পি এম ইণ্ডিয়া

প্ৰধানমন্ত্ৰী নৰেন্দ্ৰ মোদী আৰু অষ্ট্ৰেলিয়াৰ প্ৰধানমন্ত্ৰী এন্থনী আলবানিজে ২০২৬ চনৰ ৯ জুলাইত মেলব’ৰ্ণত অষ্ট্ৰেলিয়া-ভাৰত চিইঅ’ ফ’ৰাম আৰু অৰ্থনৈতিক পৰিকল্পনা ব্যৱসায়িক অনুষ্ঠানত যুটীয়াভাৱে ভাষণ দিয়ে। ভাৰত আৰু অষ্ট্ৰেলিয়াৰ শীৰ্ষস্থানীয় চিইঅ’ আৰু ব্যৱসায়িক নেতা, আগশাৰীৰ অষ্ট্ৰেলিয়ান ছুপাৰএনুৱেশ্যন পুঁজিৰ প্ৰতিনিধি আৰু প্ৰতিষ্ঠানিক বিনিয়োগকাৰী তথা আগশাৰীৰ অষ্ট্ৰেলিয়াৰ বিশ্ববিদ্যালয়সমূহৰ উপাচাৰ্যসকলে এই দুয়োটা অনুষ্ঠানত অংশগ্ৰহণ কৰে।

      চি ই অ’  ফ’ৰামক সম্বোধন কৰি প্ৰধানমন্ত্ৰী মোদীয়ে উল্লেখ কৰে যে ভাৰতৰ শক্তিশালী অৰ্থনৈতিক বিকাশ, নীতিগত সংস্কাৰ, ডিজিটেল ৰূপান্তৰ আৰু উদ্ভাৱন পৰিৱেশ তন্ত্ৰৰ সম্প্ৰসাৰণে অষ্ট্ৰেলিয়াৰ অংশীদাৰসকলৰ বাবে নতুন ব্যৱসায়িক সুযোগ সৃষ্টি কৰিছে। ভাৰত আৰু অষ্ট্ৰেলিয়াৰ অৰ্থনীতিৰ পৰিপূৰকতাৰ কথা উল্লেখ কৰি প্ৰধানমন্ত্ৰী মোদীয়ে ভাৰতত উৎপাদন, পৰিষ্কাৰ শক্তি, গুৰুত্বপূৰ্ণ খনিজ, খনন, আন্তঃগাঁথনি, নগৰ উন্নয়ন, বিমান পৰিবহণ, ৰচদ পাতি, উন্নত প্ৰযুক্তি, কৃত্ৰিম বুদ্ধিমত্তা, বিত্তীয় প্ৰযুক্তি, খাদ্য প্ৰক্ৰিয়াকৰণ তথা ডিজিটেল অৰ্থনীতি খণ্ডত উপলব্ধ বিশাল সুযোগৰ ওপৰত গুৰুত্ব আৰোপ কৰে। তেওঁ কয় যে ভাৰতৰ পৰিসৰ আৰু অষ্ট্ৰেলিয়াৰ দক্ষতাই এক ইতিবাচক ভৱিষ্যতৰ ইংগিত দিয়ে।

        প্ৰধানমন্ত্ৰী মোদীয়ে অষ্ট্ৰেলিয়াৰ বিনিয়োগকাৰীসকলক ভাৰতত দীৰ্ঘম্যাদী বিনিয়োগৰ সুযোগৰ সুবিধা ল’বলৈ আমন্ত্ৰণ জনায়। তেওঁ ভাৰতত অষ্ট্ৰেলিয়াৰ বিশ্ববিদ্যালয়সমূহৰ বৰ্ধিত উপস্থিতিক আদৰণি জনোৱাৰ লগতে উচ্চ শিক্ষা, গৱেষণা, উদ্ভাৱন আৰু দক্ষতা বিকাশৰ ক্ষেত্ৰত গভীৰ সহযোগিতাই কেৱল দুয়োখন দেশৰ প্ৰতিভাৰ ভৱিষ্যতৰ বাবে সাজু কৰাই নহয়, গোলকীয় সুযোগসমূহ লাভ কৰাত সহায় কৰিব বুলি উল্লেখ কৰে।
          

         চি ই অ’ ফ’ৰামৰ পাছত প্ৰধানমন্ত্ৰী মোদীয়ে অৰ্থনৈতিক পৰিকল্পনা ব্যৱসায়িক অনুষ্ঠানত ভাষণ দিয়ে ।  এই অনুষ্ঠানত উভয় পক্ষৰ দুই শতাধিক চি ই অ’ আৰু ব্যৱসায়িক নেতা উপস্থিত থাকে। ভাৰত আৰু অষ্ট্ৰেলিয়াৰ মাজত স্বাভাৱিক সমন্বয়ৰ কথা প্ৰকাশ কৰি তেওঁ উল্লেখ কৰে যে ভাৰতীয় গণতান্ত্ৰিক মূল্যবোধ, ভাৰত-প্ৰশান্ত মহাসাগৰীয় অঞ্চলৰ বাবে এক উমৈহতীয়া দৃষ্টিভংগী, জনসাধাৰণৰ মাজত স্পন্দনশীল সম্পৰ্ক আৰু শক্তিশালী ৰাজনৈতিক বুজাবুজিৰ ফলত দুয়োখন দেশৰ মাজত ব্যৱসায়িক অংশীদাৰিত্ব বৃদ্ধি আৰু সমৃদ্ধিৰ বাবে ইতিবাচক পৰিবেশৰ সৃষ্টি হৈছে। ২০২২ চনৰ অৰ্থনৈতিক সহযোগিতা আৰু বাণিজ্য চুক্তি (ইচিটিএ) ৰ ওপৰত ভিত্তি কৰি বাণিজ্য আৰু বিনিয়োগ সম্পৰ্কৰ বৃদ্ধিত সন্তুষ্টি প্ৰকাশ কৰি তেওঁ ব্যৱসায়িক সম্পৰ্কক এক নতুন স্তৰলৈ লৈ যোৱাৰ উদ্দেশ্যে প্ৰস্তাৱিত ব্যাপক অৰ্থনৈতিক সহযোগিতা চুক্তি (চিইচিএ) সোনকালে সমাপ্ত কৰিবলৈ আহ্বান জনায । তেওঁ ব্যৱসায়িক নেতাসকলক দুয়োপক্ষৰ পৰিপূৰক শক্তি ব্যৱহাৰ কৰিবলৈ আৰু বিশেষকৈ পৃথিৱীৰ বিৰল উপাদানসমূহ, লিথিয়াম, বেটাৰী, ইলেক্ট্ৰনিকছ, ই ভি, ছেমিকণ্ডাক্টৰ, এ আই আৰু প্ৰতিৰক্ষা যোগান শৃংখলৰ ক্ষেত্ৰত গোলকীয় সমাধান সৃষ্টি কৰিবলৈ আহ্বান জনায়। প্ৰধানমন্ত্ৰী মোদীয়ে লগতে পৰামৰ্শ দিয়ে যে দ্বিপাক্ষিক ব্যৱসায়িক সম্পৰ্ক পৰৱৰ্তী পৰ্যায়লৈ ত্বৰান্বিত    কৰিবলৈ ভাৰতীয় ৰাজ্য আৰু অষ্ট্ৰেলিয়াৰ প্ৰদেশসমূহে তেওঁলোকৰ মূল দক্ষতাৰ ওপৰত ভিত্তি কৰি গতিশীল অৰ্থনৈতিক অংশীদাৰিত্ব গঢ়ি তোলাটো গুৰুত্বপূৰ্ণ। দুয়োখন মঞ্চত হোৱা আলোচনাৰ ফলত সৃষ্টি হোৱা আশাবাদ আৰু অৰ্থপূৰ্ণ ধাৰণাসমূহৰ কথা উল্লেখ কৰি প্ৰধানমন্ত্ৰী মোদীয়ে ভাৰত-অষ্ট্ৰেলিয়াৰ অৰ্থনৈতিক সম্পৰ্ক উন্নত হৈ থাকিব বুলি আস্থা প্ৰকাশ কৰে।

***

MJPS/SS/ST/DD