു, കൂടാതെ ജി.ഐ.എഫ്.ടി. സിറ്റിയിലെ അന്താരാഷ്ട്ര ധനകാര്യ കേന്ദ്രം നിങ്ങള്‍ക്ക് വളരെയധികം സഹായകമാകുമെന്ന് ഞാന്‍ നിര്‍ദ്ദേശിക്കുന്നു. അന്താരാഷ്ട്രതലത്തില്‍ താരതമ്യപ്പെടുത്താവുന്ന നിയന്ത്രണ ചട്ടക്കൂടിനു കീഴിലാണ് കേന്ദ്രം ഭരിക്കുന്നത്. നിങ്ങള്‍ക്കായി പ്രവര്‍ത്തിക്കാനുള്ള മികച്ച അടിത്തറയാണിത്. ഇന്ത്യയില്‍ അത്തരം നിരവധി പ്ലഗ് ആന്‍ഡ് പ്ലേ സവിശേഷതകള്‍ ലഭ്യമാക്കുന്നതിനായി ഞങ്ങള്‍ അതിവേഗം പ്രവര്‍ത്തിക്കുന്നു.

സുഹൃത്തുക്കളെ,

ഈ നീക്കം ഇന്ത്യയുടെ വികസന യാത്രയില്‍ ഒരു പുതിയ അധ്യായം ആരംഭിക്കും. ഇപ്പോള്‍ എടുത്ത തീരുമാനങ്ങള്‍, രാജ്യം ലക്ഷ്യമിടുന്ന ലക്ഷ്യങ്ങള്‍, സ്വകാര്യമേഖലയുടെ മുഴുവന്‍ ആത്മവിശ്വാസവും വര്‍ദ്ധിപ്പിക്കും. ലോകത്തിലെ ഏറ്റവും വലിയ യുവരാജ്യത്തിന്റെ ഈ പ്രതീക്ഷകള്‍ ഗവണ്‍മെന്റില്‍ നിന്ന് മാത്രമല്ല സ്വകാര്യമേഖലയില്‍ നിന്നുമാണ്. ഈ അഭിലാഷങ്ങള്‍ ബിസിനസിന് വളരെ വലിയ അവസരമാണ് കൊണ്ടുവന്നത്.

നമുക്കെല്ലാവര്‍ക്കും ഈ അവസരങ്ങള്‍ ഉപയോഗപ്പെടുത്തി ഒരു മികച്ച ലോകത്തിനായി ആത്മനിര്‍ഭര്‍ ഭാരത് കെട്ടിപ്പടുക്കുന്നതിന് സംഭാവന നല്‍കാം. ഇത്രയധികം പേര്‍ ഇന്ന് ഈ സംവാദത്തില്‍ ഒത്തുചേര്‍ന്നതിന് ഞാന്‍ പൂര്‍ണ്ണഹൃദയത്തോടെ നന്ദി പറയുന്നു. നിങ്ങള്‍ക്ക് രാജ്യത്തെയും ലോകത്തെയും കുറിച്ച് മികച്ച അനുഭവമുണ്ട്. കാര്യങ്ങള്‍ വേഗത്തില്‍ നീക്കാന്‍ നിങ്ങളുടെ നിര്‍ദ്ദേശങ്ങള്‍ ഞങ്ങളെ സഹായിക്കും. ബജറ്റില്‍ വിവരിച്ചിരിക്കുന്ന എല്ലാം, ഗവണ്‍മെന്റിന്റെ നയ ചട്ടക്കൂട്, ഞാന്‍ വിശദീകരിക്കാന്‍ ശ്രമിച്ച പ്രശ്‌നങ്ങള്‍ എന്നിവ നേരത്തേ നടപ്പാക്കുന്നതിന് നിങ്ങളുടെ അടിയന്തിര സഹായവും ഒരു റോഡ് മാപ്പും എനിക്ക് ആവശ്യമാണ്. അതു ഞാന്‍ നിങ്ങളോട് അഭ്യര്‍ഥിക്കുകയാണ്. നിങ്ങളുടെ അനുഭവം, അറിവിനും സാധ്യതകള്‍ക്കും ഇന്ത്യയുടെ പ്രതീക്ഷകളും അഭിലാഷങ്ങളും ഉപയോഗിച്ച് ഒരു പുതിയ ലോകം സൃഷ്ടിക്കാന്‍ കഴിയുമെന്ന ആത്മവിശ്വാസം എനിക്കുണ്ട്. ഞാന്‍ വീണ്ടും നിങ്ങളെല്ലാവരെയും നന്ദി അറിയിക്കുകയും നിങ്ങളുടെ നിര്‍ദ്ദേശങ്ങള്‍ക്കായി കാത്തിരിക്കുകയും ചെയ്യുന്നു.

വളരെയധികം നന്ദി!

കുറിപ്പ്: പ്രധാനമന്ത്രിയുടെ പ്രസംഗത്തിന്റെ ഏകദേശ വിവര്‍ത്തനമാണിത്. അദ്ദേഹം പ്രസംഗിച്ചത് ഹിന്ദിയിലാണ്.